Saturday 13 June 2009

امال انا لما قلت كده اتريقتوا عليا ليه؟

حلو المحيا طالع لنا في الجزيرة يقول انا مبسوط من حالة الجدل العنيف اللي موجودة في ايران، ويبدو ان خطابي الى العالم الاسلامي قد ارسل برسائل ايجابية ويبدو ان "الناس" عايزة تغيير (يا حبيبي دايما يتكلم باسم الناس مش عارفة ليه) وراح رازعنا البق المتين: وما ينطبق على لبنان ينطبق على ايران
التقارير الاخبارية في الفضائيات الامريكية بتتكلم على اوباما ايفيكت بعد ما "حزب الله" خسر الانتخابات
مع ان حزب الله ما خسرش الانتخابات، ده تحالف المعارضة هو اللي خسر، وحزب الله الفالح الوحيد اللي فيهم، المهم، وقالوا ان اوباما هو اللي خللا اللبنانيين ينتخبوا اربعتاشر اذار
(الاخوة في لبنان: طبعا ده شأن داخلي، وبصراحة انا ما كنتش عايزة المعارضة تكسب عشان ما تتحطش في موقف وحش ولا في مواجهة مع الواد ده بالذات، دي ناس بتعمل ازمة دبلوماسية عشان مش عايزة تكدب لان الكدب بيودي النار، يروحوا فين دول في اوباما؟ بس اسمحوا لي اقول لكوا: الله يكسفكوا، كفاية يعني لما امريكا تقول: غيرنا مسار الانتخابات، ده حتى جون ستيوارد اتريق)
طب امال لما انا قلت كده هزأتوني ليه؟ يعني لازم رئيس الولايات المتحدة هو اللي يقول لكوا الكلمتين دول عشان تقتنعوا؟ حتى في الاراء زي القرع تمدوا لبرة؟ طب يزيد عني في ايه سي اوباما ده؟ ده حتى من اسيوط
حاجة محرجة فعلا، يعني انا اه اول ما عرفت النتيجة بتاعة انتخابات لبنان قلت ده خطاب اوباما، بس ما تتقالش، انا اقول وانتوا تقولوا لي انت غلطانة غلطانة غلطانة وكدهون يعني، لكن مش يطلع هو يقولها لنا في وشنا كده، وبعدين انا كان عندي امل اننا ما نبقاش بالهيافة دي
زي مثلا املي في ان مش كل الناس هنا في مصر يتهبلوا على اوبابا زي اللي اتهبلوا عليه في الخطبة وفضحونا وخلوا الست بتاعة فوكس نيوز تقول:
they shouted we love you Obama? I don't understand
معناتو ايه الحديت الماصخ ده؟ الناس تقول علينا ايه؟
وواحد يقول لي: هو في اصله انسان من جواه، ولو ما كانش ابن حلال ما كانش وصل للمكانة دي، وهو مسلم، بس امه يهودية، وربنا يستر عليه من اليهود احسن يقتلوه

