Saturday, 7 February 2009

تصحيح عاجل بخصوص بايضن

بس المرة دي مش غلطتي والله، دي غلطة ترجمة الجزيرة، الجزيرة كتبت الخبر كده:
عاجل: جون بايدن يقول ان حل الدولتين قد مضى زمنه
طلع الراجل بيقول كده:
It is past time for a secure and just two-state solution. We will work to achieve it,
نص الخبر على رويترز اهو
بس ده ما يمنعش اننا نقرفهم برضه

20 comments:

Anonymous said...

انا اسف ان ده حالنا انا اسف اوي انك تتكلمي علي لسانا انا اسف انك مش فاهمة اي حاجة في حاجة وماشية بسياسة فرش الملاية واهي ماشي ماشية ماهما عايزين كده الرديحة يتكلموا ويهللوا واهي ماشية اقفي يا بنتي مع نفسك وقفة كده وشوفي نفسك وشوفي طريقتك في الكلام والتعبير والسطحية اللي مالهاش مثيل واهو كل عجين بس ياريته حتي كان عجين الفلاحة عجين الفلاحة اهو اسمه له نفع وفايدة لكن ردحك عمال علي بطال والسفسفطة دي بيسهموها اللي مش فاهمين نضال قال نضال قال ماهي نضال لو كانت لسه عايشة كانت انتحرت من زمان لو لقت الكلام في السياسة يبقي كده او بالشكل كده واهي بين ده وده دلال ورضا حتي رضا بريئة من كلامك ومش راضية عنه

مهندس مصري said...

ادينا شغالين و ربنا يسهل

جبهة التهييس الشعبية said...

انونيمس

طبعا انت حر في رأيك
بس ممكن افهم انا اتكلمت بلسانك امتى يعني؟ وللا بلسان اي حد؟
ونا دي مين؟
هو انت كام واحد؟ مش انت بني ادم واحد بس؟
وانا بني ادمة واحدة بس
وباتكلم عن نفسي وباقترح اقتراحات اللي عايز يشارك فيها اهلا وسهلا اللي مش عايز هو حر

انت بقى بتتكلم بلسان مين؟ وعلى لسان مين؟ ما تعبر عن نفسك وبس زي ما انا باعبر عن نفسي وبس


مهندس

لا انت ميت فل وسبعتاشر

Anonymous said...

قال الله تعالى: الَّذِينَ يَلْمِزُونَ الْمُطَّوِّعِينَ
مِنَ الْمُؤْمِنِينَ فِي الصَّدَقَاتِ وَالَّذِينَ لَا يَجِدُونَ إِلَّا جُهْدَهُمْ فَيَسْخَرُونَ مِنْهُمْ سَخِرَ اللَّهُ مِنْهُمْ وَلَهُمْ عَذَابٌ أَلِيمٌ

بجد يا Anonymous
ديه مش طريقة نصح
ده إذا كان غرضك النصيحة

و أيضاً هى لم تدع أنها بتكلم بلسان حد

ثم ميصحش برضة إنك تتهم حتى طفل صغير
بإنه مش فاهم حاجة

من الذى أوكل لك الحكم
هل إمتلكت المعرفة و المقاييس التى تؤهلك لذلك

بجد ردك كان أقل ما يوصف به إنه مستفز

يا أخانا إن كان عندك نصيحة قولها
لكن لا تهدم و لا تقلل من شأن الآخرين

شوف أنا لست من النوع الذى يحب النفاق و أؤمن طبعاً بحديث الرسول صلى الله عليه و سلم
الذى وصف فيه النفاق بإنه بمثابة قصف للعنق

لكن أنا مضطرة و أمام كلامك
أن أقول

يا نوارة ربنا يكرمك و يباركلك

أهم حاجة بس نجدد النية فى كل مرة
و ربنا يعينك و يقويكى

مــــى

مواطن مصري said...

