Thursday 28 May 2009

شوية اغبار

اول حاجة اشتروا المصور، معلش، اصل ماما كاتبة عن وثيقة تفكيك اسرائيل
تاني حاجة اقروا البوست ده عند كريم البحيري
تالت حاجة فيه رواية لواحدة، اظن من جنوب افريقيا، قديمة، اسمها 
things fall appart
انا مش فاكرة اسم الكاتبة، لاني قريتها من حوالي خمستاشر سنة، بس بدل ما تقعدوا تتخضوا من موضوع اتفاق اسرائيل مع دول حوض النيل عشان تخفض حصتنا (الاولى تتخضوا من الصواريخ اللي متوجهة ناحية السد العالي في افريقيا - صواريخ اسرائيلي طبعا) وبدل ما تتساءلوا: ليه يعني؟ ده احنا بنعمل معاهم احلى واجب، ده احنا حتى مدينهم غازنا وبترولنا وسراطنا ببلاش ويقولوا لنا ادبح يا زكي قدرة يدبح زكي قدرة، ايه بقى؟ ليه الرزالة دي؟ 
اقروا الرواية دي عشان تعرفوا ازاي كل الاشياء تنهار. بتقع، اسم الله عليها، انشالله انا اللي اقع من الدور الاتناشر وهي تفضل سليمة، بس هي بتقع، وادي احنا موجودين، والله اعلم، ح نعرف نسندها وللا لا، بس احنا معاها يعني، ح نروح فين؟ 
عموما ان شاء الله مافيش حاجة تخض، يعني ح يعطشونا؟ ح يضربونا؟ مصر الجائزة الكبرى؟ احنا معانا ربنا ح يعملوا فينا ايه يعني؟ قال يا قرد ح يسخطوك
بس عشان تعرفوا ان اللي بيعيش ندل مش بيموت مستور ولا حاجة، هو مفضوح من اول لحظة استندل فيها وبرضه بياخد على قفاه، الندل لما يحتكم يقدر ولا يعفيش، والندل نهايته على قد ندالته، ومن غير زعل كده، اللي يوافق على الندالة ويبرر لها يستاهل اللي يجرا له، وادي احنا مع بعض، ح نروح من بعض فين
----
امي شافت دينا الرقاصة وهي بتعيط في قناة الحياة عشان اتهمت بانها رقصت مع واحدة اسرائيلية، وقالت انا بارقص في النايت كلب ده بقالي سبع سنين، واحدة زبونة جات تتصور معايا، ح اقول لها طلعي الباسبور؟ والله ما كنت اعرف انها اسرائيلية. ومفحوتة من العياط
الرقاصة
الرقاصة مفحوتة من العياط عشان اتهمت انها رقصت مع واحدة اسرائيلية
طب دي تنفع ننتخبها رئيسة جمهورية وح تبقى انضف من اللي فوقينا... اقصد الشقة اللي فوقينا يعني

11 comments:

mido said...

المصور لا المصور حرام

مواطن مصري said...

هههههههههههههههه

دينا تاني
ههههههههههههههههههههههههههههههههه
هههههههه

مواطن مصري said...

اة بخصوص موضوع الاقباط قادمون



فاكرة المقال الي كتبتة عن الدولة الدينية = الدولة العنصرية

الاخوان قادمون= الاقباط قادمون


يا سبحان الله

ربنا يخاد المنظمات المتطرفة الي جهنم

mido said...

بالنسبة للأقباط ضد التمييز تأثيرهم ضعيف جدا و شوفي طلعت السادات فين و عاشور و رجائي فين

سبهللة said...

بالنسبة للسد العالى ربنا يلطف بينا
فعلا
لنا الله
==============
وبالنسبة للست دينا
واحدة عندها مبدأ وتبكى من أجله
موقف تحترم عليه لو كان بكائها مش تمثيل والله اعلم بالنوايا
بس تحمكنا؟؟؟
فشر يا دلعدى
ما وصلتش للدرجة دى يا اختشى
راقصة وبترقص
ماشية
لكن رقاصة وبتحكم
لأااااااااا
ما يحكمشى

mido said...

يا رب الاخوان يحكموا أو حتي يمسكوا كام وزارة بالعند في ناس :P

Kalimalhus said...

كويس إن الست الوالدة تمكنت من الكتابة فى المصور عن الوثيقة و ياريت غيرها يحاول يكتب عنها فى مجلات و صحف أخرى..

مش شايف إن موضوع أقباط المهجر يخوف حد و العلاقة بينهم و بين شباب ضد التمييز تبدو مجرد كلام مرسل إلا إذا كان فيه دليل و برضه مش ها تكون حاجة تستحق القلق .. إن ما كناش نقدر نعتمد على إن المهنيين من محاميين و مهندسين و أطباء و صيادلة و تجاريين و غيرهم قادرين على إختيار ما هو فى صالحهم و ليسوا عرضة لتغرير البعض بهم يبقى نقعد فى بيوتنا ساكتين أحسن لأن ما يبقاش فيه حد فى البلد دى فيه أمل..

دينا .. أفلحت إن صدقت..

TAFATEFO said...

رجائي فين؟؟

ولا هيكسب رجائي .. علشان الإخوان مش مهم بالنسبه لهم مقعد النقيب .. حتى تدعيمهم لخليفه كان كده .. واللي هيكسب عاشور

الإخوان مش مهم بالنسبه لها مقعد النقيب .. علشان محدش يفتكر الإخوان خسرت لو فاز عاشور لأنه هيفوز

Cardiology Man said...

إزيك يا ست نوارة
هل قصدك بالرواية الرواية دي؟

http://ifile.it/12dnqeu/things_fall_apart.rar

سميربس said...

الروايه عندى هنا javascript:openNewWindow('http://www.4shared.com/file/108294522/e5386f5c/Achebe__Chinua_-_Things_Fall_Apart.html')
و ملخص لها
هنا
javascript:openNewWindow('http://www.4shared.com/file/108293081/1dc22c3e/Things_Fall_Apart.html')

الملخص ده مش انا اللى كتبته ده من عمل طالبة كانت بتدرس ادب انجليزى فى الجامعة العربية المفتوحة

هوندا said...

الكاتب من نيجيريا
اسمه
Chinua Achebe

http://www.goodreads.com/book/show/37781.Things_Fall_Apart