Sunday 21 June 2009

الفتنة مشتعلة بارك الله فيمن اخمدها




تحديث:
تلاتة بالله العظيم فيه ريحة نتنة مالية الدنيا
اللنك ده نزله ساندمانكي على التويتر واللنك بيقول ان الصورة اللي جوة دي بتاعة طفل ايراني قتله الباسيج!
الصورة لطفل في غزة وموجودة على الفيديو ده، معلش استحملوا تامر حسني شوية، والفيديو بقاله ست شهور
معناه ايه الكلام ده؟
معناه ايه؟ حد ما يكونش بيشك في صوابع رجليه زيي يقول لي معناه ايه؟
اللي مش قادر يستحمل تامر حسني الصورة في الدقيقة 4:31

ما ينفعش كده، تحت اي بند واي ظرف، سواء الباسيج هم اللي عملوا كده زي ما اللي منزل الفيديو بيقول، او ناس مندسة عشان تعمل وقيعة، كل طرف بيقول على الطرف التاني بيضرب في المليان عشان يلبس غيره مصيبة
ايا كان
الطرفين من الناس انا محترماهم
والطرفين من السلطة انا مش محترماهم
انا مش مقتنعة ولو بنسبة واحد في المية ان الانتخابات دي اتزورت، من الاول كان باين انها مش متزورة، من اول ما موسوي البسوس ده طلع من قبل تقفيل الصناديق يقول: انا نجحت ولو ما نجحتش يبقى فيه تزوير
مرورا بانه ينزل الناس الشارع قبل ما يقدم تظلم
وانتهاء بان لما التظلم بتاعه يتقبل يقوم ما يحضرش اللجنة
لو عنده ذرة شك ان فيه تزوير حقيقي كان حضر
ولو الفريق التاني عنده ذرة شك ان فيه تزوير كان تحايل على قبول الطعن
بس في النهاية اللي نزلوا الشارع بتصور ان فيه تزوير ومش قابلينه او اللي نزلوا الشارع بتصور ان فيه تدخل اجنبي ومش قابلينه، الاتنين محترمين
ناس من المتظاهرين ماتوا، وناس من الباسيج ماتوا، وتفجير انتحاري في مرقد الامام الخوميني مش ممكن يكون ايراني هو اللي عمله
ده عند ام لالو، لان الايراني اللي مش بيحب الخوميني مش ح يعمل عملية انتحارية، والايراني اللي عنده استعداد يفجر نفسه مش ح يفجر مرقد الخوميني ده يفجر نفسه في اللي يفكر انه يئذي مرقد الخوميني
اللي مش محترم هو اللي حركهم، كفاية، كفاااااااية، كفاااااااااااااااااية
ام الولد هي اللي تتخلى عنه
تاني
ام الولد هي اللي تتخلى عنه عشان ما يتقصمش نصين
ومش باين ابدا ان موسوي ده ام الولد
اللي ناصروا موسوي قالوا كلام كتير معاهم حق فيه بخصوص الحريات وان نجاد بينفرد برأيه مع ان له مستشارين كتير وان لسانه طويل وادا مبرر لاسرائيل انها تتسلح
وقالوا كلام كتير مقرف، زي انه بيلبس مبهدل وعرهم وسط الناس، وان اللي انتخبوه مجموعة من الفلاحين الجهلا وانهم مش ممكن يقبلوا ان الجهلة يتحكموا في مصايرهم، وانهم عايزين اوباما يتدخل
بس انا والله ما كنتش اعرف ان العيال السيس كتير كده في ايران، ده معناه ان مستوى المعيشة مرتفع
و"الفلاحين الجهلا" طلعوا في مناصرة نجاد وقالوا كلام كتير لهم حق فيه زي انهم مش عايزين تدخل اجنبي، وان مافيش حد في الدنيا يخسر في الانتخابات يقوم يقلب الدنيا بالطريقة دي، وانهم ما قدموش اي دليل واحد على تزوير الانتخابات ولما جات لهم الفرصة اتهربوا
وقالوا كلام برضه مقرف، زي: اعدمووووووووووووووهم دول خونة
الناس لها حق، دايما الناس لها حق اذا كان دول او دول، وايوة فيه ناس اندست وامريكا واوروبا لعبوا لعب وسخ وقال ايه خايفين على الديمقراطية الايرانية وهم بيدفعوا مليارات للاوساخ اللي حاكمينا عشان يخلوهم على قلبنا
 وايوة العملااااااااااء بالفم المليان مبرتعين ومنطلقين وبيشتغلوا على التويتر والنت بالزمبلك وعلى وشها تنور على صدرها تنور، ودول اقل اهمية لان اصلا من الاول متعلم عليهم
ومافيش حد في ايده يحل غير يا نجاد يا موسوي، كفاية
واضح ان موسوي مش عايز يحل
نجاد ناجح في الانتخابات فعلا، وهو رئيس ايران الفعلي، كل المؤشرات بتقول كده، واللي بيشككوا في الانتخابات ما عملوش ولا خطوة تقول انهم واثقين من نفسهم، وعشان كده لازم يتنحى، عشان يحافظ على البلد، مدام هو الرئيس الفعلي اللي الناس اختارته تبقى مهمته يحافظ على البلد، يستنى اعادة الفرز وبعد النتيجة يتنحى بعد خطاب محترم
انا ماليش لا في دول ولا في دول لانه فعلا شأن ايراني داخلي، بس انا باقول اللي يخلصني من ربنا
اللي فيهم خايف على بلده اكتر ووطني حقيقي يمشي واللي ح يمشي الاول هو اللي ح يبقى انتصر مش اللي ح يتمسك ويقعد، لان بالشكل ده ماحدش فيهم ح يقعد
لا نجاد ولا موسوي
(معلش انا بصراحة نفسي اتف عليه موسوي ده بيفكرني بناس كده عندنا اتعودوا ينزلوا الناس الشوارع عشان هم يتعمل لهم دعاية)
بس كفاية، دي ارواح ناس، وامن قومي، ولو فضل كل واحد يشد من ناحية مش ح يفضل لهم بلد يشدوها
اللي معاه الحق هو اللي ينقذ البلد
كفاية
ما يتعلموا من نصر الله، يا عيني يابني، ده كان على كده مفروض يرمي نفسه من الشباك على كل اللي شافه
اهو بالانجليزي
The REAL mother is the one who relinquishes the baby to save him from Solomon's knife
اكتبها لهم بالفارسي؟ ما باعرفش فارسي اللي بيعرف فارسي يترجمها
بس دي ترجمة جوجل
مادر حقیقی ، کسی است که ترک کردن کودک را به او را از چاقو سلیمان ذخیره شده است

