Friday 6 February 2009

فيديوهات للتوزيع

اللي عمل صور مقارنة الهولوكوست بجرايم الصهاينة ده...قولوا ورايا، ربنا يجزيه كل خير دنيا واخرة عننا وعن الانسانية يارب ويبارك له في مخه ده حتى مش ماضي، يعني صدقة جارية خفية كمان، ربنا يكرمه ويديله كل اللي نفسه فيه دنيا واخرة يارب
بصوا بقى، فيه ناس تانية، ربنا برضه يكرمهم زيه بالظبط عملوها فيديوهات الفيديوهات دي انا عايزاها تتوزع بهيستيريا
خصيمك النبي ياللي ما تاخدش الفيديوهات دي عندك
هي نفس الصور بس بتختلف في طريقة عرضها وفي الكلام اللي مصاحبها والمقدمة والنهاية بتاعتها
دي اكتر واحدة عاجباني، وعاجبني انها تواشيح عربية، اشمعنى هم وزعوا على العالم كله هافا ناجيلا هافا وخلوا كل الناس تتكلم عبري
انا نفسي ربنا ينفخ في صورة حد يعمل اغنية تبقى سهلة وبسيطة وجميلة والموسيقى بتاعتها تحمس كده وتبقى بالعربي ويبقى فيها كلمة متكررة وبسيطة بحيث ان حتى اللي ما يعرفش عربي يقولها، نفسي نعمل اغنية واحدة بس عربية تعلم مع كل الناس في العالم ومهم قوي انها تبقى باللغة العربي، وطبعا تبقى لخدمتنا قضيتنا احنا، مش بتحكي عن المزة بتاعته
ابعت ياللي بتبعت 

بس التواشيح دي حلوة قوي ونغمتها قريبة من كل الناس
وفيه دي وزعوها برضه وناس كتير تشوفها حلوة قوي برضه

ودي بقى مصاحبها اغنية انجليزي

ودي انا نزلتها من على اليوتيوب وحملتها تاني على اليوتيوب وحاولت اغير اغنية كان مرة فيه ولد صغير صغير صغير صغير اللي الاخ الباكستاني كان حاططها دي، بس بيقول لي بندينج، عموما متوقع انها في اربعة وعشرين ساعة الموسيقى بتاعتها تتغير



ودي حلوة برضه



جميل قوي، اكيد بيقولوا كلام مهم مدام انا مش فاهماه
باحاول الاقي الاخ الباكستاني اللي حاطط كان مرة فيه ولد صغير صغير بس مش لاقياه
وده كمان واهميته انه حاطط كلمة يهود تحت ضحايا النازي وفلسطينيين تحت ضحايا الصهيونية



ودي عظيمة لان عليها اغنية مايكل هارت لن نركع

ده جميل، ومعمول له اخراج حلو قوي وموضح الصورة مش حاططهم جنب بعض جايب صورة ضحايا النازي الاول وبعدين ضحايا الصهيونية



ده معلش يا عيني واد امريكاني فحاطط اغنية عجيبة كده، غالبا هو اللي بيغني على الجيتار وللا ايه وبيقول ست سنين اضهاد من النازي وستين سنة اضطهاد من الصهيوني، المهم برضه اجبروا بخاطره وتدخلوا وتزودوا عدد المشاهدة

