Wednesday 27 May 2009

نداء انساني الى اي حد في الدنيا دي


فاكرين انتوا الراجل ده، كلنا شفناه وهو بيتشاهد، بس هو مامتش، اسمه محمد حمدي هو في مستشفى فلسطين دلوقت في الدور التاني
مش دي المشكلة، ولا المشكلة انه مصارينه فيها فسفور ولا ان رجله اتقطعت ولا انه مركب حنجرة وبيقول: "هنا ياضي" (انا راضي) "هنا هامد"
(انا صامد)
"هنا بهب الله"
أنا باحب الله... وبيقول: رجلي سبقتني على الجنة..انا شفتها على باب الجنة
المشكلة انه له اخ اسمه عادل حزيق (تقريبا مش شقيق او الاسم مركب مش عارفة) كان مرافق معاه، قاعد مع اخوه مش بيعمل حاجة غير يحميه ويدخله الحمام ويقرا قرآن
اتقبض عليه وهو في قسم العريش دلوقت عشان يرحلوه، اتقبض عليه ليه؟ مش عارفة؟ يمكن عشان كان بيقرا قرآن؟
انا مش عارفة اقول ايه؟ طبعا مافيش احتياج اني اقول ان واحد زي ده من غير رجل ولا مصارين ولا زور مش ممكن ابدا باي حال من الاحوال يبقى في المستشفى لوحده
بس مش عارفة اقول اكتر من كده ايه؟ مش عارفة اهزأ مين؟ اهزأني وللا اهزأنا وللا اهزأ اللي لسة شايفين بعنيهم ان ربنا فوق الكل، وان حتى اللي عليه ميت حارس ومقفول عليه باب من جوة باب ربنا بيوصل له ومافيش حد كبير عليه
اعمل ايه ياربي؟ ليه يقبضوا على المرافق اللي معاه؟ ويرحلوه ليه؟ ليه اصلا كده؟ ليه يعني؟ ليه؟
انا لو ينفع انا اسيب ماما واقعد معاه، بس هو محتاج راجل في الظرف ده، طب ما اخوه كان قاعد معاه يا ناس

31 comments:

Anonymous said...

feh 7aga 2a2dar 2a3melhalo wana hena f usa law feh ay dawa

BlackIceNo said...

طب ماتزعلش نفسك اوي كدة بما انك مؤمنة بربنا وعارفة ان ربنا مستحيل هيسيبه كدة واكيد يعني ربنا عمل كدة علشان في حاجة هتحصل وانتي عارفة ان ربنا فوق كل شيء , اذا هو مالوش اي اقارب او اهل اي اي كائن حي يسأل عليه الحل الأكيد دلوقت والله ان لو في مصر كنت عملت كدة بس الحل الي المفروض اي حد يعمله يعني والي العقل بيقول عليه دة لو مافيش ومتأكدين ان الراجل دة ملوش اي حد يسأل عليه لا اهل ولا اقارب ولا اي بنأدمين تسأل عليه نشوف اي راجل قاعد على اي قهوة "صايع" مش لاقي لا شغلة ولا مشغلة ونقترح عليه الأقتراح التالي , يروح المستشفى ويساعد الراجل دة بمقابل كذا لو وافق كدة الحمدلله وحلينا نص المشكلة لو موفقتش يبقى خرا على شكله ونشوف اي صايع غيره الصيع كتير وان شاء الله هتعتروا على اي حد يقف معاه دة اذا مافيش حد يقف معاه من اهله والمشكلة التانية بقى عليكي تشوفلنا اخوه اتحبس ليه ممكن يكون كان على علاقة بالممرضة او كان بيضرب في حمام المستشفى سجارتين او بيفكر ياخد بطار اخوه ويفجر نفسه يعني شوفلنا اتحبس ليه وان شاء الله خير ويخرج ونعمله فرح

ست البيت said...

أول تعليق

ست البيت said...

تقريبا لأ طلعت التعليق المليون
مش مهم
المهم اني دا بقى حال البلد يا نوارة
يا بنت عم نجم
واسأليه
طول عمرهم بيعملوا كده
الضعيف هو اللي يترحل
الأخ هو اللي يضرب
لكن الخسيس
والواطي
ابن القردة والخنازير وعبد الطاغوت
يشرفوا ويآنسوا في ابو حصيرة
دا حتى اسمه يكسف
ويتعملهم حماية علبان ما يخلصوا التتييييييييت
اللي كانوا بيعملوه

