Wednesday 3 June 2009

ام العروسة.... فاضية ومشغولة

تحديث:
وصلني الان ميل من الاستاذ عزت هلال بيقول لي ان عبد الحليم قنديل هو كمان رفض الدعوة الى جانب جمال عيد رئيس الشبكة العربية لحقوق الانسان
على فكرة الميلينج ليست بتاعتهم مضروبة، يبعتوا لعبد الحليم قنديل؟ هم هبل دول؟

ابوخ حاجة حكاية الصحيان بدري دي بكرة
بالطبع يا عزيزي مش ح ادعي اني ح انام واشخر، انا ما اقدرش اتكلم بالطريقة البطالة دي، لازم اصحى اشوف يعني..نهارك سعيد
بس الاستعدادات قبل ساعة الصفر كالآتي:
اول حاجة انا بجد مش فاهمة منطق اسرائيل، بتتصرف كأنه ح يتجوز عليها وبتقول له: براحتك براحتك، ها؟ بس ما تجورش على حقي، ها؟
احنا واخدين بالنا ان اسرائيل مش دولة مستقلة واستمرارها مربوط بخدمة مصالح استعمارية، ما داهية تكون خايفة مصر تحل محلها في الحكاية دي! لا مش معقول يعني، هم اتجننوا وللا ايه؟ احنا اه اندال بس مش للدرجة دي يعني
وللا للدرجة دي؟
وقبل ما ييجي بيوم راحت اسرائيل عاملة كده
ياااا حتى اسرائيل بتروق البيت معانا؟ بصراحة الاتنين بيتصرفوا بستايل ستات قدام قوي، ما بقاش فيه ستات بتعمل كده دلوقت
على الله ما يكونوش محضرين له مية سخنة بملح في المطار
وكله حضر طلباته حتى الجماعة الاسلامية، طب والنبي يعني ابتدا يصعب عليا: بابا بابا.. جبت لنا عسلية؟
هو هنا بيصيع، كالعادة، في كانال الفرنسية قال ان بالنظر لعدد المسلمين في امريكا فامريكا تعد من اكبر الدول الاسلامية :)) يا دهوتي، لا شفنا ولا ح نشوف صياعة كده، وبعدين قالوا له ايه رأيك في الاسلام (طبعا هو بيعمل حوار مع كانال في فرنسا، فرنسا دي السعودية بتاعة اوروبا، دماغهم فيما يخص الاسلام شبه دماغ الناس بتوع "عباد الصليب" و"احفاد القردة والخنازير" يعني ما يقدرش يقول لهم الاسلام مش وحش يعني، اهو دين زي اي دين، لان الفرنساويين بيتعبروا ان مجرد التعبير عن عدم كراهية الاسلام يبقى كأنك جبت سيرة الست والدتهم بكلام بطال، وفي نفس الوقت مش عايز يزعل المسلمين) يعمل ايه يعمل ايه؟ قال لهم: والله فيه ناس بتقول كويس وناس بتقول وحش
هههههههههههه
لأ بصوا، احنا لازم نعترف ان دمه خفيف، اقطع دراعي من لغلوغه ان ما كان بيضحك في سره على كل الناس العبيطة اللي مبهورة بيه
يقوم يقول ايه؟
"والله احنا كان بينا تليفونات، انا ما اقدرش احكم عليه"
!!!!!!!!!!!!!!!
موبايلات بقى ها؟ وقال على رأي المثل: تعرف فلان ايوة، عاشرته، لا، تبقى ما تعرفوش، ومش كويس انك تحكم على الناس، احكم على نفسك، ويا حاسدين الناس، مالكم ومال الناس
سؤال اشتراجيتي: دوقت جات دعوات لبعض المعارضين وبعد مؤسسات المجتمع المدني وبعض الافراد المصريين المحسوبين على الادارة الامريكية.
جمال عيد، اللي دعي بوصفه مدير الشبكة العربية لحقوق الانسان، رفض الدعوة احتجاجا على حضور السفير الاسرائيلي، مش متأكده انه هو الوحيد اللي رفض الدعوة، بس لحد دلوقت مافيش اخبار عن رفض دعوة حضور خطاب اوباما غير هو جمال عيد بس، وانا اصلا مش عارفة ايه اللي طسهم في دماغهم وخلاهم يدعوه؟
واظن ان الباقي ح يحضر
وبصرف النظر عن دعوة السفير الاسرائيلي اللي نشرت في الجرايد واتقالت في برامج التوك شو ومع ذلك لسة فيه ناس بتقول: لا ما تقولش لا، بس ما تقولش بس، مش ما تقولش مش
طب نفترض ان السفير الاسرائيلي مش ح يحضر، وانهم احييوا تشي جيفارا ودعوه للخطاب، السؤال الجوهري
اللي ح يحضر ح يحضر ليه؟ اقصد يعني مخاطبة العالم الاسلامي من مصر وهي في الحالة دي، ربنا يشفيها ويعافيها، اكبر دعم للنظام القائم اللي المدعويين بيقولوا انهم معارضين له، صح؟
طيب اللي ح يحضر، ح يحضر مثلا عشان يرفع ايده ويسأل اوباما:
يا سيد انت جاي تدعم نظام استبدادي ليه؟ يا سيد انت قلت ح تنسحب من العراق ولحست الكلمتين وح تفضل سايب خمسين الف جندي ليه؟ يا سيد بتضرب القرى والفلاحين في افغانستان ليه؟ يا سيد المعونة اللي بتدفعها لحسني مبارك هي اللي مخلياه كابس على انفاسنا ولو شلتوا ايديكوا من ورا ضهره مش ح يقعد ثانية في كرسيه، طب بتدفعوا له فلوس ليه؟ حد قال لكوا اننا شحاتين؟ يا سيد انت رفعت المعونة العسكرية لاسرائيل بنسبة عشرة في المية ليه؟ دي دولة متوحشة وعلى حدودنا وانت كده بتهددنا تهديد مباشر، ليه؟ يا سيد مش عايز تنزل صور الجرائم اللي ارتكبت في ابو غريب عشان تحمي المجرمين ليه؟
انت وبلدك كلها مدينين لينا بالاعتذار... لحد اللحظة دي ما سمعناش كلمة اعتذار عن غزو افغانستان والعراق اللي اضر بمصلحتي انا كمواطن مصري واضر باكل عيشي ومن ساعة ضرب العراق بالذات شفنا فقر ما شافتهوش مصر من سنة الفت وتسعمية وعشرين، ولا سمعنا اعتذار عن التعذيب اللي في جوانتانمو وابو غريب، وبتضحك علينا وتقول لنا ح اقفل جوانتانمو وانت كل اللي ح تعمله انك ح تنقل المساجين من مكانهم لمكان تاني بنفس وضعهم القانون اللا قانوني، بس تغيير مناظر، وبتضحك علينا وتقول لنا انك بتحقق في ابو غريب وانت قبل التحقيق اصدرت عفو شامل عن كل المتورطين في الجريمة، وطبعا مش ح تدفع تعويضات للضحايا، ومش ناوي تبرز الجرائم للاعلام على الاقل كعقوبة معنوية للمتورطين، طب بتحقق ليه؟
يا سيد احنا ما بينضحكش علينا احنا ناس صيع والدنيا لطشت فينا جامد
البقين دول تروح تقولهم للخواجات اللي اكبر مشكلة حصلت لهم في حياتهم وجابت لهم كوابيس وهلع هي برجين وقعوا وتلاتلاف ماتوا.... يا سلام؟ هو ده اخركوا يعني؟ وعشان كده غزيتوا بلدين عشان برجين، وقتلتوا اكتر من تلاتة مليون عشان تلاتلاف؟ طب التلاتلاف دول بيموتوا في نص ساعة في حادثة قطر عادية جدا هنا، تحت حكم النظام اللي انت بتدفع له فلوس وبتبني له سجون وبتدعمه
يا سيد السجون الجديدة كلها في مصر مبنية بفلوس المعونة الامريكية، بتبنوا للنظام المصري سجون ليه؟
حد ح يسمح له يرفع ايده ويقول جملة واحدة؟ كلمة واحدة من اللي فوق ده؟
لو ح يقدروا يقفوا ويقولوا الكلام ده، ارجوهم يروحوا، ويروحوا بدري ويحجزوا على الارض قدام المنصة، انا باتكلم بجد، اللي ح يقدر يعمل كده ويقول اللي في قلبنا (مش مهم يحضر بالانجليزي، يقول بالعربي في مترجمين) يبقى عمل احسن حاجة ممكن تتعمل، مش خدمة لينا في مصر بس، خدمة للانسانية كلها، ده يبقى عمل احسن حاجة في تاريخ الولايات المتحدة من ساعة ما ربنا بلا العالم بيها
لو مش ح يقدروا يقولوا له الكلام ده، رايحين يعملوا ايه؟ يتفرجوا؟ هو قرداتي وللا بهلوان؟ هممم هو قرداتي وبهلوان، الاتنين، بس ما اظنش ان المعارضة المصرية والمجتمع المدني عندهم فقر سيرك يعني، البلد كلها سيرك، يعني البهلوان جاي يبيع المية في حارة السقايين
عموما مش عايزين نستبق الاحداث ونحكم على اللي رايحين، مين عارف، يمكن يقولوا كلام احسن من كده كمان، ويمكن يدوهم فرصة يتكلموا، ويمكن يبقوا احسن من ظننا بيهم واملنا فيهم
ويمكن يطلعوا قرادتية هم كمان، في الحالة دي احنا مش خسرانين حاجة، هو احنا من امتى كان عندنا امل في اي حد؟
اخيرا: حسني مبارك مش ح يحضر ليه؟ متضايق عشان بعض المعارضة مدعوة؟ وللا تعبان؟ وللا بيتقل والتقل صنعة؟
سؤال وظيفي بحت حيث اني موظفة من اللي بيشيلوا بطيخة
احنا ح نغيب طبعا، مش ح ينفع نروح الشغل
ح يحسبوا لنا اليوم غياب ونقدم عليه اجازة؟ طب واحنا مالنا؟ المفروض يدوهولنا اجازة، انما ياخدوا من اجازتنا ويخصموا الشيفت عشان هم اللي عزموا واحد عندهم؟ هو جايلنا وللا جايلهم؟

