Thursday 12 February 2009

انا مبسوطة قوي من العسل بتاعنا

بصوا بقى احنا بنعمل ايه؟ احنا قاعدين نقول ده مسلم وده مسيحي، وده شيعي رافضي وده سني، وده اخوان وده سلفي، ودي ودني وده شعري، اه يا شعري طلع في ايدي كله، لو بينطق كان رقع بالصوت من كتر ما باشد فيه، ويا ترى يا هل ترى، المسلم الاندونيسي اقرب لي وللا المسيحي المصري اقرب لي، احنا فراعنة وللا عرب، فينيقيين وللا بتنجان؟ لا وفيه شوية عرب صهاينة طالعين لنا في موضة احنا بحر متوسطيين! يعني اذا كنا حيرانين نتبرى من بعض ازاي فهاذوها الامر صعب جدا حيث ان ربنا انعم علينا بنفس الغباوة بنفس المنطلون بنفس الفالنة، فمهما حاولنا نتبرى من بعض الناس ح تبص من بعيد وتقول: اه....مش هم الاغبيا دول؟
وفي نفس الوقت، في نفس ذات شخص عين الوقت نقول ايه؟
"اه، هم اليهود كده، طول عمرهم كده، من زمان وهم كده، من ايام سيدنا موسى وهم كده، من ايام ما رموا يوسف في البير وهم كده، كلهم كده، على مر التاريخ دايما كده وهم كلهم حاجة واحدة لعملك مافيش يهودي له امان ابدا ما تاكليش من الكلام ده"
لدرجة ان احمد المسلماني اللي كان خايف من الاحتلال الفلسطيني لمصر قال ان اليهود اللي ضد الصهيونية دولم بيمثلوا انهم ضد الصهيونية وكلهم متفقين مع بعض يقسموا بعض نص يموت الناس ونص يعترض على تمويت الناس عشان يبقوا هم المعارضة والمولاة ويسيطروا على الدنيا كلها، اه والله قال كدهون مع انه راجل متعلم ومتنور ومعاه شهادات 
يعني سبحان الله، انا جدتي ام ابويا كانت بتقول: ربنا لما يغضب على بني ادم يسلط عليه مخه
صدقت، ماهو لو سلط عليك حاكم ظام مصير الحاكم يموت (ماعدا حاكم واحد كلنا عارفين انه مش ح يموت ولا حاجة) لو سلط عليك فيضان مصيره يخلص لو سلط عليك مرض يا تخف يا تموت لكن لما يسلط عليك مخك دي حلها ايه؟ مالهاش حل صح؟
يعني سبحان الله ولا اله لا الله ولا حول ولا قوة الا بالله منه له جاي رايح منه له
قاعدين نقطع في اوصال نفسنا، ونشتم في تاريخنا، ونتهم نفسنا شوية بالارهاب وشوية بالكفر وشوية بالمسيحية (حيث انها بقت تهمة اكيد) وشوية بالرافضية وشوية بمجموعة الاجية اللي بيستخدمها بعض البلطجية لما يقولوا: القومجية الاسلامجية العروبجية الشماشرجية الاي جية. وفرحانين ومبهورين بان ابن مهاجر كان مدمن كوكايين واسود وحكم امريكا وحاسين انها معجزة لان "امريكا بتدي فرص لكل الناس" بينما احنا من الف سنة مجموعة مش بس مهاجرين