Tuesday, 3 February 2009

يا انسة تسيبي انت قلبك جاحد

مبدئيا يا انسة تسيبي انتي ما تعرفيش الشباب عندنا في مصر هنا مسميينك ايه؟ هرررررررررر، ربنا حليم ستار، بس بصراحة اصله اسم عجب قوي
المهم، هم دول بس اللي عاجبينك:
فؤاد الهاشم الوطن الكويتية
(مش ده بتاع لا تعايرني ولا اعايرك؟ اهي جات له من عند لا مؤاخذة تسيبي)
عبد الله الهدلق الوطن الكويتية
(لا هدلق ايه؟ امسك نفسك شوية الست تحب الراجل التقيل بلاش الهدلقة دي)
خليل علي حيدر الوطن الكويتية
حسن علي كرم الوطن الكويتية
د. أحمد البغدادي السياسة الكويتية
يوسف ناصر السويدان السياسة الكويتية
الياس بجاني السياسة الكويتية
أحمد الجار الله السياسة الكويتية
(حبيبي، حبيبي وابن حبيبي، ده كل شوية يكتب قصيدة غزل صريح في عوكل)
حسن راضي السياسة الكويتية
نضال نعيسة السياسة الكويتية
تركي الحمد الشرق الأوسط السعودية
طارق الحميد الشرق الأوسط السعودية
عبد الرحمن الراشد الشرق الأوسط السعودية
مأمون فندي الشرق الأوسط السعودية
(مأمول افندي ده ما كانش محتاج تبعتي لنا كلسونه يا انسة لانه مش لابس اصلا)
علي سالم الشرق الأوسط السعودية
عادل درويش الشرق الأوسط السعودية
(طبعا ده اساسي يعني)
عيان هرسي علي الشرق الأوسط السعودية
(عيان؟ لا سلامتك...ربنا ياخدك ان شاء الله)
صبحي فؤاد موقع إيلاف
د. أحمد أبو مطر موقع إيلاف
أنور الحمايدة موقع إيلاف
سامر السيد موقع إيلاف
(ايه سامر السيد ده؟ اسمه زي ما يكون مصري، يارب ما يطلعش مصري، كفاية، ما تبسطهاش اكتر من كده)
يوسف إبراهيم الاتحاد الإماراتية
حازم عبد الرحمن الأهرام المصرية
(امال فين اسامة بن سرايا فضحه الله؟)
أنيس منصور الأهرام المصرية
(لا ده مش مخبي دقنه، ده دايما يقول صديقي رابين الله يرحمه...ويحسن اليك)
حسين سراج مجلة أكتوبر المصرية
علي سالم روز اليوسف المصرية
(جبنة بيضا...اممم)
طارق الحجي أخبار اليوم المصرية
(جبنة رومي....فاكرها، طب قسما بالله العظيم قريت له مقال بيعلق على حرب افغانستان وبيقول انه كان في اسعد لحظات حياته حين كانت قوات الحضارة تدك معاقل الارهاب والتخلف، اه وربنا كمان مرة)
صالح القلاب الرأي الأردنية
(طب وده حد يآمن له القلاب ده؟ وللا هو متحول؟)
د. فهد الفانك الرأي الأردنية
نظير مجلي هآرتس الإسرائيلية
مساعد الخميس الحياة البريطانية
(ثرزداي اسيستانت يعني)
ميخائيل بها كاتب لبناني
(مين ده يا جو؟)
---
بس؟ بس يا انسة لا مؤاخذة تسيبي؟ ده انت قلبك جاحد بصحيح، ما بتقريش الاهرام وللا ايه؟ ما بتقريش مدونات ليه؟ مالنا؟ ما احنا زي الفل، وبعدين مش عاجبك اكسلنت ناوناو؟ طب ده احنا هنا بالصلاة ع النبي عندنا ناس يستاهلوا سيفونك ووالله خسارة فيهم شوية المية اللي ح تزقهم على المجاري
انا مش عاجبني التمثيل المصري في القائمة دي، معلش بقى احنا اصحاب الريادة، ده مخطط ايراني لضرب الريادة المصرية، الست ليفني مش بتتفرج على القناة الاولى بتاعتنا، ولا بتقرا الاهرام كويس، وتعمدت تجاهل اعلامنا البرازية في الصحف القومية والمستقلة والمدونات والصحف المعارضة كمان
بني ادمة واطية صحيح، وطبعا التجاهل المتعمد ده بسبب الشيخ حسن نصر الله، ونحن لن نسمح للشيخ حسن انه يقلل من قدر اسهامتنا في خدمة القضية الاسرائيلية والتصدي للكيان الفلسطيني الغاصب، مصر اللي ياما قدمت وضحت من ايام الملك مينا موحد الله، وللا انتوا نسيتوا معركتنا ضد الهكسوس في عهد الخلفاء الراشدين سنة تمانية واربعين؟ وقمصاني وشراباتي وفانلاتي، مصر اللي ضحت بركاب العبارة من اجل قضية الخلع ومصر ليست بالبازار على وجهة النظر الايرانية وانما نحن خان الخليلي وح نفضل خان الخليلي والصاغة كمان ونمسك بالخيوط من اجل تطريز عملية البواسير، وليس دور مصر ان تعزز، لان اعز من الولد ولد الولد واحنا ردنا كان حازم صاغية اللي ما حطوهوش في القائمة لاسباب مجهولة لها علاقة بايران وولاية الفقيه والولايا لهم ربنا والخط الاحمر ما بقاش مودا دلوقت نزل منه الفوشيا انما ايه...جنان... الا هو فين؟ وحشني
تسيبي مش ناوية تنزل له اسكتشاته على الموقع؟ ما تعملي بلوج يا...لامؤاخذة وحاولي تتفرجي على فيديوهات ابو جلنبو، انا عارفة ان بينكوا عمار
يجعله عامر
سؤال على هامش السيرة، اوختشي، هو انت بتنشري الحاجات دي كده؟ من اجل الحب العذري؟ شغل يهود يعني؟ وللا ح تدي الناس حقها؟ اه ما احنا نعرف يعني، انتوا مش عمالين تبعتوا لنا في كلسونات ببلاش كده، الا الوكسة يكون ببلاش، طب مين اللي عليه الدور في الغسيل النهاردة؟

