Monday 22 February 2010

وغلاوة حبيبك النبي ما تكسر بخاطر الغلابة يارب

حلو الحوار اللي منى الشاذلي عملته مع الدكتور البرادعي قوي
ممتازة منى، الوحيدة اللي عرفت تعصره وجابت لنا اخره، المسلماني كان عاقل ومتعاطف زيادة عن اللزوم، وعمرو اديب عبارة عن مادة مشعة للعته والتخلف وطرطش تخلفه على الراجل خلانا مش عارفين نفهم منه حاجة
انا لحد ما اتكلم مع منى الشاذلي ما كنتش عارفة هو مين وعايز مننا ايه ع المسا؟ انا شخصيا فيا اللي مكفيني وياما اتصدمت في البلد دي ومش عايزة اتصدم تاني الحقيقة
والوضع كما فهمته ان المشروع الاساسي بتاعه انه يغير الدستور بحيث يسمح للمترشحين انهم يترشحوا وتبقى فترة الرئاسة زي بقية مخاليق ربنا اربع سنين ومدتين بس، يعني هو لسه ما اتكلمش عن برنامجه الانتخابي لان اصلا الخطوة دي مش مطروحة دلوقت من اساسه لحد ما الدستور يتعدل
وان الناس، زي ما تامر موافي قال لي، عاملين زي اللي ما صدقت جالها عريس، وانه في الاخر قال لها: يا ست انا جاي اشوف عداد النور
طيب... خلاص فهمت كده هو عايز ايه
اذا كان على تغيير الدستور كلنا موافقين.. اتكل على الله
ها؟
ح يعمل ايه تاني بعد حواره مع منى الشاذلي؟
انا بس الناس الفرحانة والناس اللي اتصلت بالتليفون ومنهم واحدة خلت البرادعي يعيط صعبوا عليا ومش عايزة ربنا يكسر خاطرهم ويطلع الموضوع فشنك واخره حوارات تلفزيون وخلاص.. يعني انا متوقعة مثلا انه يجمع توكيلات كتير ويرفع قضية لتغيير الدستور ويجمع توقيعات بالالاف وللا حتى الميت الف واحد اللي على الفيس بوك يعملوا له توكيلات، وفي حالة زي دي كلنا ح نعمل توكيلات ان شاء الله، ولو الشهر العقاري استهبل علينا نوقع بالرقم القومي.. ده اللي انا متوقعاه منه، وده اللي انا متوقعاه من اصحاب هيستيريا البرادعي على الاقل يعملوا له توكيلات
( استروا بقى مرة واحدة في حياتكوا مش ح تعيشوا عمركوا تصيحوا وساعة الجد تدوبوا)
وكده يعني.. اذا ما كانش كده يبقى حرام الناس دي كلها تتعشم
ح نشوف
والنبي يارب، وحياة حبيبك النبي يارب ما تكسر خاطر الناس الغلابة دول
بس منى الشاذلي كانت راااااااااااااااائعة
عموما.. ادي احنا مستنيين

21 comments:

Anonymous said...

There are already ppl who made Tawkelat for him and section of the group on facebook is dedicated for that and also for accepting volunteers.

It all comes down to the ppl not to him. This was his clear message in all interviews and I do hope most ppl understand it is up to us not to any body else.

مواطن مصري said...

البرادعي مش شخص دة رمز و الناس بدور على الفارس الي راكب حصان

الابيض الي هينقذ بهية الي التنين الطائر خاطفها في برجة العالي

عم مينا said...

أيوة كده يا نوارة
أصلك بصراحة استفزتيني شوية اليومين اللي فاتوا علي تويتر من الإحباط اللي كنتي عاملاه للناس

soreal said...

any body knows of an online vid for the intreview?

Anonymous said...

