Saturday 7 February 2009

النمل يثرثر

يا روحي، لسة سامعة خبر في الجزيرة انه في اكتشاف علمي جديد لقوا ان النمل يثرثر كثيرا :) يا كميلة، والبحث بيقول ان الملكة هي اعلى صوت فيهم وانها بتنادي بصوت عالي فيرفعوا كلهم قرون الاستشعار ويسمعوا كلامها وينفذوا اوامرها على طول :) يا ترى بيقولوا ايه وهم رايحين جايين كده بسرعة: يا اخي شهل شوية...هات حتة السكر دي..ياللا بسرعة ح اشيل معاك
- لا لا خفيفة خفيفة...انا ح اشيلها لوحدي
يا سيدي احنا مع بعض اهو عشان نلحق ندخلها البيت بس بسرعة
يا عم انت الحق بس حتة العيش اللي واقعة هناك قبل ما البهايم اللي في البيت يشيلوها
الملكة: الحقوووووووووووا ديتوووول ديتووووول بسرعة بسرعة
- هه مش قلت لك الحق حتة العيش؟ يا غبي....ايه ده؟ نمول ..نموووول نموووول رد علياااااااا
جوة الجحر
الملكة: قبل ما نرتب اللي جمعناه النهاردة، لازم نقف دقيقة حداد على الشهيد نمول والشهيد نميلة والشهيد نملالي اللي ضحوا بحياتهم وهم بيواجهوا اعتى الالات العسكرية للدفاع عن فتافيت العيش والرزاية وحتة السكر ووفاء لارواحهم الطاهرة انا باتعهد قدامكوا اني مش ح استسلم ولا ح اضحي بحقوقنا في الفتافيت اللي المعفنين بيوقعهوها على الارض ومالناش بديل عن خيار المقاومة
---
طب والله امي بتقعد تتفرج على النمل وتقول لي بصي...اكيد بيقولوا حاجة، قال وانا اللي كنت باخدها على عقلها طلع كلامها علمي 

6 comments:

اقصوصه said...

حلوه حياة النمل

كلها جد وعمل ومثابره

مب احنا

مالت علينا :)

77Math. said...

كل نملة وانتِ سكرة

Anonymous said...

أكتشاف علمي جديد
دي معلومة قديمة فحت
النمل والطير ولحيوانت كلها بتتكلم
والي يقرأ القرأن يعرف
بس مين يفهم

صاصا شوشه

Anonymous said...

"فتبسم من قولها ضاحكا,قال ربى اوزعنى على ان اشكر نعمتك التى انعمت على وعلى والدى صدق اللة العظيم"

Anonymous said...

دي الآية غير إنها ما اتقراتش
ما اتسمعتش أصلاً
وبأت تريأة واستظراف وخلاص

Dornen said...

النمل مدرسة لوحده

من المواضيع اللي بحبها جدا حروب النمل


انصحك تكتبي مسرحية عن النمل يا نوارة, شكلك فاهماه كويس