Wednesday, 18 February 2009

اما اكمل لكوا قبل ما انزل تاني

وبعدين يا ستي ويا سيدي لما انت شاورت لهم على المكان اللي كان واقف فيه الشخص اللي انا مش عارفة له رتبة وللا امين وللا ايه؟
بصوا هو شاب كده بتاع خمسة وعشرين سنة، لابس جاكيت كحلي وما اخدتش بالي من البنطلون ولابس بيريه، هل البيريه كان عليه نسر وللا لا؟ مش فاكرة والله بجد، بس اغلب الظن ما كانش فيه نسر. المهم انه كان واقف عند تاندة كحلي برضه (هو كان يوم كحلي من اوله) ومكتوب عليها مديرية امن القاهرة، بس مافيش حد واقف خالص، يا سبحان الله، مش هو ده المكان المؤمن اللي خايفين عليه من تفجيرات المحجبات؟ فين الناس بقى؟ رحنا على الجنب اقصد يعني دخلنا شمال ما بين المتحف وجراج الفندق لقينا عساكر كتييييييييييييييييير وامناء وبرضه عمالين يبصوا لنا على اساس اننا كائنات فضائية واخيرا لقيت واحد لابس كحلي وقاعد على موتوسيكل ومكتوب على الموتوسيكل شرطة سألناه على الناس اللي كانوا موجودين قال مشيوا
محمد غزالي سأل امين في الخباثة كده قال له واحد بالمواصفات دي بيقى ظابط بس هم شيفتهم بيخلص تمانية (الساعة كانت حوالي سبعة، سبعة ونص) المهم الظابط اللي كان معانا اللي كان مبتسم ده قال لنا اهو مافيش حد مش لاقيينه رجعنا لقينا مين بقى؟
مش عارفة لقيناه قبل ما نروح وللا بعد ما جينا، بس لقيناه، لقينا ظابط لطيف كده ومهذب قوي ومؤدب وبيتلطف معانا جدا وعلى كتفه نسر، وعمالين نبص في وشه، ياربي الشكل ده مش غريب علينا الشكل ده مش غريب علينا وبعدين محمد مفيد ومحمد الغزالي نادوا عليا برة وهم بيقولوا لي عارفة مين ده؟
قام رجعت لي الذاكرة فورا واحنا التلاتة قلنا: سموءل ابو سحلة
المهم، ح نعمل لك المحضر، بس انت ما تعرفيهوش، ح نعمل لك المحضر بس يعني هو ح نجيبه منين، ح نعمل لك المحضر بس انت مش متأكدة انه شرطة
هو انا قلت انه شرطة؟ انا قلت كان لابس كذا، ممكن يبقى من امن الفندق، ممكن يبقى شرطة
لا مش ممكن يبقى شرطة احنا مش بنلبس كحلي
خلاص، يبقى مش شرطة
قام محمد مفيد قال: وكمان مش شرطة؟  يعني بيتعجرف على الناس ويهينهم وهو سكيوريتي؟ 
قام سموءل ابو سحلة اللي على كتفه نسر ومش عارفة كده يبقى رتبته ايه ، هو قال بس انا نسيت،قال لنا فيه ناس كده فلاحين وهزارهم تقيل وبعدين انتوا ح تجيبوه منين، وبعدين ده ممكن ما ينزلش الخدمة تاني بقى مدام عرف انك عملتي فيه محضر انا لو عارف ان عندي عسكري ومتقدم فيه محضر ح اقول له ما تنزلش الخدمة هنا تاني وبعدين الموضوع بسيط يعني انتوا مكبرين الموضوع ليه؟ 
بصراحة كانت الساعة سبعة ونص وانا تعبت وزهقت واتخنقت وكنت خلاص عايزة امشي قام محمد شاف انني بافيص راح شابط: لا ح نعمل محضر، ح انزل كل يوم اسأل عليه لحد ما اجيبه، مش مهم ييجي تاني، انا ح اعرف هو مين ومن انهي قسم بطريقتي
راح سموئل ابو سحلة قال له انت اخوها؟ قال له انا ابن خالتها فقال للعيال طب لو سمحتوا عايز اقعد معاها لوحدي وقال لي نفس الكلام قلت له خلاص هات البطاقة يافندم انا مش ح اعمل محضر
لا لا لا لا لا ح نعمل لك محضر بس انا باقول لك مش ح تاخدي حاجة
طيب خلاص نعمل محضر
انا الحقيقة اسقط في يدي، ما بقتش عارفة هو عايزني اعمل محضر وللا مش عايزني، هو اكيد مش عايزني اعمل محضر بس ليه لما اقول له خلاص يقول لي لا ح نعمل لك محضر؟ هل كان عايزني اقولها له بطريقة تانية؟ انا كنت عايزة امشي لان كان عندي محاضرة في استوديو جلال ورأفت الميهي ما بيحبش حد يدخل وراه وح يمسح بيا البلاط وانا مش ناقصة تهزيئ مرتين في اليوم ومحمد الغزالي عمال يرن لي على الموبايل من برة عشان ازن على المحضر الحقيقة انا كنت فيصت ومافياش مقاومة ومش عارفة ازن عليه عشان يعمل محضر او ما يعملش محضر
قلت له خلاص ما نعملش محضر
ليه؟ اعملي محضر
طيب خلاص نعمل محضر
براحتك اديني قلت لك وانت حرة! 
بعدين نادوا لي ظابط بنجمة واحدة وقعد يعمل المحضر ومحمد الغزالي قاعد
الظابط ابو نجمة قال لي على فكرة ده اكيد مهتز نفسيا، اصل احنا بنشوف الحاجات دي في حملاتنا كتير، بسبب وجود السياح فالمختلين عقليا بيبقوا كتير اصل ده كلام واحد مختل عقليا
طبعا محمد الغزالي بص لي رحت مدورة وشي عشان ما اضحكش 
اه نسيت اقول لكوا، محمد الغزالي واحمد مهنا اتصلوا بالدستور والمصري اليوم والبديل
المهم جينا لحد اوصاف الشخص وقلت وكان لابس بيريه، قال لي لا ما تقوليش لابس بيريه لانه مش ظابط، قلت له وهو انا قلت انه ظابط؟ قال لي ماهو ماحدش بيلبس بيريه غير الشرطة قلت له خلاص يبقى شرطة قال لي بس انت مش بنلبس كحلي قلت له خلاص يبقى مش شرطة قال لي يبقى مش لابس بيريه قلت له لا كان لابس بيريه قال لي ماهو لو لابس بيريه يبقى شرطة، طيب يبقى شرطة، قال لي: هو كان عليه نسر؟ قلت له: الحقيقة مش متذكرة قوي بس غالبا ما كانش عليه نسر لا، قال لي يبقى مش شرطة قلت له خلاص مش شرطة قال لي يبقى ما نكتبش بيريه قلت له بس هو كان لابس بيريه 
يييييييييي
لحد ما محمد قال له: اكتب بيريه من غير نسر
راح كاتب بيريه من غير نسر
وماما كل شوية تتصل وضغطها وصل ميتين على مية وستة، قلت لهم ممكن امشي بقى بعد ما وقعت على المحضر عشان ماما تعبانة
راح سموئل قال لي لا المأمور عايز يشوفك هو جاي في السكة
فالمصور اللي مش عارفة اسمه اللي جه مع محمد مفيد قال له: هو كل اللي بيعمل محضر بيقابل المأمور؟
- لا بس انتوا شاكيين واحد في الشرطة
هو احنا قلنا انه شرطة-
- مش بتقولوا لابس بيريه؟
بس ما قلناش انه شرطة-
-ماهو ماحدش بيلبس بيريه غير الشرطة
من غير نسر-
- المأمور لازم يقابلها ده موضوع كبير، مش حاجة بسيطة (مع انه كان لسه بيقول الموضوع بسيط)
وطبعا امي تعبانة وانا فيصت وزهقت وكنت ح ارمي نفسي من الشباك الساعة تمانية ونص وانا من خمسة وانا في القسم
قلت له انا متنازلة عن المحضر
الله انت مش عملتي محضر-
انا متنازلة عنه
لا احنا ما اجبرناكيش تتنازلي عن المحضر-
ما اجبرتونيش انا خلاص مش عايزة المحضر الله يسامحه
لا انت عملتي محضر استني المأمور جاي في السكة، -
(اللي جاي في السكة ده دخلونا ليه بعد مدة في اودته مع انه ما عداش علينا، ما شفناهوش يعني وهو داخل اودته مع اننا كنا في وش باب القسم ولو كان جاي من برة كنا شفناه وهو داخل خصوصا اني لما دخلت قعدت ادور على باب وراني للاودة ما لقتش)
وبعدين سموئل ابتدا يزعق: خلاص اقعدي...انا باتعامل معاكوا بذوق من الصبح
:)
ح تستني هنا وح تقابلي المأمور
راح محمد مفيد قال له: لو سمحت ما تزعقش
راح طاردهم كلهم برة الاودة: طب كلكوا بقى تطلعوا برة، بس الاستاذ محمد عشان ابن خالتها يقعد كاستثناء، مش عايز حد فيكوا هنا في القسم خالص، استنوا بررررررررررررةةةةةةةةةةةةةةةةةة
العيال كانوا ح ينشفوا دماغهم راح محمد غزالي غامز لهم راحوا طالعين عشان ما يعملوش مشاكل بس طبعا كلنا بنغلي وانا خلاص بقى مناخيري بقت في كعب رجلي ومقعدين معانا راجل شيك لابس بدلة موتار وكرافتة زرقا وعمال يضحك برضه
والله سليناهم رحنا ضحكناهم شوية
بس مش معقولة يعني قاعدة اقول للناس اللي في اوروبا وامريكا والدول المتقدمة ما تسكتوش على حقكوا واشتكوا ضد اي عبارات عنصرية وعمالة اشرد لاسرائيل عشان معاملتها مع عرب اسرائيل ولما اتلقى نفس المعاملة في بلدي اسكت
يعني انا عايزة اي واحدة عايشة برة تقول لي: ينفع ظابط فرنساوي مثلا يقول لها كل اللي بيفجروا المتروهات لابسين حجاب زيك وتسكت؟ مش كانت عملت لاهله فضيحة؟ 
وللا ايه؟ وللا انا غلطانة ان كرامتي بتوجعني وللا ايه؟ وقلت لسموئل كده والله: يا فندم كرامتي وجعتني وزعلت على نفسي
مش الناس كرامتها بتوجعها برضه؟ وللا انا مخي خواجاتي زي ما رأفت الميهي بعد كده قعد يقول لي وزعلت منه قوي لدرجة انه صالحني وهو مش بيصالح حد بيزعل ابدا بيسيبه يتفلق، بس انا زعلت قوي من الكلمة دي، هو ماحدش عنده كرامة غير الخواجات؟ ليه كده؟ انا بقى الكلمة دي عيطتني، كأن احنا اتكتب علينا ما يبقاش عندنا كرامة، راح رأفت الميهي مطبطب عليا وقال لي معلش ما تزعليش
وبعدين بقى فضلنا مستنيين وانا عمالة اقول لسموئل ابو سحلة اللي عمال يقول لي خمس دقايق، قلت له الخمس دقايق دول عملوا تلات ساعات ونص وانا امي تعبانة وما اقدرش اسيبها
المهم دخلونا انا والغزالي عند المأمور هاني جرجس وقال لي ما تقلقيش اللي حصل ده ما نرضاهوش ابدا واخد نمرة محمد غزالي بعد ما كان سموئل ابو سحلة اخد مني نمرتي برة
على الله بقى بطرس يرد عليهم كالعادة
وخرجت وانا حالفة ان لو حد دبحني في الشارع مش ح اروح اشتكيه ابدا، يا اخد حقي بدراعي يا احسبن عليه وافوض امري لله
وكانت الساعة حوالي تسعة الا ربع
بس انا عندي كام سؤال بجد والله العظيم: ايه اللي يضحك في كلمة: احنا بندفع ضرايب ومن حقنا...اي حاجة بقى؟ ايه الغريب في كلمة: توجيه اهانة والتحدث الى المواطن بعجرفة واهانة رمز ديني وخطاب عنصري؟ مش مكتوب في المواثيق والقوانين ده؟
وللا هو بس كريم عامر اللي بيزدري الاديان؟ واتهام كل اللي "لابسين زي حضرتك كده" بانهم بيفجروا المتاحف ده اسمه ايه؟
الظابط اللي بيكتب المحضر قال لي بتتهميه بايه؟ قلت له: باهانتي والتحدث الي بعجرفة واهانة زي ديني
ليه بص لي شوية كده كأني باتكلم جزر قمري؟ وبعدين قال لي: ايه؟. تاني لو سمحتي، وهو بيكتب بامليه بالراحة كأني باقول طلاسم سحرية
المهم اديني خضت التجربة والحمد لله رب العالمين زي ما نصحتكوا كده انكوا تتناقشوش مع صهاينة
بانصحكوا انكوا ما تروحوش اقسام والحكمة المصرية القديمة اللي بتقول: احنا مش وش اقسام هي حكمة شعب عمره سبعتلاف سنة خبر الحياة وفهمها وانا من هنا ورايح ح اشوف الموروث الشعبي بيقول ايه وامشي وراه لان حكمة الشعوب العريقة لا يستهان بها وده مش كلام فض مجالس ده كلام خارج من تجارب ولزمن ولابد اراجع كل الامثال الشعبية واحطها نبراس ليا في حياتي خصوصا مثل لا تـ....تمسي على العبيط ولا تخلي العبيط يمسي عليك، وعلى رأي رأفت الميهي: بلا تفكير خواجاتي