ياخوفى لا فجأه وقت الجد يقطعوا عننا وسيلةالأتصال الوحيده به و هى الفايس بوك يعنى بالمختصر المفيد قبل الليله الكبيره او الرساله الخطيره يشدوا كوبس النت من العمومى و نغرق احنا لازم وسيلة اتصال بينه و بين مؤيديه غير الفايس بوك ده و بخصوص منى الشاذلى عجبنى عمرو أديب اكتر بالرغم من غتاته لكنه كان بيتكلم زى ما اى حد جحش مابيفهمش حاجه بيتكلم لكن منى كانت بتكسر مجاديفه جامد و كل شويه انت مش حاتعرف تعمل مؤتمر انت عايز ايه الضبط و هكذا

أحمد عتمان - Ahmed Etman said...

ظاهرياً، كلام الرجل جميل و معسول، و لكن، وفقاً لنظرية المؤامرة التي كثيراً ما أميل إليها هل من الممكن ما يأتي:
أمريكا تدرك أن نظام مبارك على مشارف نهايته بحكم العمر الافتراضي للبني آدم.
أمريكا غير مقتنعة بجيمي و تشعر بالخطر أن يتسبب بهطله الواضح أن تتفلت الأمور من بين يديه.
أمريكا بالطبع تخشى أن انفلات الأمور يهدد مصالحها و مصالح اسرائيل بشدة خصوصا لو كان من التوابع المحتملة للانفلات أن يصل الإخوان إلى الحكم و هو ما لن تسمح به أمريكا و لو تطلب الأمر تدخلاً عسكرياً.
أمريكا تبحث عن بديل وسطي يعطي انطباعاً أنه تغيير نحو الأفضل و يمارس بعض الإصلاحات المدنية الفعلية، و يتبنى مواقف ذات قبول شعبي أكبر خاصةً فيما يتعلق بقضية فلسطين و يكون أيضاً قادراً على أن يعيد ثقة المقاومة الفلسطينية و دول الممانعة في النظام المصري الذي فقد هذه الثقة و أصبح واضحاً تحيزه للأمن القومي الاسرائيلي، و في الوقت نفسه دون أن يتغير الموقف من اسرائيل بحيث لا يكون هناك نية للعبث باتفاقية كامب دافيد أو توقف خطوات التطبيع، و بذلك تعود عجلة المفاوضات للدوران برعاية مصرية للتوصل إلى وضع يصفي القضية الفلسطينية للأبد.
أمريكا تجد في البرادعي ضالتها المنشودة، فهو الرجل الذي يستطيع أن يوازن كل هذه الأمور بما له من ثقل دولي و خبرة سياسية و ادارية كبيرة، تسمح له أن يقوم بقدر من التغيير و التنمية الذي يرضي الأطراف المصرية و العربية دون أن يقطع أواصر الود مع أمريكا و إسرائيل، و يصادف هذا هوى عند البرادعي أن يعود إلى بلده و ينخرط في العمل العام (بحسن نية لا أستطيع أن أشكك فيها في وقت الراهن حتى ظهور بوادر سوء)
النتيجة:
تفاهم غير رسمي بين البرادعي و أمريكا ألا تعارض أمريكا تقلد البرادعي للرئاسة و ربما تعينه في معركته القادمة لدفع الشعب للمطالبة بتغيير الدستور، عن طريق الدفع برجالها في الصحافة و الإعلام و مراكز القوى و التأثير لتأييد فكرة تغيير الدستور و قبول مرشحين مستقلين و من ناحية أخرى بممارسة ضغوط شديدة على النظام الحالي للقبول بإجراء هذا التعديل ليبدو البرادعي بطلاً قاد معركة شعبية لتغيير الدستور و استعادة الحرية المصرية.
و لكن التساؤل هنا، هل تستطيع أي جهود مهما كانت أن تقنع النظام بتغيير الدستور؟ هل تستطيع أمريكا خداع و طمئنة مبارك بأن ترشح البرادعي لا يعني فوزه و أن أمريكا تدعمه هو أو ابنه حتى يتم المراد و ياخد خازوق هو و ابنه؟ أم أن عوكل ليس بهذه السذاجة؟ (أعتقد أنه مش عبيط)
و ماذا إذا لوح مبارك لأمريكا أن السماح للمستقلين بالترشح يفتح الباب أمام الإخوان لترشيح أحدهم؟ أم أن أمريكا واثقة أنه لا يوجد شخصية إخوانية حالياً ذات ثقل سياسي يجعلها تستطيع أن تفوز أمام البرادعي و أنهم مستعدون لدعمه و تلميعه إعلامياً لأقصى درجة؟ وقتها ستكون المشكلة أنهم لن يستطيعوا أن يصارحوا مبارك بهذا.

