Monday 18 May 2009

حدث بالفعل

Based on a true story
الشخصيات: الفلاح الفصيح، الخنيس، العبثي، كحيت الأليط، الأستاذ يا ناس يا شر كفاية قر، مراقب الأنفار، وانا مالي هه، الاستاذة على كيفي، المخبولة، الهلف
المكان: مكان ما في القاهرة/ مصر
الأحداث
الاستاذة على كيفي: شفتوا اللي حصل في الخنازير يا عيني؟
الفلاح الفصيح: الله يحرق الخنازير على اللي بيربيهم
المخبولة: الله؟ وعلى اللي خلقهم كمان؟
الفلاح الفصيح: استغفر الله العظيم
الاستاذة على كيفي: ده بيرموهم في الجير الحي احياء
المخبولة: وكتبوا في الجرنال ان رموهم في النار
العبثي: والله ما فيه خنازير غير اللي بيعملوا في الحيوانات كده
الهلف: اصل الخنزير ما بيحسش
العبثي: نعم؟
الهلف: ايوة، الخنزير ما بيحسش، ده كلام علمي يا استاذ، مش لما واحد يبقى ما عندوش دم يقولوا له يا حلوف؟
المخبولة: ومين بقى اللي قال لك الكلام العلمي ده؟
الهلف: واحد صاحب مزرعة خنازير... قال لي بيضربوهم بالعصايا عشان لحمهم يزيد
يا ناس يا شر كفاية قر: يعني معنى كده انهم ما بيحسوش؟ وهو ده بقى مصدرك للكلام العلمي؟ صاحب مزرعة خنازير
الهلف: انتوا بتدافعوا عن الخنازير
العبثي: مش حيوانات؟
الفلاح الفصيح: حيوانات ربنا محرمها
العبثي: يبقى مكرمها...
الهلف: مكرمها؟ ده فيها نص يا استاذ
المخبولة: مش ربنا اللي خلقها وخلاها تولد كل اربعين يوم وفي نفس الوقت امرنا ما ناكلهاش؟ يبقى ربنا بيرحمها مش بيكرهنا فيها؟
الفلاح الفصيح: تصدقي صحيح، الفكرة دي ما خطرتليش على بال خالص
الهلف: صحيح ايه؟ ما كانتش اتحرمت بنص، انت عارف؟ الخنزير الدكر بياكل صغاره، عشان كده النتاية بتطرده برة الحظيرة
العبثي: والقطط كمان بتعمل كده
الهلف: بس الخنزير ما بيحسش، خلاياه الحسية ميتة
العبثي: لعلمك فيه بني ادمين هم اللي ما بيحسوش... خالص بقى
الهلف: ده كلام علمي
(الكل بيضحك)
الهلف: دي حيوانات قذرة، فيه حيوان ياكل روثه، ده حيوان بياكل روثه ولو نام على صغاره ممكن يموتهم من كتر عدم احساسه، عشان كده بيرضعهم شوية ويجري ويرجع يرضعهم تاني
المخبولة: يعني بيحس اهو... انت بتاكل كلاب؟ عمرك اكلت كلب؟ عشان مش بتاكله تقوم تعذبه؟ وبعدين ايه حيوان قذر حيوان قذر، عيب عليك ده انت فلاح، ده الفلاح الجاموسة عنده اهم من مراته وولاده
الهلف: اه... طب وايه دخل الجاموسة في الخنزير؟ الخنزير قذر
المخبولة: آه، لكن طبعا الجاموسة بتعمل بيبي في الحمام وبتشد السيفون وبتغسل سنانها بعد الاكل
الفلاح الفصيح: اااااااااه، جبت الكلام لجمايسنا، ايه اللي جاب سيرة الجاموسة دلوقت، جمايسنا في زرايبها مالهاش دعوة بحد
الخنيس: مالكوش دعوة بجمايسنا ولا لينا دعوة بخنازيركوا
الهلف: اه صحيح يا عبثي، ده انت بتاكل خنزير، لا مؤاخذة، معلش، جرحتك
العبثي يتنفض وهو بيبرطم
العبثي: فيه بني ادمين هم اللي خنازير بجد
المخبولة: دي اخلاق دي يا هلف؟ احنا بنتكلم في ايه دلوقت؟ ينفع تقول لزميلك الكلام ده؟
المخبولة تقوم وراه: استنى انا جاية معاك
العبثي هامسا: انا مش عايز اكلم الهلف ده تاني، لا وكمان بيعايرني عشان انا مش مسيحي وباكل خنزير
