Saturday 16 May 2009

آه يا قلبي

تحديث
آه، عشان بس ماحدش يقول لي الفيديو مش مبين انهم بيدفنوا احياء، ولو ان اللي بيحكي بيقول بنردم عليهم بالشبة لحد ما نتأكد انهم ماتوا وبعدين بالجير الحي
اهو المصري اليوم كاتبة بالتفصيل ازاي بيوئدوهم وحسبنا الله ونعم الوكيل
نعمل ايه؟ انا مش عايزة اقعد اندب كده، حد يقترح، نعمل ايه؟ نكلم جمعية الرفق بالحيوان ونرفع قضية او نتضامن معاهم في القضية اللي ضد وزارة الزراعة؟
طب استنوا، انا بكرة ان شاء الله اكلمهم واقول لكوا ايه الاخبار
-----
يا ناس حرام، يا ناس حرام، يا ناس اتقوا ربنا، لا دين ولا انسانية ولا رحمة؟ مين يستحمل يعمل كده في مخلوق ربنا اداله حياة
ليه الشر ده؟ وليه فيه ناس بتساند الشر ده وبتبرر له؟ وتداري عليه؟ وتوجد له اعذار؟ وتشمت وتفرح كأن تار ما بينها وبين مخلوقات ربنا؟ مش ربنا اللي خلقهم دول؟ ده شر، شر
والحيوانات دي ح تدعي علينا، اللي ما يرحمش مخلوقات ربنا ربنا مش ح يرحمه
من لا يرحم لا يرحم، مش كفاية سكان العشوائيات وغزة بيدعوا علينا؟ ناقصين الحيوانات كمان تدعي علينا؟ ده احنا الجبل ح ينطق من افترانا وظلمنا



Mass graves for Egypt's pigs مقابر جماعية لخنازير مصر from AlMasry AlYoum on Vimeo.

انا ما قدرتش اكمل تاني الفيديو اخدته من عند عرباوي
اديني خلصت ذمتي من ربنا، الا المخلوقات الضعيفة اللي مالهاش قدرة تدافع عن نفسها، الا دي
تاني
البني ادم يقدر يدافع عن نفسه، يقدر يتكلم، يقدر يشرح وجهة نظره، لكن دول مالهمش غير اللي خلقهم في الدنيا وبلاهم بينا
ربنا ح يخرب بيتنا
الا هل بلغت؟ اللهم فاشهد
{وما من دابة في الأرض ولا طائر يطير بجناحيه إلا أمم أمثالكم ما فرطنا في الكتاب من شئ}
عُذّبت امرأة في هرّة ، سجنتها حتى ماتت ، فدخلت فيها النار ؛ لا هي أطعمتها ، ولا سقتها إذ حبستها ، ولا هي تركتها تأكل من خشاش الأرض
عن أبي هريرة رضي الله عنه أن رسول الله - صلى الله عليه وسلم - ذكر : ( أن امرأة بغيا رأت كلبا في يوم حار ، يطيف ببئر قد أدلع لسانه من العطش ، فنزعت له بموقها ، فغفُر لها ) رواه مسلم
وعن عبد الله بن جعفر- رضي الله عنهما قال: أردفني رسول الله صلى الله عليه و سلم ذات يوم خلفه فأسر إليَ حديثاً لا أخبر به أحداً أبداً وكان رسول الله صلى الله عليه و سلم أحب ما استتر به في حاجته هدف أو حائش نخل(أي جماعة النخل) فدخل يوماً حائطاً من حيطان الأنصار فإذا جمل قد أتاه فجرجر(أي ردد صوته في حنجرته) وذرفت عيناه قال بهر وعفان: فلما رأى النبي صلى الله عليه و سلم حنَ وذرفت عيناه فمسح رسول الله صلى الله عليه و سلم سراته(الظهر وقيل السنام) وذفراه(العظم الشاخص خلف الأذن) سكن فقال: من صاحب هذا الجمل؟ فجاء فتى من الأنصار فقال: هو لي يا رسول الله. فقال: أما تتقي الله في هذه البهيمة التي ملككها الله، إنه شكا إلي أنك تجيعه وتدئبه .
----
الرسول عيط على عياط الجمل عشان جعان، امال لو شاف الخنازير بيتعمل فيها كده كان عمل ايه؟ مافيش حد للمخلوقات المسكينة دي؟

67 comments:

Anonymous said...

انا موشش اتفرجت على الفيديو لانى موش بشوف اى فيديوهات تعذيب لا لبنى ادم ولا حيوان
انا موش فاهمه ليه الجهل ده بالدين
الحيوان ده بيسبح ربنا اكتر من اى بنى ادم....وربنا خلقه علشان ينظف البيئه....ويمكن دى الحكمه من تحريمه.....وبغض النظر ليه القسوه دى
والله كنت لسه بقول ليه ميش حد من ائمه المساجد ما اتكلمش عن الموضوع ده.....ده حرام كبير
يلا ربنا يرحم هما ليهم رب ....واحنا ربنا لا يؤاخذنا بما فعل السفهاء منا

خيرالدين said...

أنا شفت الفيديو ع الصبح
والتعليقات عليه حرقت دمى أكتر

رحلتنا في الحياة said...

قمة الغباء والتخلف اللى خلقه ربنا فى الشعب المصرى ده اللى مش عنده اى رحمة ولا شفقة اللى خلاهم مش راحمين البشر هيرحموا الحيوانات
نفس الموضوع قريته عنده مس سوسة

http://misssosa.blogspot.com/2009/05/blog-post_16.html
بس بجد اشمعنا الخنازير اللى قامت الدنيا عليها
والفراخ لا

مواطن مصري said...