نوارة ازيك انا ليا رأي و اقولة في هذا الشأن ما يسمى ب الدولتين



من خلال الاحداث طرح اكثر من حل اولهما حل الدولتين ان يكون فية دولة فلسطين و اسرائيل و الحل الثاني وطن واحد بمعغنى دولة واحدة نظام علماني يعيش فية الافلسطينين و اليهود و المسيحين تحت قانون واحد زي جنوب افريقيا كدة

و نظام الاغلبية و الاحزاب و ياخد مجراة

و الحل الاثالث الي قولتهولك قبل كدة و الريس تحدث عنة و انتي عارضتيني فية و شكلة هيتنفذ

هو
الثلاث دول دولة حماس في غزة و توطين جزء منها في سيناء و دة الريس الي قال علية خط احمر

و دولة فتح في الضفة و توطين جزء في الاردن و دولة اسرائيل


و انا حاسس ان في الاغلب هينفذ الحل الثالث مع اني انا ارغب في الحل الثاني وطن واحد و ان القدس تكون مدينة دولية غير تابعة ل احد و يشرف عليها اليونسكو و جامعة الدول و هيئة الاثار


سمعتي عن
مجرم حرب النازية الي اكتشفوة انو كان في مصر و ميت من 17 سنة و اليهود عاوزين العظام عشان يحاكمو بس نسيت اسمو انا شايف نعمل حملة نقول للحكومة ميسلموش العظام بتاعت الاخ الدكتور دة غير لما قادة اسرائيل يتقدمو للمحاكمة الدولية و تكون المعاملة ب المثل احداث غزة

اسمو تقريا مارتين حاجة و اسم المصري الدكتور طارق حسن

مواطن مصري said...

http://www.addounia.tv/index.php?p=173&id=48511


حكاية الدكتور (طارق)اهم مجرم نازي يجري البحث عنه



يا نوارة لو بتفكري في الي بفكر فية نجمع معلومات عن تاريخ و نربط بين الي عملو مجرمي الحرب غزة و نعمل حملة و انا على ما اسمع تعرفي ناس في الصحافة تقترحي عليهم يكتبو عن الموضوع دة ان يقترحو على النشطاء انهم يطلبة من محكمة العدل التحقيق في جرايم حرب و ان القانون يمشيي عليهم و لو هما رفضو احنا نرفض التسليم

اسمو
اريبرت هايم لو عندك معلومات عنة هاتيها

مواطن مصري said...

و ايضا فتوى طلعت موجودة في الشروق الجماعات الاسلامية حرام و انا متفق مع هذة الفتوى لائنها تؤدي الي وجود فرق اسلامية و في حديث للرسول الله صلى الله علية و سلم يقول فيما معناة ان الاسلام هيقسم الي 37 فرقة اسلامية و انتي شايفة الي حاصل اخوان على شيعة على الجهاد

Anonymous said...

ميكى ماوس
روح نااااااااااااام

علشان الصبح تقدر تطلع على مديرية الأمن

عملى فيها عبدو العبيط
يا حووووووويط

شوشو

ماهي said...

نوارة وضحي الكلام انا بقالي كذا بوست مش فاهمة حاجة نص كلامة تريقة
ما تراعي ظروفي يا ست

انتي مصدري الوحيد

Anonymous said...

