لا دي خيبتك انت يا حاج تونة

ده كاريكاتير بتاع حلمي التوني مش واحد اسرائيلي اللي راسمه

الا موضوع ان الخارجية الاسرائيلية نشرت اسماء الناس وفضحتهم ما خوفش اللي اساميهم اتنشرت ولا حاجة زي ما الواحد كان متصور، ده خلا ناس اساميهم ما اتنشرتش يقدموا ابليكيشن مع السي في يمكن ربنا يكرم

هي الخارجية الاسرائيلية بتدي فلوس كتير كده؟ اكتر من الاهرام يعني؟ ده الواحد يسمع ان الاهرام فلوسه ياما

والحاج تونة نفسه ان شلبية تكبر وشعرها يصفر (سهلة دي، اي علبة اكشوجين وتضرب شعرها) وعينيها تزرق (ان شاء الله بس هاتلها عدسات ملونة على حسابك) وتغلب الرجالة زي تسيبي ليفني

اولا من حيث ان الستات عندنا بيغلبوا الرجالة، نو اوفنس، دايما بيغلبوهم ده حتى اسطور الست اللي اكلت دراع جوزها اسطورة خالدة ومؤثرة في الوجدان الشعبي اكتر من اسطورة ايزيس

سابعا كده على طول عشان انا بس اخلاقي كنزة شوية، في الانتخابات، ايااااااااااااااااااام ما كان عندنا انتخابات، مافيش واحدة اترشحت وخسرت ابدا، الناس في مصر هنا عندها عقدة اوديب، اول ما يشوفوا ست مترشحة ينجحوها، اه والله، وفي الفلاحين بقى بالذات، واسألوا طنط شاهندة اللي مافيش مرة رشحت نفسها في كمشيش الا ونجحت

لكن هو احنا عندنا انتخابات يغلب فيها رجالة عشان يغلب فيها ستات دلوقت؟

يا حاج تونة انت يا ضنايا يا اما التعليم على ايامكوا كان مضروب، يا اما بقيت تنسى بقى، عشان قبل ما اسرائيل اللي عاجباك تتعمل كان فيه واحدة اسمها وداد متري، ست، ومسيحية، واترشحت في الاربعينات لانتخابات رئاسة اتحاد الطلبة في جامعة القاهرة وفازت في الانتخابات باكتسااااااااااااااااح منقطع النظير مع ان كان نازل قدامها نشامى اشاوس وكان نازل قدامها الاخوان المسلمين كمان، ايه رايك بقى؟

وقبل ما هرتزل يفكر يعمل كيان صهيوني كانت نبوية موسى ناظرة مدرسة وهدى شعراوي جارة النسوان في الشارع قدام الجيش الانجليزي وفتحوا عليهم الرصاص الحي، وانا ما جبتش سيرة حتشبسوت وكليوباترا وشجر الدر لان دول كانوا ايام عزنا انا باتكلم على مصر تحت الاحتلال

بس طبعا ولا واحدة فيهم كان شعرها اصفر، الاكشوجين اياميها كانوا بيستخدموه للتنفس بس يمكن كانوا بيحنوا شعرهم وكعوبهم، ولا واحدة فيهم كانت عينيها زرقا

واكيد اكيد، ولا واحدة فيهم كانت بتحرق اطفال رضع بالقنابل الفسفورية ولا واحدة فيهم كانت بتدي اوامر للجنود بتوعها (اللي عادة بيبقى اعمارهم ما بين 19 لواحد وعشرين) انهم يضربوا رصاص على روس الاطفال الرضع اللي ما حصلوش تلات شهور من مسافة اقل من نص متر، وعلى فكرة طنط وداد ما اضطرتش يلبسوها حجاب في الانتخابات زي ما الست السكرية ليفني لبسوها حجاب غصب عنها عشان تنجح في الانتخابات وياريتها نجحت هو مقعد واحد اللي تقدمت بيه وبرررررررررررضه بيبي هو اللي ح يشكل الوزارة

لا وعارف كمان ايه، ولا حتى شهيناز النجار عملت قردة عشان تكسب الانتخابات، ولا لسنوا عليها وقالوا عليها مش بتصلي ومش متدينة مثلا زي ما قالوا على ليفني

