Saturday 20 June 2009

وايه دخل المتوتين المصريين والموريتانيين في ايران؟

من لغلوغه ان ما كانت لعبة سي اي ايه على كبير
حد بقى يفهمني، ازاي ناس من مختلف الدول، مش ايرانيين، كلهم تبع مؤسسة واحدة، وكلهم من اصحاب مبدأ: احنا مالنا بغيرنا، اللي يعوزه البيت يحرم على الجامع، احنا بتوع الشأن الداخلي، احنا بتوع الاصلاح الداخلي
فجأتن كلهم بقوا ناشطين ايرانيين ومتضامنين وداخلين معارك، لا وايه، بينقلوا مواعيد المظاهرات والفيديوهات وبيقدموا اقتراحات غاية في العبثية والدموية (طبعا ماهم مش خسرانين حاجة) وبيقابلوا بمنتهى الشراسة اي حد مجرد مش مهتم باللي بيحصل في ايران ومش داعم لانصار موسوي؟
حد يفهمها لي دي
ده مثلا موريتاني
طب الرقاصين بتوعنا وحفظناهم، لكن هي وصلت لموريتانيا كمان؟
وكلهم من نفس المصدر النجس
حد يفهمني بقى
انا بقى بصراحة ما يهمنيش ايران، انا يهمني ان اللي حذرت منه طلع صح
وان فعلا بياخدوا عيالنا فمين عشان يرجعوا يشتغلوا بالزمبلك وعلى وشها تنور على ضهرها تنور
ده لو جايلهم امر عسكري مش ح يعملوا ده كله
ده فيهم ناس كانوا متعاطفين مع نتانياهو، الطم يقولوا الولية اتجننت؟
الا هل بلغت؟
لما تبقوا تلاقوا البلد ولعت وعلى راسنا اوسخ من مبارك ابقوا افتكروني
اصلهم ح يقتلوني اول ما يوصلوا عينة الجلبي والعلاوي 

16 comments:

مواطن مصري said...

فكك من ايران و ام ايران و اتفرجي على دكان شحاتة الي بيحذر من ثورة فقر و جياع في 2014


على فكرة خطبة خامئني كانت تسيس ديني لخدمة نجاد

زي ما الفتوة الي طلع عندنا ايام 6 ابريل بان الخروج عن الحاكم حرام

المهم مورتنيا فيها انقلاب كل يوم الي بيصحى بدري عندهم يبقى رئيس

اشمعنى يعني حسن نصر الله يهاجم مصر و ينتقد النظام

و لما نس تنتقد النظام الايراني تقولي cia

يعني حلال لسيد حسن و حرام على المختلفين مع سياسة ايران؟

فين بقى الديموقراطية
؟

mido said...

الواد بيقول :

My meetings in DC confirm what's already widely known: the US intelligenstia doesn't know how 2 handle

my msg was simple. If u don't support the USA will end up having 2 do what USA already don't want 2 do: military action.

و بيكمل :
ان امريكا عاجلا ام اجلا ستصتدم مع ايران عسكريا بسبب البرنامج النووي

ورأيه :


سقوط النظام يحل المشكلة

Kalimalhus said...

بلاش تبقى متشاءمة قوى كده.. ما فيش أى حد ممكن يجيلك أوسخ من جيمى سيبك من الأب إبنه أوسخ .. بس أى حد مش هتكون ليه نفس القبضة المحكمة على الأمور و هيكون مضطر يقدم بعض الإصلاحات السياسية اللى هيدى حرية فى الحركة..

المهم الناس تكسر تابو التغيير و بالتالى التغيير التانى هيكون أسهل.. ماهو مش هنطلع من تحت ضرس الأمريكان فى خبطة واحدة..

Unknown said...

سسسسسسس

Unknown said...

كنت باقول ايه بقى

كنت باقول موسوي مش عايز ينزل والعيال مصممين ينزلوا
لو انا من نجاد ادي عطلة رسمية واقفل المحلات والمصالح وأأمن الامكان الخطر واسيبهم في الشارع انشالله شهر
عايزين يكسروا بقى يحرقوا يعملوا اللي يعملوه
ما ينزلهمش امن ابدا
ويسمح للاعلام بتغطية المظاهرات عادي
ولو العيال دول داخل فيهم ناس مندسة ومستغلة الموقف ح يبان

والموضوع ح يخلص
بس لو نزل الامن يواجههم يبقى كده بيعلي الاثارة وبيطيح ببلده كلها

Kalimalhus said...

مفيش حاكم فى الدنيا يسيب ناس تعمل مظاهرات من غير ما يأمنها على الأقل.. و لو حصل شغب الأمن لازم يتدخل.. الحكاية مش لعبة و أى حاجة ممكن تتطور..

Unknown said...

التطور المؤذي فعلا ان الامن يصعد ويضرب الناس ويموتهم

Unknown said...

