Thursday 27 January 2011

بكرة ماتش الفاينال ان شاء الله.... قولوا يارب.. مالناش غيره

تحديث:
اللي عارف يدخل على الفيس بوك او التويتر والنبي ياخد البوست ده عند الناس بتاج 
#jan25
وحيث انه ماتش الفاينال، فانا مش عايزة حركات المنتخب
يعني ايه مش عايزة حركات المنتخب، يعني مش عايزة الثقة بالنفس الزايدة اللي بتخسرنا الماتشات، احد اسباب نجاح ماتش الثلاثاء ان كل واحد كان نازل وهو فاكر ان غيره مش نازل، لدرجة ان اللي اتفقوا مع بعض كانوا مخونين بعض
ودي اشارة كويسة، اشارة ان الشعب المصري مش تبع الرايجة ولا حاجة زي ما بيقولوا علينا، واشارة ان كل اللي نزلوا نازلين وهم عندهم تصور ان اليوم حيفشل بس "انا نازل اعمل اللي عليا".. بالظبط كده
ماحدش يقول: ما كل الناس نازلة... لان كل الناس نازلة دي حتؤدي الى "هي جات عليا"؟ 
اه.. جات عليك.. كل واحد نازل يعمل الواجب اللي عليه ومالوش دعوة غيره نازل ولا مش نازل
بصوا بقى.. هالله هالله عالجد والجد هالله هالله عليه
ما عادش ينفع دلوقت اي تراجع، مش شعارات، لا.. دي مصالح، النظام المصري مزنوق زنقة الكلاب، وعلى رأي العيال اللي كانوا بيهتفوا النهاردة وامبارح: ساكت ساكت ساكت ليه؟ انت مت ولا ايه؟ 
ساكت لانه مش عارف يقول ايه؟ هو طول عمره ماشي معانا بالمبدأ الشهير اللي قاله في التسعينيات على الملأ: "هو كل ما الشعب يعوز حاجة نعملها له؟" كأننا في الجيش
ولو طلع دلوقت قال لنا هو كل ما الشعب يعوز حاجة نعملها له حيسخن الناس اكتر.. كمان دي انتفاضة الجمال فعلا، خلاص
يعني مثلا انت لما تقعد خمس سنين تهمل مراتك، تقولك عايزة اغير الانتريته، تطنشها، عايزة اخرج واتفسح زي الستات، تطنشها، قول لي بحبك، تطنشها، وهي ساكتة ساكتة ساكتة، وتيجي بعد خمس سنين تقولك طلقني خلاص... ما ينفعش بقى ساعتها تقول لها: انت قولتي لي عايزة الانتريه لونه ايه؟ طب ايه رأيك في حديقة الازهر؟ اغنيلك اغنية احب احبك واعيش لحبك؟
خلاص يا عم... خلاص.. الكلام ده كان من خمس سنين، دلوقت الست بتقولك طلقها... طلقها... 
مبارك حيعمل ايه؟
لا الراجل في زنقة ربنا يوريها لكل حاكم عربي ويختمها لهم جميعا بأغنية "أنا فهمتكم.. أي نعم.. فهمتكم"
الحاجة الوحيدة اللي في ايده يعملها دلوقت انه يحاول يقسم صف الشعب.. ودي حتبقى محاولة يائسة، هو لعبها قبل كده كتير ونفعت معاه، بس دلوقت التوقيت كيك اخر حاجة، يعني اخر حاجة حيحاول يعملها انه يدي امتيازات فئوية لبعض فئات الشعب، اغلب الظن حتبقى العمال، وممكن المسيحيين (اللي فضل ينحر فيهم ودمهم ساح اكتر ما ساح في الحروب مع اسرائيل)، او النخب السياسية، الاحزاب بقى ولا الحركات، عشان يقسم الصف ويبقى فيه ناس تانية تطلع لنا فجأتن وتقول: يا جماعة نحاول نستمع لصوت العقل، احنا مهما كان مش عايزين فوضى، ثم ايه البديل؟ السؤال الوسخ ده اللي قعدنا في العبودية عشرات السنين
احنا مش عايزين بديل، هو مش انتي بايوتك، احنا عايزين نظام، نظام ديمقراطي، شريف ونزيه، واستقلال، لو جبت قرد وقعدته على كرسي الرئاسة في بلد قانون ودستور محترم ومؤسسات مستقلة حيعرف يدير البلاد احسن من "بديل الزعامة" مش عايزين زعامة احنا
دي اخر حاجة في ايده يعملها
احنا حنعمل ايه؟
ولما باقول احنا، باقول الشعب المصري، كنت زمان باخاف اقول احنا الشعب المصري على اساس اني مش واخدة توكيل منه وما اعرفش بالظبط هو عايز ايه، بس دلوقت اقدر بالفم المليان اقول احنا الشعب المصري، ايوة، احنا احنا احنا
