Sunday 14 June 2009

هم الفلسطينيين مزنوقين قوي في دولة؟

طب كده مش نافع يا جدعان، على رأي عمرو خالد: يا اخوانا يا اخوانا يا اخوننننننننناااااااااا
ده حتى ما عجبوش الدرافت اللي كنت عاملاهوله، راجل دوغري الحقيقة، من غير لف ولا دوران كده، لا حتى عودة اراضي سبعة وستين، ولا عاصمة، ولا جيش، ولا حتى جوز فرافر لحفظ الامن، ولا عودة لاجئين ولا اي حاجة، ده طابور الكشافة واخد مميزات اكتر من اللي مديها نتانياهو للفلسطينيين
وقال ايه؟ فتح وحماس اتفقوا، على ايه؟ على تبادل المعتقلين
طب من غير زعل كده، مين يزعل من نتانياهو؟ يعني تعالى على نفسك وحط نفسك مكانه، انت واحد معاك قوة نووية، القلل المنتحرة في جيبك بحق الفيتو اللي انت قاطع فيه ابونيه امريكاني، وعلى رأي السادات: عشرات المليارات نازلة ترف عليك
ويا سيدي مش ح نقول انك مقتنع ان دي ارضك، لا، مقتنع انك سارقها، ايه اللي يخليك ترجعها لناس
1- نصهم ماسك نصهم التاني وهو اللي بينزع سلاح مقاومتهم بنفسه
2- يوم ما بيترمي عليك بمب العيد وترد بقنابل فسفورية بتلاقي القومن الاولانيين يبرروا لك ويشمتوا في اهلهم اللي بيموتوا عيانا بيانا وعباس طلع يقول: عشان تحرموا تنتخبوا حماس
3- حواليك دول عربية نصهم خايف منك والنص التاني بيلحس جزمتك وبيقمعوا شعوبهم بس عشان انت ترضى
وبيدولك غازهم ببلاش بس عشان انت ترضى
وبيدولك بترولهم ببلاش بس عشان انت ترضى
وبيأمنوا حدودك ببلاش بس عشان انت ترضى
رضي الله عنك وارضاك يا حاج
طب ايه اللي جابرك يعني؟ عليك من ده بايه؟ ما تطلع عليهم تموتهم كلهم ما انت معاك فلوس وسلاح وفيتو تعمل كل اللي انت عايزه
واللي واقف قدامك هو نفسه ما عندوش رغبة حقيقية في انه ياخد حقه
مافيش حتى تلويح بقطع علاقات
مافيش تلويح بطرد سفير
حتى الفلسطينيين اللي مش عايزين يحاربوك عشان خايفين منك مش سايبين فلسطينيين غيرهم هو يقاوم بدالهم ونازلين فيهم هبد ورقع
الله
طب ايه؟ انا عايزة افهم هو الراجل غلطان في ايه؟ ما تحط نفسك مكانه يعني، هو كان سرقك عشان يرجع لك اللي سرقه كده ببلاش؟
هو مش شايفك محتاج قوي الدولة دي، مش باين عليك يعني انك محتاجها ولا حاجة، وهو بيديلك علم ونشيد وطني واسم دولة صدقة منه واحسان عشان راجل متدين وطيب وقلبه زي اللبن الحليب
كمان انت زعلان؟
وعريقات طالع بمنتهى البجاحة يقول على الفلسطينيين يوحدوا صفوفهم؟ ده على اساس ان خالتي هي اللي قبضت على عناصر المقاومة وحاصرت الناس في غزة وبتمنع عنهم السلاح وبتقمع الضفة الغربية حتى من انهم يتظاهروا ضد ضرب غزة؟
يا اخي ماحدش طلب منك تقاوم يا اخي، بس سيبهم، سيبهم واستخدمهم ورقة ضغط في المفاوضات
قال وبيشتم نتانياهو قال..... ماحدش يتكلم يغلط في الناس الحلوة دي، دي صدقة، وهو حر يديلك اللي يطلع من ذمته وانت حطها في جيبك من غير ما تعد عشان ما تقلش بركتها

20 comments:

الكلمة نور said...

انا اللى هيجننى هو عايز يتفاوض مع الفلسطنين على ايه؟
لا قدس ولا لاجئين ولا سلاح ولا ايقاف الاستيطان ولا حماس على الارض
اومال يتفاوضوا على ايه؟
اللى يلحق يلبس اول بعد ما يخلصوا

Kalimalhus said...