53 comments:

muslima said...

السلام عليكم

كتير الانسان يقعد مع نفسه ويفكر ويقول انا باقول للناس كذا وكذا طيب يا ترى لو اتحطيت فى نفس الموقف هاعمل كده ولا لا

وانتى خضتى التجربة مش علشان تثبتى لنا احنا ولكن علشان تثبتى لنفسك انك مش انسانة متناقضة او بتقولى شىء وتعملى عكسه فتقعى فى دائرة المنافقين والعياذ بالله

حاولتى تكونى صادقة مع نفسك من ناحية ومن ناحية تانية تكونى ايجابية

وكانت النتيجة كده

سؤالى ليكى يا نوارة

هل لانك صحفية وليكى ناس تقف جنبك وقت الشدة كان عنصر من العناصر ان لم يكن اهمها هو اللى خلاكى تردى وتروحى وتعافرى مع الناس دى وتقولى كرامتى وحقى
بقلب جامد

وياترى لو كنتى انسانة بسيطة من الناس الغلابة المطحونين اللى بيتمرمط كرامتهم ليل نهار بسبب وبدون سبب علنى قدام الناس وانا اتحدث عن اشياء رأيتها بعينى من رجال شرطة وظباط امن اهانات وسفاالة منقطعة النظير والناس من غلبها وفقرها مش بتعمل حاجة واقفة سمعة اهانتها اكتر واكتر وبتنضرب ومش بيعملوا حاجة

ياترى لو كنت واحدة من الناس الغلابة اللى مالهمش ظهر كنتى فكرتى تردى على بتاع الامن ده واللى اللى مش عارفين منين ولا كنت سكتى وسمعتى شتيمته ومشيتى

وزى ما قلتى تحسبنى عليه وخلاص

Anonymous said...

