Tuesday 12 May 2009

إذا قتلتم فأحسنوا القتلة

أنا عايزة افهم، هي الخنازير دي مش حيوانات؟ هي الحيوانات دي مين اللي خلقها؟ مش ربنا؟ هو مش ربنا قال على الحيوانات أمم أمثالكم؟ هو مش الرسول قال على ذبح الحيوان او قتله "إذا قتلتم فأحسنوا القتلة"؟ هو مش تعذيب الحيوانات حرام؟ هو مش فيه واحدة دخلت النار في قطة وعاهرة دخلت الجنة في كلب؟
هو مش الريس قال الخنازير تندبح؟
ليه الخنازير تتاخد في فان كبيرة وتترمي في حفرة ويتردم عليها بالجير الحي (اللايم - مادة كاوية) احياء؟
حرام ده وللا حلال؟ احنا مش خايفين من ربنا؟ اذا واحدة دخلت النار عشان عذبت قطة واحدة، امال جيش الخنازير اللي بيتعذب بالخنق والمادة الكاوية ده ربنا ح يعمل فينا ايه انتقاما له؟ كون ان ربنا محرم اكله ده مش معناه اننا نعذبه
ده الرسول قال لا تمثلوا ولو بجثة الكلب العقور حرام عليكوا
احنا مش خايفين من ربنا؟ مش خايفين من ربنا؟ يعني احنا بنعذب الحيوانات دي عشان خايفين من انفلونزا الخنازير، مش خايفين ربنا يعمل فينا زي قوم فرعون ويجيب لنا مصيبة من حيث لا نرجو ولا نحتسب واحنا بنعذب مخلوقاته بالطريقة دي؟
انا مش باتناقش في قتل الخنازير، انا باتناقش في طريقة قتلها، ده، على رأي ام زينب، حيوان اخرس ما يقدرش يدافع عن نفسه، الزبالين يقدروا يعتصموا يتخانقوا، لكن مين يدافع عن الحيوانات؟ ربنا حط الحيوانات الضعيفة دي امانة في رقبتنا وح يحاسبنا عليها
انا باعيط، مش معقولة ابدا ما نعرفش ربنا خالص كده؟ احنا فاكرين نفسنا مين عشان نعمل في مخلوقات الله كده ومش خايفين من حسابه؟

80 comments:

Anonymous said...

هو في مشاكل تانية في الذبح..أولها انه برضو الخنازير المصابة سوائل جسمها هيكون فيها الفيرس..حتى بعد الذبح..
والثاني بقى انه بلدنا معادش الواحد فيها آمن على أكله ومبقاش عارف اللحمة اللي بيشتريها دي لحمة إيه بالضبط..

لكن برضو عندك حق في حتة التعذيب..يعني طريقة اعدام الخنازير لازم تكون فعالة من ناحية، بحيث متعذبش، وتكون مأمونة برضو..

مواطن مصري said...

انا مع اعدام الخنزير

صحة الانسان ام حقوق الخنازيرررر


سيبك من دة عشان محدش يحولة لطائفي زي مايكل منير هو صحيح كندا اعدمت خنازير؟


بس شوفي البوقين الجامدين للريس

http://www.masrawy.com/News/Egypt/Politics/2009/may/12/mubarakisrael.aspx

lastcrazyboys said...

إذا كان البني ادمين مفيش رحمــة بينهم وبين بعض

هيرحمــوا حيــوان ..نصيحة لوجه الله ..أوعي تروحي تقولي الكلام ده برة

هنا حتتك تقدري تتكلمي وتنظّــري زي مانتي عايزة ..برة مفيش غير رد فعــل واحــد للكلام اللي بتقوليه ده
..................

صوتي اتنبح وانا عمــال اقول الأزمــة أزمة ثقافة

مش ثقافة بمفهومها الأهبل اللي روجــوه عنــد مــاما سوزان
والقراءة للجميع..لأ الثقافة مش قراية بس

الثقافة اللي هي مخزون وعصارة راية بتتسلم من ناس لناس

ثقافة العيب وميصحش اللي قعدوا سنين يناضلوا عشان يمحوها من بيوتنا
ثقافة " التبريقة" اللي كانت الركب بتخبط في بعضها لما تكون على حاجة مينفعش الحساب عليها دلوقتي

ثقــافة لما تعرفي الطريقة اللي ترجعيها تاني بيها

ابقى تعالي ..واتكلمي

ياما مش بس تعيطي

ده انتي تغطيني ..وتصوتي

Fatma said...

يا لطيف يارب

يا لطيف

دا بجد فعلا ولا ايه ؟!!!!!

معقولة يعني ؟

مش المفروض بيدبحوهم وبيجمدوا اللحوم وهيبيعوها في حالة ان الخنزير يطلع سليم ؟!

هو انا فاهمه غلط ولا ايه

Kalimalhus said...

هوه المفروض إن الإجراء المتبع الدبح ثم إما حفظ اللحم أو الإعدام للخنازير الصغيرة و للإناث العشار و لأى خنزير يكون لحمه غير صالح للأكل..

