Saturday 16 May 2009

جامدة جداااااااااااااا ههههههههههههه

http://www.thedailyshow.com/video/index.jhtml?videoId=227325&title=the-pageant-of-the-christ

The Daily Show With Jon StewartM - Th 11p / 10c
The Pageant of the Christ
thedailyshow.com
Daily Show
Full Episodes
Economic CrisisPolitical Humor

21 comments:

Kalimalhus said...

الراجل ده ما لوش حل...ههههههههههه

بس إنتى قصدك جامدة جدا على مس كاليفورنيا طبعا...

الغريب إن الولاية كلها أصلا صوتت على عدم قبول زواج الشواذ يعنى إحصائيا على الأقل أى حد من الولاية تسأله يبقى غالبا هايدى نفس الإجابة.. بس الحكاية كلها كوميديا كأنها فيلم.. و خصوصا الحاج ترمب.. الراجل ده بيقلبلى بطنى مش عارف ليه؟؟ بيفكرنى بشلة المنتفعين بتوع النهب المفرط اللى عندنا بيتهيألى كده إنه له أصول شرق منوفية.. مع الإعتذار لكل المنايفة..

الفقرة اللى بعد كده فى الحقيقة مهمة لأن فضيحة الست رئيسة الكونجرس و معرفتها بالتعذيب إلخ هى أحد الموضوعات الرئيسية دلوقت فى الإعلام الأمريكى..

Unknown said...

هههههههههههههه
لا طبعا قصدي على الحلقة يا شقي

واكيد انت قصدك على الحلقة طبعا
انا مش عارفة الواد ده بيستعطى ايه؟

بص قايل ايه على زيارة البابا


بس انا ما رضيتش انزلها بالرغم من انه متعاطف مع الفلسطينيين في بوست لوحدها لانه قليل الادب الصراحة
يهودي مهما كان، حاطط برضه بابا الفاتيكان في دماغه

http://www.thedailyshow.com/video/index.jhtml?videoId=227337&title=Roadus-Triptum

Unknown said...

لا شوف دي بقى

http://www.thedailyshow.com/video/index.jhtml?videoId=227351&title=Moral-Kombat

حلوة قوي

واللي بعدها

مواطن مصري said...

يا نظيف يا جامد شوفي البقين دولت يا نوارة
:) :D
البحر الميت - محرر مصراوي - قال الدكتور أحمد نظيف رئيس الوزراء ردا على رئيس العلاقات الخارجية الامريكية جون كيرى والذى حمل على الفلسطينيين وخاصة حركة حماس مسئولية تردى الاوضاع "لا ينبغى علينا ان نفكر فقط فى القاء الصواريخ ، ولكن لماذا القيت هذه الصواريخ؟ .
وأضاف "" يجب أن يكون الاستثمار فى الناس والتنمية، فكيف يمكن عمل تنمية فى ظل الاغلاقات سواء بالضفة أو فى قطاع غزة؟ ، فلم تعطوا الناس أى حل ".

http://www.masrawy.com/News/Egypt/Politics/2009/may/16/nazif.aspx

Unknown said...

ده على اساس ان بنت خالتي هي اللي قافلة غزة

Unknown said...

Gay marriage is a taboo in US. Most people disagree with it but no one dares to publically announce his opinion for fear of being charged with discrimination against gays. This is an area of controversy between the right of free speech and freedom of civil rights.

What California State did is something worth studing. Civil right groups defending gay marriage are very strong in California and managed to pass a law recognizing gay marriage. No official groups or individuals could oppose that despite the wide spread rejection of gay marriage among California residents. California State put the issue for public voting and the majority voted no for gay marriage. The gay groups are disappointed, but they have to yield to what the majority have chosen.

Kalimalhus said...

الله يحظك...ههههههههههههه

بس اللقطة بتاعة البابا اللى غالبا كان قصدك عليها لما قلتى على الراجل قليل الأدب دى من كلاسيكيات تراث الرحومة مارلين مونرو.. متهيألى تم إستخدامها مليون مرة فى مليون هدف.. لكن صعبة صحيح مع قداسته...