وكان عندي امل ان يبقى فيه اسباب تانية لنتائج الانتخابات اللبنانية على الاقل تطرح في الاعلام ما نتفضحش الفضيحة دي
انا اصلي زي مسعود، باقول مافيش فايدة وانا لسة عندي امل في محمد صبحي
طبعا فاتن الدنيا وحسناء الزمان بعد ما الناس ريلت عليه هنا في مصر، والانتخابات اللبنانية اتغيرت باشارة من صباعه
قام افتكر نفسه الامبراطور الروماني بجد، واتهبل في مخه وطلع يقول ان شاء الله اللي حصل في لبنان ح يحصل في ايران انا اصلي اخدتهم على جنب وكلمتهم كلمتين في الصميم.. ما ضربتهمش.. انا بس عرفتهم غلطهم
طب اهو احمد نجاتي على راي ام زينب نجح اهو يا اوباما احسن احسن عشان تتصدم في مشاعرينك وتنهار على الكرسي يا مرسي، بس كده الراجل ح يتأكد تماما ان المشكلة في العرب بس، اصل المشكلة الاخرى انه نجح بنسبة خمسة وستين في المية
ازاي ما اخدش تسعة وتسعين في المية انا مش فاهمة؟ خايب على فكرة، وعامل لي مهندس وهو جايب خمسة وستين في المية، دي يادوبك تدخله معهد القطن، يا ساتر على الكوسة، عشان رئيس جمهورية عملوه مهندس وهو جايب خمسة وستين في المية 
الملاحظ، كما هو وارد في فيديو جون ستيوارد، ان اوروبا وايران ما اتأثروش بنحنحة ابيه اوبابا، وخلي الانتخابات الاسرائيلية على جنب عشان دي انتخابات سلطانيات، قال الولية تنجح قوم ليبرمان يفضي سلطانيته في سلطانية زميله ويقول لها امشي يا بت قوم سبحان الله يصبح على بيبي الصبح ناجح بعد ما كان ساقط، ده ربنا له حاجات يا جدع
انا مش عايزة حد يتضايق، ولا يحاول يعيش المود بتاع الانتخابات زي ما فنون بتقول، لعلمكوا، الانتخابات دي عطلة، وبتعمل زحمة في الشوارع، وممكن العربيات تسخن، واحنا عندنا تحرشات مافيش داعي للزحمة، وبعدين قدر ماسورة طفحت، نعمل ايه؟ ثم ان الدنيا حر، ايه اللي ينزلنا احنا من البيت ونروح مصالح حكومية وانتوا عارفين بقى غلاسة الموظفين، وريحة عرق الناس، ييجي واحد غلس يقول لي: نعملها في الشتا، اقول له ولما الدنيا تمطر يا فالح؟ طب وعلى ايه وجع الدماغ ده كله؟
انت قاعد في بيتك، مرتاح، التلفزيون، التكييف، قرطاس اللب، النسكافية، تتفرج على انتخابات الناس ومبسوط واهي مشاركة وجدانية، زهقت تقلب على فيلم، او ماتش، وبعد ما الانتخابات تخلص تقعد تحلل بول على انتخابات الناس
ولا تنزل، ولا تتعب نفسك، ولا تروح تطلع بطاقة انتخابية، وتضييع وقتك، ده يوم الحكومة بسنة، والواحد عشان يوصل شغله بياخد ساعة في الطريق اقل حاجة، ولو عندك وقت فاضي اقعد مع العيال، فسحهم، نام، انت شقيان، انما تقول لي انتخابات ووش على الفاضي؟ يعني هو اللي ح يترشح مش بني ادم زي بقية البني ادمين؟ زايدين رجل وللا ايد؟ اهي كلها خلقة ربنا، اقعد يا شيخ اقعد، ساعة الحظ ما تتعوضش

13 comments:

د. أحمد الحاج said...

see this link please
http://www.youtube.com/watch?v=8C5s0pIGQog

دودو said...

يانوارة يابنتى

انتى بتدنى فى مالطة

احنا اكتفينا بالفرجة على غيرنا

نعمة
يعنى لايبقى اكل ولابحلقة

ثم انتى ازاى منتظرة مننا كمصريين بعد الخبرات اللى اكتسبناها

ان احنا ننزل ننتخب

احنا شعب ذكى

عارفين ان النتائج محسومة

يبقى نتعب نفسنا لية وننزل ونطلع

وكمان كلنا عارفين ما هو جزاء

كل من تسول لة نفسة الامارة بالسوء

انة مجرد يعدى جنب لجنة انتخابية

ودى انا شوفتها بنفسى

وبما اننا شعب فكيك
فاحنا بنجيب من الاخر ونقعد فى بيوتنا بكرامتنا

Kalimalhus said...

أيون.. كان لازم نهزأك لما قلتى كده لأن حضرتك بتفهمى .. لكن جنابه صدق نفسه و بقى فاكر إنه مبعوث العدالة الإلهية إلى العالم و إنه نبى آخر الزمان اللى البشر كلها أمنت بيه..

