Friday 21 January 2011

استجدع وانزل يوم 25 يناير


تحديث:
نسيت اقول حاجة مهمة: اجمل حاجة في ثورة تونس ان ما كانش فيها غير علم تونس والنشيد الوطني، ياريت القوى السياسية ترحمنا وما ترفعش شاراتها وصورها، مافيش غير علم مصر والنشيد الوطني، هو مش فرح ابن العمدة وكل واحد نازل ينقط باسمه
انا عارفة ان فيه ناس خايفة
حتى، لا مؤاخذة، رجالة وخايفين
طيب فيه طريقة حلوة قوي تخليك ما تخافش ولا حاجة، انزل انت وتلاتة اربعة صحابك، اي شارع، خلاص؟ امشوا في الشارع واعملوا الاتي:
وقفوا الناس اللي ماشية في الشارع زي ما بتوقفوهم تسألوهم على محل او شارع، وقول له: انت عارف ان فيه 12 مصري ولعوا في نفسهم من الفقر؟ انت عارف ان في تونس واحد ولع في نفسه من الفقر والثورة قامت، عارف الثورة قامت ازاي؟ الناس نزلت الشارع، واتحاموا في بعض، وفضلوا في الشارع لحد ما رئيسهم اللي اتسبب في كل بلاويهم هرب.. وفيه ناس بتقول ان التوانسة ارجل من المصريين.. بس انا مش مصدق، انا عارف ان المصريين كمان رجالة. زي ما التوانسة نزلوا الشارع وغيروا احنا كمان نقدر نعمل كده. وسيبه وامشي
شوف حتنزل انت وصحابك في انهي شارع
وخد الشارع من اوله لاخره، طول ما انت ماشي توقف الناس وتكلمهم، اهم حاجة، ما ترغيش كتير، ما تطولش في الكلام، تركز على نقط محددة، ان حالنا زي حال تونس، ونقدر نبقى زيهم، واللي مش عارف ثورة تونس تعرفه، تحكي له الحكاية باختصار وببساطة، واحد ولع في نفسه من الفقر الناس قامت ونزلت مظاهرات لحد ما طردت رئيسهم، واحنا عندنا 12 واحد ولعوا في نفسهم، من الفقر برضه، ونقدر نبقى زي تونس
افضل انت وصحابك ماشيين في الشارع وتكلموا الناس تكلموا الناس، الناس اللي واقفة على محطة الاتوبيس، الناس اللي واقفة مستنية الميكروباص، الناس اللي ماشية، الناس اللي بتعدي الشارع، الناس اللي ماشيين على الرصيف، ولاد وبنات
وعشان كده يستحسن ان تنزل معاكم انشالله بنت واحدة عشان تكلم البنات وما فيش بنت تفتكرك انك بتعاكسها، انت عارف ما بيصدقوا عندنا هههههههههه
مش لازم تهتف وتشيل يفط، فيه عيال جدعان حيعملوا كده، وفيه ناس خايفة، بس احنا مش لازم نهزأ الخايف، لان الخوف شعور انساني طبيعي، بس انا عايزة اقولك ان التوانسة هزموا بن علي يوم ما هزموا خوفهم، وانت لو خايف، خليك مرسال، بلغ الناس، وقولهم انا نازل في الشارع النهاردة عشان النهاردة يوم 25 يناير، احنا اتفقنا ننزل ونتكلم معاكوا، وقول للي كلمته، امانة عليك تبلغ اللي تعرفه باللي قلتهولك
البنات تلبس بنطلونات وتحتها بنطلون ستريتش او كولون تقيل، تاخدوا معاكم تليفونات رخيصة، ويبقى فيها رصيد، حتنزل انت مع تلاتة اربعة صحابك ولنقل مثلا مثلا، في شارع رابعة العدوية، مثلا، حتخش وتاخد ارقام التليفونات اللي موجودة على صفحة كلنا خالد سعيد ولو لا قدر الله حد اتعرض لك تتصل بالنمر دي او تبعت رسالة، ابعت رسالة افضل لان ممكن الرد على التليفونات ساعتها يبقى صعب
ممكن وانت بتتكلم مع حد تلاقيه متحمس، اعرض عليه انه يمشي معاك، قول له احنا نازلين نكلم الناس تحب تمشي معانا وتكلم الناس انت كمان؟ وشجعه على كده
وامشي.. امشي في الشارع امشي امشي امشي.. واتكلم اتكلم اتكلم.. وغني
غني اغاني وطنية، غني اغنية بلادي بلادي
غني مع اصحابك بصوت عالي اغنية وطنية تكونوا بتحبوها
شايف البنت دي؟ البنت دي نازلة
ان شاء الله يا اسماء مصر كلها رجالة
زي رجالة تونس
------
لو تقدر تصور صور.. لو تقدر تبعت تويتات ابعت.. لو تقدر تدون دون
وانت في الشارع
فيه ناس نازلة عشانا في تونس والاردن، وعرفت دلوقت ان فيه ناس نازلة عشانا في باريس
كل دول حاطين امل علينا