الجزء التانى جابلنا كل الحبايب.. بوش تشينى و ليبرمان حقيقى كانوا واحشينى موووووت.. الحاج تشينى على فكرة كان بيتكلم من يومين فى فيس ذا نيشن و قال درر من المعتاد بتاعه..

الواضح إن رد فعل أوباما على الصور زى ما ستيوارت صوره هو نفس رد فعله على كل موضوع ييجى يحط إيده فيه..

Kalimalhus said...

إلا هى الحكومة اللى تفشخرت قدام وفد عسكرى أمريكانى فرنساوى مشترك ديك النهار بإنها صادرت آلاف الأطنان من الإمدادات كانت هاتخش غزة عبر الأنفاق.. الحكومة دى مش برضة الحاج نظيف بيشتغل فيها مش فاكر إيه كده؟؟

مي ثابت said...

بتاريخ : الجمعة 15 مايو 2009 1:01:08 ص
عدد القراء : 218

البشاير-رندارشدى:
نفي الدكتور عوض تاج الدين وزير الصحة السابق ما ذكر علي لسانه بأحدي الصحف من أن هناك خطر قادم لمصر يسمي أنفلونزا الحمير والنباتات مؤكدا للحياة اليوم أن من نقل الكلام نقله بدون فهم فالحديث كان في أحدي الندوات كنت أتحدث بشكل علمي أن كل الكائنات الحية تصاب بمرض الأنفلونزا وذكرت أمثلة كان منها الحمير والنباتات وهذا كلام علمي بالفعل أن كل الكائنات الحية تصاب بفيروس الأنفلونزا




و آدى اللينك

http://www.elbashayer.com/?page=viewn&nid=50494

Kalimalhus said...

واضح إن كل الشعوب عندها أفيونة نفاق الذات و هى إن الشعب يبقى عنده صورة مثالية عن نفسه و عن قيمه الأخلاقية بيفضل متمسك بيها رغم إنها زائفة.. الأمريكان كده و إحنا كمان كده..

ياريت مواطن مصرى يجيب تانى اللينك بتاع الكليب من البيت بيتك.. بغض النظر عن الكلام اللى كان بيهلفط بيه الشاب المذيع مليح المحيا.. فيه حاجة بتحصل و إحنا كلنا نايمين فى الشاورمة..

عارفين كرة الثلج اللى بتبدأ تتدحرج و هى بحجم كرة البنج بونج و بعدين تفضل تكبر لحد ما تسبب إنهيار جليدى ممكن يمسح قرية كاملة من على الخريطة.. العنف فى المجتمع المصرى و رد فعلنا تجاهه هو كرة الثلج اللى كلنا مستهونين بحجمها لكن مش متخيلين حجم الكارثة اللى ممكن تطور ليها فى وقت ممكن جدا يكون قريب.. و على رأى الإنجليز
mark my words..

Anonymous said...

@مهندس حر
ههههههههههههههه اكيد مس كاليفورنيا هي الي جامده كيك

مش عارف نواره عالصبح ليه بتسخنا كدا وهتخلينا نرجع لايام البرايز :d

مدير التحرير said...

الانفلونزا من نوع ايه لا تصيب الا الانسان و الخنازير و الطيور و الاحصنة ، لذلك فإن الانفلونزا القادمة خلال سنتين إلى ثلاث ستكون هي انفلونزا الخيول

مواطن مصري said...

شوفتي كليب اعدام الخنازير

http://www.youtube.com/AlMasryAlYoum



ب الغاز

مواطن مصري said...

انا مكنتش فاكر الاعدام ب الشكل دة


انا اتراجع عن رائي الاعدامم و ادعو الي نقل الخنازير في الصحراء

Unknown said...

