Monday 8 June 2009

استطلاع رأي 37 بالمائة من المصريين يصدقون اوباما

ده استطلاع رأي اتعمل بالتليفون، طيب، اللي ما عندوش تليفون؟ بس سبعة وتلاتين في المية دي نسبة قليلة بالنسبة للهلولة اللي معمولة
بس الواضح ان اغلبية اللبنانيين مصدقين اوباما :)! يا اما خافوا من تهديد اسرائيل او الاتنين، بس عموما كده احسن، مش كويس ان المعارضة تتحط في المواجهة والمسئولية دلوقت حالا في التوقيت ده، احسن لو حاجة باظت وللا خربت يقولوا لهم كله من وشكوا، كده احسن الف مرة، الحمد لله
ربنا ما بيجيبش حاجة وحشة
وكده احسن، بالنسبة لنا احنا ثابتين مكانا، ومافيش في ايدنا حاجة نعملها، والاحسن نبقى ثابتين مكانا والاوضاع تفضل زي ما هي، عشان لو خربت ومشجعي اوباما اتصدموا فيه ما يعملوش عملتهم بتاعة كل المرة ويطلعوا ان العرب والمسلمين هم السبب ولولا اننا عملنا ما كانش ده كله حصل
ولولا ان اللبنانيين انتخبوا المعارضة كان زمانا دلوقت عندنا دولة فلسطينية، وكان زمانا عندنا رؤساء كلهم حلوين وزي القمر شبه اوباما كده، وكان زمان كل مواطن عربي عنده بيت بجنينة وعربية هامر
خلينا زي ما احنا من غير اي تغير
اما نشوف بقى حبيب اخواته ح يعمل ايه؟ خصوصا ان عامل الجراج قال لي: ده راجل بتاع كلام، الضرب في اي حتة وقف؟ يبقى هو جاي يضحك علينا
وعامل الاسانسير قال لي: بصي حضرتك... ده في اصله انسان، ومش ح يوصل للميستوى ده الا اذا كان ابن حلال من جواه

10 comments:

Kalimalhus said...

نوارة.. بلاش يا بنتى لعب فى الأرقام.. 37% صدقوا كل الخطاب و 41% صدقوا جزء من الخطاب و 5% بس ما صدقوش حاجة من الخطاب.. و دى على فكرة نسب منطقية جدا و لو هاتحسنى الظن أكتر من اللازم بالشعب يبقى بتتعمدى تخدعى نفسك و كأنك بتريحيها و بتريحينا كلنا من مسئولية إننا نحاول نفهم الناس دى حقيقة اللى بيحصل..

Unknown said...

انا بالعب بالارقام؟ انت بتتهمني بالكدب؟

انا ناقلة العنوان زي ماهو من اليوم السابع

انا ح اضحك على نفسي وللا على اي حد ليه؟

النسبة اللي صدقت جزء من خطاب اوباما هي النسبة اللي بتقول نستنى لما نشوف

ودي الاغلبية فعلا بتقول الكلام كويس بس نستنى لما نشوف

يبقى انا لعبت في الارقام في ايه بقى؟

Kalimalhus said...

خلاص ما تتنرفزيش قوى كده؟.. و حياة طنط فكيهة و إن شالله أعدمها ما كان قصدى أقول إنك بتكدبى..

بس ما أنتى عارفة كويس إن اللى بيقولوا نستنى و نشوف مخدوعين برضه..

و تعالى هنا لما دول بيقولوا نستنى و نشوف أمال ال37% بيقولوا إيه؟ .. مسلمين نمر و مآمنين بالغيب كده غميضى؟.. دى تبقى وكسة سودة دى!!

Unknown said...