بصى للموضوع من ناحية تانيه
انا متخيل العسكرى الغلبان فاكر انه بيقاوم الاوغاد اللى عاوزين يدمروا البلد واللى همه بدقون وبحجاب

وصحيح برده الراجل بياخد 40 جنيه ضرايب ايه اللى بتوصله مننا هنذله عليها؟




الصاغ أحمد رأفت

اروي الطويل said...

بصي يانوراة
بجد
إنتي رااااجل
ووالله انا لو مكانك هعمل كدا وأكتر من كدا ،، وبجد كنت هبهدلهم ، يضحكوا دلوقتي ، بس لو كل واحد عمل كدا ، فعلا مش هيقدروا ييجوا جنب حد
إحنا اللي بنسيب حقنا
واللي يسيب حقه يستاهل اللي يجراله
أنا فعلا معترضه علي كلمة ماحدش يروح القسم ، لأ نروح القسم ، ونعرف الناس إن البلد دي بلدهم ، آه هنتعب
بس حقنا هيرجع ، وكرامتي هتتحفظ

تحياتي ياسكر
:)

arwaya.com

muslima said...

بمناسبة انك ذكرتى والدتك وانها تعبانة " طهور ان شاء الله "

اكيد فكرتى فيها وازاى هى قلقانة عليكى واكيد فكرتى ان حتى لو عندكط حق تسيبيه وتمشى علشان خاطرها

اكيد فكرتى فيها اكتر من نفسك
وايجابيتك وكرامتك

ودى حقيقة

اهالينا وخوفهم علينا واحساسنا احنا بيهم وخوفهم بيخلينا كتير نبقى بعيد واقفين محلك سر منعملش حاجة ولا نهش ولا ننش

انا باقول كده علشان موقف حصل قدامى من فترة قريبة

خلصت شغلى ورحت علشان اركب من ميدان عبد المنعم رياض

وانا لسة داخلة الميدان لقيت ناس ملمومين كتير قوى وسامعة صدى صوت حد بينضرب وصوت عياط

حاولت اقرب من الناي الملمومين مش عارفة اشوف حاجة

كلهم رجالة ومش عارفة اعمل ايه

وقفت بعيد احاول اشب واروح من هنا وهنا لحد ما شفت واحد واقف زى الغضنفر عمال يضرب شاب شكله غلبان وعمال هات ياضرب فيا بالقلم شمال يمين والولد واقف ايده جنبه وعمال يعيط قدام الناس

انا كنت هاتجننومش عارفة اعمل ايه

كنت عايزة اصرخ واقوله يا مفترى يا خسيس ده لو واحد حتى عربجى ومتسول متعملش فيه كده

انا اتأكدت انه ظابط فى لبس مدنى لسبب بسيط ان الناس الملمومين كانوا واقفين يتفرجوا كانه فييلم أكشن ولا بيعملوا حاجة اكيد طبعا خايفين والطبيعى انه لو واحد بيضرب حد فى الشارع ناس عادية بتضرب بعض يعنى اكيد الناس على الاقل زى ما بنقول تحوش وتقول حاجة او حتى تنطق باى كلمة

اكيد كانوا مرعوبين

اكيد كل واحد بيفكر فى عيالة ووظيفته

وانا واقفة من بعيد عمالة اتفرج ومزهولة

ولما فكرت انى ارد واقتحم الرجالة

افتكرت امى وانها مريضة وان ممكن حد يتعرضلى بالاذى وان امى ممكن تموت لو جرالى حاجة

افتكرت وصيتها ليا كل ما انزل اروح الشغل خليكى فى حالك متكلميش حد البلد مبقاش فيها امان تيجى علطول بعد الشغل

انا الحمد لله رب العالمين مش باخاف

لكن خوفى على اهلى وخصوصا امى من انهم ممكن يحصلهم حاجة لو انا حصلى حاجة

بيخلينى اقف ساكتة قدام حاجات كتير
وسلبيات كتير

اقول ايه

الظابط ده مش اول ظابط اشوفه بالسلوك ده

اللى مستغرباله بس موقف الناس الكتير قوى اللى كانوا ملمومين وكلهم رجالة انا كنت البنتا اللى واقفة بس

حتى على الاقل لو كانوا حتى يستسمحوا الظابط كلمتين حتى مش خناق ولا دفاع عن الولد اللى عمال يضرب

يقولوا يا بيه خلاص معلش اى كلام ولا اى حاجة حتى لو نفاق وكذب

لكن حتى النفاق معرفوش يعملواه وفضلوا يتفرجوا

مش عارفة اقول ايه

لو حد عنده رد يريحنى ياريت يقولى

Anonymous said...

احييكي علي موقف
والموقف الابرز موقف الاخ مفيد
بجد عجبني وقفتكوا وموقفه بجد
وصدقيني هما بينهم وبين نفسهم عارفين انهم غلط

المزاجنجي

Anonymous said...

يا بنتي بلا أقسام بلا وجع دماغ كنتي نزلتي وقلعتي الي في رجلك ونسلتيه على دماغ أمه ولميت عليه أمة محمد وريحتي دماغك

اقصوصه said...

نوااااره

لازم دايما الانسان يتمسك بحقه

وما يتنازل عنه..حتى اخر رمق

سيري ونحن ورائك :)

Anonymous said...

لا يا نوارة انتي صح واللي يضيع حقه في الصغيرة هيضيعها في الكبيرة..انا مرة كنت ماشية جنب البتاع السياحي اللي جنب عبد المنعم رياض وواحد راح قالي ياللا يا اجرة,,هي العربية كانت مش ولابد شوية بس كانت ملاكي دمياط,,,

dr.lecter said...

تصدقي بالله كنت عارف ان دي اخرتها

اه اتمسكي بحقك ماقلناش حاجه بس مش هتاخدي حاجه فعلا

انت لو رفعتي الموضوع للوزاره ممكن يجد في الامور جديد لكن من خلال الاقسام انسي تماما

اعتقد انكم هتنشروا الموضوع في جريده مستقله ويمكن وده اللي اتمناه ان الراي العام يهتم باللي حصل بس مش دي هتبقي اول ولا اخر تجاوز من تجاوزات الداخليه

بلغينا باقي الاحداث

Founoon said...

لا يا نوارة اللي انتي عملتيه صح

ماهو الغلط ابتدى من زمان لما سكتناله دخل بحمارة


ما ضاع حق ورائه مطالب

لقد خلقنا الله احرارا said...

حمدلله على السلامة ياقمر تعيشى وما تاخديش غيرها ---بس مفيش فايدة اقتنعت بالموروث الشعبى بجد يانوارة والله البلد بتتغير انت زعلانة ان كلامك عن الاهانة وكرامتك كان غريب بالنسبة لهم بس كويس ان فى حد بيعرف الكلام ده وبيقوله --- هانت ياجميل ----وسلامة ماماالف سلامة ربنا يديها الصحة والعمر الطويل

حياة said...

