Sunday 10 May 2009

انا عايزاكوا تقروا الضرر دي عشان انا مش ح اقراها لوحدي

بسم الله الرحمن الرحيم
رجاء من السادة السجناء قراءة النص المرفق لزوم التعذيب
وح تقروها كلمة كلمة بدل ما اقل عقلي وامشي ورا عمرو غربية ومالك مصطفى واعبي شرايط زي ما قالوا لي واحطها لكوا على المدونة اوتوبلاي
خدوا
الآن يصمت فلاسفة الصحافة.. ودراويش الأستاذ
الإدارة الأمريكية الجديدة حريصة علي تصحيح أخطاء بوش.. والبداية من هنا
واهو
مع احترامنا لتركيا وأندونيسيا والجميع..لكن خصوصية القاهرة أقدم وأقوي
يخرب بيتك الشيطان... هم الناس كلموك؟
قمتان لمبارك والرئيس الأمريكي خلال 10 أيام.. أبلغ رد علي المشككين
في ايه؟
تغيير موقف واشنطن من الملف النووي الإسرائيلي.. نصر كبير للقيادة السياسية
الدبلوماسية المصرية عملت بهدوء وصبر وصمت تحت ضغط إعلامي.. وحققت الهدف
عملت بصمت يعني تشوف اوباما من هنا ما تفتحش بقها ولا تنطق لا من فوق ولا من تحت
اصل فيه تواصل روحاني، اوباما يبص في عينين الدبلوماسية المصرية يفهم هي عايزة تقول ايه من قبل ما تقوله
أوباما في مصر ليخاطب العالم الإسلامي.. خبر شكك فيه الصحفيون العاملون بصحف تنطق بلسان قطر وأيران والإخوان في القاهرة.. وأيضا انهال بعض الزملاء بالغمز واللمز علي الدور المصري الذي تراجع امام الدورين التركي والايراني.
الله يخرب بيتك يا اوباما، ده انت ح تورينا ايام سودا مع احترامي للعنصرية جدا يعني
دعونا نعد للوراء قليلا (حبيبي، ح نرجع للوراء اكتر من كده نروح فين؟ ده احنا قربنا نتزحلق من فوق الكرة الارضية) لنعيد بناء المشهد الذي كان مجرد فكرة وكيف تحول الي حقيقة.. بداية نقول انه عندما خرج الي النور اسم مصر كدولة مقترحة يخاطب منها أوباما العالمين العربي والاسلامي. سارع المشككون في مصر بنفي ذلك وقرأنا لمن تطوع بالقول أن القاهرة لم يعد لها دور في المنطقة وبالتالي لاتستحق أن يخاطب أوباما منها العالم الإسلامي
(انا شخصيا مش ح ينوبني من اليوم المدوحس ده غير اني يتحسب لي تأخير في الشغل ويمكن الشيفت كله يتلغي، احترم نفسي واخد اجازة وخلاص كنا ناقصين وقف حال)
قرأنا في صحفنا استعداء من الصحفيين المصريين علي الفكرة ومحاولة إقناع الرأي العام أن العالم قد شطب أرض الكنانة من ذاكرته. وبالتالي فان من يقول أن أوباما سيخاطب العالم الاسلامي من القاهرة إما واهم أما حالم...
يا ترى ايه التمن اللي اندفع؟ اخصصصصصص، اللهم اخزيك يا شيطان، استغفر الله العظيم
وهكذا طالعنا في الصحف الخاصة والحزبية كما في الصحف الايرانية (والنبي حد يقول لي فين الصحف الايرانية دي عشان اجيبها للواد بتاع العرب اغبيا) والاخوانية بالقاهرة شبه تأكيد علي استحالة قدوم اوباما الي القاهرة.. وقد زاد هذا اليقين عند دراويش الناصرية وتلامذة الكاتب الكبير حسنين هيكل. بعدما أدلي أوباما بخطاب أمام البرلمان التركي قيل انه هو المصالحة المنشودة مع العالم الاسلامي.
ايوة ماهي كانت كده، ايه اللي حصل خلاه يصلح غلطته؟ اخصصصصصصصصصص اللهم اخزيك يا شيطان، استغفر الله العظيم
بعد القاء اوباما كلمته امام البرلمان التركي يوم 6 أبريل الماضي كتبت الصحف الخاصة تقول "علي مصر ان تنسي تماما فكرة قدوم الرئيس الأمريكي اليها.. وعليها ان ترقد في سلام تنتظر مصيرها المحتوم" .. وبعد زيارة الملك عبدالله ملك الاردن لأمريكا والصورة الشهيرة لأوباما وهو ينحني أمام خادم الحرمين الشريفين في لندن اثناء قمة العشرين. خرج رؤساء تحرير صحف خاصة يقولون أن القادة العرب والمسئولين الاسرائيليين بدأوا زيارة واشنطن ومازال المصريون غارقين في سبات عميق.. وقال كتاب في الوفد والمصري اليوم والدستور مامعناه أن مصر دائما تجئ متأخرة!
هو عشا؟ لا ما تخافوش شايلين لنا نايبنا في المطبخ، الله يخرب بيتك يا اوباما، تقولش عوكل ده سيندليرا وقع منها القبقاب واوباما هو الاسكافي اللي ماشي بالقبقاب يدور عليها؟
طب خصيمكوا النبي لتقروا الحتة الملبسة اللي جاية دي.... واسمع انت عشان بتحب الكلام ده
والحقيقة أن القاهرة كانت تجهز في صمت لزيارة أوباما للقاهرة في يونيو وزيارة الرئيس لواشنطن في مايو .. بداية طلبت واشنطن أن تكون زيارة الرئيس مبارك يوم 11 مايو "يعني غدا".. لكن القاهرة اعتذرت.. هناك ارتباطات مسبقة سيجئ رئيس الوزراء الإسرائيلي غدا وهناك القمة المصرية الايطالية في شرم الشيخ بعدها.. مصر دولة كبري لديها التزامات وواشنطن تفهم ذلك.. المعاملة بين البلدين هي معاملة بين شركاء وحلفاء وليس بين قوة عظمي تطلب ودولة تابعة تنفذ وتطيع
إإإإإإإإإإإإغغغغغغغغغههههههههههههههقققققققققققققققققثثثثثثثثثثثثثثععععععععععععععععععععععععععععععع
مصر وراها شغل، مش فاضية، الله يحرقك يا مدعوق، اموووووووووووت واعرف ايه اللي حصل
اخصصصصصصصصصصص، اللهم اخزيك يا شيطان، استغفر الله العظيم