الحالات اللى بتعدم -بعد الدبح؟- بتعدم بالطريقة اللى إنتى قلتى عليها.. يعنى المفروض إن الخنزير بيكون ميت فعلا قبل ما يترمى فى الحفرة دى..

طبعا أنا ممكن أصدق إن اللى بتقوليه بيحصل فعلا لأن الإستسهال فى البلد دى عقيدة.. لكن الكلام الرسمى هايقول إن مافيش حاجة من دى و إن تعليمات مش عارف مين واضحة بالخصوص ده..

-السؤال بقى لإيه مصدر معلوماتك؟

Unknown said...

عدلي حسين بتاع القليوبية لا بيدبح ولا بينيل
بيعدم على طول بالطريقة المتوحشة دي
منه لله
والزبالين مش فارق معاهم الدبح او الاعدام المهم ياخدوا تعويض

مافيش طريقة تانية
ما ينفعش يحقنوهم مثلا بمادة تموتهم وخلاص

او باي طريقة غير الطريقة المتوحشة دي
هو ذنبهم؟
وح يعملوا ايه في البني ادمين الحاملين للعدوى؟
ح يدفنوهم احياء برضه؟
طب ده احنا في بيتنا القديم كان فيه ظابط جاب عسكري يضرب القطط بتاعة السلم بالنار ربنا جاب له مرض فظيع بقى صويته يجيب لاخر الدنيا

Kalimalhus said...

@مواطن مصرى

شكرا على اللينك أنا ما ضحكتش الضوحك ده من ييجى سنة.. و النبى تاخدوا الدرة دى:


المذيع : هل سيأتى ليبرمان لمصر بعد نتنياهو ؟
الرئيس : لأ .. أنا بتعامل مع نتنياهو لا اتعامل مع ليبرمان .

المذيع : إذا كان سيأتى لمصر بعد نتنياهو كزيارات عادية بين وزراء الخارجية ؟
الرئيس : أنا لا أعلم . هل وزير الخارجية دعاه أم لا.

Kalimalhus said...

عليكى بالست برجيت باردو .. هى ممكن تقوم الدنيا عليهم..

على فكرة أنا مش بتريق .. لكن نظام بيتعامل مع البشر بالشكل اللى إنتى عارفاه لما يعدم حيوانات تفتكرى ها يعمل إيه غير كده.. ربنا يتولانا إحنا و الخنازير

Unknown said...

مهندس حر

الخبر اهو بتاع عدلي حسين

http://www.elbashayer.com/?page=viewn&nid=48640

بالنوسبة للعلوان بتاع موضوع الريس اللي انا لسة ما قريتهوش

ايه العثل ده؟
بقى لا تطبيع قبل السلام؟

بقى كلللللللللل اللي فات ده ما كانش تطبيع؟

افهم من كده ان لو حصل سلام ح نخلف منهم؟

Kalimalhus said...

حكاية الضابط و القطط دى مثيرة للإهتمام..

ده أسلوب تفكير معين للتعامل مع الأمور اللى بتزعجهم بقى .. زى كده الضابط اللى طخ راجل فى نافوخه عشان بيدخن مخدرات تحت بلكونته.. تفتكرى بياخدوا كورس فى الموضوع ده و ألا دى خبرات عملية؟؟

Unknown said...

واليوم الساقع كمان كاتبة في الموضوع ده

Kalimalhus said...

لأ لو حصل سلام حا نعترف باللى خلفناهم

mido said...
This comment has been removed by the author.
مواطن مصري said...

مهندس حر انا ضحكت لما قال البق دة
الرئيس : أنا لا أعلم . هل وزير الخارجية دعاه أم لا.



مش فية مخبرات بتكتب تقارير


انا قلت انقل ليكم حاجة كوميدي

mido said...

اقرى حوار مبارك

أنه يعتقد ان رئيس وزراء اسرائيل بنيامين نتنياهو يريد ان يحل وسيعمل على تحقيق السلام

mido said...

هناك أخطاء جسيمة في عملية نقل الخنازير بعد ذبحها أو إعدامها تهدد صحة المواطنين، مشيراً إلي أن الخنازير تُنقل بعد إعدامها في عربات مكشوفة الأمر الذي يؤدي إلي احتمال انتقال الأمراض التي تحملها إلي المواطنين

Kalimalhus said...

@مواطن مصرى

و هى الحكاية محتاجة مخابرات يامواطن؟.. هو وزير الخارجية يقدر يهش دبانة من على وشه من غير ما يسأل رئيسه..؟؟؟

مي ثابت said...

طبعاً حرااااااااام


لو فكرتى فى الموضوع كله حتلاقى الحرام فيه كتير

من أول الرعب المبالغ اللى عيشوا الناس فيه

لحد المتاجرة بأعصاب الناس

النهاردة كان فيصل القاسم و على غير عادته

مستضيف إتنين نفسهم هادى

!!
الأول

د.هشام الزين ممثل منظمة الصحة العالمية

و الثانى
د. وجدى سواحل خبير فى الوراثة الميكروبية

و قال معلومات مهمة زى

الخريطة الجينية أثبتت إنه ضعيف
لا يصيب الرئة
و لا يهاجم الجهازالمناعى

أما عن كم المغالطات حتى فى الأرقام فحدث و لا حرج

على سبيل المثال
130فى المكسيك أعلنوا وفاة 150 ثم نزلوا بالعدد إلى 12 ثم 100صعدوا به إلى 22 حالة .


