Tuesday, 3 February 2009

مشروع الدكتووووووووووور مشروع الدكتور

ايه بقى؟ اردوغان بيتشتم ليه دلوقت؟ وطبعا لازم في نفس المقال اللي بيتشتم فيه اردوغان يتشتم السيد حسن، ده بقى اساسي زي الملح في الاكل كده. ايه حكاية العثمانية الجديدة دي؟
لا وربنا؟ هو احنا مش كنا لسة في المشروع الصفوي الايراني الشيعي المجوسي الملالي التوسعي؟ انا مش عارفة ازاي صفوي وازاي ملالي، وازاي شيعي وازاي مجوسي؟ يا واد يا بت على رأي كركر
طب ايران عندها مشروع، وتركيا عندها مشروع، عندهم مشاريع نهضة، عايزين يحموا مصالحهم، كل واحدة فيهم عايزة تبقى اقوى دولة في العالم كله مش بس في المنطقة، بينموا نفسهم وبيطوروا البحث العلمي، واحدة بتطلق اقمار صناعية وواحدة بتنمي ثقلها الدولي مش بس الاقليمي، بيعملوا كل اللي يقدروا عليه عشان يحسنوا من نفسهم، بيعملوا حملات لمحو امية الكمبيوتر لان ماعندهمش امية قراية وكتابة اصلا، بيعملوا حملات لمحاربة الفساد الاداري وبتبقى مشاريع مدروسة عشان يقضوا على كل حاجة بتعوقهم، عندهم انتخابات نزيهة وحقيقية، وكل واحد بييجي بيبقى هدفه ان الناس تنتخبه تاني وعشان كده بيعمل كل اللي يقدر عليه عشان يرضي الناس ويحسسهم انه منصاع لرؤيتهم وملتزم بالبرنامج اللي انتخبوه عشانه، بينتهزوا كل فرصة عشان يثبتوا وجودهم وقوتهم، وبيستلهموا من تاريخهم وعايزين يستعيدوا امجادهم، وايه حكاية اردوغان عمل كده عشان الانتخابات؟ اه، ماهو عنده انتخابات، ما يقدرش يزور، ما يقدرش يفقر بلده وبعدين يدي وجبة للناخبين اللي ما بيعرفوش يقروا ولا يكتبوا عشان يعلموا على "العلامة الخضرا" ما يقدرش يقسم الخمسة جنيه نصين ويدي نصها لسكان العشوائيات وهم داخلين اللجنة ويديهم نصها التاني وهم خارجين من اللجنة لانه ماعندوش سكان عشوائيات
ايران وتركيا والصين واندونيسيا وماليزيا وفنزويلا عندهم مشاكل طبعا، بس بيحاولوا يحلوها، ما بيقولوش كل حاجة حلوة كل حاجة فل، واللي بيغلط وللا بيتصرف بما لا يرضي الرأي العام ما بيشوفش كرسي الحكم في الدورة الانتخابية التالية
"نجاد واردوغان بيساندوا فلسطين عشان مصلحتهم مش عشانا"
طب يعني هم يعملوا اي حاجة عشانا ليه؟ كل واحد بيعمل لبلده وعايزها احسن بلد، ومش عايز يبقى تابع لحد، وعندهم احلام انهم يبقوا اقوى ناس في الدنيا
ممكن افهم ايه العيب في كده؟ ايه الغلط في ان الناس عايزة بلدها تبقى قوية ومحترمة وناهضة ومتقدمة ولها ثقل دولي؟ اشمعنى امريكا بتحتل الناس واحنا بنساعدها انها تحتل الناس؟ طيب ايران وتركيا ما احتلوش حد، لحد دلوقت، وما اعتقدش انهم حتى لو فكروا يحتلوا حد ح يحتلونا احنا، احنا مين يحتلنا احنا؟ هو احنا عارفين نحتل نفسنا؟
فيه احتلال، واي احتلال بيبقى قدامه مقاومة مسلحة، ده كومن سنس يعني، كل الناس اللي كان عندها احتلال كان عندها مقاومة مسلحة، والمقاومة المسلحة دي بيبقى مشروعها حاجة واحدة بس: التحرر الوطني، مالهمش اي اهداف تانية، وغرضهم من اي حد في العالم عايز يساندهم، انشالله ابليس نفسه، انه يديهم سلاح وامكانيات، بس. طيب، ماحدش بيساعد حد لوجه الله، كل واحد بيبقى له مصلحة، زي ما مصر مثلا كانت بتساعد الجزائر، كان لوجه الله يعني؟ وللا كان عبد الناصر عنده مشروع ويهمه انه يخدم مشروعه ويأمن محيطه؟ والمقاومة الجزائرية مقاومة تحرير وطني، جالها سلاح من مصر اهلا وسهلا، جالها سلاح من روسيا اهلا وسهلا، جالها سلاح من بوركينا فاسو اهلا وسهلا، جالها سلاح من الشيطان ح تاخده لان هدفها واضح ومحدد.
طيب ليه حماس وحزب الله ياخدوا سلاح من ايران؟ عشان هي اللي عرضت عليهم سلاح، طب ما تسلحهم يا اخي، ايه اللي يخليك تحوجهم لايران يعني؟ على فكرة الشخصية الايرانية شخصية صعبة في التعامل، يعني المقاومة بيطلع عينها وهم بيتعاملوا معاهم، دول اصعب من الاتراك كمان، الاتراك عصبيين، بس الارانيين طبيعة شخصيتهم ممكن تعل العرب شوية
طب يا اخي ما تديهم سلاح وتريحهم من التعامل مع ايران، بلاش، ما تديهمش سلاح، اعمل زي تركيا وادخل براسك في العملية السياسية، اتبناهم سياسيا زي تركيا، بلاش لا ده ولا ده، قول بقين دعم ده الناس شرقانة لدرجة ان قلبهم كان ح يقف من الفرحة لما قطر قالت لهم كلمتين جبرت خاطرهم، ده هم اصلا متشعلقين في رقابينا من غير حاجة وعينهم علينا زي اللي بيحب واحدة وهي بتديله على دماغه، طيب دي حركات مقاومة مسلحة وكسب صداقتهم مهم، على الاقل يا اخي عشان يبقى عندك ورقة ضغط قدام امريكا واسرائيل، مش انت شحات وبتاخد معونة؟ طب افرض امريكا قررت انها تقطع المعونة؟ مش يبقى في ايدك ورقة ضغط تقول لهم: كده؟ طب يا حماس ويا حزب الله، تعالوا عند بابا
اصلا اصلا ده دورنا التاريخي، المنطقة دي كلها كانت تابعة لينا، انا مش عايزة اقول كلام يبان استعماري، دلوقت ما ينفعش زي من الف او ستميت او خمسميت سنة فاتوا، فيه اسلوب تاني لتأمين المصالح في منطقة الشام اللي هي كانت دايما امتداد مصر الشرقي
طب ايران وتركيا لهم مشروعهم، ممكن افهم عوكل ايه مشروعه؟ طب ما بدل شرشحات ابو جلمبو اللي عامل زي بياعة اللمون الشلق اللي عمالة تشبشب بالقبقاب تحت شباك الهانم، والهانم ولا حتى بصت لها من الشباك، ولا حتى كلمت بتاع الامن عشان يمشيها، سايباها لما تخلص قلة ادبها وتمشي، على كل الشرشحة دي، حد فيكوا سمع مسئول ايراني واحد رد على شرشحات الحكومة المصرية؟ ده ابو جلمبو طلع يقول: وزير الخارجية الايراني طلب مقابلتي وانا رفضت! يا غبي، يا غبيييييييييي، ده لبسك حتة دين عمة والوظها عليك، ده خلى شكلك عاااااااااااااااار، تخيلوا في وسط الشرشحات دي والهطرسات بتاعة ايران اعلنت الحرب علينا، والايرانيين ما بيردوش وفجأة وزير الخارجية الايراني يطلب يقابل ابو جلمبو وابو جلمبو بدل ما يلحق نفسه يكمل غباوة ويرفض يقابل الراجل
