Sunday, 23 January 2011

بعد بكرة 25 يناير ان شاء الله... قولوا يا رب


للمشتركين يوم 25 يناير:للإبلاغ عن انتهاكات\احتجاز\طلب محامين-الخط الساخن لجبهة الدفاع:
0120624003
0129295510 - 0106701470
صباح الخير على الورد اللي فتح في جناين مصر
صباحكم تونس ومساكم تونس ان شاء الله
بعد بكرة يوم 25.. عارفين في اللحظات دي مين اللي واحشني قوي ومفتقداه؟
محمد السيد سعيد...
وحشني قوي، ومفتقداه، مفتقدة تحليلاته، ومفتقدة روح الامل اللي كان بيبثها فينا، ومفتقدة دوره في يوم بتاع بكرة
مفتقداه فعلا
---------------
طيب
احنا بعد بكرة ان شاء الله نازلين
جزء من اللي نازلين نشطاء.. وجزء مش نشطاء
النشطاء عارفين حينزلوا فين، ويعملوا ايه
وفيه كام حاجة نحب نأكد عليها:
مافيش غير اعلام مصر، ومافيش غير هتافات وطنية
بالاحرى، لا شارة ستة ابريل، ولا صورة عبد الناصر، ولا كاب كفاية، والاخوان مش محتاجين توصية لانهم نازلين بوصفهم افراد، فاكيد مش حيشيلوا شارة الاخوان، ولو مش اكيد، اديني باقول اهو
ماحدش يطلع ندل ويعمل حركة قرعة، واللي يعمل حركة قرعة ينضرب وهو واقف كده
علم مصر، النشيد الوطني او اي اغاني وطنية، هتافات لمصر
المطلب: مبارك يمشي
وباقول للنشطاء اللي نازلين بحماس، كتر خيركم، وده واجبكم مدام الزمتم نفسكوا بحاجة زي دي
بس كل الاحتمالات واردة، وارد جدا ان ماحدش ينزل غيركم، ما تزعلوش، اليوم كده ما فشلش لان الحركة بركة وانتوا عملتوا واجبكم عشان تخلصوا ضميركم قدام ربنا
وارد ان العدد اللي ينزل يبقى قليل.. برضه ما تزعلوش
وارد ان اليوم ينجح، لاني سألت ناس كتير في الشارع ولقيتهم عارفين، لو اليوم نجح والعدد اللي نزل كبير
يبقى مافيش مرواح..
خلينا نتعلم من الاخطاء اللي فاتت، واللي هي اخطاء واحنا ما خدناش بالنا منها لحد ما تونس لفتت نظرنا ليها
احنا كذا مرة كان ممكن يحصل حاجة بس احنا كنا بنروح.. مش بالوم حد، ما انا كنت باروح معاكوا، واحنا مش غلطنا عشان احنا وحشين او مزيفين، احنا بس ما كانش عندنا تصور انه ينفع، ينفع لما ننزل بعدد كبير كده نفضل في الشارع ما نروحش، وما كناش نتخيل انه ينفع اننا نقول مبارك يمشي... طلع ينفع
مدام طلع ينفع، يبقى خلينا ما نقولش اننا غلطنا، خلينا نقول اننا تبينا حاجاتة جديدة واتعلمناها
يبقى احنا خطتنا بكرة حاجة من الاتنين: يا نروح يا ما نروحش
ح نروح في كل الاحوال ما عدا حالتنين
1- ان العدد يكون كتير
2- ان الضرب والاعتقالات تكون كتير
ودي برضه اتعلمناها من تونس.. الضرب والاعتقالات بتنفع مش بتضر... اتضح كده، بس على حسب جدعنة الناس
لو الضرب والاعتقالات كتير.. ماحدش يروح، قاعدين في الشارع وحاجة من الاتنين
يا يلموا كل اللي في الشارع، وفي الحالة دي حيلاقوا نفسهم لموا الفين تلاتلاف على الاقل وتبقى فضيحة دولية واستفزاز للناس
يا يطلعوا اللي لموهم
ومش حنجري من الضرب.. ودي برضه اتعلمناها من تونس، ويبقى حاجة من الاتنين، يا يضربونا كلنا وتبقى فضيحة دولية ويبقوا بينتحروا رسمي، يا يبطلوا ضرب
والله العدد قليل، ومافيش اعتقالات، ومافيش ضرب، يبقى نعمل الشويتين بتوعنا ونروح
ما كانش يبقى احنا قاعدين مش ماشيين
حنركز بقى مع الاندال عشان ان شاء الله لما ننجح ماحدش يرجع يقول كان مضغوط عليا.. احنا قلبنا مش ابيض بقى زي التونسيين كده.. ههههه ولو انهم قلبهم مش ابيض قوي يعني
