Sunday 16 January 2011

هوبا تيتو مامبو



هيع هيع هيييييع.... والسيد حسن نصر الله حيتكلم النهاردة الساعة تمانية ونص
والاردن بيتظاهروا دلوقت
والنظام المصري قال ماحدش يستفز المصريين دلوقت... سيبوهم لما الحالة تخلص
وحكموا على الكموني - بعد سنة من ارتكابه جريمة طائفية وجريمة رأي عام - بالاعدام، بس غالبا مش حينتفذ لو ما قامتش ثورات تانية جنبنا، بس لو الجزائر شدت حيلها مع الاردن، ربنا يحكرمنا اخر كرم
تلات اربع ثورات حوالينا وحنعيش ملوك احنا
بس انا باقول يعني لو نشد احنا حيلنا كمان يبقى خير.. مش عارفين يبقى نقول للحوالينا ايدهم معانا بقى، حنعمل ايه
اه صحيح.. تأكد خلاص ان القذافي بيبعت فرق موت داخل تونس قبضوا على اتنين من عملائه... الشعب التونسي يعني هو اللي قبض عليهم
حبيب قلبي
ومن فضائل تونس علينا، اننا نسينا الفتنة الطائفية
ويا سلام بقى لو ثورتهم تلهمنا... يبقى كتر خيرهم يعني وخيرنا احنا كمان 
عموما حنشوف لبنان من ناحيتها حتعمل ايه عشان القرار الاتهامي حيطلع بكرة وغالبا حيتحط فيه حزب الله، وحنشوف الاردن حيعمل ايه برضه فيه الاف بيتظاهروا، وباقول يعني الجزائر مالها هديت كده؟ راعوا ان لكم زملاء يعني عايشين معاكم، احنا لنا ظروف معينة ومحتاجين تحميس الجوار، معلش اصبروا علينا، احنا جايين والله ان شاء الله، بس محتاجين تشجيع، شدوا حيلكم معانا واحنا برضه ربنا يكرمنا، بس راعونا بسبب الظروف المعينة يعني
اصلا اصلا هم كده كده عندهم خطط لرفع الاسعار والضرائب وكوبونات الغاز، وما قرروش يعدلوا في الخطط دي، قرروا يأجلوها بس، يعني كده كده احنا جايين ان شاء الله، بس شوية عليكم وشوية علينا
الجزائر مالها؟ بتطلع تطلع وتنزل على مافيش ليه؟
انا لاحظت كام حاجة مما يدل على انهم لازم يركزوا شوية
1- مالهمش نشطاء انترنت ليه؟ العيال بتوع اسمع يا عمرو اديب راحوا فين؟ نشطاء الانترنت التوانسة اكثر من رائعين وشغلهم يوزن بلد
2- انتوا بتبتدوا باستبياع كده ليه؟ كده نفسكم حيتقطع لما اول طلعاتكم يبقى تحديف بالطوب، مش حتقدروا تواصلوا، مش كله ضرب ضرب، فيه شتيمة الاول
التوانسة احسن حاجة فيهم انهم وسط ما بينا وبين الجزائريين، يعني لا هم مسالمين لدرجة الالتزام الكامل والمخلص والمتفاني بالكوردون بمنتهى الادب والاخلاق ولو صادف وخرج برة الكوردون هو اللي يرجع كأن الكوردون ده امه
ولا هم اول طلعتهم في الشارع تحديف بالطوب وتوليع نار زي الجزائريين ايه يا عم؟ اهدا على نفسك شوية انت كده مش حتعرف تكمل
اذا ما كنتش تبتدي هادي ويحصل تصاعد مش حتكمل، الهدوء الكامل بيتقطع لانك بعد شوية بتزهق زينا، والتحديف بالطوب من اول بسم الله الرحمن الرحيم برضه بيتقطع لانك لازم تسخن في الاول ما ينفعش تخش بكل تقلك، بنزينك حيخلص كده
التوانسة بيبتدوا سلميين ومنظمين، ولما يتطور الامر بيطوروه، وده اللي بيخلي نفسهم طويل وبيركب الطرف الاخر الغلط
ييجي واحد يقول لي: ايه يا عم جنرال الكازوزة انت قاعدة تحت البطانية تديري الثورة الجزائرية؟ اقول له اه.. طبعا، ما انا عبد السلام النابلسي يعني، باشرف عليهم
حنعمل ايه طيب، احنا محتاجينهم ينجحوا
لو الجزائر تنجح كده اولا نجدة لتونس من مؤامرات القذافي وبوتفليقة ومبارك
ثانيا احنا اساسا هنا بصُرم ولو الجزائر مع تونس صرمنا حيولع 
احلى حاجة في التونسيين
1- وحدة الهدف
2- وحدة الصف
وده اللي خلاهم منظمين كده
زائد بقى انهم نشطا من الداخل والخارج نحاول نتعلم منهم، كل النشطاء اللي نقلوا لنا الاخبار كانوا تونسيين بس، ما شفتش منهم اي استغلال لصالح اجندات سياسية، يعني اكيد كل النشطاء دول بعض منهم له انتماءات سياسية، بس ما شفتش انا انتماءات سياسية عليهم، ما قدرتش اميز اليساري من اليميني والعلماني من الاسلامي من كتر ما كان تركيزهم على هدف واحد وولاءهم الاول كان تونس بس
انا باقول يعني... مش قصدي حاجة
اهو الواحد بيقول كلمتين كده يتفك بيهم، انا عندي امل، وحنشوف لبنان والاردن برضه حيعملوا ايه، بس دول برضه لهم ظروف معينة، لبنان لازم توزن كل خطوة عشان ما تقلبش بنكد، وهم والعياذ بالله نكدهم وحش قوي وغلس وما بيطلعش الا بالطبل البلدي، والاردن عاملين زينا كده بالظبط، عندهم ظروف معينة... احنا املنا دلوقت كله معلق على الجزائر، الجزائر لو ربنا كرمها حتنقذنا وتنقذ الثورة التونسية معاها وتبقى ميت فل كده بس يظبطوا نفسهم، عندهم شوية زوايا بتحدف، لو اتظبطت ربع مللي من هنا ونص مللي من هنا نخلص كلنا
ونقول يا رب قبل اي حاجة