ده زمان الراجل ميت على روحه من الضحك علينا، جتك خيبة، جتك خيبة، شوف الناس عملت ايه؟ فضلت ثابتة على موقفها ومصممة على مصالحها لحد ما امريكا نفسها جات صاغرة، وبعد التهديد والوعيد، زي الجزمة دلوقت بتقول: ح نتكلم مع ايران. طب ح تعمل ايه يا فالح لما اسيادك يتكلموا مع ايران؟ دول ابتدوا يتكلموا دلوقت، انا سامعة في السي ان ان ان المحادثات السرية ابتدت على اعلى مستوى بين ايران وامريكا، عارف يعني ايه على اعلى مستوى؟ يعني اوباما ونجاد يا خاااااااااااااااااااايب، ياااااااااااااااااا خااااااااااااااااااايب، ده اوباما ما رفعش السماعة واتصل بعوكل غير عشان يقول له: خلي بالك يالا من حدودك، احنا ح نبعت لك مراقبة
طب شوف بقى تركيا عملت ايه لما لقت الكفة بتروح ناحية ايران، وهم كمان عندهم مشروع نهضتهم وعندهم مصالحهم، وعندهم ناخبينهم اللي بيحاسبوهم على كل شاردة وواردة
بدل ما يقل ادبه ويشرشح ويزغرد ويصقف بالقبقاب، بمنتهى الشياكة رمى بياضه قدام ايران: مش انت بقى الصايعة اللي مقطعة البطاقة وبتسلحي المقاومة؟ طيب انا ح اعمل دور ماحدش عمله قبلي، وانت ما تقدريش تعمليه، انا ح اكلم العالم كله نيابة عن المقاومة، اوكيه، انتي تعملي تسليح، وانا اعمل سياسة والعالم كله ح يسمع لي زي ما العالم بيخاف منك.
شوف النباهة، شوف المخ النور، بدل ما يتصارع ويقطع المنطقة زي الاقزام، بيتكامل وبيعمل لنفسه ثقل ودور زي العمالقة، هم الاتنين مش ح يستفيدوا حاجة لما يتخانقوا مع بعض، بالعكس، كل واحد فيهم له دور ومهمته انه يكبر دوره وينمي نفسه
ايه العيب في كده؟ مدام مش بيئذوا حد، مدام مش بيشتغلوا عملاء للاحتلال، مدام مش بيحتلوا حد، ايه العيب في انهم ينموا نفسهم؟
ما تتنيل يا عوكل بدل ما انت عامل زي العيل السقيط الفاشل اللي بيمسك العيال اللي بيطلعوا الاوائل في الفسحة ويضربهم، اتنيل اعمل لك انت كمان مشروع، اعمل الايوبية الجديدة، الاخشيدية الجديدة، المملوكية الجديدة، انشالله حتى الفرعونية الجديدة
اعمل لك اي منظر، شوف لك اي دور بدل الشرشحة واللكلكة والرغي الرغي الرغي والمعايرة وياما عملنا وياما سوينا
طب ايران مقطعة البطاقة، طب ماهي تركيا اهي، عاملة علاقات عالمية وعلاقات مع اسرائيل، ومع ذلك قدر بيريز يفتح فيه؟ انت ما اخدتش بالك انه قال له: انت بتكلم رئيس دولة مش شيخ قبيلة؟ عارف يعني ايه؟ يعني انت بتكلم باشا مش واحد عربي
يا عرة الناس، يا اتنين وعشرين جثة محنطة مالهاش دم ولا احساس الله يخرب بيوتكوا عرتونا
بدل ما تعملوا زي الاقزام اللي بتنط على كتاف الناس اللي بتكبر وتفضل تعضعض في ودانها، كبروا نفسكوا، اعملوا لنفسكوا اي لازمة
انا مش ح اعمل زي الام اللي ابنها موكوس ومرفود ومدمن وتقول له: انت زي الفل...انت تقعد على البساط وتاخد ست البنات
لا
اللي يحب البلد دي لازم يقول لها حقيقتها
احنا فشلة
فشلة
فشلة
احنا لا بنحترم تاريخنا والاجيال اللي جاية ح تتف علينا
احنا قزمنا البلد دي
دلوقت فيه في المنطقة مشروع امبريالي امريكي صهيوني، وفيه قوة ناشئة في المنطقة تانية عايزة تستعيد امجادها وما تبقاش مستعمرة وتبقى تابعة لنفسها وبس، وبتعمل كل اللي تقدر عليه عشان تفرض احترامها على العالم
احنا فين من ده كله؟
واحد نازل شوبش وشرشحة وزغاريد ويوم ما يحب يستعرض قيادته يقول احنا فشلنا قمة الدوحة! طب ما تتعلم من سيدك الامريكاني اللي قال الناس ح تحكم عليك باللي بتبنيه مش باللي بتهده، ايه المجد في انك فشلت الناس جنبك؟ طب نجحت ايه؟
وواحد كل شوية يجيب الناس يحلفهم على المصحف ويقطع رغيف العيش على وشهم والسيدة في ضهركوا ما تعملوا حاجة بقى تاني
وواحد بيحسبن
وواحد بيقول اسراطين
وواحد بيتكلم انجليزي عشان مش بيعرف يتكلم عربي
وواحد بيقطع علاقته مع فنزويلا عشان البوليساريو
ايه الخيبة دي؟ ايه الوكسة دي؟ ايه النيلة دي؟ ده شافيز عرف اهمية منطقتنا وبيعمل لنفسه دور فيها عشان يتصدى لامريكا واحنا قاعدين زي الولايا اللي غرق دراهم
والصين غرقتنا بكل حاجة حتى سجاجيد الصلاة وعندنا فرصة ان الرأسمالية الامريكية بتنهار واحنا اساسا واقعين وما عندناش حاجة نخسرها يعني نعرف من اللحظة دي نبتدي من الصفر
ما تهزوا اللا مؤاخذة بقى وتعملوا لكوا اي منظر، الناس كلها شايفة ان العالم بيمر بلحظة تاريخية وامريكا متشعلقة بايديها في سور البلكونة ويمكن تقع، ولو وقعت ح تاخد كل اللي متشعلقين في رجليها يا وكسة، يا وكسة
دي اسرائيل نفسها عرفت كده وظبطت حالها مع الصين واوروبا والهند....الهند يا غجر، ده ماليزيا بتفرض نفسها دلوقت كقوة اقتصادية، اندونيسيا اللي لسة خارجة من كارثة بتصنع عربيات من اول الموتور ياللي قاعدين تندبوا على اربع حروب خلصوا من تلاتين سنة واحتلال خلص من خمسين سنة جتكوا نيلة كل واحد في العالم بيشوف يقدر يعمل ايه عشان يبقى له مكان وثقل في العالم
وانتوا شيوخ قبيلة ايه؟ ده انتوا ولا حصلتوا شيوخ حارة انتوا يادوبك شيوخ منصر
كل الناس فالحة الا احنا، ده الدول الافريقية ابتدت تهز نفسها، يا معفنين، يا معفنين العفانة اكلتكوا واكلتنا معاكوا وريحتنا عمت الناس في العالم كله، الكل بيحتقرنا، ده كوريا الشمالية قالت لامريكا: اوعي تفتكري اننا زي العراق!!! يا وكسة، يا خيبة، يا فشلة، يا فشلة، يا فشلة، يا بُلداء، يا ساقطين، الكحك مالي الشهادة جتكوا نيلة ولا حتى تنفعوا نطلعكوا من المدرسة ونوديكوا ورشة، مافيش معلم ح يرضى بيكوا، يا متسولين، يا سريحة، يا ضريبة الكلة، يا مغيبين
صفوي ايه وعثمانلي ايه؟ حتى لما تشتموا الناس عايشين في خمسميت سنة فاتت، دي ناس بتبص لخمسميت سنة قدام، مش بيبصوا وراهم شيعة ايه وسنة ايه؟ ده على اساس ان اسرائيل اللي انتوا لازقين في شبشبها من اهل السنة والجماعة؟
كان معكم قاسم السماوي من جمهورية جتنا نيلة في حظنا الهباب
الموكوسية الفشلية المتحدة

