ولا يهمكوا يا شباب...احنا الشعب

طبعا الاستفتاء بتاع عمرو غربية اتقلب رأسا على عقب لما عملت له لنك عندنا هنا في المدونة

:)

ولا يهمكوا يا شباب، احنا الشعب، احنا من بلد الكنبلة، بلد الميت مليون شاب، احنا مش رياض البنطلوني

ومدام هو عامل استفتاء لازم يشوف رأي الناس الحقيقي، الجمنهور يعني

بس ليه يا شباب عايزين تطردوا اليهود

:)

ليه كده؟ ماهو اللي ما ترضاهوش على نفسك ما ترضاهوش على غيرك صح؟

وفيه زميل كتب يقول اليهودي اللي اصله جه مع الصهيونية يمشي واللي اصلا يهودي من اهل البلد يقعد

:))

دي محاكم تفتيش بقى؟

طب نمسكها واحدة واحدة كده

من وجهة النظر الدينية ربنا بيقول ايه؟

ربنا بيقول:

ولولا دفع الله الناس بعضهم ببعض لهدمت صوامع وبيع وصلوات ومساجد يذكر فيها اسم الله كثيرا، ولينصرن الله من ينصره، ان الله لقوي عزيز

نتأمل الآية كده

المساجد جاية في الآخر، يعني ايه؟ يعني الناس اللي مؤمنة بالقرآن المفروض ان شغلتها تحمي الصوامع والبيع والصلوات والمساجد

يعني تحمي حرية العقيدة

وحماية حرية العقيدة - اي عقيدة كانت سواء عبادة مسيحية او يهودية او اسلامية وفقا لما هو مذكور في الاية - ربنا مسميه نصر لله

يعني انت لما تحمي حرية عقيدة لواحد يهودي او مسيحي يبقى انت بتنصر ربنا زي ما بتحمي المسجد بالظبط

والمبدأ اللي مفروض تتحرك منه هو العفو عند المقدرة

لما ربنا نصر الرسول على قريش اللي عملوا فيه زي ما الصهاينة بيعملوا في الفلسطينيين قال لهم ايه؟ قال لهم: اذهبو فأنتم الطلقاء

صح؟

وصلاح الدين الايوبي افتكر الواقعة دي وهو داخل بيت المقدس وعمل زي الرسول بالظبط

صح؟

طيب يعني اذا كنت مسلم متدين ونيتك سودا كده للناس تتوقع ربنا ينصرك ازاي؟ المفروض تخلص نيتك لله وتنوي خير عشان ربنا ينصرك

صح؟

من وجهة النظر الانسانية والاخلاقية

واحد اتولد في بلد، وانت ربنا غلبك عليه، تطرده؟ ايه الحكمة من انك تطرده ماهو انت منصور خلاص

فين العدالة وانت بتدين عدوك بأنه عنصري وبيطرد الناس من بيوتها وبيخليها عشان يعمل جناين وانت لو كنت مكانه وانت اللي في موقف القوي وهو اللي في موقف الضعيف ح تعمل فيه بالظبط اللي عمله فيك؟

امال انت ضد الصهيونية ليه؟

طب ما الصهيونية دي رد فعل للنازية

انت عايز بقى تبقى رد فعل للصهيونية ونفضل نلف في الحلقة المفرغة دي؟

من وجهة النظر السياسية

مافيش حاجة تقضي على الفكر الصهيوني تماما وتقطع شأفته من جذورها غير ان فلسطين تبقى دولة ديمقراطية تستوعب كل المعتقدات

لان اقتراح طرد اليهود من فلسطين بيؤكد على الفكر الصهيوني وبيخدمه مش بيقضي عليه ولا بيضره

الفكر الصهيوني في اساسه مبني على فكرة ان اليهود مضطهدين دونا عن كل البني ادمين، وبما انهم مضطهدين دونا عن كل الناس، وكل الناس مش عايزاهم، وكل الناس يا اما عايزة تقصيهم يا اما عايزة تموتهم فمن حقهم بقى انهم يبقى لهم وطن قومي خاص بيهم

اهم لو وحشين ما حدش ح يستحملهم غيرهم ولو كويسين يبقى يقعدوا مع بعض

المهم انهم يبعدوا عن الناس اللي مش عايزاهم

وبناء على ان الناس كلها مش عايزاهم، فهم لاقيين مبرر يموتوا بيه كل الناس، ماهم بيكرهونا بقى ولو قدروا علينا ح يموتونا

حتى اطفالهم ورضعهم لما يكبروا ح يموتونا عشان احنا مضطهدين بالسليقة

والحقيقة ان دي مش حقيقة

الناس كلها بتضطهد بعض، مش اليهود بس هم اللي ضحية الاضطهاد، يعني احنا مثلا ما طالبناش الامبراطورية الرومانية بتعويضنا عن كم الشهداء اللي هي قتلتهم في مصر قبل ما الامبراطورية تدخل المسيحية وبعدها

ما قلناش للكنيسة الكاثوليكية تعتذر لنا عن المذابح اللي عملوها للعرب في الاندلس

البروتستانت والكاتوليك قطعوا بعض وكل واحد فيهم قدر على التاني ما رحموش وهكذا

يعني الانسان حيوان مضطهد بطبيعته

والمفروض اننا ناس بندور على العدالة مش بنحلم باليوم اللي ربنا يقدرنا فيه على اللي قادرين علينا عشان ما نرحمهمش

هههههههه

ما ينفعش كده يا شباب دي نية سودا دي

ربنا ح يسترها مع اتنين قتالين قتلا ازاي؟