Sunday 10 May 2009

حالتين انفلونزا خنازير؟ حد يتأكد

تحديث:
خلو العريش من اي حالات
الحالة اللي اتحجزت في مستشفى العريش طلعت سلبية، انفلوانزا عادية وده خبر حلو لان معناه ان الناس لما بتشك بتروح المستشفى، مافيش حد هرب اللي قال لاشرف ايوب الكلام ده بيألف، والاحتياطات اللي متاخدة ان لو لا قدر الله طلع فيه حالة بتترحل على طول لتلات مستشفيات في القاهرة هم اللي فيهم الحجر، على حسب كلام آبي، المعادي وواحدة تانية انا نسيت اسمها وواحدة تالتة ابي نسيت اسمها، ده انتوا ح تعيشوا احلى ايام معايا انا وابي. وبيتم اخطار الجيش، ما اعرفش هل ده بشكل عام وللا في سيناء بس عشان منطقة على الحدود، باقول ما اعرفش
يبقى كده تاني، العريش كان فيها حالة اشتباه والحمد لله طلعت سلبية
اقول تاني؟ سلبية يعني ما عندهاش انفلونزا الخنازير مش سلبية يعني وحشة
بالنسبة للحالة اللي في القاهرة مش فاهمة حاجة اسألوا مصطفى عشان انا مش فاهمة منه حاجة.

تحديث:
حالة اشتباه واحدة بس في العريش
كلمت ابي وعملت اتصالتها بناس بتشتغل هناك وقالت لي ان فيه حالة اشتباه واحدة بس في مستشفى العريش للحميات
ح تتصل بالليل بمصدر تاني ح تجيب لي اسم الحالة وح نعرف اذا كان فيه تأكيد وللا لا
سألتها عن موضوع الهروب قالت لي ان المصدر اللي قالها قال مافيش حاجة من دي بس ح تسأل تاني بالليل وسنوافيكم بالاخبار
اي حد له اتصالات او بيشتغل في الحميات يوافينا باي اخبار ونبقى احنا ننقل الاخبار احسن
ما نستناش
اللي يعرف بوجود حالة اشتباه يعمل زي ابي كده ويسأل كذا مصدر في مستشفى الحميات وكل ما نعرف حاجة ننزلها عشان نعرف حجم الموضوع
مافيش حاجة تخوف الناس غير التكتم... ووزارة الصحة طبعا
بالليل ان شاء الله نجيب لكوا اخبار اكثر تفصيلا واللي عنده اخبار غير مصطفى اللي بيثق في وزارة الصحة يقول لنا

