Wednesday 20 May 2009

دول عربية تدرس مكافأة إسرائيل لوقف الاستيطان

مش كفاية عليا حديث علي جمعة في الإج إجك، داخل لي مهندس مصري يكمل عليا
أنا قلت واحنا مالنا، هو احنا حيلتنا رشاوي؟ لقيت لك الكلمتين دولم:
ومن الدول العربية التي تخوض هذه المناقشات دول في الخليج وشمال أفريقيا، فضلا عن مصر والأردن اللتين تقيمان أصلا علاقات دبلوماسية مع إسرائيل.
فضلا عن مصر والاردن اللي هم ح يعملوا ايه؟ ح ننام نصحى نلاقي حريمنا حوامل من الاسرائيليين مثلا كنوع من انواع المكافئة على وقف الاستيطان الاستعماري في بلدنا؟
فيه كده يا ناس؟ فيه حاجة اسمها لو ما سرقتش محفظتي ح اديلك بيتي مكافئة؟
وياترى دي صدقة جارية على روح المرحوم؟ ماهي اسرائيل مسكينة ويتيمة
عموما ده كلام كان قبل النهاردة، انا لسة عندي امل ان الموعظة الكبيرة بتاعة النهاردة تغير مستقبل مصر والمنطقة كلها، اه والله، عندي احساس وامل كده ان شاء الله ان احنا النهاردة في منعطف تاريخي، خصوصا ان اصلنا بان واكيد عرف دلوقت اننا ما نستاهلش منه ده كله
مين عارف؟
يمكن الافترا اللي هنا ده كله يتغير ونلاقي نفسنا بتنا في حال وصبحنا في حال تاني
ربنا كبير
وللا ايه؟

50 comments:

حسن على said...

جاء فى مقدمة احد كتب التعليم الاولى للقوات المسلحة : "يجب على القائد تدريب الافراد على اجرائات الجنازات ... حيث ان الموت حتمى ويتم فجأة" بس خلاص انا بفكرهم عشان مايحصلش تهريج لما يحصل امر اللة

mido said...

اقرع و نزهي يعني احنا و لا ايه

mido said...

نتنياهو مصدرلهم الطرشة و بن اليعازر بينكت في عيد ميلاد مبارك و بيضحكه

مهندس مصري بيحب مصر said...

و ياريت إسرائيل حتعبرهم

ابداً

الإستيطان شغال على ودنه
و تهويد القدس شارحه
و الحفر تحت المسجد الأقصى شارحه برضه

و اللي مش عايز يخبط دماغه في الحيط
يتفضل يشرب من البحر


ربنا ينصر المقاومة
لإن إسرائيل ما تفهمش غير لغة القوة

Unknown said...

يا مهندس اسرائيل مقدور عليها
والله العظيم كمان مرة مقدور عليها بالقوي

المشكلة في الانظمة العربية
بس ان شاء الله ان شاء الله ربنا ح يغير كل حاجة من عنده

عالم بينا غلابة يعني
انت عارف قصدي هاه؟ هاه؟ اميه اميه

حسن على said...

يا نوارة هانم ... انا السواحيلى بتاعى نص نص يعنى... بس مش فاكر "الج اجك"دى اللى اتكلم فيها على جمعة؟؟ "منكن"توضحى شوية حاجة تتاكل يعنى؟؟؟؟

Kalimalhus said...

ده كده زى راجل حمش قوى دخل البيت لقى حرامى بيغتصب بنته..
- إيه ده يا بنى حرام عليك سيب البت..

الحرامى مش معبره و بيغتصب البت تانى..

- يا بنى هاأصوت و ألم عليك الحارة..

الحرامى و لا معبر أهله و بيغتصب البت برضه..

- طيب تاخد القرشين دول و تسيبها؟

Unknown said...

لازم يعني اكتبها بالحروف اللاتيني
ال
egg eggak

حسن على said...

لا لا لا... كدة بقت واضحة... وتعدمينى لو فهمت حاجة!