احنا اللي ماشيين في شارع الهرم دلوقت وهم بيقولوا: الشعب يريد اسقاط النظام
احنا.. احنا اللي كل راجل في الخمسين الف يجري على اي بنت بتنضرب ويحجز عليها من غير ما يلمسها وينزل الضرب على ضهره
احنا.. احنا.. احنا... اللي مسكنا اكياس عشان نلم فيها الزبالة اللي واقعة على الارض
احنا الشعب المصري مش حنتفرق، ومش حينفع نتفرق، والاصوات اللي حتطلع تنصحنا باننا نستمع لصوت العقل حتنضرب بالجزم القديمة
ليه بقى؟ 
1- لأننا فعلا طلعنا شعب محترم وقطع لسان اللي يقول علينا اي حاجة تانية
2- لأن لو حصل وحد دماغه زقزقت.. احنا كده بنتتحر، بنتتحر ليه، لأننا صعدنا الخناقة بينا وبين النظام، وهو صعد وقتل لنا 12 شهيد، اي تراجع حنتشنير.. احنا والنظام وصل بينا الامر ان بقينا يا احنا يا هم
لو مش احنا.. يبقى هم، ولو بقوا هم، النظام ده حينتقم مننا انتقام الجبابرة على اللي عملناه فيه التلات ايام اللي فاتوا.. خلاص، ما عدش فيها كسوف ياما اعملي معروف، لو نجح النظام، لا قدر الله، في انه يشق الصف المصري، ويستقطب بعض الفئات من خلال امتيازات معينة كل الشعب، بما فيه الفئات المعينة، حنتعلق في الحيط ونتثبت بالشنيور
من غير الدخول في خلافات كتيرة سياسية، خلينا نفتكر ان 18 و19 يناير اللي كانت انتفاضة جياع فعلا، وما كانش فيها اي عداء لشخص السادات نفسه، السادات احتواها وبعدين راح هوب كلوب ضارب كل المصريين على دماغهم في ضربة انتقامية
انتوا بتتعاملوا مع ظباط جيش... مش مع شيوخ تصوف، لو رجعنا في كلامنا او نزلنا سقف طلباتنا او اتقسمنا النظام حياخدنا على حجره وبعدين يعجنا عجن عشان يضمن اللي بدر منا في الايام اللي فاتت عمره ما يطلع ابدا 
(انا عايزة افهم مين كل الناس اللي بتتصل بيا دي وانا باكتب البوست؟ انا حاقفل التليفون) 
الى جانب ان فيه عنصر شخصي، مبارك زعلان، فيه ما يزيد عن ميتين الف مواطن مصري في مختلف المحافظات قالوا له: ارحل بقى يا عم، خلي عندك دم... ومبارك اصلا ما بيحبناش، قبل كده قال علينا همنا على بطننا ودماغنا فاضية، وابواقه قالت علينا ما عندناش كرامة، من ضمنهم عبد المنعم سعيد... يعني هو اصلا قرفان منا، وابنه قرفان منا، واحنا بلغناه بشكل واضح ان القرف متبادل
لو رجعنا خطوة حينتقم منا ويدعك مناخيرنا في الرصيف
فاكرين احداث المحلة والعلاوة؟ المحلة وقعوا صورته، راح طالع وادانا علاوة، وتاني يوم العلاوة رفع سعر البنزين، ودي كانت حاجة محدودة، ما بالك اتفاجئ ان الشعب المصري عنده الجرأة انه يبجح فيه ويقول له امشي؟
الخلاصة: عدم تراجعنا مش شجاعة مننا.. عدم تراجعنا خوف على مصلحتنا.. احنا حنتدهك.. رسمي نظمي فهمي، بما فينا الفئات اللي سيتم استقطابها
الامن حيعمل ايه؟
والله الامن راخر خلاص، مافيش في ايده حاجة يعملها، الامن مش نايم بقاله تلات ايام
حاجة من الاتنين، يا اما يتعاطف معانا، ويبقى صاحبي وحبيبي وكفاءة
يا اما يتغابى علينا.. يا ريت.. عشان اعصرك تنزل قوانين طوارئ صغيرة 
لو الامن تعاطف معانا يبقى بينجد نفسه من انه يتحط تحت محاسبة ويا ريت يتعلم من درس الامن التونسي اللي حايح دلوقت وعمال يقول انا كان مضغوط عليا
لو اتغابى على الناس، يبقى بيخلص الليلة لصالحنا بقى، ومش حنضطر نقعد نستنى انا فهمتكم.. حتخلص واحنا واقفين
احتمال انه يسلط بلجية ده حاصل بالفعل، بس البلطجية دول ولا يسووا تلاتة نكلة، يتحلق عليهم وياكلوا ضرب لما يبان لهم صاحب بقى
