Wednesday, 11 February 2009

الظاهر فيا شيء لله

انا مش قلت لكوا تبرعوا لعلاج الصهاينة نفسيا، اهو طلع معايا حق، الست دي، اولا انا مش عايزة حد يتريق عليها ولا يجرح فيها بجد عشان صعبت عليا وهي كل مشكلتها انها ست طيبة واتصدمت في حاجة كانت مؤمنة بيها، هي يهودية امريكية هاجرت للكيان الصهيوني من ستة وعشرين سنة ودلوقت بتسجل فيديوهات عشان تثبت ان فكرة اسرائيل كدولة هي مؤامرة نازية ضد اليهود، وان اللي في المراكز القيادية في الكيان الصهيوني مش يهود اصليين دول نازيين بيدعوا اليهودية، وان التعليم الصهيوني بيعمل برامج سرية للاطفال عشان يشوه نفسيتهم ويحببهم في القتل، وان الرعاية الصحية في الكيان الصهيوني بتحقنهم بحاجات تخليهم متوحشين وهي بتدعي ان دي امصال، وانها من ساعة ما ابتدت تكشف حقيقة الصهيونية وهي حاسة بدوخة هي وبقية افراد اسرتها، وان الشعائر الدينية اللي بتحصل في اسرائيل دلوقت مالهاش علاقة بالديانة اليهودية وبتقول: لو جدي وجدتي عايشين ما كانوش فهموا ولا كلمة من الشعائر الدينية الموجودة، وان دي مش شعائر دينية ده سحر اسود عشان يسحروا بيه الاسرائيليين، (مش عايزة قلة ادب انا الست صعبت عليا وفعلا خفت عليها يكونوا ح يموتوها وللا حاجة) وان الاطفال اليهود اللي في اسرئيل بيتاخدوا وبيتعمل عليهم تجارب اشعاعية، وان فيه مجموعة من زمان من اطفال اليهود اليمنيين تم ترحيلهم لامريكا وبتقول ان ترحيلهم لامريكان كان عشان (تاني مش عايزة قلة ادب قبل ما اتكلم) يربيهم السي آي إيه ويعمل منهم الجماعات الاسلامية الارهابية (قصدها القاعدة لان مافيش حد يمني غيرهم) عشان يستمتعوا بالفرجة على اليهود وهم بيموتوا اليهود وانهم مش مسلمين ولا حاجة دول يهود مخطوفين من اهاليهم، وان نظام الخدمات الاجتماعية هدفه خطف ابناء الفقراء من الاسرائيليين (اول مرة اعرف ان عندهم فقرا، يمكن قصدها ما يقدروش يجيبوا غير عربية دايو بالقسط) عشان يحقنوهم ويمارسوا عليهم السحر الاسود وان اللي  في الجيش الاسرائيلي دول محقونين بمواد معينة بتخليهم يقتلوا الاطفال، وان اللي بيدي الاوامر دي هم النازيين مش اليهود
وان النازيين غير انهم موجودين في السلطة، هم كمان موجودين في المستشفيات والمؤسسات الدينية والاجتماعية وان فيه عملية منظمة لاصابة اليهود بالغباء
الغريبة بقى ان الاسرائيليين اللي بيدخلوا لها بيتعاملوا معاها بجدية شديدة، يا اما بيزعلوا منها بجد وبيتناقشوا معاها، يا اما بيقولوا لها والله معاك حق فعلا وماحدش بيدخل يقول يا جدعان دي مجنونة غير كام واحد امريكاني، انا بقى صعبت عليا، هي مش مجنونة، ومش عايزة حد يقول عليها مجنونة لو سمحتوا انا باتكلم بجد، هي واحدة كان مضحوك عليها، وانسانة حساسة وطيبة ومش قادرة تستحمل اللي دولة الكيان الصهيوني بتعمله، ومش قادرة تصدق ان دول الناس اللي هي امنت بيهم وصدقتهم وعمالة تقول: مش اليهود اللي يحبوا يقتلوا الناس، احنا عمرنا ما قتلنا حد عشان نقتل الناس بالطريقة دي، انا مش عارفة اعتذر للعرب ازاي؟ احنا كنا علاقتنا بيهم قبل اسرائيل ممتازة، انا متأكدة ان الجيش الاسرائيلي تحت تأثير عقار معين ده غير نظام التعليم اللي مافيش زيه في اي حتة في الدنيا، ده اغرب نظام تعليم شفته في حياتي
(ملحوظة تانية: بجد مافيش يهودي تميز كان خريج نظام تعليم اسرائيلي)
طبعا انا واحدة بطبعي باحب اصدق نظرية المؤامرة وكل حاجة، بس ليه الكلام ده مش داخل نافوخي؟ لان فيه عرب في اسرائيل وبيتعلموا معاهم (اللهم الا اذا كان فعلا الاطفال اليهود بيتعمل لهم برامج خاصة سرية زي ما هي بتقول) ولو فيه حاجة زي دي ما كانش الفلسطينيين سكتوا الا اذا كان الفلسطينيين نفسهم وقعوا تحت تأثير السحر الاسود والحقن وعشان كده بيتخانقوا مع بعض ومنحوسين ومش عارفين يحرروا ارضهم لحد دلوقت:) المهم، انا ليه نزلت كلامها مع اني متشككة شوية فيه
عشان اثبت لكوا اني فيا شيء لله، مش انها مجنونة وتاني اللي ح يقول عليها اي كلمة وحشة ح ازعل قوي مش كل انسان طيب الناس تستهبله، بس فاكرين لما قلت لكوا بيخلقوا من مواطنيهم الليدي ماكبث اللي بتمشي وهي نايمة ويتهيألها ان ايديها فيها دم وتفضل تغسل ايديها وتقول الدم مش عايز يروح وتفتضل تستحمى وتحط برفان عشان ريحة الدم اللي هي متخيلاها تروح وفي الاخر انتحرت؟
هي قالت كلمة الحقيقة مهمة جدا وهي الخلاصة من كل كلامها: بيحطموا الانسان اليهودي معنويا وروحانيا وبيخلقوا منه وحش
(صحيح، مافيش حاجة اوحش من ان الانسان يتقتل اخلاقيا ومعنويا، لو مات ماديا كل الناس بتموت، بس لما يموت روحانيا واخلاقيا يبقى الحيوان احسن منه واسعد منه حظا) 
السؤال اللي فعلا بقى عايزة افهمه: مين المستفيد من وجود اسرائيل؟ لا اليهود مستفيدين، بالعكس دي اسرائيل دولة معوقة، وكل اللي هاجروا ليها قاعدين خايفين ومرعوبين وبيجيلهم كوابيس زي ما الست بتقول ومافيش انسان يعرف ينتج ولا يبدع ولا يبقى مفيد في ظروف زي دي ابدا، خصوصا لما يبقى حاسس بالذنب كمان ودي حقيقة بصرف النظر عن المحاولات الفاشلة لخلق ابطال اسرائيليين من ورق في مجالات الادب والفن كل ده كلام فارغ، واللي بيروج للحاجات دي بيبقى مغرض، ماهو انا ينفع ادي جايزة لقصيدة شرايين اليأس تتفجر في احقاد الضغينة مدام معايا فلوس كتير وينفع واحد تاني شرقان فلوس يعمل نفسه ناقد وهو حتة حمار ويقول على القصيدة دي من عيون الادب عشان ياخد اللي فيه النصيب، لكن ده ما يعملش قصيدة شرايين اليأس تتفجر في احقاد الضغينة منتج ادبي حقيقي، وصورتهم في العالم فعلا بقت وحشة، ماحدش بقى يحب اليهود دلوقت، الناس كلها بقت خايفة منهم، لكن ما حدش بيحبهم، عشان تبقوا عارفين بقى ماحدش بيفرق ما بين اليهودية والصهيونية غير العرب واليهود اللي ضد الصهيونية، غير كده العالم كله فاكر ان اليهودية هي الصهيونية. اه نسيت اقول لكوا ان الست بتقول ان هرتزل ده متآمر ضد اليهود وانه كان عايز يحولهم للمسيحية وطبعا خبطت في الكنيسة الكاثوليكية يا عيني هههههههههههه، الكل نازل تخبيط فيها من كل ناحية، طيب ادي اليهود خسرانين اكتر ماهم كسبانين، والامريكان والاوروبيين بيدفعوا ضرايب وبياخدوا ايه في المقابل؟ ولا حاجة، الناس بتحرق العلم الامريكي عشان امريكا بتسلح اسرائيل، طب ايه الفايدة اللي عايدة على امريكا كدولة وللا حتى على اقتصادها بما انهم بيحبوا الفلوس؟ وطبعا مش ح نجيب سيرة العرب، احنا بالصلاة ع النبي ماحدش حاسبنا على البشرية خالص، مع ان بقى، اللي عايز فلوس ييجي عندنا، اللي عايز ايدي عاملة ييجي عندنا، اللي عايز انتاج كتير وكويس ورخيص وابن ناس ييجي عندنا، اللي عايز يحمي اليهود من الاضطهاد يبعتهم عندنا، ماطول عمرهم كانوا عندنا بشوات، طب يعني احنا مفيدين لكل الاطراف ومع ذلك ماحدش بيحاول يستفيد مننا وبس حاطين على راسنا الحكام العرب عشان يضمنوا اننا ما تقوملناش قومة، مع ان احنا قومتنا هادية وطيبة خالص ونحب الاجانب زي عنينا وبنعمل خدنا مداس ليهم طول عمرنا، وبالعكس امريكا بتصرف فلوس كتير قوي عشان تخلي حكام العرب على كراسيهم، مع انها لو وفرت فلوسها وسابتنا ننمو ونتقدم ح تستفيد مننا اكتر بكتير 
طيب لما الكل مضرور من وجود اسرائيل الا اتنين وعشرين فرد بالتمام والكمال، ايه الاصرار الفظيع ده على دعمها؟ مين المستفيد؟ ماحدش يقول لي تجار السلاح، يا سلام؟ هو فيه اكتر من الحروب في الدنيا؟ ده مافيش اسهل من تسخين الناس على بعض في اي حتة، ماحبكش اسرائيل تفضل قاعدة، وطبعا حكام العرب هم المستفيدين الوحيدين بس ما اعتقدش انهم لهم السطوة اللي تجبر امريكا تفضل تدفع فلوس في حب العذري لاسرائيل
عمالة اقلبها في مخي، انا ما احبش حاجة ما يبقاش لها منطق كده، باتضايق