الاعداد لزيارة أوباما للقاهرة بدأ منذ مقابلة وزير الخارجية أحمد أبوالغيط لهيلاري كلينتون وزيرة الخارجية الأمريكية في 12 فبراير الماضي.. لا نبالغ فنقول إن واشنطن اختارت القاهرة نتيجة للعلاقات المتينة بين أمريكا ومصر. ولكن الاختيار جاء بعد مفاضلة حسمها العقل والمصالح والرؤية الإستراتيجية قبل ان تحسمها العلاقات الطيبة مع الإدارة الجديدة والتي لاشك انها لعبت دوراً كبيراً في ذلك.
ههههههههههههبببببببببببببببببببببببببببببببللللللللللللللللللللللووووووووووووووووووووووعععععععععععععع
المفاضلة كانت بين أندونيسيا أكبر دولة إسلامية من حيث عدد السكان "300 مليون نسمة" والتي قضي فيها أوباما طفولته وبين تركيا ومصر.
تركيا دولة علمانية وعضو في حلف الاطلنطي ومرشحة للانضمام للاتحاد الأوروبي. لكنها مع ذلك ليست هي النموذج الذي ينطلق منه خطاب أوباما للعالم الإسلامي.
ايوة طبعا، والنموذج ده لقاه هنا، يا حومتي، يعني احنا اوسخ من تركيا؟ دي بينها وبين اسرائيل صفقات سلاح بالعبيط
خطاب أوباما أمام البرلمان التركي يوم 6 أبريل لم يكن الخطاب الموعود.
لا طبعا، ماحدش موعود معايا بالعذاب موعود يا قلبي غيرنا، الله يرحمك يام سونة، الست دي كان بقها طاهر، داعية لك يا عوكل... داعية لك في صحن الحرم، انا ابتديت اصدق سواق التاكسي اللي قال لي ان التعلب قاعد ليوم القيامة
الإدارة الأمريكية تريد اختيار دولة تضررت من السياسة التي انتهجها الرئيس السابق جورج بوش.. أوباما وإدارته يسعيان إلي القاء خطاب يحمل اعتذاراً عن التدمير الذي لحق بدول إسلامية ويعلن عن فتح صفحة جديدة بين القاهرة وواشنطن.. صفحة يكون التعاون الاستراتيجي عنوانها وليس الاملاءات والشروط.
يعني ح يعتذر؟ ح يعتذر عن ان بلده بقالها عشرميت سنة عمالة تدفع ضرايب مواطنيها عشان يفضل خادمك المطيع يا مولاي كاتم على انفاسنا؟
حقة لو عملها
بس بس بس ما تسبوني احلم بقى الله، ما مسيره يجي وينيلها على دماغنا، جرا ايه؟ باقول كلمتين في قلبي الله: انا اسف للشعب المصري ان بلدي دعمت الديكتاتورية في بلدهم وكبلتهم باتفاقيات تعوق تقدمهم وتدمر اقتصادهم واستخدمتهم زي شبشب الحمام وسلطت عليهم اللي يقدر ولا يعفيش وقعدت تديله في فلوس عشان يطلع تلاتينهم
خلااااااااااااااص من غير شتيمة وانا سامعة الصوت اللي طلع، ودي كده قلة ادب على فكرة
صفحة جديدة
اختيار القاهرة لالقاء الخطاب منها يحمل في طياته رسالة بأن هناك مصالح أمريكية مصرية وعربية وإسلامية ينبغي الحفاظ عليها والتعاون في الحد من اخطار الارهاب واسلحة الدمار الشامل
ايوة... تعالى لي بقى من خلال الشنطة... قول قول، اما انا برضه قلت الريحة دي مش غريبة عليا... ها وايه كمااااان
خطاب أوباما المتوقع يؤكد أن واشنطن تفتح صفحة جديدة مع العرب والمسلمين.. وتبدأ بالدولة الأكبر التي تملك مفاتيح حل القضية الفلسطينية وتحتفظ بجسور حوار متصلة مع كافة الفصائل ومع إسرائيل ايضا.
والنبي انت عثل، اهو احب اسمعك عشان بتخر بكل حاجة، ما احنا عارفين انها ح تحلها، تفكها من بعضها خالص، ها، كمل
هناك تغيير ملحوظ في الإدارة الأمريكية لأوباما عن الإدارة السابقة.. وهناك مجموعة من الاشارات التي تؤكد وجود هذا التغيير مثل تعيين مندوب دائم هو جورج ميتشيل واتخاذه القدس مقراً دائما له. وإعلان هيلاري كلينتون عن أن حل الدولتين هو أساس مشروع سلام الشرق الأوسط.. أكبر دليل علي التغيير في الإدارة الأمريكية الجديدة انها لم تتراجع أمام هجمة شرسة للحكومة اليمينية الإسرائيلية المتطرفة ضد السلام واستمرار سياسية المستوطنات. فإذا بنا نفاجأ بأمريكا تطالب إسرائيل بالانضمام لمعاهدة منع الانتشار النووي.. أليس هذا ما تطالب به مصر بل ونادت به منذ التسعينات؟ هل هناك نجاح لمصر أكبر من هذا التحول في سياسة الولايات المتحدة؟!
رجعنا للتخريف تاني، انت بتعك ليه ما انت يا عاطف كنت بتدلق اهو وبتقول فيه ايه
طب كمل بس كمل، ايوة ايوة، هي مصر مبارك اللي غيرت سياسة امريكا، وهي اللي غيرت رأي الناخب الامريكي، وهي اللي عملت الارض كرويتون تلف حول نفسها
لماذا القاهرة؟
اسم الله عليك
لقد طالب سعد الدين إبراهيم الرئيس أوباما من قبل بتجاهل مصر وعدم زيارتها أو توجيه خطاب للمسلمين من علي أرضها.. والآن بعد إعلان البيت الأبيض عن قدوم أوباما للقاهرة يوم 4 يونيو ألا يعد ذلك صفعة علي مزاعم سعدالدين؟ كما انه يؤكد أن أوباما يختلف 180 درجة عن بوش وسياسته.. وانه وإن كان يحافظ علي مصالح إسرائيل فإنه لن يجور علي مصالح العرب.
يا عم انت خريج كلية ام لالو بتاعة البمب قسم شرشوحة؟  انت ماسك عروسة وعمال تقول: ومن عين هيكل، ومن عين الصحف المستقلة، ومين سعد الدين ابراهيم
أعود إلي خطاب الرئيس أمام الجيش الثاني بالإسماعيلية بمناسبة أعياد تحرير سيناء. فأقول إن هذا الخطاب كان أول إشارة إلي أن العلاقات مع واشنطن اختلفت.. وأن هناك تفاهماً وثقة مع الإدارة الجديدة. والأهم وجود نية لطيّ الخلافات وبدء صفحة جديدة