و فى الأول قالوا إذا دخلنا فى الدرجة السادسة المرض حيقضى على نص سكان العالم
نزلت إلى تلت سكان العالم بعدها بأيام

الكارثة بقى لما إتكلم عن عقار النصب
تيمى فلو

يعنى منظمة الصحة ألزمت مصر على سبيل المثال

بإنفاق ما بين 300 مليون
إلى 400 مليون جنية
لشراء العقار بجانب خطوات إحترازية أخرى

العقار نفسه تحتكره شركة جلعاد
الأمريكية و مقرها كاليفورنيا

و الذى تولى رئاسة مجلس إدارتها راميسفيلد
و زوجة حاكم الولاية عضو فيها
و شخصيات أخرى نافذة

الشركة ديه بتبيع العبوة
بستين دولار

فى حين عرضت شركة هندية تصنيعه
بإتناشر دولار


فى النهاية حسيت إنهم عايشونا فى كدبة كبيرة

زى كدبة السارس و الملاريا و حمى الوادى المتصدع

و كدبة أنفلوانزا الطيور
التى لم يمت بسببها سوى متين و خمسين شخص
منذ ألفين و خمسة

فى النهاية كان التساؤل

ماذا فعلت المنظمة للآلاف الذين يموتون جوعاً كل يوم

ماذا فعلت لعشرة آلاف فلسطينى قتيل و جريح فى مذبحة غزة

مواطن مصري said...

مي

هو معلش نانتي مش عايشة في مصر


عندنا اصبات تقدر ب 69 مصاب بانفلونزا الطيور و الرقم خطير


و انفلونزا الطيور ليس كدبة

ثانيا صحة الانسان المصري فوق كل اعتبار فوق حتى الخنازير

صحة الانسان المصري قبل اي حد تاني سواء فلسطيني كان او من المريخ


و بعدين الناس لو ممبلغتش عن الطيور المريضة هتحصل كارثة

Unknown said...

انا مش عارفة
ايه الجنان دة...... دة اكن فى تار بايت بيننا و بين الحيوانات الغلبانة دىو اللى يقولك قذر و اللى يقول نجس .......ربنا حرم اكله فقط مش امرنا بتعذيبه و حرقه و دم الخنازير المسكينة فى رقبتنا فى يوم القيامة...... الرسول عليه الصلاة و السلام الجذع حن له و بكى و احنا قلوبنا حجر

Kalimalhus said...

@مى

رغم إن كلامك فيه منطق بس منظمة عالمية بالحجم ده أى نوع من التلاعب المفضوح أكيد ها يثير إتهامات معلنة من
ناس كتير..

فيه إتهامات واضحة من كثيرين بالمبالغة بخصوص أنفلوانزا الخنازير بس أنا ما سمعتش حاجة عن التاميفلو أو عن مبالغة بخصوص أنفلوانزا الطيور لأنها فى النهاية فيروس حيوانى و لسة ما بينتقلش بين البشر و بالتالى خطر تحوله لوباء كبير لسه ضعيف.. بس هو فعلا نسبة الوفيات فيه بين الإصابات المؤكدة عالية لأنه فيروس شديد الضراوة بخلاف فيروس الخنازير اللى يعتبر معتدل الخطورة.

بالنسبة لقتلى و جرحى العدوان على غزة أفتكر المنظمة تقنيا دورها الإعتراض على الأوضاع الصحية فى القطاع و حالة مستشفياته فى ظل الحصار و النقص فى المواد الغذائية اللى بيهدد بإنتشار عدد كبير من الأمراض و بالتالى كارثة إنسانية ضخمة..

Kalimalhus said...

@مواطن مصرى

لا مؤاخذة بس دى عدت منك.. حياة أى فلسطينى تساوى حياة أى مصرى و أى عربى و قبل حياة أى حد غيرهم.. و إلا إحنا رحنا نحارب سنة 1948 ليه.. و حصلنا اللى حصل سنة 56 و النكسة الزفت سنة 67.. ده كله كان دفاعا عن حق و حياة مين؟؟

مي ثابت said...

مواطن

الراجل مقلش إنها كدبة

قال إنها موتت
متين و خمسين على مستوى العالم
تلتهم فى أندونسيا و الفلبين و مصر


و هيه مش كدبة
لإنها موتت فعلاً
المبالغة فيها هيه اللى كدبة

أعتقد واااااضح


فى حين بلغت

أرباح الشركة فى الألفين و خمسة فقط مليار دولار


كمان يا مواطن

قالك إن دراسة يبانية أثبتت

إن أربعة و خمسين فى المية

من الأطفال الذين تعاطوا العقار
تعرضوا لإضطرابات سلوكية


يعنى يا مواطن

فيه أنفلونزا طيور
و كمان خنازير

لكن مش بالرعب اللى معيشينا فيه

وصلت الفكرة
؟؟






يعنى

mido said...