المسلمين حيعملوا ايه؟
حتاخد تلاتة اربعة صحابك وتروح اقرب جامع لبيتكوا (مش اقل من تلاتة وحاقولك ليه)، احنا المرة دي مش عايزين نحدد مساجد، احنا عايزين نتوزع في مصر كلها وعلى كل الجوامع لان ده حيرهق الامن، بدل ما الامن يحاصر جوامع بعينها، تبقى جوامع مصر كلها فيه على الاقل تلاتة اربعة غاضبين، اول ما الصلاة تخلص حتطلع وتهتف بعزم ما فيك: الشعب يريد اسقاط النظام، زمايلك حيقولوا وراك، التلاتة اللي حيقولوا وراك، حيشجعوا اتنين تانين، اللي حيشعجوا بدورهم خمسة تانيين.. مش اول ما تهتف وما يقولش وراك غير صحابك تسكت، تهتف تاني، وتالت، ورابع، وعاشر، لحد ما تلاقي اكبر عدد بيهتف وراك وتمشوا مع اللي هتفوا معاكوا وتتجمعوا في اقرب ميدان
ولازم لازم لازم، تتفق مع واحد على الاقل، صاحبك مسيحي يستناك برة الجامع قال يعني بيشرب سيجارة جنب الكشك، مش حتروح من غير واحد مسيحي
المسيحيين حيعملوا ايه؟
مش انا يا منسي حاسبت على ازازة الزيت اللي الحاجة كانت شارياها؟ 
مش احنا جينا وحاوطنا الكنايس؟ انتوا كمان حتعملوا نفس الحكاية، حتقف عند الجامع تحمي المسلمين بدل ما يعايروك بقى ويقولوا لك العدوان الثلاثي سنة ستة وخمسين يا زواوي كان بسبب اني تضامنت معاك في عيد الميلاد
صاحبك حيطلع مع التلاتة اربعة صحابه (ياريت لو صحابك كتير تبقى فل ويبقوا اكتر من اربعة) واول ما يهتفوا تندس وسط المصلين وتروح قايل معاه
بالنوسبة للبراشوتات والمزايدين على البراشوتات
اي حد عايز ييجي يبرشت على الانتفاضة الشعبية اهلا وسهلا ومرحبا ييجي يشرفنا ويآنسنا وينورنا ضيف علينا
اسمعوني بقى، احنا مش لازم نلفظ البطانة، ومش لازم كمان نسمح لهم انهم يركبوا علينا، يعني زي ما التوانسة عملوا بالظبط، البراشوتات السياسية هبطت عليهم، ماحدش قالهم اطلعوا برة، بس قالوا لهم قشطة.. تعالوا ورايا
بالظبط كده، البراشوتات السياسية اهلا وسهلا، وييجوا ورا الناس، مش قدامهم، ماحدش فيهم قيادة، وماحدش فيهم زعيم، وما حدش فيهم مطرود كمان، متضامنين ومنضمين واهلا وسهلا ويمشوا ورا الناس والناس هي اللي تسوقهم وتحدد لهم مسارهم، لان اساسا البراشوتات السياسية دي لو اخدت قياد الامور حتسلمنا مع اول مساومة مع النظام، لازم يتزنقوا كده واي رخاوة في نبرتهم تقابل بالتلطيش على وشهم، ويتقال لهم انتوا مالكوا؟ انت جاي تعزي ولا جاي تهرج؟ جاي تتضامن مع الناس وتسمع كلام الناس اهلا وسهلا، جاي تعمل على قفانا زعيم على الست الوالدة بقى
بالنسبة للمزايدين على البراشوتات: مالكوش دعوة.. يوقع محفظته مطرح ماهو عايز، مش عايزة انا واحد يطلع يصوت لي في قناة تبع رجل اعمال ويقول لي "كانوا فين الاخوان؟ كان فين البرادعي؟ دلوقت افتكرتوا الناس؟" مالكش دعوة، على قلبنا عسل.. يوقع محفظته مطرح ماهو عايز، الناس هي اللي حتسوقهم وهي اللي تحدد لهم مسارهم، وهم مش قيادات، هم تابعين للشعب، وخليك في نفسك يا كابتن، احنا عايزينهم، عشان يا امور احنا مش حنسيب خناقتنا مع النظام ومطلبنا العادل ونتخانق مع الاخوان والبرادعي، الناس جاية تضامن معانا، وجاية تسمعنا وتمشي ورانا... كتر خيرهم، خليك بقى انت في نفسك 
عندي امل يا رب يتحقق:
قبل ما ننزل من البيت، الساعة عشرة الصبح، كل الناس تطلع من الشباك وتقول بعزم صوتها: الشعب يريد اسقاط النظام
لو سايق عربية تعملها نغمة كلاكس عايزة كل عربيات مصر تضرب الكلاكس ده
اخيرا:
قولوا يا رب.. قولوا يا رب.. قولوا يا رب