58 comments:

مواطن مصري said...

يا سبحان الله توارد افكار انا بقول ان ايران زي امريكا زي اسرائيل الناس الي عاوزة تبقى تبع الدول دول فاكرين انهم هيخدمونا قال عشان هما مسلمين يبقى غلطان لان كل دول بدور على مصلحتهم الشخصية فقط لا غير


المشكلة الاكبر اني مشفتش حد بيدور على مصر او يكون تابع على مصر لية احناالشعوبالوحيدة الي بنجري عاوزين نبقى تبع ايران مرة و مرة تبع الاتحاد السوفيتي و مرة تبع امريكا ؟؟؟


دة حتى لما الزمالك خسر ناس قالو نبع تبع انبي

نسيو الزمالك في الاخر

امتى نكون تبع مصر

جبهة التهييس الشعبية said...

لا يا مواطن، ايران مش زي امريكا ولا اسرائيل

لان ايران ما تقدرش تحتلنا، ولا لها اطماع استعمارية ضدنا، هي لها مصالح

لو احنا كبار فعلا ننسق معاها ويبقى لنا دور زي ما تركيا بتحاول يبقى لها دور تكميلي مع ايران

تاريخيا مافيش عداوة زي العداوة اللي كانت ما بين ايران وتركيا

بس دلوقت لما تحب تعمل توازنات وتحالفات ما تعملش تحالفات مع قوة عظمى زي امريكا او الة عسكرية زي اسرائيل

لان دي ح تبقى زي صداقة ما بين راجل عنده تلاتين سنة وعيل عنده عشر سنين
اكيد اللي عنده تلاتين سنة ح يبقى هو المسيطر على اللي عنده عشر سنين

لكن الطبيعي انك تعمل تحالفات مع ناس تبقى قريبة في القوة منك ولما تتحدوا تكملوا بعض وتقووا بعض

زي ما تركيا وايران بيعملوا دلوقت

زي ما سوريا وايران بيعملوا
الاتنين متحاصرين مثلا والاتنين بينموا نفسهم اقتصاديا وبينموا الصناعة الوطنية
علاقتنا بتركيا وايران مش ح يبقى فيها تبعية لانهم ماهماش اقوى مننا بالشكل الفظيع زي امريكا واسرائيل
لكن نقدر نستفيد منهم ونفيدهم لو عايزين نعمل نهضة

لما تحب تعمل نهضة لازم يبقى لك تحالفات

لكن لما تحب تعمل فساد لازم تبقى تبع حد

هرطقة said...

مين قال ان عوكل معندوش مشروع
الراجل (لمؤاخذة فى الكلمة يعنى) اتسأل قبل كده عن مشروعنا القومى
ورد
رد مفحم الصراحة
قال مشروع الصرف الصحى
لا تعليق

مواطن مصري said...

نوارة مش قاعدة بتقول مفيش دولة تعمل حاجة ل الله
ايران او تركيا او اسرائيل عاوزين يسيطرو على موارد الوطن العربي


عاوزين يتوسعو يبقى هما الكل في الكل خصوصاً ايران و دي حاجة انا ملاحظها في كل دول الي عانت من الاضهاط و خصوصا الديني
عاوزين يسيطرو عاشان يبقى هما سادة العالم

مع العلم اننا المصرين عندنا العلماء و الموارد البشرية لو في مناخ جيدة هنسبقهم الارادة الي عندنا شبة ماتت خلينا نكون صرحاء كمان الانتماء
تفسري باية ان اغلب من نص مليون شاب عاوز يهاجر ل امريكا و هجرة غير شرعية ل اوربا دة غير الناس الي بيسافرو ايران و دول البترودلار

جبهة التهييس الشعبية said...

هرطقة

لا بجد؟ والمصحف؟
معلش بعد اذنك
ممكن تحلف بالله العظيم انه قال كده؟


مواطن مصري
موارد ايه اللي يسيطروا عليها بلا نيلة
دول عندهم موارد تشترينا ميت سنة قدام

هم عايزين ينموا نفسهم واحنا عندنا فرصة اننا لو اتعاونا معاهم من منطلق مصالحنا اننا احنا كمان ننموا

ده الشرق الاوسخ ده لو قفل على نفسه وقاطع الدنيا كلها وحارب الفساد ح يبقى عنده ثروة تأكل العالم كله
ومافيش قوة ح تطغى على قوة لاننا كلنا قوانا متقاربة

دي حاجة

الحاجة التانية
السيدة في ضهرك يا مواطن بطل تقول على اي حد زي اسرائيل عشان مافيش حد زي اسرائيل
اسرائيل عدوة البشرية كلها

مواطن مصري said...

نوارة انا مش بدي الامان ل اي دولة في العالم حتى لو كانو دول اسلامية

مواطن مصري said...
This comment has been removed by the author.
هرطقة said...

ده أنا قريته زمان فى جرنان الدستور
والعهدة على الراوى
اللى مش فاكر هو كان مين الصراحة
بس على ما أذكر انها حادثة مشهورة وفى أكتر من واحد اتكلم فيها

جبهة التهييس الشعبية said...

بص يا مواطن
القوي بيبني نفسه
والضعيف هو بس اللي بيخاف
اللي عايز يبقى قوي يتصرف زي الاقوياء
واللي عايز يفضل ضعيف خليه خايف طول عمره
الخايف عمره ما بيتقدم خطوة واحدة لقدام

الناس اللي عايزة تعمل نهضة لبلدها بتعرف نفسها ومصلحتها وعدوها من حبيبها
وبتتعامل بقوة مع اعدائها وبتتعامل بكرامة وتفهم مع حبايبها

لكن احنا بنتعامل بضعف وذل مع اعدائنا وبنهدم كل علاقة ممكن تبقى مع ناس مرشحين جدا انهم يبقوا حبايبنا

قول لي احنا بنعمل ايه غير الخوف

بلاش

انت يا مواطن

انت كل كلامك له علاقة باي حاجة تانية غير الخوف؟

ما نفتحش المعبر عشان خايفين من اسرائيل

ما نتحداش امريكا واسرائيل عشان لبعدين يضربونا

ما نعملش علاقات مع قوة ناشئة في المنطقة بتجمعنا بيها مصالح وتاريخ وثقافة عشان خايفين منهم

الخايف مش بيتقدم
وفي قانون التاريخ
اللي مش بيتقدم بيتأخر

مافيش حد بيفضل مكانه
لو مش ح تمشي قدام ح ترجع ورا
ولو ح تفضل خايف ح تفضل ترجع لحد ما تبقى زي النملة وسط العمالقة

قطعنا للعلاقات مع القوة الناشئة في المنطقة اللي زي ايران او خلق مشاكل مع تركيا وقلة ادبنا عليهم
مش ح يوقف لا ايران ولا تركيا عن التقدم
هم مش محتاجينا في حاجة

تذللنا لامريكا واسرائيل وهم قوى استعمارية مافيش بينا وبينها مصالح مشتركة ومش عايزة مننا غير التبعية الكاملة والسمع والطاعة مش ح يأمنا من شرهم بالعكس ح يقللنا في نظرهم ويخليهم يستهتروا بينا ويحسوا انهم وقت ما يحبوا يقدروا يدوسونا

الخوف كلب بيسد الطريق
واحنا بقالنا تلاتين سنة خايفين
وبنرجع بنرجع بنرجع
الناس بتتقدم واحنا بنرجع لحد ما ح نقع من الشباك وماحدش ح يسمي علينا

مواطن مصري said...

بصي موضوع اني خايف ع البلد دة ممكن يديلنا الامل ف احنا نحصنالبلد و نقويها عشان كل ما بنحس ان فية خطر المفروض نطور البلد عشان خايفين على حياة ال 80 مليون

~*§¦§ Appy §¦§*~ said...

بس يا عم قاسم يا سماوي انت
اولا انا هتكلم عن تركيا من واقع سفر ليها ومعرفتى شويه بالناس
الناس هناك بتشتغل بتنمي نفسها احنا بقى الاغلبيه بتستهبل على نفسها وعاوزه تضحك على نفسها عادي يعنى وتقولك احنا احفاد الفراعنه ماشي
بس الفراعنه بنوا واحنا هدينا والحمد لله يكفى اننا بنفتقر للتحضر
الشعب الايرانى شعب بيحترم نفسه والله وغيره من واقع تعامل فى ماليزيا معاهم انا شخصيا يعنى لما حبيت انزل بي سين واتكسفت علشان شباب قاعدين مع زوجاتهم ايرانيات وحسوا مشيوا من على البى سين وسابوه وبقينا سيدات بس اه والله اتكسفت لانهم متدينين اوي وشعب برضه بيحترم نفسه انما احنا مبنحترمش حد ولا نفسنا
الراجل عندنا يعنى عوكل ده راجل تمام ميقدرش يفتح بقه ولا يعدل حاجه ولازم كان اي حد يشتم اردوغان علشان مننبهرش بيه علشان محدش يعمل زيه ما هما زي الشراشيح زي ما قولتى مش عارفين يصلحوا نفسهم يعملوا اسقاطات على غيرهم
وبعدين ما دي عادته مش عارف يبقى كويس يبقى يخلى اللى حوليه وحشين وهتلاقى مهللتيه لده طبعا
وطبعا لازم سيره السيد حسن تيجي مش هو اللى بدا ببهدلتنا وكشف المستور والكستور يبقى لازم يضرب على الراس
بصى يا بنتى عمره ما هيسترجل ابدا الا اذا شرب ماونتو ديو علشان يجمد قلبه
بس خلاص علشان رايحه مشوار

Founoon said...