ح يتأكد ازاي؟ والله ما انا عارفة، اهو نصيح لهم يمكن يردوا علينا
الخبر ده جاني على الميل على مجموعة الحقيقة من اشرف ايوب
ثاني حالة أنفلونزا الخنازير بالعريش
ظهرت أول حالة إصابة بأنفلونزا الخنازير بالعريش والمصاب يدعي سليمان محمد العيدي الحجاوي احد مواطني العريش يعمل بمنفذ العوجة المشترك مع الأراضي المحتلة, وقد تم احتجازه بمستشفي الحميات بالعريش ثم قام بالهرب بعد اكتشاف أعراض المرض عليه، وعندها قام المركز الحضري بحي الصفا بتطعيم أسرة المصاب وتطهير وتعقيم منزلة.. وما زالت جهات الاختصاص تبحث عن المصاب الهارب.
تم ضبط سائحة بريطانية بمطعم بساطة مصابة بأنفلونزا الخنازير.
------------
هو هرب ليه؟ هو فاكر اللي عنده انفلونزا الخنازير بيندبح؟ وللا ح يمشي يعطس في وش الناس وللا... ايه المخ ده اسم الله على مقامه؟ ده ح يموت نفسه كده
طب ووزارة الصحة ما طلعتش بيان ليه؟
ولا ح تطلع على فكرة، انا عارفة، انا عارفة والله، بس هو هرب ليه بجد يعني، لا نفسي ادخل في مخه، الواحد لما يصاب بانفلونزا الخنازير يهرب ليه؟
المفروض يوزعوا اوصافه بقى لبعدين ينشر المرض.. بس هو كده ح يموت، لو ما اخدش التامي فلو وارتاح ح يموت
المهم يعني، ادي احنا عرفنا ان فيه حالات في مصر قبل ما وزارة الصحة اللي فيه ناس بتثق فيها تتكلم ولا تطلع بيان
الحالة اللي قالوا فيها اشتباه بقالهم يومين مش بيقولوا سليمة وللا مصابة
وده معناه انها مصابة، ماهي لو مش مصابة ما كانوش استنوا يومين عشان يتكلموا ويقولوا سليمة
ساكتين ليه مش يكلمونا؟ احنا ناس مؤمنين وراضيين بقضا ربنا بس الكدب بيعلي درجة الخطورة، هم مش ح يبطلوا كدب بقى؟ وللا ح يعملوا زي انفلونزا الطيور ونعرف اننا الدولة التالتة في الوباء من منظمة الصحة مش منهم؟
والظاهر الست اللي طلعت في الجزيرة تقول فيه رقابة علينا من منظمة الصحة كدابة هي كمان، عشان لو كل ده بيحصل ومنظمة الصحة ما بتنطقش؟ مش ممكن طبعا
ما بلغوش منظمة الصحة كمان؟ ده لما بيشتبه في حالة في زنزبار منظمة الصحة بتقول خبر لمجرد الاشتباه
الله يخرب بيوتهم

43 comments:

مواطن مصري said...

ينهار اسود بيقولو اسعار التايمفلو دة ارتفعت الضعف

Unknown said...

I believe that you should wait until the official confirmation before distribute this kind of critical information. No point to make panic then realize that it was wrong.

مهندس مصري بيحب مصر said...

يعني الكلام ده مؤكد ؟
أستر يارب

Unknown said...

لا انا ما اعرفش الكلام ده مؤكد وللا لا

بس المؤكد انهم من يومين قالوا فيه حالة اشتبهاه بنسبة كبيرة وبعد كده سكتوا عليها

الحالتين اللي في العريش باقول اشرف ايوب هو اللي باعت لي الكلام ده

والعنوان: حد يتأكد

لكن برضه انا ما عنديش ثقة في البيانات الرسمية

خصوصا بعد تصرفهم العجيب مع الحالة اللي قالوا فيها اشتباه من يومين وما جابوش سيرتها تاني

ويا اخ محمد

لا مش غلط

انا من حقي اسأل يعني
وما بيتكلموش ولا يردوا علينا

وللا تحب يعني يبقى فيه حالات وحضرتك ما تعرفش عنها حاجة لحد ما نبقى زي انفلونزا الطيور؟

على الاقل يردوا علينا في االحالة اللي بقالهم يومين بيفحصوا فيها

دول لو بيفحصوا المجرة كان زمان النتايج طلعت

Unknown said...

انا ح اسأل ناس في العريش واقول لكوا

TAFATEFO said...

طب متريحي نفسك من القصه دي خالص

احنا لو أعلنا هتلاقيها في بيان منظمة الصحة العالمية .. هي بتطلع أبديت أو أكتر كل يوم كلما جد جديد

تابعيه هنا .. ولو ظهرت أي حالات إصابة دي مش كارثة ولا حاجه ومحدش هيخبيانتوا بتسبقوا الأحداث ليه .. جايه جايه .. ودي مش مشكله .. متستعجليش ومتقلقيش

بالنسبه للحالة بتاعة أول امبارح .. بعتلك رسالة من امبارح بس لسه بيندنج مش عارف ليه

TAFATEFO said...

جابوش سيرتها ايه .. أعلنوا انه مثبتش إصابته بانفلونزا الخنازير

انتي مستعجله ليه .. ولما أقولك جايه جايه بتقولي لا ان شاء الله مش جايه

حضرتك محيره

TAFATEFO said...