اهو الراجل طلع ما قالش اهو

وطلع مافيش حاجة اسمها انفلونزا النباتات

واحنا قاعدين من امبارح نقول ايه انفلونزا النباتات
وكل ده عشان هو دكتور

يعني مثلا مثلا
لو واحدة زي اقبال بركة اتكلمت عن الانفلونزا الطبيعية الناس عشان بتستحمرها خلقة ربنا مش ح يصدقوها في اي حاجة

وده عشان دكتور كلنا شكينا في نفسنا

هي دي فكرة تقديس المهندسين والدكاترة اللي باقول لك عليها عندنا في مصر يا مهندس

ويا سلام بقى على خناقة الدكاترة مع الصيادلة ومع دكاترة التحاليل

اهو ح يدخل دكتور يقول لي: بتوع التحاليل مش دكاترة

وخناقة مع الصيادلة عشان بيقولوا لهم يا دكتور

وكأن دكتور ده لفظ الجلالة استغفر الله العظيم ولا يقال الا لخريج طب ولو اتقال يبقى كفر

وللا تعامل المهندسين مع مهندسين الجامعة الامريكية
وابن خالتي يقول لي: كل الناس بيتقال لها يا باشمهندس دلوقت، الميكانيكي والسواق
وواحدة صاحبتي مهندسة قعدت تشتكي لي ازاي انهم دخلوا نقابة المهندسين ناس مش مهندسين

(معهد معين كده كلكوا بتكرهوه عشان بيتعينوا معاكوا ويتقال لهم يا باشمهندس وهم مش باشمهندس)


انا مقدرة طبعا انكوا بتذاكروا كتير قوي (عندنا مهندس في الشغل لسع خالص بجد بقى عامل زي الواد بتاع بيوتيفول مايند)
بس انا عمري ما شفت حد بيزعل على اللقب زي المهندسين والدكاترة بصراحة
ده انا بنت خالي كانت بتولد وهي بتفوق من البنج الممرضة بتقول لها يا مدام
قالت لها: دكتورة

ههههههههههههههههههههههه
بالمناسبة انا صاحبتي بتتعالج عند مهندسة مش مهندس، مهندسة صاحبتي برضه
والتانية تفضل تقول لها: روحي لدكتور
تقول لها: لا انت قولي لي
تقوم المقروصة تقول لها وتكتب لها على ادوية
والتانية تروح تاخدها
ولما اقول لها بتعالجيها ليه انت مهندسة تقول لي: عايشة وللا مش عايشة؟ خفت وللا لا؟

مواطن مصري said...

شوفتي دة جامدة سيد حفيظة
http://www.youtube.com/watch?v=H-HwgeIUPgE

Rasim Marwani said...

بابا روما هدف سهل للرمايات لعدة اسباب
اولاً لانه كلما فتح فمه خرجت منه حماقة او اكثر بحسب الوقت المعطى له للتحدث
وآخرها كان حديثه العلمي الرصين حول ان الواقي يفاقم من مشكلة الايدز!
ثانياً بحكم كونه رئس الكنيسة الكاثوليكية التي اشتهرت بعنفها الدموي ضد المذاهب المسيحية الاخرى، وهذا يمكن اليهود من التذلف للبروتستنت في الولايات المتحدة وبريطانيا والمانيا بدون خسائر تذكر عند الكاثوليك في فرنسا العلمانية واسبانيا المثقلة بتاريخ محاكم التفتيش ولكون الكاثوليك لا يحتاجون لاسباب اضافية غير صلب المسيح لكراهية اليهود
ثالثاً من غير المعروف على نطاق واسع حقيقة ان للكنيسة الكاثوليكية اجندة واجهزة سرية تماماً كالصهيونية واحدى الرهبانيات التابعة للفاتيكان والمسماة الجزويت او اليسوعيين كانت من اهم المنظمات التي كافحت الماسونية واربكت خطط الصهاينة في الكثير من المجالات
وحقيقة ان الفاتيكان واجهزته السرية تعاون مع المعسكر الغربي ضد الاتحاد السوفياتي دفعت الولايات المتحدة لاقامة حلف وثيق مع بابا روما ايام الحرب الباردة ولولا هذا التحالف الذي انقضت ايامه الآن لكان بابا روما اسؤ من هتلر في الاعلام الغربي

Kalimalhus said...

