Thursday 5 February 2009

قال لك: انا غلطت غلطت غلطت...ما دفعوش الضرايب

الراجل انسحب من الوزارة عشان ما دفعش الضرايب! والتاني قال: انا غلطان غلطان، هو راجل كويس، بس انا ازاي احطه في المنصب وهو مش دافع الضرايب؟ وبعد شوية طلع كام حد من الحكومة بتاعته مش دافع الضرايب وانسحبوا
لا وبيزعقوا له: ايه الحكاية؟ انت جايب لنا صيع مش دافعين ضرايبهم؟ وهو عمال يقول انا اسف اسف اسف انا غلطت غلطت غلطت
طب بيزعقوا له ليه؟ اصلا اصلا هو اللي قال، وهم اللي انسحبوا، وبيقولوا احنا اسفين، ايه بقى؟ بيزعقوا ليه؟ وللا هم ما مش لاقيين حاجة تضايقهم فبيتلككوا
امبارح كاتب تركي في الجزيرة طالع يقول: احنا مش بتنخانق مع حد ومافيش بينا وبين حد اي صراعات، لا ح نتصارع مع ايران ولا ح نتصارع مع اسرائيل احنا لنا دور محايد (قاضي يعني: اشرب من القلة دي وما تشربش من القلة دي :) تركي بقى) وعلى بعض الاطراف القلقة من الدور التركي ان تعترف انها تواجه مشاكل داخلية وانها هي اللي ضعيفة واحنا مش محتاجين نغازل الناخب التركي لان فيه برنامج انتخابي بلا بلا بلا
وقال لك بقى نجاد، رغم ان المحادثات مع امريكا ابتدت سرا، الا انه قال مش ح نوقف تخصيب اليورانيوم وانه بيقول كده عشان الانتخابات قربت وعايز الناس تنتخبه تاني
يا ترى مين الدول الغيرانة اللي مش عايزة تعترف بضعفها ومشاكلها الداخلية
حل الفزورة: السلطانية
مش نافع كده، انا مش ح اعيش عمري احقد على الناس بالطريقة دي، اشمعنى كل الناس كده واحنا لا؟ انا نفسي انتخب واللي انا منتخباه يخاف مني كده، ونزعق لهم كده وهم يعتذروا لنا ويبقوا عمالين يشرحوا لنا ليه بيعملوا كده ونقول لهم احنا مش مصدقينكوا فهم بقى يخافوا تاني ويقعدوا بقى يحاولوا يرضونا ويعملوا مواقف والناس تقول لهم: ايوة انتوا عاملين كده عشان الانتخابات قربت عشان عايزين ترضوا الناس، والناس دول يبقوا احنا، ونبقى لسة منتخبينه ويقول تصريح ما يعجبناش قوم نغدر عليه ونزعق له قوم هو يعتذر لنا، واحنا نقول الاعتذار مش كفاية تقدم تفسير وكدهون يعني
ياااااااااا يا ترى الناس اللي بيحصل معاها الحاجات دي بيحسوا بايه؟ يااااا يا ربي، انا عمري ما افتكر اي مسئول مصري اعتذر عن اي حاجة، مع انهم كلهم المفروض يعتذروا على انهم اتولدوا اصلا، طب انا نفسي اي مسئول يعتذر لنا، لو المسئولين المصريين مش ح يعتذروا يبقى اوباما يعتذر عشان امريكا احتلت الناس، واردوغان يعتذر للارمن اللي عايشين في مصر هنا، يمكن الاعتذار يخبط فينا واحنا جنبهم، ونجاد يعتذر عشان...عشان من الفين وخمسميت سنة دارا احتلنا، واليونان تعتذر عشان الاسكندر الاكبر احتلنا، ازاي يحتلنا الراجل ده؟ وبعدين انجلترا ما اعتذرتش عن الاحتلال وبعدين أطاليا دبحت مصريين كتير، ايام ما كانت روما يعني، مش ح يعتذروا....اي حد يعتذر، والله مش باغلس، ومش ح ناخد فلوس ولا حاجة، هو احنا بتوع فلوس؟ بس نفسي اعرف بس احساس الناس اللي حد بيعتذر لهم وكدهون يعني، وبعدين احنا مش اغبيا ده احنا قلبنا ابيض، حتى شوفوا لما قال لقد قررت ان اتنحى تماما ونهائيا الناس عملت ايه؟ يا قلب امهم من كتر ماهم مش مصدقين نزلوا مظاهرات يقولوا له حسك في الدنيا وفداك، الحمد لله اللي جات على قد كده، والنبي يا شيخ ما تعمل في روحك كده، ح تموت نفسك يا راجل 

12 comments:

Fatma said...