انا ل الاسف كنت مع قرار الاعدام و لكن بعد الفيديو تراجعت عن قرار الاعدام


ممكن نبعد الخنازير في الصحراء

حفيدة عرابى said...

ده على اساس يعنى ان الناس اللى انت بتخاطبيهم
او اللى فى ايديهم الحل يعرفوا ربنا
طيب ادينى امارة واحدة
امال لو ماكنتيش انت اللى مبهدلة نفسك ليل نهار تهاتى فى معاملتهم اللااخلاقية للبشر-- هيدوروا على حيوانات
انا اول مرة فى حياتى اتعاطف مع الخنازير كنت بحس زمان ان لو حد اتشتم بانه خنزير فدى اهانة كبيرة جدا ليه لكن الايام اثبتت ان فى خنارير انضف وارقى واسمى من البشر
اذا انا فقدت الاحساس بقدرة ربنا سبحانه وتعالى انه ينتقم منى فى اى لحظة متهيألى ماينفعش تقوليلى قال الله وقال الرسول
الافضل كبرى عليهم وعلينا اربعا

أكون أو لا أكون said...

حراااام... صوتهم بيقطع القلب
: (

Kalimalhus said...

بعت اللينك بتاع المدونة دى لعدد من الأصدقاء.. و دى بعض من تعليقاتهم فى إتصالات تليفونية لاحقة..

مهندس كبير وناشط:
- إنتو يابنى عالم فاضية

شاعر و صحفى:
- سو وات؟.. البنى آدميين بيتعمل فيهم أكتر من كده..

طبيبة و داعية إسلامية:
- دى خنازير.. عارف يعنى إيه خنازير؟ يعنى حيوانات نجسه ربنا لعنها..

المناقشة فى موضوع إن ربنا لعنها دى أدى إلى إتهامى بإنى علمانى و إن الناس اللى مهتمة بالأمور دى إما نصارى أو شيوعيين..

صديقين أخرين تعليقاتهم ما ينفعش أنشرها و هى مجرد أراء فى شخصى الضعيف تم الرد عليها فى حينه بما لا يجوز نشره أيضا..

الخلاصة.. المشكلة مش فى اللى بيمارسوا النوع ده من العنف اللا أخلاقى و غير المبرر ضد حيوانات لا تملك دفع الأذى عن نفسها.. و المشكلة مش فى المسئولين اللى عارفين و مطنشين أو عارفين و موافقين أو أمروا بتوفير الوقت و الجهد بالشكل ده.. المشكلة فى شعب كامل الحكاية حتى ما خلتوش يرمش.. و المصيبة فى نخبة أو المفروض إنها نخبة مش قادرة تحس إن الموضوع فيه حاجة غلط..

تانى هالفت النظر للكليب بتاع البنى آدم اللى تم دبحه فى قلب الشارع فى عز الضهر و الناس ملمومة بتتفرج و القتلة واقفين مستنيين الحكومة و واحد شاف الكلام ده تحت بلكونته دخل بسرعة جاب الموبيل مش عشان يبلغ الشرطة .. لأ .. عشان يصور الكليب ده و يفرج الناس عليه و علينا..

Unknown said...

فتاة من الصعيد
ههههههههه
دول فاكرين نفسهم بيرضوا ربنا

احنا

انا ما شفتش التعليقات

ايوشة
الفراخ كان بيتم اعدام المصاب منها او المشكوك في اصابته او اللي حد بيبلغ عنه

لكن ما كانش فيه المذبحة الجماعية دي

وعلى ما اسمع
- ومش متأكدة برضه الله اعلم -

انهم كانوا بيندبحوا مش بيتوئدوا

هو ربنا قال دبح ليه؟ عشان دي اخف الاضرار
السكينة اول ما بتقطع شريان معين الحيوان مش بيحس بحاجة بعدها
لو سكينة حامية يعني

مواطن
وياكلوا منين ويشربوا منين في الصحرا؟

يا مواطن الخطر مش في الخنازير
انا مش فاهمة هي بتتعدم ليه؟
مافيش ولا خنزير مصاب في مصر

طب ح يعملوا ايه في اللي داخل من المطار؟

المرض بيتنقل من البني ادمين

المشكل في البني ادميييييييييييين


لقد خلقنا الله احرار

طيب اصحاب القرار ما عندهمش قلب
اللي بينفذوا دول يا بنتي
دول ناس غلابة زيهم زي اي حد في الدنيا

بيفتروا على الحيوان ليه؟

اكون او لا اكون
صوتهم عامل زي الاطفال الصغيرة


مهندس حر

عفارم عليك
لا فض فوك
انا ح اجي اتعالج عندك
:D

mido said...
This comment has been removed by the author.
Unknown said...

ميدو
مهندس مصري فين؟

انت بترد على مين في ايه؟
يا حبيبي يابني؟

mido said...

مالك يا نوارة في ايه ؟ بتجيبي سيرتي ليه؟ :d

Unknown said...

سؤال بس

هو ربنا لعن الخنزير فين؟
حد يجيب لي آية واحد فيها لعن الخنزير؟

هو اكله حرام
وده معناه ان ربنا مخليه يعيش
ما طلبش اننا نقتله
امال خلقه ليه اصلا يعني؟

الخنزير حيوان ذكي وخلاياه قريبة جدا من خلايا البني ادم
ويمكن عشان كده ربنا حرمه عشان لو اكلنا يبقى كأننا بناكل لحم شبه لحم البني ادمين

فين اللعن بقى؟
طب ما الحمار حرام ناكله
والقرد
والاسد
والصقر

كل دول ملعونين؟

Unknown said...