الاتنين بيدخلوا بارتيشن تاني والتانيين قاعدين بيدخنوا
الكحيت الاليط: يا راجل؟ بقى فلان الفلاني (ممثل) شاذ؟ اخص الله يقرفه
الخنيس: وانت ايه اللي مضايقك في الـ..
ياناس يا شر كفاية قر: باقول لك ايه؟ ما تقعدش تقول لي مثلي... مثلك انت
الكحيت الاليط: مش عارف، انا باتضايق منهم قوي، دول مرضى
العبثي: ده الكلام ده في الستينات، دلوقت بيقولوا خمسين في المية سلوك وخمسين في المية جينات
الكحيت الاليط: طب والواحد يعمل ايه في التربية عشان يتأكد ان ابنه ما يطلعش كده؟
الخنيس: يعني لو جينات ح تغيرها ازاي؟
المخبولة: ييييييييييييييييييييييييي يا اخي بيقول لك خمسين في المية جينات خمسين في المية سلوك
الخنيس: لا، الجينات ح تخلي عنده الميل الجنسي، لكن السلوك انه ما يندمجش في الممارسة
المخبولة: التدخين جينات، وممكن لو واحد اتربى في بيئة مافيهاش تدخين يطلع ما بيدخنش رغم ان عنده الجينات
الكحيت الاليط: طب انا لا ابويا ولا امي بيدخنوا وانا بادخن
العبثي: يا اخي بتقول لك جينات جينات، الجينات دي مش من ابوك وامك بس
الخنيس: اللي بتقولوه ده كلام مش علمي، مافيش حاجة تمنع اللي عنده ميل جنسي معين انه يغيره، ده علم، كمان من الملحوظ ان نسبة كبيرة من النساء الاوروبيات، ان لم يكن اغلبهم، بيبقوا باي سيكشوال.... انا لمست ده بنفسي من خلال الشات
الفلاح الفصيح يدخل وهو بيوجه كلامه للمخبولة
الفلاح الفصيح: انت زعلتي عشان الخنازير يا استاذة؟
المخبولة: مش كده، بس واحد بيقول الخنازير ما بيحسش
العبثي: ده هو اللي خنزير وما بيحسش
يا ناس يا شر كفاية قر: لا بص يا فلاح يا فصيح، الا التعذيب، دي مخلوقات ضعيفة، ربنا ما يرضاش بالتعذيب، اللي فعلا يستاهل ينزل في الجير الحي ويتسلخ حتة حتة ولاد الكلب اللي بيخطفوا العيال الصغيرة ويتاجروا في اعضائهم، اهم دول ينزلوهم حتة حتة في الجير الحي، لحد ما يغطسوهم وقبل ما يموتوا يطلعوهم ويرجعوا يغطسوهم تاني
العبثي يقوم عشان يخرج: لااااا النهاردة يوم سادي ابن كلب
يا ناس يا شر كفاية قر: انا بقى سادي
المخبولة: انا بس عايزة اقول لك حاجة، التعذيب بيضر اللي بيعذب زي ما بيضر اللي بيتعذب
يا ناس يا شر كفاية قر: انا بقى باحب التعذيب، ماهو انت لو ابنك، لا قدر الله، حسيتي انه اتخطف واتقتل واتقطع واتاجر في اعضائه ما كنتشي قلتي الكلام ده، كنتي اخدتي ساطور وقطعتيه ستين حتة وما استنتيش البوليس
المخبولة: ايوة دي مشاعر انسانية طبيعية بس القانون مش هدفه الانتقا....
يا ناس يا شر كفاية قر: ما تقوليليش الكلام ده، حطي نفسك مكان الام وللا الاب
الكحيت الاليط: ايوة ما هو ح ياخد اعدام، ايه لزوم التعذيب؟ التعذيب ده انتقام واصلا الاعدام ده لوحده حاجة صعبة
يا ناس يا شر كفاية قر: يبقى يتعدم في ميدان عام
المخبولة: يعني انت ترضى تخلي بنتك اللي عندها خمس سنين تتفرج على واحد بيفرفر
يا ناس يا شر كفاية قر: لا، انا بنتي ما تتفرجش، واللي عايز ما يتفرجش ما يتفرجش، بس المهم انه يبقى رادع
الخنيس: مش ح يبقى رادع، ومش ح يحل المشكلة، اللي ح يحل المشكلة ان يبقى فيه عدالة اجتماعية
