Sunday, 16 January 2011

مبادرة

اتصل بيا خالد عبد الحميد وصحاني وقل منامي كالعادة، وقال لي احنا عاملين مبادرة، اتصلي باي رقم تونسي وهنيه على الحرية واشكريه على انه ادانا امل
انا اتصلت بواحدة في الجنوب وقالت لي يعيشك يعيشك الحمد لله وشالله العقبى لكم... فرحانة، فرحانة بجد، اخدت تهنئتي بشكل طبيعي كأنها عروسة :) كنت متوقعة انها تبقى خايفة، تستغرب، لكن لقيتها بتتلقى التهنئة كأنه يوم فرحها بالظبط
الكود بتاع تونس 
00216
وبعدين اي تمن ارقام
انا حطيت الكود واتصلت بنمرة بيتي هههههههه طلعت لي الست دي من جنوب تونس
الجزء الجنوبي هو اللي ثار الاول.. وانا فرحت ان المكالمة جه بختي في الجنوب


انا باتفرج دلوقت على الجزيرة، غسان بن جدو تونسي، وراشد الغنوشي، وعبد الباري عطوان
رائع بن جدو والغنوشي، بس عبد الباري عطوان بيقول ان شاء الله تبقى زي ثورة اتنين وخمسين؟ فال الله ولا فالك يا اخي
تف من بقك، انا مش ضد ثورة اتنين وخمسين في وقتها، من تمانية وخمسين سنة، دلوقت ما تنفعش، ثم يعني دي ثورة شعبية على ابوها، ثورة شعبية زي ما الكتاب بيقول، من غير قيادات ولا زعامات 
والحقيقة انا عايزة اقدم خالص احترامي للاتجاهين الاسلامي والعلماني التونسيين، للأسباب الاتية
1- بالرغم من انهم اتأخروا في دعم الثورة بس كده احسن، انا ما اعرفش هم عملوا كده بالعمد، ولا جات معاهم كده، بس في كل الاحوال اشكرهم على التأخر في دعم الثورة، اشكرهم انهم سابوا الشعب هم اللي يقرر مسار الثورة ويكبرها لوحده، لوحده، من شاب يولع في نفسه، لانتفاضة، لثورة
2- اشكرهم انهم لم يعطوا اي تعليمات للثوار زي الاهبل اللي طلع يدي الشعب التونسي تعليمات، اشكرهم انهم لما انضموا للثورة، انضموا بعد النقابات كمان (وكمان النقابات اتأخرت شوية في الانضمام للانتفاضة واشكرهم على كده برضه بس ما اتأخروش كتير، يمكن يوم او يومين، لكن الاتجاهات السياسية استنت شوية حلوين وكتر خيرهم) وكمان لما انضموا، كانوا ماشيين ورا الشعب، مافيش حد فيهم، لا زعيم علماني، ولا زعيم اسلامي، خرج على الناس يدي اوامر للناس ابدا.. ابدا، ما شفتش واحد منهم ادى تعليمات ولا عمل لنا جنرال كازوزة وقعد يدي توجيهات، خالص، بالعكس، كل تعليقاتهم كانت متوجهة لبن علي انه يستمع للشعب وفضلوا حافظين نفسهم في الصفوف الخلفية والقرار قرار الشعب وهم اللي يمشوا وراه
اشكرهم اشكرهم اشكرهم... رائعين
3- اشكرهم ان بعد الانتصار لم يدع اي اتجاه منهم ولا اي زعيم منهم لنفسه اي فضل ولا قعد يسفسط ولا يحلل ولا ينظر على الناس.. ابدا، وفضلوا كلهم، بلا استثناء، من اقصى اليمين لاقصى اليسار يكرروا، الفضل للشعب، والثورة ثورة شعبية، والشعب هو اللي يختار، واحنا ماشيين وراه
اشكرهم اشكرهم اشكرهم اشكرهم اشكرهم اشكرهم اشكرهم
ناس عندها دم فعلا.. الله عليهم.. الله عليهم
وانا مش مع المصريين هنا اللي شتموهم وقالوا سايبين الناس.. الله يكرمهم سابوا الناس.. الله يسعدهم سابوا الناس.. الله يهنيهم سابوا الناس ومشيوا وراهم
والله يكملهم بعقلهم 
they are keeping low profile
اللي فيهم برة  راجع وهو بيقول بفضل تضحيات الشعب انا ما عملتش حاجة
واللي فيهم جوة بيقول انا تحت امر الشعب اللي هو يقوله
انا كل ده باتكلم عن المعارضة الحقيقية.. مش باتكلم عن الاحزاب الصورية، اصل هم كمان عندهم السيد البدوي شحاتة زينا كده، ودول دلاديل ومنتفعين، ومكشوفين، والشعب بيحتقرهم
-----
كمان احب اشكر النشطاء التونسيين من الخارج اللي وصلوا لنا اخبار الثورة من اول يوم
والحقيقة هم كمان عندهم دم.. عندهم دم بمعنى انهم ما كانوش بيناموا، ونقلوا للعالم كفاح الشعب التونسي، لكن مافيش اي حد فيهم ادعى لنفسه فضل، ولا قال: انا شاركت في الثورة... ابدا، بالعكس برضه
they are keeping a low profile
-----------
ودي ناس عندها دم... فاهمين يعني ايه عندها دم؟ يعني ناس بتحس على دمها، ناس بالرغم من اهمية دورها، واقفة قصاد جلال دم الشهدا بحياء واستحياء واحترام وتواري عن الاضواء.. ما شفتش حد من المعارضة الحقيقية مش الصورية، او من النشطاء في الخارج بيحاول يبان او مشغول بالاضواء او بادعاء الفضل، بالعكس، خجلانين انهم ما ماتوش
الله يكملهم بعقلهم
ونشكرهم لانهم ادونا مثل نتبعه ونعرف الانسان المفروض يتصرف ازاي
------------
الشعب التونسي شكل لجان شعبية عشان يحمي بلده من الشرطة المنحطة التابعة لبن علي والقذافي
باحبك يا تونس
:)

9 comments:

hampozo king said...

http://www.facebook.com/?ref=home#!/event.php?eid=115372325200575

الكاتب محب روفائيل said...