اسمه مهندس حر
:)
يا ضنايا يابني
هي المذاكرة مششت لك دماغك

الا صحيح
انت يا جدع انت مش عندك امتحانات؟

mido said...

تامر موافي : الولد اللي جري و جاب الموبايل و صور القتل زي الصحفي اللي صور مذبحة الخنازير و أنا لو مكانه حعمل كده

mido said...

ماله مهندس مصري ؟ ده خطب امبارح :)

mido said...

اه كمان اسبوع ابدأ الامتحانات و اخلص في عشر ايام و اخد الاجازة بدري بدري :D

mido said...

المفروض بقي توقفي تدوين لحد اول ستة أكون خلصت امتحانات عشان مفيش حاجة تفوتني :)) و كمان مواطن مصري عنده امتحانات

Unknown said...

انا اسف يا نوارة
واضح ان حضرتك مشاعرك رهيفة ازيد من اللزوم
الكليب اللى المصرى اليوم حاطاه مفيهوش اى شىء يثير الحزن او الغضب او الألم

اصلاً الكليب موصلش لمرحلة رميهم فى ابو زعبل فى الجير الحى
و صوت الخنازير فى الكليب اصلاً
كان صوتهم و هماه بيترموا فى العربية النقل اللى على ما اعتقد مفيهاش جير كيماوى او خلافه

هو الصراحة اللى الكليب اللى يضايق اللى كان عند ميدو
مش ده
خالص

مش عارف اتعاطف مع اللى حصل
لأن شكل الحيوانات نفسها بعيداً عن كونها حلال او حرام
يثير الإشمئزاز

و بعدين انتى بتتكلمى فى ايه
احنا ميتين من زمان
اصلاً
حكومة متبلدة و شعب اكثر بلادة من حكومته

من حوالى 6 شهور دكتور نظيف عمل حوار مع الأهرام

قال فيه على الكوارث اللى بتحصل فى عهد حكومته
ان الفكرة ان التغطية الإعلامية بقت اوضح
ايه يعنى عبارة غرقت فيه غيرها غرق قبل كدة
ايه يعنى صخرة وقعت فيه غيرها قبل كدة

هو نظيف قال كدة بجد

مواطن مصري said...

ننقلهم في صحراء في زرايب طبية مجهزة ب العلف الخاص بيهم و الزبالة ممكن تتعمل اعادة تدوير و تشغل ناس كتيرة

Unknown said...

ده كلام ممتاز يا مواطن

انا ابصم عليه بالعشرة

خلاص انا بكرة اكلم بنت رشدي اباظة دي اللي في جمعية الرفق بالحيوان
هم باعتين انذار لوزير الزراعة

صحيح هم ما نقلوهمش للصحرا وخلاص ليه؟
والحل اللي انت بتقوله ممتاز

وصحي

وفيه فايدة لكل الاطراف
اللي بيربوا الخنازير
واللي حتى ما بيقربولهاش ولا بيشموا ريحتها
لانها مفيدة في الحالة دي بيئيا
والزبالة فيه شركة اعادة تدوير فعلا
بس تشتغل
هم بياخدوا مننا فلوسها على الفاتورة
بس هي متوقفة مش بتشتغل

G said...

يا ترى ليه احنا البلد الوحيده اللى بتعدم الخنازير اشمعنا مصر يعنى
ماهو امريكا فيها 4 حالات وفاه و4714 اصابه
و المكسيك فيها 66وفاه و2895 اصابه
ليه دول ولا بيدبحو ولا بينيلوا حاجهانا ما كنتش عارف و لما عرفت استغربت قوى
بيقوللك ان الخوف من انفلونزا الخنازير دى اصلا لما تتنقل ما بين البشر
يعنى ايه
يعنى لما بنى ادم يتعدى من خنزير مش هايموت ولا حاجه هو بس هايجيلو انفلونزا رخمه شويه
لكن الخوف بقى من ايه
الخوف ان لو واحد مناعته ضعيفه اتصاب ممكن الفيروس يتحور جواه و يعمل فيروس جديد
و الجديد ده هو اللى كل الدنيا خايفه منه
عشان بيقولو ان الموضوع ده حصل زمان فى حاجه اسمها الانفلونزا الاسبانيه
يعنى لسه ما فيش وباء ولا حاجه
و مش هايبقى فيه غير لما الفيروس يتحور
يعنى احنا المقروض ما نبقاش خايفين من الخنازير بقى احنا المفروض نعدم البنى ادمين اللى عايشين مع الخنازير عشان ما يطوروش الفيروس جوه جسمهم
و دلوقتى انا برضه ما فهمتش اشمعنا احنا اللى بندبح و نحرق و مش عارف ايه
و بعدين صحيح ما الدنيا كلها كانت بتدفن الفراخ فى الجير ما حدش كان بيتكلم ليه
ولا هى الفراخ حلو و الخنازير لا

Unknown said...

2enty 3arfa ya nawara fe wa7ed 2ebn 7allal keda 2ally 2eh 2ally nemashehom 3al algham 2elly fel sa7ara el gharbya ta5yaly el nas wesel beeha el tafker le 2eeh

Unknown said...