الكحيت الاليط: عدالة اجتماعية ايه يا عم؟ واحد بواب يخلف لي تسعة وتقول لي عدالة اجتماعية؟ ده مفروض يتعدم هو وولاده
الخنيس: قبل ما تعدمه، روح اعدم اللي بيعمل فرح لابنه بتسعة مليون دولار
المخبولة ويا ناس يا شر كفاية قر في لحظة واحدة: يتعدم هو وولاده؟ مين ده؟
الكحيت الاليط: البواب اللي يخلف تسعة، ده يستاهل الاعدام، يخلف وبعدين يشتكي الفقر
يا ناس يا شر كفاية قر: يا راجل اتقي الله
المخبولة: لاااااا ايه اليوم الغريب ده؟
وبعدين تقوم وتطلع في المكان الاول وهي بتكلم العبثي: ايه اليوم الغريب ده؟ واحد يقول الخنازير ما بتحسش وواحد يقول البواب اللي يخلف تسعة يتعدم وواحد عايز الناس تتعذب وواحد يقول كلام علمي جبته من الشات الاوروبيات باي سكشوال
الهلف: انت بتقارني ما بيني وبين الكحيت الاليط، ده واحد عايز يموت بني ادمين، لكن الخنزير ما بيحسش
يا ناس يا شر كفاية قر بييجي بيقعد على الانترنت وبصوت هادي
يا ناس يا شر كفاية قر: اهو، بص يا هلف، تشريح الخنزير اهو، وبيحس، وخلاياه زي خلايا البني ادم، بيحس، بيحس، ربنا اللي خالقه
الهلف: يعني بيحس؟ ده مش كلام علمي
مراقب الانفار: والله انا ليا راي في الموضوع ده، هذه ايات ودليل على ان الاسلام هو الحق
الاستاذة على كيفي: يا سلام، ازاي بقى؟
مراقب الانفار: لان ربنا حرم الخنزير واهو بينقل مرض
على كيفي: يعني الواحد يفهمكوا ازاي؟ لو اكلت عشرين كيلو خنزير مش ح يجيلك انفلوانزا الخنازير، وبعدين طب ما ربنا ما حرمش الفراخ، ماهي بتجيب مرض وبيموت
وانا مالي هه: انت عارفة يا استاذة ان اسرائيل زعلانة قوي على اعدام الخنازير
المخبولة: واسرائيل تزعل ليه؟ هي مالها؟
وانا مالي هه: ما انت عارفة بقى صلة اللي بين الخنازير واليهود
(الجميع ما عدا الهلف ومراقب الانفار)
الجميع: ياااااااااااااا سلاااااااااااااااااااااام
المخبولة: مش ممكن، حضرتك مش ممكن تكون عايز تقول لي ان الاسرائيليين حاسين بحنان القرابة ما بينهم وبين الخنازير وعشان كده زعلانين عليهم
وانا مالي هه: امال يعني تفتكري زعلانين ليه؟
الفلاح الفصيح يضحك لحد ما عينيه تدمع
المخبولة: ويا ترى الخبر ده شفته فين؟ ماحدش فينا سمع بيه خالص، ثم اسرائيل مافيهاش خنازير
وانا مالي هه: على الوكالات
الكحيت الاليط: مخبولة، انت زعلتي عشان باقول البواب لازم يتعدم
المخبولة: تفتكر ايه؟ لا والله فرحانة قوي
الكحيت الاليط: انا مش قصدي يعني يتعدم يتعدم، بس هو المسئو..
المخبولة: انت بتحمل الضحية المسئولية، هم لهم حق يخلفوا ويعيشوا زي البني ادمين، انت كنت لسة بتتكلم عن السويد من شوية وبتشكر فيهم، السويد مافيهاش الغنا الفاحش اللي عندنا ده، مصر فيها فلوس، ومدام فيها فلوس يبقى من حق الناس كلها تخلف وتعيش زي البني ادمين مش واحد يبقى معاه مليارات وواحد يتلام عشان بيخلف وهو فلوسه مسروقة
الكحيت الاليط: بس رجال الاعمال دول كل حاجة تجيبوها عليهم، يعني انت عايزة اشتراكية؟
المخبولة: على فكرة السويد اللي عاجباك دي اشتراكية
العبثي: اففففففففففففففففففففففف النهاردة يوم غريب قوي
-------------------
الحوار اعلاه مدمج ولم يتم تحريف فيه حرف واحد