Anonymousمستر


عندما تتحدث عن مدونة جبهة التهييس الشعبية، بهذه الطريقة، انت تمارس تقنية متطورة تلجأ اليها الدول المهيمنة لفرض رؤيتها وثقافتها واجندتها على العالم
وهذا الاسلوب على بساطته فعال للغاية وقوامه : تشجيع مايخدمنا بالتصفيق والجوائز والتكريم الاسطوري بالقاب توقف الدم بالشرايين كرجل العام او المرأة الاكثر تأثيراًُ في الشرخ الاوسخ او ماشاكل ذلك.
والتصفير والشتم والتكفير والتسخيف لكل نشاط لا يصب في نفس الاتجاه.
ونوارة مع احترامي التام للنصيحة،ليست مطالبة بتجديد نيتها على مسيرة لم ترث منها الى الآن الا الاذى والسب لشخصها ولاحبائها، فمن اختار طريق ذات الشوكة مطالب بتجديد الصبر وليس اي شيء آخر
من ناحية اخرى، فضلت ان اعلق كمجهول على هذا الموضوع، مع العلم ان مستواي الاجتماعي والسياسي والالقاب التي احملها قد تكون مفيدة فيما سأقوله عن هذه المخلوقة السماوية التى تدعى نوارة.
دائرة معارفي واسعة جداً، ومليئة باسماء تشكل اعمدة للفكر والسياسة والاعلام في مجتمعاتها،الا انني على يقين عندما اقول ان هذه الانسانة تتمتع بذكاء وبصيرة وقدرة على التحليل والعرض لم اشاهدها عند احد.
وانا لااشعر بنقص في برامجي الا في اليوم الذي يفوتني فيه استعراض ماكتبت، لسبب او لآخر

Tamer Diab said...

ربنا يعينك علي مجهود المدونة بتاعتك بجد
لا بجد جبهة مش واحدة لوحدها يعني :)

لقد خلقنا الله احرارا said...

من اكتر من 15 يوم وانا ماشوفتش ولا شميت ريحة النت ولما رجعت وانا هتجنن لقيت الاتى 1نوارة لسه زى ماهى مقطعة الدنيا بوستات اللهم لا حسد 2المرضى النفسيين ماشاء الله فى ازدياد دائما لا وبيتكلموا عن الردح انا مش هرد لانى نفسيتى هتتعب جدا من النقاش مع الناس دى ---3 لقيت مواطن مصرى لسه برده بيقول نفس الكلام -- بعد اذنك يانوارة يا استاذ مواطن على اى اساس حضرتك اقترحت الحلول دى مين قال لا بلاش مين قال مين ممكن يوافق على مشروع الدولتين ولا القدس دوليه ولا الخط المسخسخ اللى بيقولو عليه ده ---يااستاذ مواطن هكلمك كلام قديم شوية وبايخ كتير الايام دى خد عندك فلسطين عربية --ودى كمان مااخذ بالقوة لايسترد الابالقوة ودى كمان ازمة فلسطين ممكن نحسبها مثلا من سنة 48 مثلا يعنى والله ياباشا دى لسه صغيره اوى علشان نبيعها البيعة دى ده انجلترا احتلت الهند 300 سنة وخرجت وفرسنا استوطنت الجزائر 130 سنة وانجلترا احتلتنا احنا بذات نفسنا74 سنة ---طيب ليه لياس ده بسرعة من فلسطين وعايزيننخلص بسرعة ونقسم البلد ونخلص منها بسرعة نتنازل عن ارضنا بسرعة كده طيب هنقول ايه لولادنا لما الدور ييجى علينا انا لما بدرس المنهج ده لسنة تالتة اعدادى بقولهم مفيش حاجة اسمها العودة لحدود ماقبل 5يونيو 67 تيجوا انتو وتقولوا دولتين

مهندس مصري said...

يا مواطن إقعد على جنب و ما تتكلمش في اللي ما تفهمش فيه
إقرأ و إتعلم و إفهم و بعدين إتكلم

صعبة دي ؟

الجماعات غير المذاهب غير الفرق
و الحديث بيتكلم عن إفتراق الأمة لـ 73 فرقة

الفرق بتختلف في أصول العقائد
زي السنة و الشيعة و الخوارج و غيرهم

أما المذاهب فهي متفقة على الأصول و مختلفة في الفروع الفقهية
مثل مذاهب أهل السنة الأربعة من حنفية و مالكية و شافعية و حنبلية

أما الجماعات فهي متفقة في الأصول العقيدية و الفروع الفقهية و لكنها مختلفة في أمور دنيوية و في تطبيق بعض أمور الدين على الدنيا و اولوياتها

فالإخوان و الجهاد مثلاً جماعات

لكن السنة و الشيعة فرق

فهمت ؟

يارب تكون فهمت

و بلاش تفتي في اللي ما بتفهمش فيه

Anonymous said...