70 comments:

العبيد الجدد said...

رجاء محاولة تصوير وجوة الظباط والمخبرين الذين يقومون بضرب المتظاهرين ونشرها على اوسع نطاق ليتم محاسبتهم بعد هروب النظام

متغربه said...

يا رب يا رب يا رب

edisa said...

كلامك صح معدش ينفع نتراجع
وكل واحد لازم يعزم انها واقفه عليه

محمد نور الدين said...

ست الكل مساء الخير
غدا قد يكون يوم فاصل، لكنه لن يكون الفينال وهذا حديث طويل. كل ما أقوله الله معكم
تحياتي الصادقة

Unknown said...

ياااااااااااااااااااااااا رب

edisa said...

خلاص حطيطه ع الفيس بو بتاعك

http://www.facebook.com/#!/pages/ktabat-nwart-njm/113026295390924

watan said...

يا رب يا نوارة يا رب

عيوننا عليكو وقلوبنا معكم
وجرحنا من جرحكم وفرحنا من فرحكم

تصبحوا ع حرية

torero said...

خلى بالك يخلص بكرة
يخلص بعده
المهم انه يخلص والا الحكومة هتفرتك الشعب ده اللى ما بيحمدش ربنا على الفقر

watan said...

نوارة في اسم صفحة معينة بتحبي نحط رابط الموضوع عليه؟

د. هشام إبراهيم said...

لفتح الفيس البوك و التويتر ادخل على هذا الرابط
http://hotspot-shield.software.en.softonic.com/download?gclid=CK7Bjfal26YCFQY65QodiH231w
د.هشام إبراهيم

Moataz Medhat said...

ياريت الناس تحط الأعلام في البلكونة، خصوصا انه ماتش النهائي.

و جامد جدا موضوع الكلاكسات ده

Empress appy said...

شيرت على الاتنين

Moataz Medhat said...

و ياريت يا نواره نعمل حملة نداءات للظباط، انضم لإخواتك المصريين.

أيا كان نتيجة بكرة - و إن شاء الله خير - اللي هيلوث ايده بدم أهل بلده هيعيش متعذب بقية عمره، و بعد عمره ما يخلص.

Unknown said...

