Saturday, 7 February 2009

بيعلاموا العيال في أسيوط ثانتس ديفيند

يا حليلة، وزارة الخاردية الاموركاني ع تعلام العيال في اسيوط انهم يحبوا اموريكا ويرفعوا اعلام امريكا ويحتفلوا بسانتس ديفيند، يعني عيد الشكر يا داهل انت وهو، وبتشترط انهم يبجوا من اسر فجيرة اكمن الغلبان ع تطمر فيه اللجمة اللي ع يوكلوهاله وجال لك بجى فيه بت اسمها يسرا صرفوا عليها الفين دولار، دولار ينطح دولار، عشان يعلاموها (ولاد النتنة الفين دولار دول ايه؟ علموها تعمل مفارش كروشيه؟) والبت بجت متعلمة ومتنورة آخر حادة وجالت لهم اول هام اني اتعلامت احترم الاختلاف!!! امااااال لزمن ولابد احترمه واولت لمن اشوفه وهو داي من باعيد اجوم افز من موكاني واديله التمام، واللي ما ع يحترمش الاختلاف ع نطخه ومالوش دية حدانا واني رفعت العلم الاموريكاني وكان ع يرفرف، اصلك ده علم يرد الروح، ايشي احمر على ازرج وندوم كاتيييييير والوالية السفيرة دات حدانا، بيضا جشطة، تجولش كلوب منور في ليلة عتمة؟ وامي اولت لمن شافتها زغردت وجالت لها شالله السنة الداية تبجي في الحجاز يا اميرة يا بت الاصول، والمثل ع يجول لك اطعم الفم تستحي العين، وهم في عيد الحمد لله والشكر لله دابوا لنا ديك رومي كابيييير وجعدنا ناكل فيه أسبوع بطوله والواحاد حاسس انه بجى اموريكاني يا ولد، الديك الرومي رد الدموية في جتة النفر منينا وجالوا لنا لزمن التسامح من دوة الجلب والتسامح مافيش احسن منيته ابويا جالهم وماله، المسامح كريم واللي مش ع يسامح ع نبج بطنه بجيج وطبعا الديك الرومي وابرة الكاروشيه دولم غير المعونة اللي ع يدفعوها للحاكومة، والمعاون ربنا، ناس فييسة وما ع تستخسرش فينا حادة، ودابوا لاخويا كوتش وبروفل، بس ربك والحج الولا ما رضيش يلبسه، اصله كان احمر ودي عيبة حدانا في البلد، بس اخدناه منيهم عشان ما نكسفش ايدهم، خوادات بجى ومهماش خابرين عوايدنا، امي فكته وربطت بيه خشم الباهيمة اصلها ع تولد جريب، وجالوا لنا لزمن تحبوا اموريكا واحنا طبعا ع نحبها اومااااال، ما نحبهاش كيف؟ دي حتى توبجى جلة اصل هو احنا جطط ناكل وننكر؟ والسلام عليكم ورحمة الله وبركاته حاف آه نايص طايم.

7 comments:

Anonymous said...

woow. Have you ever seen ( zeyarat al saied AlRaees Movie) by Mahoud Abdel Aziz.

Ahmad said...

نوارة,
الواحد حاسس ان بلدنا بقت سداح مداح, اللي يقدر يعمل حاجة و يجري بعدها يعملها و ماحدش هايسأل.
أتساءل, هل ممكن امريكا يقدر تعمل كده في بلد تانية؟ غير العراق قصدي يعني.
حاجة تقرف و الله العظيم
أحمد

Punny_Punny said...

ههههههههه ظريفة
بس علي فكرة أسيوط بالذات الإخوان فيها نشطاء جدا علي الرغم من رفضي لأفكارهم لكن بقول أنهم عامل قوي في نشر روح الكره لأمريكا و اسرائيل و الحكومة المصرية في أسيوط

انسانةعادية فى عالم مش عادى said...

بس علي فكرة أسيوط بالذات الإخوان فيها نشطاء جدا علي الرغم من رفضي لأفكارهم لكن بقول أنهم عامل قوي في نشر روح الكره لأمريكا و اسرائيل و الحكومة المصرية في أسيوط



كلامك صحيح وتعالوا شوفوا كمية الاعتقالات اللى فيها

Anonymous said...

ما هم بيعتقلوا الإخوان
علشان يفضوا الساحة

لحبيبهم الأمريكان

و شرفت يا نيكسون بابا
يا بتاع الوترجيت

الإخوان وقفلنلهم فى الزور
يبقى لازمن و لابد
علشان التليفزيون
يتلون
و العربيات تتمول بدل البنزين برفا

نعتقل الإخوان
و نحبس حماس جوه القفص
و الصهاينة يخلصوا عليها

كلها سياسة ماشية فى خط مستقيم واحد
و الرادل الشريف كلمته واحدة

و عوكل يطلعلنا لسانه بعد كل حركة
بينقطنا بيها .. و يقول

أنا زى ما أنا
و اللى مش عجبه يتغير

يتغير دمه بأه
تتغير ولائته
مش فارقة

فعوكل يحدثكم من داخل الفريزير

عوكل تحت التجميد

مــــى

مهندس مصري said...

إيه المسخرة دي ؟

يعني اللعب في دماغ العيال على ودنه

الله يخرب بيت المعونة و سنينها

samanello said...

علي النعمة أحنا شعب جليل الحيا و عيختشيش .. الواحد معرفشي يجول أيه و لا يودي وشه منكم فين .. الناس الأمريكانيه ديلي أجدع ناس مجطعين و مشحطيطين نفسيهم علشان ولادنا و مكلفين روحهم و عاملين الواجب و زيادة و ممخلينيش على حيطهم غبار .. و جايين حدانا في الجحر اللي متكحرتين فيه .. و مكبرين بينا و يعزمونا على .. مولد سيدي سانكس جيفن .. ولا مكلفينا ولا جرش صاغ وجايبين وكلهم معاهم ودبحين الديك اللي حداهم سخن موحوح و سلطة كول سلو و تحبيش لزوم الجعده .. و لا نجدر ( من التقدير ) الناس اللي ضاربه المشوار ده كولاته و لانجولوا الناس ديلي مستحملين البصه على منظرنا اللي تسد نفس الحرباية الدكر و مكرفصين ( من القرفصاء ) على ركبهم و لا كلاب السكك في الدردة التالتة بجطر الصعيد .. الله لا يعيده بيهم الا والع وهم لحالهم فيه حتى من غير سواج .. و كاسين عايلنا بكم شرز ( أوفر أول ) من المفتخر شغل بره مش .. ماركة وكالة البلح ليمتد .. اللي ناحل وبرنا وحايخد من جسمنا راجات .. و مفرفشينا وعيعلمونا رقصات و حاجات كتيرا زينه .. والله يا شعب معيعجبش العجب ... حتى ماجاتش من الجريب لا بابا .. ميدو .. ولا ماما .. شوزي .. جات حدانا و رقصت ويانا و لاجابتا لنا ديك رومي .. بس نسمعهم في تلفزيون عم صميده البجال .. هنعمي الصعيد .. و التعمية الشاملة لمحافظات الجنوب جاية.. جاية .. إلا بالمناسبة يا ست التعمية غير الطعميه اللي حدانا .. و السيدة في ضهرك أنا و أبويا مستنيه التعمية الشاملة على المحطة من يجي كام سنة و مشتكيناش و لا حاجة ما هو أحنا شيفين جيرنا و أحنا في أحسن حال بس ناجص علينا كم شوال صبر أحسن اللي حدانا نفد