اتفرجوا على المشاريع اللي تفرح

وهنا تتجلى اسمى ايات الديمقراطية، اذ استجابت الحكومة المصرية الغراء لنداء الشعب بانه يبقى عندنا اي مشروع ونعمل لنا اي منظر فراحت عاملة المشروع ده

بتبص برة؟ طب ما تبص جوة الاول، تقييد تعدد الزوجات؟ تقييد تعدد الزوجات يا عالم يا مفترية؟ هي الناس لاقية تتجوز اولاني لما تتجوز تاني؟ ده على ما يلاقي شغل ويكون نفسه ويجيب الشقة ويتجوز ح يكون سلم نمر خلاص وشهر العسل ح يقضيه في الحجاز ويرجع يعيش اللي فاضل له من ربيع العمر مع الحاجة يشربوا البردقوش في البلكونة على الكرسي الهزاز وهو لابس البيجامة المخططة وعليها الروب والطايقة البيضا وهي لابسة قميص النوم الكاستور وعليه الشال الكروشيه وتحتيه الشراب الكولون الصوف عشان ركبها ما تاخدش برد

ولو ربنا كرمه وشحت من ابوه اللي سافر الخليج تمن الجوازة واتجوز وهو لسة فيه الرمق وهي لحقت تخلف قبل ما توصل لسن صباح ح يطلقها بعد اول عيل عشان المؤخر والنفقة ارخص له من تمن البامبرز واللبن وماء غريب والكراوية وطبعا مش ح نجيب سيرة السيريلاك وبودرة التلك عشان ما نجرحش مشاعر السادة القراء

حسبي الله ونعم الوكيل