25 comments:

mido said...

الغرب بيستفيد من اسرائيل لأنها مزروعة فى جسد الأمة زى فيروس بيضعف فيه , وهم عايزين الأمة دى ضعيفة علشان يقدروا ينهبوا ثروتها و الصهاينة بيلعبوا الدور ده كويس


فى نفس الوقت الصهاينة بيلعبوا لحسابهم عن طريق السيطرة على مراكز القوة فى العالم كله فيقدروا يساوموا الغرب و يمسكوه من ايده اللى بتوجعه

ahmed said...

بالعودة لكتابات د/ المسيرى
حتعرفى ان اكتر ناس مستفيدة من وجود الاسرائيلين هنا
هما الاوروبين نفسهم
الاوروبين بيكرهوا اليهود فتخلصوا منهم عندنا

و النقطة دى واضحه اوى فى الافلام الامريكانى اما يحبوا يتريقوا على واحد يقولوا عليه انه شاذ جنسياً او يهودى

~*§¦§ Appy §¦§*~ said...

هى كلامها يخليها تصعب عليا مش عارفه ليه يمكن تكون صادقه الله اعلم بالنوايا بجد بس مش هتريق لان فعلا الطيبه مش هبل ولا ينفع حد يتريق عليها بجد
لو كان كلامها صح يا ريت تاثر فى ناس كتير
ربنا ياخد الصهاينه التانيه ويريح العالم منهم

ملحوسه يومم السبت فى حاجه فى اسطبل عنتر اعتقد عندك على بيها من غاده هى بعتت رسايل عموما التفاصيل هنا
http://bekyaforsale.blogspot.com/

Dr.Online said...