انا اتمنى ان تكون مصر اعظم بلد فى الدنيا ولكن لن تكون هكذا الا اذا احترم الانسان اخوه الانسان وكان هناك لكل مواطن حقوق له وعليه انا اتمنى ان نشاهد المصريين وتصرفاتهم خارج مصر وداخلها الاحترام والالتزام خارج مصر لماذا؟؟؟؟؟
لان الانسان يحس ان لو اخطاء سيعاقب وان اساء اليه احد سياخذ حقه انا كنت فى زيارة لمصر وشاهدت انسة تركن سيارته فى مكان بجوار منزلى وشاهدت اكثر 8 اشخاص يتحدثون معها باسلوب لا يرق ان انسان يتحدث به وعندما تحدثت بالموبيل للشرطة كم يحدث فى الامارات فان الشرطة تكون امامك فى دقائق استقبلت رد باستهزاء من الشرطة وقال لى بالحرف لما يحدث اكثر من الكلام ممكن نتحرك هل تدرون ماذا لو حدث فى الامارات التى يقال عنها انها دولة خليجية جديدة وليس بمجال للمقارنة مع مصر ولكن كانت الشرطة حضرت فى اللحظة وتم القبض على المخاطئين ويتم التحقيق فى مركز الشرطة بكل هدوء وحترام وكل انسان يخذ حقه ولا يستغرق وقت طويل ولهذا الانسان يحس بانها انسان ويحترم الشرطة والقانون وكذلك الشرطة تحترمه لا الفاظ بذائية ولا هدار لادمية احد
وحمد لله على السلامة يا نوارة وكان برنامج اليوم عن جيفارا فى قناة الجزيرة اول مشاهدة لك كنتى منورة

تحياتى

كلاكيت تانى وتانى said...

ياحبيبتى يانوارة والله يابنتى تعذبتى يا بنتى لما تحبى تعملى محضر اتصلى بية انا اقولك تعملية ازاى ههههههه محاضر اية يانور اللى رحتى تعمليها مفيش محاضر بتاخد حقوق فالبلد دى اسمعى كلامى انا اتهريت محاضر وقضايا ومفيش فايدة
ومحمد الغزالى ومهنى دول عسل بجد شباب لسة متحمس وحاسس انة فبلدة وبيدافع عن كرامتة بصى ياقمر الست هنا فبلدنا متعملش محضر لراجل الا لو اتهمتة بالتحرش جنسيا بيها او لمسها الشتيمة والكلام فبلدنا مبيوجعش هههههههههه بيتعاملوا معانا الشرطة وقتها انك فافى ومدلعة ويهروكى ضحك وتريقة
ربنا يسامحك ياغزالى انت واحمد القصة مكنتش محتاجة كل دة لما حد يضايق تانى انزلى وصوتى وقولى بتلمسنى لية هتلاقية جرى زى الفار على طول هههههههههه
نوارة افرجوا عن انور نور بعد ما امريكا رفضت استقبال مبارك عندها بالامس
الف سلامة ياقمر ومتسمعيش كلام الغزالى تانى ههههههههه اسفة ياغزالى انت عارف انا بحبك بس الستات ليها طرق تانية فأخد الحقوق ومش من ضمنها قاللى وقلتلة ههههههه
تحياتى

كلاكيت تانى وتانى said...

تقول المصادر المطلعة بأمريكا والعهدة على صحابى الامريكان ان تقرير الواشنطن بوست وندائها لبراك اوباما بعدم الترحيب بمبارك ونجلة فى زيارتة لأمريكا قد لاقى قبولا لدى الرئيس الامريكى الذى اشار لمساعدية من ايصال رغبتة تلك الى مصر اما الافراج عن نور واخرين من المعتقلين السياسيين واما عدم السماح لمبارك بزيارة امريكا وافردت الواشنطن بوست عدة مقالات حول هذا ولم يفصح البيت الابيض رسميا عن رغبتة ولكنة فقط اوصل المعلومة لمصر
وفى خلال يومين فقط من هذا التحذير الشفهى قامت السلطات لمصرية كالعادة بالافراج الصحى عن ايمن نور والذى يطالب بة منذ فترة طويلة ولكن الاعتقاد الاكبر داخل اروقة السياسيين المصريين والامريكان كما نقل لى صديق يعمل فى احد الصحف الامريكية ان مصر تحاول تملق امريكا وتعلم جيدا مدى قوة اوباما فى تنفيذ وعودة الانتخابية وما يحدث اليوم منة كتحذيرات فى الخفاء قد تصبح بعد حين فى العلن وهو مالا تستطيعة مصر ولا تتحملة على المستوى السياسى والاقتصادى
تحليل بسيط مبنى على اقاويل لمطلعين على الاحداث وممكن احلام وكوابيس ههههههههه
المهم افرج عن ايمن نور لية ؟ازاى؟؟ فين ؟؟العلم عندالله
وبعيدا عن الاتفاق او الاختلاف مع ايمن كشخص اعتقد انها خطوة جيدة لنعلم منها كيف ومن اين تؤكل الكتف
ماتيجوا نهاجر امريكا جمعاااااااااااااء
تحياتى

همسات دافئه said...

عارفه يانوارة
انا لما قريت الموضوع استغربت جدا من الى انتي عملتيه وحاسيت برضه انك كبرتي الموضوع اوى
ده أقل حاجه بسمعها بس مستغربتش خالص رد الفعل ده وكنت عارفاه من اول سطر

أحكيلك قصه صغيره اوى
واحد فى منطقه حيويه جدا فى مدينة نصر وبنت سانده على عربية مستنيه مواصلات راح مسكها ورماها على الأرض وقلعها ايشاربها بس متقلقيش الشهامه لعبت دورها والرجاله جريوا وراه جابه منه الإشارب
راحت القسم قالولها تعرفيه
لاء
طب لما تشوفيه تاني ابقى تعالى قوللنا
وعرفنا بعد كده انه معروف وعمل العملة المهببه ده أكتر من مره
اقرى القصه ده وانتي تعرفي ان الى حصلك ده ولا أى حاجه
ولسه
يمكن نكون سكتنا
واتنازلنا سعات
ولما صرخنا
ومحدش خد حقنا
ولا رد كرامتنا
هايعملوا فينا ايه أكتر من كده:(
احمدي ربنا

احمد سعيد said...

نوارة
على فكرة دانتى كدة ميت فل وعشرة
وهم مدلعينك اخر دلع
علشان صحفيه
وهم مش عايزين قلق
ولو كنتى شخص عادى
وحياتك ماكنتى خرجتى منه
وكنتى هتشوفى معامله تانيه خاااااااالص
طبعا البهوات فضلوا مقعدينكم فى القسم
لحد ما سحبواالبقف دة
واحتمال غيروا الطقم بالكامل
وبعدين
ودوكى علشان تتعرفى على البنى ادم اللى مش موجود اساسا

ههههههههههههه


مساااااااااااء الفل

احمد سعيد said...

وعلى فكرة يا نوارة
معتقدش ان الصخص دة عسكرى

لان الكلام دة ميطلعش الا من ظابط
او على الاقل امين

كلاكيت تانى وتانى said...