32 comments:

wahibium said...
This comment has been removed by the author.
من مغربي said...

أهم شيئ ما كتبته نوارة بالأحمر : شعارات من أجل الحرية الديمقراطية و الكرامة، و لو أكتفيتم بالنشيد الوطني و العلم سيكون أفضل، و لا تدعوا أي شخص يركب على الأحدات (عن قصد أو غير قصد) ... و تدكروا أن التونسيين تاروا بدون إخوان أو سلفيين أو تيارات أخرى .... هم تاروا لأنهم قرروا أن يكونوا أحرارا بعدما حرروا أنفسهم من الخوف و من كل ما يمكن أن يشتت التورة. حتى الجملة العضيمة "الله أكبر" لم يستعملها التونسيين إلا في اللحضات الجليلة الصعبة أتناء القصف و الإصابة بالرصاص

كلام wahibium يجب أخده بعين الإعتبار فلا تورة بدون تواصل، و يجب فتح قنوات مع وسائل الإعلام النزيهة بكتافة .....

كريم البحيرى said...

بجد يانوراه كلامك هايل زى العادة بس بجد انا نفسى ان كل مجموعة من الشباب يختارو مكان شعبى ويعملوا فيه مظاهرة ويكون فى اتصال بين كل الناس دى ولو حصل فى اكتر من مكان فى مصر كلها مظاهرة نتحرك كلنا فى مسيرة فى اتجاه القصر بتاع عيلة الديكتاتور وحاشيته ونحاكمة بدل ما يلحق يهرب زى بن على
وعلى فكرة عمال المحلة اعلنوا ان فى تجهيزات للمشاركة فى يوم الغضب ويوم الاحد القادم فى وفد من العمال المنقولين والمفصولين من الشركة عاملين اعتصام مفتوح احتجاجا على التعسف ضدهم وبيطالبوا بوضع حد ادنى للأجور 1200 جنية والمكان المقترح حتى الان قصر الرئاسة واحتمال ان كان صعب يكون ادام مجلس الوزراء او فى اتحاد العمال
ولو متمش تنفيذ الطلبين هيكون الوفد دا اول المشاركين فى يوم الغضب وهيوجهوا رسالة لكل عمال مصر بالمشاركة

متغربه said...

والله يا نوارة انا نفسي اكون معاكم و عاى فكرة انا ام و عندي اطفال صغار وكان نفسى يكونوا في مصر علشان يشوفوا ان احنا مش سلبيين و ماسكتناش و على الاقل لو لا قدر الله ما حصلش المراد من رب العباد ما يتفوش في وشي انا و ابوهم و يقولوا و الله اهلنا دول ناس محترمه و ما سكتوش قبل حكاية 25 يناير كنت انا و ابوهم قاعدين نقول العيال دي هتستلم البلد ملط لا غاز ولا بترول ولا حتى مياه و ان احنا بلا فخر الجيل اللي هيخلي النيل ترعة راكدة لغاية سوهاج قعد يجري في مصر من يوم ما ربنا خلق الارض واحنا بقى اللي هنقول ستوب كفاية كدة لا املك لكم الا الدعاء انا باكتب لك و انا باعيط و باقول يا رب لو احنا ما نستاهلش نعيش عيشة عدلة ما تاخدش العيال دي بعمايلنا و سلبيتنا يا رب تتوفقوا عشان كل عيييييال مصر

أبو أمك said...

أنا هاعمل بنصيحتك وأشوف انشالله حتى بنت واحدة
وأنزل أتعشى معاها

MerMaid said...

والله انا عاوزة اعيط....نفسي انزل لكن جوزي مش هيرضي...بيخاف من امن الدولة و يخاف نتراقب و نتعرض لمشاكل

والله نفسي انزل ..بس انا هقول لكل الناس تنزل...حتي لو انا منزلتش

فهد said...

