Tuesday 11 January 2011

ومازال السؤال يطرح نفسه

بن علي وبوتفليقة... مش عارفين يأكلوا الناس ليييييييييييييييييييييييييييييييييييييييييييييييه؟
ليه؟ ليه؟ ليه؟ ليه؟ ليه؟ ليه؟ ليه؟
طب احنا بيقولوا لنا انتوا خمسة وتمانين مليون حنأكلكوا منين - والنبي من ايام ما كنا اربعين مليون وهم عمالين يقولوا لنا كده وينبروا علينا - طب احنا من ساعة ما وقعنا اتفاقية الطين مع اسرائيل واحنا بنديها البترول بتاعنا ولما قرب ينفيخ رحنا مدينها الغاز ومضطرين من ساعة توقيع السلام نقع ضحايا المعونة الامريكية اللي بتنحرنا نحر، طب احنا طول عمرنا بنتسرق عادي واخدنا على الفقر ونشفان البطن
الجزائر وتونس مش لاقيين ياكلوا ليه؟
ليه؟
ده العيال اللي ماشيين في الشارع شبهنا بالظبط... سوء تغذية، ورفيعين رفع السنين، ووشهم اصفر، وتحت عينيهم اسود، ده جوع جوع يعني مش بيتدلعوا
طب ليه؟ ليه؟ تونس عشرة مليون، يعني لو سرق نص ثروتهم حيلاقي يأكلهم برضه
الجزائر دي بسم الله ما شاء الله اكوام ثروات وفلوس الله اكبر... ولا الله اكبر ايه؟ حاحسدهم على ايه، دولة غنية وشعب فقير
طب ازاي الدولة غنية وكل دول فقرا؟ انتوا فاهمين ده معناه ايه؟ ده معناه ان السرقة عندهم بغباوة، يعني المسئولين بيسرقوا حتى وهم نايمين، مش بيلحقوا يخشوا الحمام من كتر ماهم مشغولين في السرقة
ايه ايه ايه؟ لو سرقوا بالمعقول حيلاقوا يأكلوا الناس دول 35 مليون، وبعدين دول غلابة زينا كده، اقصد يعني بيرضوا بقليلهم ما عندهمش احلام وتطلعات، اخرهم نفسهم يبقى عندهم شغل، وانشالله وجبة واحدة في اليوم، وبيت يسكنوا فيه يبقى فيه حمام خاص بيهم ما يبقاش الحمام مشترك، طب دي سهلة بالنسبة لدول زي الجزائر وتونس
هي سهلة بالنسبة لمصر كمان بس حيضطروا ما يسرقوش قوي، يعني ممكن يسرقوا يوم ويوم، حيضطروا يخفوا ايدهم شوية من السرقة عندنا في مصر
انما بالنسبة للجزائر وتونس، عادي يقدروا يسرقوا بكثافة وبدون اي تهاون ولا تكاسل ويأكلوا الناس برضه، مش لازم يبطلوا سرقة ولا يوم مدام هم سرقة هوليك كده، فيه فايض للسرقة والناس تاكل برضه
وبعدين الفقرا مش طبعهم يطلعوا في مظاهرات ويموتوا كده الا يكونوا خلاص، حطوا صوابعهم في الشق ومافيش صرفة، ليه يوصلوا الناس لكده؟ ده الجزائريين طالعين عشان الزيت والسكر والرز، والتوانسة طالعين عشان نفسهم يشتغلوا
برضه مش فاهمة ليه بن علي وبوتفليقة يوصلوا الناس لكده؟ مافيش اي عذر ولا مبرر، ده افترا للافترا زي الفن للفن كده
طالبان لا يشبعان... طالب علم وطالب مال

13 comments:

utopia said...

"مدام هم سرقة هوليك كده"
ههههههههههههههه
والله باحب تدويناتك اللى بتضحكنا فى وسط النكد ده
بس فعلا والله تفسير علمى لحالة السرقة اللى عمال على بطال....هما شكلهم بيحبوا السرقة
او ممكن كارهين شعوبهم ومش عايزين يسيبولهم فتفوتة .. "شعوب فوبيك" :))

المهدى said...

الفشل والتبعية والإستبداد
لو إثنين من الثلاثة فقط أكيد حيكونوا شعب فقير برضه بس حيلاقوا ياكلوا
يعنى لو الخائن المستبد يحسن الإدارة ممكن ولو الفاشل المستبد وطنى ممكن ولو الفاشل الخائن يمكن تغييره برضه ممكن لكن مع الثلاثة مستحيل
وبرضه مع الإحتفاظ بالريادة وكامل حقوق الملكية الفكرية ولمسة الإبداع المصرى

محمد نور الدين said...

ست الكل تفسيرها بسيط جدا
إنها الدولة الريعية، يعني إيه الدولة الريعية؟ هناك أنواع من الدول الريعية لكن بلاش نوسع المناقشة ونبقى عند حدود بلدي و بلدك
الجزائر حسب الخبراء الإقتصادييين تصنف دولة ريعية ،لأنها تعتاش على عائدات بيع المادة الخام للخارج.
أما مصر فتصنف شبه ريعية لأنها تجني ضرائب من تحويلات قواها العاملة في الخارج.
ونتيجة هذه العملية تصبح الدولة الريعية مستقلة عن المجتمع ككل
فهي ليست في حاجة إليه ولهذا تتصرف في العائدات كأنها ملك لها وتهتم فقط بزبانيتها وبالأجهزة الأمنيةالتي تحمي بقائها واستمرارها
وتدريجيا تتحول إلى دولة أمنية أي دولة ضد المجتمع
ومن هنا يبدأ شراء الذمم و عملية الإستقطاب و الإذلال وإمتهان كرامة البشر

مواطن مصري said...