16 comments:

حسن على said...

المترحم بتاع جوجل دة راجل قليل الادب جدا ووقح... ازاى يقول "سليمان ذخيرة" وش كدة؟؟؟ طب يخليعا "سلمان ذخيرة لامؤاخذة" مثلا ...تبقى مبلوعة شوية؟؟؟

Kalimalhus said...

نوارة
-----
عايزين ترجمة للى مكتوب فوق و تحت الصورة عشان نبقى ماليين إيدينا كويس .. و تحديدا إيه التفاصيل اللى قالوها عن الطفلة و أصيبت إزاى ..

يخرب بيت أبو النضال اللى بالشكل ده ولا أيمن نور أيام ماكان فى الوفد..

ahmed samir said...

http://www.almanar.com.lb/NewsSite/NewsDetails.aspx?id=90634

Unknown said...

شوف حد بيترجم فرنصاوي
انا ما تلاقينيش

Unknown said...

حسن علي
هههههههههههههه

أكون أو لا أكون said...

لم أتوقع أن تكون إيران سهله هكذا وتقع في شراك الفتنه...!!!

وفعلا من يهمه مصلحة البلد هو من يتنحى...

أمريكا تعلم أن نجاد عنيد... لا ترده لا تهديدات ولا تظاهرات... لذلك وضعت في طريقه من يواجهه...
وبالنسبه لنجاد التنحي صعب جداً... فهو بمثابة تقديم إيران لأمريكا على طبق من فضه بعد أن كانت حكومه إيران بالمرصاد لكل الخطابات والأوامر الأمريكيه طوال الأربع سنوات الماضيه التي حكم بها نجاد.

أكون أو لا أكون said...