والله العظيم يا طارق لو مشوهم على الغام الصحرا الغربية ح يكون اهون وارحم من الوأد

ووأد بإيه
الشبة وبعدين الجير الحي

وبداروي يقول لي حاجة مش مؤثرة

طب انا قسمت الفيديو على حوالي سبع مراحل عشان اكمله للاخر وشفت جثث الضحايا

كده مش كويس يا جدعان
كده مش كويس بجد

ده فيه صورة كاملة نازلة عن الحيوانات في القرآن
كده تحدي سافر لربنا جل جلاله
لا بنرحم بعض ولا بنرحم ضعيف ولا طفل ولا حيوان

كده مجتمع خراب
احنا عايشين في مجتمع خراب
المجتمع اللي مافيهوش رحمة لا بست ولا طفل ولا ضعيف ولا اسير ولا جائع ولا حيوان يبقى ربنا ح يعمل فيه ايه؟

كل الناس عارفة ربنا بيعمل ايه في المجتمع اللي زي ده

كل الناس
ايا كان دينه مسلم مسيحي يهودي بوذي هندوسي
واللي مالوش دين خالص
كل الناس عارفة ان الرحمة لما تتنزع من مكان بيخرب

Unknown said...

يعني اعمل ايه؟

اكركب لكوا الدنيا عشان تحسوا

1- حد بيرحم ستات؟ كل عيد الستات تتهان في الشوارع واللي عايزة تفضل هدومها عليها ما تخرجش في العيد
2- مش لسة مدرس قاتل طفل عشان ما عملش الواجب واخد ست سنين؟
3- واحد يقتل اكتر من 1000 فقير وعامل وشقيان وياخد سبع سنين وهو هربان ومش ح ينفذهم
ومين اتحبس في حادثة الدويقة؟ ولا حد
سكان الدويقة هم اللي منهم ناس اتحبست
4- الاطفال اللي بتاكل من الزبالة دول مش بني ادمين؟
(وبالمناسبة دي احب اوصي جميع السادة الزوار انهم لما يرموا اكل يربطوه في كيس لوحده ويربطوا زبالة الحمام في كيس لوحدها وبعدين يحطوها في الكيس الكبير
5- احنا مش لسة قاتلين ناس كان نازل عليهم القصف واحنا قافلين الباب في وشهم؟ قتلناهم وللا ما قتلناهمش؟ قتلناهم وللا لا؟
6- واخرتها الحيوانات يتنكل بيها بالطريقة دي، هم بيعدموا الخنازير وللا بينتقموا منهم؟

الناس اللي تعمل في الناس كده وتعمل في بعض كده وتعمل في مخلوقات بريئة بتسبح اللي خلقها في الدنيا وبيتولاها ويرزقها ربنا ح يعمل فيها ايه؟

احنا لازم نعمل حاجة

حاجة بخصوص الرحمة
حد عنده اقتراح؟

نفكر مع بعض انا مش عندي اي حاجة في دماغي دلوقت

بس المشكلة ان مش بس الحكومة ما بقاش عندها رحمة
احنا بقينا - الظاهر من كتر الاسى اللي شفناه - الرحمة عندنا ساعات بتبقى قليلة

مش باقول ان المجتمع اختفى منه الرحمة خالص
لا
الناس لسة كويسة وفيها خير
بس الغلب مش مديهم فرصة

ممكن حد يساعدني في التفكير
عايزين نعمل حاجة مش بس ننتقد

Unknown said...

انا قريت الكلام اللى فى المصرى اليوم
قبل ما اشوف الكليب
لكن لقيت ان الكلام مؤثر اكثر من الكليب الف مرة
حضرتك شوفتى الكليب على اعتبار ما سيكون

لكن انا شفته باعتبار اللى الكليب مبينه

الكليب مؤثر و لا مش مؤثر ميهمنيش

حتى لو مصوروش كليب مش مهم

انا متعاطف مع الحيوانات ديه برده
بس تصوير الكليب كان غلطة كبيرة
لانه كليب يجيب اشمئزاز مش تعاطف خالص

Unknown said...

انا ما اشمئزتش منهم خالص يا بدراوي
انا كنت عايزة اخدهم في حضني
وعلى فكرة لو دول بني ادمين عريانين ومش مستحميين (زي بتوع ابو غريب مثلا اللي كانوا بيتسابوا لحد ما يدودوا) كنت قرفت منهم برضه
لكن هم مخلوقات في كرب
بيحسوا بالالم
الفرق بينهم وبين البني ادم ان البني ادم الى جانب الالم بيحس بالاهانة
وبعدين الله اعلم برضه
يمكن يكونوا بيحسوا بالاهانة ونفسهم بتصعب عليهم واحنا مش عارفين
ربنا بس هو اللي يعرف لغتهم واحساسهم ايه؟
وربنا قال امم امثالكم
يبقى اكيد مش مجرد بيحسوا بالالم الجسدي
اكيد لهم الم نفسي معين
مش فيه كلب لما صاحبه يموت يحزن عليه ويمتنع عن الاكل لحد ما هو كمان يموت
يعني هم كمان عندهم عواطف

Unknown said...

حقول لحضرتك حاجة بمناسبة أية امم امثالكم اللى انا شايف انها من اجمل الأيات فى القرآن

صحيح مش طالبة تأمل دلوقتى و لا تفلسف

بس انا مرة سئلت نفسى سؤال
قلت ربنا بيقول امم امثالكم

فهل نحن البشر امثالهم
؟!

يعنى الحيوانات امثالنا
بس احنا مع الأسف مش امثالهم
خالص

انا بتعاطف جداً مع الحيوانات و بيصعبوا علينا انهم عايشين معانا اصلاً
و بدل ما يعيشوا فى راحة نقرفهم

ســـــاره said...

