Wednesday, 25 February 2009

هو اوباما بيسمع عمرو دياب؟

ايه الحملة الانتخابية اللي عاملها عمرو دياب دي؟ انا منين ما امشي الاقيه، وبيعملوا برامج عليه ويستضيفوا مفيد فوزي وعمار الشريعي وحلمي بكر!!!!!!!!!!!! علامات التعجب الكتير دي للناس اللي من جيلي اللي عارفين ان التلاتة دول كانوا بيلعوا ابو خاش عمرو دياب على السبحة
عموما لو عمرو دياب اترشح قدام ايمن نور وجمال مبارك انا ح انتخب عمرو دياب
عته بعته يبقى على الاقل قرد يسليني ولا غزال شارد

13 comments:

ايوشة said...

تؤتؤ مش تعيبى فى الهضبة يانوارة ده فخر ومخفرة الشباب المصرى كله ههههههههه
انا نفسى افهم عامل ايه للشباب علشان معجبين بيه لدرجة تقليده فى كل حاجة
ربنا يصلح الاحوال

مواطن مصري said...

لية كدة انا برشح الملك منير


و ايمن نور مالى شعب غريب يعني يتحبس الناس تزعل يطلع الناس مش عابهة و لا عشان هو ليبرالي؟؟؟

جبهة التهييس الشعبية said...

ماحدش يزعل ابدا ان واحد يطلع من السجن

خالص
حمد الله على سلامته
حتى لو اللي طلعه اوباما
هو يستاهل يطلع من السجن ومن زمان وده حقه

بس يحل عن سمانا بقى
هو احنا ناقصين علل؟
وللا كل واحد اتسجن ح يعمل زعيم؟

ثم حيث انه ليبرالي دي في حد ذاتها عار يعني

ده لو كان من القاعدة كان بقى ارحم
على الاقل ح يبقى عنده كرامة
لكن مش دي القصة يعني
القصة انه ما ينفعش يبقى رئيس جمهورية
يطلع من السجن اه
لكن ما يهددناش بقى بانه مرشح نفسه خلف لحسني مبارك
هو احنا ح نلاقيها منه وللا من جمال

يعني البلد الوسخة دي مش عارفة تطلع لنا حد عدل؟
ما البلد مليانة ناس محترمة

لازم يعني اللي يمسك البلد يبقى بتاع رجال اعمال وامريكا راضية عنه ومرمي في حضن اسرائيل؟

ثم اذا كانت صحته مش سامحة له يكمل المدة في السجن

يقوم عايز يحكم البلد وهو مكحكح كده
ربنا يشفيه يعني
بس احنا مش فاتحينها مؤسسة خيرية
هو احنا يا ربي انكتب علينا سجايرنا تبقى واحدة
ويسكت بقى
عشان من ساعة ما طلع عمال يقول كلام تخريف في تخريف

مواطن مصري said...

يا سلام

يعني عاوزة الاخوانجين يمسكو البلد و يرجعونا ستين سنة وراء الي مش مؤمنين حتى بحقوق المرأة ولا حتى ب المواطنة و الي هما اساساً ضد حرية الرأي ؟؟؟؟؟؟؟



ب العكس بقى انا شايف ان انسب شخصين ينفعو لمنصب الرئيس هما الدكتور ايمن نور و الدكتور اسامة غزالي حرب على الاقل مش متطرفين
و معتدلين و يؤمنو بدولة مدنية ديموقراطية

و مين قالك ان
ايمن نور مرمي في حضن اسرائيل


انسب الاحزاب الي شايفها تمسك هما الجبهة الغد الوفد مع بعض التحفظات على الوفد

Dr.Online said...

اعتقد انه بيواجه تصاعد نجم تموره باشا

بس على كل ايه الليجاب الكلام دا في المونه !!!

اه خدت بالي من التاج

؛)

جبهة التهييس الشعبية said...

مواطن
بس انا يعني مش شايفاك مؤمن بحرية الراي ولا حاجة

ده انت حاطط الاخوان في دماغك كانهم قتلوا لك قتيل

يعني لو انت بتعتبر نفسك ليبرالي وكل الليبراليين مشاعرهم ناحية الاخوان زيك يبقى نغير حسني مبارك ليه؟
هو تغيير وشوش وخلاص؟
ماهو ح يروح هو وييجي ناس تقدم الاخوان لمحاكمات عسكرية برضه
ومن فشيخ لفشيخ يا قلبي لا تحزق

dr.online
ههههههههه
ايوة اسم الله عليك
ركز معايا كده

مواطن مصري said...

