انا مش عارفة اوصل لاحمدي نجاد ازاي

اقتراحاتكوا ايه؟ انا عايزة ابعت له رسالة: 

والننننبي، السيدة زينب في ضهرك، سايقة عليك سيدنا النبي وكل اهل البيت واحد واحد... بلاش الاعدام، والنبي والنبي والنبي، اظن من صلاحيات رئيس الجمهورية انه يعمل عفو على اللي اخدوا اعدام

وميدو بيقترح انهم ممكن يتعاقبوا بخدمة عامة، يكنسوا شوارع طهران كلها ويغسلوها، ان شالله ينضفوا حمامات الجوامع والحمامات العامة، بس بلاش الاعدام والنبي، حطوهم تحت المراقبة وكفروا سيئاتهم، بس بلاش الاعدام

الله يخليك، وغلاوة سيدنا الحسين عندك، بلاش اعدام دي عيال صغيرة، حتى لو غلطوا، حتى لو فعلا متجندين من اجهزة استخبارات خارجية، معلش، عيال، عيال صغيرة ويتاخدوا بالهينة، امسكوهم اعملوا لهم برنامج تأهيلي، انشالله حبس في محل الاقامة

اي حاجة الا الاعدام والنبي، والنبي، حلفتك بالنبي عليه الصلاة والسلام 

كده غلط، غلط على الثورة، وعلى امن ايران، هو لما تعدم الناس ده ح يأمن البلد؟ ابدا، ده يوغر الصدور ويعرض البلد لخطر اكبر وحواليكوا ناس عايزة تتخطفكوا، ما تعاديش ناس برة بلدك وجوة بلدك، اللي ح يتعدم ده له اخ، له ابن عم، له جار، له صاحب، لو فيهم واحد بيحبك ح يكرهك، وبدل ما الاستخبارات الاجنبية جندت لها اتنين تلاتة بسبب الكره اللي الناس ح تحسه ح تعرف تجند اكتر

الله يخليك

والنبي والنبي والنبي، والنبي والنبي والنبي

انا مش عارفة اقول له الكلام ده ازاي؟ اوصل له ازاي؟