ديننا حرّم اكل لحم الخنزير
بس ماقالش ان اللي يقتله ويعذبه هيدخل الجنة !!!

الإعدام يبقى دبح مش وأد
احنا هنرجع لعصر الجاهلية لكن مع الحيوانات ولا ايه؟
ايه اللي انا شفته ده ..معقولة في كده؟
لاحول ولاقوة الا بالله

فكرتيني بفيديو شفته قبل فترة
لناس بترمي البقر يتسلخ في الماكينة وهو حي
تخيلي؟!!

mido said...

اقروا المقال ده و ادعوا لكاتبه و ادعولى

خنازير بلا ألم

مواطن مصري said...

احنا اساسا في الجاهلية الحديثة نعيش العصور الوسطى في اوربا و الجاهلية ما قبل الاسلام


اولا موضوع اعادة التدوير موضوع ممكن نصدر منة مواد خام من الزبالة


يعني مثلا في مصر اعادة التدوير بتحصل بس لسة الثقافة دي مش موجودة في مصر ان الناس بتشري الزبالة و بتفصلها عن بعضيها و بتصدر للصين و الصين تبيع المواد الخام من الزبالة بتاعتنا بضعف الثمن

لية احنا ميكونش عندنا مصانع متطورة ل اعادة التدوير و نطلع منها مواد الخام و نوفر

خيرالدين said...

هو أنت ملاحظه ان مفيش تركيز على شغل وزارة الصحه فى المطار
الوزاره جابت أطباء حديثى التخرج ومش عارفين اى حاجه عن المرض ولا عارفين يتعاملوا مع الناس
دى معلومات من واحد صاحبى هناك

mido said...

ايه رأيك ان القوراض دى اسمها خنازير غينيا المنزلية و جميلة جدا

Fatma said...

لا حول ولا قوة الا بالله

لا حول ولا قوة الا بالله

انا مش متخيله

مش متخيله بجد

دول مش بني ادمين

Unknown said...

سارة

كلامك فكرني بالحديث ده

:"ما من إنسان قتل عصفورًا فما فوقها بغير حقها إلا سأله الله-عز وجل-عنها. قيل يا رسول الله : وما حقها؟ قال ( :"يذبحها فيأكلها ولا يقطع رأسها يرمى بها" [النسائى

كنت قريته في الاربعين النووية واستغربت قوي وقلت لماما ان على كده البلاطي المنك وجلد التعبان وجلد التعلب تبقى حرام

mido said...

ملحوظة على الهامش :

هى مش المصرى اليوم بتقول انها محايدة و بتنقل الخبر دون تدخل للتأثير على القارىء ؟

طيب ليه حاطين موسيقى حزينة مع الكليب ؟ مش ده تأئير على القارىء ؟

مش هم بيحاولوا يقلدوا البى بى سى ؟

هل البى بى سى كانت حتحط اى اضافة على الكليب زى المصرى ؟ ما اظنش

الكلام ده بس عشان ميوجعوش دماغنا بالمهنية و الحيادية

Kalimalhus said...

ميدو
----
يعنى يابنى عامل كل الهيصة دى عشان ما عجبنيش إن الأخ اللى فى البلكونة ما طلبش الشرطة و وقف يصور؟

و بعدين لما تنده عليه بإسمى إبقى قول يا باشمهندس..هههههههههه

--------------
لذيذ الأخ بتاع العربية اللى مضايق عشان فى خنازير فى أرض الكنانة..

ما جنابك كان فى خنازير فى أرض الكنانة من ساعة ما فتحها عمرو بن العاص فى عهد عمر بن الخطاب رضى الله عنهما و لم يأمر الثانى الأول بالتخلص من الخنازير.. فقط لم تؤخذ عشورها يعنى ضريبتها عينية كما هو الحال فى غيرها..
و لم يسبق أن أفتى أى إنسان بإن لنا أن نفرض على من ليس من ديننا أن يلتزم معنا بما يأمرنا به هذا الدين أو بما ينهانا عنه..

على فكرة ظاهرة التأفف غير المبرر من مجرد وجود الخنازير فى البلد هى أحد أسباب الهيصة الغريبة اللى حصلت فى مجلس الشعب و سبب إندفاع المسئولين التنفيذيين فى عمليات الإعدام بحماس أعماهم عن أبسط قواعد الرحمة.. و ده كله إنعكس على شعور بعض المسيحيين بإن فى الأمر شبهة طائفية و خلى إخوانا فى المهجر عملوا بليكة و كأن الأمر مؤامرة لذبح المسيحيين أنفسهم..

إحنا بصراحة محتاجين نعقل..

Kalimalhus said...

ميدو
----
البتاع ده مش إسمه هامستر.. إيه علاقته بالخنازير؟ يعنى لو بيتسمى بخنازير غينيا يبقى زى ما حصان البحر بيتسمى كده رغم إن ما لوش علاقة بالحصان..

Kalimalhus said...

أنا شخصيا ما عنديش مانع إن البلاطى المنك تطلع حرام و فرو التعلب و الشنط جلد التعبان كذلك بما إنى مش هايحصل يبقى معايا تمنها و لو حصل أهو ممكن أقول كده للمدام عشان ما تبعترش القرشين على حاجة من دى..

بس الصراحة منطوق الحديث -لو كان صحيح لأن الأربعين النووية مش من مصادر الحديث الصحيح- ما بيقولش كده.. الأصل هو الإستفادة بأى شكل من الحيوان سواء للأكل أو لغرض تانى.. و الله أعلم.

mohamad said...