مش ده كان بتاع احذروا غضب مصر؟
لقد كانت آخر زيارة للرئيس مبارك إلي أمريكا عام 2004 وفي 13 أبريل اجتمع مع الرئيس بوش وبحثا خطة طريق التي أعلنها الرئيس الأمريكي السابق وآليات تنفيذها.. لكن في اليوم التالي مباشرة "14 أبريل" قابل الرئيس بوش ارييل شارون رئيس الوزراء الإسرائيلي وأعطاه الضمانات الأربع التي جعلته يتنصل من أي التزام بالسلام أو حل الدولتين.
هع هع هع آه
ان انعقاد قمتين للرئيسين مبارك وأوباما في نهاية مايو ثم في بداية يونيو أي في خلال 10 أيام يدل علي أن مكانة مصر كبوابة للمنطقة مازالت كما هي وليست كما يتصور دراويش الناصرية والمنظرون وكتاب الصحف الخاصة وتلامذة هيكل وغيرهم
ومن عين كل اللي شافوك ولا صلوش صلاة استسقا حصنتك بالشبشب وصندل من شر الحنجل والمنجل
لقد عملت الدبلوماسية المصرية بهدوء وصبر وتحت نيران صديقة كثيفة وضغط إعلامي شرس للتقليل من جهودها.. لكن القوة الناعمة نجحت بامتياز وفشل المشككون.
ناعمة وقوية وكلها حنية... مين اللي شكك في الدبلوماسية المصرية؟ طب يجدد ايمانه بقى يا شباب عشان خسر دينه كده
ويبقي بعد ذلك السبب الذي جعل واشنطن تختار مصر؟ انه نفس السبب الذي جعل دول الكومنولث "المستقلة عن الاتحاد السوفيتي سابقاً" تختار القاهرة.. هذه دول مسلمة ظلت 70 عاماً عاجزة عن ممارسة شعائرها وعباداتها منها تركمستان ذات الأصول التركية وهي دولة سنية.. ومنها أذربيجان الشيعية التي ترتبط بعلاقات وثيقة بإيران. ومنها كازاخستان السنية التي تفخر بابنها الظاهر بيبرس (والجدعان، والحاج ابو سرة، وولاد الحاج ابو سرة، والحاج مرعي بتاع الكلمة، ومراته، وولاده، والمعلمين، واجدع جزارين في المدبح بيحيونا في فرحنا وبيكيدوا العوازل وحب ايه اللي انت جاي تقول عليه، حب ايه، حب اي، حب او وايييييييييه).. هذه الدول خرج منها علماء مسلمون عظام كالبخاري والتبريزي والمقريزي عاشوا في طشقند وبخاري وسمرقند.. عندما استقلت هذه الدول في أوائل التسعينات لم تذهب إلي تركيا أو إيران أو باكستان رغم ارتباطهم العرقي بها. لكنهم جميعاً جاءوا لمصر الأزهر.. أول وأكبر جامعة إسلامية بالعالم. والتي يجمع الجميع أنها منبع الفقه وعلوم الدين.. ومن شديد الأسف أن يعرف الغرب والعالم كله ذلك. وينكره بعض الصحفيين في مصر
-----
الا انا في يوم من الايام لما كان الموكوس اوباما لسة في حملته الانتخابية قلت لكوا ان الواد ده مليان عقد من جوة نفسيته وح يفكها علينا عقدة عقدة وح يورينا اللي عمرنا ما شفناه، وحتى كان فيه ناس بتقول لي حرام عليكي يا شيخة احنا لسة شفنا منه حاجة؟
بس الشهادة لله
الشهادة لله الواد ده فاجئني انا صخصيا اللي كنت مدياله خوانة على اعلى مستوى
ما اتخيلتش ابدا، ابدا، ابدا، في اكثر احلامي توحشا وبرية انه يطلع بالشكل ده
ابن المتضايقة دخل علينا بصدره وقال، ح نسحب القوات من العراق تماما ونهائيا... إإإإإإإإإ إن شاء الله... إإإإإإإكمان سنة ونص...إإإإإإإإ احنا مش ح نسحبها قوي يعني... إإإإإإإإإإإإ احنا بس ح نسيب عشرين الف... إإإإإإإإوللا اقول لكوا خليهم خمسين ياللا انشالله ماحد حوش
احنا ح نقفل جوانتانمو ونبطل التعذيب...إإإإإإإإإكمان سنة إإإإإإإإإإ يعني لما يتقفل ح ننقلهم سجون تانية إإإإإإإإإيعني هم وضعهم القانوني مش ح يتغير قوي إإإإإإإإإإإإ ننقلهم بقى في سجون في العالم التالت ياللا بقى جحا اولى بلحم توره
ومشي بنفس الطريقة دي في كل حاجة
في الاقتصاد، وفي العلاقات الخارجية، وفي السياسة الداخلية، الامريكان بيلطموا دلوقت، عامل عليهم ضرايب بالهبل وبيتريقوا وبيقولوا ح يعمل لنا ضرايب على النفس، مع ان مصر لها السبق في الموضوع ده واحنا عارفين ان مشروع عدادات المناخير في طريقه لينا ده اذا فضل عندنا مناخير
وقال: احنا عايزين نسمع الناس في العالم الاسلامي، الناس اللي هم الناس يعني اللي إإإإإإإإإإ الرؤساء برضه، هم يعني مش بني ادمين ولهم نفس إإإإإإإإإإ اللي هم كانوا اصلا شغالين خدامين عندنا... يعني ح نطنشهم؟ دي حتى تبقى قلة اصل إإإإإإإإإإ انا باقول ندعمهم برضه حتى لو كانوا ديكتاتوريات اهو اللي تعرفه احسن م اللي ما تعرفوش
طب كانت لزومها ايه الدخلة الجامدة دي ياللي تنضرب في كلاويك؟ حرام عليك احبطت كل الناس، اللي انا الحمد لله ما كنتش منهم ومع ذلك اتصدمت، امال اللي كانوا فاكرينك المخلص عاملين ايه دلوقت يا قلبي؟
ياد يابن النصابة... منك لله، روح يا شيخ، الهي يقعد لك البت ميشيل في رقبتك لاخر لحظة في حياتك تفضل لابدة في ارابيزك وتموت وانت بوزك في بوزها، مش كفاية متجوز واحدة اسمها ميشيل، لما هي اسمها ميشيل امال اخوها اسمه ايه؟ جولييت؟
ربنا يستر وما تجيبلناش وباء تاني معاك، ما انت رجلك خضرا، رحت امريكا اللاتينية جبت لهم فلفلوسا الخنازير يا بوز الاخص
كانت معكم
waterboarding
قسم
الحالات الخطرة
سجن جوانتانامو