دول مهاجرين وعبيد وعملوا عدة دول زي الاخشيدية والمملوكية، وبدل ما نقول: احنا اول حضارة حررت العبيد وعملت منهم حكام بنشتم في نفسنا ونقول احنا الامة الوحيدة اللي حكمها عبيد من اعراق واجناس مختلفة وما حكمناش واحد مننا، طب ما اهو، ما انتوا فرحانين اهو ان ابن مهاجر كان جدوده من طايفة العبيد ومن عرق وجنس مختلف وبيحكم امريكا اهو وبتقولوا امريكا عظيمة عشان ادت واحد زي ده فرصة انه يحكمها اهو
لا
لما تيجي مننا تبقى عيبة، ولما تيجي من غيرنا تبقى انجاز حضاري عظيم
ومش بس كده
لا وفوق البيعة بنخدم الصهاينة خدمة العمر، قاعدين ميت سنة يكافحوا عشان يثبتوا الاتي: ان اليهود كلهم حاجة واحدة وشعب واحد، وان اليهود كلهم يتصفوا بصفات واحدة، وان اليهود كلهم صهاينة حتى لو بينوا غير كده لانهم بيبقوا خايفين من الاضطهاد وعليه فاليهود شعب بلا ارض واليهودية مش مجرد دين زي الاسلام والمسيحية دي عرقية وجنسية، هاتوا لنا ارض بقى، خدوا ارض اهي، بتاعتنا لا مش بتاعتنا
طيب انا مش ح اكلمكوا بوصفي عربية ولا مسلمة انا ح اتقمص شخصية واحد من التبت واقول لكوا انا لو مكانه ح ابص للموضوع ازاي
دلوقت انا واحدة تبتة (من التبت يعني) شايفة اتنين ناس بيتخانقوا مع بعضياتهم، ناس منهم النفر الواحد فيهم شعر شنبه بيتخانق مع شعر دقنه وكل واحد فيهم حيران ينتمي لايه ولمين حيث ان كلهم قرفانين من بعض ومش عارفين يهربوا من بعض ازاي 
والناس التانية بيدعوا انهم حاجة واحدة، والاسخم من كده ان القوم الاولانيين بيقولوا على القوم التانيين انهم كلهم حاجة واحدة على مر التاريخ كله، وان حتى الناس اللي من القوم التانيين دول اللي بيقولوا يا ناس يا عالم احنا مالناش دعوة بدوكهمة برضه جزء منهم بس هم مخبيين
والقوم الاولانيين مشغولين في خناقات شنباتهم مع دقونهم بينما القوم التانيين اللي عندهم طوائف كتير قوي (غير الطوائف الكبرى الاساسية: الرباي والقراي والسامري) ماحدش شايف خناقاتهم مع بعض، ومهما يتخانقوا مع بعض القوم الاولانيين اغبيا ومش بيحاولوا يفكروا في الموضوع ده ويستغلوه صح
طب ما اذا كان الكلام من بق القوم الاولانيين انهم مقسمين نفسهم ستميت حاجة وموحدين القوم التانيين ومأرخين لهم كمان وعاملين لهم جذور عمرها خمستلاف سنة، طب ما يبقى القوم التانيين معاهم حق بقى، ماهم كده يبقوا شعب واحد بقى فعلا، وشعب عريق كمان وعمره الاف السنين، والله بقى طول عمره وحش طول عمره خاين طول عمره مالوش عهد طول عمره لو حلف لك على المصحف ما تصدقهوش ماحدش طلب منك تناسبهم، بس على الاقل طول عمرهم حاجة واحدة من الالاف السنين وعليه فمن حقهم يبقى لهم ارض تجمعهم مدام هم شعب واحد كلهم مسخة تلك الاصل من بعض