هولوكوست لخنازير مصر

وأدينا شايفين البني آدمين واللب مفروض ليهم (نظريا وفي التصريحات ) الرفاهية بيحصلهم إيه في البلد

فما بالكم با إخواننا في الحيوانات اللي صدر قرار من فوق (آخر دور ) بالإعدام والتخلص منها هتتعامل إزاي؟

بس الفيديو ده ناقض صورة حد بيدعك إيديه وبيضحك ضحكة الساحرة الشريرة

إحنا بلد سمعتنا زي الزفت

اللهم لا تؤاخذنا بما فعل السفهاء منا يا رب العالمين

Rasim Marwani said...

حكمة الله قضت بان تحمي بعض الحيوانات من الاكل ومن الاستئناس المنزلي لضرورة تتعلق بوظيفتها خارج البيوت ... ومنها الكلب والخنزير
وصفة النجاسة التي يتصف به الكلب والخنزير هي ذاتها صفة الدم الذي يجري في عروق البشر وهي ذاتها صفة الماء الذي يخلقون منه
وقد ورد ان للكلب عشر صفات من صفات النبوة
وفي مثال آخر عن الرسول الاكرم :رأى رسول الله صلى الله عليه وسلم رجلاً قتيلاً، فقال عليه الصلاة والسلام: ما شأن هذا الرجل قتيلاً؟ فقالوا: يا رسول الله، إنه وثب على غنم بني زهرة، فأخذ منها شاة، فوثب عليه كلب الماشية فقتله: فقال صلى الله عليه وسلم: قتل نفسه، وأضاع ديته، وعصى ربه عز وجل، وخان أخاه، وكان الكلب خيراً من هذا الغادر ثم قال صلى الله عليه وسلم: أيعجز أحدكم أن يحفظ أخاه المسلم في نفسه وأهله، كحفظ هذا الكلب ماشية أربابه

Unknown said...

هههههههههههههه
والله انا ربنا رازقني بشوية ناس عثل عثل عثل عثل

الاخ بهيج
داخل باسمه المعهود
الاسم الكامل يعني
وسايب لي ايات قرآنية واحدايث
طيب يا اخ بهيج
انت ح تهيج وللا ح تقرا قرآن
لزمن على الاقل تتوضا طيب

مواطن مصري said...

ههههههههههههههه

هنا فية سؤال مهم لو حد بعد الشر جالة الفيروس هيتعمل فية زي الي اتعمل في الخنازير ؟؟

mido said...

مهندس حر : الهامستر غير الغينيا بيج

mido said...

ليه منشرتيش التعليق اللي فيه آيات قرآنية؟ :D

Unknown said...

المصرى اليوم
غداً
-----
رجال الدين يهاجمون إعدام الخنازير حية ومنظمات دولية تتظاهر للمطالبة بمعاقبة مصر.

و على ما اذكر فى بقية الخبر امين اباظة وزير الزراعة بيقول لن نسمح بتشويه سمعة مصر
و الجبلى بيتسوح بالهليوكوبتر فى المطار لمتابعة اجرائات الوقاية

Unknown said...

ههه
هههه
ههههه

شوفى الخبر ده من المصرى اليوم غداً برده


البيت الأبيض يطالب الصحفيين المرافقين لـ "أوباما" بالتطعيم ضد "الالتهاب الكبدى والتيفود والحمى الصفراء" قبل زيارة مصر.

Kalimalhus said...

ميدو
----
كلامك صحيح و شكرا على المعلومة.. هما الإتنين من القوارض بس عائلتين مختلفتين.. بس الصراحة شكلهم قريب جدا من بعض..

Kalimalhus said...

طب أنا رأيي ما يجوش و بلاش شكشكة.. و ياريت يمنعوا المصريين فوق السبعين يخشوا أمريكا.. على أساس إن الرحلة طويلة و خطر على الصحة و كمان عندهم فلفلوزة..

بهجت الاباصيري said...

الفيديو اللي شفته ده بيفكرني بافلام خالد يوسف ....... وياخوفي لحسن يتاثر بيه تبقي مصيبة ...... ممكن يعمل فيلم يسميه المقبرة - ويجيب كومبارس ويدفنهم وهما صاحيين

عموما انا بقترح انهم قبل ما يدفنوا الخنازير يوزعوا علي كل واحد وجبة كنتاكي وعلبة عصير ...... ساعتها نص الشعب المصري ها يحقد علي الخنازير

وجتنا نيله في حظنا الهباب

مواطن مصري said...

شوفتي اعلان دكان شحاتة

Kalimalhus said...

لا يا بنتى ظلمتى الناس.. بتقولى بيوئدوهم و الوأد ده يعنى الدفن حيا مما يؤدى إلى الإختناق.. التفاصيل فى المصرى اليوم بتقول إنهم بيرموا عليهم مواد كيميائية حارقة قبل الدفن و بيسيبوهم قيمة 30-40 دقيقة لغاية ما المواد الكيميائية دى ما تاكل أعضاءهم الداخلية قوم يموتوا..

ده مش إستسهال بقى.. ده حل عبقرى طلع بيه شخص جهبذ و فكر فى إستخدام النفايات الكيميائية لمصانع الشبة و ده برضه وسيلة للتخلص من النفايات دى.. ما شاء الله.. حاجة تفرح صحيح..

الراجل صاحب الفكرة دى لازمله نيشان يترشق فى...صدره..

