تحذير هام بخصوص جمعة الانتصار والاستمرار

طبعا انا واثقة في المنظمين والداعين وواثقة في الشعب وواثقة في الجيش

لكن علينا اننا نحط في اعتبارنا بعض الحاجات عشان نخلي بالنا: مطلوب تكثيف اللجان الشعبية والتفتيش بدقة والتعاون مع الجيش باكبر قدر ممكن في اليوم وتشديد التعاون والحراسة اكتر من اي يوم فات

ليه؟

فيه بعض اجنحة النظام مازالت شغالة لسه، وبعض الاجنحة دي بتكره الجيش - ومش محتاجين نقول انها بتكره الشعب - ومتغاظين من الجيش جدا جدا جدا انه وقف جنبنا 

الى جانب ان امريكا واسرائيل بيكرهوا الجيش المصري جدا ومن زمان وارجعوا لوثائق ويكيليكس، وعلى حبة عينهم ان الجيش واقف جنبنا.. على حبة عينهم، هم مش عايزينه، هم عايزين عمر سليمان

وللناس اللي بتتكلم بنبرة تشكيكية عن الجيش، انا عايزة اقولكم ان مبارك عمره في حياته ما كان حيمشي بخير لولا وقفة الجيش جنبنا

كان حيمشي في كل الاحوال، لكن قبل ما يمشي كان ناوي يولع البلد، وكان عايز يولع البلد بالجيش، كان عايز الجيش يضرب علينا نار، وكان عايز امريكا تيجي تحتلنا وقال لهم لو انا مشيت الاخوان حييجوا في دعوة صريحة لاحتلال مصر، وكان عايز من الجيش ان اللي ما ينفذش اوامره يتضرب عليه نار، يعني كان عايز جيشنا يضرب في بعضه

وناس من اجنحة النظام كانت موافقاه من ضمنهم عمر سليمان

والكلام ده مش كواليس، ده كلام اتقال واتنشر وكان واضح لكل انسان كان في ميدان التحرير او عند مجلس الشعب، كفاية ان الجيش قال لنا لو طلبوا منا تاني - سامعين؟ تاني - اننا نضرب عليكم حننتحر

ولو الجيش عايز ينط على السلطة كان نط عليها، وطبعا ما كانش حينط عليها بسلام، كانت حتحصل برضه مواجهات وكانت حتبقى مدبحة، وبرضه ده كان حيعرض مصر للاحتلال

ليه باقول كده؟ 

باقول كده عشان اللي معوجين على الجيش يتعدلوا شوية، الناس ما عملوش حاجة وحشة لحد دلوقت.. اتعدلوا عشان ده مش في الصالح

الجيش نحى القائد الاعلى للقوات المسلحة ومش عايز السلطة... اتعدلوا.. اتعدلوا.. ده احنا زاعق لنا نبي، ده ولا في الاحلام اللي حصل معانا ده

لكن مازال عمر سليمان - اللي بيكره الجيش جداااااااااااااااا ومتغاظ منه جدااااااااااااااااااااااا - موجود في قصر الرئاسة 

ومازال له رجالته في جهازه اللي مستعدين يخدموه لان مصالحهم معاه

الشرطة نزلت، ومعنى ان الشرطة تنزل ان البلد مش امان، عادي يعني، انتوا عارفين ماحدش بيزعزع امن واستقرار البلاد غير جهاز الشرطة

والشرطة كمان متغاظة من الجيش خصوصا جهاز امن الدولة

وامن الدولة ورجالة عمر سليمان معاهم سلاح، مش في ايديهم سلطة، بس في ايديهم بلطجة

ده غير بقى رجال الاعمال اللي الجيش شنيرهم واخرهم ابو العينين اهو اللي اتمنع من السفر، وبرضه له رجالة 

ايه اللي حيحاولوا يعملوه

اللي حيحاولوا يعملوه انهم يوقعوا ما بين الجيش والشعب 

قبل نجاح الثورة ضربوا المتظاهرين وكانوا حريصين على تحييد الجيش، بس بما ان الجيش اخد صفنا فممكن - لا قدر الله وربنا يسلم يا رب - يحاولوا يتعرضوا للجيش عشان هم املهم ان الجيش والشعب يقعوا في بعض، هم دلوقت مش بيفكروا غير في الانتقام، ومش عاجبهم ان الامور بتسير في الاتجاه الحالي، هم عايزين فوضى فعلا، وعايزين بلبلة ومصايب سودا، وبالمناسبة مبارك مش عيان ولا حاجة كل ده استعطاف، الاستخبارات الاجنبية كلها بتقول انه زي القرد وعايش حياة رئاسية مرفهة وان ادعاءات مرضه دي لاستعطاف الناس، واقروا الصحف الاجنبية، بتقول الحقيقة اكتر من المسئولين المصريين، وده ما كانش رئيس ومشي، ده رئيس عصابة وله ناس مصالحهم متشابكة معاه

اولا: مش صح، ومش في الصالح، ومش سياسة انك تروج خطاب يشكك في الجيش لان ده بيصب في مصلحة رجال الاعمال ورجالة عمر سليمان وفلول النظام البائد، وارجع تاني واكرر، الجيش لو عايز السلطة كان حيعمل مدبحة وياخدها، هو مش عايز، ومش عايز مدبحة، وبصراحة اكتر، هو اضطر ياخد صفنا لما لقى ان مبارك واللي معاه اتجننوا وعايزين يحرقوا البلد، فلقوا ان مافيش مفر غير انهم ينحوه، بقول اخر، الجيش مش عايز وجع دماغ

ثانيا: مهمتنا يوم الجمعة اننا نحمي الجيش بارواحنا، انت وانا وكلنا نموت ومافيش فرد من الجيش يتمس، دي ناس بلطجية ومعاهم سلاح وقناصة وقرف على دماغهم.. انت شغلتك تحمي قوات الجيش من اي حد يحاول المساس بيهم ولو بخدش صغير

ثالثا: اللجان الشعبية تقف قبل نقاط الجيش ومع نقاط الجيش عشان تحمي الجيش، ودي مهمتنا ومسئوليتنا

رابعا: ونقول يا رب، مالناش غير يا رب، هو اللي حصل معانا ده كان عمره حيحصل غير ربنا معانا؟ قولوا يا رب اليوم ده يعدي بسلام زي اللي قبليه واحسن بايدينا احنا ومسئوليتنا احنا، دي ثورتنا احنا، ثورة شعبية، وشغلتنا نحميها، ونحمي الجيش اللي وقف جنبنا، مش هو اللي يحمينا... حط في بالك كده، احنا اللي حنحمي الجيش مش هو اللي حيحمينا