27 comments:

مواطن مصري said...

نفس السؤال هو لسسة في حد بيشتري روز و الاهرام الخ

؟؟؟؟؟؟

مواطن مصري said...

هوا لية الايام دي قافشين على الطلبة في الجامعات الحكومية و بيعملولهم تدريب عسكري

؟؟؟

Anonymous said...

نوارة .. كده برضة تهملى الزعيم "مجدى الدقاق" !!! اللى اسمه منور القايمة

تركي الحمد , طارق الحميد ( رئيس تحرير الشرق الأوسط ) , عبد الله الهدلق , مأمون فندي , علي سالم , عبد الرحمن الراشد ( السعودية/مدير قناة العربية ) , نضال نعيسة , جهاد نصرة , أبيّ حسن , طارق حجي , مجدي الدقاق , فؤاد الهاشم , عثمان العمير , حسام عيتاني , حازم صاغية , نديم جرجورة , حمزة رستناوي , لؤي حسين , جمال عبد الجواد , عبدالمنعم سعيد , هاني النقشبندي , نصير الأسعد


هوه و جمال عبد الجواد اللى يرفع الضغط .. و عبد المنعم سعيد اللى بيزايد تصورى حتى على مبارك فى إدانة المقاومة
خلاص الشغل دلوقتى بقه على المكشوف ..و لسان حال الجماعه دول بيقول "أخرجوا آل لوطٍ من قريتكم إنهم أناسٌ يتطهرون".... يعنى بصريح العبارة إقضوا على المقاومة علشان بتفكرنا بعارنا

مـــى

Anonymous said...

ايوة انا ابويا بيشترى الاهرام
بيقرا صدق او لا تصدق
وبيحل الكلمات المتقاطعة
والسودوكو
والحاجة بتفرش باقى الجرنان تحت البطاطس المحمرة
ولو اتبقى حاجة بنلمع بيها القزاز
اصل عدد الجمعة بيبقى ورقة كتيييير



احمد سعيد

Anonymous said...

يا جماعة احمد موسى فين
هو ماحدش معجب بية هنا غيرى ولا اية
الراجل دة بيبذل مجهود برضة
يا ساااتر عالظلم



احمد سعيد

حـنــّا السكران said...