طبعا همه الأول إستشاروا ناس من إخوانا الحلوين و دول إقترحوا إما الكهربا أو النفخ.. بس الأخ اللى ما جابيتوش ولادة ده جاب حل يخلى الخنازير تتحرق أطرافها زى اللى إتكهرب و تتنفخ أمعاءها بحركة واحدة..

سيبكم إنتو بلد ريادة بصحيح..

مواطن مصري said...

شوفي الفلم دة لراحة البال


http://www.youtube.com/watch?v=Cbk980jV7Ao


انا حطيتة عندي

Unknown said...

عبد من عباد الله
والنبي تكتب تعليقك تاني
طار مني غصب عني وانا بامسح زفت الطين

Unknown said...

ده كان تعليق عبد من عباد الله

جبته من على الميل:

لأ بجد صدقيني الموضوع اكبر من كونه غلط او جهل من مسئول ... اينعم لو اللوم على اي شخص مره فالمسئول الكبير و المتعلم و الواعي العاقل اللي لديه شئ من الحكمة طبيعي حتبقى ميت مره ..

بس ارجع و اقول المشكله اكبر من كده ... المشكله فينا احنا في الناس عموماً مش حاسه بأن ده شئ غلط جامد او مشين .... بصي الناس اللي بتنفذ و اللي بتتكلم و اللي جابوهم في وائل الابراشي برده المشكله ثقافه عامه للأسف إذا كنا ما بنرحمش الإنسان يبقى الحيوان يحمد ربنا اننا بنخليه يعيش اساساً ........... هم يضحك و هم يبكي زي ما بيقولوا .

يا ريت التعليق المره دي يوصل لحسن المره اللي فاتت الاستاذ بهيج تصرف تصرف مش لطيف كان سبب في ان التعليق يروح

-----------
سبحان الله زي ما يكون قلبه كان حاسس

Unknown said...

حد تاني تعليقه طار؟

Unknown said...

نوارة
لقد حرم الله اكل الخنازير لحكمة يعلمها سبحانه و تعالي كما جعل فضلاتها نجسة نجاسة مغلظة لحكمة ايضاً اما ما دون ذلك فلم نؤمر بقتلها او تعذيبها او حتي كرهها وحكمها في ذلك حكم جميع الحيوانات الاخري.
ما ورد في الفيديو المرفق لايمت للاسلام و احكامه بصلة و هو حرام قطعاً و اكثر ما يحزنوني فيه هوا اتخاذه زريعة لوصف الاسلام بما ليس فيه

ســـــاره said...

طيب شووووفي الفيديو ده وقوليلي رأيك في الإستسهال بحياة الحيوان كونه مجرد حيوان!!!
بيفرموا البقر حي
تخييييلوا ياجماعه البقر بينفرم حي؟!!

http://www.youtube.com/watch?v=dh394o-uP2Q

انا والله وانا بتفرج عالحاجات دي بستشعرها
مش عارفه لو انتوا زيي ولا لاء
بس بحس الألم جوايا انا
ليه كده ؟ ليه عدم الضمير ده
ده كائن حي بروح ..ربنا خلقه زينا وكرّمنا عنه بالعقل بس
لكن عنده احساس وعاطفة وشعور
بيحس بكل حاجه زينا ..حتى الألم بيشعر بيه
لاحول ولاقوة الا بالله
انا تعبت نفسيا بجد

ده الرسول صلى الله عليه وسلم قال :( لعن من اتخذ شيئا فيه الروح غرضا)

يعني الرماية والصيد لمجرد التسليه حراااام والنص صريح صاحبها ملعون وهنا النص ماحددش الإنسان ..قال الروح يعني كل كائن حي فيه روح ودي رحمة الإسلام .. يقوموا ناس يوئدوا الخنازير وناس يفرموا البقر حي!!
الله العالم في ايه تاني مستخبي ماحدش عارفه

سامحيني حبيبة قلبي على الكومنت دي
بس مخنوقة بجد من اللي شفته فحبيت افضفض :)

Unknown said...

صباح الفل أستاذة نوارة
الموضوع و ما فيه
ان انا و بارنيوم بتاع اسرائيل اللى بيعزف بلال جايب سيرتنا فى مقال واحد
و مع نظيف بيه كمان

انا لسة صاحى و قارى المقال


عاتبنى بعض القراء لأننى لم أشر إلى وجود موقع إلكترونى يقوم بنشر هذه الاصطباحة منذ بدأت قبل أكثر من ستة أشهر بعد مسحها ضوئيا، لأعزائى حق فى عتابهم، ولعلها تكون فرصة لشكر القارئ العزيز أحمد بدراوى على جهده الجميل كل هذه الفترة فى نشر المقالات على موقعه http://belal-fadl.blogspot.com/، ولست أدرى كيف أشكره على هذه المحبة الغامرة سوى بوعده بمحاولة أن أكون قدها، على قد ما أقدر
.

http://www.almasry-alyoum.com/article2.aspx?ArticleID=211308&IssueID=1408
---
انا قلت اقولك عشان انتى مضايقة من الأخ بينبرونوا المثل
ههههههههههههههههههههههههههه

مي ثابت said...