45 comments:

مواطن مصري said...

هو انتي الي كاتبة البوست دة


هههههههههههههههههههههههههههههه

لا عجبني البوست بقولك

ابعتيلي اللينك بتاعك ع ماي سبيس

mido said...

مين المخبولة :D

mido said...

بس بذمتك ينفع بواب فقير يخلف تسعة؟ دمار شامل

مواطن مصري said...

و مين الكحيت الاليط
:D

عزيز عيني said...

مش عارف ليه عندي احساس بأن الاستاذ يا ناس يا شر كفاية قر والحاج وأنا مالي هه منايفه متأصلين .....شكلها كده الدم بيحن

كلاكيت تانى وتانى said...

يا نوارة فية موضوع لازم نثيرة اعلاميا لأننا كدة بيضحك علينا بجد انفلونزا الخنازير يمكن مش موجودة بشكلها العام الواضح فى مصر بس الاعراض بتاعتها منفصلة بصورمختلفة بتهاجم الناس كلها الايام دى انا عملت دراسة حالة على اكتر من شخص والنتيجة مخيفة جدا اولا الموضوع بدأ بمرض ابنى فجأة بضيق فى التنفس وانفلونزا وسخونية ورعشة ودخل المستشفى يومين اشتباة فى ربو طبعا اخد كمية مضادات واكسجين وبعدها بأيام لحقة اخويا بس بأعراض اخف وبدأت الأعراض تنتشر حولينا حتى انا مازلت اعانى من ارهاق عام وبرد طفيف وضيق تنفس ولسة بتناول المضادات الحيوية ودة نبهنى اسأل المحيطين بية فالشرقية والقاهرة عن وجود بعض الاعراض فلقيت بالفعل اعداد كبيرة بتشتكى من نفس الاعراض مجتمعة او منفصلة لأنفلونزا الخنازير ومفيش حد بينطق الكل بيبلبع مضادات حيوية وبس ومش فاهمة فية اية ولية التكتيم الاعلامى القصة اعتقد ببساطة ان الفيروس موجود بس بصورتة البسيطة بالفعل وناس كتير بتشتكى بس لا احد يبالى وكل واحد بيتعامل معاة على اساس برد او ارهاق او ربو او ضيق تنفس برغم انى عملت لستة للاعراض لناس صحابى فى القليوبية والشرقية والقاهرة نفس الشكوى والاعراض وانا اليوم اللى ببطل فية المضاد بتعب تانى حاولى تعملى عندك وحواليكى كدة استنفار واستبيان للناس انا واثقة ان الفيروس موجود وبقوة

مي ثابت said...

صحيح ممكن يكون فيه حوار طبيعى بالشكل ده


طبعاً الحواركله عبثى

لكن كمان

حرف القاف فى الجملة ديه مش مريح بالمرة

علشان كده إستبدلته بالفاء



المخبولة: الله؟ وعلى اللي خلفهم كمان


ينفع يا نونة

و لا رأفت الميهى ممكن يقولنا إننا أخلينا بالبناء الدرامى للحوار

ههههههه

Unknown said...

ايه ده يا كلاكيت

استني

رحتي مستشفى الحميات؟

عشان اصل ممكن اي حد يجيله برد يفتكره انفلونزا الخنازير

ارجوكي قولي الاعراض بالظبط

انت عندك حرارة؟

Unknown said...

طب ما تروحي مستشفى الحميات وتحللي يا كلاكيت

عشان ممكن يبقى مجرد هلع وتبقى الحكاية برد عادي

Unknown said...

كلمي مية وخمسة

الاعراض:

سعال
رشح
حرارة
ضيق تنفس
الم في الزور والمفاصل
واعياء

مواطن مصري said...

طيب دي اعراض برد عادية


يا نوارة كلها اسبوع و تروح لحالها

Kalimalhus said...

@كلاكيت

الأعراض مختلطة بأعراض الأنفلوانزا العادية و ده طبيعى ما هى أنفلوانزا برضه..