وانا برضه بحبك يا تونس

حلوة حكاية الاتصال الطريفة جدا دى

تحياتى

من مغربي said...

بالفعل، ينقصنا إبداع في الإعلام، عمق في التحليل، أنت يا نوارة أعطيت تحليل جيد لتسلسل الأحدات، بينما عبد الباري هو شريط متكرر، المشكل دائما عنده في الأخر و أعدائه جاهزون و تابتون بينما لم يحلل الدات يوما و لم أستفد منه شيئا سوى دغدغة عواطفنا التي ملت منها عقولنا.

راشد الغنوشي ليس هو راشد الغنوشي التمانينات و التسعينات، هو الأن يعلم معنى الديمقراطية الحقيقية التي تعلمها في الغرب و يعلم أن الشعب التونسي لن يقبل بأي فكر متطرف يرفض الأخر و يجرم الأخر إنطلاقا من معتقداته و أفكاره و تصرفاته.

بالنسبة للجزيرة أنا الأن أتعامل معها ببراغماتية .... إنها مصدر خبر مهم و أحيانا أداة واجبة للتحميس و إثارة الهمم، ولكنها في المقابل قناة ضيقة الأفق و بدون عمق في تحليل الخبر و الأحدات.

قبل سقوط زين الهاربين بأيام كنت قد قرأت هدا التحليل البسيط العميق لأحد ناشطي الفايسبوك التونسيين "
قناة الجزيرة ....تصفية حسابات
قناة تونس7....إستخفاف بعقول الناس
القاعدة....تترصّد ...وقد تتدخّل
أمريكا....تنصح وكأنّها المثل الأعلى
فرنسا....تدعو للتهدئة خوفا على مصالحها
الرئيس في وضع حرج .... لا ينام الليل
الحاشية ... هربت باموالنا و لن تعود
البوليس....للقضاء على البطالة , شعاره إقض على البطّال
الجيش فى وضع حرج .... ارضاء الشعب ام الحكومة
المعارض...فرصتُه التّي لا تُعوّض
التجمّعي....أين يُخفِي وجهه من الناس.. كلٌ شئ أصبح مكشوفا....

المواطن...ضباب... ضباب.... الرؤية منعدمة "

الحمد لله، هناك شمس ستشرق بالحرية و الأمل.

من مغربي said...

بالفعل، ينقصنا إبداع في الإعلام، عمق في التحليل، أنت يا نوارة أعطيت تحليل جيد لتسلسل الأحدات، بينما عبد الباري هو شريط متكرر، المشكل دائما عنده في الأخر و أعدائه جاهزون و تابتون بينما لم يحلل الدات يوما و لم أستفد منه شيئا سوى دغدغة عواطفنا التي ملت منها عقولنا.

راشد الغنوشي ليس هو راشد الغنوشي التمانينات و التسعينات، هو الأن يعلم معنى الديمقراطية الحقيقية التي تعلمها في الغرب و يعلم أن الشعب التونسي لن يقبل بأي فكر متطرف يرفض الأخر و يجرم الأخر إنطلاقا من معتقداته و أفكاره و تصرفاته.

بالنسبة للجزيرة أنا الأن أتعامل معها ببراغماتية .... إنها مصدر خبر مهم و أحيانا أداة واجبة للتحميس و إثارة الهمم، ولكنها في المقابل قناة ضيقة الأفق و بدون عمق في تحليل الخبر و الأحدات.

قبل سقوط زين الهاربين بأيام كنت قد قرأت هدا التحليل البسيط العميق لأحد ناشطي الفايسبوك التونسيين "
قناة الجزيرة ....تصفية حسابات
قناة تونس7....إستخفاف بعقول الناس
القاعدة....تترصّد ...وقد تتدخّل
أمريكا....تنصح وكأنّها المثل الأعلى
فرنسا....تدعو للتهدئة خوفا على مصالحها
الرئيس في وضع حرج .... لا ينام الليل
الحاشية ... هربت باموالنا و لن تعود
البوليس....للقضاء على البطالة , شعاره إقض على البطّال
الجيش فى وضع حرج .... ارضاء الشعب ام الحكومة
المعارض...فرصتُه التّي لا تُعوّض
التجمّعي....أين يُخفِي وجهه من الناس.. كلٌ شئ أصبح مكشوفا....

المواطن...ضباب... ضباب.... الرؤية منعدمة "

الحمد لله، هناك شمس ستشرق بالحرية و الأمل.

مدير التحرير said...

http://www.youtube.com/watch?v=W9pzK_Nmm2I

الخوجة said...

تسلمى يأستاذة ودايما باسمع كلامك
Tunisia .. Jasmine Revolution - تونس.. ثورة الياسمين - Tunisie .. Jasmine Révolution

الخوجة said...

العدوى وصلت ياجدعان
العدوى وصلت ياجدعان

حياة الظل said...

نوارة نوارة ممكن اقولك موضوع مهم وضروري
لو سمحتي اذا موجودة اكتبي رد

Sara said...

و افرضي طلع الرقم ده بتاع بن علي ؟؟؟ :)