مواطن مصري يا شوفيني: بنتكلم علي تعذيب الخنازير و انت في وادي تاني !

احمد سعيد said...

عندنا اصبات تقدر ب 69 مصاب بانفلونزا الطيور و الرقم خطير
______________________________

يا مواطن

انت قريت عن الحادثه اللى حصلت على الدائرى من كام يوم ؟؟؟؟

عرفت مات فيها كام واحد ؟؟؟؟

مي ثابت said...

إضافة لازمة


عدد شهداء مذبحة غزة

1146


و عدد الجرحى

5100

هذا بحسب إحصائية وزارة الصحة الفلسطينية فى القطاع
فى ستاشر واحد من هذا العام

احمد سعيد said...

العقار نفسه تحتكره شركة جلعاد
الأمريكية و مقرها كاليفورنيا

و الذى تولى رئاسة مجلس إدارتها راميسفيلد
و زوجة حاكم الولاية عضو فيها
و شخصيات أخرى نافذة
_________________________

اهاااااااااااااااااااا

بقى الحكايه كدة

شكرا يا مى على المعلومات دى

بس الاول انتى متأكدة منها ؟؟؟

احمد سعيد said...

نوارة

انتى عارفه ان فيه ناس فى بلدك اتعمل وبيتعمل فيها اوسخ من كدة الى الان ؟؟؟؟


انا مش بقول ان اللى بيحصل فى الخنازير دة غلط

انا معاكى طبعا ان دى وحشيه وشىء ميرضيش ربنا

يعنى انا مش مستغرب من زعلك

بس مندهش من صدمتك

انتى متوقعه من ناس زى دى ايه يعنى ؟؟؟


وحياتك لو حصل وباء فى مصر لا قدر الله ليطخوا المصابين بالنار زى الكلاب الضاله


نوارة


توقعى من حكومتك اى حاجه

اى حاجه

لانهم باختصار

معندهمش سقف اخلاقى اصلا

مي ثابت said...

مهندس حــر

أنا نفسى إندهشت

لكن لإن الضيف الآخر كان ممثل لمنظمة الصحة العالمية

و لم يعترض

على ماقيل

و كان بيردد أكليشيهات من قبيل

إحنا حلوين و أمورين
كلام كده عجيب


أما عن دور المنظمة اللى المفروض كانت تقوم بيه تجاه جرحى غزة و إدخال الدواء و المعدات الطبية

فى حينه
وجهت ليها الإتهامات
و لم ينف ممثليها تقصيرهم

و كانت حججهم واهية

بمعنى إنهم معترفين إنهم مسئولين عن الصحة العالمية

سواء لجرحى أو لمرضى

و لكنهم و كأغلب المنظمات
المسماه دولية

إذا كان الأمر يخص الضعفاء
فقانونهم
إتركهم لعدالة السماااااااء

Kalimalhus said...

أنا خلصت الحوار بتاع طويل العمر و رحت بلعت بكوباية شاى بلبن و حبست بسيجارة كليوباترة مكتومة..

ما تنكروش إن الراجل دمه خفيف طحنننن.. تصدقوا كنا بناكل من كلامه زمان؟؟ أنا فاكر أول مرة بدأت أمتنع عن الوجبات اللى بيقدمها كنت فى إعدادى لما الأمريكان خطفوا الطيارة بتاعتنا اللى كان عليها فلسطينيين إختطفوا سفينة أمريكية إسمها أكيلى لاورو .. ما توعوش عليها دى.. يومها الراجل وقف قدام الدنيا كلها طيارته مخطوفة و كرامة بلده ممسوح بيها البلاط و قالك : إن قلبى يتمزق
كان ناقص يطلع منديل محلاوى زى بتاع أحمد بدير فى ريا و سكينة و يقعد يعيط..

المهم خدوا كمان درة:

المذيع : نتنياهو حاول فى الفترة السابقة مع السوريين أنه يستفسر عن موضوع الجولان ..
الرئيس : نتنياهو قال لى شخصيا لن أعطى الجبل ده ولا التبه دى . ده قال لى أنا شخصيا هذا الكلام ..


بس برضه النتن بيعمل من أجل السلام.. مش كده و ألا إيه؟؟

مي ثابت said...

الأمر المهم دلوقتى

هوه خلط لحوم الخنازير

باللحوم العادية

علشان كده
برنامج الحياة اليوم الخميس الماضى
إستضاف
دكتور عادل إبراهيم
إستاذ الرقابة على اللحوم

و وضح إننا نقدر نميز لحم الخنزير
بالآتى


الخنزير يختم باللون الأزرق وبشكل دائري يمكن تمييزه عن أختام اللحوم الأخرى


لحم الخنزير يتميز بتغلغل الدهون وسط العضلات والألياف اللحوم الأخرى الدهون بها عبارة عن كتل


من خلال الرائحة ، فلحم الخنزير يتميز برائحة مميزة يمكن ملاحظتها


لحوم الخنازير تتجه إلى اللون الفاتح عن البدء في طهيها



أما عن كبده الخنزير فتتميز أن أنسجتها تأخذ شكلا سداسيا منتظما كخلية النحل


الطحال فى الخنزير يتميز انه يأخذ شكل طولي أما اللحوم الأخرى فهو على شكل مثلث





ربنا يستر

Kalimalhus said...

