مبادرة

اتصل بيا خالد عبد الحميد وصحاني وقل منامي كالعادة، وقال لي احنا عاملين مبادرة، اتصلي باي رقم تونسي وهنيه على الحرية واشكريه على انه ادانا امل

انا اتصلت بواحدة في الجنوب وقالت لي يعيشك يعيشك الحمد لله وشالله العقبى لكم... فرحانة، فرحانة بجد، اخدت تهنئتي بشكل طبيعي كأنها عروسة :) كنت متوقعة انها تبقى خايفة، تستغرب، لكن لقيتها بتتلقى التهنئة كأنه يوم فرحها بالظبط

الكود بتاع تونس 

00216

وبعدين اي تمن ارقام

انا حطيت الكود واتصلت بنمرة بيتي هههههههه طلعت لي الست دي من جنوب تونس

الجزء الجنوبي هو اللي ثار الاول.. وانا فرحت ان المكالمة جه بختي في الجنوب

انا باتفرج دلوقت على الجزيرة، غسان بن جدو تونسي، وراشد الغنوشي، وعبد الباري عطوان

رائع بن جدو والغنوشي، بس عبد الباري عطوان بيقول ان شاء الله تبقى زي ثورة اتنين وخمسين؟ فال الله ولا فالك يا اخي

تف من بقك، انا مش ضد ثورة اتنين وخمسين في وقتها، من تمانية وخمسين سنة، دلوقت ما تنفعش، ثم يعني دي ثورة شعبية على ابوها، ثورة شعبية زي ما الكتاب بيقول، من غير قيادات ولا زعامات 

والحقيقة انا عايزة اقدم خالص احترامي للاتجاهين الاسلامي والعلماني التونسيين، للأسباب الاتية

1- بالرغم من انهم اتأخروا في دعم الثورة بس كده احسن، انا ما اعرفش هم عملوا كده بالعمد، ولا جات معاهم كده، بس في كل الاحوال اشكرهم على التأخر في دعم الثورة، اشكرهم انهم سابوا الشعب هم اللي يقرر مسار الثورة ويكبرها لوحده، لوحده، من شاب يولع في نفسه، لانتفاضة، لثورة

2- اشكرهم انهم لم يعطوا اي تعليمات للثوار زي الاهبل اللي طلع يدي الشعب التونسي تعليمات، اشكرهم انهم لما انضموا للثورة، انضموا بعد النقابات كمان (وكمان النقابات اتأخرت شوية في الانضمام للانتفاضة واشكرهم على كده برضه بس ما اتأخروش كتير، يمكن يوم او يومين، لكن الاتجاهات السياسية استنت شوية حلوين وكتر خيرهم) وكمان لما انضموا، كانوا ماشيين ورا الشعب، مافيش حد فيهم، لا زعيم علماني، ولا زعيم اسلامي، خرج على الناس يدي اوامر للناس ابدا.. ابدا، ما شفتش واحد منهم ادى تعليمات ولا عمل لنا جنرال كازوزة وقعد يدي توجيهات، خالص، بالعكس، كل تعليقاتهم كانت متوجهة لبن علي انه يستمع للشعب وفضلوا حافظين نفسهم في الصفوف الخلفية والقرار قرار الشعب وهم اللي يمشوا وراه

اشكرهم اشكرهم اشكرهم... رائعين

3- اشكرهم ان بعد الانتصار لم يدع اي اتجاه منهم ولا اي زعيم منهم لنفسه اي فضل ولا قعد يسفسط ولا يحلل ولا ينظر على الناس.. ابدا، وفضلوا كلهم، بلا استثناء، من اقصى اليمين لاقصى اليسار يكرروا، الفضل للشعب، والثورة ثورة شعبية، والشعب هو اللي يختار، واحنا ماشيين وراه

اشكرهم اشكرهم اشكرهم اشكرهم اشكرهم اشكرهم اشكرهم

ناس عندها دم فعلا.. الله عليهم.. الله عليهم

وانا مش مع المصريين هنا اللي شتموهم وقالوا سايبين الناس.. الله يكرمهم سابوا الناس.. الله يسعدهم سابوا الناس.. الله يهنيهم سابوا الناس ومشيوا وراهم

والله يكملهم بعقلهم 

they are keeping low profile

اللي فيهم برة  راجع وهو بيقول بفضل تضحيات الشعب انا ما عملتش حاجة

واللي فيهم جوة بيقول انا تحت امر الشعب اللي هو يقوله

انا كل ده باتكلم عن المعارضة الحقيقية.. مش باتكلم عن الاحزاب الصورية، اصل هم كمان عندهم السيد البدوي شحاتة زينا كده، ودول دلاديل ومنتفعين، ومكشوفين، والشعب بيحتقرهم

-----

كمان احب اشكر النشطاء التونسيين من الخارج اللي وصلوا لنا اخبار الثورة من اول يوم

والحقيقة هم كمان عندهم دم.. عندهم دم بمعنى انهم ما كانوش بيناموا، ونقلوا للعالم كفاح الشعب التونسي، لكن مافيش اي حد فيهم ادعى لنفسه فضل، ولا قال: انا شاركت في الثورة... ابدا، بالعكس برضه

they are keeping a low profile

-----------

ودي ناس عندها دم... فاهمين يعني ايه عندها دم؟ يعني ناس بتحس على دمها، ناس بالرغم من اهمية دورها، واقفة قصاد جلال دم الشهدا بحياء واستحياء واحترام وتواري عن الاضواء.. ما شفتش حد من المعارضة الحقيقية مش الصورية، او من النشطاء في الخارج بيحاول يبان او مشغول بالاضواء او بادعاء الفضل، بالعكس، خجلانين انهم ما ماتوش

الله يكملهم بعقلهم

ونشكرهم لانهم ادونا مثل نتبعه ونعرف الانسان المفروض يتصرف ازاي

------------

الشعب التونسي شكل لجان شعبية عشان يحمي بلده من الشرطة المنحطة التابعة لبن علي والقذافي

باحبك يا تونس

:)