احمد سعيد said...

ههههههههههههههه

انتى طيبه اوى يانوارة

الله يمسيك ويصبحك بالخير يافيومى


ناس طيبين والله

ديالا said...

مهندس حر علي فكره تشبيهك حلو جدا وكمان قريب للحقيقه وعلي انا بتكلم عادي جدا اهو بس مش في مناخ الديمقراطيه الي اتكرمت عليا بيه وانت بتتهكم عليا

مهندس مصري بيحب مصر said...

تقرير : جيفارا البديري
تاريخ بث التقرير : 19/5/2009

يعاني أكثر من خمسة وثمانين ألف عربي بدوي من أوضاع صعبة في أكثر من خمس وأربعين قرية لا تعترف بها اسرائيل في صحراء النقب. وفى هذا السياق، قامت مؤسسة حقوقية عربية بجولة في هذه القرى للتنبيه إلى خطورة الاوضاع الانسانية هناك
http://www.youtube.com/watch?v=Am9aNnTAHP0

lastcrazyboys said...

الظــاهر" فانجيليا"..كان عندهــا حــق

زي الواد بتاع عرفة الجامع

والحرب فعلا على وشك..واهي المقدمات ظهرت اهي

اول محاولة اغتيال فاشلة يبقى فاضل تلاتة

وكذب المنجمون

مهندس مصري بيحب مصر said...

حبس إخوان البحيرة ال24 والأمن يحاول التستر على الضابط ناجي الجمال الذي ألقى أحدهم من الدور الرابع

Kalimalhus said...

ديالا
----
هى حكاية إن ربنا بس اللى بيحاسب و إننا مالناش حق نحاسب حد.. خرجتنى عن شعورى خصوصا إن النهارده كان يوم مستفز من أوله و جرعات النفاق فى التليفزيونات المصرية جابتلى تربانتينة فى دماغى..

أنا آسف إنى زودتها معاكى.. و بعدين أختنا نوارة عندها مناخ ديموقراطى طول السنة رغم إنها ما بتحبش الديموقراطية..

ديالا said...

مهندس حر انا بجد بحييك علي زوقك بس هو انت شايف اني فعلا مزوادها في شعوري ناحيه الريس طب بجد اعمل ايه انا فعلا كبرت ملقتش غيره وبجد بحبه بس كتير اوي فعلا هنا بيلوموني بس انا فعلا معرفتش اكرهه هو انا فعلا كده غلطانه

TAFATEFO said...

عموما ده كلام كان قبل النهاردة، انا لسة عندي امل ان الموعظة الكبيرة بتاعة النهاردة تغير مستقبل مصر والمنطقة كلها، اه والله، عندي احساس وامل كده ان شاء الله ان احنا النهاردة في منعطف تاريخي، خصوصا ان اصلنا بان واكيد عرف دلوقت اننا ما نستاهلش منه ده كله
مين عارف؟
.

فيفي عبده نفسها تتوب قبل ما تموت بساعه واحده زي مديحه كامل ما تابت وصلت الفجر وماتت زز على حد تعبير فيفي هانم

ايه العلاقه؟؟

ربنا مش ظالم .. طبعاً مش ظالم

ومبارك مش بس مربوط في رقبته حقوق ربنا .. لا دي حقوق عبااااااااد كتيييييييييير أوي أوي أوي .. فمتمناش ومعتقدش حد يتمناله حسن الخاتمة

أنا متمنالوش حسن الخاتمة .. وإن شاءالله ميحصلش

كام أم ثكلت .. وكام طفل اتيتم على ايده واي زبانيته؟؟ حسن الخاتمة ليه؟؟

TAFATEFO said...

هو الحب منافي للعدل؟؟

ابن رأس النفاق قال للرسول (ص) انه لو أراد قتله فليأمره بقتله لأنه لا يطيق أن يرى أحد من المسلمين قتله

أنا بحب مبارك .. وبحب السادات .. وبحب عبدالناصر

لكني متمناش لمبارك غير سوء الخاتمة وعذاب الآخرة

يمكن هو ده العدل في نظري

Kalimalhus said...