كلام الجد بخصوص الخنازير..

المؤكد إنها لا تمثل خطر حقيقى فيما يتعلق بأنفلونزا الخنازير نفسها .. الأنفلونزا دى بتنتقل بين البشر فعلا و بالتالى الخطر هو فى دخول مصابين بيها للبلد ثم تفشى المرض بين البشر.. الخنازير ما لهاش دعوة بالكلام ده كله..

الخطر الحقيقى هو فى أسلوب تربية الخنازير و إختلاطها بالبشر و الطيور و حيوانات أخرى فى مناطق قريبة من الكتل السكانية المكتظة..

و الخطر ده كان موجود منذ زمن و إزداد بشكل كبير مع توطن أنفلوانزا الطيور فى مصر.. و ده اللى بيبرر عمليات التخلص من القطيع الحالى للخنازير و بعدين نقل مناطق تربيتها لأماكن مناسبة و تحت ظروف ما تشكلش خطورة على الصحة..

يعنى إيه ده كله؟

يعنى إحنا مش مضطرين للإستعجال و اللهوجة و لا لقتل الخنازير بطرق بشعة و غير إنسانية و منافية لتعاليم أى ديانة سواء بتحرم أكل لحوم الخنازير و ألا لأ..
تانى الخطر المباشر من الخنازير مش بالحجم اللى يبرر الأساليب الوحشية اللى بيستخدموها دى..

Kalimalhus said...

@مى

موضوع تأثير التاميفلو ده على الأطفال عندك مصدر معلومات نقدر نستعين بيه بخصوصه؟؟

لأن لو الكلام ده مؤكد تبقى مصيبة لأن فى حالة لا قدر الله إن المرض إنتشر فى البلد أولاد كتير ممكن يتعالجوا بالعقار..

مواطن مصري said...

مي لو اتساهلنا في موضوع انفلونا الطيور و الخنازير هيبقى في وباء في مصر مثل الكوليرا

و ايضاً في اكثر من 2000 شخص على مستوى العالم مشتبهة باصابتة بانفلونزا الخنازير

مواطن مصري said...

بلاش التاميفلو

اشربو يانسون


احسن

Kalimalhus said...

كان فيه كلام إن عبعظيم وزير محافظ القاهرة إعترف بإنه بيتم خلط لحوم الخنازير فعلا باللحوم العادية.. اللذيذ إنه قال إن ده كان بيحصل حتى قبل أنفلوانزا الخنازير و ده على فكرة منطقى لأن الإقبال على لحوم الخنازير عموما موسمى و مرتبط بفترات صيام المسيحيين المصريين و بالتالى لحم الخنازير بيرخص كتير فى وقت الصيام و يرجع يشد حيله بعد الأعياد..

شكرا على المعلومات يا مى.. على العموم المدام قررت تمشينا على البروتين النباتى خلاص ..

مي ثابت said...

أحمد سعيــد

مهندس حـــر


للحصول على هذه المعلومات و غيرها

يُرجى مشاهدة برنامج

الإتجاه المعاكس على الجزيرة

الساعة الثانية ظهراً
و يعاد صباح الخميس

فى الثالثة صباحاً




و فعلاً موضوع الأطفال خطيييييير

بس لو نفتكر كم الأدوية اللى تم تداولها بالفعل

و بالرغم من إجازتها و التصريح بتعاطيها

ثم ثبت بعد ذلك إنها أخطر من المرض اللى بنعالجه

و بيبقى الموضوع وراه بيزنيس و ناس بتسترزق

و ده لإن المكسب من الأدوية
بيفوق مكسب
تجارة السلاح أو المخدرات

مي ثابت said...

مواطن

عدد الإصابات المؤكده

خلال عشرة أيام
1085
فى
21
بلد

و آدى الرابط

http://www.moheet.com/show_news.aspx?nid=253395&pg=11



و فعلاً
زى ما قولت اليانسون الدافى على الريق

أفضل شئ إلى الآن

مواطن مصري said...

يا مي يا ريت نستبعد موضوع نظرية المؤامرة لائن في اصابا كتيرة في امريكيا استحالة انها هضحي بمواطنين امريكان تاني بعد 11 ستمبر

صعب تعملها تاني

امريكا مش ب الغباء دة

مي ثابت said...

مهندس حــر

عفواً

هوه أحسن شئ إننا نشترى من مكان موثوق فيه

و يا حبذا
لو أجزاء كاملة
كتف أو رجل مثلاً

هيبر وان

لحمته كويسه جداً
و الخدمة فيه ممتازة

Kalimalhus said...