انا مش قلت قبل كدة اقرالك ومعلقش تانى بتخلى لسانى يفلت ههههههههه وانا عندى عيال عاوزة اربيهم هههههههه متنشريش التعليق دة سلامتك من كل شر محتاجة جلسات ارشاد اسرى يانور وتنمية نفسية لأنة مش كل شئ لازم نزعل علية ولا منة
العبط كتير ياحبيبتى والسئ اكتر
خدى بالك منك خلى لافعالك نفس مستوى رد الفعل عشان محدش يضحك عليكى ولا منك بمعنى راجل ضايقك انزلى اعرفى هوة مين ولية وسلطتة اية اعرفى اسمة واتكلمى معاة لقيتى القصة تستاهل ولة قيمة اعملى مابدا لك لانة مينفعش ان حد فمكانة كضابط يعمل كدة واقلبى فوق دماغة الدنيا بس بعد ماتعرفى هوة مين او لية لقيتية عبيط واتغظتى منة عاملية كراجل قليل الادب واقلعى البوت وفوق دماغ اهلة وملوش عندك دية ياحبيبتى تصدقى انى متصورتش ابدا انك شفافة وطيوبة كدة شكلك فالصور منهارة وتعبانة ومرهقة ومش عارفة تتصرفى بجد الموقف كان سئ والتصرف كان اكتر من اللى يتحملة الموقف اساسا خدى بالك منك وقتك اولى بية فكرك مش المهاترات فالشارع والاقسام

مواطن مصري said...

ايمن نوووووووووووووووور طلعععععععععععععععععععععععععععععععععععععععععععععععععععععععععععععععع



لولولولولوولولي عقبالك يا عبد الكريم عامر

esraa said...

لأ بقي انتي عندك حق وكان لازم تعملي المحضر
يعني من اول محضر كده هنتنازل
امال الناس اللي في المعتقل تعمل ايه بقي
دول ياعيني عليهم يتنازلو عن البلد كلها مش المبادئ بس

مهندس مصري said...

يا بنتي ما هو اللي يعمل محضر ضد حد من الشرطة لازم يعمله في النيابة و في تفتيش الداخلية

لكن محاضر الإقسام دي وجع قلب على الفاضي

انتي المفروض لما الهباب بتاع الكشك ده قالك كده كنتي هزأتيه في لحظتها و كان بقى كلام بكلام و بقينا خالصين

انتي لسانك حلو على النت لكن في الحياة واضح انه قصير قوي

يالا الحمد لله حصل خير
و المهم ان صحة ماما تكون كويسة دلوقت

مهندس مصري said...

آه و نسيت أقول لك انا مش بأدخل القسم أبداً
مش بأستريح لدخلته
و المرتين اللي دخلت فيهم القسم أعمل محاضر روتينية علشان تخليص شوية ورق و ما كنتش رايح اشتكي حد و مع كده اصريت آخد واحد صاحبي محامي معايا
علشان أخلص أموري بسرعة و علشان أضمن حقي
لإن كنت حاسسس اني لو دخلت لوحدي يا عالم ايه اللي يحصل لي و بدل ما أكون داخل اعمل محضر يلبسوني قضية و لا يطلعوني انا الغلطان في اي حاجة مش على مزاجهم
لإن دي عالم مريضة و مش بتحترم أي حاجة و لا أي حد الا لو كان صاحب سلطة و نفوذ أعلى منهم

مواطن مصري said...

كنت اسئلية على رفعت السكري دة حقيقي ولا

عبقرينو said...

كويس انك عملتى محضر ودخلتى التجربة دى بداية التغيير هو اننا نضحى بوقتنا ونضحى بحاجات تانية فى سبييل الحصول على حقوقنا

.:.-=- ELGaZaLy-=-.:. said...

بصى يا نوارة انتى صح..وكفاية اوى اننا عملنا للظابط قلق وجرى زى الفار وخبوة..كل الادله وكل الى حصل بيقول انهم مرعوبين مننا..
كفاية انة يستخبى ويجرى..كفاية ان المامور ينزل القسم هو والنائب بليل ..كفاية اوى لم الاخ ابو سحلة يجيلنا مخصوص...اية يا جدعان ..
كبرى انتى صح

وبعدين عيب عليكى ابن خالتك جدع برضة

e7na said...

جدعه يا نواره
مع ان ده المفروض فى اى بلد زى ما انت قلتى لهم حاجه طبيعيه
لكن هم اتعودوا ان اللى يجى يشتكى اذا تجرأ ودخل القسم يتشحتف ويعيط ويناول كل واحد يقابله فلوس علشان يظبط له المحضر او يقع فى عرض البيه الظابط والامناء والمخبرين
انما كلام عن حقوق وضرائب وعنصريه
يبقى شكلنا مخلوقات فضائيه
..
واوعى يا نواره تقولى انك لو الموقف اتعاد مش هتعملى كده
انا عارف ان الموضوع مش سهل
بس مينفعش نقعد نتكلم وننظر واما نتحط فى موقف ما ناخدش حقنا
...
سلامى للاستاذه صافى

Moray said...

يا ستي المؤسف اني موش في بلاد الخواجات و لا حاجة
أنا عايش في الامارات و الشرطة ما تقدرشي تعامل حد كدة

و الشهادة لله أنا مرة دخلت القسم أشتكي واحد
بالاضافة لأن القسم في نظافة فندق خمس نجوم فالمعاملة كمان أسرتني من اللياقة و الذوق و اللين اللي بيتكلموا بيه معايا بالرغم من أني ما عنديش أي اثبات عالى ادعائي ضد واحد اماراتي مواطن و أنا وافد

اتحسرت عاى أقسام البوليس و الشرطة عندنا

و اعتبارنا الشرطة جبهة تانية غير الشعب دي حاجة مؤسفة

محمد

Anonymous said...

قرات للاستاذ ابراهيم عيسى المقال التالى فى جريدة الدستور المصرية وهو افضل تعليق على ذلك الموضوع