ونوارة مع احترامي التام للنصيحة،ليست مطالبة بتجديد نيتها


يا راجل يا طييييييييييييييب
ديه الصلاة و الصوم
و الحج لازم فيهم من النية

و النية فى أى عمل بتحوله من عادة إلى عبادة

يعنى زى ما قلنا الرسول صلى الله عليه و سلم

رب عملٍ أثمرته نية
و رب عملٍ أحبطته نية



واحد من الناس

جبهة التهييس الشعبية said...

يا عمي ما ينفعش كده
احنا مش ممكن ربنا كاتب علينا الانقسام والتفتت حتى في حتة مدونة
يعني ده احنا لو ما لقيناش حد مننا نتصارع معاه ح نبص في المراية ونتصارع مع نفسنا

النية لله
والمحاسب ربنا
واللي بيعمل حاجة غلط ربنا يهديه واللي بيعمل حاجة صح ربنا يوفقه
بس المفروض ان عندنا هدف موحد

مش ممكن ح نعيش عمرنا كله ندي ضهرنا لهدفنا ونبص لبعض عشان نفتش في بعض ونتنطط على بعض عشان كل واحد فينا يحس انه كويس من خلال انه يثبت ان غيره وحش مش من خلال انه يتعب نفسه ويعمل حاجة في سكة الهدف بتاعه

ياريت نحدد هدفنا كده
وعدونا هو اللي ضد هدفنا وبيعلن علينا الحرب
ما نمشيش نعلن الحرب على بعض واحنا هدفنا واحد
انا يا سيدي باتكلم بلساني وعن نفسي وعدوي هو الصهيونية وكل من يوالوها ويخدموها وبس
ومش عايزة اعمل عداوات مع حد تاني لان كفاية قوي الصهيونية ودلاديلها في العالم بما فيهم مصر نفسها
دول الملايين يعني
وما بيتخانقوش مع بعض
وما بيشتموش بعض
وما بيفتوش في عضد بعض
وما بيدينوش بعض
وبيختلقوا الاعذار لبعض
وبيحسنوا الظن ببعض
وما بيتنططوش على بعض
ومش عيب اني اتعلم من اعدائي واستفيد من نجاحهم في قضيتهم الباطلة

سيدنا الامام علي قال للي كانوا بيحاربوا معاه: اجتمعوا على الباطل وتفرقتم عن الحق يا اشباه الرجال ولا رجال

افففففففففففففففففففففففففففففففففففففففففففففففففففففففففففففففففف

Dr.Online said...

مهندس مصري
......................

شكرا على المعلومات القيمه عن الفرق و المذاهب و الجماعات

مواطن مصري said...

يا مهندس يا مصري الله يسامحك اولا ثانيا الجماعات الاسلامية كل جماعة و ليها فكر و بتاعتبرة الفكر الصحيح و اي فكر اخر بدعة

و على سبيل المثال الجماعات الي في العراق شوف كم جماعة سواء جماعات السنة و الشيعة و كل واحد شايف الموضوع من روئيتة

مواطن مصري said...

@ خلقنا الله احرارا

الحلول دي فعلا تم طرحها و اخرها اتكتب عنة في الواشنطن بوست بتاع جون بولتن

مهندس مصري said...

د / اون لاين
============
العفو

Anonymous said...

يا سيد مواطن
ممكن تكون دى فرصة انك تتعلم وتتثقف وتستفيد من خبرات ناس أكبر منك سنا وأكثر علما ، بس واضح إن ما فيش فايدةوإن الموضوع مش فى دماغك وكل همك إنك تجادل وخلاص وللأسف كل مناقشة بتتطلع منها بمنظر أسوأ من اللى قبلها
أنا بس عندى فضول شديد أعرف سنك ومجال دراستك وتوجهك الدينى والسياسى... ممكن؟
أنا قريبا مستنتج كل الحاجات دى بس أحب أسمع منك

محمد جابر