هو في حد بيشتم اردوغان ؟!

مش كانوا من كام يوم عمالين يقولوا ادي المسلمين والله اكبر وعاملين افراح وليالي ملاح وعمالين يتلزقوا في الناس اللي عندها كرامة ؟

ايران او تركيا او اي حد ليه مصالح ..عادي ماكل الدنيا عندها مصالح

بس في ناس بتدور على مصلحتها بكرامةوكبار او عايزين يبقوا كبار فعلا مش فنجرة بقى وفي ناس ممرمطة كرامتها على حساب المصلحة وفي الاخر لا بيطولوا مصلحةولا كرامة

احنا بقى الناس التانيين ..مالنا بقى ومال الناس اللي عندههم كرامة دول

حاشرين نفسنا فيهم ليه شوية نتلزق وشوية نشتم !

احنا نسكت خالص بخيبتنا التقيلة

نسكت تماما

لسه كنت بتكلم في حاجة شبه كدا في اخر موضوع عندي

جبهة التهييس الشعبية said...

اه يابنتي بيتشتم جامد قوي
بيقولوا حركة استعراضية وعايز يكسب الانتخابات وهو زعل على نفسه ما زعلش على فلسطين واخدها اهانة شخصية
وقرف قرف

مصريين وسعوديين بالذات في الجزيرة والعربية والاهرام والشرق الاوسط

Founoon said...

ياختي حتى لو زعل على نفسه مش على فلسطين

اهو بني ادم عنده كرامة

مش زي البعدا

حاجةوسخة

Ahmad said...

مواطن مصري بجد حاول تكبر شوية مش مهم انك تعلق و خلاص المهم تقول حاجة ليها لازمة
بجد انا لما بقرا تعليقاتك بحس بحال البلد
اوووووووووووووف

مواطن مصري said...

@ احمد انا بقول رائي و الله ليك رائي تاني قولة انا زهقت بجد من الناس الي عاملة نفسها العلماء

يا عم سيبنالك المعرفة

ثورة الياسر said...

مساء الخير
بقولك لا يا نوارة غلطانة بالاوي كمان
ايران وتركيا ليهم اطماع واستعمارية كمان
بس في فرق بين استعمار زمان واستعمار اليوم
صار في استعمار بالوكالة
فايران مستعمرة غزة بالفعل بس بوكالة لحماس
طيب اردوغان يعطية العافية زعل عشان اولادنا بغزة مكان عمل حاجة على ارض الواقع بدل الكلام
مهو راعي المفاوضات المباشرة والغير مباشرة مع سوريا ليش ما قلتوش عنه استسلامي ؟؟؟
اقولك معلومة .
اسرائيل بتمر بضائقة كبيرة ونقص حاد في المياة وعاملة صفقة ضخمة جدا لشراء مياة من تركيا طيب يا عم الطيب اردغان احتج بالفعل واجل بيع اسرائيل مية مش بطل لا انا ما بخربش على تركيا بس بقولك اجل الصفقة وقول تضامنا مع الفلسطينيين والله والله يا نوارة كانت اسرائيل وقفت العدوان ومتقلوليش هي تركيا تعمل كده لية مش هي دولة اسلامية وبتقول القدس نواة العالم الاسلامي والا هو كلام وبس

وبعين حابب اقولك حاجة طول ما احنا بنشتم في رؤسائنا وقادتنا عمرنا ماحنفلح ولا تقوم لينا راية
يا جماعة عيب والله الكلام ده هو الي جايبنا لورة

تحياتي ليكم ومتنسوش تدعولنا والقصف بيزيد دلوقتي وشكلها ليلة كوبيا على دماغتنا
سلالالالالالالالالالالالالام

حـنــّا السكران said...

أنا قلت من الأول انه سيمفونية الشروال العثماني رح تبدأ
ـ عندنا انحطاط غير مسبوق في الصحافة العربية لا يوازيه شيء سوى انحطاط الساسة العرب و الأنظمة العربية ( الأشياء العربية , مستحيل ينطبق عليها تسمية نظم أو أنظمة ) ..يعني كل الناس بهالدنيا لهم غايات و أهداف إلا جماعتنا , غايتهم و هدفهم الأسمى ..يعيشوا و ينقـّوا و يطقوا حنك و بس .. على هامش البشرية .
ـ إيران أطلقت قمر صناعي محليّ الصنع .. بكرا بيكتبوا انه ايران اتجهت نحو السماء لتنشر الفكر الشيعي بين أهل السماء بعد أن بدأت بأهل الأرض ..
شو هالمصيبة اللي نحنا فيها ؟؟ و الله العظيم أنا صرت بحسد المجانين ..الوجع اللي جوانا لم يعد يحتمل ..

جبهة التهييس الشعبية said...

ثورة الياسر

لا مؤاخذة يا اخويا في الخيابة
والنبي تتنيلوا على خيبتكوا مافيش اخيب مننا غيركوا

لا مؤاخذة يعني نو اوفنس

Anonymous said...

الاخ مواطن مصرى
موارد مين يابنى اللى يطمعو فيها
هو احنا لسة عندنا موارد
بترول الخليج اللى التقارير بتقول انة هيخلص قبل سنة2020
ولا القمح المصرى اللى معادش بيتزرع
ولا الكانتلوب والفراولة
ولا الارض الزراعية اللى اتجرفت واتعدمت العافية
ولا التمانين مليون فهلوى اللى كل واحد فيهم فاكر نفسة ابو العربف وملك الصياعة والفهلوة

اة
اكيد قصدك مواردنا من التكاتك
مهى ثروة قومية برضة
بسسسسس
انا عرفت
اكيد قصدك مواردنا المتذايدة من الجراثيم البشرية اللى بيسموها
حكومة
ورجال ادارة
بس اعتقد دول مش هيلزموهم فى حاجة
دول ممكن امريكا توردهم لدول امريكا اللا تينية لافساد حركة التنمية هناك
ودعم مزارع الخشخاش
وتشغيل الايدى العاملة فى صناعة الكوكايين

قال موارد قال
.............

نوارة

مش قلتلكم من اكتر من شهر
هيقولو المد العثمانى
شوفتو
كمان شوية يقولك المد الفنزويلى

انتى بتدنى فى مالطة
عوكل ولا يلزمة حاجة من الكلام دة
عندة تتحرق البلد بجاز
ان شالله لو بقت خرابة
هيقلبها جراش ويقعد هو وعيالة على مدخلة يلمو الفلوس


واللة حتى لو بقت البلد دورة مية عمومى فى موقف
ولا هيهمة
هيقعد عالباب
وياخد ربع جنية من اللى داخل
وممكن يبيع مناديل
اة سبوبة يعنى
اهو كلة اكل عيش
وكلة لية ولعيالة
مانتى عارفة بعيد عنك
البطالة عاملة ازاى دلوقتى
اللى بيحكم امريكا ولا دولة فى اوروبا لما بيمشى
بيقعد يكتب كتب
ويدى محاضرات وبياخد منها الشىء الفلانى
انما دة لو غار
محدش هيرضى يشغلة باشكاتب فى زريبة
والراجل معادش فية صحة للبهدلة
يعنى مش هيعرف يلف على مقالب الزبالة يلم علب البلاستيك الفاضية
والواد نوفل ابنة
وى بابا
مش هيعرف يشتغل فى الورشة
اصلة ضعيف وفرفور
والكلة بعيد عنك لحست دماغة
والست مرجانة
اقصد امنا الغولة
خلاص راحت عليها
يعنى ماعدش بنفع معاها الوقوف تحت عمدان النور فى المهندسين
محدش هيعبرها
والواد كتنلة التانى اخرة يشتغل حرامى جزم فى جامع بباب واحد
يعنى العيلة ياعينى من العجزة والمعاقين
يبقى عصفور فى اليد
يصيعو يعنى
يبقى اياكش تولع
مش مهم
طالما هتخلهم عائد شهرى لا يقل عن 100 جنيه
يبقى قاعدين
احسن من مافيش
اة
ماهو اصل مافيش حسابات فى بنوك برة
دى اوشاعة