.يقول سأشعر بالمفاجأة لو خرج أيمن نور من السجن حياً(اهو خرج شعرت بالمفاجاة اهو)! الدولة تصل إلي درجة مهووسة من كراهية أيمن نور حتي أنني لا أستبعد إطلاقًا وسط صمت وتواطؤ ورخاوة الحياة السياسية المصرية أن يتم التخلص من أيمن نور! الغريب أن أيمن نور في زنزانة في السجن منذ حوالي ثلاثة أعوام، ومع ذلك فصحف الحكومة تكاد لا تخلو في أي يوم من الهجوم علي نور أو زوجته السيدة جميلة إسماعيل، ولا يكاد يخلو حوار أي مسئول في الحزب أو الحكومة مع أي بني آدم يقابله من هجوم وتعريض بأيمن نور أو استنفار ضده أو محاولة هدم سمعته أو الطعن في وطنيته! كما أن جهاز الأمن في مصر يضع أيمن نور في أول قائمة أعداء النظام المطلوب التخلص منهم قبل حتي جماعة الإخوان المسلمين وحركة كفاية، نعم نور أهم من الإخوان عند الدولة وأخطر وأقوي، ويوشك أي مسئول أمني علي تحويل خصومته مع أيمن نور إلي خصومة شخصية كأن أيمن خطف ابنته أو قتل خاله!! فتنضح تصرفات الأمن تجاه أيمن وجميلة بحالة من الغضب والانتقام الشخصي كأن بينه وبينهما ثأراً قديماً عميقاً يحفر نفسه في وجدان المسئول الأمني! إلي هذا الحد النظام بجلالة قدره خائف ومرعوب من أيمن نور وهو رجل في زنزانة! سبحان الله، لماذا إذن يخوتوننا بالكلام عن قوتهم وجماهيريتهم وشعبيتهم وحزبهم الأزلي الأبدي السرمدي «أبو تلاتة مليون عضو»؟! الرئيس مبارك يستثني أيمن نور من كل قرارات العفو الطبيعية والتقليدية التي تنطبق علي السجناء حتي لا يخرج أيمن نور، كأن خروج الرجل سوف يعطل مسيرة مبارك وسوف ينسف جهود التنمية، الشيء الوحيد الذي يمكن أن تفهمه من استثناء نور من العفو علي هذا النحو الفج هو خوف النظام من قوة ما لدي أيمن نور، يبدو أن النظام وحده باعتباره ثاقب الرؤية نافذ البصيرة يراها في نور، ويعرف الرئيس مبارك بحكمته أن خروج أيمن نور سوف يعوق مشروع التوريث (ربما).. سوف يطرح بديلا في مواجهة جمال مبارك (احتمال) وإلا لماذا يخاف منه النظام، لماذا يرتعب من رجل في زنزانة؟ أجهزة الأمن تخاف من حزب الغد فسلمته إلي منشقين عن أيمن نور، خلاص فهمناها، لعبة سخيفة وتافهة، لكن من قال إن الحياة الحزبية في مصر لها قيمة أساسا وإنها تخلو من التفاهة والسخافة، ومن قال إن حزب الغد بدون أيمن نور يشكل أي فارق عن حزب أحمد الصباحي وتلك الأحزاب التي لا تساوي لدي المواطن مثقال حبة من خردل. السؤال هنا: لماذا الإمعان الكفور في الخصومة والرغبة المهووسة في الانتقام بالاستيلاء علي مقر كلنا نعرف أنه مكتب أيمن نور الشخصي أي أنه ملكه هو وأولاده وباسمه، لماذا هذا التجبر والتكبر وتلك الغطرسة والفظاظة في التعامل مع شقة أيمن نور؟ عارفين ليه؟ لأن الدولة التي ترتعب من رجل في زنزانة هي كذلك مرتجفة من تجمع عشرين شخصاً من أنصاره في شقة.. شقة في وسط البلد تواجه حزباً علي كورنيش يملك كل شيء في البلد (هو يملك البلد أصلا)، ولكنه لا يملك الشرعية ولا الجماهيرية ولا المحبة، ومن ثم تعرف الدولة أن شقة (نور) يمكن أن تواجه برج (عتمة) ولهذا سارعت جحافل لحرق الشقة، والمخجل أن يتم ذلك بأرخص التمثيليات وأعفنها إخراجاً حين يتهمون أصحاب الشقة بأنهم حرقوها. أظن أن الدولة سوف تسلم شقة أيمن نور للمنشقين عنه، هنيئاً للدولة بالشقة، تشبع بيها وترتع فيها وممكن تؤجرها مفروشاً لو أرادت، لكنها لن تهدأ.. لن ترتاح.. لن تفرح، فالمؤكد أنها مازالت علي رعبها من رجل في زنزانة وتطارد شبحه الذي بات يطاردها في الصحو والمنام، ستبحث عن أي شيء آخر يحاول أن يهدئ غضبها وأن يطفئ نارها تجاه أيمن نور، لم تعد ترضيها حملات جديدة من صحف الحكومة والصحف المحسوبة علي الحكومة ضد أيمن نور، يبدو أن هذه الحملات لا تقنع أحداً ولا حتي الحكومة بأنها انتصرت علي أيمن نور، لقد رأت النار تشتعل في شقة نور لكن النار التي تشتعل في مصر كلها وتحيلها بلدا يشتهر بزراعة القطن وإشعال الحرائق لم تنجح في إشفاء غليلها، مالها الدولة وقد تحولت لأرملة عجوز في الصعيد تحث عيالها علي الأخذ بالثأر حتي تطفيء ناراً مشتعلة في كبدها، ماذا فعل فيكم أيمن نور إلي هذا الحد؟ إذا كان سياسياً صغيراً بلا شأن كما تزعمون أنتم وغيركم فلماذا تكرهونه وتخافون من خروجه ومن أنصاره ومن شقته؟! لقد اتهمتوه بالتزوير وحكمتم عليه بالسجن بتهمة حيازة أوراق مزورة، خذ بالك هذه تهمة نور طبقا لقضية كلنا نعرف أولها من آخرها.. حيازة وليس اصطناع مستند مزور ولا تزوير مستندات، ثم هذا المستند المزور الذي حازه كان غير مهم ولا مؤثر ولا يترتب عليه أي فعل سلبي أو إيجابي بل التهمة إنه حاول إيهام لجنة الأحزاب بشعبيته.. هل اتفقعت مرارتك؟ نعم هذه هي تهمة نور التي حوكم عليها بخمس سنوات سجناً ولا يريد مبارك أن يعفو عنه بعد نصف المدة، وهذه التهمة التي يحب جهاز أمن الدولة أن يطلق علي أساسها تعبير المزور الأكبر علي أيمن نور.. الله الله.. يعني من زور أصوات عشرات الملايين في الانتخابات المصرية ليس مزوراً أكبر والذي حاز مستنداً عن حزبه هو المزور الأكبر.. إنهم ينسون أن الله أكبر. لن يكون حريق شقة يملكها أيمن نور وأولاده، يجتمع فيها أنصار الرجل وبقايا رجال حزبه المسلوب هو آخر حريق.. لكن الساحة السياسية التي خلت من الرجال والرجولة ستظل تتفرج لأن الحقد تجاه رجل في زنزانة ليس في قلب الحكومة فقط بل في قلب صغار المعارضين الذين أحرجتهم شعبية أيمن نور وصموده في السجن وعالمية قضيته وتعاطف الملايين معه وإكبار الدولة لحجمه وخوفها منه.. كل هذا جعل الصغار يتخلون عنه كما الكبار وجعل مصر تشهد سرد أحداث موت معلن بلا ذرة من انفعال ولا نقطة من كرامة وكبرياء ولا حرف من كلمة حق. لن يخرج أيمن نور من السجن حياً في الغالب والله غالب علي أمره!

Dr.Online said...

تجربه تضاف لتجارب الواحد الشخصيه

نفكر فيها و نتعلم منها

بالمناسبه

شوفو التجربه اللي في البوست دا عندي:

http://letsthinkdeeper.blogspot.com/2009/02/blog-post_19.html

mado said...

تعيشي ومتاخديش غيرها يانوارة.
انا عرفت الخبر عن طريق تويتر وكان المصدر المدون محمد الجوهري.
وبجد قلبي وقع.
وكويس انهم اتعاملو معاكم كدا.كويس انها جات علي قد التريقة والضحك علي كلامكم.
لان للاسف في ناس بيتعاملو معاهم بعجرفة وقلة ذوق.

ولو انا مكانك كونت دخلت فيه شمال.
علشان دي اشكال واطية لما بيحسو الي قصادهم ضعيف يسقو فيها.
معلش يانوارة وحاولي
الي حصل دا ميأثرش عليكي.

ElHaram said...

من الأمثال المصرية العظيمة
"إذا كانت العمم إشتكت من الفسا . . إيش يكون حال الإلبسة "؟

كفارة يا نوارة والحمد لله إنت ماإتاخدتيش في قضية "تكليم السموأل بما يتنافى مع الإحترام الواجب مع ضباط الشرطة وأسودها الهواصر"

lastcrazyboys said...

سيبك من كللللللللللل ده

:اجمل حاجتين في الليلة دي كلها

"أسقــط في يدي"
مش عارف عملتيها ازا ..ولا جبتيها منين

والحاجة التانية انك مش عارفة تفرقي ..واحد بنجمة ..والتاني بهلال

للدرجــة دي مش مديالهم اهميــة ولا اعتبار ..عشان كده محاولتيش تتعرفي على ترتيب الرتب
طب بصي باختصار كــده "للمعلومية فقط

نجمةواحدة"ملازم"
"نجمتين" ملازم أول
"تلات نجـوم" اسم النبي حارسه بقى نقيب
اربع نجوم " مفيش اربع نجوم" لان كتافه مش هتشيل
قووم ايه
حاطين نسر وبكــده يبقى "رائــد" لو خد جنبيها نسر يبقى "مقــدم"معرفش على ايه بس اهو مقدم وخلاص
"العقيد " طبعا يبقى نجمتين ونسر
تلات دبابير"نجوم"ونســر ده عميد
اللواء بقى اللهم صلي على كامل النور بيبقى حاطط سيفين ونسر

في رتب جيش زيادة وهي الفريق..والفريق الأول ..وسيادة المشير وغالبا بيبقى وزير الدفاع

اقعدي سمعي بقى لحد المغامرة الجاية عشان تعرفي ترتيب السطلة اللي بتتكلمي معاها

bluestone said...