السبيل الوحيد للتأكد هو إنك تروحى لمستشفى الحميات.. حسب المعلن المستشفيات دى بس هى المجهزة لتأكيد الإصابة أو نفيها..

على فكرة لو حد عنده معلومات عن مستشفيات تانية مجهزة لإكتشاف الإصابة ياريت يقول لأن فيه ناس ممكن ما يكونش فيه مستشفى حميات قريب منها..

فكرة إن الفيروس منتشر فعلا بس الناس مش واخدة بالها صعبة شوية لأن لازم كان حد هايروح لمستشفى و ساعتها حالته ها تكتشف.. و على فكرة الفيروس صحيح مش شديد الضراوة لكنه بيسبب أنفلوانزا أقوى من العادية و ده أمر يمكن ملاحظته..

كلاكيت تانى وتانى said...

ياحبيبتى افهمى مش انا بس
دة معطم الناس حواليا وفأماكن كتير فالقاهرة كدة مفيش سخونية خالص اعراض متفرقة بدون سبب واضح يعنى انا عندى ضيق تنفس وارهاق بدون سخونية غيرى عندة الم فى العضلات مع برد بدون سخونية غيره سخونة بس وبرد بدون ضعف تنفس اعراض كتير للأنفلونزا ناس كتير بتشتكى مش انا بسسسسسس كلمت 105 قالولى لازم سخونية بس انا بعتقد ان الفيروس موجود بس بصورتة الضعيفة وبيتحور ويهاجم الناس بطرق مختلفة والكلام عن عدم وجودة اطلاقا مش ممكن يكون صحيح والأ اية كمية الاعراض الغريبة دى عندى وعند غيرى وطبعا دة مش هلع لأنى ببساطة مش فاضية اهلع ههههههه ولا فاضية اخاف اصلا ههههه اسألى بس عندك وحواليكى لأنى فعلا شايفة اعراض غريبة عند ناس كتيرفالشرقية وفأماكن راقية فالقاهرة والقليوبية

Unknown said...

يبقى لازم تروحي مستشفى الحميات وتحللي

وبعدين في تغيير الفصول الناس بيجيلها برد
والفترة اللي فاتت فضل الجو شتوي وبعدين قلب صيفي مرة واحدة

وده جو عيا

ما تتخضيش
الخضة ممكن تضاعف احساسك بالمرض

عشان ترتاحي انت واللي حواليكي لازم تروحوا الحميات وتحللوا

كلاكيت تانى وتانى said...

بصى الشئ المشترك بين كل اللى قاللولى انهم تعبانين هوة ضيق التنفس وعندى كمان عشان كدة بقولك الفيروس بصوتة الضعيفة ودة مش وحش لأنى حسب فهمى ومن قراءاتى اعتقد انة كدة بيعمل عندنا مناعة للفيروس لما يجىى بصورتة القوية ويهاجم ويمكن دة من رحمة ربنا بينا مش عارفة بس انا عاوزة افهم لأن الوضع بقى مقلق ومستحيل يكون مثلا عشرة فأماكن متفرقة بيجمعهم عرض ضيق التنفس وجملة اعراض تانية متفرقة تبع قدرة الجسم والسن ويبقى وهم او خوف او هلع معرفش ومش فاهمة وعاوزة افهم ولو حتى كلامى صحيح هل تتوقعى
انة فعلا حد هيصرح ويقول كدة ويفهمنا
ابنى شخصوة بنزلة شعبية حادة وكان سخن ومش قادر يتنفس واخد كورس ادوية ورفضت اخرجة من المستشفى الا بعد يومين تانى يوم سافر اخويا 24 س ورجع تانى مش قادر يتنفس وقعد على جهاز اكسجين يوم كامل واخد نفس علاج ابنى وجالة برد دون سخونية يويمن وعدت بعدها انا الم فى العضلات وارهاق وضيق نفس بدون سخونية وكلة راح من المضاد ماعدا ضيق التنفس والارهاق وبدأت اكلم كل اللى اعرفهم وفوجئت بأعراض مختلفة فتحت النت على اعراض انفلونزا الخنازير والطيور لقيت نفس الأعراض بس بتفاوت يبقى فهمينى بقى تستنتجى اية من كل دة ..... انا بخير بس فعلا ضيق التنفس مضايقنى وبيرجع لما ابطل المضاد الحيوى زفالمستشفى وف 105 بيقولولى مفيش ودة الحر وبيسألوا نفس سؤالك فية سخونية ولا لأ ؟؟؟؟؟؟؟؟؟يبقى فية اية بقى يا أما انا غبية ومبفهمش يا أما مصر كلها بقى نفسها ضيق وعندها ربو ههههههههههههههه

mido said...