انا بعت لحضرتك تعليق
وصل و لا ايه ظروفه

انا عارف حضرتك مش بتحذفى تعليقات
بس التعليق انا قاللى انه وصل و فى انتظار الأبروفال

مش عارف بقى
قوليلى ممكن ابعته تانى

Kalimalhus said...

و التطور فى الإتجاه التانى إن الشغب يتحول إلى مواجهات مع أنصار نجاد اللى مش هيقدروا يسكتوا و يسيبوا التانيين يبرطعوا فى البلد..

على العموم موسوى طلع ذكى لأنه سحب غطاؤه عن المتظاهرين.. و بالتالى جزء كبير غالبا مش هينزل بكرة.. و اللى هينزلوا هيبقوا موضع شك و كأنهم بيؤكدوا إنهم ضد النظام ككل و ده أمر غير مقبول من الأغلبية..

Unknown said...

ودي ابداعات الاخ الموريتاني

http://twitter.com/weddady/status/2246136532

http://twitter.com/weddady/status/2246090479

http://twitter.com/weddady/status/2245803792

واليكم فضايحه بقى

http://twitter.com/weddady/status/2245717783

والنبي ح يضربوا نفسهم ميت جزمة انهم قابلوه وللا كلموه الفضحي

http://twitter.com/weddady/status/2240324787

http://twitter.com/weddady/status/2232812351

http://twitter.com/weddady/status/2229927791

واسمعوا منه الاخبار بقى عشان ده مصدر موسوء
http://twitter.com/weddady/status/2228754115

حد يقول لي ان اللي بيحصل ده طبيعي
بس لو راجل يقول لي الكلام ده في وشي ويتحمل اللي ح يجرا له بعدها

انا ما اقدرش استحمل حاجة زي دي تحصل في مصر

lebneneyeh said...

نوارة هيدي للمرة الخامسة او اكتر تقريبا بعلق و ما يلاقي اي ترحيب فيني بالمدونة مع اني جديدة و من المعجبين بكناباتك بسيطة مش قصة.

بس بدي قول شغلي انو انتي بتحرقي بدمك عشات اتفهمي الناس انو امريكا و اسرائيل ورا يللي عم بصير بايران مع انو ما بيخفى على احد انو مش بس هيدي الاحداث شغل امريكا و اسرائيل اذا بتقرأي من كتب الصهاينة بروتوكولات صهيون و غيرون بتشوفي انو ملزمين يعملوا اي شي بس للحفاظ على كيانهم الغاصب .يللي بدي قولو انو اي مصيبة يتصير بالعالم سببها اسرائيل بشكل مباشر او ساعات غير مباشر .

بس بدي قول كلمة لا مواطن انو انت ما زاعجك الا ايران و السيد حسن ؟ بعدين ممكن تشرحلي بشو كانت كلمة السيد القائد تسيس ديني ؟ انا بقلك لانو حكى الحق و حاول يهدي النفوس و يهدي الوضع. بس عن جد يللي بيمشي بالحق و فيما يرضي الله منحسس منو بصير مش منيح و منلفقلو الف شغلي تشوه صورتو .يا ريت كل يللي بعلقو بالعاطل على السيد حسن او سماحة القائد الخامنئي يعملو قد ربع يللي هالرجلين بيعملو .

الله يحفظلنا هالرجلين العظيمين تيكملو المسيرة بأذن الله.

و شكرا يا نوارة و اسفة عالازعاج سامحيني شكل المدونة هون بس للمصريين و انا جيت دخيلة عليكن سامحوني و يعطيكن العافية.

عصفور المدينة said...

حقيقة أيضا أستعجب من اهتمامك الشديد بالشأن النجادي كما عبت عليهم اهتمامهم بالشأن الموسوي

Anonymous said...

ايه بس اللي مدايقك استاذه نواره
انا سمعت خطبه الخمينئي وهو قال ان في ناس بتستغل الاحداث للعبث بالنظام واخلال الامن

وبغض النظر ان دي اطول خطبه جمعه سمعتها في حياتي
وبغض النظر من ان موضوع قوه خارجيه ده شعار مكرر لحكومات كثيره
لكن برضه ايران مستهدفه الى حد كبير ومفيش استبعاد لشيء

بس هو انصف كل المعارضين وقال انهم خدموا القضيه والثوره ...... وده اللي مخليني مستغربه الاحداث

لكن صعب يسيب مظاهرات من غير امن
بس ممكن يدي اوامر بعدم الصددام العنيف
او يعملوا زي عندنا ويلبسوا مدني ويدخلوا وسط المظاهرات ويعملوا اللي عايزينه بقا ........ لكن لازم هيكون في تواجد امني وضحايا مع الاسف

حسن على said...