هوه على العموم لما رئيس مجلس الإدارة يبقى الحاج رمزى فيلد و عضوة فى المجلس الست مرات تيرميناتور.. يبقى الكلام برضه معقول..

ها حاول أتفرج على البرنامج مع إنى مابحبش مصارعة الديوك..

مي ثابت said...

مواطن

إنت طيب

تصبح على ألف خييييييييييير

مي ثابت said...

على فكرة مش معنى كده

إننا أشرار

بس حاول تعقلها شوية



تصبح تانى على خير

Kalimalhus said...

http://www.almasry-alyoum.com/article2.aspx?ArticleID=210696موضوع فى المصرى اليوم و معاه صورة للخنازير و هى بتدفن و واضح إنها ميتة فعلا قبل عملية الدفن.. مش إحتمال كلام عدلى حسين ما كانش واضح و إنهم بيموتوا الخنازير قبل دفنها ؟؟

بهجت الاباصيري said...

ايه كمية المهندسين اللي انا شايفه في المدونة دي ....... دا ولا نقابة الباشمهندزيين ... ولا اكمن هيا مفروض عليها الحراسة ينتشروا كده في كل حته
شئ غريب اومال اللي بيبنوا الكباري دي كلها مين بقي ؟
اكيد بقي مهندسين من سلاااااااح الفرسان
وعموما عظيمة يا مصر .... يا ارض اللوا

وتصبحوا علي خير

TAFATEFO said...

انتي جبتي منين انه ولا بيدبح ولا بيعمل؟؟ الخنازير يا فندم بتتدبح وتتعدم في حفر خاصة بين طبقتين من الجير الحي

وحذرت وزارة الدولة لشئون البيئة من الآثار البيئية الخطيرة التى يمكن أن تنتج من جراء دفن الخنازير التى يتم إعدامها دون مراعاة للشروط البيئية المقترحة وأهمها الدفن بين طبقتين من الجير الحى.

وأشارت الوزارة فى تقرير لها إلى أن الخنازير هى الكائن الوحيد الذي يتفاعل مع كافة أنواع الجراثيم مما يهدد بخلق أنواع جديدة من الميكروبات والأوبئة.

وأكدت ضرورة إضافة الجير الحى إلى الخنازير المدفونة لطبيعته التى تخلق نوعا من الحرارة عند تعرضها للرطوبة مما يقضى على أية ميكروبات أو جراثيم ويحولها إلى كربون لا يوجد ضرر منه، وإنشاء خلية بموقع المدفن الصحى مخصصة للخنازير النافقة على أعماق مناسبة وفى حالة توافر محاجر مستنفذة يمكن استعمال هذه المواقع فى دفن الخنازير النافقة.

وشددت الوزارة على ضرورة توافر المعدات اللازمة لتغطية الخنازير النافقة أو التى يتم إعدامها وذلك للحد من التأثير الضار على العاملين بالموقع أو البيئة المحيطة والصحة العامة
.

وإن كنت متأكد ومعنديش واحد في الميه شك ان ده كلام ملوش معنى .. لكن بكره هتأكد وأبعتلك رقم مسؤول تكلميه لو تحبي .. ومتبقيش تصدقي كلامه برضه

TAFATEFO said...

تقرر اعدام الخنازير كلها وتعويض اصحاب الممزارع ، ومش هندبح منعا للتلوث ، هننقلهم احياء الى مدفن ويعدموا هناك بطريقة علمية معروفة من خلال حفر تردم بالجير الحى.

الفصله بين منعاً للتلوث و هننقلهم .. هي اللي سببت اللبس

اللي شافوا الحلقة فهموا صح

هحاول أجيب لحضرتك فيديو الحلقةاللي فيه الجزء ده

TAFATEFO said...

ومعلش يا جماعة

بالعقل كده .. تمثيل بجثث ايه بس؟؟

مفيش طريقة للتخلص من جثة الخنازير ومنع انتشار الأوبئة غير دي .. ودي تعليمات وزارة البيئة .. واللي مش مصدقني يتصل بوزارة البيئة

المحافظ كان بيقول مش هندبح .. هنعدم كل الخنازير

هننقلهم أحياء لمدافن .. وهناك نعدمهم بطريقة علمية وهي حفر الجير الحي .. وهي الطريقة الوحيدة للتخلص من الجراثيم والأوبئة التي قد تتسبب فيها جثث الخنازير

شوفوا ده كمانبعقلي لا أتصور ان ده يحصل لأنه غير عملي .. معنى دفن الخنازير أحياء انك هترميهم على مساحة رهيبة .. ولا هتحطهم فوق بعض أحياء مثلاً .. ده مش منطقي أبداً أبداً

بكره ان شاء الله نتأكد (نتأكد) .. ونفهم .. وبعدين طبعاً طبعاً طبعاً منصدقش

مهندس مصري بيحب مصر said...

ما دام فيها رامسفيلد يبقى ما تستبعدوش حاجة

mtwfeeq said...