وبعدين انتى عايزة ظباط جهاز امل الدولة وجهاز العروسين يروحو فين؟
يسرحو بغزل البنات؟
حرام عليكى احنا ناقصين بطالة
سيبى الناس تسترزق

والسادة اللى راكبين على قفا الجيش
الفراخ البيضا
يجيبو شرايط فياجرا وجنيهات دهب منين
ها ؟
حرام عليكى
يعنى انتى عايزاهم بعد 40سنة خدمة يروحو يشتغلو غفر فى شونة الغلة؟


وزيهم السادة العلوج خراتيت الخليج
اللى بيلبسو على راسهم جهاز منع الفهم اياة

ماهو اصل الخيبة هى اللى يتكسب دلوقتى
اصلنا فى عصر تفتيح المخ
وهم بيفتحو مخهم
بيدهلزوة ويبهلزوة
علشان يبرعش
ويبقى اخر طعطعة
مش كدة برضة ولا اييية؟
نيااااااااه


احمد سعيد
صح
ولا انا غلطان

مواطن مصري said...

@ حنا سكران

تركيا خايفة على مصالحها في المنقة و عرفت تلعب صح نفس اللعبة بتاعت ايران

العب على وتر الدولة العثمانية الحديثة


هههه مش بعيد يقولك ايران عاوزة تنشر الفكر الشعي ي كائنات الفضاء
لوووووووووووول فينك يا ستيفن سبيلبرج

طالب ثانوى said...

بوست تحفة يانوارة هلكنى على نفسى من الضحك

بصى بجد انا اخر مرة اشتريت الاهرام فيها يوم الاحد بجد بجد حسيت انى بقرا جريدة اسرائيلية مترجمة حجات عجب وشتيمة على سوريا وقطر كانهم هم اللى محتلين غزة بجد حاجة تقرف

مواطن مصرى
------------
انا بعد كدة هريح دماغى ومقراش التعليقات

مواطن مصري said...

احمد يا سعيد ما هو لو طول عمر بنفكر في تبعية الدول يبقى عمرنا ما نفلح انا قولتها و هفضل اقولها التغير عمرو مش من الانظمة التغير في بني ادم الاول يتغيرر


و بعدين يبقى الانظمة تتغير

طالب ثانوى said...

صحيح يانوارة هو انتى بكرة رايحة المعرض؟؟

Anonymous said...

حاولوا تترجموا الكلام دة وتنشروه فى مدونة الهولوكوسلت

وشهد شاهد
أهم مقابلة تليفزيونية فى التاريخ

هل تتخيلون رجل دين يهودى يعلنها صراحة فى أهم محطة تليفزيون أمريكية قائلا : يجب ألا تكون هناك دولة اسمها ' إسرائيل '!!

هذا هو حديث الشعب الأمريكى الآن بعد المقابلة التلفزيونية التى أجراها Neil Cavuto من محطة FOX NEWS الأخبارية مع رجل الدين اليهودى الأرثوذكسى الراباى Yisroel Weiss

وبالطبع نظرا لأهمية المقابلة و التى أطلقت عليها محطة الأخبار FOX NEWS اسم
THE MOST IMPORTANT INTERVIEW ON EARTH

وهاهى الترجمة بالعربية

أجرى نيل كافوتو Neil Cavuto : مقابلة لعلها أهم مقابلة تجرى هذه الأيام لأنها سفهت بشكل واضح وبعبارات صريحة تلك الكذبة الشيطانية التي خدعت ذوي النوايا الحسنة حول العالم وأقنعتهم بدعم هذا الشيء الشرير والبغيض الذي يسمي نفس 'الدولة اليهودية '.

الراباى Yisroel Weiss من جماعة اليهود المتحدون ضد الصهيونية يقول ل Cavuto وللعالم أن إسرائيل أفسدت كل شيء على الناس جميعا! اليهود منهم وغير اليهود .

الراباى Weiss: هذه وجهة نظر متفق عليها عبر المائة سنة الماضية أي منذ أن قامت الحركة الصهيونية بخلق مفهوم أو فكرة تحويل اليهودية من ديانة روحية إلى شيء مادي ذو هدف قومي للحصول على قطعة أرض وجميع المراجع قالت أن هذا الأمر يتناقض مع ما تدعو إليه الديانة اليهودية وهو أمر محرم قطع! ا في التوراة لأننا منفيون بأمر من الله .

Cavuto : ما المانع إذن في أن تكون لكم دولة؟ وما المانع في أن يكون لكم بلد تنتمون إليه؟ وما المانع في أن تكون لكم حكومة؟

الراباى Weiss: يجب أن لا تكون لنا دولة .

يجب أن نعيش بين جميع الأمم كما ظل يفعل اليهود منذ أكثر من ألفي عام كمواطنين مخلصين يعبدون الله ويتصفون بالرحمة الربانية .

وعلى العكس مما يعتقد الناس هذه الحرب حرب ليست دينية فقد كنا نعيش بين المجتمعات المسلمة والعربية دون أن تكون هنالك حاجة إلى رقابة منظمات الأمم المتحدة لحقوق الإنسان .

Cavuto: دعني أسألك هذا السؤال أيها الراباى.... هل كانت حياة اليهود أفضل قبل قيام دولة إسرائيل اليهودية .

الراباى Weiss: نعم كانت أفضل بنسبة 100%.... ففي فلسطين لدينا شهادة الجالية اليهودية التي كانت تعيش هناك وغيرها من الجاليات في أماكن أخرى بأنهم كانوا يعيشون في توافق وأنهم ناشدوا الأمم المتحدة بذلك حسب الوثائق التي بحوزتنا حيث أن كبير حاخامات اليهود في القدس قال : نحن لا نريد دولة يهودية .

وعند اتخاذ قرار قيام إسرائيل تم تجاهل سكان ذلك البلد من المسلمين والمسيحيين واليهود .

Cavuto: على أية حال لم يكن لديكم بلد تنتمون إليه ولكنكم كنتم غرباء لدرجة أن تعرضتم للاضطهاد والقتل عبر الألفية الماضية وخصوصا ما حدث قبل خمسين أو ستين عاما؟

الراباى Weiss: هنالك قتل بسبب معاداة السامية وهنالك موضوع آخر عندما تثير العداء بخلق معاداة السامية من خلال الصهيونية .

أي بعبارة أخرى أن الأمر لم يأت هكذا دون سبب ..... حيث أنك تطرق نوافذ جيرانك وتدعوهم إلى معاداة السامية .

Cavuto: أنت يهودي أرثوذكسي حسب علمي .... ما هو رأي اليهود التقليديون في ذلك الموقف؟

الراباى Weiss: الرأي الغالب لدى اليهود هو : صحيح أنه لا يجب أن تكون لدينا دولة ... ولكنها قامت ..... غير أن الدعاية الصهيونية بأن العرب يريدون رمي أي يهودي في المحيط وبأن هنالك حقد دفين لليهود مكنهم من إقناع الكثيرين من

اليهود وهو ما جعل هؤلاء يخافون من العودة إلى تلك الأرض .

Cavuto: حسنا ... لا يمكنك أن تلومهم فهذا صحيح .... أقصد أن لديك مثلا رئيس إيران الذي يقول أن المحرقة لم تقع أصلا ولو كان الأمر بيده لدمر إسرائيل وقضى على جميع اليهود .

الراباى ويس Weiss:

هذا كذب واضح .... فهو لديه جالية يهودية في إيران ولم يقتلهم عندما سنحت له الفرصة Cavuto:

إذن أنت لا تأخذ كلامه على أنه يريد قتل اليهود؟

الراباى Weiss: بل هو يريد تفكيك الكيان السياسي .... وفي الحقيقة نحن مجموعة من رجال الدين اليهودى (Rabbis) ذهبنا لزيارة إيران العام الماضي ...