أولاً : أنا مشفتش فيديوهات و لا حتى قدرت أبص على صور تعذيب الخنازير

لإن مجرد الكلام عنه و وصفه

كافى لإثارة كل مشاعر الحزن و الألم

الإحساس بإن مخلوق لا حول له و لا قوة بيصرخ و يستصرخ من التعذيب حتى الموت

!!
و للأسف نحن شهود على ذلك

إحساس لا يوصف





ثانياً : إيه الفرق بين الخنزير و الكلب

الخنزير لا يؤكل

و برضه الكلب لا يؤكل




الخنزير نجس

و برضه سؤر الكلب نجس



الخنزير بياكل من المخلفات

برضه الكلب فى بلدنا بياكل العظم من المخلفات


فهل أباح لنا رب العزة
إننا نعذب الكلب حتى
الموووووووووووووووت



ثالثاً : الأمر المثير للدهشة
إننا دايماً كنا بنهتم بصورتنا فى الخارج



سمعتنا برة فى موضوع الخنزير فى منتهى السوء

بل و ربط البعض بينها و بين خنق أهل غزة و محاصرتهم

و بيطالبوا بدراسة الشخصية المصرية الحديثة و ما طرأ عليها من تغيير

بإعتبارها أصبحت شخصية سيكوباتية

مي ثابت said...

أنا شايفة إن أول خطوة

ممكن تكون

بإستصدار فتوى من المفتى

بمشروعية ما يقوم به هؤلاء المعذبين

و أعتقد إن مفيش لا دين و لا علم يجيزه


و بعدين نتحرك بالفتوى فى وسائل الإعلام و مؤسسات المجتمع المدنى

مي ثابت said...

فيه حديث جميييل بيقول

عَنْ رَسُولِ اللهِ صلى الله عليه وسلم قَالَ: (إِنَّ اللهَ كَتَبَ الإِحْسَانَ عَلَى كُلِّ شَيءٍ. فَإِذَا قَتَلْتُمْ فَأَحْسِنُوا القِتْلَةَ، وَإِذَا ذَبَحْتُمْ فَأَحْسِنُوا الذِّبْحَةَ، وَلْيُحِدَّ أَحَدُكُمْ شَفْرَتَهُ، وَلْيُرِحْ ذَبِيْحَتَهُ)[130] رواه مسلم.



لما جم العلماء يفسروه قالوا
:


إننا لو أردنا نقتل شئ أباح الله قتله

فلا نقتله بأى وسيلة و السلام

لكن لابد أن تكون سهلة


كأن نقتله بالرصاص

أو برضّ الرأس

أو بإسقائه السم

أو بالصعق بالكهرباء



أى نقتله بالأسهل

وأسهلها كما قيل: الصعق بالكهرباء


لأن الصعق بالكهرباء لايحس المقتول بأي ألم ولكن تخرج روحه بسرعة من غير أن يشعر

خيرالدين said...

ده مقال عن الموضوع يا نواره

http://www.islamonline.net/servlet/Satellite?c=ArticleA_C&cid=1239888776255&pagename=Zone-Arabic-AdamEve%2FAEALayout

بيقول لك ان واحد عبقرى بيقترح اننا نطلق الخنازير فى العلمين علشان نتخلص منها ومن الالغام
الناس دى مستحيل يكون عندها دم او احساس

lastcrazyboys said...

أنا شكلي كــده هبــبدأ أؤمن بنظرياتك

ماهي هــوجــة الأخبــار هديت ..صحيح إن الأعــداد ما بتقلش..لأكــن الخضــة الأولانية اللي بتاخدلها يومين ..خلااااص

ايه بقى اللي هما ناويين عليه..أصل متقولييش خايفين من انفلونزا الحلاليف

طب واحنا لو موتنا الحلاليف اللي مبقدرش تنطق..هنعمــل ايه في الحلاليف اللي :كروشهم سمينة ..وقفاهم عجينة

في ريحة مؤامرة ..في جو المكان يا ست

بس ايييييييه..!!؟؟ مش عارف

كله هيبان في اوانه

mido said...

@نوارة

اوعى تشوفى الفيديو

اللى سارة جايباه

حيجرالك حاجة

mido said...

@سارة

البقرة اللى فى الفيديو ميتة أصلا

و الصوت متركب عل الفيديو

عبد من عباد الله said...

ههههههههههههههه لا مش معقوله ده مستنيني انا بقى .....
" ده جيلي انا بقى !! "


انا لو راجل من بتوع نظريه المؤامره كنت قولت ايه ده كله مره كده ده انتي متواطئه معاه بقى ...

بس كمان يا ريت ما تذكريهوش كتير كده لحسن واضح انك بقيتي متعايشه معاه و اللي يدخل المدونة لازم يعرف قصه بهيج ده و الافضل انك تحاولي قدر الامكان انك تتجاهليه و ما تجبيش سرته يعني ، إلا اذا انت بقى اتعودتي خلاص على غلاسته و المدونة من غيره ما تنفعش هههههه .

ســـــاره said...

ميدو ازاي البقر حي
انت لو شفت الفيديو من اوله هتعرف ان البقر حي
الجزء اللي انا جايباه بس يخص الفرم
والبقر كان بيتحرك !!!
بس الفيديو كامل موجود عاليوتيوب
ممكن تشوف العملية من الأول خالص

بس انا مش قادره افهم ازاي جالهم قلب يعملوا كده في حيوان حي سواء كان خنزير او بقراو غيره..ازاي بجد؟!!!
ولو فعلا مابتستحمليش يانوارة
يبقى بلاش تشوفي الفيديو لأنه بجد مؤلم

اه صحيح :)
نظام المدونة دي ازاي
يعني نوارة اللي بترد ولا ميدو ولا مين :D
عشان انا اتلخبطت ومابقتش عارفه مين صاحب المدونة اللي اوجهله الكلام :D