ايش هي المواقع الممنوعة في مصر علشان نساعدكم؟؟

utopia said...

يااااااااااااااااااارب
خليك معانا يااااااااارب
(ان تنصروا الله ينصركم ويثبت اقدامكم)
صدق الله العظيم

ان كان الرب معنا فمن علينا

ياارب

Sotouhi said...

أنا اللى هيبصلى بكره على إنى مسيحى هنط فى كرشه. أنا بكره مصرى و بس...بلا مسلمين بلا مسيحيين بلا شماتة الحكومة فينا

utopia said...

برنا مج صغير لفك الحجب
حمله....سطبه....شغله...وادخل على اى موقع هايشتغل

http://www.ultrareach.com/

بس النت بقى بطىء فشخ
شكلهم هايقطعوه ولا ايه؟؟؟

amina said...

سلالالالالالالالالام
ربنا معاكم يا نوارة و قلبنا و دعائنا لكم من المغرب و ان شاء الله يكون غدا الجمعة هو المتمم لحكم حسني مبارك لا اعاده الله عليكم, على ان يكون السبت هو غرة مصر جديدة
و منصورة يا مصر منصورين يا مصريين و الطيارة للسعودية بتحمي
بالتوفيق

mado said...

new design الشعب يريد إسقاط النظام

Unknown said...

يارب ..............الشعب يريد اسقاط النظام

Adel hassan elokaby said...

ياريت نحافظ على البلد بلاش اى تخريب دى بلدنا واى خسارة نحن سوف نتحملها بعد هروب اللصوص
من غرائب الدنيا ان تحمى الشرطة اللصوص وتترك اصحاب الحق عجبى
حسبى الله ونعم الوكيل
لازم لازم نحاول معرفة الضباط والمخبرين المشاركين فى الغدر ونعمل بعد كدا لوحة نحط فيها زبالة مصر الخونه

Unknown said...

نوارة أرجوكي خللي الهتافات لمصر و حرية مصر ابعدوا عن هتافات اسقاط النظام لأن ده حيستفز الشرطة و حيخلي ناس كتير تنفر لكن لو هتفنا لمصر حنكسب ناس كتير قوي

خللي شعار واحد لينا كلنا و ليكن كاقتراح

مصر حتفضل غالية عليا
و لو لقينا استجابة من الأمن معانا في صفنا و بعد ما نتجمع نضيف عليه مش حنسيبها للحرامية

تخيلي معايا لو كل الناس داخلة ميدان التحرير من كل اتجاه و كلهم بيهتفوا هتاف واحد يبقي هو شعار ثورتنا ده حيخلي الناس اللي منزلتش تتهز من جوة و ينزلوا أرجوكي ادرسي الموضوع ده

edisa said...

في برنامج لتغيير الايبي فعال جدا اسمه هوت سبوت
ود رابط التحميل من ميديا فاير

http://www.mediafire.com/?h0zjiqdmivm

إبن شهيد said...

حيقطعوا خطوط الموبيلات وألنت بكره لو فى حد معاه أجهزة أتصال أو "واكى تاكى" ياريت يجيبها معاه ولو مش نازل المظاهره يديها لواحد نازل و ياريت لو حد معاه جهاز راديو متطور من إلى بيعمل "سكان" علشان نعرف مكالمات الشرطه

بأقترح: حمل لافتات مكتوب عليها أيات من القرآن أو الأنجيل مما تتوعد بعقاب من يؤذى أخوته فى الدين مثل " لَئِن بَسَطتَ إِلَيَّ يَدَكَ لِتَقْتُلَنِي مَا أَنَاْ بِبَاسِطٍ يَدِيَ إِلَيْكَ لَأَقْتُلَكَ إِنِّي أَخَافُ اللّهَ رَبَّ الْعَالَمِينَ" ملا مانع من أضافة " إِنِّي أُرِيدُ أَن تَبُوءَ بِإِثْمِي وَإِثْمِكَ فَتَكُونَ مِنْ أَصْحَابِ النَّارِ وَذَلِكَ جَزَاء الظَّالِمِينَ"

Amal said...

ماذا يحدث في مصر ؟؟
ساعة ولا في بوست جديد من مصر على التويتراو النت

قلوبنا معكم

حنــان said...