واستقبلنا القادة الإيرانيون والتقينا بنائب الرئيس حيث أن الرئيس كان في زيارة إلى فنزويلا في ذلك الوقت والتقينا كذلك بالزعماء الروحيين وكلهم بينوا وبكل صراحة بأنهم ليسوا في نزاع مع اليهود .

Cavuto: إذن أيها الحاخام أنت تعتقد أنه طالما أن إسرائيل موجودة فلن تأتي بخير .

الراباى Weiss: اليهود يعانون والفلسطينيون يعانون ونحن نصلي من أجل التعجيل بتفكيك هذه الدولة اليهودية بطريقة سلمية .

Cavuto: إنه لأمر مثير أيها الحاخام ..... فهي وجهة نظر لا نسمع عنها في الغالب .

***************


إنتهت المقابلة المثيرة والتى بالفعل أدهشتنى!!!

لا بد من نشر هذا اللقاء في جميع أنحاء العالم بأسرع مايمكن . وهو بين يديك ..

مواطن مصري said...

بجد بشكر كل التعليقات الي كانت ضدي مكنتي اعرف ان لسة فية ناس لا يحترمو الرأي الاخر ع العموم سيبنالكم احنا اعلم و المعرفة

و مش هنزل لمستوى الناس الي بتستظرف و شكرا

طالب ثانوى said...

مواطن مصرى
-----------
طبعا احنا بنحترم الراى الاخر لكن انت متخيل انك اكتر من خمسين بوست الراى الاخر مش كتير شوية

مهندس مصري said...

انا موافقك في 99% من كلامك
بس ما تنسيش إن إيران محتلة جزر طنب الصغرى و طنب الكبرى و أبو موسى من دولة الإمارات العربية المتحدة

و رفضت ايران تحكيم محكمة العدل الدولية في هذه القضية
و لم تصل الإمارات عبر المفاوضات المباشرة مع إيران الى اي حل حيث ترفض إيران الإنسحاب من الجزر الثلاثة المحتلة

أما باقي كلامك فأنا موافقك عليه 100% يا نوارة

و بالنسبة لمواطن مصري

إرحم أعصاب الناس بآراءك الغريبة دي

أنا مش نشرت عندك قبل كده تعليقين طوال كانوا بوستين عندي مفندين كلامك كله و انت ما رديتش عليهم و ما عرفتش ترد

انت بتجادل على الفاضي بدون اساس او منطق

و نوارة لها الجنة إنها صابرة عليك و بتنزل تعليقاتك الغريبة

لو اتعملت انتخابات نزيهة بجد دلوقتي في مصر رأيك ده حيمثل أقلية سياسية
لها إحترامها
بس مش حتمشي كلامها على اغلبية البلد اللي شايفة رأي معظم الناس اللي هنا في المدونة دي

و بعدين اللي أعرفه انك لما تتناقش مع حد و يقنعك بمنطقه تقتنع و نخلص
مش تسكت شوية و بعدين ترجع تطلع من ناحية تانية علشان تجادل تاني في نفس الموضوع

إرحمنا يارب

ربنا يهديك يا بني و تعرف الحقيقة و الصواب فين

طالب ثانوى said...

انا اللى اعرفة ان الجزر ما كانتش تحت السيادة الاماراتية حيث ان

في 29 نوفمبر 1971 دخلتها القوات الأيرانية بعد انسحاب البريطاينيين من هذه الجزيرة، وكان ذلك قبل إعلان قيام دولة الإمارات العربية المتحدة بأيام قليلة، حيث طالبت بها الحكومة الإماراتية إلى جانب جزيرتي طنب الصغرى و أبو موسى، ولكن الحكومة الإيرانية تصر على انها جزر إيرانية كانت قد احتلت من قبل البريطانيين في السابق، اكتفت الإمارات بالوسائل الدبلوماسية لحل الأزمة تفاديا لتصعيد النزاع بينها وبين إيران. كان استيلاء إيران على هذه الجزر الثلاث جزء من صفقة تقاسم نفوذ بين إيران و السعودية بضوء أخضر بريطاني حصلت بموجبها إيران تحت حكم شاه إيران على الجزر الثلاث وأعلنت البحرين كدولة مستقلة.

مواطن مصري said...

و الله بقى انا بقول رئي و اانا غلطان اني قاعد في مكان المفروض بينادي ب الديموقراطية و الحرية ولا انت عاوز تسمع بس نفسك و تسقف لنفسك

و الله دة رائي عجبك عبجك مش عجبك براحتك

ولا انت عاوز تسكت الراي المضاد ليك و تسمع نفسك زي الحكومة يبقى انت فرقت اية عنها

انا فعلا دلوقتي عرفت ان الشعب المصري كلة غير مستعد لتجربة الديموقراطية و ان كل عاوز يسمع رائية بس ولا يحترم اي رائي

مواطن مصري said...

و لو دة اسلوبكم في الحوار قابلوني لو البلد دي اتغيرت

طالب ثانوى said...

ما تشاركينا بالراى يانوارة

مهندس مصري said...

فلسطينوا الداخل يمنعون الجنود البدو الذين شاركوا في الحرب على غزة من الزواج ودخول المساجد
التاريخ: 6/2/1430 الموافق 02-02-2009 | الزيارات: 2417
المختصر /

المختصر / ذكرت إذاعة الجيش الإسرائيلي بأن الأئمة في مساجد مدينة راهط القريبة من بئر السبع المحتل قاموا بطرد ومنع جنود الاحتلال من البدو الذين شاركوا في الحرب على غزة من دخول مساجد المدينة لأداء الصلاة.

كما ترفض العائلات في مدينة راهط والتي تربطها علاقات قرابة قوية مع سكان القطاع تزويج بناتهم للجنود البدو في راهط.

وقال احد جنود الاحتلال الذي شارك في الحرب في غزة:" إن الأهالي في رهط منعونا من دخول المساجد والجميع يرفض تزويجنا".

المصدر: مركز البيان للإعلام

mido said...

@ مواطن مصرى

قول رأيك براحتك بس استحمل النقد اللى فى الاغلب حيكون حاد

مهندس مصري said...

يا مواطن انا مش ضد انك تقول رأيك

إفهم يا بني

أنا بأقول لك أنا فندت كلامك عندك و انت ما ردتش
ليه ؟
لإن معندكش رد مقنع

عارف انت الشخص العنيد اللي بقول هو رأيي كده و خلاص هه

الرأي بيكون مبني على اسس منطقية مقنعة

لكن لما كل الناس تفند الاسس اللي بيعتمد عليها رأيك بشكل منطقي جداً

المفروض انت ترد بقى بمنطق يفحمهم و بحجج تفند حججهم

لكن لا يا بني انت بتتجاهل الرد

لإن مش بيكون عندك رد مقنع
أو بتعيد نفس كلامك القديم اللي الناس اثبتت غلطه بالفعل

يبقى ده مش نقاش يا مواطن

ده مجرد عناد و جدال بالباطل

المبدأ بتاع النقاشات بيقول يا تقنعني يا أقنعك

لكن لما آجي أقنعك تقوم انت بدل ما تحاول تقنعني تقول لي لا يا عم انا رأيي كده و مش حأغيره مهما حاولت تقنعني هه بدون أي اسباب منطقية تصمد للنقد و بدون ما ترد بالحجة على كلامي أنا او نوارة او احمد سعيد او حنا السكران او أي حد مختلف معاك
يبقى انت بتعاند و خلاص مش بتتناقش يا مواطن
:))

Dr.Online said...

بوست بيوجع قوي يا نوارة

بس احنا نستاهل

------------------

بالنسبه لجزر طنب و ابو موسى

انا طبعا مش بدافع عن استعمار اي حد لحد

بس فيه نظرية استراتيجيه هيا اللي مخليا ايران تتمسك بيهم غباء و خلاص بالقوه و العافيه و اللي مش عاجبه عنه معجبه

السيطره على الجزر دي معناها السيطره على المضيق مدخل الخليج العربي

طبعا لو كانت الامارات هيا اللي هتاخد الجزر دي فعلا مش مشكله

المشكله كلنا عارفين القواعد العسكريه الامريكيه اللي في كل دول الخليج

طب يبقى ايه الحل بقا لو ايران سمعت للقانون و العدل و اديتهم للأمارات (دا بفرض انها اصلا شايفه انهم بتوع الامارات)

هنلاقي من بكره امريكا عامله قاعده عسكريه هناك و ماسكه ايران من رقبتها (مدخل الخليج العربي) طبعا اي حد بيفكر و خايف على نفسه و عارف كدا مش هيفكر بقانون و حقوق لأنه هيقول يا روح مبعدك روح

الخلاصه: انهم ممكن يكونو فعلا من حق الامارات بس حقيقة الوضع الاستراتيجي بيقول مينفعش نسيبهم (طبعا وجهة نظر ايران مش انا) و الا ابقى بموت نفسي عشان يبقى شكلي حلو

و على فكره دول ميعرفوشي المثل اللي بيقول يا بخت من بات مظلوم و الا بات ظالم !!!!!!!!!!!!!!!!