ده إنتى بقى فعلا مستقصدانا إحنا و الدكاترة الغلابة..
بس إحنا متعودين على النوع ده من الحقد الطبقى..هههههههههههه

بصى بقه.. ماتلخبطيش كل حاجة على بعضها.. فيه ناس بيهمها اللقب فعلا و خصوصا الشباب الورور اللى متخرج جديد.. بس دى حاجة و النقابة حاجة تانية.. يعنى إحنا ليه بنعترض على قبول خريجى بعض المعاهد؟ لعدم ثقتنا فى إن المعرفة و التدريب اللى بتيتحه المعاهد دى كافى لتخريج مهندس.. و المفروض إن النقابة عليها حماية مستوى ممارسة المهنة فى البلد و مش المفروض تقبل فى المهنة ناس مش مؤهلين لممارستها و ده فى النهاية الهدف منه حماية المجتمع من أخطاء المهندسين اللى همه مش مهندسين..

الأصح إن شهادة التخرج ما تبقاش كفاية لقبول الشخص فى النقابة أو منحه ترخيص بالعمل بالمهنة المفروض يبقى فيه إختبارات للقبول و إختبارات لتجديد الترخيص على فترات.. بس إنتى عارفة كويس ممكن يحصل إيه لو الإختبارات دى إتعملت دلوقت؟؟

Unknown said...

لا انا معاك فعلا في موضوع النقابة ده

لان احنا عندنا في التلفزيون شغلنا مع اجهزة حساسة وهوا، يعني اي غلطة تعمل اللي انت بتشوفه في التلفزيون المصري
ولان فيه ناس بتدخل بالواسطة والنقابة قبلت بعض المعاهد
انا لامسة بنفسي ان خريج هندسة عين شمس والقاهرة غير خريج اي حاجة تانية
ومرة حصلت مشكلة كبيرة
عشان واحدة متخلفة زيي كده
احنا متعودين ننادي المهندسين يصلحوا لنا الاجهزة ولما يتأخر سبع ثواني نهرج ونقول له: انت خريج ايه؟ معهد نجارة؟

على اساس تهريج
قام واحدة معتوهة نادت واحدة الناس بيقولوا لها يا باشمهندسة
وبتشتغل في قسم الهندسة
غلطتها؟
المهم البت قامت ومش غابت ثواني بقى
قعدت متنحة للجهاز ومش عارفة تعمل فيه حاجة

قام البت التانية بتستظرف بروح خالتها وبتضّحك معاها: هاهاها مالك يا بت متنحة كده ليه؟ انت خريجة ايه؟ معهد القباقيب المتحدة؟

وعنهااااااااااااا
يييييييييييييييييييييييييي

ما بيتكلموش لحد دلوقت

Ahmed Al-Sabbagh said...

أتمنى يكون الموضوع ده مفيد يانوارة
انفلونزا النباتات
http://ahmedelsabbagh.blogspot.com/2009/05/blog-post_16.html

مهندس مصري بيحب مصر said...

ما تقلبيش عليا المواجع
أنا قافل في الشغل مع واحد محترم جداً على المستوى الشخصي و كبير في السن
و أحطه على راسي من فوق
بس مستواه العلمي صفر
و المفروض إنه خريج معهد بيخرج مهندسين جودة
إيه مهندسين جودة دي ؟ الله اعلم

بس هو مش مهندس مدني و لا معماري و لا يفهم فيهم
و بعدها يدي أوامر في شغل مش فاهمه و يشرف على تنفيذو إستلام حاجة مش عارفها و مش فاهمها و يبوظ شغلي بسبب جهله بأصول الشغل
و يضحك المقاولين اللي بنشرف عليهم عليه و على المكتب الإستشاري كله بالتبعية

قفلت معاه مرتين أو 3 و منعته يتدخل في اللي ما يفهموش

أصل مهندس المدني لازم يكون دارس هندسة مدنية
إنما واحد لا درس نظرية إنشاءات و لا مساحة و لا خرسانة و لا إنشاءات معدنية و لا هندسة ري و صرف و لا طرق و لا كباري و لا خزانات و لا منشآت ري و لا خواص مواد و لا ميكانيكا تربة و لا هندسة اساسات و لا سكة حديد و لا هندسة مواني و حماية شواطئ و لا ترميم و لا حاجة خالص من اللي بيطلع عينا فيها 4 سنين في قسم الهندسة المدنية
يشتغل مهندس مدني بأمارة إيه ؟