سألني صاحبي عن فيديو يدعوا لمظاهرة 25 يناير وقال:
انت كده هتودينا في داهية
وكان ردي الحياة اللي احنا عايشينها هي الداهية نفسها
تحياتي لكل النشطاء وتحياتي لهذه المدونة الجريئة والمحترمة

محمد نور الدين said...

ست الكل مساء الخير
لقد ترددت في التعليق على ما شددت عليه بالأحمر حتى على أفسد عليك الفرحة و البهجة كما أخبرتينا بذلك في الفيديو .وعلى ذكر الفيديو لقد شاهدته مرتين ليس بسبب التصريح الصحفي، إنما لسبب يخصني يعني أنت ملكش دعوة.
قلت ترددت في التعليق لأن هناك واقع في المغرب العربي بالغ التعقيد بشأن الهوية و الانتماء و اللغة .قد يكون المجتمع التونسي أقل حدة لكونه أكثر تماسا. لكن حتما ستظر أصواتا تطالب باعادة النظر في مسائل ثقافية كثيرة بدون أدنى شك ستكون أقل حدة ولن تقارن بماهو عندنا في الجزائر ولا في المغرب
لأن الأنظمة المتعاقبة في تونس سطحت الكثير من القيم الفكرية فخلقت فئات واسعة لها توجهات أخرى هي الآن في لحظة كمون لأن الثورة قامت بها تونس العميقة التي حسمت انتمائها .لكن هذه الفئات ستعود وستجعل من أطاريحها سجل تجاري لتحقيق مصالح وستكون مدعومة من المستعمر القديم

حياة الظل said...

الظاهر نوارة مش واخده بالها بتكللم مع مين
يا انسة نوارة انتي قاعده تتكلمي مع الشعب الي سب شهداء الجزائر وفي نفس الوقت كانوا بيقولوا عن هيفاء وهبي
في شعب قال اذا الشعب يوم اراد الحياه وفي شعب بقوله من يهن يهن الهوان عليه
قال 80 مليون قال
تفو عالواطي

مخبر قمل دولة said...

نوارة .. انا متعود اعمل تغطية مباشرة للمظاهرات من اسكندرية على تويتر ، تمام؟ وعاوز اغطي اليوم ده بس خايف الموبايل يتاخد مني .. طب أجازف واخده معايا واغطيها؟ ولا اخد موبايل رخيص واجي اخر اليوم انزل تدوينة باللي حصل
اممممم
في نقطة كمان .. ممكن أعمل أنفولو لوائل عباس على تويتر وتفكيلي البلوك؟ ‎:D
مع اني متضايق انك عملتي بلوك للناس كده بدون سابق انذار (مانتي لو كنتي خيرتي الناس معظمهم كان هيختارك) .. وكنت واخد الموضوع بكرامة بقى وبتاع
بس انا قلت بقى احنا داخلين على ثورة والثورة ماتنفعش من غير تويتر وتويتر ماينفعش من غير نوارة

lastcrazyboys said...

أنـا من الصبح مش عارف اتكلم .. عندي تنميلة غريبة في رجلية من ساعة ما شفت اللينك ده

خلاااص ..الناس دول مش هيستنوا يجندوا حد ..الناس هتبقى عميلة بالأدب ..وممكن بالنحو والصرف كمان

بيقولك تحت رعاية..info لا وفي الـ

وزارة الخارجية ..يعني موساد موساد رسمي

إسرائيل تتكلم بالعربية

M. Faramawy said...

يا جماعة على فكرة يوم 25 يناير اجازة رسمية و الكلام ده اول مرة السنه دي بمناسبة عيد الشرطة
يعني ممكن تكون هناك فرصة اكبر لتوسيع المشاركة الشعبية...

mUsLiM said...

بمناسبة موضوعك

ياريت تقري المقال ده أظنه بيعبر بحق عن وجهة النظر السلفية الشرعية من الأحداث الجارية

http://www.h-alali.org/m_open.php?id=8a57f52e-2598-11e0-979f-cf6fbd66c7b2

السلام عليكم

Unknown said...