أبعاد الطبخة الجديدة للنظام على المستوى دولى واضحة .. يعنى بيقدم أكبر قدر ممكن من البراهين لأمريكا إن إستمراره هو الضمان الوحيد لمصالحها فى منطقة مهددة بأن يبتلعها النفوذ الإيرانى..

لكن كثافة الطبخة و بعدين إتساعها بشكل كبير داخليا مخلينى أحس إن الموضوع أكبر من كده.. بشكل محدد.. الفرشة دى واسعة و متخططلها من وقت.. يا ترى النظام بيستجمع قواه تمهيدا لقفزة كبيرة و بيحاول يأمن نفسه عشان ما يقعش على جذور رقبته تنكسر؟

حد فاكر مقال إبراهيم عيسى من فترة عن خطاب التنحى ؟.. هوه الراجل قال :بس ما أظنش.. يا ترى بقى أيظن و ألا مش أيظن..

TAFATEFO said...

ذهب عبد الله رضي الله عنه إلى رسول الله صلى الله عليه وسلم وقال له :

( يا رسول الله ، بلغني أنك تريد قتل أبي ، فوالذي بعثك بالحق ، لئن شئت أن آتيك برأسه لأتيتك ، فوالله لقد علمت الخزرج ما كان لها من رجل أبر بوالده مني ، وإني أخشى أن تأمر به غيري ، فيقتله فلا تدعني نفسي أنظر إلى قاتل أبي يمشي في الناس
فأقتله ، فأقتل مؤمنا بكافر فأدخل النار )

TAFATEFO said...

عبدالله هو ابن عبدالله بن أبي بن سلول رأس النفاق وكان صحابي ومجاهد وكان مؤمناً صادقاً يحب رسول الله ويحب أباه رأس النفاق

الحب لا يضاد العدل

Unknown said...

طب يمكن جمال يتعظ
ما تسددوهاش في وشي بقى
اما انتوا ناس غريبة
يعني انا اول مرة يبقى عندي امل

Unknown said...

ده الحب المدوحس ده يا مصطفى
وبتحبهم ليه يعني؟
لا تعرفهم ولا يقربولك ولا بتتمنى لهم حسن الخاتمة
بتحبهم عشان تغلس على نفسك؟

Kalimalhus said...

تصدقى يا نوارة إنك طيبة طيبة بجد.... هههههههههههه

فإنت بقى قلت إن فقدان حفيده ها يرده للصواب.. أو إن جيمى زعله على إبن أخوه ها يخليه يربى دقنه و يروح يجاور السيدة و يفكه من حكاية عرش مصر و الكلام ده..

قرى .. و إعترفى .. إنتى بتتفرجى على أفلام حسن الإمام تلات مرات فى اليوم بعد كل وجبة.. مش كده؟

Unknown said...

اتفرجوا على اليوتيوب، اكتبوا عمرو اديب محمد علاء مبارك، واتفرجوا على كل المقاطع، مش ممكن، عمرو اديب، وكذا حد متصل يقولوا ايه: احنا بنختلف مع الرئيس في حاجات كتير بس مهما كان ده عشرة تلاتين سنة

:)

طب والله العظيم احنا ناس زي الفل، عشان لما كنت في الاول باقول احنا خدنا على طبعه وعرفنا بيحب ايه وبيكره ايه وبياكل ايه وما بياكلش ايه كنتوا بتتريقوا عليا وتقولوا لي: هو جوزنا؟ اهو، ربنا نصفني على كل اللي اتريقوا عليا اهو وطلع جوزنا في الاخر

طب والله العظيم احنا ناس طيبة، شوية يعني مش قوي، بس ان جنرال طيبين

يارب بقى يعرف اننا غلابة وما كناش نستاهل منه المعاملة دي ابدا، ويعرف ان رأيه فينا كان غلط هههههههههههههه والله مش عارفة اقول ايه؟

Unknown said...