نواره لو عاوزه الترجمه ضروري أنا أتصل على صديقتي الإيرانيه...

mido said...

احيه أنصار نجاد في البلالة و خسروا المعركة الاعلامية و السيبرية بالقاضية و سايبن العسكر

أكون أو لا أكون said...

يا الله يالله يالله...
الفيديو مؤلم... ايه ده... حـــــــــــــــــرام
أنا دلوقت بس شفته... ياربــــــــــــــــي

أكون أو لا أكون said...

والطفل ده من غزه أنا فاكره صورته...

Unknown said...

في الدقيقة 0:08
الطفلة المصابة ملقاة علي الارض غارقة في دماءها و فجأة تفتح عيناها و تتسع نظرتها و تتسمر عينيها الشاخصتين في نظرة مرعبة جعلت شعر جسمي يقف. انها لحظة خروج الروح التي وصفها الحديث الشريف فعندها يتبع بصره روحه. ثم اغمضت عينيها للأبد. انظروا للدقيقة 0:08
ففيها كل عظات الدنيا
انا لله و انا لراجعون

Kalimalhus said...

الفيديو مؤلم للغاية فعلا.. المشكلة أننا تعودنا على التعامل مع أرقام.. 2 قتلوا 2000 ذهبوا ضحية مش عارف إيه.. إلا هى إزاى ذهبوا؟.. همه ذهبوا يشتروا باكو دخان؟.. لكن الواقع إننا نقرأ الأخبار المماثلة و كأنهم فعلا ذهبوا يشتروا باكو دخان..

ضحية واحدة نراها رأى العين تعدل الملايين الذين قرأنا عن مقتلهم..

يظهؤ إن السلطة شيئ وسخ فعلا و حكاية إن الدولة تحتكر حمل السلاح حكاية وسخة برضه.. إبقوا فكرونى لما نعمل الدستور الجديد نحتفظ فيه للمواطنين بحق حمل السلاح زى أمريكا.. عشان لما يبقى فيه مذبحة يبقى الضحايا من الجانبين عل و عسى يبقى ده فيه ردع متبادل..

يلعن أبو خاش الديموقراطية على المظاهرات على عوكل و إبنه (أصل حالف ما ألعنش حاجة غير لما ألحق بيها عوكل و إبنه عشان الثواب)..

أبو عمر - الصارم الحاسم said...

موضوع الطفل لا يصلح تطبيقه في السياسة وفي مصالح بلد كامل...القياس هنا غير متناسب بين الحالتين

ازاي الموضوع فيه ريحة وحشة وازاي يسيب لهم البلد ويمشي

يعني اما اكون عارف ان الموضوع ملعوب فيه ولصالح جهات خارجية اقول عشان احافظ على الطفل اتنحى
؟؟؟

ويسيب البلد لقمة سائغة لمروجي الفتنة وكمان هو عارف ان اهدافهم مشبوهة

راجعي اسلوب تعامل عمر بن الخطاب مع مقدمات هكذا فتن وراجعي الاسلوب اللي اوصى به للاستخلاف

أبو عمر - الصارم الحاسم said...

للاسف
الفيديو ليس لطفل غزة.....فيه اختلاف كبير بين الدقيقة
4:31
والفيديو الايراني

وبعدين اللي في الفيديو الايراني ست مش طفل

Dr. Ahmed Wagih said...

أكتر حاجة مضايقاني في الموضوع هما "الباسيج" وهما زي الأمر بالمعروف والنهي عن المنكر في السعودية!!! دمويين وشايفين ان عندهم توكيل انهم يتحكموا في خلق الله!
يا رب اللي عايز مصر تبقى دينية زي ايران يهفه عقله يسافر يحارب في افغانستان ولا حاجة ويبعد عننا!

Unknown said...

الصارم الحاسم
ابوس رجلك ركز شوية

انا ما قارنتش ما بين الفيديو الايراني اللي البنت المسكينة دي بتموت فيه وما بين فيديو تامر حسني

انا قارنت ما بين الصورة دي

http://www.iran-resist.org/article5440.html

اللي صاحب المدونة بيقول عليها صورة لطفل ايراني مقتول

وما بين الدقيقة 4:31

في الفيديو
هي هي نفس الصورة