ميخائيل بها .أول مرة بسمع فيه كان بعد حرب تموز .حيث كتب مقالاً تحدث فيه عن بطولات و تضحيات الجيش الاسرائيلي و الخدمات الجليلة التي يقدمها للبنان بقصفه لما أسماه ..معاقل المقاتلين الاسلاميين من حزب الله ..بينما كما قال يومها : ( الاسرائيليون يقومون بعملنا بينما نحن نتفرج بسفالة و خوف كما تفرجنا عام 82 و نكيل لهم الاهانات على اعمالهم البطولية )و في مقاله ذاك عرض كل الاماكن التي قصفتها اسرائيل حيث قال مثلا ..( طبعا غير الضاحية اللي وصفها بالدولة الاسلامية القائمة بحد ذاتها )انه الجسر الفلاني قصفوه لانه جماعة حزب الله كانوا يمرقوا عليه بسياراتهم ..السيارة اللي انقصفت بالاشرفية كان يشتبه انها حاملة سلاح تابع لحزب الله ..الرادار تبع الجيش اللبناني ..كان فيه ضباط او مجندين شيعة متعاطفين مع حزب الله .. المواطنين المسيحيين اللي قصفتهم اسرائيل في مناطق مسيحية واستشهدوا..كان يشتبه انه ابن عمة واحد منهم بيحب وحدة شيعية خال ابن عمتها احتمال يكون في حزب الله ( يعني هيك شي )..و الموقع العسكري اللي انقصف في الشمال كان موقع سوري ( مع انه السوريين كانوا فلوا من زمان ) و استنتخ ميخائل في مقاله ذاك ان اسرائيل لم تقصف أو تقتل في لبنان إلا لهدف شريف و فيه مصلحة للبنان ...و يومها الاسرائيليين نشروا مقاله في مواقعهم و في موقع وزارة الخارجية نفسه. و من يومها لم أسمع بهذا الحشرة أبدا حتى رأيت اسمه على قائمة الشرف الصهيونية .

جو

حـنــّا السكران said...

بس اكتر شي انا مستغربه ..أنه اسم فارس خشان و حازم صاغية مش موجود بالقائمة ..الشباب لهم الأسبقية في نيل الشرف ..
فارس خشان وصف لجنة فينوغراد بأنهم أغبياء و لا يعرفوا انهم انتصروا و لا يعرفوا ماذا حدث في الجنوب في المعركة ..و اخو الشرموطة هو بس اللي عارف على أساس انه كان قائد وحدة مظليين اسرائيلية .
بس بعتقد في ملحق جايي ..رح يكون فيه خشان و صاغية و اكسلانت نياو و أسامة كتائب .. و ثـلـّة من الأخوة المجاهدين فرسان الهيكل الجدد .

مواطن مصري said...

http://www.youtube.com/watch?v=SJzCEXmMNmY


"العاشره مساءً - الشاعر جمال بخيت و قصيدته الجديده "مش باقي مني



جامدة و تقيللللة اووووووووووووووووووي

حـنــّا السكران said...

على فكرة .. بعض هؤلاء الذين نشرت وزارة الخارجية الصهيونية اسمائهم ..الفقراء منهم فقط و غير المسنودين و الذين يسترزقون بالفتات ..زلزلت بهم الارض بعد مفاجئتهم بالنشر ..انا قريت مقال لواحد منهم و لقاء مع واحد تاني و تنيناتهم .. ما كان باقي إلا يقولوا :
والله العظيم انا ما كان قصدي وكان خلاف وجهات نظر و كان قصدي الاصلاح و انا مش عميل ..و اذا مش مصدقين اعطوني كلاشن و انا بكرا من الصبح بروح بحارب .

حسن على said...

تنوبة: سقط من القائمة اسماء طاقم اخبار فضائيتي العربية المشبوهة والحرة الاكثر شبة ... كذلك سقط اسماء كل من فتحى شرور والفئى-الفقى سابقا-وستين فى المية من اعضاء المجلس المزيف والاعضاء بالتعين واسم اللة عى مقامكوا بائع الكشرى جهاد عودة ... والكل "سن كيلوت" كما يقول الفرنسين

Anonymous said...

بل اكثر من ذلك ... ذلك الشيخ الفانى الضعيف الشخصية اللى سلم على بيريز بأدية الاتنين ولما سأل عن ذلك غنى لهم غنوة وردة" قال ماعرفوش ..ما قابلتوش ..ولاشفتوش" حسن على

مواطن مصري said...

و ايضاً لا تنسي مذيعي قناة الجزيرة لنشر الفتنة بين شعوب العربية و زيادة الحقد العربي

said said...

it's always difficult for me to understand what your new post is all about, would you please start with a complete sentence?! GOMLA MOFIDA.., what those names are for what kind of list is this, and what kind of arabic english you are using?!!!! do you want pepole to read your post or is it something between you and your close friends only????

محدود الدخل said...

المفروض كان أسم عوكل و ابو الليف يتحطو على رأس القائمة لدورهم الكبير والرائع في التعريص حسب قول ابو الليف لا فوض فوه

Nemo said...