الظاهر حيبقى من لغلوغة فعلا... فاللعبة دى بتحصل باستمرار ومن زمان ... واحد عاوز جرين كارد او فلوس سهلة - على طريقة " جيف ايت ون سيجارت يا جونى" وحمار مش فاهم حاجة بيعمل قرد ويوريهم عجين الفلاحة ونوم العازب لربما يحصل على الكارت والفلوس ايضا . هؤلاء بيحصل لهم برمجة من برة حقوق انسان أوحفاظ على البيئة وفى الحقيقة "بالزمبلك"- كما قالت نوارة -بيتوجهوا وقت اللزوم لخدمة ألاجندة الامريكية تحت شعار الحريات - الحلو- والجقيقة انة لس لة علاقة الا بالدولارات الموعودة او بحلم الهجرة لأرض العم سام ... سام جدا جدا جدا

Unknown said...

انا مش عايزة بس عشان الناس قرفانة من مبارك تروح تاكل اي كاكا في وشها

ايوة مبارك مقرف، وشبشب لامريكا واسرائيل

بس احنا مش عايزين نستبدل الشبشب بقبقاب

لان ده امتصاص لغضب الناس ومش ح يبقى فيه تغيير حقيقي وحلني على ما الناس تغضب تاني وتقوم تاني ده ان قامت

انا مساندة لحراك اي شعب في الدنيا ضد اللي مضايقهم

انشالله حتى اللي مضايقهم من حكومتهم ان البطيخ اللي في السوق كله اقرع

مدام الناس متضايقة يبقى معاها حق

بس ياريت بس نقرا مذكرات الناس اللي كانوا بيشتغلوا في السي اي ايه ونشوف ازاي انهم بيحطوا الدولة المستهدفة تحت الرقابة ولما يشموا ريحة غضب في الشارع يحضروا بسرعة بديل عشان يمتصوا حالة الغضب بحيث ان البديل يبقى في ايدهم

بالظبط زي ما حصل مع امريكا نفسها

الناس كانت غضبانة ولو كان ترشح اوباما وهيلاري اتأخر خمس شهور كانت شوارع امريكا ح تبقى شبه شوارع ايران دلوقت

مافيش تغيير في الجوهر لكن فيه تغيير في الصورة

مع كل اختلافي مع كل الناس ما اعتقدش ان فيه حد في مصر عايز كده

اكيد كلنا عايزين بلدنا تبقى احسن
واكيد كلنا مش عايزين نتغش ولا نتخدع

احنا عايزين حاجة حقيقية

في كتاب اعترافات قرصان اقتصادي الكاتب بيقول للاسف ما عملناش حسابنا ان الايرانيين ممكن يثوروا لاننا كنا واثقين في الشاه وعشان كده ما حضرناش بديل وسقط البلد في ايد حركة شعبية حقيقية

يا جدعان كل حاجة واضحة

نخلي بالنا
واللي سهل تجنيده لانه عبيط بقى وللا يائس وللا زهقان
يتعلم عليه
مش عشان يتجرس ولا يحتقر
ماهو بني ادم برضه، والله اعلم بظروفه بس ده غير صالح اننا ناخد منه نصيحة، مع كامل احترامنا ليهم بس هم صوتهم مش من دماغهم

Kalimalhus said...

نوارة
-----
كلامك صحيح.. لكن ليه مشاكله..
1 - مع مرور الوقت ياترى التوجه العام للناس هيبقى مع مين؟.. بشكل أوضح هل الوقت فى صالح تشكيل حراك شعبى واعى للمصالح الحقيقية للوطن والا فى صالح إزدياد عدد النشطاء الواكلين أو المخدوعين و إزدياد الناس اللى على إستعداد للإنخداع بيهم؟
2 - إمتى ها نقدر نعرف إن الحراك الشعبى ماهوش فى خطر .. إيه المؤشرات اللى بيها نقدر نحكم إن الوقت أصبح مناسب..
3 - إيه فى رأيك اللى ممكن نعمله عشان نواجه عمليات الإختراق المنظمة لحركات التغيير الشبابية و للناشطين و البلوجرية و غيرهم .. وبعدين الأسوأ الإختراق غير الملموس لناس ما بيتكلموش يعنى لا بيكتبوا بلوجرز و لا بتلاقيهم على الفيس بوك أو التويتر .. الناس اللى الإختراق الفكرى بيتم لهم من خلال وسائل إعلام عادية و أهمها التليفزيون و زربيح القنوات الأمريكانى اللى لحست دماغ العالم..

أهم مما سبق .. الأمريكان مش فى حاجة لمساندة أى جهات داخلية بخلاف النظام .. جيمى و هأكرر كلامى أسوأ ألف مرة من أبوه بخلاف رعونته و عدم إكتراثه بالغلابة مقارنة بيه عوكل يبقى ملاك رحمة .. ومع إنعدام خبرته السياسية هيخرب البلد فى خلال كام سنة .. أكيد أى حاجة فى الدنيا ممكن تبقى أحسن من كده..