لكن محمد حمدي ارهابي
ومش لا زم يبقى راضي
لأنه دا معناه انه مش ناقم على خمااااس اللي لازمن ولا بدن وحتماً كان ينساها ويكرها
وبعدين يا بنت يا نوارة يا بنت عم نجم
دا كان بيحارب مع حماس
يعني ارهابي
يبقى هم اللي يعالجوه
ولو احنا من كرمنا وتعطفنا وشحتفه قلبنا
دخلناه يتقلب اقصدي يتعالج
يحمد ربنا ويبوس ايدي شعر ودقن
مش كمان عاوز مرافق
تلاقي المرافق السوسه دا
كان بيعمل ان اخوه عيان
وهو متورط أكيد أكيد يعني في تفجيرات الأزهر ...والحسين
والأزهر والإمام والسيدة المقام
ومحمد دا ممكن كمان يكون عامل عيان
والفسفور اللي في بطنه دا
فسفور من الحبر اللي بلعه ايام الانتخابات الفسفورية
أكيد كان عاوز يزور الانتخابات لصالح الاخوان
اللي هم حماس بس نحت مسمى آخر
عشان الضرايب

آه يا بلد
ما فيش ولد
ولا راجل ولا سند
أكلوا الكلاب أكلي
واخدوا ولادي من حضني
وتحت التراب سكني
وأمواتي فوق الأرض

بيتي واتهدم
على ولادي الصغار
نار ولا عدم
ماليش حق اختيار

ارضي يا مدفني
يا عزي يا عرضي

قتل الغريب ولدي
واخويا باع الأرض

مهندس مصري بيحب مصر said...

لا حول و لا قوة إلا بالله

مواطن مصري said...

في الحالات دي بغض النظر باختلافي مع فصائل الفلسطينيةة و لكن

ممكن أقول ربنا معاة و يشفية يا قادر يا كريم

و يقوي أرادتة

دودو said...

يانوارة
يابنتى
قلنا100مرة ديل ولامؤاخذة عمرة ماينعدل ولو علقوا فية قالب
ولاموت بيوعظ ولابيحوق

والراجل اللى قطع قلوبنا دة لية ربنا

Anonymous said...

o God This is so difficult to sustain all these injuries alone with no aid of anyone no assistant

Unknown said...

اديني بعت لهشام مبارك واكيد النديم ح يوصل لهم برضه

مش عارفة

Unknown said...

سولا
انا ح اسأل واقول لك اذا كان فيه حاجة تقدري تعمليها
وربنا يخليكي

مي ثابت said...

تم التواصل مع لجنة الإغاثة بإتحاد الأطباء العرب


و وعدوا بعمل اللازم


و ربنا يكرمك يا نوارة

مي ثابت said...

نوارة إنتى عرفتى إمتى بالموضوع

؟؟

لإنهم بيقولوا

إنهم فعلاً أرسلوا له مرافق من إمبارح


لكن هذا لا يمنع إن أى حد عايز يشارك يذهب إليه فى المستشفى و ينسق معاهم

حـنــّا السكران said...

بتنادي مين يا نوارة ؟

هو مش قال احذروا غضب مصر ؟

هذا هو غضب مصر ..مصر اللي احتلها و استعمرها و عملها سكّين في ظهر الحق و في ظهر أصغر طفل مظلوم بيوقع تحت ايده .. إيمتى رح ينزل عليه غضب و تسبقه رجله و إيده و لسانه على جهنم .. انا عمري في حياتي ما احتقرت شيء قدّ ما احتقرت المخلوق ده في السنتين الاخيرتين ..و عمري ما عرفت أكره حد لكن اعترف انه بكرهه أكتر من أي شيء اّخر و بعتبره أخطر من كلّ مجرمي الصهاينة جميعا .

معليش ..هالكلام لا يفيد و لا يقدم و لا يؤخّر ..بس اللي عم يعمله و اللي عم يصير كل يوم و المشهد هنا أصعب بكتير من انه الواحد يبقى طبيعي في ردة فعله الانسانية .

قال يتعظ قال .

ديالا said...

ايه ده هما نسوا انه احنا مسلمين ومن امه سيدنا محمد صلي الله عليه وسلم هيقولوا ايه لربنا لما يسالهم ليه عملتوا كده في اخوكوا المسلم ده اذا كان الرسول صلي الله عليه وسلم وصانا بالانصار فيهقول ايه لما نعرف ان المسلمين بيعملوا كده في بعض

طب استني يانواره مش ممكن نكون ظالمينهم ويكون المرافق ده بيهدد الامن القومي وهو قاعد مع اخوه وبيقراله قران وبيخخط لانقلاب عسكري ولا حاجه جايز برضه يعني انتي هتعرفي اكتر منهم هما الي عارفين كل حاجه

احنا ندعيله لان ربنا استحاله ينسي عبده ودعي عليهم بقي

lastcrazyboys said...

هو مش العريش دي مليانة مخدرات
وبانجو وحشيش

ولا صحييييييح..دول اكيد مابيقروش قــرآن

سبهللة said...

ربنا يرزقه بكام شاب مصريين يتبادلوا على رعايته لأن فعلا زى ما بتقولى لازم يكون معاه راجل

مي ثابت said...

