انا ما باحبش الادانات

امبارح كتبت على التويتر اني مش قابلة ادانة من الجماعات السلفية وياريت يسكتوا ويحاولوا ينسونا انهم موجودين في الدنيا شوية

وبعدين فكرت انهم ممكن يكونوا بيدينوا عشان خايفين يتهموا، خصوصا انه باين جدا ان النظام محتاس وماعندوش ادنى فكرة عن اي حاجة ومش عارف اي حاجة في الحياة، باين جدا من كلمة مبارك، قعد يقول جهات خارجية، وانا باقرا التقارير، وراس الافعى، وديل القطة، ووزير الداخلية مختفي، وبيان الداخلية مضحك، الخلاصة هم في حالة لا يرسم لها فعلا

they are clueless 

خالص، وقابضين على 17 واحد اقطع دراعي من لغلوغه ان كان فيهم واحد له اي صلة بالعملية، ومدام محتاسين كده يبقى حيطبشوا، لان الحادث مفزع، حتى للي بيكرهوا المسيحيين، فكرة سيارة مفخخة في شارع مصري ده حادث مفزع والمصريين مش حيقبلوه لأنهم دفعوا اتمان غالية قوي عشان يبقوا في امان، وهزأوا نفسهم، وقبلوا حاجات ماحدش يقبل بيها، وخلوا شكلهم وحش.. المهم يعني، اتبهدلوا قوي عشان ماعندهمش استعداد انهم يبقوا زي العراق ولا حتى زي الجزائر ايام التفجيرات.. خالص، فلما بعد ده كله يحصل تفجير شبه تفجيرات العراق، لو النظام ما عرفش مين اللي عمل كده وجاب الحكاية من مصارينها، الله اعلم رد فعل الناس حيبقى عامل ازاي

من ناحية تانية المسيحيين حاسين انه: لا بقى.. مش كده يعني، ما تسيبونا في حالنا انتوا عايزين منا ايه؟ احنا كنا عملنا لكم ايه عشان ده كله؟ كفرتونا وقرفتونا ونازلين فينا شتيمة، ولما حد فينا يعمل شغل وينجح قاعدين باصين له في فلوسه، ولما نبني كنيسة تقلبوا علينا الدنيا، وعلى طول تاهمينا في امريكا، واحنا لو مع امريكا كنا غورنا من وشكوا وسيبناها لكم مخضرة ولا كانت امريكا عرفت تحمينا من البهدلة واحنا واكلين الخرا وساكتين واخرتها حتعملونا زي مسيحيين العراق؟ اشمعنى احنا اللي بنتبهدل كده؟

والمسلمين كمان في حالة لا يرسم لها

شوية يقولوا الاسلام بريء، وشوية يقولوا احنا اسفين، وشوية يقولوا ما الناس بتموت في كل حتة، وشوية يقولوا لا ده مش استهداف للمسيحيين ده استهداف لينا كلنا

المهم يعني في حالة من الله اكبر في اللا مؤاخذة يعني عند كل الناس، والكل خايف ومحتاس

بس الحقيقة اللي شاركوا في الفتنة الطائفية انا مش قابلة منهم اي ادانة

الحاجة الوحيدة اللي ممكن تتقبل منهم هو الاعتذار

وبروح امهم بقى يبطلوا يقولوا الموساد وجهات خارجية شوية، عشان ده لا يعفي من المسئولية بالعكس ده يعمق المسئولية ويحطهم في خانة الخيانة العظمى

لو اللي عمل كده الموساد، ده معناه ان كل اصحاب الخطاب الطائفي، بداية من عباد النصارى، وانتهاء بـ: المسيحيين عندهم اسلحة واختنا وفاء قسطنطين واختنا كاميليا، اللي هو العوا بدون ذكر اسماء

ده معناه ان كل دول عملاء للموساد، لانهم زرعوا خوف داخل المسلمين من المسيحيين، وقعوا يقولوا لهم دول بيستقووا بالخارج، ودول عندهم سلاح، ودول عندهم الاسد في البدروم بياكل الاخوات اللي بيسملوا، لحد ما بقى عند المسلمين احساس بالرعب من المسيحيين، وانهم طابور خامس، وان الكنيسة دولة جوة الدولة، والمسيحيين عندهم صيدليات ومحلات صاغة وكلوا البلد

العملية دي نتيجة طبيعية للوضع ده، سواء اللي عمل كده واحد من المسلمين اللي شحنهم السلفيين واكد كلامهم العوا

او يكون اللي عمل العملية دي الموساد مستغلا ان المسلمين مشحونين بالخرا ده وهم اول ناس حيتشك فيهم  انهم عملوا كده