موضوع اللي بيحصل كمان مع الحالات المشتبهة قولتلك عليه .. وده يوضحلك ليه هرب

Unknown said...

وانت بتبعت رسالة ليه
مافيش رسالة وصلت

طب ما تقول هنا

الشخص ده
سليمان محمد العيدي الحجاوي

مالوش ذكر وعملت سيرش على اسمه وعلى العريش ومافيش اي حاجة بخصوصه

وسياسة التخبية والكدب هي اللي بتخوف

الحالة اللي بقالها يومين

مالها؟

مالها؟

ما تقول هنا
هو سر؟

وبعدين هو انت متحدث باسم الصحة

الصحة ما طلعتش بيان بخصوص الحالة المشتبهة ليه؟

mado said...

نوارة انا قلبي وقع تحت الكرسي لما قريت البوست دا :(

بس نزلت جبته تاني لما قريت تعليق مصطفي.
شكرا يا طفاطيفو.

متتصورش لو الفيرس دا دخل مصر ممكن ايه الي يحصل.
تخيلي كدا واحد مصاب وهو ميعرفش .او جاتله الاعراض بس مفكرش يكشف لانه افتكرة دور برد عادي.ولانه كمان معهوش تمن الكشف.
وركب المترو.
او ركب اتوبيس نقل عام.
هتبقي كارثة
لو المرض دا دخل المصر.

لو سمحتي يانوراة خليكي متفائله شوية.

مواطن مصري said...

بكرة يقولك فية اضهاد لمرضى و منظمة اقباط المهجر تعمل زي ما عملت في الخنازير هههههههههه

mido said...
This comment has been removed by the author.
TAFATEFO said...

أنا مش متحدث باسم الصحة .. كل الحكاية اني أعرف ناس الوقائي

حضرتك اللي متابعتيش .. أنس الفقي وعبدالرحمن شاهين وعمرو قنديل نفوا .. وكانوا عايزين الإعم يبطل ينشر جالات الاشتباه

مليون إشاعه طلعت عن ناس مصابه .. وهي الناس فاضيه تلاحق ورا الإشاعات

لما يبقى في حاجه هتعلن .. وحتى لو حضرتك مش واثقة فيهم .. مقدامكيش طريقة تانيه تتأكدي بيها

يا مادو .. هو لو واحد عنده انفلونزا ركب أوتوبيس كل الناس هتتعدي ويجيلها انفلونزا؟؟

حتى الآن المركد ان المرض بينتقل دروبليت .. ومفيش حاجه اسمها انه المكان اللي يمشي فيه كل اللي فيه يتعدي

ما هم الناس اللي مهولين الموضوع هما اللي عاملين كده

فيه حالات مؤكدة في مصر؟؟ لا .. لغاية دلوقتي

هيحصل؟؟ طبعاً طبعاً هيحصل .. مسألة وقت

دي كارثة؟؟ لا

TAFATEFO said...

هقولك هنا

المشتبه فيه بيحجز في أوضة في المستشفى ويتعين عليه حراسة من الشرطة .. احنا الدولة الوحيدة اللي تعمل كده وده مش صح

مفيش وعي علشان كده بنعمل كده

الحاله بتاعة من يومين .. المعامل المركزيه قالت انها مش بوزيتيف .. واحد قاللي كلام مش مقتنع بيه انها زوونوتيك من الخنازير ودي حاجه نادره جداً وريبورتيد حوالي 50 حاله بس

كل واحد هيشتغل في مزرعة خنازير وهيجيله دور انفلونزا هيخاف انها اتش ون ان ون مع انهم مأثبتوش ان الاتش ون ان ون منتقل للإنسان من خنزير أصلاً .. ملقوهوش في الخنازير

نظرية المؤامرة ده حضرتك اقتنعي بيها براحتك .. لكن محدش يلعب برعب الناس

مش كفايه منظمة الصحة العالمية .. بتستعجلوا الفتنة الطائفية .. بتستعجلوا انفلونزا الخنازير

طب لو قالولك ان في حالة انفلونزا خنازير .. تفتكري انها هتفرق معاكي أي حاجه

ولغاية ما يقولولك ان في حاله عمرك ما هتصدقي ان مفيش

TAFATEFO said...