ضابط أمن دولة قذر حدف اخواني من الدور الرابع في البحيرة

مي ثابت said...

- أعراض إنفلونزا الخنازير في البشر مماثلة لأعراض الإنفلونزا الموسمية وتتمثل في ارتفاع مفاجئ في درجة الحرارة وسعال وألم في العضلات وإجهاد شديد. ويبدو أن هذه السلالة الجديدة تسبب مزيدا من الإسهال والقيء أكثر من الإنفلونزا العادية.

http://www.aljazeera.net/NR/exeres/8846C3A7-6A1F-4FA6-97F1-0C155EFA93E6.htm



فعلاً ممكن تكون الأعراض اللى عندك أنفلوانزا عادية

لكن للإطمئنان لازم نروح الحميات

و إن شاء الله يكون الأمر بسيط

فقط نطمئن

و شفاكى الله و عفاكى من كل مرض

Kalimalhus said...

أفهم من حكاية الموضوع مدمج إنه ممكن يكون أجزاء منه متجمعة من تعليقات البوستات اللى فاتت على حوارات مع ناس فى الشارع و كده؟؟

طبعا شخصية الأخت العزيزة المخبولة واضحة مع إن كان ممكن تلاقى إسم ملائم أكتر زى بارودة محمصة مثلا.. يعنى إسم يوضح توهج الشخصية و إندفاعها... :D

أنا برضه مش شايف إنه من الممكن التسامح مع الأخ أبو تسعة ده.. أصل العملية مش عايزة فكاكة.. راجل بواب و شايف عيال الشوارع مرميين فى كل حته و شايف بيحصل فيهم إيه و إزاى مش حتى متسابين فى حياة البؤس الطين اللى همه فيها لأ فيه اللى بيستغلهم و فيه اللى بيسرق أعضاءهم و فيه اللى بيقتلهم بغرض التسلية.. يبقى شايف ده كله و يروح يجيب تسعة مرشحين لمصير مماثل..
كونه مش واخد حقه فى بلد منهوبة أمر صحيح بس مختلف لأنه بيتعامل مع واقع شايفه و عارفه.. و فى إطار الواقع ده هو مذنب فى حق نفسه و أكتر فى حق أولاده اللى جابهم للدنيا و عرضهم لمصير أغلب الظن إنه سيئ إلا من رحم ربى و ربنا يتولانا إحنا و الخنازير برحمته..

Unknown said...

برضه اشتري تامي فلو

هو رسميا مش موجود غير في الحميات
لكن في السوق السودا
الصيدليات بتبيعه
معلش تمنه حراق شوية بس لو ما نفعش مش ح يضر

اهو دوا برد زي اي دوا برد وانت كده كده بتاخدي مضاد

على فكرة لو بتبطلي كورس المضاد قبل ما يكمل طبعا لازم تتعبي تاني

المضاد الحيوي ده كورس
حتى لما تتحسني ما تبطليهوش لحد ما تخلصي الكورس



مهندس حر

لا يا مهندس ده حدث بالفعل

ناس صحابي دار بينهم الحوار ده

انا بانقل بامانة

باقول مدمجة لاني اختصرت كلام كتير اتقال في النص
القعدة كانت طويلة
اربع ساعات

TAFATEFO said...

مفيش أي فرق بين أعراض السيزونال انفلونزا والاتش ون ان ون

اللي قلقان أو عايز يعرف أي حاجه أو يسأل يتصل بـ 105

الأعراض المذكوره هي نفسها أعراض الانفلونزا .. ومفيش حد مجالوش انفلونزا قبل كده

احنا في وقت تغيير فصول والجو متقلب وطبيعي جداً ان الناس تجيلها كل الأعراض دي .. غير ان تأثير الإعلام واضح على ناس كتير .. أوي

دي كل الـ كيوز آند ايز اللي ممكن تيجي على بال أي حدوبعدين .. مفيش أي داعي للقلق

mido said...

كلام عن وفاة

محمد علاء مبارك

TAFATEFO said...

If you become ill and experience any of the following warning signs, seek emergency medical care.

