الندوة بتاعة دافوس كاملة

والله كلمة عمرو موسى كانت هايلة، وبيريز فضح عباس ومبارك، حسبي الله ونعم الوكيل، بيتكلم نفس كلام عباس ومبارك، ما اعرفش مين فيهم اللي مغشش التاني، بس حرام، والله العظيم عمرو موسى كلمته كانت ممتازة، وطول ما بيريز بيتكلم عمرو موسى كاتم ضحكته على كدب الراجل الكداب ده اللي قعد نص ساعة يقول لنا: ضربني بوشه على ايدي يا سعادة البيه

واردوغان بقى ما اقولكوش

وقال ايه؟ بيريز بيتكلم كأنه بجد وبحق وحقيق، اللي يشوفه يقول يا ضنايا يا قل امك، يا عيني، ده انت مظلوم قوي، قال بيقول ايه: احنا بقالنا يا ناس ستين سنة بس حاربونا سبع حروب، خمس حروب وانتفاضتين، (انتفاضتين...بيشتكي من الانتفاضتين، على اساس انه ما يحبش حد يزغزغه وعشان قلبه بيوجعه من الضحك) فيه ايه؟ ليه كده؟ اه والله، قال فيه ايه؟ ليه كده؟ وربنا كمان مرة. صحيح يا شباب، فيه ايه؟ ليه كده الافترا بتاعكوا ده؟

قوووووووم هو ده بقى اللي حمر وش اردوغان، وقال ايه، حلو الملامح بيقرا الحديث بتاع لن تقوم الساعة حتى يحارب المسلمين اليهود، وبيقول ان ده كلام حماس، وده معناه ان حماس عايزة حرب

طيييب

اسمععععععع اسمععععععععع علك تستفيد

ما كل اديان الدنيا فيها نهاية سعيدة لاصحاب الديانة اللي مؤمنين بيها، حتى البوذيين حتى الهندوس، حتى السيخ، حتى اللي مش مؤمنين بربنا خالص عندهم تفاؤل ان بكرة الناس تفوق وتعرف ان مافيش ربنا، ده حتى الرأسماليين مؤمنين ان الرأسمالية ح ترجع تاني والشيوعيين مؤمنين ان الشيوعية ح ترجع تاني، لو الواحد ح يعيش من غير امل امال يعيش ليه؟ ما ينتحر بقى

ماهو كل واحد معتقد في حاجة بيبقى عنده امل انها تسود في نهاية العالم، طب احنا فين واخر الفيلم فين يعني؟ واشمعنى احنا اللي تف علينا الكلب؟