20 comments:

mido said...
This comment has been removed by the author.
mido said...

فين مواطن مصرى ؟

استطلاع أمريكي: ثلثا المصريين لديهم آراء إيجابية تجاه الإخوان المسلمين

Unknown said...

http://www.youm7.com//News.asp?NewsID=105253

أكون أو لا أكون said...

بكره تشوفي الناس تطبل وتزمر... لو كان في حد قادر يوجه الأسئله لأوباما ماكانتش الإمور وصلت للدرجه ده،...
أنا قريت عن حملات النظافه في مصر... وكان سؤالي... يعني الشعب مش بيستاهل إنه ينعم بالنظافه ده كل يوم؟
ليه التقليل من قيمة المواطن... وإهمال البلد من الناحيه الصحيه والجماليه...
هم لما عملوا حملة تنظيف يعني عارفين ان البلد محتاجه اهتمام من ناحية النطافه... طيب ليه كانوا عاملين نفسهم مش داريين ولاشايفين؟

وعلى الصعيد السياسي... اوباما لا حيقدم ولاحيطور في العلاقات السياسيه ولا حيعتذر عن الجرائم اللي عملوها... أصلاِ جيته استفزاز للعالم الإسلامي... وعايزين يفهمونا إن الوصي عليكم جاي يملي أوامره على الرعيه...

كل الإحداث عامله زي العلكه... من بق بوش الأب لبق لكلينتون وكلينتون إداها لبوش الأبن... وبوش الإبن تفّها ببق باراك...

أكون أو لا أكون said...

