انا مبسوطة قوي من العسل بتاعنا

بصوا بقى احنا بنعمل ايه؟ احنا قاعدين نقول ده مسلم وده مسيحي، وده شيعي رافضي وده سني، وده اخوان وده سلفي، ودي ودني وده شعري، اه يا شعري طلع في ايدي كله، لو بينطق كان رقع بالصوت من كتر ما باشد فيه، ويا ترى يا هل ترى، المسلم الاندونيسي اقرب لي وللا المسيحي المصري اقرب لي، احنا فراعنة وللا عرب، فينيقيين وللا بتنجان؟ لا وفيه شوية عرب صهاينة طالعين لنا في موضة احنا بحر متوسطيين! يعني اذا كنا حيرانين نتبرى من بعض ازاي فهاذوها الامر صعب جدا حيث ان ربنا انعم علينا بنفس الغباوة بنفس المنطلون بنفس الفالنة، فمهما حاولنا نتبرى من بعض الناس ح تبص من بعيد وتقول: اه....مش هم الاغبيا دول؟

وفي نفس الوقت، في نفس ذات شخص عين الوقت نقول ايه؟

"اه، هم اليهود كده، طول عمرهم كده، من زمان وهم كده، من ايام سيدنا موسى وهم كده، من ايام ما رموا يوسف في البير وهم كده، كلهم كده، على مر التاريخ دايما كده وهم كلهم حاجة واحدة لعملك مافيش يهودي له امان ابدا ما تاكليش من الكلام ده"

لدرجة ان احمد المسلماني اللي كان خايف من الاحتلال الفلسطيني لمصر قال ان اليهود اللي ضد الصهيونية دولم بيمثلوا انهم ضد الصهيونية وكلهم متفقين مع بعض يقسموا بعض نص يموت الناس ونص يعترض على تمويت الناس عشان يبقوا هم المعارضة والمولاة ويسيطروا على الدنيا كلها، اه والله قال كدهون مع انه راجل متعلم ومتنور ومعاه شهادات 

يعني سبحان الله، انا جدتي ام ابويا كانت بتقول: ربنا لما يغضب على بني ادم يسلط عليه مخه

صدقت، ماهو لو سلط عليك حاكم ظام مصير الحاكم يموت (ماعدا حاكم واحد كلنا عارفين انه مش ح يموت ولا حاجة) لو سلط عليك فيضان مصيره يخلص لو سلط عليك مرض يا تخف يا تموت لكن لما يسلط عليك مخك دي حلها ايه؟ مالهاش حل صح؟

يعني سبحان الله ولا اله لا الله ولا حول ولا قوة الا بالله منه له جاي رايح منه له

قاعدين نقطع في اوصال نفسنا، ونشتم في تاريخنا، ونتهم نفسنا شوية بالارهاب وشوية بالكفر وشوية بالمسيحية (حيث انها بقت تهمة اكيد) وشوية بالرافضية وشوية بمجموعة الاجية اللي بيستخدمها بعض البلطجية لما يقولوا: القومجية الاسلامجية العروبجية الشماشرجية الاي جية. وفرحانين ومبهورين بان ابن مهاجر كان مدمن كوكايين واسود وحكم امريكا وحاسين انها معجزة لان "امريكا بتدي فرص لكل الناس" بينما احنا من الف سنة مجموعة مش بس مهاجرين دول مهاجرين وعبيد وعملوا عدة دول زي الاخشيدية والمملوكية، وبدل ما نقول: احنا اول حضارة حررت العبيد وعملت منهم حكام بنشتم في نفسنا ونقول احنا الامة الوحيدة اللي حكمها عبيد من اعراق واجناس مختلفة وما حكمناش واحد مننا، طب ما اهو، ما انتوا فرحانين اهو ان ابن مهاجر كان جدوده من طايفة العبيد ومن عرق وجنس مختلف وبيحكم امريكا اهو وبتقولوا امريكا عظيمة عشان ادت واحد زي ده فرصة انه يحكمها اهو

لا

لما تيجي مننا تبقى عيبة، ولما تيجي من غيرنا تبقى انجاز حضاري عظيم

ومش بس كده

لا وفوق البيعة بنخدم الصهاينة خدمة العمر، قاعدين ميت سنة يكافحوا عشان يثبتوا الاتي: ان اليهود كلهم حاجة واحدة وشعب واحد، وان اليهود كلهم يتصفوا بصفات واحدة، وان اليهود كلهم صهاينة حتى لو بينوا غير كده لانهم بيبقوا خايفين من الاضطهاد وعليه فاليهود شعب بلا ارض واليهودية مش مجرد دين زي الاسلام والمسيحية دي عرقية وجنسية، هاتوا لنا ارض بقى، خدوا ارض اهي، بتاعتنا لا مش بتاعتنا

طيب انا مش ح اكلمكوا بوصفي عربية ولا مسلمة انا ح اتقمص شخصية واحد من التبت واقول لكوا انا لو مكانه ح ابص للموضوع ازاي