متستهونوش بنشر الرعب بييييييين الناس

أرجوكي للمره التانيه .. لو وسيلة إعلامية واحدة تبنت طرح التعتيم هتبقى كارثة أكبر من مشكلة (مش كارثة والله العظيم) اتش ون ان ون

مدير التحرير said...

لن يحدث أي شيء اذا دخل الفيروس الى مصر أو غيرها ، هي مجرد انفلونزا دعوا عنكم التضخيم الاعلامي

77Math. said...

آمين

TAFATEFO said...

اللي بيثق في وزارة الصحة.

في ناس صعب جداً جداً تقنعهم بحاجه

براحتك

وعنداً فيكي جايه جايه .. افضلي مرعوبه بقى

يطمنوكوا مش عاجب .. يقولولكوا الحقيقه مش عاجب

افضلي بقى على أعصابك لكل أصحاب الإشاعات والمتاجرين برعب الناس

TAFATEFO said...

الإعلان في بيان أو أكثر يومياً

السوم السابع بتتابع البيانات دي

عاااااااااااااااااااااادي

لما يبقى في حاجه هيقولوا .. تصدقي بقى متصدقيش متقدريش تعملي حاجه

http://www.youm7.com/News.asp?NewsID=97722

TAFATEFO said...

ده وسائل الإعلام في متابعتها الغريبة وتلهفها وراء نشر أخبار الاشتباه خلتهم يقولوا نقول ان في حالة ونرتاح ونريحهم

Unknown said...

بالنسبة للعريش عندنا كذا حد في العريش ونقدر نعرف من كذا مصدر

بالنسبة لبقية المحافظات عايزين ناس تبقى عارفة ومتابعة

وانا ح اكلم ابي دلوقت اشوفها كلمت مصدر تاني عشان نعرف هل حالة الاشتباه لسة وللا تأكد انها سليمة وللا عيانة وللا ايه التفاصيل بالظبط

بالنسبة للحالة اللي هنا في القاهرة انا شخصيا مش عارفة عنها حاجة

اللي عارف يقوم

Unknown said...

يا مصطفى اللي ينشر الرعب بين الناس عدم المتابعة

لازم الناس يتم اخطارها بحالة حالة
وهل هي اشتباه وللا لا
ولما تتفحص ويتأكد سلامتها يتم اخطارهم

ويتعرف كل حاجة بالتفصيل ويرغوا كتير ويقولوا

ده اللي يطمن الناس

امبارح لسة شايفة عند احمد عبد الفتاح صور خنازير ميتة

طيب الخنازير دي مقتولة
وللا كانت بتجري في الشارع
وللا عيانة

طول ماهم مدينا الطرشا كده ماحدش ح يطمن

اللي يطمن انهم يكلمونا

وسياسة الطناش عشان قال خايفين الناس تتخض هي اللي بتخليني ما باصدقهمش لو حلفوا على المية تجمد

كفاية حاتم الجبلي يعني

ده اسطى جزار مش دكتور

مدير التحرير said...

و بعدين الخنازير لا تموت من انفلونزا الخنازير

مدير التحرير said...

و لعلمكم الانفلونزا العادية "بمصطلح الناس" تقتل سنوياً أكثر من نص مليون بني آدم و للآن لم تقتل انفلونزا الخنازير الا حوالي 47 شخص
فالموضوع عادي ، لا داعي للتضخيم

TAFATEFO said...

مصادر؟؟

والمصادر هتعرف منين ؟؟

كله من المعامل المركزية

تليفونك ماله؟؟

معرفتش أتصل بعتت رسالة صوتية

TAFATEFO said...

بالله يا نواره ركزي شويه

مفيش أي دليل على ان اتش ون ان ون مصدره الخنازير

هي طبعاً خنازير عيانه علشان كده أعدمت .. لكن مش باتش ون ان ون

TAFATEFO said...