ههههههههههههههههههههه
مش ممكن يا نوارة
الشويتين اللى فى الأخر دول بالدنيا يا شيخة
ههههههههههههههههههههههههه
والله العظيم طلعتينى من مود نرفزة ما يعلم بيه إلا ربنا
ربنا يفرح قلبك يا بنت عمنا أحمد والله
عموما
بس هى رسالة واضحة يا نوارة من اسرائيل
احنا ما عدناش بنخاف
لان حكام الدول العربية معانا
وده بيدل فعلا على مدى الإنحطاط اللى احنا وصلنا له
فعلا
عوكل بقى غاسل وشه بشخاخته
ولا فارق معاه كس أم الـ 80 مليون عبد وامة اللى فى عزبة أبوه الباشكاتب
فهم حيعملوا حساب لإيه
منك لله يا عبود يا بتاع السعودية
هو اللى فتح الفتوحة بنت الوسخة دى علينا
ما هو أصل بسلامته النبى حارصه وصاينه جمال مبارك لما كان شغال مرسال الغرام قبل حرب العراق .. آسف .. غزو وتدمير العراق
بوش بعت قال للـ " رجالة " اللى فى المنطقة يا جماعة آى كانت اتس فيرى فيرى امبوسيبول
البيبول بتوعكم ممكن يعملوا رفولوشن وبيج بروبليمز على أور داد ويطربقوها على دماغ اور مام
راح عبود بعتله كلمة واحدة مع جيمى
" نحن أقدر على تكميم أفواه شعوبنا "
وفعلا .. احنا نستاهل أوسخ من كده كمان
بس ربنا كريم .. وفرجه قريب .. قريب قوى ان شاء الله

راجى said...

بيتهيألى ان كلسون سيبى *** ده وسخ وساخة عمرها ما تنضف ولا بمية النار
لان الجتة نفسها وسخة
ملحوظة: كاتبين عنك كلام حلو النهاردة فى عمود فى الاهرام ، حاجة توغوش

Anonymous said...

يا جمااااعة
كل الناس اللى اسمائهم مش مكتوبة دول
مش مقامم يتكتبو فى موقع الخارجية
موقع الخارجية دة لكومبارسات الصف التانى
انما نجوم الصف الاول
تكتب اسماؤهم
بمية المجارى
فى لوحة الارف
على باب الكنيست
مش كدة برضة ولا اية




احمد سعيد

Founoon said...

نوارة صباح الخير
بمناسبة الاهرام
كاتبين عنك النهاردة في الاهرام مقال حلو اوي

حسن على said...

خبر عاجل : ايران (الوحشة) الشريرة المتخلفة تطلق قمرا صناعيا (وحشا أيضا)وشريرا ايضا لأ واية... صناعة ايرانية وحشة وشريرة ايضا ... فألا يدل ذلك على مدى (شرورية)نظامها وتخلفة؟؟؟ الصراحة عوكل كان عندة حق ..واوعى تقولوا لأ

جبهة التهييس الشعبية said...

ايه ده؟ انتوا بتتريقوا عليا؟ حد كاتب عني انا في الاهرام؟
مين اللي كاتب عني في الاهرام؟ انا؟ الاهرام؟ ايه؟ فين؟ مين؟ امتى ده؟ الاهرام؟
الاهرام؟

جبهة التهييس الشعبية said...

ماحدش يعرف بمناسبة ايه؟

Founoon said...

كاتبين كلام حلو اوي بجد لازم تقريه

عمود كاتبه فتحي محمود

المقال اسمه قطة دلال صفحة 5

اخر جملة في المقال بتقول

( وفي كل يوم يصل هؤلاء الشباب الى مواقع جديدة يحتكون فيها مع الرأي العام العالمي بينما وسائل الاعلام العربية مازالت مشغولة في حرب داحس والغبراء المشتعلة بينها )

Founoon said...

http://www.ahram.org.eg/Index.asp?CurFN=amod12.htm&DID=9847

خدي اللينك لاقيته

جبهة التهييس الشعبية said...

اه يا شباب
ده كاتب عن النيو الهولوكوست
احنا لازم نبعت نشكره
الميل بتاعه اهو

fathimahmoud@hotmail.com

جبهة التهييس الشعبية said...

مش بس المشاركين في المدونة
انا اقصد كلنا
هو ايه اللي واداه الاهرام ده؟
رجل من آل فرعون يكتم إيمانه
:))

esraa said...

ههههههههههه
بجد قلدتي طريقة ابو الغيط كويس
حسيت ان هو اللي بيتكلم قدامي

مواطن مصري said...

نوارة هوا لية الشارع المصري دايما بيجري ورا مبداء التبعية يعني مرة مع الاتحاد السوفيتي و مرة مع الولايات المتحدة و ناس عاوزة تجري ورا ايران


و محدش عاوز يجري يشوف مصلحة البلد للعلم مع ان كل الدول الي انا ذكرتها مش هتعملنا حاجة

امريكا و اسرائيل زي ايران كلو بيجري ورا مصلحتة الشخصية و محدش عارف كدة


ولا انتي مش واخدة بالك من الحكاية دي

؟؟؟؟