In children, emergency warning signs that need urgent medical attention include:

* Fast breathing or trouble breathing
* Bluish or gray skin color
* Not drinking enough fluids
* Severe or persistent vomiting
* Not waking up or not interacting
* Being so irritable that the child does not want to be held
* Flu-like symptoms improve but then return with fever and worse cough

In adults, emergency warning signs that need urgent medical attention include:

* Difficulty breathing or shortness of breath
* Pain or pressure in the chest or abdomen
* Sudden dizziness
* Confusion
* Severe or persistent vomiting
* Flu-like symptoms improve but then return with fever and worse cough
.

الوورنينج ساينز دي مش معناها ان عندك اتش ون ان ون .. معناها انك محتاج ميديكال جايدانس للانفلونزا

TAFATEFO said...

@mido

الكلام عن حد مهم من العائلة المالكة في مستشفى وادي النيل بقاله 3 أيام

امبارح جبهة انقاذ مصر قالت انه ابن علاء وان سوزي قطعت أجازتها .. وبرضه مش أكيد

مفيش حاجه أعلنت

TAFATEFO said...

Swine flu (influenza A/H1N1) symptoms
The following symptoms can indicate you've contracted influenza A/H1N1. After a 24 to 48 hour incubation period, the virus can leave you with:
-A fever
-Muscle pain, particularly back muscle pain
-An irritated throat
-Headaches
-Intense fatigue, possibly resulting from pain
-Difficulty breathing
-Dry and deep episodic coughing
-A runny nose
-Loss of appetite
-Diarrhea (rare)
-Nausea and vomiting (rare)

Information released by the World Health Organization warns that you may not be able to tell the difference between seasonal flu and influenza A/H1N1 without medical help so see your doctor if you suspect you may have contracted the virus.

TAFATEFO said...

@mido الكلام اللي فيه "وفاة" ده سمعته من مين أو اتكتب فين؟؟

TAFATEFO said...

مكتوب في موقع جبهة انقاذ مصر برضه

!!!!!!!!!!!!!!!!

mido said...

وفاة حفيد الرئيس مبارك .. محمد علاء مبارك

مواطن مصري said...

عليكم ب اليانسون المكون الاساسي ليم فلو

Unknown said...

يا حبيبتي يا كلاكيت

انت مش غبية ولا حاجة بعد شر عنك الغباوة ليها ناسها وانت ابعد ما تكوني عنهم

لكن زي ما قلت لك قبل كده
الخضة ممكن تضاعف احساسك بالمرض
ومش انت لوحدك اللي مخضوضة
الله يخرب بيتها مافيا الصحة العالمية خضت كل الناس
واي حد دلوقت بيعطس بيجيله هلع
ضيق التنفس ده ممكن يبقى من مظاهر الهلع
انا لما باخاف او اكتئب بيجيلي ضيق تنفس

اهم حاجة ما تخافيش
ما تخافيش
اصلا اصلا انفلوانزا الخنازير دي مش خطر

ثانيا
الاعراض اللي عندك مش اعراضها
اعراضها هي بتاعة الانفلوانزا الشديدة الي بتخلينا نقعد نخطرف في السرير
مدام مافيش حرارة يبقى ما تتخضيش
ولو فيه بعد الشر حرارة
ما تتخضيش
اوحش حاجة لما الواحد يبقى عيان انه يخاف ودي اللعبة اللي لعبتها منظمة الصحة العالمية والاعلام العالمي
انهم يخضوا الناس
وزي ما برضه قلت لك قبل كده
تغيير الفصول لازم له برد
ده كل سنة بيحصل يا كلاكيت
يمكن السنة دي طالبة مع البرد ضيق تنفس
ويمكن زي ما قلت لك الهلع العام هو سبب ضيق التنفس
اكتر حاجة بتأخر ان الواحد يخف انه يخاف
عشان كده باقول لك
وح اقول لك عاشر
خدي بعضك واقطعي الشك باليقين وروحي اقرب مستشفى حميات وحللي
وبرضه احتياطي اشتري يا ستي تامي فلو
انا بيني وبينك عندي احساس ان التامي فلو ده ما يفرقش عن اي دوا تاني
بس الناس لما بتاخده بتخف لانها مسألة نفسية
الاعلام العالمي اوحى لهم ان التامي فلو هو اللي بيخفف فلما ياخدوه بيخفوا
والله انا حاسة انهم لاعبين في دماغنا
اهم حاجة في العيا
الراحة النفسية قبل الراحة البدنية
لو حللتي واخدتي الدوا اللي بيقولوا عليه بيخفف ح ترتاحي نفسيا وتطمني وتبقى زي الحصان ان شاء الله