مهندس حر

والله العظيم انتوا عيال شريرة
هو فيه حاجة بعيدة عن ربنا؟

Kalimalhus said...

ديالا
----
هوه أنا قعدت أفكر فى حكاية إنك بتحبى مبارك دى و أجيبها شمال و أجيبها يمين لغاية ما مصطفى قال إنه بيحبه..

فحيث كده أنا هاقدم على هجرة لموزمبيق..

نوارة.. تحبى أشوفلك عقد عمل هناك و ألا ها تقعدى هنا لغاية ما تحبى مبارك إنتى كمان؟

رحلتنا في الحياة said...

والله انتى طيبة فعلا يانوارة ولسه عندك امل وربنا يخيب ظننا ان شاء الله واملك يتحقق بس فعلا احنا اتعودنا عليه ومعرفش من غيره ممكن نعمل ايه

Kalimalhus said...

عمرك سمعتى عن شعب غيرنا عنده مثل بيقول اللى يجوز أمى أقوله يا عمى..

أمال إحنا كل اللى بيعدى بيركب و ما ينزلش ليه.. عشان لا بنرفس و لا بنعض .. يحطولنا برسيم ناكل و نشكر.. ما يحطوش نسكت و نصبر..

و بعدين ها نروح بعيد ليه ما إنتى نفسك بتقوليلى هوه فيه حاجة بعيدة عن ربنا؟

لأ طبعا مافبش.. بس ربنا عرفوه بالعقل مش بالعشم..

مهندس مصري بيحب مصر said...

أونروا طالبت إسرائيل بفتح المعابر
إصابة فلسطيني في سلسلة غارات على غزة
الطيران الإسرائيلي كثف غاراته الثلاثاء على قطاع غزة (رويترز-أرشيف)

أصيب ناشط فلسطيني في سلسلة غارات شنها الطيران الإسرائيلي مساء الثلاثاء على قطاع غزة, بينما أعلن جيش الاحتلال أن صاروخين سقطا ببلدة سديروت دون أن يوقعا إصابات.

وقالت مصادر فلسطينية إن الطائرات الإسرائيلية شنت ثلاث غارات على الشريط الحدودي بين القطاع ومصر دون أن تقع أي إصابات. وأضافت أن القصف دمر أنفاقا جنوبي قطاع غزة.

كما استهدفت غارة أخرى وسط القطاع ورشتي حدادة في حي الشجاعية ونقاط تجمع لنشطاء فلسطينيين, ما أدى إلى إصابة أحدهم بجروح.


وقالت مصادر طبية إن الناشط أصيب على نقطة تجمع للنشطاء في حي الزيتون جنوب شرق مدينة غزة, مضيفة أن إصابته متوسطة.


وفي وقت لاحق قصف الطيران سيارة مدنية كانت تسير قرب جبل الكاشف شرقي جباليا شمال القطاع دون وقوع إصابات.



الاحتلال قال إن إسرائيليا أصيب بالهلع نتيجة سقوط الصاروخين على سديروت
(رويترز-أرشيف)
قصف سديروت
وجاءت الغارات بعد وقت قصير من إطلاق ناشطين قذيفتين صاروخيتين محليتي الصنع من القطاع على بلدة سديروت جنوبي إسرائيل. وقال متحدث عسكري إسرائيلي إن القذيفتين سقطتا في ساحة منزل بالبلدة دون وقوع إصابات مباشرة.

وأضاف المتحدث أن حالة من الهلع أصابت إسرائيليين بالبلدة وأن أضرارا مادية لحقت بالمنزل. ولم تعلن أي من فصائل المقاومة مسؤوليتها عن إطلاق الصاروخين.

من جهته أشاد جهاز الأمن الإسرائيلي (الشاباك) بجهود مصر لمنع تهريب السلاح لقطاع غزة.

وقال رئيس الجهاز يوفال ديسكين للإذاعة الإسرائيلية إن مصر "تبذل جهودا حقيقية لمنع تهريب الأسلحة إلى قطاع غزة.. وإنجازات القاهرة في هذا السياق آخذة في التحسن".