انا اول مشفت الكلام اللي الست بتقوله فتحت بقي على الاخر

و بدأت اشوف باقي الفيديوهات

لما وصلت للتالت بقيت مش قادر

حاسس ان لو مؤلف من اقوى مؤلفيين الخيال العلمي حاول يألف الكلام دا مش هيقدر

نفسي استسلملنظرية المؤامره لأنها مشوقه , لقيت انها مش هتريحني انا دي هتريحهم هما اكتر

معنى الكلام دول انهم ناس غلابه

وان قوادهم هما اللي شياطيين وان الشعب نفسه غلبان و مسكيين و مسيير

مش عارف

هل تتصوري ان اللي الست بتقوله ده ممكن يحصل ؟

ازاي و امتى و بأي نظامو تخطيط على اي مستوى سواء بالذكاء او العمق في الوقت

يعني قبل ما المانيا تقع و الا بعدها

طب هل كانو افراد و اتجمعو ؟؟؟ ازاي؟

و الا كانو جهاز من اجهزة النازيين و بيقومو بخطه

طب الهدف من الخطه ايه انهم يدمرو اليهود معنويا يعني

المعروف ان اللي كان بيكره اليهود للدرجه دي هتلر و هوا اللي كان بيقود لكن في الحيقيقه النازيه أذت شعوب كتير من مختلف الاجناس و الجنسيات

يعني مش بتكره اليهود تخصصا يعني

و انها تعمل كل ده (لو ينفع يتعمل اصلا) عشانهم مخصوص ملوش اي سبب منطقي

انا عارف انك قلتي محدش يقول عليها مجنونه بس انا قابلت حالات زي دي ... انواع من الشيزوفرينيا او البارانويا

بيبقى فيه صدمه شديده الشخص بيتعرض ليها و الصدمه ديمش بتأثؤر على ذكائه بس بتحرف تفكيره علشان يلاقي مبررات للي صدمه

و يحاول يقلل من وقع الصدمه على نفسيته فعقله المريض بيخترع ضلالات عشان يقدر يتكييف و يعيش

الضلالات دي لأنه بيبقى مستمدها من الللي حواليه بتبقى متناسقه و كل ما زاد ذكائه اصلا بيبقى الضلالات د منطقيه (طبعا هوا مش قاصد بس عقله المريض هوا اللي بيتكلم)

الفكره سحريه و غريبه و مغريه و طبعا و هيا تصعب على اي حد عشان مقتنعه باللي بتقول بيه بس زي منتي قلتي فيه حاجات مش مهضومه و متمشيش خالص

لو فكرتي كويس هتلاقيها تهد الافتراض من اساسه

و شكرا

تامر علي said...

طبعاً الكلام ده مش مظبوط لسبب بسيط وهو إن كل الأحداث دي مشار اليها في القرآن والأحاديث ... مشار لإن اليهود أهل عصيان وعدوان ليوم القيامة وأنهم لاعهد لهم وأنهم يوقدوا نيران الحرب بين الناس وأن الله سوف يسلط عليهم "الى يوم القيامة" من يسومهم سوء العذاب بسبب العدوان والكفر وتبديل كلام الله وعبادتهم لأحبارهم من دون الله .

كل ده مشار إليه ولو لاحظتم ذكر بني اسرائيل في القرآن كتير جداً اشارة لأن دورهم في المستقبل كبير جداً ... وهم وصلوا لما هم فيه بتخطيط سنوات طويلة من الجهد والمثابرة (في الباطل) حتى سيطروا على اقتصاد العالم والاعلام العالمي ومن خلالهم على السياسة الدولية ... ويمكن فهم الأحداث بصورة أعمق بالإطلاع على كتب اليهود ..بالإضافة لكتب الدكتور المسيري عليه رحمة الله كما اشار أ/ أحمد

شكراً

جبهة التهييس الشعبية said...

انا مش شايفة ان الغرب مستفيد حاجة من دعم اسرائيل يا ميدو
ايه الفايدة اللي عايدة عليه؟ عمال يصرف عليها وهي عاملة زي البلطجي اللي بياخد فلوس من الرقاصة ومالوش لازمة ولا حتى بيدافع عنها


احمد

هي فعلا بتقول كلام يأكد كلام المسيري
مش لازم كل كلامها غلط، ممكن تحليلاتها غلط لكن هي بتقول حقائق خطيرة بخصوص التعليم والنظام الاجتماعي والصحي

وحتى بتقول انهم مغييرين في طرق العبادة المتعارف عليها عند اليهود وبيخلوهم يتلو كلام هم مش فاهمينه
بس موضوع ان النازيين متسللين وعاملين نفسهم يهود دي واسعة شوية
بتفكرني بالناس اللي عندنا اللي بيقولوا اليهود مسيطرين على كل حاجة في حياتنا


ابي
اه
هي صعبت عليا، هي الظاهر كانت من الهبل اللي مصدقين في الحكاية ولما هاجرت اتصدمت

د.اونلاين
هي مصدومة بس مش لازم يبقى عندها شيزوفرينيا
زي ما قلت لك هي كلامها نصه حقائق هي بتسردها بالوقائع والنص التاني تحليلات
يمكن تحليلاتها تبقى غلط
تبقى مصيبة لو طلع كلامها صح
:)

تامر

لا معلش ثانية واحدة قول لي الاية القرآنية اللي بتقول ان اليهود بيشعلوا الحرب بين الناس؟ دول معروفين على مر التاريخ انهم ما بيبحوش يحاربوا، ده ربنا امرهم يحاربوا ما رضيوش وقالوا يا عم احنا قاعدين هنا انت مش نبي؟ روح حارب انت ومعروفين على مر التاريخ انهم طول عمرهم بيتجنبوا المواجهات السياسية والعسكرية
ايه الاية اللي بتقول انهم بيشعلوا الحرب بين الناس؟
الاية بقى اللي بتقول ان ربنا ح يبعت عليهم ناس تذلهم ليوم القيامة الكلام ده كان عن بني اسرائيل مش عن اليهود
ولو جمعنا كلام الست دي على كلام عبد الوهاب المسيري على كلام جمال حمدان ح يطلع اننا احنا بني اسرائيل يا تامر مش هم
انا هنا باتكلم من الناحية العرقية
بني اسرائيل حاجة واليهود حاجة تانية
اليهودية دي ديانة
وبني اسرائيل دول عرقية
الكلام اللي بيقوله جمال حمدان ان سكان المنطقة منتمين الى ما يسمى بالاعراق السامية، والاعراق السامية دي اعراق كتير منها السيريانية والاسماعيلية اللي هم العرب المستعربة اللي منهم سيدنا محمد صلى الله عليه وسلم، والعبرانية اللي هم بني اسرائيل والارامية وغيرهم
كل دول اسمهم ساميين ولغاتهم اسمها لغات سامية ولو سمعت الارامي ح يتهيالك انه عربي بلهجة معقدة شوية بس ح تفهم منه كلام كتير
وان سكان المنطقة دي طول عمرهم بيختلطوا من اول لحظة وابناء سيدنا اسحاق نفسه اتجوزوا اراميات وسيريانيات وفلسطينيات ومصريات كمان وان المنطقة ما بقاش فيها نقاء عرقي واليهود اللي كانوا موجودين ايام بعث سيدنا عيسى اللي هو كان يهودي نفسه فيه منهم بقوا مسيحيين وبعد شوية فيه من المسيحيين اللي هم من بني اسرائيل ومن اليهود الموجودين في المنطقة بقوا مسلمين وعليه فانت ممكن تبقى من بني اسرائيل وانت مش عارف لان سكان المنطقة اختلطوا جدا
يهود اوروبا بقى جمال حمدان اثبت انهم مش بني اسرائيل ومش ساميين