انا عايزة منكوا ايه بقى؟
جمعاااااااااااااء تاخدوا الفيديوهات دي كلها وتنشروها عندكوا على المدونات، ده بيعمل لها لينكات كتير على الموقع ومن ثم بيعمل لها عدد مشاهدات كتير وعدد اللنكات المرتبطة بيها كتير قوم تقب اكتر عند الناس لما تفتح صفحة اليوتيوب
الحاجة تانية، اللي عنده بورنامج التحميل بتاع الفيديوهات من على النت يحملها وعنده اكاونت باسمه ينزلها تاني وباسم
holocaust
او
new holocaust
بحيث كل اللي يدور على الكلمة دي يلاقي الفيديو ده، على الاقل عشان نخدم الانسانية ربع ما اللي عمل الصور دي خدمها
انا عايزة تعذيب، عايزة اللي يكتب هولوكوست مايلاقيش غير الكلمتين دول
اللي مش عنده مدونة ولا اكاونت على اليوتيوب او ما يعرفش ينزل الفيديو من على النت يعمل ايه؟
اولا فيه برنامج مافيش اسهل منه لدرجة ان انا العبيطة باستخدمه عادي اسمه
IDM 5.15
مش عايزة واحد قليل الادب يدخل يقول لي قديمة، انا باكلم البنات اللي زيي انتوا مالكوا؟ ثانيا يعمل اكاونت على اليوتيوب
صعبة؟ ولو صعبة الواحد لو مش ح يتعب على حاجة زي دي يتعب على ايه؟ على اي حال البرنامج محمد شلطف بعتهولي وهو عندي وعندكوا الميل بتاعي تقدروا اللي عايز يحمله يبعت لي وانا ابعت له
(ملحوظة البوست ده نازل على المجموعات البريدية ومرفق معا برنامج الاي دي ام)
طيب اللي ماعندوش وقت او صبر او حتى احمر مني في الكمبيوتر يعمل ايه؟
يدخل كل يوم على الفيديوهات دي ويفتحها بس، بحيث يكتر عدد المشاهدة، ويبعتها بالميل لكل اللي يعرفهم 
على فكرة لو روحك في مناخيرك قوي ومش طايق تعمل حاجة لانك بتشتغل وزير....لا ده الوزير ما وراهوش حاجة يعملها، طيب، لو بتشتغل زبال ومش فاضي كفاية تفتح كل اليوم الصفحة دي وتدوس على السهم بتاع بلاي بتاع كل فيديو وما تتفرجش ولا حاجة بس كفاية دوست بلاي وامشي من هنا
كل ده ح يقبب الفيديوهات دي على وش القفص
انا مش عايزة احرجكوا في نفسيتكوا اقول لكوا ان فيه عرب ومصريين بيوزعوا الدعاية الصهيونية في كل حتة، خللي الطابق مستور بقى
يعني دي حاجة مش ح تاخد منا مجهود
-------
اه، الشباب اللي عايش في اوروبا والدول المتغدمة مطلوب منه اكتر انه يعمل ريتينج ويوزع على اوسع نطاق عشان لما الفيديوهات بتتفتح كتير في بلد معينة ح تقب في البلد دي ممكن في بلد تانية لا
 

8 comments:

رحلتنا في الحياة said...

علم وينفذ
ربنا يجزيكم كل خير يارب
وتجيب الفيديوهات دى نتيجة

Empress appy said...

علم وينفذ الصبح ان شاء الله هتلاقيها على مدونتى وتحت الاسم برضه نيو هولكوست اي خدمه يا فندم
وهقول للناس تعرضها
بس انا اتسالت مين اصلا اللى همل الصور تعرفى ولا ايه

Anonymous said...

www.mazika.in/singer50-song3735 - 88k -

يا ريت تذودي
انا يوسف يا ابي
دي كانها معمولة النهارده

اهداء من ابلة تهاني الي تلميذتها
نوجة وجميع المنايفة

Ahmed Mohamed said...

انا عملت كده بالظبط
اول امبارح
بس الواضح جدا ان كلمة هولوكست مبقتش مخصوصه باليهود
بقي في جمبها عدد كبير من فيدوهات لفلسطين وغزه بالخصوص
وتقريبا نفس الصور زي ما بتقولي
الاخراج بيختلف

http://www.youtube.com/watch?v=rKuDuhGCdy4&eurl=http://ga-za.blogspot.com/&feature=player_embedded

Anonymous said...

اغنية مايكل هارت اتشالت غيريها

ان شاء الله بالتوفيق

Anonymous said...

فيه خبر حلو الجزيرة أعلنته فى نشرة 10

عن رفض العمال فى ميناء ديربن فى جنوب أفريقيا
تفريغ حمولة سفينة صهيونية
فخدت فى وشها و للخلف در

خلفيات الخبر بتقول
إن اتحادات العمال في جنوب إفريقيا "كوساتو" ولجنة التضامن مع فلسطين ورابطة الشباب الشيوعيين،
كونوا جبهة الغرض منها مقاطعة إسرائيل


الجميل بأه إن الموضوع ده عمل ضجة عند الصهاينة

ليه بقى
علشان جنوب أفريقيا بتحتل
المركز الأول
فى التجارة مع أفريقيا
تليها مصر و كينيا

و بيقولوا إن حجم التجارة مع أفريقيا بتمثل 48% من حجم تجارتها
مع كل دول العالم

و كمان إنها بقالها سنوات و سنوات
بتنمى و تسمن فى تلك العلاقات


تخيلوا بقى حسرة الصهاينة

فعلاً زى ما تألم أهل غزة
و بكينا معاهم بدل الدموع دم

لكن ان شاء الله ربنا حيفرحنا فى مصاصى الدماء



مـــى

زينـه said...

ربنا يوفقكم

Anonymous said...

السلام عليكم ورحمة الله وبركاته
مشكورة علي الجهد الرائع ده
زوروني في مدونتي ودي أقل حاجة أأقدر أأقدمها للمحتل الجبان

http://ayman-abd-elazeem.maktoobblog.com/