قال لك: انا غلطت غلطت غلطت...ما دفعوش الضرايب

الراجل انسحب من الوزارة عشان ما دفعش الضرايب! والتاني قال: انا غلطان غلطان، هو راجل كويس، بس انا ازاي احطه في المنصب وهو مش دافع الضرايب؟ وبعد شوية طلع كام حد من الحكومة بتاعته مش دافع الضرايب وانسحبوا

لا وبيزعقوا له: ايه الحكاية؟ انت جايب لنا صيع مش دافعين ضرايبهم؟ وهو عمال يقول انا اسف اسف اسف انا غلطت غلطت غلطت

طب بيزعقوا له ليه؟ اصلا اصلا هو اللي قال، وهم اللي انسحبوا، وبيقولوا احنا اسفين، ايه بقى؟ بيزعقوا ليه؟ وللا هم ما مش لاقيين حاجة تضايقهم فبيتلككوا

امبارح كاتب تركي في الجزيرة طالع يقول: احنا مش بتنخانق مع حد ومافيش بينا وبين حد اي صراعات، لا ح نتصارع مع ايران ولا ح نتصارع مع اسرائيل احنا لنا دور محايد (قاضي يعني: اشرب من القلة دي وما تشربش من القلة دي :) تركي بقى) وعلى بعض الاطراف القلقة من الدور التركي ان تعترف انها تواجه مشاكل داخلية وانها هي اللي ضعيفة واحنا مش محتاجين نغازل الناخب التركي لان فيه برنامج انتخابي بلا بلا بلا

وقال لك بقى نجاد، رغم ان المحادثات مع امريكا ابتدت سرا، الا انه قال مش ح نوقف تخصيب اليورانيوم وانه بيقول كده عشان الانتخابات قربت وعايز الناس تنتخبه تاني

يا ترى مين الدول الغيرانة اللي مش عايزة تعترف بضعفها ومشاكلها الداخلية

حل الفزورة: السلطانية

مش نافع كده، انا مش ح اعيش عمري احقد على الناس بالطريقة دي، اشمعنى كل الناس كده واحنا لا؟ انا نفسي انتخب واللي انا منتخباه يخاف مني كده، ونزعق لهم كده وهم يعتذروا لنا ويبقوا عمالين يشرحوا لنا ليه بيعملوا كده ونقول لهم احنا مش مصدقينكوا فهم بقى يخافوا تاني ويقعدوا بقى يحاولوا يرضونا ويعملوا مواقف والناس تقول لهم: ايوة انتوا عاملين كده عشان الانتخابات قربت عشان عايزين ترضوا الناس، والناس دول يبقوا احنا، ونبقى لسة منتخبينه ويقول تصريح ما يعجبناش قوم نغدر عليه ونزعق له قوم هو يعتذر لنا، واحنا نقول الاعتذار مش كفاية تقدم تفسير وكدهون يعني

ياااااااااا يا ترى الناس اللي بيحصل معاها الحاجات دي بيحسوا بايه؟ يااااا يا ربي، انا عمري ما افتكر اي مسئول مصري اعتذر عن اي حاجة، مع انهم كلهم المفروض يعتذروا على انهم اتولدوا اصلا، طب انا نفسي اي مسئول يعتذر لنا، لو المسئولين المصريين مش ح يعتذروا يبقى اوباما يعتذر عشان امريكا احتلت الناس، واردوغان يعتذر للارمن اللي عايشين في مصر هنا، يمكن الاعتذار يخبط فينا واحنا جنبهم، ونجاد يعتذر عشان...عشان من الفين وخمسميت سنة دارا احتلنا، واليونان تعتذر عشان الاسكندر الاكبر احتلنا، ازاي يحتلنا الراجل ده؟ وبعدين انجلترا ما اعتذرتش عن الاحتلال وبعدين أطاليا دبحت مصريين كتير، ايام ما كانت روما يعني، مش ح يعتذروا....اي حد يعتذر، والله مش باغلس، ومش ح ناخد فلوس ولا حاجة، هو احنا بتوع فلوس؟ بس نفسي اعرف بس احساس الناس اللي حد بيعتذر لهم وكدهون يعني، وبعدين احنا مش اغبيا ده احنا قلبنا ابيض، حتى شوفوا لما قال لقد قررت ان اتنحى تماما ونهائيا الناس عملت ايه؟ يا قلب امهم من كتر ماهم مش مصدقين نزلوا مظاهرات يقولوا له حسك في الدنيا وفداك، الحمد لله اللي جات على قد كده، والنبي يا شيخ ما تعمل في روحك كده، ح تموت نفسك يا راجل