اعتصام متضامنين
وفي سياق آخر قالت مصادر بالحكومة الفلسطينية المقالة إن عددا من المتضامين الأجانب يعتصمون ويضربون عن الطعام قبالة بوابة معبر رفح احتجاجا على منع السلطات المصرية بالمعبر السماح لهم بالدخول للقطاع.

وقالت اللجنة الحكومية لكسر الحصار في بيان إن المتضامنين وعددهم تسعة ويضمون أطباء وممرضين من بريطانيا واليونان وبلجيكا أعلنوا اعتصامهم وإضرابهم عن الطعام منذ صباح الثلاثاء.

وأوضحت اللجنة أن أولئك الأجانب موجودون بالمعبر منذ خمسة أيام في انتظار سماح السلطات المصرية لهم بالدخول, لافتة إلى أنهم يحملون معهم معدات طبية وأدوية ومساعدات.

عالقون بالحصار
من جهتها طالبت المفوضة العامة لوكالة غوث وتشغيل اللاجئين الفلسطينيين (أونروا) كارين أبو زيد إسرائيل بضرورة العمل على فتح المعابر بقطاع غزة لحرية تنقل الأفراد والبضائع.

وقالت أبو زيد للصحفيين بغزة إن الأونروا تواجه العديد من المشاكل لأنها لا تستطيع إدخال شيء لغزة بسبب الحصار الإسرائيلي.

وأضافت "نحن لا نستطيع إدخال الطعام ولا الأدوية ولا السيولة النقدية والمواد اللازمة لبناء وترميم المساكن التي دمرت في الحرب وكذلك ترميم الأماكن الصحية والمدارس, فنحن جميعا عالقون تحت الحصار".
المصدر: وكالات
http://www.aljazeera.net/NR/EXERES/FEC5DCD4-A837-49E3-A8ED-7A6032455255.htm

Unknown said...

مهندس حر
هههههههههههههههه
ههههههههههههههههههههه
هههههههههههههههههههههههه
ههههههههههههههههههههههه
ههههههههههههههههههههههههههه
ههههههههههههههههههههههههههههه

لا وايه؟
بيحبه وعايزه يروح النار وعمره في حياته ما شافه غير في التلفزيون
يعني مش مثلا اداله مرة حتة شيكولاتاية وهو في المدرسة وعنده اصل بقى مش عايز ينسى له الشيكولاتاية
لا
ده ما يعرفوش خالص وعايز له خاتمة مهببة وبيحبه
زي ما بيحب السادات وعبد الناصر
من غير مناسبة برضه
انا مش عارفة طيب هو تعريفه ايه للحب؟

انا؟

لا انا قاعدة لحد ما ضميره يصحى ويطلع في مرة يعتذر لنا عن كل اللي عمله فينا ويتبرع بفلوسه كلها لمصر ويستقيل هو وولاده واحنا ح نسامحه


ايوشة
ايه؟ هو مش معقول للدرجة دي؟ مش معقول ليه؟ ده سيدنا محمد كان عنده امل في ابو جهل هو صحيح ما اسلمش
بس سيدنا عمر اسلم وقبل الاسلام ما كانش يفرق عن ابو جهل كتير

رحلتنا في الحياة said...

ولاده مين يا عم .. ولادنا اللي ماتو في العباره واكلهم السمك محدش جاب سيرتهم .. احنا بس لانا شعوب عاطفيه نشعر بالحزن بس ده مش معناه انا احنا ولاد الريس

ياخوفي بكره لما يتوكل الريس كلنا تدفعنا العاطفه ونختار جمال

تعليق واحد من اليوتيوب على مقاطع عمرو اديب هههههه

رحلتنا في الحياة said...

ماانا بقول ربنا يخيب ظننا كلنا يارب ويكون فعلا الموضوع ده سبب فى تغيره
بس المقاطع بتاعت عمرو اديب دى بتتضحك والله العظيم

TAFATEFO said...