هههههه نواره الست ده بتتكلم عن إيه...هي كل قضيتها العنصريه؟
ده مش موضوعنا في العالم العربي والإسلامي... إحنا قضيتنا الإحتــــــــــــلال... وله هي عايشه في عالم تاني؟
يعني سابت الحمار ومسكت في البردعه
ايه الناس ده.

mido said...
This comment has been removed by the author.
mido said...


الشوارع التى ستغلق غدا



- شارع الجيزة - نفق الجلاء - شارع النيل - سراي الجزيرة - آخر شارع الهرم

العروبة - صلاح سالم - الخليفة المأمون - طريق المطار - قصر العيني - كورنيش جاردن سيتي - كوبري الجامعة

شارع القبة - ميدان روكسي - كوبري سراي القبة - اول جسر السويس

مهندس مصري بيحب مصر said...

و الله يا بنتي الحاج باراك عندنا في الرياض دلوقتي
و لسه واخد الغداء المتين و بيتكلموا
و الله اعلم
بكره نقعد جنب الحيطة و نسمع الزيطة

ثم الراجل واعي و بيعرف يلعب بالكلام و ما يتخافش عليه يغلط
الخوف على الهطل اللي بيعجبهم الكلام و ينسوا الأفعال على الارض

Me7'o said...

ههههههههه أعمل إيه بس
ضحكتينى على حالنا والله بيتهيألى كده
أوباما عمل زى
فرافيروااااااااااا
أنا جاى ى ى ى ى ى ى ى ى ى ى ى ى ى
:عاوزين بقى نغنيله
العتبة جزاز والسلم نايلو فى نايلو ول والعنبة جزاز والسلم نايلو فى نايلو
ول ول

إلا صحيح هو حسنى مش هايحضر
ولا عمل زى الست المصرية الأصيلة المستنية جوزها يرجع من الخليج وقاعدة مستنياه فى البيت بالحتة الزفرة وحاطة الطبيخ على النار

(استرها معايا يا رب)

بهجت الاباصيري said...

اهداء الي كل الاهلاوية

http://arabtube.tv/viewVideo.php?video_id=1663&title=___________________________

والله يخرب بيتك يا ريشه

Unknown said...

الرياض مزينة بأعلام امريكا تعانق العلم السعودى طوال طريق المطار و حتى القصر الملكى
ربنا يرحم اللى ماتوا فى غزة بالطيارات الاباتشى و يرحم الابرياء فى العراق المنكوبة و يرحم الغلابة اللى سقطوا من ذاكرة الكل فى افغانستان ووادى سوات ووزيرستان و كلهم ميتين عشان مزاج امريكا الكل خانهم حسبى الله و نعم الوكيل

Anonymous said...

بيقولوا الراجل كاريزماتيك000000انا خايفه يأثر عليهم بسحره الفظيع00000
لا اعتقد ان احد من المدعوين سيتحدث00الكل سيستمع ويستمع ويستمع000000ولا ننتظر ان يتحدث احد000000فمنذ متى يتحدث احد اصحاب الحركات والجمعيات وما شابه باسم المواطن 000000ومن يتحدث لن يحضر

مواطن مصري said...

دلوقتي بخصوص روبير فيسك انا عندي سؤال

هو مش عنجليزي ما يخلية في انجلترا بتاعتة

الي بتعذب المسلمين و بتعاملهم معاملة سيئة

و الي احتلت بلادة بلدنا يخلية في بلدة انا الراجل دة بقيت اكرة

يكتب عن جوردن براون



الاخوان مش هيشاركو في مظاهرة كفايا

هه

ذو النون المصري said...

فعلا
اسرائيل و مصرعاملين زي اتنين نسوان متجوزين راجل واحد
و الكل بيتسابق في النظافه علشان يعجب اكتر

Ahmed Fawzi said...