Anonymous said...

زمان كان ليا واحد صاحبي كان مواطن و بعدين الحمد لله ربنا شفاه و بقى كويس خالص

Anonymous said...

المستشار إبراهيم الصغير.. صاحب الأحكام التاريخية

كتب شيماء القرنشاوى ٣/ ٢/ ٢٠٠٩
كانت أحكام جلسة أمس هى المشهد الأول لظهور المستشار إبراهيم الصغير يعقوب، رئيس دائرة فحص الطعون فى المحكمة الإدارية العليا على الساحة الإعلامية، حيث أصدر ٣ أحكام فى قضايا شغلت الرأى العام، حيث أيد تصدير الغاز إلى إسرائيل، وأكد أحقية قوات الأمن فى التواجد داخل الحرم الجامعى، ومنع دخول قوافل المساعدات الإنسانية إلى قطاع غزة إلا عبر القنوات الشرعية المخصصة لذلك.

والمستشار إبراهيم الصغير ترأس دائرة فحص الطعون خلفًا للمستشار إسماعيل راشد صديق، الذى تولى رئاسة الدائرة «الأولى موضوع»، بدلاً من المستشار نبيل ميرهم، الذى ساءت حالته الصحية.

شغل المستشار إبراهيم الصغير - الذى يبلغ من العمر ٦٥ عامًا - لعدة سنوات منصب رئيس إدارة فتوى رئاسة الجمهورية، الإدارة المختصة بحسم النزاعات الإدارية التى تكون «الرئاسة» طرفًا فيها مع أى جهة أخرى.

مـــى

Dr.Online said...

عفارم عليك (تركي دي على فكره)

دا الكلام اللي الكل بيقوله لمواطن

بس هوا مش سامع

تفتكر هيرد عليك

Anonymous said...

dr on line@
............
بصراحة اشكرك على توضيحك الجميل لموقف الجزر دى
دى تعتبر قضية امن قومى لايران
طبعا انا مش مع الاعتداء على اراضى الغير ولا حاجة
ولكن مش هينفع اعدائى يحررو نفسهم من قيود القانون اللى مش بيتنفذ اصلا
واجى انا اكتف نفسى بية
لمجرد ان شكلى يبقى حلو
ولو تفتكرو موقف جزيرتى صنافير وتيران فى حربنا مع اسرائيل
ازاى كانو مهمين ومتحكمين فى خليج العقبة كلة

دول نفس الموقف
ممكن تجيبو الاطلس
وتشوفو هم فى مضيق هرمز
نفس الموقف فى مضيق تيران على العقبة


هو هواة موقف حزيرة شدوان فى مدخل خليج السويس
وطبعا كلنا عارفين المعركة المحترمة اللى دارت على شدوان واستقتل فيها جنودنا الابطال

الجزر دى امن قومى لايران
ولو تلاحظو ان قدامهم مينا ايرانية مهمة جدا اسمها بندر عباس

معنى ان الامارات تاخد الجزر دى
معناة ان امريكا هتركب عالخليج العربى وتدلدل رجليها
فمش من مصلحتنا كعرب ان اى قوات اجنبية تتحكم فى الجزر دى
وطبعا انتم عارفين الامارات سكتها بتودى على فين

وبعدين بصراحة
ومحدش يزعل منى
اساسا دول الخليج دى من ستين سنة مكانش لها وجود
واللى عملها هو الاحتلال
بالظبط زى الاردن وسوريا ولبنان
مكانو كلهم بالاضافة لفلسطين حتة واحدة
اسمها الشام
بس الاستعمار كان عارف انة كدة كدة خارج
فقعد يمهد الطريق لدولة اسرائيل
بخلق دويلات صغيرة ضعيفة مقسمة بجوارها
لضمان امنها
وطبعا كلنا فاكرين الوكسات دى كويس


وبعدين اصلا يعنى حسب معلوماتى المتواضعة جدا فى الناحية دى
انا اعرف ان الامارات دى لحد وقت قريب
كانت مفككة
وكانت قبائل صغيرة
ازاى يعنى كيانات صغيرة زى دى يكون ليها سيطرة على جزر بحرية
بصراحة كلام مش مقنع
ماكلنا عارفين وضع الخليج العربى قبل عصر البترول كان عامل ازاى
وبعدين مش مهم الجزر دى تبقى مع ايران ولا مع الامارات
المهم ان الامريكان مايسيطروش عليها لمصلحتنا كمسلمين
وكعرب
وكدول منطقة
وطبعا احنا عارفين ان دة مش هيتحقق لو كانت الجزر دى تحت سيطرة الامارات
تاااانى يوم الصبح هتتبنى فيها قاعده عسكريه امريكية

نجاد دة راجل بيحمى بلدة وبيخاف عليها
والله الجزر دى لو كانت عندنا هنا فى مصر
كان زمان عوكل خصخصها وباعها بالكيلو
فى سوق التلات

مش كدة برضةيانوارة؟؟؟



احمد سعيد

عباس العبد said...

الناس بتشتم رجب طيب أردوغان مش علشان هو غلطان فى حاجة
الناس بتشتمه علشان مش طايله تشتم حد تانى , بتشتم اللى بالى بالك بس عن طريق غير مباشر
الناس بتشتم و تقول : يا تراكوة يا ولاد الكلب ياللى عايزين تتقدموا و تبقوا احسن مننا و تحافظوا على مصالحكم .. كأنها بتقول يا اللى بالى بالك يا ولاد ال..ياللى فرطوا فى مصالحنا
فهمتى قصدى

جبهة التهييس الشعبية said...

لا طبعا
يا بخت من بات مظلوم ولا باتش ظالم ده ايه؟

الدنيا دلوقت يا بخت من بات مقتول ولا باتش قاتل
ويا حياتي يا حياتك

وانا مش باقول ان تركيا ح تحرر فلسطين
انا باقول تركيا بتبص لمصالحها

وبتتعامل مع اسرائيل هي مخبية انها بتتعامل معاها؟

بس الحقيقة تعامل تركيا مع اسرائيل بيحرج الحكومة المصرية اكتر

لاننا كنا كل ما نتكلم على الغاز وللا على السيادة على حدودنا وللا على كرامتنا

يقولوا لنا احنا مش مغامرين احنا عاملين اتفاقية سلام

طب ما تركيا اهي
لا مغامرة ولا نيلة
ومتعاونة مع اسرائيل اكتر مننا

ح تديهم مية ببلاش زي ما بنديهم غازنا ببلاش؟

ح تسمح لهم يضربوا حدودها زي ما بنسمح لهم يضربوا حدودنا؟

تقدر اسرائيل تعمل ربع اللي بتعمله معانا مع تركيا

هل علاقة تركيا مع اسرائيل منعتها من مساندة المقاومة ولو على المستوى السياسي والدبلوماسي؟

اشمعنى احنا؟

هي العلاقات تمنع اننا يبقى عندنا سيادة وكرامة؟ تمنع اننا نبيع الغاز بفلوس مش ببلاش؟

ايه الحب العذري اللي احنا فيه ده؟

يا ضنايا
ده ولا قيس
ده احنا ناقص نكتب غزل عفيف في اسرائيل ونهيم على وجهنا في الصحراء

Zainab said...

This post is the greatest of all.you have said what is inside our hearts and minds.God bless you nawara

حرة المداد said...

مواطن مصرى
انا لن اناقش آراءك لانك لاتقتنع الا برأيك فقط، ولاني قرأت تعليقاتك العجيبة المتكررة المكررة في مدونات أغرب وأعجب بعضها لا يمكن ان يكون كتابها الا من عينة كتاب قائمة ليفني...ان لم يكونوا اسوا بمراحل....ماعلينا...لكن ياريت تاخد بالك من الاملاء بما انك مواطن مصري ومصر بتتكلم عربي...وبالنسبة للتغيير فان شاء الله سيحدث وساعتهانبقى نقابلك.

mado said...