نسيت اقول ان القطعة الادبية الرائعة دي من ابداع محمد علي ابراهيم الجمهورية 

39 comments:

TAFATEFO said...

ده سؤال استفهامي مش انكاري

هو ايه اللي مضايقك في ان خطاب أوباما يكون من القاهرة؟؟

أوباما لو ضغط (فعلاً) على إسرائيل للدخول في معاهدة منع انتشار السلاح النوي

ولو سعى لإقامة دولة فلسطينية (بصرف النظر عن موقف المقاومة منها .. ده الكلام عن جهود دبلوماسية) ونجح في ده اللي بيفشلوا فيه باقلهم عشرميت سنه

يبقى ايه اللي مضايقك؟؟ ما هو كده يبقى مصر استعادت دور (برضه بصرف النظر عن الموقف من الدور ال*** ده) ومن حقهم يتكلموا ويقولوا بخطأ كل من أعلن انتهاء الدور المصري في عملية السلام و تأثير مصر في المنطقة ..

مش فاهم وجهة نظر حضرتك بصراحة

وبيتهيألي ان الموضوع بداية جديدة زي كل البدايات القديمة .. خطاب .. ومفاوضات وبوس وأحضان وتوقيع ومصافحة وصور ثلاثية .. ولحس لكل حاجه وتجدد اعتداءات

الحل السلمي أيا ان راعيه أثبت فشله .. انسى يا عمرو

تهذئة تلو التهدئة .. اتفاق تلو الاتفاق .. معاهدات وتوقيعات وصور ومصافحات

وفي الآخر .. السلاح هو وحده القادر على حسم القضية وإنهاء الصراع

TAFATEFO said...

وبعدين

انتي مش ملاحظه ان حماس هتجدد التهدئة .. وسكتوا عن الانتخابات .. واتفاق المصاحلة بخ؟؟

ما هو لازم تحصل حركة .. لو مكنتش حرب تبقى مفاوضات

نبدأ مفاوضات من جديد ونسلم ونبوس ونتعشى ونخطب ونوقع ويتلحس كل ده في الآخر .. وعمليات عسكريه .. وتهدئة .. ونبدأ مفاوضات من جديد .. ونسلم ونبوس من الناحيتين المره دي علشان ربنا يبارك

ما هي دي الدورة الطبيعية

Unknown said...

