من ميدان التحرير المحرر احدثكم

تحديث:
ايه ده؟ انا دعوتي مجابة كده؟ الحمد لله، يارب استجيب بقى ان مبارك يغور يا رب الليلة يا رب، يا رب ما يدخل عليه الليل وهو رئيس مصر ابدا ابدا ابدا يا رب
احنا عددنا وصل 300 الف دلوقت
----
فيه حاجة مش تحديث بس كل مرة انسى اقولها، وكذا مرة افكر نفسي اني اقولها وبانسى: فاكرين الفيديو بتاع الناس اللي بتصلي وفتحوا عليهم المية؟ انا كنت هناك على الكوبري وفتحوا مش بس المية على المصلين، وكمان الرصاص المطاطي، ساعتها المسيحيين كانوا واقفين على الجنبين، اول ما لقوا المية والرصاص اتفتحوا علينا دخلوا يصلوا معانا وكان فيه بنات مسيحيات مش معاها حجاب ودخلت تصلي من غير الحجاب هههه، واتصاب منهم ناس
-----
الحمد لله كسبنا معركة امبارح امام بلطجية نظام مبارك وتم تحرير ميدان التحرير وسيمون بوليفار وميدان عبد المنعم رياض وكل الشوارع المحيطة بميدان التحرير بالكامل، وقبضنا على عدد كبير من عناصر التخريب وكلهم لحد دلوقت امن دولة على يدي وانا واقفة طلعوا بطاقاتهم وعددنا في ميدان التحرير حوالي سبعين الف والعدد كده يعتبر مش كبير

فيه بعض الناس متضايقين ان العدد سبعين الف بس، وبيقولوا لي اكتبي للناس تيجي

بس انا مش باكتب للناس عشان تيجي، انا باكتب عشان اقولهم اني مبسوطة ان العدد سبعين الف بس، عشان ربنا لازم يمحص الناس، وبصراحة تلاتة مليون ونص بتوع يوم الثلاثاء دول صعب قوي ان كلهم يبقوا ناس صادقة ومخلصة، اكيد فيهم ناس جاية في الظيطة، وناس جاية لما حست انه امان، وناس جبانة، وناس نص لبة، وناس مخهم على قدهم، وناس ما يلزموناش

وبما اننا في المعركة الاخيرة فاحنا مش محتاجين غير الناس الصادقة بس، مش طالبة لا نفاق ولا غباوة، احنا محتاجين الناس اللي ربنا منور لها عقلها وقلبها الاتنين من الاخر كده، انا بادعي ربنا انه ييسر المجيء للناس اللي هو عالم فيهم خير ويعسر المجيء للناس اللي ربنا عارف فيهم نفاق او شر، وانه ينطقهم بما يكره عشان تتسجل عليهم لاني ما باحبش البراشوطات

عشان كمان ان شاء الله احنا قربنا قوي قوي قوي على الانتصار، ولازم الانتصار ينسب للناس اللي تستاهله مش للناس اللي بتظيط

او الناس اللي ما دخلتش غير في الامان، او اللي كان فاكرها ثورة من ام ايفينت وعامل اتيندينج عشان يروش

المحلة دلوقت فيها مظاهرة مية وخمسين الف وده عدد قليل برضه بالنسبة ليوم الثلاثاء

عموما احنا هنا في امان بعد ما الشباب حققوا النصر الحمد لله وكل بلطجية النظام هربوا، من آن لآخر بيحاولوا يقربوا واللي بيتمسك فيهم بيبقى عبرة الزمان وبينحبسه ونكتفه وياكل ضرب خصوصا لما بيطلع ظابط امن دولة، الكونيات كلها بتنزل عليه ضرب بتخلص منه كل الضرب اللي ضربه للناس الغلابة طول حياته، والدخول والخروج آمن تماما وفيه واحدة نزلت من ورا جوزها اللي حابسها عشان تجيب لنا مواد غذائية وطبية وعرفت تدخل بسهولة، لان اللي واقف على المداخل اسود والله، والجيش رجع بقى، بعد ما العيال حرروا وسط البلد، رجع تاني

دلوقت بيقروا بيان الاتحاد العالمي لعلماء المسلمين في الميكروفون، والله كلام يبرد القلب، قالوا اللي مات هنا شهيد واللي قاعد هنا مرابط

بالنسبة لاعتذار احمد شفيق

اعتذارك مش مقبول يا ابو الكباتن، الحالة الوحيدة اللي اعتذارك فيها يتقبل انك ترجع لنا الشهداء اللي راحوا امبارح، لو عندك ذرة انسانية تستقيل او تضرب نفسك بالنار، قال تحقيق قال، انت كنت فين امبارح طول الليل والعيال بيترمي عليهم مولوتوف ورصاص حي وقنابل مسيلة للدموع؟ كنت بتركب عجل في الغردقة؟ مش عارف تصدر امر بان دول يتوقفوا؟ هو فيه مدنيين معاهم قنابل مسيلة للدموع؟ اشتروها من سوق الجمعة ولا ايه؟ ولو انت رئيس وزراء ومش عارف تدي امر لوزير الداخلية او وزير الدفاع ان دول يتوقفوا فورا يبقى تحتفظ بالبقية الباقية من كرامتك وتستقيل، او تنتحر، دم الشهداء في رقبتك ورقبتكم كلكم وحسبي الله ونعم الوكيل، انت ومبارك وسليمان ووجدي وكل اللي شاركوا في جريمة امبارح ولو بكلمة او حتى سكوت او رضا ولو صامت عن الجريمة وكل اللي دعموا مبارك ربنا يحرق قلبكوا كلكم على ولادكوا زي ما حرقتوا قلوب الناس على ولادها، وبعدين يقول انا مستعد للتحاور مع المتعصمين في ميدان التحرير

اهلا وسهلا ييجي يشرفنا هنا احنا مش خارجين

ثانيا، مافيش حوار، فيه مطالب، ومطالبنا معروفة مش اللي بنقوله بنعيده واللي بنعيده نزيده؟ هو احنا بنتكلم لاوندي؟

ومش بنروح لحد، هو عارف مطالبنا واخر كلامنا

ومن ميدان التحرير المحرر احدثكم، المتظاهرون لم يفوضوا اي مخلوق للتفاوض نيابة عنا، وما عندناش مفاوضات احنا، عندنا مطالب وواضحين فيها، ونحن مرابطون هنا في انتظار النصر... والغايب مالوش نايب

وحنعمل قائمة سوداء باللي ركبوا، واللي استندلوا في نص السكة، واللي كانوا فاكرين ان معارضة مبارك ام بلاش دي حاجة ستايل ولما بقت مكلفة فجأة بقوا يحبوه بعد ما قتل الناس وبقى بابا مبارك وعملوا عيشة، واللي شوه سمعة اشرف واطهر وانضف ناس فيكي يا مصر واتهمهم بالعمالة وحسبي الله ونعم الوكيل واخص بالحسبنة عم الشيخ حسن يوسف اللي افترا علينا ربنا يردها له في لحظتها ويفضحه جوه وبرة ويدوقه مرار الافترا والظلم قادر الكريم يستجيب مني وانا قاعدة في اطهر مكان في القاهرة

بكرة ان شاء الله جمعة الرحيل... يا رب انصرنا وما تدخلش في صفوفنا الا اللي تعرف عنه الخير