هو انا ماحدش بيرد عليا ليه؟ باقول ايه العسل اللي احنا فيه ده؟

بيقول لك واحد من حماس لم تبرعات وداخل بيها من مصر لغزة راحوا ماسكينه وقالوا له جبت الفلوس منين، قالهم دي تبرعات ناس للمنكوبين، راحوا ضاربين عليها، اه وربنا، ضربوا على عشرة مليون دولار زكاة مال الناس وفلوس الايتام والمعاقين والمصابين ومنكوبي الحرب اللي هم اصلا سبب في اصابتهم لما قفلوا عليهم بالمفتاح من برة وهم بينضربوا جوة وقالوا لهم: لما تبقوا تموتوا يبقى ندخلكم

وبعدين بيقول لك قارب الاخوة اللي بيحمل مساعدات وفيه صحفيين واطباء ورجال دين مسيحيين ومسلمين واكل ومعونات طبية، قال لك بقى راحوا ناطين عليهم جوة المياه الاقليمية المصرية وظبطوهم بقى، وركاب القارب اتصلوا بمصر ومصر ما ردتش عليهم

ايه العسل اللي احنا فيه ده؟

انا مش سألت السؤال ده قبل كده؟ ماحدش بيرد ليه؟ اللي مش ح يجاوب ح اسقطه واطلعه من المدرسة واوديه المرور واقول لهم انه عليه مخالفة السير عكس الطريق عشان يدفعوه تلاتلاف جنيه ويحبسوه اربع ايام على ذمة التحقيق ويطلقوه من مراته ويدخلوا عياله الاحداث ويضربوا جوز خالته ويخلوا خالته تتفرج، مش بتذاكروا ليه؟ فين جدك اللي كان بيذاكر على اضاءة عمود النور وطلع الاول ودخل كلية الطب

- هو جدو دكتور؟

لا ماهو ساب الكلية عشان يشتغل ويساعد ابوه

الحمد لله ان امي عمرها ما قالت لي الكلام ده وانا صغيرة ابدا بس صحابي في المدرسة كان بيتقال لهم الكلام ده وكانوا مصدقينه وما استغربوش ابدا ان تقريبا تلات اربع جدود اللي في الفصل ذاكروا على عامود النور ودخلو الطب وسابوا الطب عشان يشتغلوا 

عشان كده لحد دلوقت مش عارفة افهم: ايه العسل اللي احنا فيه ده؟ اكيد صحابي في المدرسة زمانهم فاهمين دلوقت