7 comments:

fleur de Rif said...

الجزائريين اوضاعم اصعب من مصر.. الجيش في تونس متحد مع الشعب لكن الجيش في الجزائر هو اصلا الحاكم

Ramy said...

شوفتى انتى قولتى ايه

احلى حاجة في التونسيين
1- وحدة الهدف
2- وحدة الصف

انما صدقينى لو حصل حاجة هنا فى مصر

عارفة هندبح فى بعض

مش هتكون حُريتنا هدفنا

كُل مجموعة فى البلد هتدور على مصلحتها

و هنكون لبنان تانى

و لو حصل

ابقى بس افتكرى اللى قولته

صدقينى مش تحبيط

بس دة اللى واضح من اللى حاصل فى مصر
و على فكرة مش خوف برضه

يعنى علشان الناس أحياناً بتفتكر التفكير غلط

312asdf said...

هم اللي قالوا بلاش استفزاز
يعني كل واحد يروح القسم التابع له و يدخل يضرب ظابط المباحث ألمين و لو نطق يقول له شت يور كاوس,
الريس قال بلاش استفزاز للمواطنين أبوس اديكم السعودية حر و التكييف بايظ
و يا رب الناس عندنا متهداش على يوم 25
عشان ساعتها حشتم بالأم أي حد يسب في المغرب العربي
و ربنا يهدي الجيش بتاعنا و يجعل قلوبهم على قلب رشيد عمار إن شاء الله

نعيب زماننا

lastcrazyboys said...

ماهو أصلاً لزززمن يشكوا في الأهبل "أبو بردعة" من ساعة ما كان أول واحد عارض موقف الشعب العربي التونسي من " شين الهـاربين "

the magnificent ninja said...

ان شاء الله عدوى الثورة تنتقل للعالم الاسلامي كله
و خاصة في وجه مبارك و عباس و القذافي و فشار الأسد و الملك عبد الله و عبد الله الثاني

و أتمنى ان الشيخ راشد الغنوشي يمسك الحكم في تونس حتى تعود تونس القيروان الى مكانتها الشامخة في الأمة الاسلامية

yasser said...

بدئت تنقع ايه ينوارة ياقمر تصدقى الموظفيفين فى وزرارة التربية والتعليم مانعين الراجل انه يدخل الوزارة والوزير يعنى المسكيين (علشان قرار الريس بعدم استفزاز الناس)( اصدر 3 قرارات تلوفونية اى والله تلوفنية من الموبيل بتاعة حاجة كدة تومتيكى توماتيكى بالالغاء قراراته السابقة واولاد الكلب الشعب راسم والف سيف لازم الوزير يمشى ؟؟؟ظ والوزير يعيييط ولا حد سائل فية ايه رائيك يابت يا نوارة اول مترجاعى وتشوفى التعليق ده منك للحاج تويتر وفيس بوك ويالا نلم الناس وعلى وزارة التربية والتعليم نقف معاهم واه يبقى التوانسة غيرو نظام واحنا غيرنا وزير ؟معلش اه احسن من بلاش لحسن المصريين شكلهم مستنيين كتير ويمكن ربنا ينفخ فى سرتنا ويجلنا الله اكبر فى المؤخذة والناس تتلم ونغيير انا رحت قدامك مستتنيكى انتى والعيال اوعى تتاخرى

Ahmed Fawzi said...

و إنت مستنية الجزائريين فكرتينى بمحللين الكورةبتوعنالما بيستنوا نتيجة مباراة بين فريقين تانيين علشان يعرفوا إحنا حانعمل إيه حانكمل و لا حانطلع بره .. :))))))