مهندس

تاني معتقدش ان الحب والكره ليهم علاقه .. مفيش حاجه اسمها المفروض أحب شخصه ولا أكرهه .. تفرق في ايه يعني؟؟

وبعدين وأنا سغير كان قدام عيني علطول فيديو رفع علم طابا و زياراته وقعدته مع الفلاحين على المصطبه يشرب شاي والأوبريتات العجيبه

طب كمان أنا بحب عاطف صدقي الله يرحمه جداً

بهجت الاباصيري said...

الناس اللي عماله تتكلم دي معندهاش دم كل مصيبة راكبين فيها ويقعد يقولك انا مش شمتان حتي اسألوا دموع عنيا اسألوا مخدتي ....... وعاملين يقولك العبارة والاطفال والبتنجان .... اللي بيتكلموا دول بقي ومش عاجبهم عملوا ايه بقي حضراتهم .... رغي علي الفاضي زي علي جمعة بالظبط ... عموما في حوالي مليون طفل مشرد وبيشموا كله ويمكن اكتر في الشوارع .... اللي الانسانية مقطعاه قوي يدب ايده في محفظته وينزل يديهم .... لحسن الصنف شاحح اليومين دول

واللي بيحب الريس يرفع ايده .... والباقي يركب البوكس

بهجت الاباصيري said...

سؤال للمهندس مصري ....... انت شغال بقوة كام خبر في الدقيقة ؟
انت يابني مولود في الاستديو التحليلي

افصل دا التلاجة بتفصل

TAFATEFO said...

سبحانك يا رب .. تفرق في ايه؟؟

عمر الكاره ما كان عادل .. ومعتقدش اني هستفيد حاجه لما أكرهه

لا تبغضوا أحداً من الناس. وإذا كان لا بدّ لكم من البغض فابغضوا كلّ ما في الناس من ضعف وإثم.

لا تبغضوا الشرير، وابغضوا الشرّ. لأنكم إن أبغضتم الشرير اصبحتم أشراراً مثله. أما إذا أبغضتم الشرّ فقد تقتلونهُ وتهتدون إلى الخير.

Kalimalhus said...

مصطفى
-----
أنا ما عنديش إعتراض على إنك تحب أى حد.. المشكلة إن مادام واحد زيك بيحبه يبقى عندنا مشكله كبيره فى بقيت الشعب..

أنا ممكن أضمن إن حبك ليه ما يأثرش على قرارك مثلا فى إنتخابات الرئاسة اللى جاية.. لكن بقيت الشعب أنا مضمنوش.. و عشان كده أنا من الصبح على باب سفارة موزمبيق..

على فكرة أنا برضه بحب عاطف صدقى..

Unknown said...

بتحبوا عاطف صدقي ليه؟ الله يرحمه، عشان خدوده كانت مكلبظة؟

هو البني ادم يا يكره يا يحب؟
يعني ما ينفعش لا يكره ولا يحبه؟
الواحد عشان يكره حد او يحبه لازم يعرفه
بس الشخصيات العامة الواحد بيحب افعالها او بيكره افعالها
انما معلش يعني الكلام:
ده واحد ظالم، في رقبته حقوق عباد كتير، ما اتمنالوش التوبة، وما اتمنالوش حسن الخاتمة، وانا اصلا ما اعرفوش شخصيا
بس باحبه
doesn't make any sense

Unknown said...

بهيج بيسألكوا سؤال ديني: لو في رمضان وما لقاش حاجة يفطر بيها ينفع يسب الدين؟
ههههههههههههههههه
الحمد لله على كل حال

TAFATEFO said...

doesn't make any sense.

:D:D:D Sure

:-# :-# :-# :-# :-#

كده أسلم

lastcrazyboys said...