تعليق عنصري ايه بس يا نوارة ؟؟
ده انتي لو سألتي العسكري اللي شتمك مش هيعرف يعني ايه عنصري اصلا

على فكرة انا شاكة تماما في انه يكون بيهزر هزار غبي هزار فلاحيني صعيدي ملخبط

لانه ببساطة شديدة لو مسلم مثلا لا يمكن يقول الكلمة دي ويقصدها لان العسكري اللي مرتبه 100 جنيه في الشهر أكيد في عيلته مش اقل من 20 واحدة محجبة
اصله مش عسكري في باريس مثلا

ولو كان عسكري مسيحي وعايز يسخف عليكي او يضطهدك فيه طرق تانية مختلفة تماما للاضطهاد واسأليني انا بقىىىىىىىىىى

الشخص العنصري اللي بيمارس قهره على الاخرين بيعمل كده بشكل غير مباشر وده امعانا في القهر مهما بلغت سلطته

يعني مثلا يقولك مش هتعدي من هنا
او يوقفك يقرفك وياخد رخصك ساعتين ويسخف عليكي
او يعمل معاكي زي ما عمل معايا ظابط مرور من كام شهر سحب رخصتي علشان اللي كان قاعد جنبي مكانش لابس الحزام رغم انه لسه راكب !!!!!!!!
ووقفني ساعة واتخانقت معاه ودفعت غرامة ع الجزمة من غير ما يحس انه ضايقني ومشيت

وطبعا لا يمكن اشتكيه لانه كان حريص انه مايعملش حاجة يتمسك بيها

فاهماني ؟؟؟

لو شخص عنصري وعايز يهينك كان هيعمل مليون حاجة تانية غير كده

الوضع مختلف عن اوروبا يا نوارة يا حبيبتي
اوروبا المحجبات فيها اقلية ويسهل ممارسة العنصرية ضدهم
لكن الوضع في مصر مختلف تماما

ومش هصدق لو حلفولي على المية تجمد ان فيه بني آدم لابس ميري ممكن يطلق كلام عنصري زي ده بشكل مباشر على واحدة محجبة في الشارع ويكون قاصده ومش بيهزر
مسلم بقى ولا مسيحي ولا حتى كافر

جبهة التهييس الشعبية said...

معلش يا شباب كنت طول النهار برة البيت وانا دلوقت في الشغل

جبهة التهييس الشعبية said...

يا بلو
هو مش عسكري
اظنه ظابط لان سنه صغير وطريقة كلامه ونطقه للحروف مبينة انه متربي على الغالي يعني
ثانيا مين جاب سيرة انه مسيحي؟
معلش نو اوفنس
المسيحي حتى لو عايز يقول كده ح يخاف
ده واد بقى شرطة سياحة وبيشتغل مع السياح وافان جارد بقى وعامل نفسه خواجة
وما كانش بيهزر ولا حاجة

الخوجة said...

نعرف منظمة العفو ولا ايه رأيك شاورى تكه واحده

وبعدين طوال النهار ادخلى نزلى تعليقات نطمن انك عايشة بس

احمد سعيد said...

lastcrazy boy
.................

معلش ليا تعقيب صغنطوط على كلامك

المقدم نسر ودبورة

ورتبه الفريق اول اتلغت من فترة

sarah said...

والله يا نوارة الناس دزل موجودين فى كل حتة بس انا مبقاش بيهمنى ... لما حد بيضايقنى باديله على دماغه
\والله هزأت عسكري قدام الخارجية وعسكرى تانى فى لجنة كان بيعاكس وامين شرطة قدام باب القسم مسخرت اللى جابوه ... انتى مش غلطانة هما اللى مش متعودين ان فى حد عايز ياخد حقه ... ومرة عملت محضر لجيران لينا قلوا أدبهم علينا بس القسم معملش حاجة الا لما شوفنا واسطة علشان يتظبطوا ... انتى صح ومية مية
وربنا يكونف ى عونا فى البلد دي يارب

حسن على said...

اكتشاف مثل عربى حديث: المستجير ب"سحلة"من ابية يستاهل اللى يجرى ليه

Anonymous said...

muslima

تريدين اجابة على سؤالك؟ تأملي ماكتبت...ستجدين الجواب
واللبيب من الاشارة يفهم

Anonymous said...

يا نوارة أعتقد إنك سمعتى عن قافلة جورج جالاوى حوالى 120 عربية أغلبهم عربات إسعاف يا ريت يكون هناك إهتمام إعلامى مسبق بهذه القافلة عشان نشكل نوع من الضغط على المعنيين حتى يتم وصول القافلة و دخولها بسرعة و إن الحكومة تعرف إن هيكون فى فضايح إعلامية لو ما سمحتش للقافلة بالدخول

bluestone said...

ماهو ده اللي قلته يا نواره
لو مسيحي من غير اوفنس ولا حاجة
مش هيقدر يعمل كده حتى لو عايز
فاهمة قصدي؟؟
يعني برضه فين مليون طريقة يقل أدبه بيها من غير ما يعمل لنفسه مصيبة

وحتى لو كان من شرطة السياحة وعيل صغير وفرفور وفاكر نفسه خواجة
ماهو برضه اكيد والدته محجبة ولا اخته ولا خالته
هو الموقف كله مش طبيعي اصلا مش مفهوم

Anonymous said...

يا نوارة يا ريت تدخلى على الموقع ده و تحاولى تتواصلى معاه ناس عاملين إحصائيات هامة جدا عن العلاقة بين الفلسطينين و الصهاينة مش عارف أحكى عن اهمية الموقع ده والله هتدعيلى و يا ريت تنشرى و يحاول كل النشطاء التواصل مع الموقع ده http://ifamericansknew.org/

تامر علي said...

أولاً أحييك على موقفك الإيجابي اللي كتير مننا مش بياخده ...فعلاً تستحقي عليه تحيه كبيره .
استهزاء الضباط بيكم مش سبب للتخلي عن الإيجابية ...الرسول لما بعث أول حاجه عملها الكفار انهم استهزأوا بيه.. النهايه بتاعة القصة بتاعتك مع انها غير مبشرة :) لكن ممكن تكون ارهاص لوقفات ايجابية تؤدي لنتائج اكبر ان شاء الله

عــلي ابراهـــيم said...

انا مش هقولك تستاهلي اللي حصلك ده ولا حاجه عشان انا اللي اتحسبنت فيكي واهه الحمد لله اخدتي شهادة ارهابيه كمان ..مين قدك يااخت نواره ..بكره نزورك في جونتانمو ..يمكن اوباما يرجع في كلامه وميقفلش المعتقل ده طالما الارهابيين لسه مشردين في شوارع المحروسه واللي يفجر المتحف ممكن يفجر برج التجاره
.................
الخلاصه اني بعت رساله علي ايميل ياهو ياريت تعبرينا وتردي عليها يا نوارتنا

بذرة امل said...