صور علي فليكر عن ضحايا غزة من الاطفال


شوفي كدا

Anonymous said...

سؤال برىء يا نوارة
هوا مواطن مصرى ده قريبك؟ ولو مش قريبك سايباه ليه ينكد على الناس كلها بآرائه؟
أنا اللى فهمته من دخولى مدونتك على مدار أكتر من سنة إنك مش صبورة وبتوصلى لحد معين فى النقاش وتقفشى بعدها زى ما بيحصل أما بتتناقشى فى مواضيع عمرو خالد أو الشيخ يوسف القرضاوى .... ياريت بقى تقوليلنا ساكتة ليه على مواطن مصرى ده وسايباه وكل مرة تشرحيله الموضوع من الأول؟

Anonymous said...

والله كل اللي اقدر اقوله عنك انك ما تنفعيش تكوني لا صحفية ولا غيره انتي كبيرك تقعدي بحلة محشي على الناصية بتاعة حارتكوا وتقعدي تحدفي الناس بالطوب ... واحده لسانها مش عارفه تحكمه ولا تلمه ... الله يلعن ابو اليوم اللي خلاني اشوف مدونتك ... شيء مقرف ومقزز ولا تستسيغه النفس السليمة ... أنا آسف ان فيه مثلك

Anonymous said...

حملة مقاطعة الفن الهابط
بسم الله الرحمن الرحيم

الحملة عبارة عن مقاطعة تامة للسينمات ليه بقى ؟
احنا عمالين نشتكي من القذارات الي بنشوفها في الافلام و الموضوع بيتحول من سىء لأسوأ .. و بنشتكي من الوضع الغريب الي يخلي واحد ممثل هايف مليونير و آلاف الخريجين من طب و هندسة و غيرهم مرتباتهم ملاليم دا لو لقوا شغل أصلا ..
الطبيعي اننا بنلوم الحكومة كالعادة على الوضع دا .. بس لأ المسئولية الأكبر علينا احنا مش على الحكومة !!
لأن الموضوع عرض و طلب .. المنتجين بيعملوا الأفلام بالشكل دا لأننا عايزين دا و لأننا بنروح السينمات و بندفع . لو فكرنا في الموضوع دا هنحس بإهانة كبيرة قوي لينا !!
عشان كدا لازم نغير الوضع دا بإدينا و نقول لاااااا للإباحية .. لا للفن الهابط .. لا للهيافة .
خلينا نبقى عمليين و نحسبها .. لو افترضنا متوسط دخول السينما للواحد مننا مرة واحدة شهريا و بيدفع فيها 20 جنيه
يبقى لو وصلنا ل 100000 عضو في الحملة مقاطعين السينما يبقى احنا بنخسرهم شهريا 2000000 ( 2 مليون جنيه) .
و على الأقل قوي نبقى وصلنا صوتنا وعملنا الي علينا ..
و مطالبنا فن محترم , يحترم عقلياتنا و قيمنا و ديننا
خليك ايجابي متقولش "هو جت عليا يعني ماهو ناس كتير بتروح السينما"
ايوة على الأقل عملت الى تقدر عليه .

مهم جدا: قبل ماتنضم للحملة وتقاطع السينما لازم الأول تكون رافض الافلام دي من جواك ... يعني لازم تكون مش عايز الافلام دي بجد و عايز فن محترم و هادف .
و افتكر : "إن الذين يحبون أن تشيع الفاحشة في الذين آمنوا لهم عذاب أليم في الدنيا و الآخرة والله يعلم وأنتم لا تعلمون


http://www.facebook.com/home.php?ref=home#/group.php?gid=44104217671&ref=ts

Anonymous said...

الاخ انونيموس
بتاع حملة مقاطع الفن الهابط

والله انا تبنيت الحملة دى بينى وبين نفسى من زمان
من2004
لما خلت فيلم اسمة الباشا تلميذ
ومكملتوش

خرجت من نصة ونا حاسس ان دماغى اتملت براز

وحلفت مخشش الافلام دى تانى

بس المشكلة لا فيا ولا فيك

المشكلة فى الناس اللى ماتعرفش الفيس بوك
ولا عمرهم مادخلو على النت
ممكن يخلو واحد صاحبهم مثلا يدخل علية علشان ينزلهم كليبات الموبايل
بس دا اخرهم

هم دول اكبر زباين
وغالبية الشعب

علشان نجاح حملتكم لازم تخرجو من حيز الفيس بوك والمدونات
وتنزلو للناس اللى صوتكو مش بيوصلهم
انتو انزلولهم
لانهم مش هيطلعولكو
فوق

ربنا يوفقكم



احمد سعيد

مواطن مصري said...

@حرة المداد

انا بقول رائي و مش من حق اي حد انو يصنف رائي او يخونة

Anonymous said...

ايران ملهاش اطماع استعمارية ؟ ده استعمرت العراق من الباطن مع الامريكان . عمال اتخيل شكلك وانتي بتكتبي وصلة الردح دي ولابسة الشادور الايراني بتاع ماما.

جبهة التهييس الشعبية said...

اهلاااااااااااا

انت جيت؟

والله العظيم كنت لسة في سيرتك في البوست الاخراني

ازيك عامل ايه؟ انشالله ربنا ياخدك باذن الله

مسلم مصري said...

دي أحسن تدوينة قريتها عندك.

Anonymous said...

ما تبطلي شغل الفلح دة ,عمالة تدعي على الناس عمال على بطال هههههههههههههه المهم محدش بيستجيب لشغل الفلح بتاعك دة .خليكي في التهييس احسنلك

حرة المداد said...

مواطن.......على فكرة انت فهمت غلط...انا مش باخون رأيك لان أحيانا بتقول كلام معقول...لكن انا باعتب عليك وصعبان عليااختلاطك بمدونين مدوناتهم والقعدة معاهم تلخبط المخ وتخرب الدين....الاملاااااااااء يا مواطن اسمهارأيي مش رائي

Anonymous said...

يسلم بوقك...والله جبتها صح ويسلم راسك وراس اللي خلفك ويرحم والديك

مصر تحت الاختلال said...

انا معاكي ان ايران وتركيا بتحركوا لمصالح شخصيه بحته ايران ذات مرجعيه دينيه و تركيا بتحكم بحكومه اسلاميه يمكن هو ده الي قرب بينهم كمان كل بدل منهم ليها تاريخ قديم كدوله كبري مؤثره في العالمسواء الدوله العثمانيه او في ايران مش هنعرف نعد من بلادفارس لغايت دوله الصفاوين
العالم دلوقتي بقي كله احلاف يعني اروبا اتلموا مع بعض وكمان شدوا امريكا معهم في حلف الاطلسي بما ان الجماعه العربيه بتاعتنا مفيش منها رجا لازم نشوف مصالحنا مع نفسنا وندور علي حد نتحد معاه بالنسبه لامريكا هتبعنا عند اول مطب لان عندها في المنطقه الفرخه بكشك ايياهايعني يا جماعه مع امريكا ملناش مكان يا رب الناس في مسكنا في مصر يفكروا مره للمصلحه العامه مش الخاصه

مصر تحت الاختلال said...

انا معاكي ان ايران وتركيا بتحركوا لمصالح شخصيه بحته ايران ذات مرجعيه دينيه و تركيا بتحكم بحكومه اسلاميه يمكن هو ده الي قرب بينهم كمان كل بدل منهم ليها تاريخ قديم كدوله كبري مؤثره في العالمسواء الدوله العثمانيه او في ايران مش هنعرف نعد من بلادفارس لغايت دوله الصفاوين
العالم دلوقتي بقي كله احلاف يعني اروبا اتلموا مع بعض وكمان شدوا امريكا معهم في حلف الاطلسي بما ان الجماعه العربيه بتاعتنا مفيش منها رجا لازم نشوف مصالحنا مع نفسنا وندور علي حد نتحد معاه بالنسبه لامريكا هتبعنا عند اول مطب لان عندها في المنطقه الفرخه بكشك ايياهايعني يا جماعه مع امريكا ملناش مكان يا رب الناس في مسكنا في مصر يفكروا مره للمصلحه العامه مش الخاصه