Tuesday 30 June 2009

التزامات

بعد مدة طويلة من "اتفاق فتح وحماس لبدء الحوار بشأن الوفاق الوطني" و"تعطل الاتفاق بين فتح وحماس لبدء الحوار بشأن الوفاق الوطني" و"حماس تتهم فتح بتعطيل الاتفاق لبدء الحوار بشأن الوفاق الوطني" و"فتح تتهم حماس بالمماطلة في تنفيذ الاتفاق ببدء الحوار بشأن الوفاق الوطني"
اخييييييييييييييييييرا
الاتفاق تم، زغردوا يا عيال
الحممممد لله، اتفقوا انهم يقعدوا يتكلموا بشأن الوفاق الوطني، واول حاجة اتكلموا فيها: سيب وانا اسيب
فتح كانت قابضة على عناصر حماس، قوم حماس قالت: وانا صغيرة؟ انا كمان ح اقبض على عناصر فتح، جات فتح قالت لحماس هاتي العيال اللي عندك، قامت حماس قالت لها: ماهو انا اخدت العيال دي عشان انت اصلا واخدة عيالي، هاتي عيالي وانا اديكي عيالك، قام فتح قالت لهم هي بقت كده؟ قام حماس قالت لها كده وابو كده
قام مصر طبعا ام اللجان كلها، قالت لهم طب نعقد لجنة منبثقة عن اللجنة الاولانية ونتكلم اصل فتح كده شكلها في قلبها كلام ومش عارفة تقوله
وعقدوا اللجنة المنبثقة عن اللجنة الفرعية المنبثقة عن لجنة مدخل صلاح سالم من عند العباسية بعد الساعة تلاتة الصبح وما تتغباش على الظابط عشان لو معاك سبع رخص مش ح يسيبك وانت مش وش بهدلة
قوووووووووووووووم فتح تقول ايه اللجمة دهين؟ احمد قريع قال لهم في وشهم، وحتى الاخوة المصريين قاعدين وسمعوا الكلام بودانهم: لا، احنا مش ح نفرج على عناصر حماس، اصل احنا علينا التزامات تجاه اسرائيل والمجتمع الدولي وفقا لخارطة الطريق
طب يا عم فتح، لما انت متجوز ومستقر في حياتك، جاي تخطب على مراتك ليه؟ وكمان عايز تتجوز حماس مسيار عرفي وشارط عليها ما تخلفش عشان ام العيال ما تحسش بحاجة؟ هي بايرة؟ ده حتى قعدة الخزانة ولا جوازة الندامة
التزامات ايه اللي لفتح تجاه اسرائيل وعلى اساسها قابضة على فلسطينيين زيها ومش عايزة تفرج عنهم وغتاتة كده بتقول لحماس افرجي عن اللي عندك؟ هم اكلوا ايه عشان يشربوا عليه مية؟ مش الالتزامات دي بيبقى قصادها مقابل؟ ايه المقابل؟ ان يبقى اسمكوا سلطة؟ على ايه؟ هو انتوا عندكوا بلد عشان يبقى لكوا سلطة؟ وللا هي وجاهة كده زي لقب سير في انجلترا؟
واسامة حمدان طالع في الجزيرة رافع حواجبه ومبحلق عينيه من الذهول وبيقول: وقالوا لنا كده في وشنا، وربنا كان المصريين قاعدين حتى اسألوهم اهم لا من ديني ولا من دينكوا، اسألوهم، قالوها كده، لدينا التزامات تجاه اسرائيل والمجتمع الدولي عشان كده مضطرين نقبض عليكوا، قالوا كده، قالوها والله، اي والله قالوا كده
وفضل ياعيني يقول قالوها قالوا قالوها قالوا لحد ما الكاميرا مان قفل عليه
دلوقت بقى اتفقت حماس وفتح على انهم يتفقوا يقعدوا مع بعض عشان يتفقوا على الوفاق ويأجلوا ملف المعتقلين لحد ما يتوصلوا للوفاق الوطني وبعدها يبقى يحلها حلال
والعيال عندي العيال عندك اهم يتعشوا عندي ويتغدوا عندك هي فرقت؟ ده احنا زي ما نكون  اخوات والله واكتر
طب ده معزة حماس عند فتح من نفس معزة اسرائيل ويمكن اكتر والله
وبعدين عباس ما رضيش يقابل الدويك دي حاجات بسيطة، يعني هو الدويك ح يروح فين؟ وما يقعدش بقى يقول: بيقابل اولمرت ومش عايز يقابلني، احنا ح نبتدي الغيرة من دلوقت؟ الراجل ما ضحكش عليكوا، اه، عنده بيت وعيال والالتزامات، والمفروض بقى انتوا تراعوا حاجة زي دي وهو له اربعة، ح تضايقوه ح يروح يتفق مع الاي ار ايه ولا يهمه انشالله يارب يتفق مع التاميل، والف فصيل سياسي يتمناه وهو بظروفه دي
وعلى راي اللي قال: كنا عايزين دولة فلسطينية ربنا كرمنا وادانا اتنين في بطن واحدة
سونة وسنسن

10 comments:

Love-Guru said...