مي ومواطن مصري

عدد الاصابات المؤكدة هي 5200 اصابة على مستوى 30 دولة ولكن اغلبهم في المكسيك وامريكا اما حالات الوفاة فهي 61 اغلبها في المكسيك

الكلام ده مصدره موقع منظمة الصحة العالمية

http://www.who.int/csr/don/2009_05_12/en/index.html

Anonymous said...

كويس انك فتحتى الموضوع ده
الابراشى جاب فيديوهات فظيعة
واحد بيحدف قالب طوب على راس الخنزير
و التانى بيدوسه بعربية
مقدرتش اتفرج على باقى البرنامج
احنا ازاى بقينا كدة؟

TAFATEFO said...

أجييييييييييييييييييييييييييييه

الكلام ده كان 29 ابريل؟؟؟!!!

بكره نشوف ايه اللي حصل .. علشان مش متأكد ايه اللي حصل في القليوبية تحديداً .. لكن في كل المحافظات الخنازير المصابة بتعدم .. يعني تموت وتتدفن في مدفن جير حي

تذبح .. يعني تتدبح ويستفاد بلحمها .. تتخزن يعني

متأكد ان المشكلة مشكلة فصلة . وهدور على فيديو الحلقة وهسأل بكره ان شاء الله

TAFATEFO said...

29 ابريل!!!!!!!!!!!!!!!!!!!!!!!!!!!!

Unknown said...

هو قال يوم 29 ابريل
المبادرة المصرية وتضامن بيتابعوا مع الزبالين ايه اللي بيحصل

وعدلي حسين قال انا ماليش دعوة بحد انا ح اعدم

واللي بيتابعوا قالوا لي بقى وصوت الخنازير وهي بتصوصو حاجة فظيعة

بيبقى صوتها زي العيال الصغيرة

ما تروح بنفسك وتشوف بدل ما اصحابك اللي بتثق فيهم يقعدوا يملوا بدماغك بكلام كده

انا ناوية اروح

Unknown said...

جبت من اللي راحوا يا مصطفى

ما تروح يا مصطفى يا اما تسأل حد راح بدل ما انت مصاحب لي كام واحد في وزارة الصحة عمالين يعملوا زي الناس في ودانك

Unknown said...

واتفرج على حلقة وائل الابراشي

Unknown said...

وبعدين تعويضات ايه اللي بتتكلم عليها؟

انت بذمتك مش مكسوف وانت بتقول تعويضات؟

خمسين جنيه على الراس الصغيرة وميت جنيه على الخنزير الكبير؟

وما تقوليش مافيش طريقة غير انهم يندفنوا احياء وخنازير تقعد تصوصو في الحفرة

انت ما عندكش قلب؟

Unknown said...

وبالمناسبة
انا اقصد بالحادثة دي القليوبية بس
عشان ما تروحش تقول لي دبحوهم في الغربية
انا باتكلم عن القليوبية
عدلي حسين بالتحديد
مش عايز يدبح عايز يخلص بسرعة

Unknown said...

لو صح هذا الحديث يكون تصرف في غاية الوحشية. أسلم طريقة لاعدام الخنازير بدون تعذيبها هي بالصعق الكهربي.
عموما لو هذا صح فلن يكون مفاجأة فقد تركوا اهالي الدويقة تحت الركام أحياء حتي ماتوا ثم اقترح احدهم تسوية المكان و اعتباره مقبرة جماعية. و قاموا برش الكيماويات المطهرة. يعني طريقة التفكير متشابهة

mido said...

النهارده فى (المصرى اليوم) قايلين :

احتمال التفجيرات بتاعة الزيتون من تنفيذعناصر هاربة من خلية حزب الله

!!!!!!!!!!

Unknown said...

هو صح الحديث في القليوبية اكيد

صعق بالكهربا؟

يا راجل يا مفتري

Unknown said...

الله
الهبل ح يشتغل بقى

Unknown said...

طب كويس

ده معناه اننا عمرنا ما كان عندنا ارهاب ولا دياولو
وان كل التفجيرات اللي حصلت في مصر كانت من تنفيذ الحكومة
ماهو اللي يكدب في حاجة يكدب في ستميت حاجة
ودي وسعت منهم قوي واخدتهم الجلالة
طب كانوا يسبكوها شوية

mido said...

لا بس أكيد دى تسريبات أمنية للمخبر اليوم

Unknown said...

التعليقات طارت

الله يخرب بيتك يا بهيج

لو سحمتوا اكتبوها تاني لو تحبو

mido said...

طار فى الهوا شاشى

lol

mido said...

سبحان الله ! بهيج ماله بس مش انت اللي نايمة علي نفسك :D

أحمد عتمان - Ahmed Etman said...

معلش تعليقي برة الموضوع، بس اقري مقالة فهمي هويدي دي
http://fahmyhoweidy.blogspot.com/2009/05/blog-post_5391.html

تموت من الضحك

Anonymous said...

