العملية مش انتحارية يا حكومة وسخة

تحديث:

هههههههههههههههه

كده برضه، وانا اللي قلت عليكم ناس ذوق ومتعاونين

القاعدة رجعت قالت مش احنا اللي عاملينها وقالوا ان دي اكاذيب، وزنوبيا جايبة كذا لنك للتهديدات، وبعدين لبيان بتاع انها مجرد البداية يا شنودة وفي الاول جايبة بقى البيان اللي بيقولوا ان مش هم اللي عملوا كده

ما تلعبوش بينا حرام عليكم، انتوا ما عندكوش اخوات وزراء داخلية؟ ما تقولوا للراجل اي حاجة ربنا ما يوقعكوا في ضيقة.. بس هي زنوبيا زعلانة منهم ليه؟ يعني اقصد لما حد بيوصل للجنان ده بيبقى خارج الحساب يعني، الواحد بيزعل من اللي عشمان فيه او معتبره عنده عقل او اي حاجة يعني

دلوقت انت حتعمل ايه يا عادلي؟ ههههههههههه يا عيني

ساعدوا وزير داخلية عاجز مسكين للعثور على راس الافعى

-------------------

بيان القاعدة اهو.. ووالنبي بقى ماحدش يقعد يطلع ديني ويقول لي ايش عرفك انه موقع القاعدة، كأن القاعدة دي جوز خالته وعارفهم وعارف ان ما تطلعش منهم العيبة

ده الموقع اللي بيتنشر عليه التهديدات في العراق، وبعدها بتتنفذ، وبعدها هو نفس الموقع بينزل تبني اصحاب الموقع ده للعمليات دي، خشوا على الارشيف بتاعه وانتوا تلاقوا عمليات كتير اتنفذت وهم تبنوها

ام السفسطة بقى بتاعة: وايش عرفك ان هم القاعدة

انت ايش عرفك يعني ايه قاعدة اساسا؟ اهم الناس اللي بتعمل الحاجات دي وبتنشرها ومسميين نفسهم دولة العراق الاسلامية باين ولا ايه

المهم الناس ربنا يستر اصلها بتدينا معلومات وياريت الداخلية بدل ما هي محتاسة كده تقرا البيان بتاعهم وتحاول تستوعب هم بيقولوا ايه جاتهم خيبة، بدل ما عمالين يهلوسوا ويقولوا جهات خارجية، وقد تعرفنا عليهم، طلعوا اجانب

جهات خارجية اللي هي ايه؟ اجانب منين؟ وتعرفتوا عليهم اساميهم ايه؟ انتوا ساترين عليهم ما بتحبوش تفضحوا الولايا مثلا؟

العادلي لازم يقال فورا ايه الضعف اللي هو فيه ده؟ مش قادر يعرف مين الجهة ولا مين الشخصيات ولا حتى قادر يطلب مساعدة حد؟

طب القاعدة بتساعده اهي

اولا الجهة الاجنبية: هي تنظيم القاعدة في العراق

ثانيا.. يا عالم يا كدابة، يا كدابة، يا كدابة، يا خايبة يا خايبة يا خايبة، يا فاشلة يا فاشلة يا فاشلة

العملية مش انتحارية يا بهايم

البيان بيقول:

فيسرنا اولا ان نبارك للاخوة المجاهدين الذين نفذوا غزوة الاسكندرية فبورك في سواعدهم وفي جهادهم ونسأل الله ان يحفظهم بحفظه ويجعلهم ثابتين على الحق ويرزقهم الشهادة في سبيله مقبلين غير مدبرين.
بتعرفوا تقروا يا بهايم؟ ولما بتقروا بتفهموا اللي بتقروه؟ اللي نفذوا "غزوة الاسكندرية" لسه عايشين
لسه عايشين
عارفين لسه عايشين ليه؟ عشان لسه ما خلصوش شغل، مش حيفجروا نفسهم الا في اخر عملية لانهم مش حيعرفوا يخرجوا
او يمكن بيتهيالهم انهم مش حيعرفوا يخرجوا، لكن بما انهم جم وشرفونا هنا وعرفوا مدى ضعفكم وخيابتكم، فممكن يخلصوا شغل ويمشوا ويوفروا نفسهم لعمليات تانية تبقى انتحارية في بلاد تانية فيها امن وفيها ناس عندها مخ وبتشوف شغلها
ثالثا:
بالفعل اللي صعد موضوع كاميليا شحاتة هو المسئول عن العملية دي، والكلام اللي قلته بخصوص ان بتوع القاعدة، على اثر موضوع كاميليا شحاتة، افتكروا ان "الاخوة المسلمين" في مصر محتاجين لمساعدتهم بما اننا خايبين بقى ومش عارفين ناخد حقنا من النصارى اللي حاكمين البلد فقالوا يساعدونا يعني... ربنا ينتقم منهم دنيا وآخرة
اسمعوا
ستجدون ان النصارى في مصر قد ارتكبوا الكثير من النواقض لتلك الشروط فهم بذلك ليسوا اهل ذمة اطلاقا.
وكمان
الامر الاخر هو وجوب استنقاذ اسارى المسلمين وهذا امر دليله واضح في الكتاب والسنة


كقوله تعالى : { وَ إِنِ اسْتَنْصَرُوكُمْ فِي الدِّينِ فَعَلَيْكُمُ النَّصْرُ } [ الأنفال : 72 ] ، و ما ثبت في صحيح مسلم و عند أصحاب السنن عن أبي هريرة رضي الله عنه أنّ رسول الله صلى الله عليه وسلم قال : ( المسلم أخو المسلم لا يظلمه و لا يخْذُلُه و لا يحقره ) .