حتى بص على اشكالهم يا اخي، ده انا شكلي يهودي اكتر منهم

وعليه، فالوعيد اللي جاي لبني اسرائيل اذا كان وعيد لعرق بني اسرائيل يبقى صايبنا احنا مش هم

والدليل ان الصهاينة ماحدش بيذلهم ولا حاجة هم اللي بيذلوا الدنيا كلها اهو

وبعدين انت مؤمن بالقرآن كله وللا بتاخد منه اللي عاجبك؟
القرآن كله بيقول ان من اليهود ناس زي اللي بتقول عليهم وناس كويسة ومن المسيحيين كذلك ومن المسلمين مؤمنين صدقوا ما عاهدوا الله ومنهم منافقين ومنهم خلطوا عملا صالح واخر سيء
يعني القرآن نفسه لم يعمم على حد والا انت بتتهم القرآن بانه بيضطهد الناس من غير سبب
يعني ذنبه ايه اللي اتولد من بني اسرائيل ربنا يغضب عليه وهو لسة حتة لحمة حمرا لا عمل حسنة ولا سيئة؟

أكون أو لا أكون said...

السلام عليكم...
كيف حالك العزيزه نواره...
انتي فكرتيني بكلام كانت قالتهولي من زماااااااان صديقتي الافغانيه...
الكلام ده قبل ١١-٩-....
اقدم بكتيــــر...
كنا بنتكلم ليه هم هاجروا من افغانستان...
قالت لي:اليهود...
قلت لها: وماعلاقة اليهود؟
قالت لي اليهود عاثوا في افغانستان فساداً...
وقد جاؤونا من اليمن والسعوديه...

لم استوعب الفكره وقتها...ولكن بعد ماحصل ماحصل من بن لادن... تذكرتها...
-------
هل رأيتي فيدو الذي تحدث عن الشبان اليهود الذين شوهدوا يرقصون ويقفزون فرحا أثناء أصطدام الطائرات بالبنايات في -١١-٩
---------

اللعبه واضحه...!


على فكره... العرب مش بس للأيدي العامله... مش بس العبيطين اللي بيسلبوهم فلوسهم... مش بس اللي بيدوا نفط وغاز ببلاش...
مش بس اللي بياكلوا الضرب وبيشكروا وبيقبلوا الجزم...

لاااااااااا
ارض العرب مكب للنفايات النوويه و الإشعاعيه...

والعرب بيبيعوا ترابهم... وتقل مساحة ارضهم... وتكبر مساحة ارض اسرائيل وفرنسا...

و
و
و
إلي مالا نهايه...

شوفي إيه أكبر عيب في الكون... حتلاقيه بالعرب...

Anonymous said...

ارسل لك الاستاذ فتحي محمود نائب رئيس التحرير في الاهرام، رسالة على الياهو بدون ان يتضمن العنوان الشرطة التحتية هل وصلتك ؟

تامر علي said...

1-آدي يا ستي الآية وبتتكلم عن اليهود كمان مش بني اسرائيل علشان متزعليش

"وقالت اليهود يد الله مغلوله غلت ايديهم ولعنوا بما قالوا بل يداه مبسوطتان ينفق كيف يشاء وليزيدن كثيرا منهم ما انزل اليك من ربك طغيانا وكفرا والقينا بينهم العداوه والبغضاء الى يوم القيامه كلما اوقدوا نارا للحرب اطفاها الله ويسعون في الارض فسادا والله لا يحب المفسدين "

2-من المعروف فعلاً إن العرب وبني إسرائيل أبناء عمومة ودي حقيقة تاريخية لكن بني اسرائيل "اللي هو سيدنا يعقوب " اللي هما الأسباط كان لهم أنبيائهم وكتبهم السماوية حتى آخر أنبيائهم "سيدنا عيسى عليه السلام " اللي بعث قبل رسولنا الكريم عليه الصلاة والسلام ب500 سنه فقط وعند بعثة الرسول ظن اليهود أن نبي آخر الزمان سيكون منهم فلما كان من (العرب) كفروا به وظلوا على كفرهم حتى الآن وبحكم أنهم أهل دسائس ومكائد ظلوا مشتتين في الأرض واختلطوا بأجناس أخرى فعلاً ولكن هم أنفسهم لايعدون اليهودي واحد منهم إلا إذا كانت أمه يهودية بحسب معتقداتهم .

فبأي منطق القرآن هيخاطبنا إحنا كعرب ومسلمين بوعيد بني اسرائيل وهو في إجزاء أخرى بيخاطب المسلمين والمؤمنين بغض النظر عن الأعراق وعندما يتكلم عن بني اسرائيل يوجه الخطاب لأتباع سيدنا موسى ومن جاء بعده من أنبياء بني اسرائيل؟؟؟؟


3- طبعاً القرآن خطابه للناس ليس بحسب أعراقهم ولكن بحسب اعتقادهم ولايوجد اضطهاد حتى للكافر لكن الكلام عن "المعتدين " ومين اللي بيعتدي الآن إحنا ولا اليهود ؟؟؟؟ وعلى فكرة ارجعي للحكم الشرعي للمدنين الإسرائيلين في فلسطين المحتلة هتلاقي إجماع الأئمة أنهم غير مدنيين ويجب قتالهم وأي شخص مستوطن في بلد محتل لايمكن يكون انسان محترم لأنه أساساً بنى بيته على أنقاض شخص آخر يقتل ويهدم بيته .
شكراً للطرح المثمر

الحقيقه المصريه said...

دعوه للتضامن
لعلك علمت بالحكم الصادر ضدي بغرامه 42.500 الف جنيه لاني نشرت مستندات تؤكد خطوره شركه تراست للكيماويات ببورسعيد على البيئه وعلى العمال وعلى امن مصر القومي لذا ادعوك لزياره المدونه والوقفوف على اخر التفاصيل
وارجو في حال الاقتناع بما نشرته ضد الشركه من مستندات ان اجد تضامنا منكم
لان الرساله هناك رساله خطيره جدا موجهه للمدونون المصريون
وأنا اول من تلقى هذه الرساله
فأما ان نتكاتف واما سنقول غدا
اوكلت يوم اكل الثور الابيض

تقبل تحياتي تامر مبروك


http://elhakika.blogspot.com/


http://www.elhaqeqa.com/?page_id=1160

الحقيقه المصريه said...