ايه مصطفى الكلام اللي عكس بعضه اللي انت بتقوله ده؟

انت عايز تنام؟

ومين ده اللي ح يضغط على مين عشان تدخل في معاهدة ايه يا مصطفى؟
مالك؟

ومين اللي ح ينجح في فشلوا فيه بقالهم عشرميت سنة؟

مين اللي ح يعمل كده يا مصطفى؟

انت بتهزر صح؟
وللا عايز تنام؟
ومصر استعادت دور ايه؟

دور المعرص؟
طيب هي عمرها ما فقدته عشان تستعيده
تفتكر نظام فاسد ومتفكك ومسنود بعود كبريت ولولا امريكا ما كانش قعد ده كله ايه الدور اللي ممكن يعمله؟

وبعدين منين ده كله ومنين الموضوع بداية جديدة زي كل البدايات القديمة ولحس كل حاجة وتجدد اعتداءات

مالك يا مصطفى؟

بص
انت تضلم الاودة وتدخل تنام كويس ولما تصحى وتشرب القهوة نبقى نتكلم
اوكيه؟

Unknown said...

مبارك ح يستعفى علينا بالزيارة دي زيادة ماهو مستعفي
وياريت فيه حد ح يستفيد غير اسرائيل

TAFATEFO said...

(برضه بصرف النظر عن الموقف من الدور ال*** ده).

*** ع ر ص

هو أنا بقول ان ده صح؟؟ أو انه لخدمة القضية؟؟

ده لخدمة الدور المصري الـ*** اللي كان اندثر وكنا بنقول انه اندثر

خطاب أوباما من القاهرة بيخدم الدور ده

الكلام مش متناقض .. الكلام عن موقفهم ودورهم ومصالحهم

إذا كانت الدبلوماسية المصرية تسير في طريق فرض التهدئة وإنهاء المقاومة .. يبقى خطاب أوباما انتصار ليها

لو قعد الطرفين على مائدة مفاوضات من جديد .. وجددت التهدئة .. يبقى ده انتصار للدبلوماسية المصرية (تاني بصرف النظر عن خدمة القضية) .. ليه بتستنكري انهم يبرزوا انتصار حقيقي (يخدم الموقف المعرص ولا يخدم القضية ولا ينهي الصراع

باختصار

تجديد التهدئة - العودة للمفاوضات - التفاو على أساس حل الدولتين .. انتصار للدبلوماسية المصرية في الخط الـ*** اللي بتنتهجه

آه طبعاً

وبعدين لسه 5 ساعات على ما أنام

TAFATEFO said...

في حالة طوارئ هنا علشان لو واحد عطس بالليل ولا حاجه

انتي مش مقدره المسؤوليه بتاتاً

Unknown said...

الا انت صحيح ما قلتليش هي الحالة ايه؟

والله انا كنت عارفة انهم لا ح ينطقوا ولا ح يقولوا

ياللا خللي اوباما ييجي هنا يمكن يفطس من كتر الصحة اللي احنا فيها

TAFATEFO said...

عزمي بشارة يكتب: كلُّ مُعوِّلٍ على إسرائيل لا يُعوَّل عليه

مواطن مصري said...

بردو معلش يا نوارة انتي اية الي مزعلك
ب العكس لما اوبما

هيزور مصر دة رد على الدول الي كانت بتقول انها بقت قوة مؤثرة و هي اساسا دول لا تذكر

ثانياً موقع مصر و دور مصر التاريخي و العالم كلة يعرف ان مصر لو حركت يمين العالم العربي هيتحرك يمين او اغلب العالم العربي

ثالثاً معلش يا نوارة سعات بحس أنك لو دولة عربية أو جماعات أسلامية لو جت و ضربت مصر هتضامني معاها أكثر من المصرين و مصر

لاحظي كمان أن فية شد بين اوبما و حكومة ألاسرائيلية حول موضوع الدولتين

و أن يا طفاطيفو ان لقاء الاخير اتفقو على مرجعية مشتركة بين فتح و حماس


و بعدين يا نوارة بغض النظر عن مدى معارضتنا

ل أي شخص زيارة زي دي بتثت أننا قوى في المنطقة متجيش دولة بنت يومين و تعمل فلم علينا

مواطن مصري said...

يا نوارة فية دول من مصلحتها أنها تقلب الدنيا على مصر مش كراهية للنظام معين لا لتنفيذ مخططات تانية

مواطن مصري said...

طيب مش يسمعنا احسن من بوش ابن التيت الي كان نازل فينا ضرب ضرب



و دة سبب من اسباب تشويهة صورة العربي و المسلمين في امريكا في عهد بوش

ابو اعصار said...

اخيرن لقينا حد الجرائد القومية بتقدسه اكتر من مبارك هو اوباما
لازم الشعب المصري يبقى زي اوباما عشان يتقدس

حـنــّا السكران said...

الحقيقة انا عاجز عن التعبير

الله يرحمك يا سرفانتس

هو مش مصوّر نفسه و هو بيرقص و حاطط الصورة مع المقال ؟؟ اتأكدي

ـ لدي كلام كثير احاول قوله لكن كله قبيح ..ليس على مبارك و لا على اوباما و لا على اسرائيل كمان .. بل على هكذا ( صحفيين ) .. لا أصدق ان هذا الرجل حائز على شهادة الابتدائية .ما هذه المسخرة ؟؟

ـ على فكرة . الإعلام الصهيوني نشر اليوم انه هناك مباحثات لاجتماع قمة ( بضم القاف ) في عمان بين الملك الاردني و مبارك و نتنياهو قبل سفر نتنياهو الى واشنطن .. الشباب عايزين ينسّقوا الشغل .. و ارقص يا محمد علي ابراهيم .. يا كايد العوازل يا ابو مصر مشغولة و مرتبطةو لا تلحقني مخطوبة , انت .

أحساس لسه حى...كلام من جوه روح لكل روح said...