و الداهية إن فيه ناس هنا صدقت بكده .. و عدد كبير من الجرنالجية الأراذل قاعدين يغنولنا: إن فاتك أو باما .. ما تبقاش تقول يا ماما

Kalimalhus said...

موسوي على موقعه : نتيجة الإنتخابات تم تزويرها ولن أستسلم لهذا التلاعب..

(وائل عباس على التويتر)..

إحنا فينا من كده!!!
هههههههههههههههههههه

يا شماتة مواطن فينا..

أهو دلوقت هيهرينا.. شوفتو أهى مزورة..

و بعدين مش بعيد دلوقت يبقى فى ناس تقولك إيران ستشهد ثورة برتقالية زى بتاعة أوكرانيا كده..

كويس إن الإيرانيين ما يعرفوش البرتقانى بتاع أوكرانيا .. يعرفو البرتقانى اللبنانى بس..

Unknown said...

هو مش بكيف موسوي ولا نجاد
الانتخابات مراقبة دوليا
واللجنة هي اللي تقرر

mido said...

مهندس حر

هو انت كنت متخيل ان شعبية موسوى

اكبر من شعبية

نجاد؟

Kalimalhus said...

ميدو
----
أنا مش متخيل أى حاجة..

كل اللى أقد أقولهولك إن ماحدش فينا عنده صورة كاملة و حقيقية عن طبيعة الوضع فى إيران و مش لازم لا نصدق الجموع اللى بنشوفها فى خطب نجاد و لا الجماهير اللى فى المظاهرات دلوقت..

صندوق الإنتخابات لو فعلا نضيف يبقى هو المعبر الحقيقى عن شعبية ده أو ده..

برضه لازم نخرج أراءنا إحنا بره الموضوع .. لأن المواطن الإيرانى عنده هموم تانية غير المواجهة مع أمريكا و غير القضية الفليسطينية ..

mido said...

فى مرشح فى الدنيا يطلع بعد قفل

الصناديق بساعة و يقول انا كسبت و

بفرق كبير ؟!!


يا أخى

مواطن مصري said...

على فكرة بيقولو ان فية احداث شغب في ايران

و ضرب نار و حركات

بس بردو جة اصلاحي راح محافظ المرشد هو من يسيطر و ليس رئيس

Kalimalhus said...

الإدارة الأمريكية تشكك فى نتائج الإنتخابات الإيرانية
http://www.foxnews.com/politics/2009/06/13/official-obama-administration-skeptical-irans-election-results/

Kalimalhus said...

شريف منير بيقولك إنه قال باحبك يا أوباما من قلبه..
http://www.shorouknews.com/ContentData.aspx?id=55060

Kalimalhus said...

ميدو
----
أنا مش مصدق موسوى لكن فى النهاية ما أقدرش أحكم على حاجة معرفهاش..

و تانى إحنا لينا الوجه الخارجى للسياسة الإيرانية أما شأنهم الداخلى فمش لازم نطلق عليه أحكام بدون أساس ..

و تانى إحنا مالناش مصلحة لأن ثوابت السياسة الإيرانية بيتحكم فيها مؤسسات تانية غير الرئيس.. يعنى نجاد أو موسوى ما يفرقش بالنسبة لينا..

لكن إن كنا بنعتبر نفسنا أصدقاء للشعب الإيرانى فيبقى نتمنى لهم الإستقرار و إن إرادتهم تحترم .. أقله يمكن نتعدى منهم و ألا إحنا ما بنعرفش غير الأنفلوانزا اللى بتيجى من أمريكا..

Anonymous said...

أنا سمعته بيقول إن خطابه فى القاهرة عمل تأثير
و قال كده فى بداية التصويت
أنا اللى مش فاهمة تأثير إيه فى يومين
و ايران قبل كده انتخبت تسع مرات و صعد فيها اصلاحيين و محافظين
يعنى محدش منتظر يقحم خطابه فى كل حاجة
بكرة اى حاجة هتحصل هيطلع يبتدى خطابه بالجملة دى و بعدين يكمل تعليقه