دعوه للتضامن
لعلك علمت بالحكم الصادر ضدي بغرامه 42.500 الف جنيه
لاني نشرت مستندات تؤكد خطوره شركه تراست للكيماويات ببورسعيد على البيئه وعلى العمال
وعلى امن مصر القومي
لذا ادعوك لزياره المدونه
والوقفوف على اخر التفاصيل
وارجو في حال الاقتناع بما نشرته
ضد الشركه من مستندات ان اجد تضامنا منكم
لان هناك رساله خطيره جدا موجهه للمدونون المصريون
وأنا اول من تلقى هذه الرساله
فأما ان نتكاتف واما سنقول غدا
اوكلت يوم اكل الثور الابيض

تقبل تحياتي تامر مبروك


http://elhakika.blogspot.com/

http://www.elhaqeqa.com/?page_id=1160

===

Anonymous said...

لو رجعنا بكتب التاريخ كده كام قرن لورا هنعرف إن اليهود " المتصهينين " نفسهم كانت أمنيتهم أنهم يحتلوا فلسطين " لقد بدأت تلك الحركة فى الظهور منذ حملة نابليون على مصر عام 1798 عندما قام المليونير اليهودى روتشيلد ذو الميول الصهيونية بتمويل الحملة الفرنسية عن طريق البنك الذى يملكه بمدينة باريس وأن يجعل صناع السفن اليهود بميناء جنوه الأيطالى يقومون ببناء قطع أسطوله البحرى فى مقابل أن يعطى نابليون لليهود فلسطين لينشئوا وطن قومى لهم فيها بعد أن يحتل مصر و يحكم قبضته عليها و بذلك يكون الطريق ممهدا له ليزحف على فلسطين و يحقق لهم أطماعهم فيها و فشلت حملة نابليون على مصر فظهر أحد أحفاد المليونير الصهيونى روتشيلد مرة أخرى ( وكان أيضا يدعى روتشيلد ) بصفقة جديدة و هى أنشاء البنك المركزى الأنجليزى و تمويله و فى مقابل ذلك أعطاه الإنجليز وعد بلفور ) " منقول بتصرف من كتاب أ.جميل عارف " المؤمرات اليهودية على مصر " و بعض كتابات د. عبد الوهاب المسيرى
و إن كان الصهاينة مقدروش يحققوا ده بتوسع على الواقع إلا فى العصر الحديث بدايةً من 1948
أما كلام الست اليهودية فبعيداً عن السخرية منه هو فيه حاجات كتير منه صح " الوقائع مثلاً كلها صح " لكن التحليلات كلها مش داخلة دماغى و إن كنت أنا كمان من الناس إللى مقتنعين جدااااااااااااا بنظرية المؤامرة بس
دى واسعة أوى
احنا لو مرينا كمان على التوراه هنلاقى إنها بتتكلم عن الأرض العربية " من النيل للفرات " و كأنها ملك لبنى إسرائيل و الصهاينة طبعاً بيستغلوا الحكاية دى فلو أى حد بيملك حاجة ممكن يورثها و هى دى النقطة إللى بيلعبوا عليها فى الغرب
فمن ضمن عدة أمثلة من التوراه فيه فقرة فى سفر يشوع بتقول على لسان ربهم يهوه " كل أرض ستطئوها أقدامكم أعطيتها لكم كما كلمت موسى "
و الفقرة إللى بعديها بتفصل الأرض دى هيا أيه "من الصحراء وجبل لبنان إلى النهر الكبير نهر الفرات جميع أرض الحيثيين ، و حتى البحر الكبير* الذى فى جهة مغارب الشمس تكون حدودكم "
البحر الكبير* هو نهر النيل
و ما ننساش إن الأعلام و معظم رؤوس الاموال للشركات العالمية فى أمريكا و كل أوروبا تقريباً اليهود " المؤيدين للحركة الصهيونية " هما إللى قائمين عليها
فأكيد مش غريب إن أمريكا تعمل كده و تدفع الفلوس دى
و كمان برضه لو حطينا النقط دى جنب نقطة مهمة أوى و هى إن الشعوب فى أوروبا و أمريكا كانت فعلاً بتقرف من اليهود و بتخشاهم " كانوا دايماً مصدر لأثارة الفتن و المؤمرات ، كفاية بس إللى عملوه فى روسيا لوحدها لما قتلوا أكتر من 10 من قياصرة روسيا فى أقل من 50 سنة و كمان عملوا على تشويه عهدهم و قلبوا كل ميزة قاموا بها لجرائم تاريخية !!! "
و لو رجعنا كمان لتاريخ أمريكا فى بداية القرن العشرين تقريباً سنة 1907 هنلاقى إن كان فيه رسايل متبادلة بين بعض السياسيين " كانوا قلة " الذين لم يسيطر عليهم اليهود بالفضائح أو الأموال بيحذروا فيها من تنامى ذلك الغول الفاسد المسمى بالنفوذ اليهودى " على حد وصف أحد هؤلاء الساسة "
و هما كمان حطينهالنا كده زى الحمار الأعرج فى الطريق علشان البترول و علشان ميصحوش من النوم فى اليوم يلاقونا فجأة أتوحدنا " يعنى هى لو كانت عفن الخبز دى مش موجودة كنا هنتوحد ....... الله أعلم "
أما عن سؤالك عن الآية فالآية الكريمة بتقول : بسم الله الرحمن الرحيم " كلما أوقدوا ناراً للحربِ أطفأها الله ويسعون فى الأرض فساداً والله لا يحب المفسدين " صدق الله العظيم
و على فكرة فى أمثلة كتير
و آخر حاجة كنت عايزة أقولها إن إحنا مش لازم ننسى إن هتلر و النازيين كانوا بيقتلوا الناس من كل الأعراق و الأجناس ما عدا طبعاً الجنس الآرى و أنهم قتلوا من الأفارقة ما يقارب من 10 ملايين ده بحسب الأحصاءات و أنهم لم يقتلوا من اليهود إلا 400 ألف فى أكثر التقديرات " و كل الكتب التى تتكلم عن الصهيونية و المحرقة مثل كتاب الكاتب الفرنسى " رجاء جارودى " الصهيونية تثبت ذلك بالأدلة"
و لكن لأنهم أخبث أهل الأرض فها قدروا يرسخوا كذبهم و هلوساتهم فى العالم و يبتزوا بيها الشعوب الغربية
نيمو

جبهة التهييس الشعبية said...