و مش بس كده... ده كمان ثمانية فصائل فلسطينية تبلغ مصر أنها غير ملزمة بنتائج حوار فتح وحماس. يعني اصبح عندنا عشرة فلسطين
http://www.shorouknews.com/ContentData.aspx?id=66512

Abo-alela Junior said...

هما إتفقوا قبل كده

في 2006 ... و ضربوا بالإتفاق ده عرض الحائط

مش عارف الحل ممكن يكون إيه بالضبط
بس أظن إن حماس وفتح لازم كل طرف منهم يتنازل شوية علشان يشكلوا حكومة وحدة وطنية

علي الأقل يبقي عندهم حكومة واحدة

بس الفكرة إن فيه عناصر في فتح عاملين زي السوس .. بيبوظوا المقاومة من تحت لتحت
و فيه فتحاوية قبل كده قالوا إن العناصر دول عار علي الحركة
و حماس متمسكة بالسلطة و مش عاوزة تسيب وزارة واحدة

ربنا مع الوسطاء بجد .. ده صلح الصعايدة ألطف من كده

مواطن مصري said...

منها ل الله الي كانت السبب حماس هي الي بدأت الانشقاق

و صدق مقولة الراحل علاء ولي الدين لما

قال لما احب اتكلم شعب فلسطكين اتكلم مع مين

mido said...

الحكومة الفلسطينية المقالة: السجون في غزة خالية من المعتقلين السياسيين

مهندس مصري بيحب مصر said...

طول ما عباس الخاين في السلطة هو و شلته الوسخة يبقى عمرهم ما حيتفقوا
لإن أي إتفاق وطني يحقق مصالح فتح و حماس و فلسطين ككل إسرائيل و امريكا مش حيرضوا عنه
و بالتالي عباس مهما توصل لإتفاقات حيرجع يفسخها تاني بضغط إسرائيلي امريكي
يبقى لازمته إيه ؟

إذا كان الصحافة الأمريكية نشرت أوامر كوندليزا رايس لعباس بضرورة تبويظ إتفاق مكة و قالت له يا إحنا و إسرائيل يا حماس
و هو طبعاً إختارهم

مش عارف إيه الجديد بس ؟

Kalimalhus said...

نوارة..
-------
عايزك تقرى البوست ده على
Moments of Gaza
http://gaza08.blogspot.com/2009/06/gates-to-hell-what-egyptian-regime-did.html?showComment=1246383818831#c3819241582136097223

Unknown said...

وانا اضم صوتي لصوتك يا مواطن

منها لله حماس

حد في الدنيا يرشح نفسه في الانتخابات
لا وايه؟
وكمان ينجح؟

Kalimalhus said...

مش هاقول منهل لله بس حماس أخطأت عندما دخلت فى عملية سياسية لا تقبل شروطها.. كأنها فريق تدرب للعب كرة القدم ثم تقدم للعب فى دورى الكرة الطائرة لمجرد أنه رأى أن فرصته فى الفوز مضمونة لأسباب لا علاقة لها بقواعد اللعبة و منها شعبيته كفريق كرة قدم متميز..

إكتساب نقاط فى جدول الدورى الخطأ لا يحتسب و ربما يغرى ببعض الإلتزام بقواعد اللعبة الجديدة فى سبيل مكاسب أكثر.. و إلا فلماذا تبدى حماس اليوم مرونة فى سبيل كسب كأس الإعتراف الدولى؟

لقد أثبتت تجارب منظمة التحرير الفلسطينية من قبل أن إكتساب الإعتراف عربيا أو دوليا لم يخدم القضية و لم يستتبعه إلا مزيد من القيود التى تتعارض مع مصالح الشعب الفلسطينى.. أهم ماتفقده عندما تكتسب الشرعية الدولية و التى هى أصلا لفظ لا معنى له فى ذاته هو أنك تتخلى عن حق المقاومة لأنه لا يمكنك أن تتفاوض و تقاتل فى نفس الوقت أو هكذا هى القاعدة السائدة اليوم..

حسن على said...

خبر صحفى مثالى : ياألهى...ان محمود عباس حامل!!!فمن الذى فعلها؟؟؟؟؟؟؟؟؟ خبر قدبم نسبيا... لكنة جديد ايضا

Dr. Ahmed Wagih said...

الفرق بين رام الله و غزة هو الفرق بين فتح وحماس... الفرق بين التحضر والأنغلاق، الحياة والموت، حماس مش مسئولة لوحدها ولكنها السبب الرئيسي في مصيبة غزة بسبب عدم النضج في القرارات السياسية.