هيا قفلت زي الطاولة ليه كدة؟
طيب لما نشوف، يارب اطلع بخرف

مواطن مصري said...

ردا على دوم دوم

امريكا عارضت البرادعي و كانت اكثر الناس بتهاجم البرادعي هما امريكا و اسرائيل


ثانيا امريكا و اسرائيل مش هتستنى البرادعي ولا غيرة عشان تضرب العراق كدة ولا كدة كانو هيضربو العراق


البرادعي اخد نوبل ل السلام عشان أجل الحرب على ايران و كان موقفة واضح و صريح

انة بيرفض استخدام الحرب ضد الشعوب

و ايضا قال ان اسرائيل مش موقعة في اتفاقية منع انتشار الاسلحة النووية و قال ان دي غلطة الدول العربية هي الي وقعت

مش غلطتة بالتالي لسرائيل مش ضمن صلاحيات الوكالة


و بعدن انت كدة بتروج كلام الحزب الوطني


اذا كان البرادعي بتاع امريكا امال عوكل بتاع اية مثلا ً ؟؟؟؟؟؟؟

و بعدين مش عاجبك البرادعي قولنا على اسم

هات لينا بديل

الاخوان اظن المصرين فاقو منن كذبة الاخوان

المعارضة شاشات الجزيرة و الشيوعين الي عايشين في الماضي

الشعب فقد الثقة فيهم

عندك مين هات لينا اسم

اتفضل عندنا said...

Howa e7na yenfa3 ne3mel tawkelat men bara masr?
Elsefara hena 3andaha 7abet 3abat fa yareet te2oleely belzabt atlob menhom aih

أحمد عبد الكريم said...

لا يا نواره
منى كانت فى أسوأ حالاتها
وأسلوبها فى ادارة الحوار كان سخيف جدا

علاء عبد الرحمن said...

الغريبة فينا كشعب مصرى يااننا مش بنصدق ان ممكن تيجى ساعة الخلاص
ولأننا فعلا غلبانين مش بنقدر نصدق نفسنا فبنروح مكسرين مجاديف بعض

ولو حد حاول يصلح نقوم بسرعة نحكم على نيته ونتهمه بالتواطؤ أو العمالة

لأننا وصلنا لحالة الغرام من الفساد والمستبدين مش قادرين حتى نحلم غن ممكن يجيى اليوم اللى تنزاح الغمة وتتطلع الشمس ويظهر النهار بوضوحه وصفائه

فعلا احنا ناس غلابة والله

Auroramoslema said...

انا برضه حسيت ان منى منتهى السخافة الصراحة.. اي نعم هي قالت انها هتمثل الجانب المعارض بس واضح انها مكنتش بتمثل.. دي متسلطة على الراجل بسخافة.. بس اللقاء حلو برضه وفيه كتير

Wild at Heart said...

هو فعلا قدم لنا الحل الوحيد للي احنا فيه "أنا مش عايز المصريين ينتظروا المخلص، أنا عايزهم يخلصوا نفسهم".

أحمد عتمان - Ahmed Etman said...