معلش يا مادو

أنا كنت بكدب

موضوع ان واحد يركب أوتوبيس ينقله لكل اللي فيه فعلاً مش صح .. لكن في الأماكن المزدحمه تنتشر العدوى

المفروض الناس تعمل الإرشادات دي في حالة ظهور حالات إصابة

اغسل يديك بالماء والصابون باستمرار (الهاند هيجين)

تأكد من تغطية فمك وأنفك أثناء العطس (يفضل بمنديل كلينكس والتخلص منه مباشرة) كوف اتيكيت

ابعد يديك عن أنفك وعينيك

التطهير الستمر للأسطح

التزم البيت عند الشعور بأعراض الانفلونزا واستدعي الطبيب

تجنب الأماكن المزدحمة

المخالط والراعي لمصاب مؤكد بالمرض يحرص على التواجد على مسافة أكثر من 6 أقدام بينه وبين المريض ولو هيقترب المفروض يلبس ماسك

لو لا قدر الله انتشر المرض في مصر (وده مش معناه وجود حالة اصابة .. ده معناه ان تظهر حالة بعدها كذا حاله .. بعدها كذا حاله بصورة تدل على نشاط وانتشار المرض ساعتها نبقى ممكن نخاف ونترعب

لغاية دلوقتي كل الدنيا بتهاجم منظمة الصحة العالمية على الرعب اللي عملته وبيتهموها ان ده لصالح شركات أدوية

حتى الآن لا يمكن تصنيف الفيروس انه قاتل .. كل الموضوع انه نيو سترين ملناش منها مناعه لأن مسبقش إصابتنا بيها أو التطعيم ضدها

خطة وزارة الصحة معموله من سنة 2007 واللي عايزها يقولي أبعتهاله .. وخطة ممتازة وتنفيذها بيتم بصرامة وتجاوز كمان

أرجوكم بلاش الرعب .. الخوف من أي واحد تظهر عليه الأعراض وميبلغش وينشر المرض خوف من انهم يعزلوه ويسيبوه لغاية ما يموت

بلاش تنشروا الرعب .. المرض مش قاتل ولا حاجه .. لغاية دلوقتي نسبة الوفيات مش كبيره أبداً .. وسبب الموت في المكسيك ان قبل اكتشاف المرض كانوا فاكرينه حاجه عاديه وهترو فتأخروا في التعامل بجدية مع المرض .. أمريكا مفيهاش غير حالتين وفاة من بين 2245 إصابة

المرض موجود في دول كتير جداً (27 حتى الآن) لحالات فردية أثرها حالة واحدة ومنتشرش وبدون وفيات

متترعبوش على الفاضي .. اترعبوا على حاجه تستاهل

وبطلييييييييييييييييييييييييي .. اللي بتعمليه ده مش في مصلحة أي حد

ممكن تفهميني لو ان الوزارة فعلاً بتخبي كلامك ده ايه هدفه؟؟ هتقولي للناس اقعدوا في بيوتكم محدش ينزل منها؟؟

فكري .. من فضلك

Empress appy said...

هههههههههههه مستشفى القبه كوبري القبه هههههههههههههه
ومش فاكره التالته مش كل شويه اتصل اعرف حولى رصيد شكرا ههههههههههههيييييي
هما دول اللى فيهم حجر صحي وبتتحول لهم الحالات فى حاله لوظهرت فى طياره من بتوع الجيش
علشان يلحقوها مفيش اي حاجه هناك خالص لو فيه هجيبه يقعد وسطنا نيهاهاهاا

Empress appy said...

اه بالنسبه للجيش هو قالى اه لازم يتم اخطارنا اعتقد علشان دي تبع حدود وهما اللى مسكينها واتصلت تاني بحد قريبى فى الجيش تقريبا العيله كلها جيش ههههههههههه
فى سينا اكد ليه والله دلوقتى قالى الجيش لازم يعرف والاخطارات بتمشي فى كل مكان امن الدوله والجيش المخابرات بتاعت الجيش هى اللى بتعرف الموضوع
بس كان
معكم ابى اقعدوا بالعافيه من التجمد التالت فرع العريش

احمد سعيد said...