بيحسوا انهم بني ادمين

وبيجيلهم احساس مانعرفوش يا اوختشي بيقولوا عليه الفخر

مش انتي لوحدك اللي غيرانه وزعلانه

الاحداث اللي حصلت مؤخرا كانت كتيرة على اعصابنا كلنا

انا حسيت اننا عايشين في عالم موازي للعالم دول

احنا مش في نفس العالم اكيد

احنا ماشيين معاهم بالتوازي

بنعملهم باي باي من بعيد
ومافيش امل تجمعنا نقطةالتقاء

الواحد معبي اوي

77Math. said...

نوارة


أنا آسفة جدا .. والله العظيم ما حعمل كدا تاني

اؤمري انتِ بس

!

أقول لك حاسين بإيه ؟

حاسين إنهم بيختاروا الشخص اللي فعلا حيأمن لهم حياة آمنة وتعليم جيد ومستوى معيشي آدمي ..

ودا بالتبعية يعني مركز سياسي متقدم .. واحترام بين الدول

والشخص دا بيبذل كل جهده عشان يوصل للمركز دا عشان يحقق للشعب - اللي هو واحد منه- اللي هو عايزه ..

بيتعاملوا من منطلق كلنا شعب

مش واحد رئيس والبقية مرؤوسين نمص دمهم


عارفة بقى حاسين ازاي؟

حاجة راقية كدا مش موجودة عند العرب المتخلفين

حسن مدني said...

ايه الكلام ده يا نوارة
المفروض إحنا نعتذر لليونان عشان ضيعنا جثة الإسكندر الأكبر اللي جاء يحررنا من الاحتلال الفارسي الصفوي المجوسي. اللي جه أصلا يحررنا من احتلال الهكسوس، اللي أصلا جايين يحررونا من الفراعنة، اللي حررونا بدل البرد.
شوية إنصاف وعدالة بقى، إنتي كمان عايزة الناس الكبار يعتذرولك.
إحنا بفضل الله عندنا رئيس قالها واضحة صريحة مدوية

هو كل ما الشعب يعوز حاجة أعملها له


كمان عايزاه يعتذر.

لكن علشان انتي غالية عندنا
أنا ممكن أعتذر لك عن ... مش عارف بس أنا آسف وخلاص

تحياتي

حسن مدني said...

ثم إن الناس المسؤولين عندنا ما بيغلطوش

عمرك شفتي مسؤول عندنا مسؤول عن أي حاجة؟

ثم إن الدموقراطية دي أثبتت فشلها، بتجيب ناس بتغلط، وتعترف بغلطها. إحنا عندنا كلهم ملهمين، عشان كده مافيش حد بيغلط، ولا بيسرق ولا بيضيع مصالح البلاد والعباد.

جتنا نيلة ملينا البلد

وبرضه تحياتي

Fahd said...

نوارة

انا بتعذر لك

بتعذر لك

بعتذر لك


ايه كفاية كده ولاايه

Anonymous said...

احنا مش كدة لية؟؟؟؟؟

احنا مش كدة ليه؟

اقولك معندناش زى دول لية
واحنا مش كدة لية
علشان عندنا مواطنين لحد دلوقتى بيعتبرو السياسة قلة ادب

وان الشاب اللى يمشى فى مظاهرة دماغة لاسعة واهلة معرفوش يربوة

وان البنى ادم اللى ملوش دعوة بالبلد انشالله تولع
ناصح وفاهم الدنيا صح


طول مافية ناس سايقة عربيات وساعة ماتخش فى شارع فية مظاهرة على غزة
يقعدو يسبو ويلعنو نص ساعة علشان اتعطلو دقيقتين


طول مافية ناس بتخاف من ظابط المباحث اكتر مابتخاف من ربنا
دا ان كانت بتخاف من ربنا اصلا