يتفوضوا على هايبصموا على الحاجات دى إمتى

Kalimalhus said...

يا جماعة أنا أعلن إعجابى الشديد بنتنياهو و أدعو إلى منحه الجنسية المصرية تمهيدا لإنتخابه رئيسا لمصر مدى الحياة .. أهى هى دى الرجالة .. و الله أنا لو صهيونى أفرح بيه و أتفشخر و أحط رجل على رجل و أصدر الطرية فى وش التخين و أقوله بوس .. مش الواحد من بتوعنا تبقى ليته أكبر من دماغه و مخبيها بين رجليه..

يساري نوبي said...

انا شايف ان اللي حصل دا هو انتصار لمبدأ السلام اللي بدا فيه الراحل السادات "الله يرحمه بس مايدخلوش الجنه" لان احنا كدا خدنا أرض و دوله و علم و حاجه عيب بلاش اقول اسمها
و لو فاكره فيلم السادات و المبدع أحمد زكي بيقول للحلاق اجيبلك كرسي و انت بشطارتك تاخد بقية المحل
ادينا خدنا الكرسي و بشطارة عمو ابو مازن ناخد الكنبه و السرير و نجيب التلاجه من الخليج و الفرح الخميس الجاي ان شاء الله

Unknown said...
This comment has been removed by the author.
Unknown said...

ههههههههههههه
يساري نوبي عامل دماغ النهاردة
هههههههههههههه
ههههههههههههههه

Kalimalhus said...

بدراوى
------
صاحب تعبير الدجاج المقلى كان المبدع شارون ربنا يديه على قد نيته..

الراجل قال إحنا مستعدين ندى الفليسطينيين حتة أرض يعملوا عليها حكم ذاتى يسموها إمبراطورية يسموها دجاج مقلى همه حرين..

ناس زى العثل الصراحة.. أنا بحب الناس دى قوى .. مش تقولى أوباما!

Kalimalhus said...

فى برنامج بلدنا السفير محمد الأشعل مساعد وزير الخارجية الأسبق قال حاجة عجبتنى:

خطاب أوباما كان عناوين و خطاب نتنياهو هو المذكرة التفسيرية..

أوباما قال دولة فليسطينية .. لا قال فين و لا قد إيه.. نتنياهو قال منزوعة السلاح و جنب إسرائيل .. يعنى فى الأردن مثلا ..

نفسى أشوف عبدالله و هو بيلبس الخازوق ده من حبايبه اللى كانوا بيعالجوله الكلب بتاعه

mido said...

مهندس حر

و خالد صلاح رد عليه قاله ايه ؟

حسن على said...

الكلمة نور :نوراللة عليك او عليكى ...ايهما أليق اما "البيض الابيض" فبماذا يرحب ؟؟ بأستمرار التجويع والحصار والقتل؟؟؟ والكوفية الفلسطينية التى رسمها الاسرائليون فوق رأس أوباما تخفى تحتها دستة "كوفع" (الطاقية الاسرائيلة)... وكل شيئن انكشفن وبانن ياشيخ "اوبامن " أوباما يعنى بس عشان السجع لامؤاخذة يعنى

Kalimalhus said...

ميدو
----
خالد صلاح غطرش عليه لما لقاه داخل فى تعديد النقط اللى أوباوا قالها و إزاى نتنياهو فصلها

و جاب جعر من بتوع الصلاطة الفليسطسنية فى رام الله قالك لأ لأ .. أوباما قال كلام تانى خالص و مش عارف إيه .. بس ده قبل ما البيت الإسود ما يقول إنه دخل الكنيف و مستريح من بيبي النتن..

محبى أوباما.. الفوطة ياولد عشان أوباما يمسح

Love-Guru said...

بمناسبة حكاية الغاز اللي ببلاش الحكومة حتقلل الدعم علي الغاز في الموازنة الجديدة ستة و نصف مليار جنيه و طبعا حيشلهم المستهلك المصري علشان المستهلك الاسرائيلي يتنعم

Ahmad atef said...

وأنا المحاصَر والمحاصِـــــر والحصار000وأنا الذي لم يحفظ "الأنفـال" واستمرأ تـرديــد السور القصـــــار
وأنـــــــــا الذي يمناي تشجب عزل إخواني 000ويسـراي ارتضت توفـير أسمنت الجدار

Me7'o said...