بلغ السيل الزبي

ها نحن والموتي سواء

فاحذروا ياخلفاء

لا يخاف الموت الميت

ولا يخشي البلايا

قد زرعتم جمرات اليأس فينا

فاحصدوا نار الفناء

وعلينا وعليكم

فاذا مااصبح العيش قرينا للفناء

فسيغدو الشعب لغما

وستغدون الشظايا

بهيج الشرير said...

والنبي ياأبلتي أنا عندي إقتراح! إيه رأييك لو ناس كتير تيجي يوم ٢٥ يناير لابسين زي الخولات ظباط الشرطة وفي الحالة دي العيال بتوع الأمن المركزي هيرتبكوا ويخافوا يضربوا المتظاهرين؛ وياريت كمان اللي مش ناويين ييجوا يروحوا على بيوت الخولات ظباط الشرطة ويعملوا كل الكبائر والصغائر مع نسوانهم وبناتهم؛ بس خليكوا بعيد عن نسوان مصر الجديدة لأني بإذن الله ناوي أكون هناك الأول

Widiman said...

لو عاوزة تعملى الواجب الصح انشرى الفيديو ده
http://www.youtube.com/watch?v=ujtIdyfjgWU

خاص بتعليمات يوم 25 يناير

karima said...

السلام عليكم ..فعلا سا استاذة نوارة اجمل واحلى شيء في ثورة التوانسة التى اخذت منا القلوب والعقول والتي حررتنا معها ..انها كانت متحدة في كل شيء في الاهداف في الاصوات ..في الغاية وفي الوسيلة ..ستظل هذه الثورة اكبر انجاز شعبي صنع في دولة عربية ..وقد احيت فينا هذه الثورة تفائل يبشر بخير...وان الله لا يغير ما بقوم حتى يغيروا ما بانفسهم ..فتحية احترام وتقدير لهذه الثورة المباركة

واحد عادى said...

أجل إن ذا يوم لمن يفتدي مصرا
فمصر هي المحراب والجنة الكبرى
حلفنا نولي وجهنا شطر حبها
ونبذل فيه الصبر والجهد والعمر
سلاماً شباب النيل في كل موقف
على الدهر يجني المجد للنيل والفخرا
تعالوا فقد حانت أمور عظيمة
فلا كان منا غافل يصم العصرا
تعالوا نقل للصعب أهلاً فإننا
شباب ألفنا الصعب والمطلب الوعرا
شباب إذا نامت عيون فإننا
بكرنا بكور الطير نستقبل الفجرا
شباب نزلنا حومة المجد كلنا
ومن يغتدي للنصر ينتزع النصرا

Unknown said...

مسلم

انت جايب لي مقال لحامد العلي؟ وبتقول لي عليه رأي السلفية؟

حامد العلي ده، بصرف النظر سواء اختلفت معاه في بعض الاراء واتفقت معاه في اراء اخرى، على راسي من فوق، ده راجل محترم ونزيه ومناضل ومش تابع ومش قبيض ومستقل

ايوة هو متبني الفكر السلفي
لكنه لا ينتمي للتيار السلفي الامنجي اللي بيستغل من قبل الحكومات العربية

وزي ما قلت لك مش كل ارائه باتفق فيها

لكن حتى وانا مختلفة معاه الراجل ده على راسي على راسي على راسي وامل حياتي اصلي وراه كفاية نضافته وكفاحه وبهدلته في انه يتمسك بمبادئه

وده لا يشكل راي التيار السلفي معلش بقى، وبالذات التيار السلفي في مصر

بس عموما حركة حفص الحمد لله انضمت ليوم 25 يناير وانا بيني وبين اي حد ايه غير النزاهة؟

مش بيني وبين اي حد الاتفاق في الراي ابدا

بيني وبين اي حد النزاهة
النزاهة
النزاهة
وخدمة صالح البلاد
فيه حركة سلفية واحدة منضمة للمعارضة وبقية الحركات السلفية عملت عبيطة مع انهم بيتبهدلوا دلوقت، بس الظاهر الباقيين عندهم امل ان الود يرجع تاني

وانا شكرت حركة حفص لانضمامها ليوم خمسة وعشرين يناير مع الوضع في الاعتبار انهم موقفهم اصعب من اي فصيل اخر بسبب الحملة المعمولة على السلفيين وكان تصرف حكيم وشجاع منهم انهم ينضموا لليوم

ونفسي تاخد بالك من حاجة بس عشان دي نقطة، مش بس السلفيين ما بياخدوش بالهم منها، لكن للاسف اي حد مؤدلج قوي وماشي زي ما الكتاب بيقول مش بياخد باله منها

