Friday 12 February 2010

هم بيتجاهلونا ليه؟

هو احنا كل شوية نعرف معلومة في وسط الكلام؟ يعني ما عرفناش ان فيه مرشدين سياحيين اسرائيليين في مصر بيتعاملوا مع شركات سياحية مصرية الا لما اتنين ابعدوا؟ ينفع كده يعني؟ هو كل شوية؟ احنا قفانا ورم على فكرة
لا وايه؟ ابعدوهم عشان بيقولوا ان اليهود بنوا الاهرامات، يا سلاااام، امال هم مشغلينهم ليه اساسا؟ هو فيه صهيوني ما بيقولش ان اليهود بنوا الاهرامات؟ ولا حتى اللي مش صهيوني، ده جون ستيوارت قال كده
ومنتظرين ايه من ناس عاملين صورة زي دي وناشرينها في موقع اخبار؟
انا عايزة افهم ايه الذلة اللي ماسكاها علينا اسرائيل عشان ندي لها غازنا ببلاش ونستورد احنا الغاز بفلوس ونقعد نغني ظلموه؟ بنصرف عليها ليه عشان تتقدم اكتر واكتر وتحقق تقدم في الصناعة والبحث العلمي وتستقل بامكاناتها عن امريكا وعن اي حد واحنا كل يوم نبقى تابعين اكتر واكتر وفوق البيعة نسيب عيالنا عواطلية ونشغل لهم العواطلية بتوعهم
فيه ايه المرشد السياحي الاسرائيلي زيادة عن المصري؟ انا مش ح اتكلم لا على تطبيع ولا على اهرامات ولا اسرائيل كيان عنصري غاصب ولا نيلة
انا ليه عيالي قاعدين على القهوة، خريجين سياحة وفنادق، وعواطلية واجيب انشالله حتى فلسطينيين وللا سودانيين وللا اي جنسية تانية، حتى لو عربية، اشغلهم بدل عيالي يعني؟ 
وماحدش يقول لي بيعرفوا لغات كتير، انا شخصيا اعرف ترجمانات ما بيعرفوش يقروا ولا يكتبوا ولبلب في سبع لغات
وخريجين كليات سياحة وفنادق بيعرفوا اكتر من لغة زي القرود، واللي ما بيعرفش عنده استعداد يتعلم لو ح تشغله
هي مصر دي ضرتك يا عوكل؟ ومش مزعلك غير الاهرامات اللي مبنية لناس ماتت؟ طب واللي عايشين؟
ما تبطل تتجاهلنا كده، رد علينا احنا مش عايشين معاك هنا في البيت؟ على طول يا بتاكل يا بتتفرج على الماتش يا قاعد مع صحابك على القهوة وكل يوم والتاني يجيلنا تليفونات غريبة تقول لنا كلام غريب؟

15 comments:

حسن مدني said...

انت بجد مش عارفة الذلة اللي ماسكينها علينا؟ أو عليهم؟
انت مش سمعت تصريحات رئيس لجنة العلاقات الخارجية في مجلس الشعب الموقر، عضو المجلس بالتزوير السيد الفقي
بأن حاكم مصر لازم يكون بموافقة أمريكية، وبمباركة إسرائيلية؟

تحياتي

أبو أمك said...

مرشدين أغبيا صحيح
فيه حد يسيب الغاز المصري المدعم في إسرائيل وييجي يدور على انابيب بوتاجاز هنا

Anonymous said...

مرشدين و صحفيين وووووووو وبيقولوا مفيش تطبيع مع الصهاينة ، أنا شايفة أنهم يسلموا لهم البلد جملة بدل البيع القطاعى ده . آلهى يحرق دمهم زي ماهم عمالين فينا. قاعدين بيتسرسبوا جوة البلد و احدة واحدة لحد ما هنصحى فى يوم من الأيام نلاقيهم فوق دماغنا و ما نعرفش نعمل معاهم حاجة . و الله الناس ديه بيعملوا كده عشان يسلمونا لهم زي البرتقالة المقشرة بالضبط . حسبي الله و نعم الوكيل

wahat_alshohada said...

يا نهار مش فايت
مرشدين سياحة صهاينة علشان يحكوا للسياح تاريخ مصر؟
واكيد بيحكولهم من ايام سيدنا موسى و البردى و ان مصر دى بتاعتهم
انا عايزاكم تسجلوا على الكلمة دى
"ان ماكناش نصحى فى يوم نلاقى اسرائيل محتلة جمهورية مصر كلها
وتلاقى علم اسرائيل مرفوع على عمود النور اللى قدام بيتكم و على الجامع اللى بتصلى فيه والمدرسة اللى عيالك فيها
مابقاش انا ايمان بدوى"

wahat_alshohada said...

على فكرة يا نوارة الصورة اللى بتتكلمى عنها فيها ايه؟ انا مش شايفة اى صور فى اللينك؟

mido said...

@wahat_alshohada


هى دى الصورة

سامي said...