خطاب أوباما كان عناوين و خطاب نتنياهو هو المذكرة التفسيرية

يسلم فمه والله
يا حكام العرب حرام عليكم بقى
إصحوا فوقوا الله يخرب بيتكم

خربتم بيتنا وذلتونا ومرمغتوا وشنا فى التراب

حسبى الله وهو نعم الوكيل فيكم يا زبالة يا شوية مخنثين يا رمم

إلهى أشوف فيكم يوم وإنتم متجمعين كده فى أى قمة ينزل عليكم صاروخ حربى محدش فيكم يموت وتطلعوا تجروا كلكم بره تقابلكم إسرائيل تضرب عليكم نار وبرده محدش فيكم يموت تقابلكم شعوبكم بالجزم وقنابل المولتوف ومحدش فيكم يموت وتطلعوا تجروا كلكم كده
لحد ما يقابلكم أتوبيس سياحى أنا عارفه يدوس عليكم كلكم ومحدش فيكم يموت
وتجولى أنا بقى
أتسلى عليكم واحد واحد يمكن أشفى غليلى منكم لحد ما تموتوا من الخضة

ما طبعاً إنتوا مش هاتستحملوا فكرة إن فيه واحد من شعبكم ممكن يأذيكم
هههههههههههه
أوففففففففففففففففففففففففف

Me7'o said...

حبة جد بدل المسخرة اللى فوق دى

توصيات نتنياهو كده على السريع

1- إقامة دولة فلسطينية منزوعة السلاح
2- الأعتراف بالدولة الإسرائيلية اليهودية
3- عدم عودة اللاجئين إلى الأراضى المتبقية للفلسطينيين

توصياتى انا بقى كده على السريع

1- نعمل دولة فلسطينية أرخبيلية
يعنى تتكون من عدة تجمعات فى العديد من دول العالم أكنها جزر يعنى ويكون مقرها فى جزيرة نائية فى المحيط القطبى الجنوبى

2- الاعتراف ببنت الخطيئة اللى هوه الدولة الإسرائيلية وأمه تبقى الدول العربية وأبوه أمريكا
معلش المفروض يبقى العكس بس لقيتها مش هاتبقى معبرة

3- انظر الوصية الأولى

والسلام عليكم ورحمة الله وبركاته

Empress appy said...

عارفه ان بقى يجيلى الضغط بسببك وبسبب التصريحات والاحداث طيب اهرب اروح فين انا بدا يجيلى احباطات تصدقى كل ده وكان عندى امل بس خلاص مش

Anonymous said...

الراجل نتنياهو اصله صريح ودوغري وتربيه الغرب.....وبعدين بيتهيئلي احنا موش مزنوقين فيها اوي الدوله الفلسطينيه....ما اديلنا ستين سنه عيشيين من غيرها....... صحيح من غير كرامه......بس برضه عايشين
هي بس عامله للكبارات صداع وكده
وبرضه بتنفع في مواسم التصريحات الحنجوريه

دودو said...

بغض النظر عن ترحيب الادارة الامريكية بهذا الخطاب ,

الذي لا يتوافق مع ما وعد به اوباما في القاهرة .


وبغض النظر عن عدم ذكر المبادرة العربية اللى صدعونا بيها وبحكمة اللى عملها

هل مازلنا نتلقف الوعود و لو كانت وهما ؟

هل كان خطاب اوباما السحرى حجة جديدة لتنويم الشعوب مغناطيسيا60 سنةتانيين

ثم نقرر ان كان هيوفي بوعوده او لا
.
هناك معيار واحد هو الفيصل فى ان يجعل اوباما ا و غيره يسمع لنا ام لا

الا و هو هل نحن جاهزون لان ناخذ ما نريد

ام جاهزون لان نقبل ما يعطيه لنا الاخرون .

محمود خاطر said...

صراحة نتنياهو أكيد أحرجت الريس دلوقتي وزمانه بيلف ويدور حولين نفسه ومش عارف يقول ايه أو يعمل ايه بعد ما خالاص القضية الفلسطينية اللي هو بيعتبرها راعيها الأول وحامي حماها أوشكت علي النفاذ

Kalimalhus said...

Me7'o

هههههههههههه

حرام عليك ياراجل قصدك إيه بإنك تحط الدولة الفليسطينية فى القطب الجنوبى..

شكلك عايز تجمد القضية..

و بعدين مافيش محيط قطبى جنوبى أصلا و لا فيش جزر هناك..

إنت قصدك تتوهنا؟؟