في كل الاحوال يوم 25 نجح خلاص.. لانه سمع في كل حتة والنشطاء في كل حتة في العالم العربي معانا
----------------
اللي مش نشطاء
والله انت وجدعنتك بقى
انا حاتعامل مع اكتر ناس خايفة دلوقت لان دول اللي يهموني اكتر من الناس المستبيعة - والمستبيعين اللي مش مسيسين كتير - الناس اللي خايفة:
زي ما اتفقنا، حتنزل مع صحابك، اتنين.. تلاتة.. خمسة.. زي ما تحب
وتمشي في الشارع، انشالله شارع بيتكم، تاخد الشارع من اوله لاخره رايح جاي، بص دي اقل حاجة ينفع تعملها، مافيش اقل من كده، مش حاقدر اقولك تدلدل السبت من الشباك
حتمشي في الشارع وتوقف الناس تتكلم معاهم، تتكلم معاهم عن الغلب والفقر والناس اللي حرقت نفسها، لو حد قالك دول كفرة قول له طبعا.. ما الجوع كافر.. والظلم كافر.. والقهر كافر.. وطبيعي الناس تكفر.. والناس دي ما ولعتش في نفسها عشان تكفر، الناس دي ولعت في نفسها عشان عندها امل اننا نبقى زي تونس، يعني مش منتحرين، لان الانتحار يأس، وهم مش يائسين، هم عندهم امل
وبدل ما نستنى لحد ما الناس تحرق نفسها عشان تحركنا، لازم نتحرك من نفسنا ويبقى عندنا دم
وتحاول تعرض على كل حد بتتكلم معاه انه يمشي معاك وقول له انك مش مسيس وانك بتخاف زي ما هو بيخاف، ومش عايز مشاكل زي ماهو مش عايز مشاكل، وما نفسكش تتسجن، ولا تنضرب، انت عايز بلدك تبقى كويسة بس، وتغني اغاني وطنية
انا عارفة اننا بشكل عام مش بنحفظ اغاني وصوتنا وحش ههههههههه، خلاص، نغني النشيد الوطني عشان ده الوحيد اللي حافظينه، ومش محتاج حد مطرب ولا حاجة
لو تقدر تشيل علم مصر على كتفك يبقى كتر خيرك، يا اخي لو ظابط كلمك قول له باشجع المنتخب يا باشا
وعايزة اقولكم حاجة
مافيش ظابط مصري حيضرب نار عليك.. صدقني.. انا متأكدة ان ظباط الامن المركزي اقصى حاجة يعملوها انهم يضربوا بالشوم، مش حيضربوا نار
وانا واثقة ان لو جالهم امر ضرب نار مش حينفذوا
ايه رأيكم بقى؟
ما تتخانقش مع الظابط.. لو جه كلمك كلمه زي ما بيكلمك.. اه.. كلم ظابط الشرطة، قول له:
كل سنة وانت طيب.. نازل يوم اجازتك، بتقبض كام عشان تنزل تتذنب كده وتحمي ناس بتمص دمك ودمي وتوقعنا في بعض
على فكرة انا جربتها ونفعت.. جربتها في التشريفات لما ظباط الشرطة بيوقفونا عشان الوزير يعدي، لما كنت باتخانق معاهم كانوا بيعملوا رد فعل دفاعي وبيتعصبوا، لكن لما كنت باقولهم: اللي معدي ده المفروض يخدمني ويخدمك، مش يذنبك في الحر والبرد عشان هو يعدي كأنه ابن ناس واحنا ولاد كلب، والناس بتفش غلها فيكم مع انكم متضررين زي ما احنا متضررين، انت وانا بندفع له مرتبه من ضرايبنا ونقف له عشان هو يعدي، ليه؟ على فكرة كانوا بيعملوا رد فعل يفاجئك، مش بس العساكر، الظباط كمان، الظباط كمان طلعوا قرفانين
الناس كلها قرفانة
طبعا الظابط حيسمع منك الكلمتين وما يردش، مدام ما ردش يبقى موافق على كلامك، بس حيقولك: طب بس امشي من هنا عشان ده غلط عليا وانا اللي حاتئذي.. امشي من قدامه وروح حتة تانية، ما تروحش، وارجع اعمل اللي كنت بتعمله، تكلم الناس، وتحاول تضمهم عليك، وتغنوا اغاني وطنية
احنا نقدر على فكرة.. نقدر على حاجات كتير.. بقالهم من ساعة ما ثورة تونس نجحت وهم عمالين يكتبوا لنا في الجرايد ويقولوا لنا في التلفزيون: الصراحة راحة يا روحي وانت ما بتعرفش
لا احنا بنعرف.. وحنوريهم

11 comments:

lastcrazyboys said...