ايمان بدوى شطحتى بعيد قوى

شمس العصارى said...

انا ممكن اعتبر اى حد يسأل التسأولات دى
انما انتى تساليها
دى مبقتش طيبة بقا
هههههههههههههههههه

wahat_alshohada said...

والله العظيم
لو اسرائيل عايزة و جالها مزاج تحتل مصر هتعملها فى كم ساعة اصل ايه اللى هيمنعها
جيش ومفيش لغاية الاسماعيلية
والله اعلم فيه فين اساسا
تدريب وسلاح مش باين
ولا حتى حد بيسمع صوت طيران
حد بقى بيسمع صوت اى طياات حربية؟
انا ماسمعتهاش الا على معبر رفح
ال اف 16 الاسرائيلية و الزنانة بس

شعب ومقاومة شعبية او دفاع مدنى مفيش
كلة بيعد نقط الماتشات على رأى نوارة
علشان ترتيب الدورى و الكاس
والحاجات الاهم دى

هما على طول فى حرب و قتال و تدريب و استعداد
واحنا على طول فى ايه غير الكورة
واخبار الفنانين و الرقصات؟
الا من رحم ربى
ودول مش هينفعوا خالص
دول حبة يتعدوا على الصوابع
وعقبال ما تفوق شعب و امة يكون خلاص
البقاء لله

يحيى إبراهيم said...

معاكي حق يا ايمان
و الله معاكى حق

و ساعتها مش حنقول ايه دا و ازاى ؟
و إمتا و فين ؟

لا حنبقي مستعدين نفسيا و معمولنا ضبط مصنع على كده كمان

الناس اللى دمها جري زى السيول في سيناء
راح هدر خلاص

و مش من دلوقت
لا من يوم ما المعاهدة الباطلة اللى غرسنا فيها السادات
له من الله ما يستحق

صنع لنا تورتايه حلوة أوي
في أكتوبر 73
ويوم ما حط إيدة في أيد القذر بيجن في 17 سبتمبر 1978م

جاب جاروف تراااااب و زينها بيه.
و اتفضلوا أطفحوا بالسم الهاري.

Tamer said...

@ استاذة ايمان بدوي

بعد اذن استاذة نوارة انا عايز احيي حضرتك

انا كنت من قراء دعوات و نشاط حضرتك من ايام
(Arabian 2000 )
و دي كانت الفترة اللي كنت بدأت أفهم فيها ايه اللي بيحصل في الدنيا

TunisianGuy said...

لا أجزم بصحة الاتهامات من عدمها، لكن هناك نقطة في الشريط الثاني تستحق الإهتمام، وهي أن رفيق الحسيني في اللقطة الي في الصالون كان لابس قميص نص كمّ و في غرفة النوم يلبس قميص كمّ، ما يعني أن اللقطتين منفصلتان وبالتالي بأن الأمر قد لا يتعلق بالتحرش بموظفة أو بمتقدمة لوظيفة.
في صورة ثبات انفصال اللقتطين فإن ذلك يدل على أمرين:
ـ سقوط تهمة استغلال النفوذ والتحرش (مع بقاء تهمة القضية الأخلاقية، لأني لا أعتقد أنهم داهموه في بيته و صوروه )
ـ سوء نية الجهة الي فبركت الشريط و قدمته على أنه تحرش بموظفة

wahat_alshohada said...

الف شكر يا ميدو ربنا يكرمك
------
زقزوق
بكرة تشوف ان مكنش فى زماننا هيبقى فى زمن العيال قريب جدا
احنا لا نملك اى مقومات للدفاع عن الوطن
ثم اننا عادينا الامة العربية و الاسلامية كلها
من الجزائر لقطر لتركيا لايران
يعنى من الاخر لا احد سيقف معنا
شعب و تعبان و تافهة و يجرى وراء التفاهات .. انظر مباريات الكورة..
انا لا اتمنى ذلك لكن احكى من الواقع
------
تامر
ربنا يكرمك يااااه متابع من ايام اربيان 2000
برافة عليك والله يبارك فيك
--------------
يحيى ابراهيم
بارك الله فيك
والله العظيم اتمنى ان تخيب ظنونى فعلا
___________
الاخ من تونس
انا اعتقد ان الكلام و الفضائح مضبوطة 100% على الاقل
صاحبها لم ينكر ولم يفتح فمة
وهو وشلة عباس من نفس النوعية
انظر دحلان ..
حسبنا الله ونعم الوكيل

Anonymous said...

علي فكرة القانون يمتع غير المصريين من العمل بالارشاد السياحي
وبالتالي يمكن تنظيم حملة لاخراج كل من هو غير مصري من هذا العمل
ويبقي ضربنا كذا حمار بطوبة
وارجو من القانونيين اتخاذ اللازم نحو هذا الامر

rifaa said...

For information on Egyptian gas prices to Israel compared to Russian gas prices sold to Israel, read what I wrote in my blog: http://rifaatahtawi.blogspot.com/2010/02/egyptian-natural-gas-prices.html