اللي يعمل خير يتشكر ونفس الشخص لو عمل شر ينتقد، انت مش بتصنف اشخاص
يعني لما اشتم اردوغان عشان بعت طيارة لاسرائيل وفي نفس الوقت ما بعتش طيارة لاسطول الحرية لا يعني انه لما يعمل حاجة كويسة ما اشكرهوش

مش واحد عمل حاجة حلوة بقى هو حلو ولما يعمل حاجة وحشة بقى هو وحش

هو وحش او حلو دي حاجة تخص مراته ما تخصنيش

انا يخصني الفعل، الفعل حلو يتشكر الفعل وحش يتشتم

حتى لو الفعلين صدروا من نفس الشخص، لان الشخص بذاته لا يعنيني انا ما اعرفوش

Unknown said...

مستمتعة بالحوار ما بين من مغربي وابو هاجر
:)

Unknown said...

كريمة

للاسف اللي بتقوليه عندنا احنا كمان

ما عندناش ناس نزيهة كتير ومعظمهم بيقبضوا من الخارج وتابعين

بس يعني حنفضل مكبلين كده؟

mUsLiM said...

الشيخ حامد العلي هو الأمين العام السابق للجماعة السلفية فى الكويت


والسلفية بشكل عام هى التيار الإسلامي أيا كانت طوائفه لأن معنى الكلمة بالأساس هى العودة إلى قواعدنا السالفة والإحتكام للشريعة الغراء دون صرف النظر عن الواقع بل مع مراعاة الواقع الجديد والزمن المعاصر

بحيث تكون الأمة مصدراً للسلطات والسيادة للشريعة

على كل حال فالأشخاص ينسبون للسلفية ولا تنسب السلفية لأحد إلى للنبي صلى الله عليه وسلم باعتبار أن المنهج السلفي يدعو إلى تحكيم الشرع الحكيم

ولو اعتمدنا ذلك المفهوم لرأينا أن الغالب الأعم من المسلمين هم سلفيون لكن ساد هذا اللقب على الملتزمين من المسلمين الداعين فعلياً لتحكيم الشريعة

لكن على كل حال ودون الولوج فى تفاصيل نظرية

حركة حفص السلفية حركة ضعيفة نوعاً ما خاصة وأن مؤسسها الشيخ رضا صمدي هو تايلاندي فى الأساس وليس مصري وإن تربى وعاش فترة من عمره فى مصر وله فيها أنصار وأتباع

إلا أن دعوة حركة حفص لن تلاقي القبول الكافي فى نظرى من جموع المنتمين للسلفية بالمعنى السياسي خاصة وأن أعلام التيار السلفي بمصر أعلنوا صراحة إختلافهم مع رضا صمدي مؤسس حركة حفص المذكورة

على كل حال فإن دعوة حركة حفص لا شكل تشكل تغييرا فى المياه السلفية الراكدة فى مصر

ونأمل أن يكون ذلك حافزا لمراجعة العديد من المشايخ الأفاضل فى توجههم السياسي


ونسأل الله تعالى أن تكون الأحداث التونسية قد بذرت بذورها فى سائر أراضي الأوطان العربية والإسلامية حتى نتخلص من طواغيت هذا الزمان كما تخلص التوانسة من بن علي بشرف وكرامة

فدورنا فى هذا الوقت هو المحافظة على العدوى التونسية إن صح التعبير إن لم نكن قادرين على فعل ما فعلوه

والله المستعان

السلام عليكم

Unknown said...

نوارة خدي ده اضحكي شوية كدة :D
http://tube.manhag.net/watch_video.php?v=78ADKGDO66D9

بس نصيحة خلي جنبك علبة مهدئ عشان اعصابك
وقزازة جاز
عشان تولعي في الجع بعد ما تخلصي

Unknown said...

كلام مسلم صح علي السلفيين
المفروض اهل سنة وجماعة "الي هم كلنا يعني"
يعني سلفيين مهما اختلفت عقائدنا او مذاهبنا الفقهية والفكرية

بس احنا يا استاذ مسلم نقصد نوعية معينة محددة من السلفيين
الي هم بيسموا نفسهم سلفيين
ويقعد يطلع يبدع اهل السنة علي الفضائيات
وصل كلامي؟

Ahmed Mohamed said...