المــلك .. وحـدوتـــــة تونسيــة

كنت عملت الفيديو ده اهداء لثورة الياسمين

لو ركزنــا .. ختمت الكليب بالمشهد اللي كان السبب في الانتصــار

واحد باشا said...

قوم يامصري مصر دايما بتناديك

خد بنصري نصري دين واجب عليك

يوم ماسعدي راح هدر قدام عنيك

عيد لي مجدي اللي ضيعته بإيديك

شوف جدودك في قبورهم ليل نهار

من جمودك كل عضمة بتستجار

فين آثارك ياللي دنست الأثار دول فاتولك مجد وانت فوت عار

ليه يامصري كل احوالك عجب

تشكي فقرك وانت ماشي فوق دهب

مصر جنة طول مافيها انت يانيل عمر ابنك لن يعيش ابدا ذليل

يوم مبارك تم لك فيه السعود حب جارك قبل ماتحب الوجود

ايه نصارى ومسلمين قال ايه ويهود

دي العبارة نسل واحد م الجدود

شفت أي بلاد يامصري في الجمال

تيجي زي بلادك اللي ترابها مال

نيلها جي السعد منه حلال زلال

كل حي يفوز برزقه عيشته عال

يوم مبارك تم لك فيه السعود حب جارك قبل ماتحب الوجود

ايه نصارى ومسلمين قال ايه ويهود

دي العبارة نسل واحد م الجدود

عُقاب said...

و الله يا نواره وليكي عليا و على اللي خلفوني حلفان طبعا

انا في الانتخابات اللي فاتت كنت بطالب الاخوان اللي انا منهم نبطل نقول شعارات خاصه

على فكره انا كلمت اهلي و مش هسافر

هما حسوا بنفخ شديد و قعدوا يزلوني بالكام برطوش اللي هيخسروا بس انا اصريت

باركيلي

karima said...

ربنا معاكم ومعانا ...واجمل شيء يا استاذة نوارة انه فيه تجربة ناجحة ونافعة وهي التجربة التونسية لذا لا يوجد اي عذر لاي مواطن انه يتخلف عن واجبه وحقه ..تحياتي

utopia said...

طوارئ بمطار القاهرة لفحص 59 طرد ذهب وعملات أجنبية


http://gate.ahram.org.eg/News/34252.aspx
شكلهم هايسيبونا عالحديدة يا نوارة

Sutty and Betty said...

اتعلمنا حاجات من الإسماعيلاوية زمان، كانوا بيعملوا دمية تمثل المندوب السامي البريطاني "إلنبي" ويحرقوها في شم النسيم، وعملوا إلنبي على شكل ناس كتيرة منهم نتنياهو ، ليه منعملشي دمية ضغننة في حجم القلم الجاف على شكل رموز الفساد ونولعها بعود كبريت واحد

ghyboba said...

d

أبو هاجر said...

ست الكل ما أروعك
نعم ما أروعك وما أوفاك وما أصدقك وما أصدق كلامتك .لقد كان محمد السيد سعيد مفكرا كبيرا ورجلا عظيما. لقد كنت أكن له الكثير من الاحترام والتقدير و التبجيل كنت أتابع اسهاماته الفكرية وإبداعاته في البديل .لقد كنت متواضعة لما قلت في مقال الدستور أنا من الأشخاص غير الموصوف لهم الحب ، لأن من تتذكر في هذا المنعطف التاريخي محمد السيد السعيد ، من تقول بكلمات دافئة ،واحشني ومفتقداه .هذا أكبر من الحب يا النوارة
ولأننا في أجواء ومناخ الثورة التي يباح فيها الغزل، بل يصبح مستحبا أقول لك بمنتهى الصدق والإعجاب،أنت قطعة شهد ،أنت الشهد كله

المشخصاتي said...

تفتكري يا نوارة دلوقتي الوضع احسن ولا زي 6 ابريل ..انا محتاج اي امل

mohammed said...

أخر توجيهات للعقيد عمر عفيفى لأماكن التظاهر و تحركات الجموع يوم 25 يناير يوم غضبة المصريين و تحيا مصر برجاء النشر على أوسع نطاق

http://www.justin.tv/taghyeer_dot_net/b/278136912

kiki said...

و الله يا نوارة الراجل عمر عفيفي ده انا خايف منه و حاسس انه بتاع كلام و بس... او اسوأ... خلينا نشوف حيوصلنا لفين