طول مافية كائنات قاعدة فى بيات شتوى عميق ماتفوقش منة الا كل 4 سنين مرة تنزل تتنطط فى الشوارع زى الاراجوزات علشان كورة دخلت جوة شبكة
ويملو الدنيا هبل وبعدين يرجعو يبيتو تانى


طول ما فية مواطن بيقولك طالما عايشين يبقى مش مهم اى حاجة تانية
ادينا عايشين بناكل ونشرب وننام ونعشر ولا مؤاخذة
ونربى خلفتنا على انهم يعملو زينا
زى البهايم يعنى

مش مهم الارض اللى واقفين عليها تنباع وتنسحب من تحت رجلينا
مش مهم جسمنا يتملى امراض
مش مهم شوية حيوانات يسحلونا فى الشوارع ويضربونا بالنار زى الكلاب
مش مهم نتسرق عينى عينك
مش مهم الذل والاهانة
ايه يعنى
مش عايشين؟
مش مستحملين ولسه فينا الروح؟
خلاص يا دار مادخلك شر

الغريبة ان كل السواد دة ومحدش واخد بالة منة
كل ماتورية لواحد يقولك
فين...فين دة؟

ياااااااااعم بطل تشاؤم
مالحياة حلوة اهى
لسة الشمس بتطلع
ولسه بنلاقى حاجة ناكلها
وقماش نحطة على جسمنا
وهوا نتنفسة
يبقة اية المشكلة

فعلا الشعب دة اعجب ظاهرة فى التاريخ

الشعب الذى يشتغل نفسة


كل يوم بيعدى بتمنى اليوم اللى الناس دى تفوق فية
ياااااااااارب الناس دى تفوق بقى

ولو مش هتفوق الا بمصيبة
يبقى اتمنى المصيبة

لو الناس دى مش هتفوق الا لما البلد تولع بجاز
يااااااااااااارب البلد تولع بجاز
انشالله لو ينزل عليها نيزك

اى حاجة
بس نفوق


وبعدين مستغربة
مستغربة من اية

دلو ربنا حاسبنا بالعدل على خيبتنا دى
مش بالكرم
كان خسف بينا الارض من زمان





احمد سعيد

Fahd said...

انا متشوق اني اشوف تعليق مواطن مصري

انا بقيت من كتر ما بتعب منه بستناه

77Math. said...

fahd

ضحكتني بجد

زي اللي بيستعذب العذاب

أنت مثال مصغر للشعب !



شفتوا بقى إن مفيش فايدة ؟
;)



أنا مش بهدي النفوس

ياكش تولع !

جتهم نيلة اللي كانوا السبب في انحطاط ثقافتي

مهندس مصري بيحب مصر said...

ههههههههههههههههههههههههههههه

و ماله

دايماً الأحلام بتكون أول الطريق

حكاياتى said...

بهذوها المناسبة خدى دى
منى الشاذلى للوزير اباظة : ايه رايك فى الاتهامات اللى بتقول انك...
الوزير : مين اللى بيتهم
منى : الراى العام
الوزير : الراى العام ما يتهمش اللى بيتهم النيابة وانا ليا ورق وبس ........... ههههههههههههههههههههههه

Anonymous said...

حكاياتى
..........

العاشرة مساء
90 دقيقه
الطبعة الاولى


بيفكرونى ببرنامج الاطفال القديم
اللى كان بييجى فى الراديو زمان
بتاع بابا شارو


وطبعا يا اطفال انتو عارفين ان الخرفان الصغيرين مسمعوش كلام عمو التيس الكبير
لما قالهم هنودى خروف صغنون منكم كل يوم لملك الغابة علشان ياكله علشان نأمن من شرة

فتاهو كلهم فى الغابة وامنا الغولة خطفتهم

وكلتهم هم هم
علشان مسمعوش كلام بابا



اكتر واحد بيعيشنى فى الجو دة بصراحة

الباشمهندس المسلمانى بتاع الطبعة الاولى
بيحسسنى انة شغال فى مدرسة تربية فكرية


حسبى الله ونعم الوكيل



احمد سعيد

Ahmed Fawzi said...

ها ها البوست ده فكرنى بالمشاهد الأخيرة من فيلم " فيلم ثقافى " يلا بقى ممكن نتحسن على الألفية الخامسة و يجيلنا مسئول يخللى الشعب كله يعتذر