خطباء المساجد جاتلهم تعليمات من وزير الاوقاف زئزؤ انه يكفروا المنتحرين ,انهم يبدو استياء (الدين) من الثوره التي تقوم بدافع الخبز ,وطبعا كنت عايزه اقوله احا بس الي خلاني سكت انه قال يعني يجي واحد ياكلكم ويشربكم ويشيل من دينكم هتبقو مبسوطين انما مصر لسه فيها اسلام حتي لو فيها فقر
كنت هاقوله احتين بس سكت بردو لما قال ان النظام مقرف اه وابن كلب _انا مش عارف قاله مرتين علي مسامع الناس وسكتو -طبعا مش من باب الدفاع عن النظام منباب ان الافاظ دي تتقال في الشارع يا عم الشيخ مش في الجامع
..
عشان خطباء المساجد دول مش عارفين اي حاجه في الدين وشاطرين يتفزلكو ونقاب وقصر الجلبيه طول الجلبيه وعلي الفولت عليت الفولت وطي الفولت وطيت الفول والثوره علي الحكام فتنه الي الخره الي بيقولوه
يجدعان مصر مفهااااااااااش تعليم ولا وعي
يا جدعاان الناس الي في الجوامع بهايم بيسمعو ومينفذوش الي المفروض يتنفذ وبيسمعو وميصححوش
الي المفروض يتصحح من الهجص الي بيتقال وهما يا اما نايمين يا اما مفقرين يا اما بيهزو دماغهم بعبط كدا

من مغربي said...

يا توانسة يلي غبنوكم يا توانسة يلّي عذبوكم، يا توانسة يلّي قهروكم، يا توانسة يلّي سرقوكم تنفسوا الحرية، شعب تونس هدالنا الحرية، يحيا شعب تونس، تحيا تونس العظيمة، المجد للشهداء، يا توانسة ما عادش خوف، المجرم هرب .. بن علي هرب . شعب تونس حر .الشعب هو اللي يحكم .. يا شعبنا يا عظيم.. يا شعبنا يا باهي .. يا شعبنا يا غالي ..... يا شعبنا يا سمح . تنفس الحرية .. العظمة لتونس .. البقاء للشعب التونسي .. رانا تحررنا ، وبن علي هرب

......

هده هدية لكي يا نوارة، نضير مقالكي الجميل في الدستور الأصلي .... كمعلومة، مبدع هدا الحدت و الكلام هو محامي إستقبلته قناة نسمة أمس .... السيد ساعة و هو يتكلم في البرنامج قبل أن يشير إلى دلك مقدم البرنامج .... المحامي قال بأن كل شيئ كان عفوي

متغربه said...

نوارة عندي اقتراح في موضوع لبس البنات بيتهيالي ان اللي عندها سالوبيت تلبسه تحت الهدوم احسن من البنطلون و اامن مش كده ولا ايه

مش فاهمه said...

يارب اليوم ده ينجح زى ما بتفكروا و تحلموا بس انا مش مقتنعه للأسف مش مقتنعه بثورة بميعاد سابق و ترتيبات و تاخد ايه معاك و ماتاخدش ايه و تلبسوا ايه و ماتلبسوش ايه
اللى نجح الثورة فى تونس اتفاق الكل و عدم وجود فوارق رهيبه بين الكل
ربنا يخيب ظنونى لكن انا مش متفائله قوى الناس اللى حواليا اللى بيعانوا و مهمشين ومش لاقيين اللضى لسه مش فايقين الراجل سواق التاكسى اللى ركبت معاه وانا باقوله كان مش عارف حاجه خالص احنا قليلين و هم الكتلة الأكبر ربنا يستر

hassan_attala said...

يعني سايبين السنهكلها وجايين ايام امتحنات طب حتي حطو في اعتباركم ان حاجه زي دي مش هيقومها غيرالشباب ولاعايز والدي ووالدك ينزلو يموتو ومتقوليش في تونس قامت يوم ايه ويوم ايه دي حاجه مكانتش متحضره قامت وخلاص

يمكن بحر said...