ههههههههه الجزائر بيسرقو و الشعب

نايم انما احنا الريادة

بنسرق و الشعب صاحي و محدش بيعمل حاجة

يا نوارة لو شفتي كم الفساد الي

في المحليات هتتصدمي

البلد بتاعتنا مليانة فلوس و خير

بس الحرامية كثير بيسرقو ثمار

التنمية قبل ما تيجي لينا

البلد في حالة كساد يا نوارة

مفيش شراء و المصانع مش شغغالة

دة غيرر البطالة المؤقتة

الي بيقولك وظفنا كام مليون صح

هما شغلو بس شغلو الناس 4 شهور

و مشو الناس انا اشتغلت في شركة

اتصالات و مشوني بعد 4 شهور


و الله صدق الي قال عملاء الداخل اخطر

من الخارج

مواطن مصري said...

انا واحد من الناس معنديش مانع يحكمنا

ملك يحكمنا ديكتاتور بس يطبق

العدالة الأجتماعية و بدل ما 40

واحد بيسرقو البلد يخلي ال 85 مليون

يسرقو معاة خير البلد

مش فاهمه said...

لأ و ايه دخل الفرد عندهم فى الشهر 300 دولار و احنا اقل من 100 دولار فى الشهر ده احنا على كده ابطال بقه عرفتى ليه المصريين اهمه

سامح said...

احتياجهم لحرامية اصغر عشان يحموهم
واحتياج الاصغر لاصغر بيوسع دايرة السرقة
بعيد عن الموضوع -مع الاعتذار-
شوفي الرابط ده فضلا
http://www.salafvoice.com/article.php?a=5076

Unknown said...

الجزائر بيسلحوا جيشهم بالغالى والجيش بتاعهم الانفاق عليه اكبر من الجيش المصرى والفساد على كافه المستويات هناك حسب الويكيليكس والراجل زى ما ترجميتلنا انت الوثائق مش مناهض على الفاسدين بلاد بنت كلب زينا

samia said...

نوارة أدمنت المدونة تاعك
لازم نشوفها كل يوم ببساطة لأن الوضع في الدول العربية أصبح متاشبه حد التماهي

دول تملك من مقومات النجاح كل شيء لكن مع ذلك تهدر كل ما تملكه بغباء لا يوصف
تتحدثين عن الفقر في الجزائر، تعرفي أن مساحة أرضنا تجاوزت 2 مليون ومع ذلك الناس تشكي من أزمة السكن، أكثر من 20 مليون ساكنين في 10 ولايات 38 ولاية الباقية وصلت فيها الكثافة السكانية لساكن واحد في أكثر من 2000 كلومتر مربع
واش تسمي هذا الهبل والجنون ولا رغبة في تعفين الوضع
بالتوفيق يا نوارة

Anonymous said...

إهداء إلى شعب تونس العظيم
http://aboukerdan.blogspot.com/2011/01/blog-post_2930.html

Ahmed Mohamed said...

انتي ليه متكلمتيش عن السودان
لاني عاوز اعرف رئيكم -كمصدر للمعلومات -هههههه
بجد والله ليه متكلمتوش عن انفصال الجنوب وان الناس فرحانه قوي بيه وانهم حاسين انهم مواطنين درجه تانيه
هل عشان شوية فاسدين نقسم وطن
طب ما يشيلو الفاسدين ويفضل الوطن علي حاله
دا دليل ان الجنوب لن يصل الا ما يحلم به اهله
ماهوه مدام مقدرتش تصحح اوضاعك في بلدك ولجأت انك تعمل دوله لنفسك هيجي وقت ويظهر فاسد ويخليك مواطن درجه خمستاشر هتعمل ايه بقي
هتنفصل تروح فين ؟

محمد نور الدين said...

ست الكل الله يخليك ،سامية أمانة عندك .سامعاها ماذا قالت ،البنت من أولها أدمنت . سابقا تساءلت وقلت لك عاملتنا إيه
لكن اليوم وبعد اعترافات سامية تأكدت أنك عاملتنا عملة عند أبو حصيرة لأن اليهود يعملوا عملات جامدة ما تخرش منها المية.
ولهذا أنا أقر وأعترف أن أبو حصيرة من أولياء الله الصالحين وله كرامات وتجليات

lastcrazyboys said...

شكلك اكتفيتي بالمقولتين اللي بتؤكـد على"إن الطفل المصري أذكى طفل في العالم"
وإن الموساد هو اللي بيحط حاجة في الجو للشباب المصري

ونسيتي المقولة الخالدة "إن مصر أغنى بلد في العالم ..ليييه!!؟

عشان بقالها سبعتلاف سنة بتتسرق ..ولسة الناس لاقية تاكل "