عزيزتى

هو دلوقتى رؤساء الدول بتفتخر بزيارة رئيس امريكا ليها

طيب تفتكرى هو اى رئيس امريكى بيزوؤ اى دولى علشان قوة حاكمها ولا علشان مكانة الدولة

ده لو مسك مصر شعبان عبد الرحيم طبيعى ان رئيس امريكا يزوها

لاكن قوة ومكانة البلد اللى تغير سياسات اللى تقول لا وتعترض

مش كل ما يحصل حاجات تقول احنا كنا بنعمل فى صمت

نفسنا مرة يعملوا علانية ويعترضوا على الامريكان بس هما بيعترضوا بس على الامريكان فى تدخلهم فى حكم مصر

لاكن سياسة الامريكان بدل بعيدة عن .
......يبقى خلاص

صحيح فين صحف ايران دى

تحياتى

سلام

دودو said...

يابنتى هو هيلاقى احسن من كدة فين
نظام هينفذ كل المطلوب من غير مناقشة
وشعب عمرة ماقال تلت التلاتة كام
وبياكل على دماغة وعمرة مااعترض على حاجةولاعمرة اختار حاجة
بذمتك فية احلى من كدة
مش تقوللى تركيا ومعرفش اية **ياشيخة تركيا اية دى اللى فيها انتخابات بحقيقى والشعب بيختار بجد
بعد الشر علينا واهلابسى الاستاذاوباما

مهندس مصري بيحب مصر said...

أوباما ده لعيب
و بيلعب اللعبة بحرفنة شديدة
و بيلبسه للعالمين العربي و الإسلامي مغري
بس بالراحة و بشويش و من غير شوشرة

حواديت مصرية said...

انا عاوز افهم اتفشخنا على الاخر لان اوباما جاى مصر هو فيه ايه احنا ليه حاسين بالنقص واننا مالناش لازمة وان مجرد الراجل ده جاى فهو انتصار للديبلوماسية والملوخية بالتقليه ماييجى ولا يتحرق بجاز وسخ قال يعنى فيه جاز نظيف لا فيه احمد نظيف اوباما يااخوانا عارف كويس ان اى تعاطف مع العالم الاسلامى هيتفسر انه بيحن لجذوره وانه ناوى على مده تانيه علشان كده هو هيكون اقسى على المسلمين من غيره وبكره تشوفوا وبعدين اهو بدا بالضحايا100 معظمهم من النساء والاطفال فى افغانستان وبعدين التخلف الى احنا فيه لو صدقنا ان اى رئيس امريكى ممكن يضغط على اسرائيل وبكره ييجى ونقعد على الحيطه ونسمع الزيطة

Kalimalhus said...

إيه يا بنتى الغاغة اللى إنتى عاملاها عالصبح دى؟.. أتارى البلوج هنج أول مرة جيت أفتحه.. و بعدين إيه النار و الرماد ده.. و بعدين مش قلنا الصخص بتاع الجعورية ده بلاش منه عشان بيجيب ننح فى المخ و كريزة تف لا إرادى؟

بالذمة هو إيه الجديد باظبط عشان أنا مش شايفه و ألا يمكن أنا نظرى ضعف أكتر ما هو ضعفان و لازمن أغير النضارة؟.. و لما أنتى ما كنتيش مصدقة فى حبيب بابا و ماما أوباما و إتصدمتى بالشكل ده أمال اللى صدقوا إنه هايخش القدس على حمارة بيضة و وراه المسلمين و العرب شكلهم إيه دلوقت؟.. هالبت بيلموهم من الشوارع و هم بيعضوا فى الأسفلت و بيقرقشوا الرصيف.

يعنى مانتيش عارفة التمن اللى إدفع.. و هو ملحمة حزباللهنامة يانا يامه اللى خلت بيريز عمل بيبي على روحه من كتر الإنشكاح - دى مش تمن.. و هو فريق سلاح المهندسين الأمريكى اللى جايب معاه جوهاز أوشاعة بيطلع القملة من شعر النملة و قاعدين على حدود غزة دلوقت - ده مش تمن؟.. و هى تصريحات أبو غيط وسيع اللى بتقول إن مصر لا تفرق بين نونو قرنى و أم الخير و ناقص يقول إن مصر لن تتخلى أبدا عن النونو الصهيونى قبل أن توقف إيران برنامج النونو بتاعها- دى مش تمن؟

عايزاهم يعملوا إيه أكتر من كده؟ يبيعولهم البلد و يشتغلولهم فيها ناظر عزبه و مقاولين أنفار؟ الله طب ما ده حصل فعلا..

قولى الصراحة كده و ماتخبيش شكلك كنتى مستنية جوز ميشيل يبين أيوتها أمارة.. يابنتى فى بلاد الواحد يقعد على الكرسى الكرسى يلبسه و بلاد يقعد على الكرسى يلبس الكرسى و البلد و ما يطلعش ولا بزار مغربى.. فيه مصر مبارك و فيه أوباما أمريكا.. يعنى إيه؟.. يعنى فيه سياسة أمريكية ليها حدود للتطرف و حدود للإعتدال و مابين الحدود دى أى رئيس بيختار مكانه لكن يطلعتو بره الحدود يجيلوا واحد إسمه لى هارفى أزوالد يهفه رصاصتين فى نافوخه طالعين من حتتين بينهم نص كيلو.

الموضوع توزيع أدوار بالظبط زى الحكومات اليمينية و اليسارية و يمين الوسط بتاعة الصهاينة.. يعنى ببساطة بوش يحسس أوباما يعتذر و الضرب فى أفغانستان شغال و بيزيد و الأمريكان لسه فى العراق و جوانتانامو بعتنا نجيب ضرفه بس هى بعيده حبتين و التعذيب كخ يع حرام و الولاد اللى قاموا بيه هانقولهم عيب ياواد ماتعملش كده تانى.. ها يجننونى ولاد المجنونه.. والنبى ياختى ماقدره عليهم.. فطس فى إديهم عشرميت عربى دلوقت و الواحد من دول بابعت أخطفه و أجيبه فى طيارة خاصة و أصرف عليه دم قلبى و بعدين يفتحوا عليه المية فى البانيو و ينسوه.. ده إسمه كلام ده؟

Unknown said...