يا مواطن، مين جاب سيرة العراق؟
و بعدين أمريكا و إسرائيل كانت ضد البرادعي و هو رئيس للوكالة لانه مكنش مطاوعهم زي ما هما عايزين، دلوقت الراجل برة الوكالة و إذا بقى رئيس لمصر ممكن مصلحتهم تبقى معاه مقارنةً بالبدائل الأخرى فبالتالي ممكن أمريكا تدعمه، الدول مش بتاخد مواقف شخصية من حد، الموضوع ببساطة مصالح، ماهو بن لادن كان حبيب أمريكا لما كان بيحارب روسيا و كانوا مسمينه سوبرمان و بعدين عملوه ألد أعدائهم.
و بعدين هو أنا قلت إن عوكل مش راجل أمريكا المخلص لا سمح الله؟ فشر و لا عاش و لا كان اللي يقول عليه كلمة زي دي.
و بعدين هيا ايه بقى كذبة الإخوان اللي المصريين فاقوا منها دي؟
انا اللي شايفه ان الناس بتتعاطف معاهم اكتر و كل ما الحكومة بتحاربهم اكتر كل ما الناس بتكتشف اكتر انهم ناس محترمة و كويسة
و بعدين انا معنديش أسماء
و نفسي لو ظني يخيب و يطلع البرادعي قد الأمل المحطوط فيه و زيادة، احنا نكره؟ انا بس مش عايز أمشي ورا أي كلام من غير مافكر في اللي وراه
احنا كشعوب عربية أغلب مصايبنا في القرن اللي فات كانت عشان كنا بنسمع الكلام الحلو و نردده و نمشي وراه من غير ما نحلل اللي وراه
فكفايانا سذاجة بقى،و مش اي حد يعشمنا نجري وراه عمياني، لازم نفهم من التاريخ ان الأمور مش بتكون غالباً كما في ظاهرها

شمس العصارى said...

و الله معاكى حق
كل الحق
المشكلة الكبيرة فى الغلابة الى ما صدقوا يلاقوا قشاية يتعلقوا بيها
الناس ما صدقت تلاقى حد يقول حترشح و حغير و ممكن نعمل و ممكن نقول و خصوصا لو كان الشخص ده ممكن يلاقى قبول من القوى الوطنية و الاخوان و الناس العاديين
بالاضافة للقبول الدولى
انا قلت الكلام ده من اكثر من شهرين
http://shamsal3sary.blogspot.com/2009/12/blog-post_20.html
عارفة يا نوارة لب الموضوع و اصل الحزن فعلا
ان الناس حاليا عاوزة تعمل و ممكن تتحرك لكن الواقع - حسب مقاييس القوة فقط - يمنع ذلك
فما يقوله البرادعى هو نفس مطالب القوى الوطنية و معناه رحيل مبارك و نظامه
فهل ممكن الناس تقف فى وجه مبارك بجبروة القوة المتحكم فيها - جيش و شرطة - ام نرجوا من الرياح ان تاتى - ولو لمرة واحدة - بما تشتهي السفن
انا محضرتش جنازة رؤساء قبل كده و
نفسى احضر جنازة المخفى ولا شكلهاحنموت قبله و هو الى حيحضر جنازتنا هههههههه
نلتقى بعد الحلم

سكوت هنصوت said...

منى مين الي كانت في احسن حالتها...

منى الحقيقة لم تساعد الرجل على الإطلاق في إظهار رؤية متكاملة...لم تسألة مباشرة عن الياته وعن صحته التوكيلات, كل الكلام تشكيك في تشكيك في شعبيته وقدرته, دي لما كانت بتتكلم عز كانت زي القطة المغمضة, وعز كبسها خمسين مرة...وطلع في اخر الجلسة ملاك واحنا الي ظالمينه!!

بصراحة انا كنت مستفزة جدا منها

Anonymous said...

بصراحة انا كمان كنت مستفزة منها اوي و فعلا هي كانت بتغلس عليه جامد و كان عندها زي نبرة سخرية و تهكم واضحين و تشكيك و كانت متقمصة شخصية تامر أمين على الآخر بصراحة انا بطلت أحترمها من زمان و مش عارفة ازاي عجبك حوارها أنا بقرالك من زمان و بحب دماغك جدا بس في موضوع منى انت منحازة لها جداااااااااااااااااااااااااااااااا
و بجد منى بعد الحوار ده سقطت من حالق

Anonymous said...

حكمة اليوم : البرادعى اللى ما تعرفوش,احسن من عوكل اللى تعرفة,هوة و"ولدة قفة". البرادعى وقف فى وجة امريكا عندما ارادت تسييس اداء الوكالة الدولية للطاقة الذرية ربنا يوفقة ويوفقنا معاة حسن على

Ooshi said...