او تكون القاعدة فعلا، سمعت العوا والسلفيين وشافت مظاهرات كاميليا وقالت لك اخواتنا في الاسلام في مصر محتاجين مساعدتنا

المهم ان اللي خلق الحالة دي بين المسلمين وخلاهم يا اما يطلع منهم تصرف زي ده، يا اما يليق عليهم ان يطلع منهم تصرف زي ده بسبب حالتهم

اللي عمل كده مش مسموح له يدين انا اسفة

ومش مقبول منه ادانة.. ما تقتلش القتيل وتمشي في جنازته

اللي عمل كده مقبول منه الاعتذار والاعتراف بانه اخطأ وانه ما كانش لازم يسترزق على مواجع الناس بالطريقة دي ويخاطر بأمن البلد كلها

فاتوحة السيارات المفخخة لو اتفتحت في مصر قولوا على نفسكم يا رحمن يا رحيم.. شوفوا العراق

ملزوم سليم العوا يعتذر ويحمل نفسه المسئولية، وملزومة الجماعة السلفية تعتذر وتتحمل مسئوليتها

كمان ملزومة الكنيسة تسيب الناس في حالها

انا مش عارفة صح اني اقول الكلام ده في الجو الملتهب ده ولا لا، بس حاقوله

حالة المحاوطة اللي عاملاها الكنيسة بتضفي نوع من السرية على المسيحيين بتخوف المسلمين وبتخليهم يتخيلوا اهازيع في دماغهم مالهاش اي اساس، وعشان كده كان سهل جدا ان يتم شيطنتهم والتشكيك فيهم وفي وطنيتهم واتهامهم بالتبعية لامريكا اللي بيؤدي في النهاية الى استحلال دمهم بما انهم جواسيس بقى

وسبحان الله يعني، في وثائق الويكيليكس، ما لقتش مسيحي ياخويا واحد راح السفارة الامريكاني، كل الجواسيس اللي راحوا السفارة الامريكاني يشحتوا ويدلوا بمعلومات كانوا مسلمين

لكن الحقيقة مدارس الاحد اللي البابا شنودة عملها، وهي عبارة عن انه اخد عيال المسيحيين يلعبهم مع بعض عشان ما يلعبوش مع المسلمين، يخشوا نادي الكنيسة عشان ما يخشوش نوادي "المسلمين" يتكلموا مع بعض، عشان ما يتكلموش مع المسلمين

القفلة دي قالقة المسلمين ومحسساهم ان المسيحيين بيتوشوشوا عليهم وبيقولوا اكيد كلام وحش قوي، امال مش عايزينا نسمع ليه؟ اشمعنى احنا بنقول كل حاجة في الميكروفون؟ اشمعنى احنا مكشوفين في كل حاجة وهم متداريين؟ مالهم ملمومين كده وبيتودودوا .. ايه اللي وراهم؟ امريكا بتتكلم عليهم ليه؟ اكيد ضاربين صحوبية معاها.. هم حيجيبوا لنا الاحتلال زي ما حصل في العراق، هم مش بيكرهوا اسرائيل .. اكيد بيحبوها... ااااه، شفتوا بشوي قال ايه؟ بيقول البلد بلدنا، يعني عايزين يمشونا، بيتعاملوا معانا على اننا احتلال، يبقى اكيد عايزين يا يغيروا لنا دينا يا يقتلونا.. والخيالات بقى تشتغل، السلاح والاسود والسحر وتفة القسيس اللي في القربان

ما كل ده عشان الكنيسة رابطاهم وحابساهم وعازلاهم، مخبيهم ليه يا قداسة البابا شنودة؟ هم عيب؟ طلعهم في الشمس، طول ما انت مخبيهم بتسهل على الطائفيين انهم يخوفوا المسلمين منهم، والانسان بيكره اللي بيخاف منه

هو مخبيهم عشان خايف عليهم: اقلية دينية، عايشة وسط اغلبية وممكن بسهولة يتم استقطاب الاقلية انها تسيب دين الاقلية وتدخل في دين الاغلبية عشان حياتها تبقى اسهل، فراح قافل عليهم بالمفتاح ، بس قفلة المفتاح دي هي اللي حتقضي على الاقلية المسيحية في مصر، لانهم حيطفشوا بسبب الجو العدائي

الحقيقة انا لو بايدي الامر الغي مدارس الاحد، لانها بتكرس للطائفية والخوف، اقول حاجة كمان؟ 

اقول واجري على الله:

ما ينفعش الاطفال الصغيرين في الكنيسة يتقري عليهم اسماء ناس ويتقال لهم دول الشهداء اللي قتلهم المسلمين: زي النهاردة من الف سنة مات مش عارفة مين قتله مسلم.. انت كده مش بتساعد انت بتعقد، لان ده بينمي احساس عند المسيحيين ان مافيش امل، الناس دي وحشة عشان هم مسلمين، وعشان هم مسلمين يبقى مافيش امل في اي حاجة تتعمل، لان مش المشكلة خطاب طائفي ممكن يتغير بالمشاركة، المشكلة اساسا ان المسلمين مخلوقين في الحياة، فاحنا بقى نلم على بعض كده لحد ما ربنا يطلعنا منها على خير

انا مش حاخش في مناقشات تاريخية واقول ان دي رؤية منقوصة للتاريخ لأن ده مش وقته، لكن انت ليه عايز تعيش المسيحي في خوف ويأس وتشيله مرارات قديمة لا هو ولا المسلمين اللي حواليه مسئولين عنها؟ 

بس ارجع واقول ان ده بسبب ان التاريخ القبطي مش بيدرس في المدارس، فطبيعي ان الكنيسة حتقول وجهة نظرها اللي شايفة الامور من جانب واحد

وبعدين المرارة واليأس والخوف والاحساس بأن المسلمين هم كده وحشين عشان لابسهم شيطان واحنا بندعي لهم ربنا يهديهم، ده بينتقل للمسلمين وبيقدروا يتعرفوا عليه حتى لو المسيحي ما قالوش، فيقوم المسلم يخاف هو راخر، وييجي ناس تقول له الحق بيقسموا السودان والمسيحيين عايزين كده

لا المسيحيين المصريين لهم حتة تانية غير مصر، ولا المسلمين المصريين يقدروا يكملوا بالكميات المهولة دي من الادرينالين النابع من شعورهم المستمر بالخوف ، وما ينفعش الناس تفضل خايفة من بعضها كده

ثم احنا محتاجين المسيحيين الشرقيين في الظرف الحالي، وحسن نصر الله قال فيه خطة لإخلاء المنطقة من المسيحيين الشرقيين 

وطبعا ده خدمة جليلة لصالح اسرائيل

ليه بقى؟

احنا عارفين ان اسرائيل مهتمة قوي بالدي ان ايه، وعمالة تحاول تثبت اي ادلة على ملكيتها للارض، بتدور على اثار تاريخية مش لاقية، عمالة تعمل تحليل دي ان ايه، بيخرم معاها

فبتحاول تدعم فكرة ان العرب دول غزاة للدول المجاورة وان المسلمين الموجودين دول مش سكان اصليين دول مهاجرين زينا زيهم

وحاولت بالفعل -  من خلال مؤسسات امريكية - تعمل تحليل دي ان ايه عشان تثبت اختلاف المسلمين عن المسيحيين في المنطقة ما عرفتش، ولو كانت اثبتته كانت حتهيص، بس بما انها ما عرفتش، بقى الدليل الوحيد على ان الغالبية المسلمة هم من السكان الاصليين، هو المسيحيين، لازم يخفوا الدليل ده بقى، يموتوا، يطفشوا، المهم الدليل ده يختفي، عشان يبقى المسلمين قصاد الاسرائيليين، اختلاف الدي ان ايه بتاعهم عن بعض لا يعني شيء لو اعتمدوا ونشروا وروجوا لنظرية ان المسلمين اصلهم من الجزيرة وهم مهاجرين مش سكان اصليين، بل وكمان طفشوا السكان الاصليين

بس ده مش معناه ان كل حاجة تقول الموساد، وكل حاجة تقول اسرائيل عشان تعفي نفسك من المسئولية

اسرائيل ما ضربتش شيوخ السلفية على ايدهم عشان في الميكروفون في صلاة الجمعة ينزلوا شتيمة في النصارى عباد الصليب

الموساد ما جندش العوا عشان يقول ان المسيحيين عندهم سلاح بلا بينة

ولا جند كمان بيشوي عشان يقول المسلمين مش اهل البلد واحنا صحاب البلد

صحيح الموساد بيعمل شغل استخباراتي كويس قوي عشان يعرف يحفز المحركات الرئيسية للاتجاهات اللي هو عايزها، بس لما يبقى الكبار بيتلعب بيهم وبيتغرر بيهم وينجروا لقلة عقل.. تلوموا ليه على الصغيرين لما يجروا البلد لكارثة؟

اللي غلط يعتذر

ويتحمل مسئوليته

ويصلح اخطاءه

وكفاية اللي حصل لنا.. وما تعتمدوش على مبارك ومقاطيره كتير.. الراجل محتاس ومش عارف يعمل ايه، ولو انه غذا الطائفية واهي فرقعت في وشه