يا سلاااااااااااااام

ليه؟ انت ما سمعتش الناس اللي بتقول: مجرد انه يكلم العالم الاسلامي ده لوحده خطوة كبيرة مش مهم ايه اللي ييجي بعدها؟

ما سمعتهمش دول؟

اللي بيقولوا نستنى لما نشوف مش مخدوعين ولا حاجة

هم بيقولوا والله بلاش نصادر عليه يمكن يعمل حاجة وفي نفس الوقت مش مطمنين للخطاب

لما يقول صدقوا جزء من خطاب اوباما يعني قال ليا تحفظات على الخطاب

حاول تفسر الكلام اللي بتقراه

هم ما بيسألوش كده في استطلاع الرأي: هل صدقت كل خطاب اوباما ام جزء من خطاب اوباما

هم بيقولوا بالبلدي: ايه رأي في الخطاب؟

فيه ناس بتقول: هايل رائع وااااو ويصوتوا او يقولوا زي الراجل بتاع ده انسان وابن حلال من جواه

وفيه ناس بتقول: والله هي بداية، بس هو لحد دلوقت كلام، ما شفناش حاجة
او، هو كويس بس ما عجبنيش لما قال كذا، او كذا، بس في المجمل مش وحش احسن من بوش..إلخ

ودي اغلبية الناس فعلا

ومش مخدوعين
هم مش عايزين يتخانقوا، ولا عايزين يفقدوا الامل
اهم مستنيين

الخمسة في المية دول قالوا: هو فيه خير بييجي من امريكا؟ امريكا دي حاكمها اليهود

او زي الراجل اللي قال لي: ده بيأكلنا الاونطا، هو الضرب في العراق وقف؟

هم بقى مش ح يكتبوا كده
بيعيدوا صياغة الكلام

ومجلس الوزرا ده غبي جدا في الصياغة

يعني مثلا في استطلاع الرأي بتاع سعادة المصريين يكلموا الناس ويقولوا لهم: انت سعيد في حياتك؟

فالناس ترد وتقول: الحمد لله

يقوموا كاتبينها: نعم سعيد في حياته

مواطن مصري said...

لبنان و اختار 14 اذار و الحكم لل صندوق زعلانة لية دلوقتي؟

Kalimalhus said...

يعنى سيادتك شايفة إن الناس اللى مستنية التروماى فى البلكونة مش مخدوعين؟؟

أمال ما وقفتيش معاهم ليه؟

Kalimalhus said...

مواطن إمشى من وشى الساعة دى لألبسك الصندوق فى راسك!!

واحدة تقولى مش مخدوعين و التانى شايل الصندوق و جايلى من البوست اللى فات..

Unknown said...

لا مش مخدوعين
هم مش عايزين يعيشوا باليأس زينا كده
نفسهم يتشعلقوا بالامل

Kalimalhus said...

أنا سبق قلت إن الأمل حاجة و العشم حاجة تانية.. و العشم مضر للى بتعاطوه لأنه ممكن يعمل حاجات مش كويسة..

الأمل بيستند لوقائع و حسابات إحصائية زى غن المدام تبقى حامل قوم الواحد يبقى عنده أمل 50% يجيله بنت..

أما العشم فإن واحد قاعد فى السعودية بقاله سنتين يستنى المدام تجيبله ولد.. و نتيجة النوع ده من العشم إن المدام فعلا تجيب ولد و تكتبه بإسمه..

Kalimalhus said...

و مين اللى جاب سيرة اليأس..

"...ولا تيأسوا من روح الله انه لا ييأس من روح الله إلا القوم الكافرون" يوسف 87

و بعدين هوه مش لسه فى ناس فى إيدها سلاح؟ و لو صادروا السلاح الحجارة موجودة و لو خلص الحجر الصبر السلاح ..

"ولنبلونكم بشيء من الخوف والجوع ونقص من الأموال والأنفس والثمرات وبشر الصابرين" البقرة 155

و إذا كان ما فيش فى إيدينا غير التذكير يبقى نفذنا الأمر الإلهى..
"وذكر فإن الذكرى تنفع المؤمنين" الذاريات 55

إنما اليأس طبيعة المستسلمين القانطين من رحمة الله و المتعلقين برحمة البيت الأبيض..