ماله بهيج
نكتب تانى طبعا
بقول ان غريب ان الواحد يتخيل ان افراد حزب الله الفارين بدل ما ينفدوا بجلدهم عماليين يتكتكوا ويخططوا ويدبروا علشان يعملوا العمله دى...اللى هى اصلا واضحه اتجاهات اللى عملها....واضح ان الحكومه لازالت تعتقد اننا مجموعه من الاغبياء
بالنسبه للخنازير ....لو سلبيه للانفلونزا ليه اصلا تعدم....المفروض تندبح وتتباع....وكمان يدفنوها حيه ولا علشان هى حيوان اخرس
بالنسبه لبرنامج الححيقه....اللى كانوا بيعذبو الخنزير كانوا من الشرطه او تحت رعايتها لان واضح فى الفيديو ان شويه ظباط كانوا بيصورو بالموبيل....وطبعا ده شىء روتينى عندهم بس جت فى الخنازير الغلابه
دمتى بخير....تقبلى مرورى

Kalimalhus said...

@DomDam

هى تموت صحيح بس أنا ما عرفتش أضحك عشان بطنى وجعتنى..

مواطن مصري said...

الحكومة مشم ن مصلحتها انها تعمل ارهاب او عملية قبل اوبما

مش اغبياء اوي الامن



المهم هناكل قمح فاسد يا ولاد

بس بغض النر عن اختلافنا مع مصطفى بكري الا انة يشكر عن موضوع القمح دة

Kalimalhus said...

الكلام عن شكوك فى إن تفجيرات الزتون وراها أفراد خلية حزب الله الهاربين هو إعادة تصحيح للمسار... هههههه

إحنا مش عايزين حد يقول إرهاب أو فتنة طائفية أو كلام من ده دلوقت .. إحنا بنقول حزب الله و إيران .. يالاه كله يقول ورايا.. حزب الله إيران حزب الله إيران .. إيه يابنى ياللى قاعد ورا إنت ما بيتقولش ليه؟؟

مواطن مصري said...

مهندس حر ايران زي اسرائيل

و عملت تفجيرات في العراق و في لبنان

مواطن مصري said...

نوارة اسمعي الاغنية دي بتركيز

http://www.youtube.com/watch?v=Mfz7wVxzuoE

be a nigger too

مهندس مصري بيحب مصر said...

الاتجاه المعاكس- مرض إنفلونزا الخنازير
http://www.youtube.com/watch?v=rdBKRar5FbM

TAFATEFO said...

طريقة إعدام الخنازير اللي حصلت في القليوبية

نقل الخنازير حية إلى مكان الدفن .. في نقط يشرف عليها بيطريين بتعدم الخنازير

الإعدام .. ابره بتدخل من الرقبه لتصل لقلب الخنزير .. ثم يترك ليموت

يتم إلقاء الخنازير في حفرة عميقة مبطنة بالجير الحي ويتم ردمها بالجير الحي

اللي قال الكلام ده مصدر مش مستقل .. ده د. ممدوح خلاف وكيل وزارة الصحة بالقليوبية

وده طبعاً مصدر مش مستقل .. ومصدر غير موثوق بيه

واضح جداً ان الإشاعات كتير .. بصرف النظر عن كلام بعينه .. لكن أي واحد دلوقتي عارف ان الإشاعات بخصوص انفلونزا الخنازير وإعدام الخنازير ماليه البلد .. وأعتقد (على حسب فهمي كواحد متخلف حزب وطني) ان الوحيد القادر على نفي أو تأكيد أي ادعاء غير موثق هو الجهات المسؤولة .. وممكن كمان اعمال العقل

عموماً .. بيتهيألي نفي صحة الإشاعات أصبح غير ذو قيمة .. والسبب سمعة الحكومات المهببة

فاحنا من هنا ورايح نتعامل مع كل ما يقال باعتباره حقيقة إلى أن يثبت العكس .. والله الموفق

وخلوا بالكم دلوقتي ان اللي يصدق كلام ناس مسؤولة يبقى حزب وطني ودي شتيمة .. وممكن أضيف من عندي انه يبقى ابن ستين حزب وطني

:D:D

enjoyyyyyyyy

Unknown said...

طفاطيفو
الكلام اللي بتقوله ولا حتى الحكومة قالته

المصري اليوم في العدد الورقي جايبة صورة لفان بقلاب والخنازير بتترمي في الحفرة حية
واحيانا بيضربوها على دماغها

وجايبة التفاصيل هنا بالفيديو بس شالوا الفيديو للاسف

http://www.almasry-alyoum.com/article2.aspx?ArticleID=210801&IssueID=1404

المسئولين بناء على الكلام ده قالوا خلاص مش ح ندفنهم احياء ولا ح نضربهم على دماغهم ح نموتهم بالغاز

يعني اللي قالك الكلام ده عايز يضحك الناس عليك

Unknown said...

اللي عنده المصري اليوم العدد الورقي يعمل للصورة سكان وينزلها ويجيب اللنك عشان اللي بيقول بيحقنوهم وبيبوسوهم من بقهم ويغنوا لهم ننة هو يشوف بنفسه الخنازير وهي بتترمي في الحفرة صاحية

mido said...

لا الصورة كانت لخنازير ميته

Unknown said...

لا يا ميدو

طب هات الصورة