يا ريت بس تطمنى إذا كان فعلاً وصل ناس لعنده زى ما قالوا

؟؟

لإننا للأسف حنبقى خارج القاهرة النهاردة

و إلا كان ممكن نذهب له بأنفسنا


لكنى حتابع معاهم بالتليفون


و لكى الشكر مقدماً

AbdElRaHmaN Ayyash said...

:|
يااااربي
:|:|
أبو عبدالله !!!!
و الله انا مش عارف اقول يه على الحكومة دي !!!!!
انا رحت عندهم كذا مرة
طيب ايه اللي نقدر نعمله !!
بجد ربنا يسترها مع محمد
و يحمي عادل :S
انا مش عارف بجد اقول ايه

Anonymous said...

ل اله الا الله
الهم ولي خيارنا امورنا ولا تسلط علينا من لا يرحم ولا يخافك يا ارحم الراحمين
ربنا معاه ويا رب تكون لجنه الإغاثة بإتحاد الأطباء العرب وصلت له فعلا
دمتى بخير.....تقبلى مرورى

Sosty said...

لا حول ولا قوة الا بالله
الله المستعان يارب :((((
حسبنا الله ونعم الوكيل

yousef said...

الكاتب أحمد السعيد

الأربعاء, 20 مايو 2009 16:46

أحمد السعيد - تعازينا يا سيادة الرئيس.. إن قال لك أحد عظم الله أجركم فلا تعتقله بشبهة أنه اخونجي.. فغالبية شعبك من المؤمنين وان لم يكن لهؤلاء نصيب في الحكم أو التقرب منك.
سمعت أن طائرة رئاسية خاصة نقلت حفيدك الى فرنسا بينما تُمنع عربة إطفاء وإنقاذ جلبها متبرعون بريطانيون ومنهم النائب جورج غالاوي من دخول غزة والعمل على رفع الأنقاض من فوق جثث أطفالها.. هل تعلم أن هؤلاء الانجليز قد فقدو الأمل بإدخال العربة وأعادوها الى ليبيا مؤقتا؟؟
وفي اليوم الذي عادت طائرتك الرئاسية بحفيدك بعد أن قضى الله التعجيل بأجله, يتم منع وفد طبي من دخول غزة؟ ماذا لو مُنع الأطباء عن حفيدك وهو في شدة المرض يا سيادة الرئيس؟
ولمَ قبلتم بنقله الى فرنسا؟ أما أخبروك أن أحسن الفرق الطبية الاجنبية يتم احتجازها حاليا خارج معبر رفح المغلق غير بعيد عن مكان اجازتك الدائمة في شرم الشيخ
هل أخبرك رئيس مخابراتك أنه في الوقت الذي تدفن فيه أنت حفيدك, يقوم الفلسطينون بدفن الطفل ربحي جندية الذي يصغر حفيدك بعامين والذي مات أمس بعد طول عناء من المرض والوهن
هل تعلم أنه كان يتبول دماً منذ أذار الماضي دون أن يقوى الاطباء على تشخيص مرضه أو أن يسمح له بالسفر للعلاج؟؟؟
ربما كان ألم رحيل الولد أخف وطأة من مرارة شعور أب بقلة ذات الحيلة.. وهو يرى جسد ابنه الضعيف يذبل شيئا فشيئا.. بينما يقوم الأمن بحراسة أقفال المعبر المغلق تنفيذا لأوامركم ؟
لم يطلب أحد استعارة طائرتك الرئاسية لنقل الطفل ربحي... بل كان أهله سيكتفون بنقله على حمار عبر معبر رفح فيما لو سمح ذلك البغل الذي يغلق المعبر لهم بالوصول الى الجانب الاخر من السجن الغزّي؟
فراق الحبيب مؤلم يا سيادة الريّس!! لكنه لا يعادل شعور من امتزجت لديه لوعة فقدان الولد بالمرارة من ظلم الأخوة والقرف من سيادتكم
وعظّم الله أجركم

فلسطينية الهوى said...

اسمه عادل حمدي إخزيق

واخوه الجريح اسمه محمد حمدي اخزيق

المشكلة يا نوارة ان محمد لسه قدامه شهرين كمان قبل ما يركب الطرف

فهو فعلا محتاج مرافق يخدمه

مواطن مصري said...

يا اخي يولع المعبر انا بكرة الشماتة في الموت


بطلو شماتة عشان محدش يجي و يقولكم احسن

و تستاهلو و الكلام دة


خليتو القضية قضية معبر بس



انا زهقت من كل واحد يقول معبر معبر كان مصر هي الي محتلة


ربنا يهديكم و يهدينا جميعا

و تفكرو صح و تتصرفو صح

z!zOoOo said...