ومش من حق القوم الاولانيين يفتحوا بقهم بقى، ولا يفرق معاهم يبقى لهم وطن يجمعهم لانهم اصلا مش طايقين بعض، بالعكس، شيل ده من ده يرتاح ده عن ده
انا زهقت، مين ح يدفع تمن زرع الشعر لما اقرع؟ كل الكلام اللي على ان اليهود حاجة واحدة (حتى لو حاجة واحدة وحشة شيء ما يهمش حد وحشين وحشين وعاجبين نفسهم والله) وكمان على مر التاريخ هو بالظبط الكلام الصهيوني
طب زعلانين ليه من اسرائيل طاه؟ ثم ان حقيقي الكلام ده مش صحيح، مش صحيح، والله مش صحيح، اليهودي الانجليزي انجليزي واليهودي اليمني يمني، مش ممكن اليهودي الانلجيزي هو واليهودي اليمني يبقى طباعهم واحدة ابدا، واليهودي الصهيوني مش ممكن ابدا يبقى زي اليهودي اللي مش صهيوني يا ناس ح يجيلي حمى البحر المتوسط حرام عليكوا اذا كان اهو جوة اسرائيل والبت ليفني السكرية والواد بيبي بتاع المافيا ماسكين في شواشي بعض اهو ونتنياهو بلطجة كده بيقول انا اللي نجحت
ما سمعناش حد بيقول لهم حلوا مشاكلكم الداخلية واتوحدوا ولا حد عايرهم انهم منقسمين زي ما بيعايروا الفلسطينيين
ما جوة اسرائيل ناس بتنزل مظاهرات ضد الصهيونية وبيقولوا احنا اتولدنا هنا واتورطنا حتى الولية اللي بتقول ان النازيين هم اللي عملوا اسرائيل اهو وبرة اسرائيل يهود بيقولوا بتفكيك اسرائيل خالص
واكتر من كده يهود بروكلين دلوقت حالا وانا باكلمكوا معلقين يفط مكتوب عليها
free palestine
ويهود تانيين لهم تفسيرات تانية ضد الصهيونية اهو
ماهو
ماهي احلوت وزهزهت اهي، ايه بقى؟ ايه؟ ايه؟ ليه مصممين نشتم في اليهود كلهم تاني بقى ونقول طول عمرهم كده ولاااااا مهما قالوا لك ده تمثيل في تمثيل هم من جواهم متفقين مع بعضهم ومصممين نوحدهم تحت راية هم مش متوحدين تحتها وكمان نعمم الكراهية عليهم؟ ليه؟ عشان نأكد كلام الصهيونية ان اليهود مستهدفين وانهم لو ما بقوش صهاينة الناس كلها ح تدبحهم لان الناس كلها بتكرههم حتى شوفوا العرب بيقولوا عليكوا ايه؟ بيقولوا كلكوا كدابين وكلكوا حاجة واحدة صح؟ 
صح
صح
العبي يا حاجة العبي
حسبي الله ونعم الوكيل سبحان الله
هو ربنا بيظلم؟ حاشا لله
ربنا ما بيظلمش حد، والله ما بيظلم حد ابدا، كل واحد ربنا بيديله اللي يستاهله 