بالنسبة للتكتيم
والله انا مش باثق في الاعلام عندنا ولا طبعا في مؤسسات الدولة
واكيد اكيد مش باثق في وزارة الصحة
وزارة وزيرها رجل اعمال
تفتكري دي وزارة ايه؟ وزارة الرقص تبقى محترمة عنها

بس عموما انا برضه احساسي ان الموضوع مش محتاج تكتيم ولا نيلة
انا مش حاسة ان فيه وباء
انا احساسي ان الوباء الحقيقي هو وباء الخوف اللي نشروه

وان شاء الله خير ما تخافيش

Unknown said...

هههههههههههه
مواطن

انا باحبك قوي


ميدو

عارف يا ميدو لو جبهة انقاذ مصر بتكدب المرة دي تاني

ح اعمل لهم فضيحة بجلاجل

TAFATEFO said...

^^ :-|

mido said...

مواطن مصرى

الاعشاب دى برده شغل دجل و

و ناس ظلامية

و انت راجل متنور

mido said...

انقاذ مصر عمل ايه قبل كده ؟

انا مش متابعه

Unknown said...

موقع جبهة انقاذ مصر مش بيفتح عندي ليه؟

بيفتح عندكوا؟

Unknown said...

اهو فتح فتح

Rania Lelah said...

ههههههههههههههههههه
الحوار حلو اوى اوى يا نوراه بجد و تحسى انه مصرى بجد كل واحد فاكر انه بيتكلم كلام علمى و مؤكد و حقيقى و لا يتخلله الشك
و كمان التنقل الا منطقى بين المشاكل و ربطها كلها بالخنازير

و الله احنا شعب عسل :)

Unknown said...

والله للامانة انا مش فاكرة بالتحديد الاخبار اللي كان بيألفها

لان الكلام ده من حوالي سنتين
وبقالي سنتين مش بادخل

بس انا اللي فاكراه كويس اني قريت خبر في انقاذ مصر وكان حاجة كده سيريالية فاتخضيت واتصلت بناس كتير وبعدين ضحكوا عليا عشان باخد اخبار من الموقع ده
وطلع الخبر غلط
ح احاول ادور بالظبط كان خبر بخصوص ايه
انت عارف بقى الزهايمر

Unknown said...

يا عيني
ده عنده اربعتاشر سنة

كان عيان عنده ايه؟

طب استنوا ح افتح رويترز وللا حاجة

TAFATEFO said...

مهو مفيش أي جريدة رسمية أو وكالة أنباء تقدر تقول أي حاجه قبل ما يعلن رسمياً

Unknown said...

عرباوي بيقول ان الخبر اتذاع في الجزيرة

لا حول ولا قوة الا بالله

انا لله وانا اليه راجعون
ربنا يرحمه

انا فتحت الجزيرة وح اشوف كده الاخبار ايه

مواطن مصري said...

سوزان مبارك كانت في لندن و قطعت التكريم الصبح و راحت تطمن




لو بعد الشر الخبر طلع صحيح بلاش نشمت في الموت

أكون أو لا أكون said...

انا لله وانا اليه راجعون...
الله يرحمه

أكون أو لا أكون said...

http://news.bbc.co.uk/hi/arabic/middle_east_news/newsid_8056000/8056723.stm

Kalimalhus said...

إنا لله و إنا إليه لراجعون.. الولد صغير.. ربنا يصبر والديه..

mado said...

نوراة بعت ليكي ميل فيه الحاجة
شوفي كدا وردي عليا.

صحيح مفيش حد قالك ان الي بياكل خنزير بيبقي شبهه.
وبيبقي راجل نص كم مش بيخاف علي اهلة.
اصل في واحد قالي كدا والمفروض انه راجل كبير ومتعلم وماسك منصب كويس يعني مش راجل علي قد حالة في التعليم ولا المستوي الاجتماعي ولا العلمي.
مقتنع ميه في الميه ان الي بياكل خنزير بيبقي راجل قرني.

معداش عليكي الصنف دا