الاخوان يعلنو عن برنامج وواضح و محترم يؤمن بحقوق الجميع ميبقاش برنامج يرفض حقوق المواطنة و عاوزانة نقتنع بية


يبقىلو جة الاخوان يفرق اية عن حسني

Mohamed Hamdy said...

انا مش بعرف عبرى لكن اعرف ناس تعرف عبرى ومن فلسطين نفسها والاحلى : عندهم استعداد يترجموا كمان

اذا كان ممكن نتكلم اونلاين بدل تعليقات المدونات عشان نتناقش اكتر

ابعتيلى الميل اللى بتفتحيه ماسنجر سواء كان ياهو او هوتميل او جى ميل حتى على ايميلى

mohamedhamdyonline@gmail.com

احساس لسه حى said...

عزيزتى

ما السياسه بتتغير واكيد عمرو بتاع زمان مش بتاع دلوقتى

للاسف عمرو دياب ملهوش فى السياسه

طيب ما احسن ايمن وجمال يغنوا ونشتريلهم كل الالبومات بتعتهم

وانا عن نفسى هشترى لجمال بدل مش نسخه واحده اتنين تلاته خمسه

بس يبعد عن السياسه

تحياتى

سلام

حسن على said...

رغم تعاطفى مع ايمن نور وحرمة فى محنة سجنة وهجوم البلطجية على شقتة وكل الوساخات التى تعرض لها ...الا انة مجرد برجماتى طموح الى جانب كونة نائب شجاع مشاغب ,باااااسسس لحد هنا اما لوترشح للرئاسة فسيصبح "قرد يبكينى" ولايسلينى. الترشح لمنصب رئس الدولة يحتاج شخصيات لها قامة فكرية عالية كالمستشار طارق البشرى مثلا او غيرة من رجال القانون المحترمين لأعادة كتابة دستور بواسطة جمعية تأسيسية لايختارها المخبرون تؤسس نظاما جديدا للحكم يجعل كل المصريين -بما فيهم سكان العشوائيات - مواطنيين من الدرجة الاولى وليكن ما نطلبة هو رئيس دولة نزية فى ذمتة المالية..فى اختيارةلمعاونية..فى الانحياز الى الشعب وليس الى اعداؤة..رئسا لانخجل منة اذا تكلم.. ولانتبراء من قراراتة السفيهة..رئيسا تكون عضلاتة هى عقلة وليس جحافل الامن المركزى ..رئيسا تصبح صورتة لتكون رمزا للنبل والرفعة .. لاان تصلح صورتة لأن توضع على علب البولوبيف

حسن على said...

بل اكثر من ذلك... رئيسا نعلم كيف حصل ابناؤة على ثرواتهم يمكن كل الناس تقدر تقلدهم ونصبح بلد المليارديرات بقى

جـــــــر شـكـــــــل said...

عمرو دياب وعمرو خالد وأيمن نور ما بقدرش أفرقهم من بعض والغريبة أنهم مواليد سنة واحدة تقريباً أو قرايب أو نفس درجة اللزوجة يمكن بياكلوا مشبك مع بعض كتير 00

لكن الغريب يا نوارة أنه لو جه للبلد الوسخة دى رئيس مدنى بعد حسنى مبارك ح يكون أيمن نور

سكوت هنصوت said...

نفسي اعرف ايه علاقة الموضوعات بالتعليقات!!!!!!

عموما...عشان الأخ الي شايف ان حزب الجبهة او حزب الغد هما افضل الاحزاب الموجودة...احب اقولك..انسى يا عمرو

لعبتها قبلك وامنت بيهم قبلك...لكن اكتشفت انه كله في النهاية بطيخ

وكل الناس الحلوة الي بتطلع في التلفزيون تسمعنا احلى كلام...هما اول ناس معندهمش مانع يستغلوا مناصبهم في اي ورطة يتحطوا فيها

واول ناس ما تعرفش حاجة عن الشعب..واول ناس مستعدة تستخدم القوة ضد المعارضة فقط لو ان القوة في ايدها

بلا غزالي بلا نور...


شوفولنا وجوه جديدة الله يكرمكم