انا ما باحبش النصب يا حاج تونة، كون ان المزة عاجباك عشان شعرها اصفر وعينيها زرقا فتقدر تعلق لها بوستر على حيطة اودتك او تحط صورتها على الموبايل بتاعك او حتى تودي التي شيرت بتاعك المطبعة يحطوا لك ام شعر اصفر عليهن نقدر نجيب لك الايميل بتاعها او تضيفها على الفيس بوك، ممكن نوسط لك طارق حجي يجيب لك مرة الموبايل ومسيجات بقى او لو عندك ويب كام تعملوا شات الساعة تلاتة بالليل وهي بت شقية يعني، بس الخوف بس انها لا مؤاخذة بتحب الشيباب الصغننين، شفتها انا وهي عمالة تلقح راسها على كتف العيل اللي من دور عيالي انا، يعني من دور احفادها ممكن نضرب لك باروكة صفرا وبنطلون جلد احمر وبلوزة هاي كول فتافيت السكر عشان تعجبها وترحمنا احنا لكن ده لا يسوغ انك في سنك ده تنصب علينا، الحملة الانتخابية للكيان الصهيوني اثبتت مدى تخلف وعته المجتمع ده، اولا غير ان الاحزاب بتاعتهم كده: يمين متطرف، يمين، يمين معتدل! معلش احنا دلوقت بنمر بأسوأ مراحل تاريخنا من ايام الملك مينا موحد القطرين ومع ذلك مين في الدنيا يلبس مرشحة حجاب بالعافية عشان رايحة تزور مثلا الاخوان المسلمين؟ يالهو بالي، ده كان زمان الكل شرشح وشنشل وزغرد ورقع بغطيان الحلل

مين في الدنيا يترشح للانتخابات المزورة بتاعتنا دي وفي الحملة الانتخابية منافسيه يقولوا: مش بيصلي

يا لهويييييييييييييييييييييييييييييييييييييي، ده اللي يقول كلمة زي دي كان زمانه متعلق من ودانه في ميدان عام

ويعني ايه رايحة تقابل المتدينيين؟ دي انتخابات، يعني مثلا في الانتخابات المضروبة بالنار بتاعتنا حد بيروح يقابل الطريقة الاحمدية؟ وللا شيخ الازهر في الحملة الانتخابية بتاعته؟ ده ايمن نور راح قابل المرشد العام للاخوان المسلمين ودي جماعة سياسية ما اسمهمش المتدينيين ولا حاجة وعملوا له فضيحة مع ان يعني ماحدش بيلبس حجاب وهو بيقابل المرشد ولا حاجة

ثم ايه الحملة الانتخابية بتاعتهم: ح اقتل الفلسطينيين، لا انا ح اقتلهم اكتر، لا بقى ده انا لسة قاتلاهم اهو، لا ما قتلتيش كفاية

لا سمعنا عن خطة اقتصادية ولا اجتماعية ولا اي اصلاح سياسي ولا اصلاح في التعليم ولا تنمية ولا اي حاجة، دي دولة شحاتة عايشة على المعونة والمعونة اهو، الاسرائيليين نفسهم بيقولوا عايزين نعرف بتروح فين؟ احنا عندنا فقر، اغبيا مش عارفين بتروح فين؟ بتروح لقنابل الدايم

هي دي انتخابات؟ وللا دي دولة؟ 

يعني فيه دولة في الدنيا العالم كله عرب وادانب واقفين وراها يساندوها ولحد دلوقت مش عارفة تعمل حاجة عليها النطلة حتى انتخاباتها كلها بتدور حوالين مين اللي ح يقتل اكتر وبس عمالين ينزلوا فيديوهات على اليوتيوب يقولوا احنا اللي عاملين جوجل واحنا اللي عاملين ميكروسوفت واحنا اللي خلقنا ادم وحوا بلطجة كده زي ما بيقولوا احنا اللي بنينا الاهرامات طب فين؟ مش نشوف؟ ادي الجمل وادي الجمال، مش لما حاجة بتتعمل في دولة ظرمبيح بيتكتب عليها صنع في دولة ظرمبيح؟ وللا ده انكار ذات ده وللا ايه؟ واذا كان بيصنعوا كل ده وهم اللي خرموا التعريفة ومخبيين عشان الناس لما تشوف مكتوب عليها اسرائيل مش ح تشتريها يبقى اسخم وانيل، يعني هم عارفين انهم مكروهين من المستهلكين في العالم كله بالرغم من دعم كل حكومات العالم ليهم باستثناء تلات اربع دول

انا عايزة افهم ايه اللي عند اسرائيل تتحسد عليه؟ ده احنا اللي بقينا عبرة خلقه وانا اقصد مصر بالذات مش بقية الدول العربية، وبقى الدنيا كلها عمالة تتفرج علينا من كتر اعاجيبنا وتهييساتنا حالنا احسن على الاقل مش بنموت اطفال بايدينا، اه بنساعد يعني، بس مش احنا اللي بننفذ

على الاقل يوم ما يترشح لنا واحد، لو بقى عندنا انتخابات، مايقدرش يقول انا ح اقتل ويتساب كده ناهيك عن انه ينتخب اساسا

ده الفلسطينيين اللي ما عندهمش دولة كان عندهم برامج انتخابية فيها تنمية ومحاربة فساد وخطط اصلاح سياسي واقتصادي

على قولك، بلا خيبة

بلا خيبة في السن ده، الناس بتكبر تعقل وللا تتجنن؟ هو حلمي التوني محتاج يقدم على وظيفة في الخارجية الاسرائيلية دلوقت؟ وللا ده طلب معاش ده وللا ايه؟