هو انتوا ليه مش مقدرين حجم الكارثة اللي احنا فيها؟

بصرف النظر عن ان اللي يتقرص في كورعه اوباما لما يتكلم من عند مبارك

ومعلش هو مش بيتكلم من مصر

هو بيتكلم من مبارك

وده اللي انتوا مش عارفين تركزوا فيه

بصرف النظر عن الاضرار اللي ح تلحق بالمنطقة والناس من حوالينا

يا سيدي معلش بقى ربنا يوفقهم نعمل لهم ايه


بس ده معناه ان جمال جاي جاي
خلاص
مافيش بقى غير اننا نصحى الصبح نلاقي القارة الامريكية غرقت عشان جمال ما يجيش

انتوا ما اخدتوش بالكوا ان الست شرشوحة كان عمال يقول هيكل وسعد الدين ابراهيم

هيكل عشان يدي رسالة لمعسكر دعم المقاومة

وسعد الدين ابراهيم عشان يدي رسالة للي عمالين يقولوا مافيش توريث وكفاية بقى عايزين نخلص


وبعد الزيارة دي لو سابنا نتكلم يبقى ده من فضله واحسانه

Unknown said...

مهندس حر
ههههههههههههههههههههههه

طب ما انت ح اطق من جنابك اهو

Kalimalhus said...

نهار بمبى مشجر وكط كمان؟؟ هوه إنتى كنت مستنية أمريكا هى اللى تمنع التوليس؟؟

هوه إنتى مش برضه قريتى مقتطفات المحاضرة اللى ألقاها مش عارف مين الصهيونى رئيس الشباك و الا البلوكونة السابق؟.. سيبك من كل الهجص اللى كان فيها عن إعادة إحتلال سينا و المارينز اللى ها يسيطروا على القاهرة و الحاجات دى.. الرسالة الواضحة إن إسرائيل عارفة إن مصالحها و يمكن أكتر هاتكون فى خطر كبير إن ماكانش النظام فى مصر يفضل على ذات نفس الطريق و ده مافيش حاجة تضمنه غير إن جيمى هوه اللى يمسك العزبة بعد ما بابا تعيشى إنتى ياطنط.

هرطقة said...

الجمهورية مستواها انحدر قوى بعد سمير رجب
فين أيامك يا سمسم
الواحد كان يقوم من النوم هبطان
يقراله سطرين.. يبقى عايز يشربله جردل كركديه
بس انا عاجبنى الكوبليه ده
"مكانة مصر كبوابة للمنطقة"
حاجة تفرح الصراحة
منه لله اللى فتح البوابة للزباين

mido said...

مواطن مصري : ببساطة زيارة اوباما دعم لنظام استبدادي معتقلاته مليانه عن أخرها

Unknown said...

انا ما كنتش مستنية امريكا تمنع التوريث

لكن كل المتفائلين قالوا ان اوباما ح يتلبخ في الازمة الاقتصادية وح ينسانا شوية

احنا مش طالبين مساعدة

احنا عايزينهم ينسونا شوية

اجازة
اجااااااااازة

الزوجين محتاجين يبعدوا عن بعض شوية عشان الحب يعيش

انما كده هم بيضحوا بالشعب عشان حسني مبارك يعيش

mido said...

مواطن مصري : يعني الزيارة دي مبارك يعتبرها _تجديد لرخصة نظامه و توريث حكمه_ في مقابل مساعدة اوباما فالملفات الخارجية و اللي مبارك بيساعده فيها أصلا

Unknown said...

الرسالة دي جات لي على الميل

http://www.rehabmaroc.com/vb/showthread.php?t=9345

هو حسني مبارك اتقبض عليه في المغرب سنة تلاتة وستين؟

Unknown said...

الدنيا كلها بتوج منك يا عوكل

من المحيط للخليج

عشان يعرفوا بس احنا مستحملين ايه

مش عارفين يستحملوه على بعد اميال

امال احنا بقى اللي قاعد على ارنبة مناخيرنا نعمل ايه؟

الله يخرب بيتك يا اوباما
انت والبت ميشيل في ساعة واحدة

Kalimalhus said...

كلام الجد.. مشروع التلويث ماشى سواء أوباما إهتم أو لم يهتم.. سواء قال على عوكل ديكتاتور أو إتغزل فى محاسنه..

الدعم الأمريكى نفسه للمشروع مش ها يتأثر بالكلام ده لأن مصلحة أمريكا مرتبطة بيه و ده حتى بوش أبو مخ تخين فهمه و لم الدور طول فترته التانية..

الخطاب بتاع أوباما كان جايزة على مسابقة الغطس فى الكنيف اللى نظمتها أمريكا بمناسبة الإدارة الجديدةو اللى بيفوز فيها اللى يغطس أعمق فى أوسخ كنيف ممكن.. و طبعا الفريق الأوليمبى بتاعنا أخد درع الجلة فى المسابقة دى عن جدارة و إقتدار..

يعنى الفريق المصرى قدر إنه يتفوق على فريق خادم الكنيست و الكونجرس و فريق جوز رانيا بل و أخد كل إبتكاراتهم - الهلال الشيعى و الأطماع المجوسية - و زايد عليها و أطلق عليهم فريق الملاية و فريق ياعووومر اللى عمرهم ما إنهزموا فى أى تقسيمة ردح قبل كده..

خطاب أوباما من القاهرة المباركية هو تمهيد للحوار القادم مع إيران و تدعيم لورقة البذاءة العربية اللى أضيفت لأوراق المفاوض الأمريكى.

mido said...