17 comments:

احمد سعيد said...

بصى يا نوارة
انا معاكى فى كل كلامك
ومعاكى اننا لازم نستغل كل الفرص
ونستغل اراء اليهود المعارضين لاسرائيل
ونتلم على بعضنا ونبطل بقى التشرذم دة
ماقولتش حاجه
كل اللى قولته ان الدين اليهودى اللى موجود دلوقتى بيامر اتباعه بكل حاجه وحشه
دا كلام مسلم بيه من كل اللى درسوة
ومش معنا كدة ان اليهود كلهم اسطنبه واحدة
اكيد فيهم اللى ملتزم بالتعاليم دى
وفيهم اللى بينكر عليها حاجات
وفيهم اللى رافضها ككل ومقتنع انها محرفه
وفيهم اللى مش فى دماغه الدين اساسا وكل همه يعيش ويبرطع
دة شىء بديهى
يبقى مش معنى انى بقول ان دينهم كدة
انهم كلهم زى بعض وكل لا يتجزأ
فهمتينى؟
وصلت كدة؟؟؟؟؟

حـنــّا السكران said...

نوارة

أرسلك لك مقال الأستاذ الجميل فتحي محمود

و نشرته عندي في المدونة .

مواطن مصري said...

بوست حلو و رائيك يحترم ايضا بس انا اول مرة اسمع عن

بحر متوسطيين

مش دي الي عاوز يعملها الحج ساركوزي


انا مقتنع اننا نقوى و نساعد الاخر منبقاش عندنا مشاكل الديا و الاخرة و نسيب المشاكل و نروح نساعدهم


يعني لو والدتك بعد الشر تعبانة و جارتك في العمارة التانية محتاجة هتسيبي والدتك والدتك حتى لو كانت مطلعة عينيكي و تروحي تساعدي جارتك


الناس ل الاسف عاملين اية الدين ولا الوطن ؟؟؟

اانا مع الناس الي بتقول الوطن قبل اي دين

و فية ناس بتقول الدين لو في بلاد الواق الواق

بس انهي الاولى اهل بلدك و اهل الواق الواق
؟؟؟؟؟

مواطن مصري said...

ههههههه


شوفي دي ولا تعليق

الحكومة المصرية: 89% من الشعب سعداء وراضون عن معيشتهم

http://www.alarabiya.net/articles/2009/02/12/66309.html

مواطن مصري said...

بالنسبة الي اليهود انا شايف ان فية مواطنين احرار بغض النظر عن دينهم متعاطفين مع فلسطين

و بعض اليهود منهم ايضا متعاطفين بس رجال الدين اللظلامين المتطرفين اليهود بيغيبو عقول هؤلاء

زي كدة الشيوخ المتطرفين او القساوسة المتطرفين

عشان كدة زي ما قولتلك نلعب على توعيتهم

مهندس مصري بيحب مصر said...

يا ستي و مين اللي ساوى بين اليهود الصهاينة و اللي مش صهاينة
بالعكس انا شايف إن اليهود غير الصهاينة هما حلفاؤنا و لازم تكون علاقتنا كويسة معاهم بل و نحاول نتعاون معاهم بقدر الإمكان

مين بس اللي ساوى بينهم و بين بعض

ثم يا نوارة لما ربنا قال في قرآنه كلمة اليهود و بعدها وصفهم بصفات
أصدق كلام ربنا و لا لأ

لكن زي ما قلنا قبل كده الكلمة لا تعبر عن كل فرد فيهم و لكن تعبر عن معظمهم

أنا مش بأكره اليهود كيهود

أنا أكره منهم اللي يؤذيني فقط
سواء بقى كان يهودي او مسيحي
سواء كان صهيوني او مسمي نفسه حاجة تانية

لكن عدو عدوي صديقي

المسلماني نظرية المؤامرة وسعت منه المرة دي شوية
:)

و انا متفق معاكي إنهم أجناس و اعراق مختلفة
هو انا انكرت
انا موافق على كده
لكن الخلطبيطة البشرية دي
مش معظمها بيكرهنا و متفق على إبادتنا ؟


بينهم خلافات شديدة بنص القرآن

تحسبهم جميعاً و قلوبهم شتى بأسهم بينهم شديد

يعنى ربنا قال إننا حنحسبهم جماعة واحدة
و ربنا قال إن قلوبهم شتى و مختلفين مع بعض
و ربنا قال إن بأسهم بينهم شديد و بيقطعوا في بعض
و فيه دراسات بتؤكد إن لو إسرائيل توقفت عن الحرب و أقامت سلام مع جيرانها حتنهار بسبب شدة الصراع الداخلي فيها و إن اللي لامم الكوكتيل ده مع بعضه هو الحرب فقط لا غير

كل اليهود اللي ضد الصهيونية انا مش حاططهم في نفس البوتقة

بس ربنا وصف معظم اليهود بصفات مشتركة بينهم
ايه اللي مش مصدقاه في كده
بأكرر تاني
معظم مش كل

و اليهود اللي ضد الصهيونية و إسرائيل قلة
و هما الإستثناء بتاعة القاعدة

ثم اليهودية مش زي اي ديانة تانية مفتوحة للمعتنقين الجدد
هما بيقولوا لازم تكون امك يهودية علشان تبقى يهودي
يبقى الديانة دي ما ينفعش بشكلها الحالى تتقارن باي ديانة تانية زي المسيحية و الإسلام
و راجعي كلام احمد سعيد
:)
و ما تشديش شعرك يا بنتي
لو إقرعيتي مش عارف حنعرف نعمل حملة في المدونات و نلم لك فلوس لعملية زرع الشعر و لا إيه ؟
:))

احمد سعيد said...