مستهعجله على ايه يانوارة

هتيجى هتيجى

متستعجليش

TAFATEFO said...

الحالات المشتبهة (اللي عندها أعراض انفلونزا عادية) على المناف البرية أو الجوية بتروح الحجر بيتاخد منها عينة وتفضل تت الملاحظة .. لو كان طفل بيروح منشية البكري .. في أي حته أي حاله مشتبهه بتروح أقرب مستشفى حميات .. سواء اتش فايف ان ون أو اتش ون ان ون .. وتفضل في العزل تحت الملاحظة

المشتبه بيتاخد منه عينه تتحلل في المعامل المركزية

لو كانت بوزيتيف .. بيتاخد منه عينتين واحده بتروح المعامل المركزية والاتانية بتروح الفيريفينج لابس زي معامل الناميرو في مصر . لو كانت بوزيتيف برضه

تبقى دي كونفيرميد كيس

موضوع الـ 3 مستشفيات ده مش فاهمه بس هتأكد منه

أي كونفيرميد كيس هتعلن بكل بساطة .. في بيان يومي لـ عبدالرحمن شاهين بيعلن فيه أخبار الاشتباهات والموقف

الموضوع مش عامل رعب في الدنيا ولا حاجه .. لأن الوف مش من ده لأنه مش شرس .. هو بينتشر بسرعه بس مش شرس .. الخوف من المرحلة القادمة (زي ما قال بنك امبارح) الخوف من تحور الجين ليكون أكثر شراسة

ايه المهم .. المهم ان أي واحد يعاني من أعراض انفلونزا ويكون جاي من سفر أو مخالط لخنازير أو شاكك في نفسه يتصل بـ 105

هو الفيروس قاتل .. لا

بخلاف المكسيك .. أمريكا فيها 2500 كونفيرميد كيسز و حالتين وفاة

كندا فيها 280 كونفيرميد كيس وحالة وفاة واحدة

كوستاريكا فيها 8 كونفيرميد وحالة واحدة

باقي دول العالم في 25 دولة سجلت إصابات بدون وفيات

TAFATEFO said...

المعادي وكوبري القبة وحلمية الزيتون دول مستشفيات جيش

انما أي مستشفى حميات فيها عزل

أكيد الكلام ده عن الجيش

mido said...

مصطفي : ايه رأيك تكتب المصطلح العلمي بالانجليزي او ترجمته بالعربي ؟ و بلاش الطريقة اللي بتستخدمها دي

Kalimalhus said...

شكرا لمصطفى و آبى للأخبار و التطمينات .. حصلنا الرعب يا ست نوارة هو إنتى كل حاجة بتعملى فيها أزعرينة كده و الا إيه؟؟

انا متخيلك دلوقتى قاعدة قدام الكمبيوتر لابسة كمامة و جوانتيات مطبخ من اللى بيجيبوا بيهم الحاجة من الفرن و كل شوية ترشى الشاشة و الكى بورد ديتول و تقوللى همه ولاد اللذينه دول أكيد حد فيهم عنده فلفلوزه و مدكن..

عععااااططططسسسسسسيييييييي.. طرطشت عليكم؟.. لا مؤاخذه.. هو أنا كنت بقول إيه؟

mado said...

ياطفاطيفو
انا من غير اي حاجة بغسل ايدي عمال علي بطال بالديتول دا الطبيعي بتاعي.وبتسخدم المنديل بكثرة
لاني عندي فوبيا من الامراض عموما.
وتقريبا المرض دا لو ظهر ممكن اتعدي وانا في بتنا :(
لاني بلقط اي عدوة بسرعة للاسف.
انا كدا بدأت اقلق.