مش عارفة انا اتعصبت من منى جدا وحاسة انها اتغيرت اوي انا بقالي فترة ماشفتش العاشرة مساء بس لما قلتي ان الحوار كان حلو قلت لازم اشوفه بس حسيت انها عايزة توقعه في شر اعماله وعمالة تقاطعه وماقهمتش ايه نظام الاسئلة الغريبة اللى كانت بتسألها للمتصلين دي؟:" انتي جوزك موافق على المكالمة دي؟!!" ايه السؤال الغبي دة؟

وليه قطعت على هويدا طه؟ مش عيب كدة يا منى؟

وعلى اى اساس بتقول ان فيه ملايين مش هيهتموا بترشيحه؟ عشان الكام واحد اللى جابتهم في التقرير بتوع الأنابل وعبد الله غيث في المسلسل وشهادة الأيزو؟

لأ منى اتغيرت

nabil said...

منى باعت نفسها يا اخواننا من زمان قوي ... و عايز أقول ان البرادعي ممكن يكون له دماغ تانية شوية و نظيفة شويتين بس الواقع مش هيساعده يعمل اللي هو عايزه و أكيد عمنا مبارك مش عبيط و هيعرف يكسب امريكا في صف ابنه سبع البرمبة و لسان حال امريكا الوقتي " اللي نعرفه أحسن من اللي ما نعرفوش ... و اللي ربيناه على ايدنا و في خيرنا أحسن من أي حد تاني " ... و أنا ما أعتقدش ان واحد زي جمال ممكن تتعرض البلاد للانفلات تحت حكمه لأن ابن الوز عوام.

أخيراً أنا خايف على أعوان البرادعي جداً بعد الهيصة اللي هتحصل في 2011 .. خصوصاً ان فيهم ناس بحبها جداً بصراحة .. و ما ننساش اللي حصل لأيمن نور

صدقوني بقى في ان الحال مش حيتعدل الا اذا قامت ثورة من الشعب المصري نفسه ... و التاريخ بيقول كده و ما ينفعش نستنى الفرج و احنا قاعدين في بيوتنا استحاااالة.

حـنــّا السكران said...

رأي وائل عبد الفتاح في مقاله بالأخبار اللبنانية عجبني , و هو يماثل رأي بعض الأخوة و الأخوات هنا .
http://www.al-akhbar.com/ar/node/178682

أقصد بخصوص منى .

ــ الدكتور البرادعي شخصية ممتازة و إنسان محترم و رأيي الشخصي انه إنسان صادق جداً و لديه أهداف وطنية نابعة من حبه لبلده و لأهل بلده , يا ريت يقدر بهمّة الشعب معه يوصل لأهدافه .

Anonymous said...

أنا شفت جزء من حوار البرادعى مع منى الشاذلى و بعدين حسيت أنى مش مطمن له حاسس أنه بيستعبط علشان يكسب تعاطف الشعب يعنى أنا لو ما كنتش أعرف أن ده البرادعى كنت هقول مين العبيط اللى مش عارف يقول كلمتين على بعض ده
و أنا مش مقتنع أن واحد اشتغل فى المناصب اللى البرادعى اشتغل فيها يقعد مرتبك كده قدام منى الشاذلى أمال لو قعد قدام أحمد منصور هيعمل إيه؟!
حاسس أن الراجل ده بيمثل
و كمان بيقولها أنا عمرى ما خططت لحاجة هى بتيجى معايا كده بالصدفة
مش فاهم برده و مش مقتنع بأنها بتيجى معاه بالصدفة و متأكد أنه بيستعبط علشان يكسب تعاطف الشعب اللى بقى بيكره مبارك أكتر من أى حد فى الدنيا
متهيألى لو ابليس رشح نفسه أمام مبارك الناس هتنتخب ابليس
منك لله يا مبارك جننت الناس و خليتهم عايزين يخلصوا منك بأى طريقة