اكون او لا اكون
لا
:(
ما تشتميش العرب، احنا كويسين والله بس البخت مال


تامر
طب والله كنت عارفة انك ح تقول لي الاية دي وقلت مش معقول يكون قصده على الاية دي

الاية دي مش تفسيرها انهم بيشعلوا الحرب بين الناس يا تامر، دي تفسيرها انهم عمرهم ما بيعرفوا يحاربوا اقرا تفسيرها في ابن كثير او في الطبري
يا تامر اليهود حتى في القرآن وفي الكتاب المقدس معروفين انهم بيخافوا من الحرب جدا وبيخافوا من الدخول في الصراعات السياسية
اقصد اليهود الاصليين يعني
بعد انتشار الاسلام ناس كتير من اعراق مختلفة دخلت في الاسلام
من ضمنهم ناس كتير من بني اسرائيل
اذا كنا بنتكلم عرقيا
وفيه تلات تغيرات في تاريخ الاعراق البشرية غيرت الخريطة العرقية للبني ادمين كلهم: الامبراطورية البطليموسية والامبراطورية الرومانية والدولة الاسلامية
سيدنا محمد ذاته من بني اسماعيل بس مش كل اتباعه من بني اسماعيل

الدولة الاسلامية كانت اخر مرة الناس تعرف فيها مين ابن مين ومين من عرق ايه
من اول القرن التالت الهجري ما بقاش حد عارف يعمل تتبع لاصله العرقي خلاص
وعليه
فإذا كان الوعيد لعرق بني اسرائيل فهم اكيد مش الصهاينة
لان الصهاينة مش بني اسرائيل ولاحاجة عرقيا
انا باقول لك اذا كنت بتتكلم عن الناس عرقيا يبقى الوعيد لينا مش باقول ان ربنا بيتوعدنا فعلا
اذا كنت بتتكلم عن اليهود
الكيان الصهيوني مش دولة يهودية
ولا لها علاقة بالدين اليهودي حتى اللي سيدنا محمد شهده
مش ان اليهود اختفوا، ما اختفوش ولا حاجة هم موجودين وكتير منهم ماسك الاقتصاد والاقتصاد بينهار اهو وبيوتهم اتخربت
لكن المشكلة يا تامر ان الكلام اللي بتقوله ده مافيش حاجة تدي لاسرائيل مصداقية قده
انت بتتعامل معاهم على انهم بني اسرائيل وهم مش بني اسرائيل
مين بني اسرائيل دول اللي شعرهم اصفر وعينيهم زرقا دول؟
ده انا وانت شكلنا يهودي عنهم
وبتتعامل معاهم على انهم يهود وهم مش يهود لا من الناحية الشعائرية ولا من الناحية الدينية
عشان تبقى عارف الاتحاد السوفييتي (اللي هو اكبر مورد للمهاجرين للكيان الصهيوني)
كمية المهاجرين المسيحيين منه مهولة، كلهم ناس فقيرة مش لاقية تاكل وسجلوا نفسهم يهود عشان يروحوا اسرائيل عشان قالوا لهم دي امريكا بتصرف عليهم والفلوس هناك ايه بالكوم

وعشان تبقى فاهم فيه ناس طلبت تحليل دي ان ايه واسرائيل رفضت لان قوامها كله قايم على المهاجرين من اوروبا الشرقية ومعظم المهاجرين من اوروبا الشرقية لا يهود ولا يقربوا لليهود من قريب ولا من بعيد

طب هم هنا عملوا تحليلات دي ان ايه لسكان المنطقة وللحفريات اللي لقوها ولقونا شايلين نفس الجينات بكل اخلاطها من الاف السنين
هم بقى مش عايزين يعملوا تحليل دي ان ايه ليه؟

اسرائيل دي كلها كدبة، وماحدش بيديها مصداقية غير اننا بنعاملهم على انهم يهود او انهم بني اسرائيل ونقعد نقول: ما اليهود طول عمرهم كده

طب اليهود (اذا كنا بقى مصممين نتكلم كلام عنصري ونعمم على الناس مع ان ربنا نفسه بيقول ليسوا سواء) معروفين انهم خوافين ومش بيحبوا يحاربوا

دول مش بيحبوا يحاربوا؟ دول بيتنشقوا على الحرب، كل ما واحد يقول لهم ح احارب ينتخبوه

من امتى بقى؟ من امتى اليهود محاربين؟

اليهود مسالمين لدرجة التملق (اقصد الصورة النمطية عنهم انهم بيتملقوا الاغلبية لانهم اقلية) فين بقى؟ اسرائيل دي اللي عمالة تدي كل الناس بالجزمة

ثم انت بتقول ربنا بيبعت عليهم اللي يذلهم
بقى دول مذلولين؟
هو فيه حد مذلول غيرنا؟

الناس شاكة ان جمال حمدان اتقتل عشان اثبت ان انثروبولوجيا بني اسرائيل الحقيقيين (عرقيا) موجودين في المنطقة ما خرجوش منها واللي برة دول متهودين بسبب الحادثة الشهيرة اللي حصلت في دول الاتحاد السوفييتي قبل الاتحاد السوفييتي، اللي هم الاشكينازي كلهم، مافيش حد فيهم بني اسرائيل عرقيا ده غير انهم الفوا ولحنوا في اليهودية واخترعوا دين اليهود الشرقيين ما يعرفوش عنه حاجة خالص
----
انونيمس

لا رسالة الاستاذ فتحي ما وصلتش
ممكن يبعتها تاني لو سمحت

Dr.Online said...

نواره انا بختلف معاكي يا نواره خالص في النقطه دي

فكري معايا كدا

فيه فرق بين اني ابقى جبان و بين اني ابقى عاوز اقتلك

فيه فرق اني ابقى عاوز أأذيك و شايف ان أذيتك واجب مقدس و اني ابقى بدور على طريقه اني اعمل كدا من غير معرض نفسي لأي خطر

اللي مشهور عن اليهود الجبن و الخسه و التأامر عشان الوقيعه و الحرب

اللي ممكن يكونو بيحركوها

او بيشاركو فيها بطريق غير مباشر

او حتى بيخوضوها و هما عارفين ان سلاهم و تجهيزاتهم بتأمنلهم امان 99ز9999999%

مش معنى انك جبان و مش عايز تموت حتى علشان معتقدك انك متحاربشي لما تتأكد ان كل الظروف مواتيه و الكفه ناحيتك الف في الميه و طبعا يا ريت لو يكون معايا ناس تانيه بتدعمني بالمال و السلاح و احيانا البشر كمان عشان مبقاشي انا الخسران سواء انتصرت اواتهزمت

ايه {ايك؟

رابطة هويتي اسلامية said...