الاخوة بيستجدعوا مع المسلمين في مصر المغلوبين على امرهم
مين بقى ابن الكلب اللي مسئول عن نقل الصورة دي للقاعدة؟


واقع الامر ان فيه اختراع اسمه تنظيم القاعدة في الكون ده، وكلنا عارفين دماغهم وعارفين هم بيفكروا ازاي، بس الظاهر طول السلم يا اهل بلدي سبب عندكم رخاوة في العضلات وتخن في المخ
اللي نقل الصورة دي وجاب لنا تنظيم القاعدة في بيتنا (ها؟ سامع يا مبارك ياللي قلت للامريكان: الديمقراطية بتاعتكوا دي جابت لي حماس على عتبة بابي.. هي حماس عمرها عملت لك حاجة عشان مضايقاك على عتبة بابك؟ اهو ربنا جابلك القاعدة في عبك عشان تعرف ان الله حق) هو المسئول عن اللي حصل، انا مش حاحاسب القاعدة انا، ماهم معروفين وجنانهم معروف وصلاتهم المشبوهة معروفة، انا احاسب اللي جاب لي القاعدة هنا، من اول امن الدولة اللي لعب بملف كاميليا مرورا بالتافهين اللي تظاهروا عشانها (مسلمين ومسيحيين على فكرة) وانتهاء بالمجانين اللي بدل ما يعقلوا الناس شيطوهم
هم دول المسئولين، وعلى راسهم وقبلهم ومحركهم مبارك، ولو كان عايز يوئد الفتنة في مهدها كان عمل كده، لكن اساسا هو اللي عملها ما عملهاش عشان يخمدها


فيا ايها المسلمون اعلموا ان دولة العراق الاسلامية قد وجهت عدة رسائل الى النصارى في مصر من اجل اطلاق سراح اسرى المسلمين المحتجزين عندهم الا ان النصارى قد رفضوا مطالب المجاهدين و اخذتهم العزة بالاثم و ما كان من سبيل اخر امام المجاهدين الا ان يبادروا الى شن عمليات جهادية ضد النصارى حتى يرضخوا لمطالب المجاهدين وليعلم النصارى في العراق ومصر وغيرها انهم في الحكم سواء ومن اراد النجاة فليرينا سعيه الجاد الى اطلاق سراح المسلمين المحتجزين وليتبرأ من افعال النصارى في مصر.


صح.. الناس عداها العيب وحذرتنا واحنا حاكمنا شوية ولاد وسخة مركزين في تزوير الانتخابات وحجب صورة البرادعي وضرب المتظاهرين، مش فاضيين يأمنوا البلد من تهديدات تنظيم القاعدة، مع ان الناس كتر خيرها والله يعني مش بس حذرتنا، دي حذرتنا، وادتنا ديد لاين، وعينت لنا الاماكن اللي حتعمل فيها العمليات، وما كانش ناقص غير تدينا اسماء اللي حينفذوا وصورهم وارقام بطاقاتهم، حيعملوا لك ايه اكتر من كده يا عادلي؟ انت يا موكوس قاعد في انهي داهية؟ انزل انا ادور لك عليهم ولا ايه؟


وبعدين راح ماضي الراجل


ابو سليمان الناصر


من انصار الجهاد العالمي


متشكرين يا حاج.. وعداك العيب والله، انت بريت عتبنا وعملت اللي عليك، احنا اللي ربنا بالينا ومسلط علينا شوية معاتيه ربنا صايبهم في مخيخهم


يعني نعمل ايه احنا دلوقت؟
نعمل ايه؟ نحمي نفسنا ازاي؟ مش كل الاعداء اللي في الدنيا طيبين زي القاعدة كده وحيقولوا لنا خد لك ساتر قبل ما اضربك، فيه ناس حيفتكروا انهم لو قالوا لنا ممكن نعمل حاجة لا سمح الله ولا نأمن نفسنا لا قدر الله
نعمل ايه ياربي؟ كل واحد بقى يأمن نفسه؟ طيب ازاي؟ نروح نأجر مرتزقة من بتوع امريكا يحرسونا؟ ماهم دول برضه مش مضمونين، ممكن يغدروا علينا في اي لحظة
نعمل ايه ياربي؟
نروح فين؟ نروح فين؟


دول مش عارفين حاجة خالص، عشان فيه تلات جثث ما اتعرفوش عليها قاموا افتكروا انها عملية انتحارية، لو كانت انتحارية كان البيان احتسب المنفذ عند الله، انتوا ايه؟ ما بتقروش بيانات؟ ما بتتفرجوش على نشرة الاخبار؟
وبعدين لقوا جثة متفحمة قالوا لقينا افريقي بين القتلى
طب اعمل فيكوا ايه؟ هي الجثث متفحمة ومتقطعة، حتعرف الافريقي من الهندي من االصيني ازاي اعمل فيكم ايه؟ ده كرومبو حيحلها احسن منكم