Saturday 20 June 2009

بتوع الكالفين كلاين نسونا الغلابة

هارشين احنا ان بعد هولوكوست الخنازير بقينا الدولة العربية الاولى في فلفلوسا الخنازير، ليه؟ لان هي دي الريادة المصرية، احنا الوحيدين اللي اعدمنا الخنازير في العالم وتقريبا لما الكونغو لقتنا بنعمل كده عملت زينا، اه والله :) من غير ما يفكروا كده، مجرد بس عشان مصر عملت كده، برضه الورد مهما يدبل يفضل عبيره فيه
بس الاهم من الخنازير اللي دعت علينا (انا متأكدة انها دعت علينا، ويمكن المصايب اللي احنا فيها دي جزء منها دعوات الخنازير المسكينة علينا) البني ادمين اللي كانوا بياكلوا عيش من ورا الخنازير، اللي اتخرب بيتهم
غادة صاحبتي عشان بتشتغل في التنمية قالت لي ان تحت ايدها ابحاث ان مصر احسن دولة في العالم في الريسايكل بالرغم من بدائية الادوات، وان كل اللي محتاجينه ارشادات صحية: يعني يلبسوا جوانتيات يلبسوا كمامات، وان البدائية دي بتوفر فلوس كتير
وده طبيعي، احنا اقدم دولة في العالم في الريسايكل، لاننا اول فلاحين في الدنيا، والفلاحين مش بيرموا حاجة ابدا، ما عندهمش زبالة
وعشان كده، خربوا بيت الناس الوحيدين اللي بيعملوا حاجة عدلة في البلد دي وجابوا لهم شركة ايطالية المفروض اصلا تتعلم من الزبالين بتوعنا ازاي الشاطرة تغزل برجل حمار
-------
طبعا الزبالين مش مهمين، وخراب بيوتهم مش مهم، عشان مش عاملين شعرهم زبايكي ولا لابسين كالفين كلاين ولا نسوانهم مزز  

10 comments:

حلم بيعافر said...

العيب مش فى المصرى.العيب فى الحكام

حلم بيعافر said...

على فكرة لو كانوا سابوا الخنازير كانت ممكن تبقى مصيبة
والخنازير تموت احسن ماحنا يجيلنا انفلونزا ونموت

ســـــاره said...

حلم بيعافر

طيب لو كانوا نقلوا الخنازير للصحرا وبعدوها عن المدن بأميال..هل برضه كان ممكن تبقى نصيبه؟

اللي حصل تهور وبيدل على حالة هلع انتابت الصحة من غير تفكير ولا اي خطة مدروسة ..لأنهم خافوا انهم مايكونوش قد المسؤولية في حالة انتشار المرض ..فقالوا نقطع عرق ونسيح دم ونخلص..بس ده تصرف غير مسؤول ابداااا

في الدول المتقدمه ماعندهمش زريبة او حظيرة او اي حاجه من النوع ده داخل المدن..كلها تبقى في مزارع بعيده عن المدن انما احنا في الدول العربية ماشاء الله علينا بنحب نعيش ونتعايش مع كل الكائنات الحية ولما تحصل مصيبة نقول ابادة جماعية !!دايما بنحب المختصر المفيد

Love-Guru said...

و احنا برضه الدولة الرائدة في العالم حيث يتربي الخنازير علي القمامة. و اظهرت الفيديوهات التليفزيونية بكل وضوح السلام الاجتماعي بين فصائل الحيوانات المختلفة حيث اجتمعت الخنازير مع الفراخ مع الحمير و ايضا الجاموس و البقر و المعيز علي مائدة الزبالة اليومية . فهل هذا هو الريسيكل المطلوب المحافظة عليه؟
ان تنمية عشوائيات جمع الفمامة و استحداث وسائل و طرق تربية الخنازير وفق المعايير الصحية المتفق عليها دوليا هو الخطوة الصحيحة التي تأخر الاخذ بها بسبب ضغوط امبراطورية الزبالة. حتي جمع الزبالة نفسه لابد ان يتطور اذا اردنا مجتمعا خالي من الامراض. و بدلا من البكاء علي الخنازير التي قتلت يجب ان تنشط الجمعيات الاهلية بدورها في تنمية هذه العشوائيات و ايجاد بدائل لاهلها فسكان العشوائيات اهم من الخنازير و اموال ال سي اي ايه المتدفقة علي الجمعيات غير الرسمية يجب ان توجه لهؤلاء في العشوائيات بدلا من تسخيرها لاثارة الفتن السياسية و الطائفية

الشعب لابد له من حكومه تشكمه said...

بس على فكره منظمه الصحه العالميه كانت طلعت تصريح وقالت فيه بالحرف انهم اكتشفوا ان الخنازير مصدر لا يستهان به ودهبعد دراسات اجروها ,يعنى ممكن فعلا تكون الخطوه اللى مصر عملتها دى فى صالحنا..
وكمان متنسيش حاجه مهمه جدااا ان كل الحالات اللى ظهرت كلها فى المطار يعنى قادمون من الخارج والولد المصرى اللى ظهرت عليخ الاعراض برضه بيشتغل فى فندق مع الاجانب.

Ramy Wasel said...

احنا شعب من الرواد
فى اى حاجه طبعا
واحنا جايبين الطلاينه يلموا الزباله
نوع من الانزحه ليس الا
وكل واحد ايطالى بيلم زباله عندنا
تقوله انتى جايه اشتغلى ايه
وبفلوسى بذلك يا كلب

overdose said...

ازاي مصر ليها الريادة؟؟؟؟

ماقلنا مفيش حاجة اصلا اسمها انفلونزا خنازير

دا مجرد ملعوب من منظمة الصحة وشركة روش بتاعة التاميفلو

دي انلفونزا عادية عشان كده في ناس بتخف منها لوحدها


طبعا الكلام مش عاجب

lebneneyeh said...

مرحبا
كيفك نوارة ؟ انا وحدة من لبنان بس عايشة بالامارات
و كل يوم بفتح مدونتك اكتر من مرة بس ما كنت علّق. و بس عملت اكاونت و سرت علّق ما لقيت اي ترحيب منكم فا انا بعتزر يمكن انتو بس بتفضلو المصريين بالمدونة . بس مع اني من اشد المعجبين فيكي و بالوالدة الكريمة فا بس بدي اعتذر عن دخولي بيناتكن و سامحيني .بس رح ضلني اقرأ مدونتك

Che_wildwing said...

العيب طبعا في الغلابة
كانوا ممكن يشوفوا حل بسيط للموضوع ده
وياكلوا هما من الزبالة بدل الخنازير ...ولا هي أول مرة يعني
الشعب اتمرع بصحيح

أكون أو لا أكون said...

لا حول ولا قوة إلا بالله... هي حتى الزباله عايزين يخصخصوها...؟