نداااااء الى الاخوة السلفيين... ممكن تسكتوا؟

والله العظيم والله العظيم والله العظيم دي نصيحة مخلصة لوجه الله عشان بس حق الغلبان اللي مات ده ما يروحش وعشان كمان انتوا ما تتقدموش كبش فدا لان اي حد عايز الحق مش عايزكم تبقوا كبش فدا

اسكتوا

اسكتوا 

اسكتوا لو سمحتوا

عشان مصلحتكم

عشان نعرف نعمل حملة ونكسب لكم تعاطف وطني مش تعاطف فئوي

لو سمحتم... لووووووووووووووو سمحتم

افففف، مش عارفة اشرحها لكم ازاي

مافيش حد حيتعاطف معاكم من القوى الوطنية ومن فئات مختلفة من الشعب ومن المؤسسات الحقوقية ومن الناس اللي صوتها عالي طول ما انتوا بتتكلموا بالطريقة بتاعتكم دي، لازم تفهموا ان قطاعات كتيرة، حتى من اللي مالهمش في السياسة، بتحملكم مسئولية الفتنة الطائفية لو سمحتوا اسكتوا، انا عارفة انكم ما عملتوش حاجة، وعارفة ان بعد التفجيرات انتوا سكتوا وما فتحتوش بقكم وده كان تصرف حكيم

لو سمحتوا سيبونا نتناول القضية من وجهة نظر حقوق الانسان وبتحميل النظام المصري المسئولية وانتوا مش بتعرفوا تعملوا كده، انتوا مخكم مظبوط على الخناق الطائفي، انا والله مش بالومكم، كل واحد على حسب التربية الفكرية اللي اترباها، زي ما كل ما تكلم واحد شيوعي يقول لك القضية قضية طبقة، زي كل ما تكلم واحد اخواني يقول: خيرا ان شاء الله، انتوا كل ما حد يكلمكم تقولوا شنودة والنصارى وبشوي والاسيرات والكلام اللي فعلا بيقوم عليكم الناس وبيكرههم فيكم والناس على اخرها دلوقت بعد اللي حصل الكلام ده حيستفز كل الناس في التوقيت ده بالتحديد حتى الناس اللي مش مسيسة

انا ما اقدرش اطلب تعديل الخطاب لان اختياركم للخطاب حرية فكرية ما اقدرش اصادر عليها، بس لو سمحتوا مش دلوقت انتوا بتئذوا نفسكم كده

مركز هشام مبارك عامل اجتماع بكرة للسيد بلال

والشبكة العربية ناوية برضه تتبنى القضية

والدستور مش ساكت وعامل تغطية كويسة

واحنا مش حنسيبكم والله.. بس اسكتوا والنبي، ما تقولوش حاجة غير: ازي الصحة، برافو، الجو جميل

عشان نعرف نحشد لأن كده مش ممكن ابدا الناس حتتحشد في الظرف الملتهب ده مع خطاب زي خطابكم، الشهيد السيد بلال له حق ومش حنسيبه ان شاء الله، وحيتعمل له حاجة زي خالد سعيد واحسن، وحندمجه مع شهداء الكنيسة وتاخد زخمها

انتوا ان شاء الله مش حنسيبكم تدفعوا تمن اخطاء النظام وتقصيره وتبقوا كبش فدا لاننا عايزين حل حقيقي مش عايزين ضحية تتصلب وتترجم والناس تفش غلها فيها

بس اسكتوا والنبي.. اسكتوا خالص، لو عايزين تعملوا حاجة انقلوا اخبار، بس، بلاش اراء، ما تقولوش رأيكم في حاجة دلوقت خالص وبلاش تحليلات

لو سمحتوا اسمعوا الكلام، انا متعاطفة انسانيا معاكم ومش حتلاقوا كتير في الظرف ده يتعاطف معاكم انسانيا، وباقول لكم اللي فيه مصلحتكم والله العظيم... لا انا ولا اي انسان عنده ذرة اخلاق يقبل ابدا بمذبحة للسلفيين عشان النظام يغسل ايديه من المسئولية.. ابدا

بس ساعدونا.. انتوا كده مش بتساعدوا خالص.. خالص، انتوا كده بتحاصروا نفسكم باللي بتعملوه في منتدياتكم وتعليقاتكم وكلامكم، اسكتوا شوية