الحجاب حقيقة ثابتة أم مجال للتفكير

من باب تناول جميع الأراء وفتح باب النقاش كان لابد أن نتبني في رابطتنا هذا النقاش الذي سوف يجعل من النقاش مرجع للجميع للوصول إلي الحقيقة التي يعرفها البعض وتخفي علي البعض ويحاول البعض تجنبها.
ومن هنا تبنت الرابطة أن تكون هي حجة علي من يدور بينهم النقاش علي صفحاتها.
نفجر الجديد دائما حوارنا اليوم
الحجاب حقيقة ثابتة أم مجال للتفكير
وفيها ننقاش بعض المدونات التي أعلنتها صراحة رفضها للحجاب وحوارنا اليوم موجه إلي مدونة " مذكرات ثائرة ".
ندعوكم للمشاركة في هذا الحوار المفيد
تقبلوا دعوتنا ننتظركم لنستفاد منكم
رابطة هويتي إسلامية

مهندس مصري said...

http://ahmednasr.com/wp/archives/687
الترجمة العربية لـ رسالة من طفل فلسطيني إلى الرئيس الأمريكي
منشورة بمدونة إرحم دماغك

مهندس مصري said...

المقصود باليهود هما اللي بيقولوا على نفسهم يهود
الناس مش خبيرة في الأديان و حتقعد تحلل مين اليهودي سليم الديانة و مين منحرف الديانة

كل اللي بيقول على نفسه يهودي و أوراقه الرسمية بتقول كده و السلطات الرسمية معترفة بكده يبقى يهودي بغض النظر عقيدته اليهودية سليمة و لا لأ لإن ده ما يهمنيش في شئ

إنتي بتقاوحي في إيه ؟
معروف فعلاً إن اليهود بيشعلوا نار الحرب و بيقوموا الناس على بعض
و لكن ده ما يتعارضش مع جبنهم
طيران و قصف من بعيد و هما مش حيتأذوا في حاجة
جنود خط المواجهة الأول فيهم كتير من الدروز المجندين في الجيش الإسرائيلي
الجنود اليهود مش بيدخلوا أي أرض غير بعد ما يحرقوها و يطهروها بالقصف الجوي و المدفعي
و بيحاربوا دايماً من واء جدر او في قرى محصنة
و علشان كده الدبابة ميركافا 4 هي أكثر الدبابات تدريعاً و تحصيناً بالكامل
و علشان كده بيرقعوا بالصوت في اي مواجهة مباشرة قريبة

ثم الحديث بتاع لا تقوم الساعة حتى يقاتل المسلمون اليهود
تفتكري بيتكلم عن اليهود صحيحي العقيدة

بلاش تلفي و تدوري بالكلام
الفذلكة اللفظية وحشة

اليهود هما اليهود يا نوارة

و فيه منهم ناس كويسيين بنص القرآن لكن أغلبهم زي الزفت

ثم إحنا كمسلمين بنقول لو اليهود على عقيدة سيدنا موسى الصحيحة كانوا اسلموا

زي ما المسيحين بيقولوا انهم لو كانوا على العقيدة اليهودية الصحيحة كانوا آمنوا بالمسيح عيسى عليه السلام

ببساطة يا نوارة اليهود هما اليهود و بلاش تعقدي الدنيا

بالنسبة لكلام الست
سردها للوقائع سليم و استنتاجاتها غلط طبعاً
بس هيا بتحاول تلاقي تبرير يساعدها على نفي الوحشية دي كلها عن اليهود قومها اللي هي مش مصدقة حالة الوحش اللي إتحولوا له

جبهة التهييس الشعبية said...

انا مش مبسوطة من شتيمة اليهود دي يا اما اللي بيعمم عليهم بالطريقة دي يقبل الكلام اللي بيتعمم علينا

مدام بتشتم الناس بديانتهم يبقى تقبل ان حد يسب لك الدين
ما تزعلوش بقى لما يرسموا سيدنا محمد صلى الله عليه وسلم ويتريقوا عليه

جبهة التهييس الشعبية said...

واحد زي ده

http://www.youtube.com/watch?v=NR3ouOe9iyE

يتسب له الدين ليه يعني؟

مهندس مصري said...

و ده يرجعنا لفكرة التعميم تاني
لما انتي كنتي بتقولي الرجالة كذا و كذا و انا قلت لك قولي معظم مش كل
فقلتي لي ان قصدك واضح و انك بتعبري بالكلمة عن معظم مش كل
سواء بقى الرجالة او الستات او شعب مصر او العرب او اليهود
كلنا بنستخدم الكلمات دي علشان تعبر عن معظم الناس دي مش عنهم كلهم

فاكرة كلامك و لا نسيتيه

و مش شتيمة لما الواحد يقرر حقائق واقعة منهم حالياً
و مش شتيمة إن الواحد يوصفهم بما هو فيهم و بما هو مذكور في القرآن و الحديث الشريف

:))

و لما اقول على واحد يهودي يا يهودي دي مش شتيمة

زي ما لو حد قالي يا مسلم مش حيكون شتمني

و ده مش سب للدين

جبهة التهييس الشعبية said...

لا طبعا ده قياس خاطئ خالص

عشان لما بتقول الرجالة المصريين كذا انت بتتكلم على ثقافة معينة بتتحكم في تربية الرجالة او الستات المصريين
زي ما بتقول المصريين دمهم خفيف

لكن ماحدش بيقول المسلمين دمهم خفيف

الكلام عن ان اليهود كلهم حاجة واحدة بالرغم من ان فيهم مصري وفيهم انجليزي وفيهم روسي وفيهم اثيوبي وفيهم هندي وياباني

ده بيأكد النظرية الصهيونية انهم حاجة واحدة

طب المسلم الانجليزي طباعه مش شبه طباع المسلم المصري لان المسلم المصري اتربى في ثقافة ومجتمع معين مختلف عن المسلم الانجليزي

والديانة مش عرقية
اذا كنت من انصار الناس اللي بتقول ان العرقية بتأثر على طباع الناس ولو ان ده كلام بعض الشيء عنصري لكن ده لا ينسحب على الديانة

الله
امال انتوا ضد اسرائيل ليه بقى؟
ما لو الكلام ده صحيح ان طباع اليهود هي هي في كل حتة وفي كل زمن وفي كل مجتمع طيب يبقى هم شعب واحد بقى ومتشتتين ليه؟ ما من حقهم يبقى لهم وطن قومي ويبقى هم الوحيدين اللي لهم حالة خاصة كده

عشان مش كل المسلمين زي بعض ولا كل المسيحيين زي بعض
هم بس اليهود (وفقا لكلامكوا) اللي زي بعض

مهندس مصري said...