لدي تعليقان بديهيان لكن مش عارف ليه مش بناخد بالنا منهم :
1- من يقول أن الثورة ذات الميعاد المعلن عبث ، وكوميديا ، ماشي هتفق معاك بس حتى لو لم تكن معلنة ، المشكلة مش في الميعاد ، المهم العدد ،الناس
ببساطة لو أنا مثلا قلت أنا بكرة الساعة 5 رايح أعتصم قدام قصر القبة لغاية مايغور مبارك ، طبيعي ان هيبقوا عاملين حسابهم ان فيه واحد مجنون جاي وهيضربوني بالنار ، ومختل عقليا وخلصنا ..
بس لو راح معايا نص مليون واحد ، هنا فقط مهما كان النظام غبي ومجنون وظالم وديكتاتور لن يستطيع قتل نص مليون ولا اعتقال نص مليون ..
ماذا لو أصبحنا مليون ، 2 ، 3 ...
وهكذا لازم كل واحد يفهم ان وجوده بيصعب مهمة إفشال الثورة ، كل أما عددنا يزيد كل اما نجبر هذا النظام على أنه يعملنا حساب ويسمعنا ويرضخ لمطالبنا ، مش زي ما سي مبارك بيقول : سيبوهم يتسلوا !!!

2- من يقول : وهل تضمنون ألا يأتي من هو أفجر وأكفر كما يقول الدكتور سعيد عبدالعظيم!
لا نضمن ولكن بربك أليس علينا السعي وليس علينا إدراك النجاح !
ان انتفضنا ربما حققنا ما نصبو إليه ولو بنسبة 10% ، لكن لو جبنا واستكنا فلا مجال لتحقيق شئ البتة

karima said...

السلام عليكم ..استاذة نوارة اكيد لن نبقى مكبلين ..اذا رضينا بهذا الوضع فنحن لسنا اهلا للحرية ولا اهلا للتغيير ...لكن التغيير لن يحصل مادمنا لا نعي من هو عدونا الحقيقي ..البعض دائما يشير للكيان الصهيوني وهذا الكيان هو العدو ويتخذه شماعة ليهرب من الحقيقة ودائما ما نسمع اننا مستهدفين منهم لا خوف ابدا من عدو معروف ..اما العدو الخفي فهو الذي ذلك السكوت والجبن واللامبالات في مجتمعاتنا العربية عندما يسكت مواطن عن جبروة مسؤول فهو ياذن له ان يزيد في جبروته وعندما لا يبالي مواطن بنظافة حييه ولا يبالي فهو عدو لنفسه ...وعندما نتهم بالتفاهات ونجرى وراء الشبهات وندعي علما وثقافة غربية ونجيز لانفسنا الفتوة في الدين ...التصرفات اليومية يا استاذة هي مصيبتنا فكيف نكون اهلا للتغيير ونحن لا نغير ابسط الاشياء

Anonymous said...

من يتخيل أن التغيير في مصر ممكن أن يبدأ من الشارع فهو واهم.. فصفات المصري الثابتة الأصيلة ومنها الجهل، الجبن، الوصولية، الغدر وخيانة العهد، والجحود تجعل التغيير مستحيلا.. فأن لم يتغير هذا من أنفسكم فلا تحلموا بالتغيير...

نظام حسني مبارك- وحسني مبارك وحاشيته هم أبناؤكم وأتوا من بين ظهرانيكم- هو خير من يمثلكم. فمن يريد أن يعرف مصر - الشعبية - فليعرف نظام مبارك. ولنأخذ الانتخابات الأخيرة وما جرى فيها كمثل... فلو كان مبارك دكتاتورا (تخيل دكتاتورا أو فرعونا باسم وشخص حسني... يا لها من مهزله!!!) أقول لو كان دكتاتورا يحكم بالحديد والنار والمقابر الجماعية وألغى القانون وعلق الدستور لكان خير مما حصل.. ما ظهر للعالم أن في مصر حكومة نصابين تحكم شعبا ساقطا بالتراضي... وأعيدها... بالتراضي.. وعلينا أن نتذكر أن المصريين هم أسرع الشعوب تبنيا رأي حكومتهم... أ ولستم بفراعنة؟؟

بسم الله الرحمن الرحيم
فَاسْتَخَفَّ قَوْمَهُ فَأَطَاعُوهُ إِنَّهُمْ كَانُوا قَوْماً فَاسِقِينَ
صدق الله العظيم

أساله تعالى وان يمد في عمر الأسره المباركيه عقود وقرونا وأن ينتقم منكم أجمعين شعبا ونظاما.. كي تذوقوا وبال أمركم وانتقاما منكم لخيانتكم الأمة (فلسطين، ليبيا، العراق، السودان...) وما خفي كان أعظم