استلمي الاستمورنينج ده قبل ما الواحد يخش ينام

هو الفروض عدد امبارح..بس لخمة الوضع ..والسرادق..مكناش فايقين لحاجة

بس هو لسة فيه ناس جبــلات بالشكــل ده

نظيف ينتقد «الوحشية»فى التخلص من الخنازير.. وعدلى حسين يهاجم «المصرى اليوم» لكشفها عمليات الإعدام

والله انت حقتك رجلك تيجي في الموضوع ..جنبا الى جنب مع المصري اليوم

تتمســوا على خير

عشان الواحد بكرة عنده احتفال بالدوري..حاسس ان الترسانة هيعملها يا جدعاااان

lastcrazyboys said...

استلمي الاستمورنينج ده قبل ما الواحد يخش ينام

هو الفروض عدد امبارح..بس لخمة الوضع ..والسرادق..مكناش فايقين لحاجة

بس هو لسة فيه ناس جبــلات بالشكــل ده

نظيف ينتقد «الوحشية»فى التخلص من الخنازير.. وعدلى حسين يهاجم «المصرى اليوم» لكشفها عمليات الإعدام

والله انت حقتك رجلك تيجي في الموضوع ..جنبا الى جنب مع المصري اليوم

تتمســوا على خير

عشان الواحد بكرة عنده احتفال بالدوري..حاسس ان الترسانة هيعملها يا جدعاااان

mido said...

@مصطفى

طيب ده بيحب عبدالله بن ابى سلول

عشان
ابوه

ايه المقارنة ؟

Fatma said...

@Tafatefo
لكني متمناش لمبارك غير سوء الخاتمة
وعذاب الآخرة

يمكن هو ده العدل في نظري

ليه بس كدا ؟
ما تتمناش حاجة وحشة تحصل لحد حتى لو كان يستاهلها
قول انا ليا حق عنده ومش مسامحه فيه
وربك عادل ما بيضيعش حقوق الناس
بس ما تتمناش لحد حاجة وحشة
دا الملايكة بتقول ولك بالمثل

عايزة اقول حاجة بس من غير ضرب :)
فاعفوا واصفحوا ألا تحبون أن يغفر الله لكم
بلى احب ان يغفر الله لي
وأنا عن نفسي مسامحة الريس في حقي
كفاية عليه اجيال ورا اجيال حقهم في رقبته
اهو يمكن اخفف عنه حاجة

Fatma said...

شوفي دا
عدلي حسين
مستعد أعالج المكتئبين من إعدام الخنازير فى «الخانكة»
http://www.almasry-alyoum.com/article2.aspx?ArticleID=211773

والله ماحد محتاج يروح الخانكة غيره

Kontiki said...

يعنى نفتح لهم الاجواء و نديهم تسهيلات تانية لو التزموا و وقفوا الاستيطان !!
دى فلسفة اليأس اللى انا اتبعتها مع اختى لما جابت درجة مهببة فى امتحان الفيزياء بدل مااعاقبها اخدتها ورحت بيها سيلنترو ودى كان من منطلق انى فى قمة الياس من انصلاح نظام التعليم وايمانى انها ترس فى منظومة ظالمة وفاشلة ومن المستحيل انه ينصلح الحال ولو بعد مليون سنة
واضح ان حكومتنا العربية بتتبع فلسفة اليأس وليس فى الامكان ابدع مما كان وزى روايات نجيب محفوظ طول عمرنا شعب يدى للفتوة اتاوة
وطالما وصلوا للمرحلة دى يبقى الاحسن يشيلوا كلمة ذكر من كل البطايق من كبيرهم لصغيرهم بلا هم

مواطن مصري said...

هو صحيح يا نوارة في المكسيك فية 1000 واحد ماتو جديد من انفلونزا الخنازير


المرض بينتشر

مواطن مصري said...

خدي بقى الخبر دة و منتظر الرد بتاعك

نقل المستشار عدلى حسين، محافظ القليوبية، هجومه على «المصرى اليوم» من البرلمان، إلى المجلس الشعبى المحلى، وواصل تصريحاته «البذيئة» ضد الجريدة، بسبب كشفها طرق إعدام الخنازير فى محافظته، وهى الطرق التى وصفها رجال الدين بأنها لا تتفق وتعاليم الإسلام.