يا أبطال مصر ربي ينصركم و يثبتكم
نحن معكم , والله من قبلنا
يارب انصر الثورة فى مصر يااااااااااااارب
اللهم انصر اخواننا المصرين وثبتهم
اللهم أنصرهم كما نصرتنا
اللهم امين

خارجين معاكم غدوا ان شاء الله نتظاهر قدام السفارة المصرية في تونس
انطلاقا من الساعة 11 صباحا وهذا اقل شيئ يمكننا فعله من تونس حاليا

ربي معاكم ينصركم و يحميكم
منصووورييييييييين
ياااااااارب

Anonymous said...

ربنا معكم

مصر قبلة الوطن العربي كانت ولا تزال ولو أفل نجمها في عهد مبارك هاهي تعود

حـنــّا السكران said...

نوارة, اشتقتلّك يا عظيمة:
لو قطع النت عندك و عايزة توصّلي أي كلام و تنشريه ,ابعتيلي رسالة على موبايلي و أنا بتّصل فيك فورًا و أنقل ما تريدين نشره باسمك .
عاشت مصر ,وعاش الشعب الحرّ في مصر .

Mustafa Mustafa said...

A translation of this post is available @ http://goo.gl/vYcgc
Brought to you by
twitter.com/Jan25Live
Facebook: http://goo.gl/mrtq8

نفرو said...

خطوط الديال أب .. جربوها ..خاصة أن لسه الأرضى شغال .. فيه أمل فى فك حصار الإنترنت
لأن شركات مغمور للإنترنت فى مصر لسه شغالة على شركة النور وشغال زى الفل
شوفوا الأرقام دى على الأرض
أى حد فى مصر يجرب معنديش أرضى للأسف
ده لينك فيه كل الأرقام
http://www.amcham.org.eg/Egypt%20section/FreeInternet.asp
اعملوا شير وأى حد يجرب
http://www.amcham.org.eg/Egypt%20section/FreeInternet.asp
http://www.amcham.org.eg/Egypt%20section/FreeInternet.asp
www.amcham.org.eg

Unknown said...

يارب يانوارة يارب

Unknown said...

انا شيرتة على الاتنين

Unknown said...

ربنا يحميكم يا نوارة كان نفسي اكون معاكم في مصر
ويمكرون ويمكر الله
والله خير الماكرين
اللهم رد كيدهم الي نحورهم
اللهم انصرنا عليهم

Unknown said...

we can change and we will.

Dr. Imad M. Rashid Abu Shehadah said...

ضغطة زر واحدة .. طريقة بسيطة جدا لفتح الفيس بوك رغم الحجب .. وتصلح لمتصفحى النت من خلال الكمبيوتر أو الموبايل.. فقط اضغط على الرابط التالى
www.lisp4.facebook.com
وتنتهي المشكلة

دكتور كويتي said...

الله ينصر الشعب المصري البطل
عاوزين قلب العالم العربي ينبض مرة تانية
تحياتي من الكويت

noora said...

لا لا لا التراجع يعتبر انتحار للشعب وراح تخذلون كل الشعوب العربيه اللي بتنتضر نصركم .
وياليت تحاولوا تمنعوا محاولات التخريب والسطو والنهب
لانها تشوه صورة الثورة والشعب
الله معاكم والموضوع رح نعمله تاج في الفيس بوك والتويتر

elmo said...

الساعات الاخيرة في حياة النظام ..... الجيش سيرفض اطلاق الرصاص على المصريين

قارئة said...

ارجوكم قولونا نعمل ايه أحنا عايشين برة مصر قلوبنا ودعاءنا معكم معكم بدموعنا وأرواحنا لكن لازم يكون في حاجة نعملها غير الفرجة والانتظار

Unknown said...

يا جماعة الناس تحمي الممتلكات
المتحف المصري
البنوك
السفارات
مش عاوزين مجموعة بلطجية الحزب الوطني يخربوا الثورة

ياسمين حميد said...

أعرف أنه لا يمكنكِ قراءة تعليقي الآن بسبب قطع الانترنت
ولكن أحببت أن أقول:

أنا معكم بقلبي، ربنا يوفقكم

وجميع أهل اليمن معكم


تحياتي

ويكا said...