دلوقت انا واحدة تبتة (من التبت يعني) شايفة اتنين ناس بيتخانقوا مع بعضياتهم، ناس منهم النفر الواحد فيهم شعر شنبه بيتخانق مع شعر دقنه وكل واحد فيهم حيران ينتمي لايه ولمين حيث ان كلهم قرفانين من بعض ومش عارفين يهربوا من بعض ازاي 

والناس التانية بيدعوا انهم حاجة واحدة، والاسخم من كده ان القوم الاولانيين بيقولوا على القوم التانيين انهم كلهم حاجة واحدة على مر التاريخ كله، وان حتى الناس اللي من القوم التانيين دول اللي بيقولوا يا ناس يا عالم احنا مالناش دعوة بدوكهمة برضه جزء منهم بس هم مخبيين

والقوم الاولانيين مشغولين في خناقات شنباتهم مع دقونهم بينما القوم التانيين اللي عندهم طوائف كتير قوي (غير الطوائف الكبرى الاساسية: الرباي والقراي والسامري) ماحدش شايف خناقاتهم مع بعض، ومهما يتخانقوا مع بعض القوم الاولانيين اغبيا ومش بيحاولوا يفكروا في الموضوع ده ويستغلوه صح

طب ما اذا كان الكلام من بق القوم الاولانيين انهم مقسمين نفسهم ستميت حاجة وموحدين القوم التانيين ومأرخين لهم كمان وعاملين لهم جذور عمرها خمستلاف سنة، طب ما يبقى القوم التانيين معاهم حق بقى، ماهم كده يبقوا شعب واحد بقى فعلا، وشعب عريق كمان وعمره الاف السنين، والله بقى طول عمره وحش طول عمره خاين طول عمره مالوش عهد طول عمره لو حلف لك على المصحف ما تصدقهوش ماحدش طلب منك تناسبهم، بس على الاقل طول عمرهم حاجة واحدة من الالاف السنين وعليه فمن حقهم يبقى لهم ارض تجمعهم مدام هم شعب واحد كلهم مسخة تلك الاصل من بعض

ومش من حق القوم الاولانيين يفتحوا بقهم بقى، ولا يفرق معاهم يبقى لهم وطن يجمعهم لانهم اصلا مش طايقين بعض، بالعكس، شيل ده من ده يرتاح ده عن ده

انا زهقت، مين ح يدفع تمن زرع الشعر لما اقرع؟ كل الكلام اللي على ان اليهود حاجة واحدة (حتى لو حاجة واحدة وحشة شيء ما يهمش حد وحشين وحشين وعاجبين نفسهم والله) وكمان على مر التاريخ هو بالظبط الكلام الصهيوني

طب زعلانين ليه من اسرائيل طاه؟ ثم ان حقيقي الكلام ده مش صحيح، مش صحيح، والله مش صحيح، اليهودي الانجليزي انجليزي واليهودي اليمني يمني، مش ممكن اليهودي الانلجيزي هو واليهودي اليمني يبقى طباعهم واحدة ابدا، واليهودي الصهيوني مش ممكن ابدا يبقى زي اليهودي اللي مش صهيوني يا ناس ح يجيلي حمى البحر المتوسط حرام عليكوا اذا كان اهو جوة اسرائيل والبت ليفني السكرية والواد بيبي بتاع المافيا ماسكين في شواشي بعض اهو ونتنياهو بلطجة كده بيقول انا اللي نجحت

ما سمعناش حد بيقول لهم حلوا مشاكلكم الداخلية واتوحدوا ولا حد عايرهم انهم منقسمين زي ما بيعايروا الفلسطينيين

ما جوة اسرائيل ناس بتنزل مظاهرات ضد الصهيونية وبيقولوا احنا اتولدنا هنا واتورطنا حتى الولية اللي بتقول ان النازيين هم اللي عملوا اسرائيل اهو وبرة اسرائيل يهود بيقولوا بتفكيك اسرائيل خالص

واكتر من كده يهود بروكلين دلوقت حالا وانا باكلمكوا معلقين يفط مكتوب عليها

free palestine

ويهود تانيين لهم تفسيرات تانية ضد الصهيونية اهو

ماهو

ماهي احلوت وزهزهت اهي، ايه بقى؟ ايه؟ ايه؟ ليه مصممين نشتم في اليهود كلهم تاني بقى ونقول طول عمرهم كده ولاااااا مهما قالوا لك ده تمثيل في تمثيل هم من جواهم متفقين مع بعضهم ومصممين نوحدهم تحت راية هم مش متوحدين تحتها وكمان نعمم الكراهية عليهم؟ ليه؟ عشان نأكد كلام الصهيونية ان اليهود مستهدفين وانهم لو ما بقوش صهاينة الناس كلها ح تدبحهم لان الناس كلها بتكرههم حتى شوفوا العرب بيقولوا عليكوا ايه؟ بيقولوا كلكوا كدابين وكلكوا حاجة واحدة صح؟ 

صح

صح

العبي يا حاجة العبي

حسبي الله ونعم الوكيل سبحان الله

هو ربنا بيظلم؟ حاشا لله

ربنا ما بيظلمش حد، والله ما بيظلم حد ابدا، كل واحد ربنا بيديله اللي يستاهله