السلام عليكم

بجد مش عارف اقول ايه

حسبنا الله ونعم الوكيل

عجبني جدا رأي روي بجد حل بناء جدا وانا كنت هقترح شيء شيه بإقتراحه

او مثلا مجموعه مدونين في القاهره يروحوا هناك ورديات ده طبعا اليمش وراه حاجه لو كل واحداتبرع بساعه من وقته في اليوم وظبطوا مواعيدهم سوا

هيقدروا إن شاء الله علي رعايته

والله لو اقدر كنت روحتله بس انا مش في القاهره اصلا

بعيد عن الموضوع عارفه احلي حاجه فيكي ايه ( ديه مش بتاعه حماقي ) إنك مش حارمه نفسك من حاجه

اي شيء في اي وقت بتكتبيه إن شاء الله لو 100 بوست في اليوم

ربنا يوفقك ويكرمك

ويوفقنا جميعا لما يحبه ويرضاه

وحسبنا الله ونعم الوكيل

دمتي بكل ود

وفي رعايه الله

mido said...

ههههههه مواطن مصري تعليق حرقك للدرجة دي أصله جه علي الجرح بالظبط و في الصميم

رحلتنا في الحياة said...

هو فى اى مستشفى طيب بالظبط فى العريش يعنى ولا ايه وفى ناس فعلا هتساعد وتروح ترافقه ولا ايه ؟؟؟؟
هقول ايه غير حسبنا الله ونعمة الوكيل

Kalimalhus said...

قرأت البوست صباح الأمس و منذ ذلك الحين لم أجد ما يمكننى قوله ..

ماذا يمكننى أن أقول لمحمد؟

و أسمحوا لى .. فليس لما قد أقوله لأى منكم أى أهمية .. فكلنا فى الهوان على درجات و ليس فينا من يستحق عزاء أخيه له .. فالنعزى أنفسنا كما نشاء و لنسربل عجزنا فى الحسبنة و الحوقلة و الدعاء على الظالمين .. و لكن هل فينا من يمكنه أن ينظر فى عينى محمد و يقول له إن صورتك بعد أن عرفت بأنك مازالت حيا فى رحمة البشر هى أشد وطأة على النفس مما كانت و ظنى أنك شهيد فى رحمة الله؟..

هل أصبح أكرم لنا أن يوارى التراب سوءاتنا من أن يفضحها نور النهار؟

عجزنا أفدح من أن يجبره مد يد العون لمحمد إن أمكننا ذلك و عارنا لن يغسله أن نسعى فى أمر توفير الرعاية له .. لا شك أن من يسهم فى أمر كهذا أعلى درجة ولكننا فى هوان العجز الأكبر سواء..

تصبحوا على ما امسيتم عليه .. جتنا الأرف..

Unknown said...

هو في مستشفى فلسطين في مصر الجديدة الدور التاني

Kalimalhus said...

مواطن مصرى
----------
ياريت تشيل تعليقك لأن ظنى بيك إنك أفضل من إنك تقول الكلام ده فى الموقف ده..

مواطن مصري said...

مهندس حر


انا قولت في تعليقي الاول بغض النظر عن اختلافي انا بدعو

للراجل دة ب الشفاء و العلاج و الصبر

اما واحد يدخل و يشمت في موت واحد اي كان


فدة غير مقبول


يبقى نوارة تشيل تعليقي و تعليقة


لائن انا ضد الشماتة في الموت

سواء كان للشعب الفلسطيني او ل اي شخص مصري اي كان منصبة

Unknown said...

مواطن مصري

انا ما شفتش اي شماتة في تعليق يوسف
الراجل بيقول له انت كنت بتدفن حفيدك وفلسطينيين كانوا بيدفنوا اطفال
انت بعت حفيدك فرنسا
ووقفت الاطفال الفلسطينيين على المعبر ينزفوا مش عايز تدخلهم

ده واقع يا مواطن
هو اللي يقول الواقع يبقى بيشمت

ويا مواطن الحق احق ان يتبع
هي مصر دي مش بلدي زي ماهي بلدك؟
اللي يحب بلده يتمنى لها العدل
ومصر شاركت في قتل الفلسطينيين يا مواطن انت ما تقدرش تنكر كده

على الاقل يبقى عندنا دم ونتبرأ من تصرفات الحكومة ويبقى عندنا دم ونبقى مكسوفين من دمنا اننا ما عملناش كفاية عشان نوقف المجزرة اللي كان بايدنا نوقفها او على الاقل ننقذ الناس

انما نعمل زي الامريكان ونقتل القتيل ونبرر قتله
ده احنا البعدا يبقى ما عندناش دم بقى وربنا يشنبرنا ونستاهل بقى ان اسرائيل تعطشنا عشان نبقى نعرف نساعدها تقتل الفلسطينيين ونكتفهم لها عشان تضربهم كويس