ههههههههه
المسلمانى دة بيفكرنى ببرنامج الاطفال الاذاعى بتاع زمان
بتاع بابا شارو
بس مع الفرق
دة للاطفال
ودة للشعب

Unknown said...

احمد سعيد
مش مصادفة ان ربنا سبحانه وتعالى في القرآن بالذات بيكلمنا كتير عن الفترات اللي بني اسرائيل خرقت فيها العهود في مواقف معينة
من اول سيدنا يعقوب لحد سيدنا محمد كان فات حوالي اربعتلاف سنة فيها فترات كتير كان بني اسرائيل فيها عايشين زي الفل يعني، وربنا قال لنا كده:وتمت كلمة ربك على بني اسرائيل بما صبروا

وفيه بني ادمين في التاريخ كتير عملوا خروقات باشكال مختلفة وربنا ذكرهم كلهم لكن ليه ربنا ركز على بني اسرائيل بالذات في قصص التخاذل والتنطع والتحايل وها انتم تقتلون انفسكم وتخرجون فريقا منهم من ديارهم تظاهرون عليهم بالاثم والعدوان

يا ترى مين اللي بيعمل كده دلوقت يا احمد؟

تفتكر ربنا ذكر المواقف دي بالذات ليه وركز عليها كتير في مواضع كتيرة ليه؟ عشان يكرهنا في ناس راحت وماتت وخلاص؟ وللا عشان ينبهنا اننا عرضة اننا نقع في نفس الاخطاء

ليه ربنا ما ركزش على اصحاب الاخدود مثلا وحكى حكايتهم بالتفصيل؟ ليه ما ركزش على اصحاب القرية ومر عليهم بس سريعا وما حكاش حكايتهم بالتفصيل؟ ليه ركز على الحاجات اللي هي بالظبط شبهنا بالمللي

الحقيقة انت مش منصف يا احمد
احنا ما خليناش حاجة ذكرها ربنا عن خروقات بني اسرائيل ما عملنهاش
ولا كلمة ولا حرف ما فوتناش حاجة واحدة ما عملنهاش
والناس اللي رافعة راسها اللي انت بتقول عليها عملنا فيهم وبنعمل فيهم زي ما اتعمل في سيدنا موسى وزي ما اتعمل في طالوت
ومافيش مرة ربنا يبعت لنا حد عليه النطلة الا ونطلع تلاتين اللي جابوه ونكفره في عيشته ونلاقي حجة عشان نتهرب من المواجهة

مهندس مصري بيحب مصر said...

ما هو ده الطبيعي يا نوارة
قال رسول الله صلى الله عليه و سلم ما معناه :( لتتبعن سنن الذين قبلكم شبراً شبراً و ذراعاً بذراع حتى إذا دخلوا جحر ضب ٍ دخلتموه قلنا : اليهود و النصارى يا رسول الله قال : فمن ؟ ) يعني فمن غيرهم

يبقى النبي صلى الله عليه و سلم قال لنا إن في ناس من أمة الإسلام حتقلد و حتتبع أمم اليهود و النصارى و حتقلدهم بالشبر لدرجة إنهم لو دخلوا جحر الضب حندخل الجحر وراهم و زيهم و تقليداً لهم

فكان لازم يحصل اللي انتي شايفاه حالياً ده

احمد سعيد said...