وقال عدلى، فى بيان تلاه أمام المجلس المحلى للمحافظة، أمس: «أشكر المحررة مها البهنساوى، صاحبة التحقيق الصحفى، على هذه الرقة والإنسانية البالغة، فقد تأثرت من أصوات الخنازير، وصعبت عليها، وإذا كانت قد أصابها الاكتئاب وتريد العلاج عندنا، فلا بأس، وأنا مستعد أن أتحمل من جيبى الخاص تكلفة العلاج النفسى لمن أصابهم الاكتئاب بسبب إعدام الخنازير، ولأننى لا أملك مالاً كثيراً، سأعالجهم فى (الخانكة) ومستعد أيضاً أن أرسل لـ(لجرنال الموقر) قائمة بأسماء من أصابهم الاكتئاب لعلاجهم فى الخانكة».

ولم يكتف عدلى حسين بهجومه على «المصرى اليوم»، بل وجه انتقادات حادة إلى علماء الدين، الذين أدانوا إعدام الخنازير بهذه الطريقة، وقال: «إذا كانوا قالوا ذلك فما رأى فضيلتهم فى قطع اليد والرجم وقطع الرأس بالسيف كما يحدث فى السعودية، وما رأيهم فى أشياء أخرى كثيرة تقرها الشريعة الإسلامية»، وتابع موجهاً حديثه لعلماء الدين: «ولا إنتوا درستوا شريعة أخرى؟».

واختتم بيانه الهجومى بقوله إن نشر «المصرى اليوم» القضية دفع وزارة الزراعة إلى إرسال خطاب له يلزمه بذبح الخنازير قبل دفنها، وقال: «أدبح فين.. ليس لدينا مجزر أو وحدة ذبح.. لذلك قررت إعدامها عند المدفن، خوفاً من تلوث المنطقة بدمائها».

تعليق:

«المصرى اليوم» تترفع عن الرد على عدلى حسين حتى لا تهبط إلى مستوى تصريحاته ولغته، وتكتفى بإعلان توجيهات رئيس الوزراء وتعليمات وزير الزراعة له بعدم تكرار إعدام الخنازير بـ «الجير الحى»، وهو ما يؤكد صحة ما نشرته الجريدة، لذا نربأ بالصحافة أن تنحدر إلى تبادل البذاءة مع المحافظ.

عدلى حسين يهاجم علماء الدين.. ويواصل تصريحاته «البذيئة»: مستعد أعالج المكتئبين من إعدام الخنازير فى «الخانكة»
http://www.almasry-alyoum.com/article2.aspx?ArticleID=211773

أسماء - فلسطين للأبد said...

والله يا نوارة أنا برضه عندى أمل ورجاء فى ربنا ان اللى حصل يكون بداية لتغيير .. بس فيه نفطة مهمة جدا : "إن الله لا يغير ما بقوم حتى يغيروا ما بأنفسهم" يعنى العظة دى المفروض توصلنا احنا كمان .. يعنى الموظف اللى مابيمشيش شغل حد اللا برشوة يتعظ ويتغير .. اللى مابيتقنش عمله ومقضيها بالفهلوة ومشى حالك يتعظ ويتغير .. اللى بيرمى مخلفات بيته فى الشارع ومش هامه انه بيئذى الناس اللى حواليه يتعظ ويتغير .. واللى بياخد حق غير حقه بالواسطة واللى بيقول ياللا نفسى واللى متعصب وعمال يولعها واللى واللى ..... لو كلنا قررنا فعلا اننا نتغير للأفضل أكيد ربنا برضه هايغير أحوالنا للأفضل ويهدى اللى فى إيديهم القرار للى فيه صالحنا .. أتمنى فعلا ان الكل يفوق من أكبر كبير لأصغر صغير وكلنا نبقى أحسن مما كنا .. إحنا فعلا نستحق ونقدر نكون أحسن من كده