نواره
عاجل

انتى موجوده ؟؟؟؟

عايز ابلغ الناس هناك حاجه مهمه

ولو موجوده حاولى تنشرى بين الناس كلها والاهالى يتواصل مع عيالهم اللى فى الجيش كلهم

ويحرموا عليهم انهم يؤذوا اى حد او يقفوا ضد الثوره

الشباب اللى فى الجيش كلهم زينا مش موظفين مش مبسوطين بل بالعكس
باقى فكرتى مفهومه اكيد

ارجوا التنفيذ والنشر فى كل مكان

Moataz Medhat said...

إن شاء الله مبروك يا نوارة، و ربنا يتمها على خير، و ترجعي لنا بالسلامة.

عموما شرفناكي على التويتر
و قفل من كتر التويتات عن مصر و الثورة

Unknown said...

http://www.islam-nogodbutallah.blogspot.com/
هاااااااااااااااااام وعاجل

Gihan said...

Nawara, my name is Gihan I'm egyptian and I live in the US. I know that the internet was cut off in egypt since friday. In this article http://www.debka.com/article/20590/

it says that mohamed hussien tantawi was in the US meeting with obama. From reading the article you will know that unfortunately the military is not on the people's side. I was happy at first just like the protesters when the military appeared on the streets. However I started to wonder, why did mubarak not dare make an appearance until after they took charge of the streets? Also the military in Egypt since Nasser has always been loyal to the president. I really don't mean to disrespect them but that is the truth.
I'm praying for you all the time. Please don't end the riots until MUBARAK LEAVES.
ربنا ينصركم و يحمي مصر و المصريين

karima said...

ربنا معاكم وربنا ينصركم ان شاء الله ..نحن متتبعين ...ومتأملين وحالمين اليوم لكم وغدا لنا ان شاء الله ...

Al Jareedah said...

من الضروري أن تشكل الإنتفاضة المصرية إدارة مؤقتة (أشبه بحكومة ظل) تشمل كل أطياف المعارضة وهدفها ١)قيادة الشعب في مرحلة تغيير النظام ٢)تكون خميرة حكومة موءقتة فيما بعد تشرف على إنتخابات حرة.يجب عدم المراوحة أو فقدان زمام المبادرة.خصوصاً بعد الإدارة الماكرة للأزمة من قبل النظام. (عاشق لمصر)

taima said...

مصر الحبيبه تعود من جديد تحيه اجلال واكبار لارواح الشهداء والف تحيه لشعب مصر قلوبنا معكم ونحبكم وندعو لكم دائما ربنا ينصركم ويوقف معكم ويارب احمي نواره اختي الحبيبه واحمي كل مصري واحمي ام الدنيا يا رب يا رب ...مصر في قلب فلسطين ربنا معكم

Abeer Soliman said...

http://www.facebook.com/event.php?eid=137150873014161&notif_t=event_wall#wall_posts

karima said...

قلوبنا معكم ودعواتنا تسبق دموعنا

ربي ينصركم ...ولكن طمنونا عنكم

ولاء نابلسي said...

نحن معكم, وهنا القاهرة..

د. المطالع بن الكتاب said...

الرجاء احترام القراء والكتابة بالفصيحة لاننا لسنا في بسطة خضار

Unknown said...

بصي انا بقرالك من سنين وبيعجبني كتير من كلامك و لاوني ساعات باتخض من شوية الفاظ صعبة بتقوليها بس انا اول مرة اعلق عليكي لان من ساعة ما النت قطعت و انا ما بطلتش تفكير فيكي قلقانة عليكي و مبسوطة و فخورة و يتهيالي لو شفتك في الشارع حاخدك بالحضن و اقولك وحشتيني ربنا يحفظك و يحفظ مصر انا في امريكا وطلعت مظاهرة بس حاجة شيك كده و البوليس واقف يحمينا الواحد كان مكسوف ان انتوا بتتبهدلوا واحنا اخرنا ان صوتنا يتبح

حـنــّا السكران said...

http://www.youtube.com/watch?v=QLrS9yU7A_A

Rasha said...

where are u Nawara, I'm so worried about u. try to give some notification about you. please I'm really worried. Rabna Maakoy.

w.h said...