هههههههههههه
يا سلام
و هما مش بيتربوا على حاجة واحدة زي بعض
مش بيتربوا على أسفار العهد القديم و على التلمود و على نظريات الصهيونية و الوطن القومي الموعود
الأطفال الإسرائيلين مش بيتربوا على مناهج عنصرية و برامج وحشية تغسل دماغهم و تخليهم وحوش لا ترتوي الا بدماء العرب و المسلمين
مش بيتربوا من صغرهم على إن العرب و المسلمين أعداؤهم اللي مش لازم تأخذهم بيهم شفقة او رحمة

هما مختلفين في حاجات كتير بس لهم بعض السمات العامة المتشابهة اللي بتنطبق على معظمهم

و كلهم ما إتولدوش كده
كانوا مولدين على الفطرة يا بنتي زي أي بني آدم
بس تربية أهلهم لهم هي اللي عملت منهم كده لو فاكرة الحديث

الآية بتقول إيه ( تحسبهم جميعاً و قلوبهم شتى بأسهم بينهم شديد )
يعني فيه بينهم إختلافات و فيه بينهم تشابهات و سمات عامة

بالنسبة للمسلم المصري و المسلم الإنجليزي
فيه بينا إختلافات و فيه برضه صفات عامة بتجمعنا كلنا خصوصاً لو كنا ملتزمين بدينا و دي بتكون واضحة قوي في الحج

يعني المفروض المسلمين الملتزمين صادقين و كرماء و لا يخافوا من التضحية في سبيل الله و نفوسهم صافية و بيحبوا الخير للكل و مش بيشربوا الخمر و صفات غيرها كتير
نابعة من إلتزامنا بديننا

و اليهودي برضه لو إلتزم بما هو مذكور في التلمود من بقر بطون الحوامل و قتل كل الرجال و استعباد كل النساء و الأطفال في البلاد التي يقوم بغزوها يبقى حتلاقي بينهم صفات سوداء مشتركة كتير ناتجة عن تربيتهم الغلط على افكار غلط

كون ان فيه شوية فيهم محترمين و قلوبهم مش اقسى من الحجارة زي حال معظمهم ما ينفيش السمات العامة لأغلب مجتمعهم

كلهم حاجة واحدة من ناحية كرههم و عداوتهم لينا و قلة منهم بس اللي مش بتعادينا

لكن من ناحية الثقافة العامة و الصفات المكتسبة من رجوع اصولهم لدول مختلفة هما مختلفين فيها

لما أقول إن بينهم سمات مشتركة و صفات مشتركة ربنا وصفهم بيها في القرآن مش معناه إنهم نسخ متطابقة من بعض

لا أكيد بينهم إختلافات
بس الصفات اللي ربنا ذكرها موجودة في معظهم
سواء إشعال الحرب بين الناس
الجبن و القتال من وراء جدر او في قرى محصنة
و غيرها كتير من الصفات المذكورة في القرآن

احمد سعيد said...

نوارة
فيه فرق بين اننا ننتقد الدين اليهودى الموجود الان
واننا ننتقد الرساله اللى نزلت على سيدنا موسى
الدين اليهودى الان
لا مش هقول الان
الديانه اليهوديه من اكتر من الفين سنه
انفصلت تماما عن العقيدة الحقيقيه اللى نزلت من عند الله عز وجل
ولا يوجد بينهم اى سمات مشتركه
انتى قريتى التلمود بتاعهم؟
المشنا والجمارا
بجد لو قريتى فقرات منهم هتجيبى كل اللى فى بطنك
ايه الغل دة
عداء مستحكم مش هقول للمسلمين
للبشريه كلها
كل الناس اى كانوا
دة للحياة ككل
اى حاجه حلوة
حتى الذات الالهيه والملائكه والرسل والانبياء
نالهم ايضا الكثير
انا مش ضد الاديان التانيه
كل واحد حر فى دينه
اللى عايز يعبد الله هو حر
يعبد تماثيل هو حر
يعبد الطبيعه ولا يعبد البقر هو حر
دى حريه ربنا كفلها لكل انسان واختيارة سيحاسب عنه امام الله
انما لما يبقى دينك بيدعو لبقر بطون الحوامل
وشرب دماء الاطفال
ونشر الرذيله بين الاخرين
ويقولك لو عديت قدام كنيسه ارجع خطوة لورا وتف
ولو جامع ارجع خطوتين وتف
ولما يقول ان المرأة احط من الحيوان
ولما يقول ان الله عز وجل يبكى باستمرار لانه سمح بخراب اورشليم
ولما يقول ان الله يجلس فى اخر اليوم يتدارس العلم مع ابليس وفى الليل يلعب مع الحوت ملك الاسماك
ولما يقول عن اى شخص غير يهودى انه اقل من الحيوان ودمه وماله واهله حلال لليهودى
و
و
و
دا الكلام دة اللى موجود فى التلمود وفيه كلام اسوأ بكتير مينفعش يتنشر ولا مؤاخذة
التلمود المنتشر والمعروف
فما بالك بالكتب المخفيه بتاعه الصفوة او القباله
زى كتاب الزوهر كدة
دة يبقى دين دة؟؟؟؟
دة مش دين دة فيروس

Anonymous said...

وده يثبت نظريتي إن احنا أحفاد بني اسرائيل مش اليهود
مسلمو بني اسرائيل
نفس التصرفات نفس الكلام نفس الكسل و الأنتخة قول لربنا و هو اللي يعمل و احنا قاعدين هنا مش هانتحرك.استغفر الله و حسبي الله و نعم الوكيل
يا سبحان الله التشابه التاريخ بيعيد نفسه أما بقى يهود اليومين دول بتوع شغل و مؤذيين و جمال حمدان قال دول مش من سلالة بني اسرائيل و أنا أؤكد على كلامه

احمد سعيد said...

الاخ انونيموس
...............
احنا احفاد بنى اسرائيل؟؟؟؟
ازاى يعنى؟
برضه مهما كان تخاذلنا وسلبيتنا
بس احنا معملناش زى بنى اسرائيل
على الاقل لسه فى ناس رافعه راسها
وحاطه ارواحها على اديها
والنماذج الكويسه كتير
معلش
انا مش موافقك على رايك