وبعدين انت بتقول تجنبو الاماكن المزدحمة طيب الناس الي بتركب مترو والناس الي بتركب الاتوبيسات دي وضعهم ايه.
تخيل كدا اتوبيس نقل عام وقت خروج الموظفين وكله ناس كبيرة وفيهم حد عنده عدوة.
يبقي اكيد لازم حد هيلقط.
للاسف الوضع مش مطمئن

تقدر تقلي الناس ازاي هتتجنب الزحام.اذا كان كل حاجة في مصر زحمة من .
طوابير العيش الموصلات الزحام في الفصول والجامعات الشوارع.

اتمني يخيب ظني والموضوع يعدي علي خير لان المرض دا لو دخل مصر هتبقي كارثة فعلا.

mado said...

مصطفي عايز منك طلب.
عايز موقع او اي روابط فيها معلومات فيها ملعومات عن المرض وعن طبيعة الفيرس وكيفية انتقاله والعلاج منه وكدا يعني.
بس يكون مصدر موثوق منه.
وشكرا

TAFATEFO said...

مادو .. كل المعلومات عن الفيروس والمرض ول الأبديتس على موقع منظمة الصحة العالميةعلشان كده يا مادو بيقولوا انك لو حسيت بالأعراض تلزم بيتك .. لو كل الناس التزمت بالتوجيهات مفيش خطورة ان شاء الله

عموماً أي مشتبه بإصابته بيعزل .. وعلشان كده من الأفضل منخوفش الناس على الفاضي

الإشاعة ان في مصابين وان الحكومه لا تؤدي دورها وبتنفي مع زجزد إصابات (رغم ان ده مش منطقي) معناه شلل كامل في الحياة

وزارة الصحة بتطلع بيان يومي .. في خط ساخن لأي واحد مشتبه في انه مصاب بانفلونزا الطيور أو الخنازير .. المصاب بيعزل وبيتم التأكد من عدم إصابة المخالطين له

الفيرس مش شرس .. وده من رحمة ربنا .. الواحد لو أخد العلاج في أول 48 ساعه هيشفى ان شاء الله .. وفيات المكسيك كانت نتيجه لظروف تانيه

أعداد الوفيات الناتجه عن المرض مش كبيره

مفيش حالياً أي حاجه تدعو للخوف حتى لو سجلت إصابات بالمرض .. مفيش أي داعي للخوف والرعب

TAFATEFO said...

مادو

في كمان ملف بالعربي عاملينه بتوع الوزارة لشرح طبيعة المرض وكيفية التعامل معاه ووووو

لكن موقع منظمة الصحة العالمية أوضح بكتير

بس لو احتجته قوللي وأبعتهولك

Unknown said...

يا مها بدل ما اعمل بابلش لتعليقك عملت ريجيكت
اكتبيه تاني

mado said...

شكرا يا مصطفي علي المساعدة.
وعلي المعلومات القيمة دي.
وانا هكتفي بمنظمة الصحة العالمية لاني بصراحة اثق فيهم اكتر .
شكرا : )
ونتمني ان المرض ميوصلش مصر او حتي يكتشفو علاج ليه اكتر فاعلية.

Unknown said...

Dear Nawara,
Please read my former comment again. I said you shouldn't "distribute" this information. I didn't mention the "explanation about the announced candidate cases" which we have the right to ask about by logic. Now, after the confirmation you published that the information was fake, I think I was totally correct. It was someone who want to show off and act like an important person who know more than others. So, he told the lie about the positive case that escaped from the hospital.
In Japan, where I am studying, we had the same from the some Egyptian student. They keep sending this fake info about positive cases in Japan. Two days ago, Japan confirmed the first case, however, those student didn't send although they are in the same city where the case where found "Narita".
It seems its some thing in our genes. 3awzin ganaza we nishb3 latm.
Sorry for witting in English as I don't have Arabic layout on my keyboard.

Unknown said...

I think Mr Tafatifo did a great job. I totally agree with his posts. Panic distribution with either fake or correct info will lead to negative results anyway. However, the main problem is that we misstrust the government.

مدير التحرير said...

كلام الاخ مصطفى هو الصحيح لأنه الحصل بهذا المرض للي بفهم بالمصطلحات العلمية هو drift
و ليس shift