عجبنى أوى موقفك يانوارة أنتى ومهنى ومحمد الغزالى
عجبنى ثباتكم واإحساسكم بالكرامة
ودى حاجة للأسف عادت معدومة الأيام دى
لسة شايفاكى فى قناة الجزيرة فى الفيلم الوثائقى تشى جيفار
رأيك كان مقنع اوى لما أتكلمتى عن التشابه اللى بين الزرقاوى وجيفار
تحياتى

حسن على said...

اليوم حصل لى عظيم الشرف بمقابلة السيدة صافى ناز كاظم( عبد الحق)وابنتها الانسة نوارة نجم (عبد الحق)وتبين لى ان السيدة صافى ناز طالعة لبنتها -تقولش قرايب يا جدع- انبهرت بدماثتمها الهائلة فى الحياة الاجتماعية رغم عنفهما فى الدفاع عن الحق. التهمت خمسين صفحة من كتاب نوارةالرائع( عش على الريح)فى دقائق ..سلاسة ..صدق..عفوية..وتلقائية وتدفق رائعين .... واستأذن لأتابع قرائة الكتاب شاكرا لنوارة اهدائها الرقيق

mido said...

الكتاب تحفة انا قرأت جزء الطفولة _أسلوبك ساحر

سكوت هنصوت said...

نوارة

مش عايزة اقولك...i told you do

بس فعلا عايزة اقولك حاجة مهمة

انت بتسألي في البوست سؤال مهم...اعتقد انك مش مستنياله اجابة
بس انا من باب الرخامة هجاوب

بتقولي ايه الغريب في انك تتكلمي عن الضرائب الي بتدفعيها..الغريب انك بتتكلمي عنها في بلد بتاخدها منك اتاوة

يا نوارتي الحبيبة..عادل امام قالها في فيلم الأفوكاتو, الحل العلمي في بلد تدار بطريقة غير علمية هو حل غير علمي في حد ذاته

مين الي قال ان الي شتمك ايا ما كانت هويته...مدرك كلمات زي العنصرية وحقك في الحياة والكلام الكبير قوي ده

وليه مفترضة ان شوية ظباط تعليمهم على قدهم وما يفهموش غير في شغل اللوع والنصب...هيفهموا كلامك

يا رب تكون بس خرجتي بنتيجة من التجربة دي يانوارة...

انا شخصيا حصلي موقف مشابه لما خبط عربيتي عجل بيجري في شارع الهرم

تخيلي عجل طالع يجري في الشارع لوحده في رمضان...وراح هاجم على عربتي مكرسلي الزجاج وكان هيموتني لولا ستر ربنا...

رحت بهبلي عملت زي حضرتك كده ورحت قسم الشرطة اعمل بلاغ عشان كنت شايفة ان من مسؤوليتي اني ابلغ عن العجل الهربان الي كان ممكن يقتل اطفال بتجري في الشارع

تفتكري الظباط عملوا ايه...اعتبروا اني بقولهم نكتة الموسم....لا يا شيخة بقى معقولة عجل خبطك

يا نهار ابيض..وكان بيجري كده في الشارع...توؤ توؤ توؤ توؤ توؤ

لا حول الله يا رب...طب وحضرتك عايزة ايع دلوقتي

انا عايزة ابلغ عن الحادثة...يعني عايزانا نعملك محضر

معرفش تعملوا ايه...انا ببلغكم ان فيه عجل هربان في الشارع...وبيدغدغ في عربيات الناس وممكن يقتل حد

طب وهتتهمي مين في المحضر...قلتلهم معرفش بس اقرب جزار لمكان الحادث هو الموسكي

يعني عايزانا نعملك محضر نتهم فيه الحاج الموسكي الكبير ولا الصغير

ابص للظابط بغباء الدنيا والأخرة واقولة وانا اش عارفني...انا عملت الي عليا...اعمل انت الي عليك وشوف هتحل مشكلة العجل الي بيجري في شارع الهرم ده ازاي

ما طولش عليكي يعني...قضيت اسود ليله في عمري في القسم...واضطريت اروحه مرتين مرة عشان اعمل المحضر ومرة عشان الغيه لإنه ما طلعش الموسكي...لإني تصوري..لقيت العجل

يعني انا الي اتخبطت...بلغت ورجعت اتطقست على حكاية العجل ولقيته ولقيت صاحب العربية وعرفت انهم عجلين مش واحد واحد منهم هرب خلاص....ورجعت القسم لغيت المحضر الي كنت عملته...ومشيت

كل الي عملوه الظباط ان هما كتبوا ورقتنيز...ورقة عليها المحضر وورقة التنازل عن المحضر

اتعلمت من التجربة دي...ان الواحد لازم يختار معاركه

عشان ما يلاقيش نفسه بيهدر في وقت وصحة واعصاب منغير مناسبة

لو هضيع خمس ست ساعات في القسم...يبقى لازم تكون عشان حاجة تستاهل

احنا مش في بلد ديموقراطية ولا محترمة

احنا مش في بلد محترمة..وبقولهالك تاني يا نوارة..احنا مش في بلد محترمة عشان نستنى معاملة محترمة

البلد مش تراب وارض..البلد شعب وحكومة

والحكومة دي فاسدة ومفسدة..حكومة مش محترمة

خلت الشعب كمان شعب مش محترم

وبالتالي فالبلد حاليا مش محترمة

يبقى ما استناش منها بقى معاملة محترمة

واعترافنا بإننا مش محترمين هو اول خطوة في سبيل احترامنا لنفسنا

ارجو ان تكون الوالدة بخير الأن..,اسفة على الإطالة

TAFATEFO said...

وجرى قتل الضحايا بعد أن قيّدوا وعصبت أعينهم، وجرى إلقاء جثثهم لاحقاً في قنوات مياه ببغداد بعد تصفيتهم برصاص في الرأس.

http://arabic.cnn.com/2009/world/2/21/leahy.iraq/index.html

مواطن مصري said...

نوارررررررررررررررة لبنان انضربت ب المدفعيية الظاهرة الصهاينة بينفذو فلم ميونخ


لبنان انضربت
ب المدفعية

خطاب نصر الله الظاهر هيتحقق


ربنا يستر

سـهـيـر زكــي said...

ألف الحمدلله على سلامتك يا نوارة

بس ب اعتب عليكي إنك ما استمريتيش وصممتي إنك تاخدي حقك

إلّي إتعمل معاكي ممكن يحصل بالمستقبل لأي حد تاني, ويمكن يكون مش زيك قوي ولا يعرف طريق محامين ولا ظليع بالامور ديت

ما يرضيكيش ساعتها إن كرامته تتبهدل

لو كلّ واحد إتنازل عن حقه وتحجج بأيّ حجة, فده ح يعطي إنطباع للّي ما يستموش بأن الشعب ممكن يتنازل عن أيّ حاجة

عزيزتي نوارة إنتي طول عمرك قوية, إنتي بتعتبري زي الأمل بالنسبة للكتير من الناس, انا ما عرفكيش ولا سبق لي إني صادفتك شخصيا, بس بتعجبني شجاعتك وثباتك على رأيك ودفاعك عنه, حتى لو كنت ح اختلف معاكي ببعض النقاط

ربنا يخليكي ويحرسك ويبعد عنك الأشرار

ياه دنا كتبت كتير ولخبطت بالكلام ومعرفش أصلا أنا قلت إيه

سلام

احمد سعيد said...

سكوت هنصوت
............
انتى كدة جبتى من الاخر
قولتى كل اللى كنت عايز اقوله
مات الكلام خلاص