قلوبنا معكم ودعواتنا أيضاً أستمروا فى أنتفاضتكم ، فقضايا الشعوب الحيه لا تموت ، أشد على ايديكم ، لا يكسرنكم هذا الزمن الرمادى ، ثمه فى نهايه النفق ضوء نهدهد به تعبناالكبير، ضوء يحملنا الى عرش الحريه ، الى لذه الأنتصار ، ليفرح جميعنا حينئذٍِ ولو فى شارع مظلم فى مُدننا العتيقه ، يغدو ملعبنا الوحيد ، نحميه ونجعله منبراً جديداً للحريه ، قضيه قديمه أمنا بها مذو خلقنا ، بعدها سننتصر ، سننتصر ولو بعد حين ،

w.h said...

قلوبنا معكم ودعواتنا أيضاً أستمروا فى أنتفاضتكم ، فقضايا الشعوب الحيه لا تموت ، أشد على ايديكم ، لا يكسرنكم هذا الزمن الرمادى ، ثمه فى نهايه النفق ضوء نهدهد به تعبناالكبير، ضوء يحملنا الى عرش الحريه ، الى لذه الأنتصار ، ليفرح جميعنا حينئذٍِ ولو فى شارع مظلم فى مُدننا العتيقه ، يغدو ملعبنا الوحيد ، نحميه ونجعله منبراً جديداً للحريه ، قضيه قديمه أمنا بها مذو خلقنا ، بعدها سننتصر ، سننتصر ولو بعد حين ،

Sosso said...

Ettament 3aliki ya Nawwaret il intisaar sootik menawwer el jazeera .
2olobna ma3akom men Paris.

Abu Ziad said...

ربنا معاكم ودعواتنا معاكم...ويا ريتني معاكم لولا أني في خارج مصر وكنت زمان بكرها وبلعنها ( أقصد النظام ) وكنت بهاول أبعد اكتر وأكتر عنها لكني اليوم نفسي اسيب كل حاجة وأرجع أقف مع إخواتي وأدوس على ارضها بكل ثقة وأجأر ضد الظلم زيهم...ربنا معاكم

osa said...

ألله ينصركم على هذا الفرعون الطاغي

chello said...

يا رب !
قلوبنا معكم .. احييتوا الحياة :)

chello said...

يا رب !
قلوبنا معكم .. احييتوا الحياة :)

chello said...

يا رب !
قلوبنا معكم .. احييتوا الحياة :)

chello said...

يا رب !
قلوبنا معكم .. احييتوا الحياة :)

ahmed el labban said...
This comment has been removed by the author.
ahmed el labban said...

ربنا يحميك يا نوارة يا بنت الشاعر الكبير احمد فؤاد نجم وبمناسبة ان انتي بتدخلي قفشات الافلام في مقالاتك احب اقول لك


ينصر دينك يا استاذ نوارة

Unknown said...

بجد مش همدح فيكى بس بيعجبنى جدا كلامك للجزيره وبجد لو مكنتش فى محافظه بعيده عن القاهره بتحسر لانى مش معاكم ربنا ينصركم وان شاء الله هينصركم المشكله ان فيها ناس كتير نتيجه الاعلام الفاسد بقو على قناعه ان ده الامان للبلد وانه لو مشى البلد هتبوظ حتى الكلام والاقناع لا يجدى معاهم اتمنى بجد انكم تفضلو مصابرين علشان دم الشهدا وتعبكم ما يروحش هدر ياريت لو نقدر يكون لينا اى دور ممكن نلم فلوس ونبعتها للناس اللى عايشه فى الميدان مش عارفه بس لو ينفع نعمل اى حاجه

إبراهيم عبد المعطي said...

أرجو وضع لافته يسقط النظام في كل شرفة ( بلاكونه )

إبراهيم عبد المعطي said...

ارجو وضع لافته يسقط النظام في كل بلاكونه

Muhammad Abdel-Kader said...

شهادة للتاريخ.
يا ريتني كنت معاكوا بجد.
ربنا يحفظك ويكتر من أمثالك ويرزقنا الوعي.