انت مقرتيش مقال ابراهيم عيسى عن أسر مبارك فى المغرب ؟

(هكذا اعتقلت حسني مبارك)

Kalimalhus said...
This comment has been removed by the author.
Unknown said...

نفسي افهم
ازاي واحد كان مشروع شهيد يتقلب القلبة دي؟

ازااااااااااااي

امال لو ما كانش ظابط جيش وفلاح كان عمل ايه؟

امال ابنه اللي لا ظابط ولا فلاح ح يعمل فينا ايه؟

Kalimalhus said...

http://dostor.org/ar/content/blogsection/21/64/ده مقال النهاردة عن زيارة أوباما و الخطاب

الكلمة نور said...

ايوه وهو قائد سرب كان فى مهمة ارسال سلاح للثورة الجزائر وقت كان فيه خلاف بينها وبين المغرب
وطيارة القائد المظفر وقعت فى المغرب
واتأسر
وخده معاه الملك الحسن باالافورول العسكرى بتاعه كهدية وهو بيزور عبدالناصر
والقصة نشرتها كريستيان ساينس ميرور
وفى واحد مغربى نزلها فى مذكراته
وجرى الكلام عليها كاستشهاد ضد مصر على خلية حزب الله

Kalimalhus said...

ما تقلقيش أوى هوه مش لسه هايعمل هوه إبتدى يعمل فعلا و اللى إحنا فيه الخمس ست سنين اللى فاتوا من باكورة خيراته اللى هاتنزل على دماغنا و دماغ الورثة و الأحفاد أفرادا و أجوازا.

مي ثابت said...

أيوة بيقولوا عوكل كان إتقبض عليه

عند نقطة حدودية

إسمها نقطة الشواطر على الحدود المغربية الجزائرة

و الرواية إتنشرت فى صحيفة الأيام المغربية إتنين يناير من هذا العام

رواها الظابط كرزاى العمارى أحد مسئولى النقطة فى هذا الوقت

و كانت التهمة إمداد المقاومة الجزائرية بالسلاح و لكنه ظُبط فى المغرب


على فكرة

إبراهيم عيسى كتب عن الحكاية فى الدستور الأسبوعى

و آدى الرابط

http://dostor.org/ar/content/view/21814/64/

Unknown said...

حد عارف حاجة عن الحالتين بتوع انفلونزا الخنازير اللي في العريش؟
جايلي خبر ان واحد فيهم هرب

الله يخرب بيتك يا اوباما على بيت نحسك بس قال انه جاي جاب لنا الوبا معاه

واد شؤم

mado said...

من أول ما قريت الابداع دا وانا عمال اقول الاسلوب دا مش غريب عليا.
وفجأة لما وصلت لجزء لا بئس به تأكدت انه فلته عصرة الاستاذ المبدع محمد علي ابراهيم.

الراجل دا باسلوبة الاهبل ووساختة في الكتابة مفيش لها مثيل.

بجد دا قرب يغلب ممتاز القط وأسامة سرايا في تلميع النظام والدفاع عنه.

بالنسبة للجمل البلاغية البلاغية والي عجبتني
هي :

1-هل هناك نجاح لمصر أكبر من هذا التحول في سياسة الولايات المتحدة؟

2-
لقد عملت الدبلوماسية المصرية بهدوء وصبر وتحت نيران صديقة كثيفة وضغط إعلامي شرس للتقليل من جهودها.. لكن القوة الناعمة نجحت بامتياز وفشل المشككون


ويبقي بعد ذلك السبب الذي جعل واشنطن تختار مصر؟ انه نفس السبب الذي جعل دول الكومنولث "المستقلة عن الاتحاد السوفيتي سابقاً" تختار القاهرة..

بجد مش عارف ناقص يقول ايه تاني.
ناقص يقول ان مصر محور العالم كله وان مفيش دولة بتتحرك الا بمشاورة مصر
او كما يدعونها الاخت الكبيرة.

المشكة مش في الراجل دا المشكلة الاكبر فالناس الي بتصدقة.وتنساق ورا الكلام دا.
ياجماعة الي فرحان بزيارة اوباما لمصر ياريت يعرف ان الزيارة دي دعم لمبارك ونظامة لا اكتر ولا اقل.هو اوباما هيلاقي احسن من مصر فين يعني.

حتي الناس الي كانت متوقعة انه يتم ربط المعونة بحقوق الانسان كنوع من انواع الضغط علي النظام المصري.
توقعها طلع فشنك. :)

ووزير الدفاع الأميركي روبرت جيتس قال: أن المعونة العسكرية لمصر غير مشروطة بمسألتي الديمقراطية وحقوق الإنسان.

صحصحو كدا وبلاش حد يطلع يقول تأكيد لدور مصر وريادة مصر.

الزيارة ما هي الا تأكيد لدور مصر في التواطؤ لصالح امريكا واسرئيل.
وتأكيد علي دعم مبارك ونظامة.

دودو said...

طبعا هو عبقرى العصر والاوان اللى بيكتب اسمة ثلاثى اللى ميتسماش
مهى نوارة مش عايزة تتئذى منة لوحدها قامت هبدانا المقال بتاعة
اللة يسامحك
اما ازاى
تحول عوكل من مشروع شهيد للحالة اللى هوفيها دلوقت فاسالى عن الحاشية
اكيد البطانة الفاسدة بتصنع النموذج اللى احنا شايفين منة الويل دة
وخصوصا انة ماكانش لة فى حكاية الزعامة دى وجت معاة كدة
اماعن جيمى فهو جة خلاص وبركاتة مالية البلد من اولها لاخرها

Rasim Marwani said...

President fares best in Jordan, worst in Egypt -- where he will speak

http://www.swamppolitics.com/news/politics/blog/2009/05/obamas_arab_ratings_sixnation.html