عندى سؤال ظريف ... هو مش السيد أوباما إبن عم الحج حسين كان مسلم و إتنصر ؟؟؟؟
أنا شخصيا معنديش مشكلة كل واحد حر فى دينه يؤمن باللى يؤمن بيه .. بس الإخوة الأشقاء فى السعودية إستقبلوه على أى أساس ؟؟ و ما أقاموش عليه الحد اللى هم مقتنعين به ليه ؟؟؟؟ ولا الحدود دى للغلابة بس ؟؟

و بالنسبة للأخوة هنا و اللى كانوا عايزين يستضيفوه فى الأزهر .. إشمعنا أوباما يستضيفوه و مايطالبوش بإقامة الحد عليه و هم نفسهم اللى طلعوا عين د. نصر حامد أبو زيد و كانوا عايزين يفرقوا بينه و بين مراته و طفشوهم من البلد ؟؟؟؟؟
سؤال بس مش أكتر

مواطن مصري said...

نوارة لو ضيف جي

يشرب الشاي و ياكل الفطير و يشيش في الفيشاوي و يتكل على بلدة

كرم الضيافة

بردو
:DDDDDD

lastcrazyboys said...

مش انا كنت النهاردة كنت في جماعة القاهرة ..أي والله رحت

والتوضيب والمهرجانات مش بالطريقة اللي وصلتني من العيال ..واللي قريناه وسمعناه..عادي يعني
والأهــم مفيش تأهب أمني برضه بالطريقة اللي توقعتها "دخلت وخرجت مرتين ..محدش قاللي كاني ولا ماني "

الشباب في الجامعة طبعا مسحولين في امتحاناتهم ..ولا فارق معاهم مين جي ..ولا مين رايح

الحــوارات كلها بتدور حــوالين الدكتور ده ابن تيييييييت ..والسؤال جاي جاي..والحاجات دي

كلية الآداب محدش هيعتبها ..لأنك لو واقفة عنــد السور اللي باصص على فنــون "من برة الجامعة يعني " هتلاقي زبالة من بتوع يبقى انت اكيد في مصــر

اجمــد نكتتين سمعتهم لما العمال جابوا سلم مزدوج حديد بس كبيييير قوي
بطريقة لافتة للنظر..واد مصري ابن مصري وابن مصر الله عليه قال: هو اوبــاما اللي جاي يا جدعان ..ولا ريتشارد قلب الأسد
مش دي الأبراج اللي دخلوا بيها اورشليم
!!!!!!
وانا خارج كان باين ان الحتــة اللي قدام الباب الرئيسي مكملتش "انا كنت فاكر الأسفلت عجز معاهم..وبعتوا يجيبوا .." بس في شباب -جزاهم الله خيرا- وضحوا الصورة لما كانوا رايحين يركبوا المواصلة ..فواحد منهم لفتت نظره الحكاية زي حالاتي

صاحبه قاله : "ادول يا ناصح الجبة اللي لازم بتسيبهم لليلة الامتحان ..وتفضل ماسك الورق لحد باب اللجنة"


يعني ممكن يخلصوا والراجل في العربية على كوبري الجامعة تقريبا

كــان معكم من جامعة القاهرة

Lastcrazyboy
===
ملاحظتين قبل ما امشي
لوعيد فعلا مش عايز يحضر اعتراضا على حضور السفير الاسرائيلي فيبقى اقــل حاجة نقدر نقولها ..تصرف اهبل مالوش
اي معنى ..ومزايدة كداااابة وعريانة قوي

ثانيــا :


يَا أَيُّهَا الَّذِينَ آمَنُوا لا تَسْأَلُوا عَنْ أَشْيَاءَ إِنْ تُبْدَ لَكُمْ تَسُؤْكُمْ"


والحـدق يفهــم

Me7'o said...

إبقى أتفضلى زورينى فى المدونة المفعوصة الجديدة بتاعتى يهمنى رأيك فيها...
http://mylifeflavor.blogspot.com/

اللى مش واخد لباله انا معلق فوق آهوه التعليق رقم 7 ماشى لحسن يفتكر إنى داخل أعلن عن مدونتى وخلاص
يالا
سى يو سووون جد ويلينج

مواطن مصري said...

اة ميدو الاخوان دول ملهمش شرعية اساسا


و الدستور بيمنع اي حزب

او جماعة تبقى على اساس ديني

مواطن مصري said...

سؤال هما هيدخولو القاعة من غير جزم


ولا ؟؟

:DDDDD