نوارة
انا متفق معاكى فى كلامك
ومش شايف ان فيه اختلاف ما بينا ولا حاجه
اوكيه
انا معاكى فى كلامك دة
امال ايه وجه الاختلاف وعدم الانصاف؟؟؟

احمد سعيد said...

وبعدين انا حاسس كويس اوى بالوكسه اللى احنا فيها دلوقتى واعتقد انك عارفه كدة كويس

انا كل اللى قولته هو ان فيه اوجه خطورة على البشريه ككل من العقيدة اليهوديه اللى موجوده حاليا والمختلفه كل الاختلاف عن ما انزله الله

وقلت ان مش معنى كدة ان اليهود كلهم اسطنبه واحدة وشكل واحد

لان من الطبيعى انه يكون فيهم الملتزم بالتعاليم دى وبينفذها على ارض الواقع

وفيهم اللى بينتقد فيها حاجات

وفيهم اللى رافضها ككل

وفيهم اللى مش فى دماغه الدين اساسا

زى ماهو موجود فى كل دين

ودة ميخليهمش كل لايتجزأ ولا حاجه

اظن الكلام منطقى

انا انتقد العقيده التى تحارب البشريه وانتقد من يتبناها
فقط لا غير

ايه وجه عدم الانصاف فى كدة؟؟؟

احمد سعيد said...

وبعدين انا كل اللى قولته
انى انتقد العقيدة اليهوديه الموجوده الان واللى تختلف تماما عما انزله الله
ودة مش لانى شايفها محرفه
كل واحد حر فى دينه
ولكن لانها خطر على البشريه ككل
لانها تحارب الكيان الانسانى فى حد ذاته


ودة ميخليش اليهود كلهم زى بعض او اسطنبه واحده ولا حاجه

لان طبيعى انه يكون فيه فئه متمسكه بالتعاليم دى وبتنفذها على ارض الواقع

وفئه تانيه بتنتقد فيها حاجات معينه

وفئه تالته بترفضها ككل

وفئه رابعه مش فى دماغها موضوع الدين من اساسه

والنوعيات دى موجوده فى كل عقيدة

يعنى مش زى بعض ولا حاجه

كل واحد حر فى دينه
مش مشكلتى

بس لما الاقى دين من وضع افراد بيحرض ضد البشريه ككل
لازم ارفضه

انا برفض التعاليم دى ومن يتبناها
فقط لا غير

ايه بقى اوجه عدم الانصاف فى كلامى؟؟؟

Anonymous said...

ايه ا بنت عمي الكلام ده
يا خيبه ليكون ربنا سلط عليكي عقلك
اركزي وركزي وتمركزي وبلاش تلخبطيني معاكي
الخليتيين الي في دماغي تعبو منك وربنا من ساعت الوليه المجنونه الي مش مجنونه ما جت المدونة
اركزي يا اما الله يبارك فيكي

مصطفى شوشة

عم مينا said...

بوست رائع يا نوارة

Anonymous said...

انا بقى حازم بن مالك مصرى بكل اسف انا عايز اقول لك حاجه واحده خدى بالك من صحتك ياختى هو حضرتك فاكره ان بلادنا العربيه حماها الله الله الله حيتغير فيها اى شيء بمجرد الكلام ياخى هع هع على فكره انا باحترمك جدا اخوك حازم

`, ذو الراس الخشبية said...

جرى ايه يا حاجه اوعى يا به تكونى مهيسه ولكن قوليلى بس انت شوفتى الواد المتغطى وزير الواحة الخارجة وهو بيتكلم عن معبر رفح وبيقول بكل ان مصر مش ممكن تفتح المعبر الا اذا كانت السلاطة الفلس طينية هى المسوءلة امام الرءاى العام الاسرائلى

منظور شامل للحياة السعيده said...

نواره

احمد سعيد

مهندس مصري


بوست و ردود يخلو الواحد يفكرو يروح يقرا شويه عشان يجمع