Friday 27 February 2009

أنا هديت دلوقت واعرف اتكلم بخصوص الوثيقة

خلاص مش ح اقول اخص ولا حاجة :)
طبعا انا عارفة ان فيه حالة يأس مسيطرة على البشريات، وفيه ناس بتقول: وايه الفايدة، يعني افرض مليون واحد وقعوا على الوثيقة دي، افرض خمسين مليون، ميت مليون، مليار واحد وقعوا
خلاص؟ كده اسرائيل ح تتفكك بكرة الصبح؟ وللا حتى كمان سنة وللا باين لها تفكيك اصلا؟
هو من حيث باين لها تفكيك، باين، وباين قوي، مافيش دولة توصل الى هذا المستوى من اللا اخلاقية والفساد لدرجة تدمير الافراد اللي فيها نفسيا واخلاقيا بالطريقة دي الا وبتنهار، دي اسرائيل دي حتة فسلة، مش اجدع يعني من الامبراطورية الرومانية اللي ما وقعهاش غير الفساد والدموية لدرجة انهم وصلوا لدرجة من الدموية انهم بقوا يستمتعوا بمنظر العبيد وهم بيموتوا بعض والوحوش وهي بتلتهم البني ادمين ويتضايقوا من العبد لو موت العبد التاني على طول ويفضلوا يصرخوا عشان يعذب فيه شوية واللي ادى لسقوطهم مش الافعال المشينة دي، ولكن استمتاع المواطن العادي اللي مفروض انه زيي وزيك بالافعال دي واعتبارها حاجة لذيذة
انظر الشكل
نيجي بقى للازمة الوثيقة ولازمة التوقيع عليها
اسرائيل دلوقت تحولت الى ثابت من ثوابت المجتمع الدولي وبناء عليه بيتم تبرير كل المذابح اللي بتحصل في فلسطين عشان حماس تعهدت بمسح اسرائيل من على الخريطة
وعليه بيتم حصار ومقاطعة كل الدول اللي مش عايزة تعترف بما يمسمى "حق" اسرائيل في الوجود
طيب زي ما سبق وقلت مش عيب انك تتعلم من اعدائك اذا كانوا ناجحين وانت لا مؤاخذة فاشل، العيب انك تفضل فاشل وترضى بالفشل وتسلم لهم باللي سرقوه منك، صح؟
طيب فكرة الدولة اليهودية دي كانت مش على بال حد خالص، وطرحها في حد ذاته ما كانش مقبول بتاتا، الدنيا كلها كانت بتكره اليهود ما عدا احنا (اه والله العظيم عمرنا ما عملنا لهم اي حاجة وحشة دول كانوا متدلعين عندنا اخر دلع)، زي ما كل الدنيا كلها بتكرهنا دلوقت بما فيهم احنا، وزي ما انا مش عارفة هي الناس بتكرهنا ليه انا برضه مش عارفة هي الناس كانت بتكرههم ليه لما كانوا ما بيعملوش حاجة ولما بدوا يقتلوا في الناس الدنيا بقت تحبهم!!!!! عجايب والله
المهم ما علينا، اول حاجة اتعملت انهم ابتدوا يطرحوا فكرة الدولة اليهودية علنا، وهرتزل كتب كتاب الدولة اليهودية يقنع فيه اوروبا ان فكرة الدولة اليهودية دي فكرة مغذية ومفيدة لكل الاطفال الحلوين اللي بيسمعوا الكلام وبيشربوا اللبن، طرحها بجرأة ونشرها وبعدين ابتدا يشتغل، ليه كتبها بالجرأة دي عشان يعمل اهتزاز في الرأي العام اللي كان مجمع على عدم قبول الدولة اليهودية، بحيث ان يحصل انقسام وسط الناس، ناس تقول ممكن وناس تقول مش ممكن ويتحول الثابت الى مسألة خلافية (في كتابه الدولة اليهودية حمل هرتزل بشدة على اليهود المعارضين لفكرة الدولة اليهودية وقال بالرغم من كثرة عددهم بين اليهود الا ان شعبنا مسيرة يقتنع بجدوى الدولة اليهودية...اسمع علك تستفيد)، لحد ما دلوقت بقى الثابت ان اسرائيل موجودة ومافيش خلاف عالمي على ما يسمى "بحقها" في الوجود، اللهم الا احنا واحمدي نجاد، وحتى الناس اللي متضايقة من وجودها بتتعامل معاها على انها بقت امر واقع وهي بتلعب على فكرة ان الوقت في صالحها وكل سنة بتعدي عليها وهي موجودة بيخلي الناس تقبل بوجودها وخلاص بقى ادي الله وادي حكمته
فهمتوا مني وللا اشرح تاني؟
تاني مرة عشان البيه
لما تكتب وثيقة بعنوان: تفكيك اسرائيل ويتجمع عليها توقيعات كتير قوي ده ح يلفت النظر للوثيقة ام عنوان غريب دي
زي مثلا ما العالم كله التفت للوثيقة التركية اللي اتجمع عليها مليون توقيع عشان الاعتذار للارمن
كده انت اولا كسرت تابو فكرة ان اسرائيل لازم تبقى موجودة وان ماحدش معترض على وجودها غير محور الشر اللي بديول وقرون
وده ح يدفع للخطوة التانية ان الناس تقرا الوثيقة
لما تقرا الوثيقة وتلاقيها معتمدة على القوانين الدولية اللي الرأي العام العالمي بيلجأ ليها عشان يبرر جرايم اسرائيل ده ح يحرج الرأي العام العالمي ويخليه يفكر
على فكرة فيه واحدة على ماي سبيس قالت لي انتوا مش محترمين، عايزين الناس تعمل لكوا كل حاجة وانتوا قاعدين على المؤخرة
وده جزء من كراهية الراي العام العالمي لينا، اننا مش محترمين، يعني انا مش ح اقولها اه احنا مش محترمين انا دافعت وجبت مصارينها بالادب، بس بيني وبينكوا
احنا بالطريقة دي مش محترمين خالص، الكلام ده من اسرار العيلة يعني، اللي يقول لنا انتوا مش محترمين نقول له لا احنا محترمين وكدهون يعني، مش تروح تقول لهم اه والله احنا ناس رمة
المشكلة مش في الحكومات يا جدعان والله العظيم، لان الحكومات دي بتبقى من اختيار الشعوب، وعلى فكرة  مش صحيح ان الحكومات العربية لا تمثل الشعوب العربية، احنا صحيح ما انتخبنهاش، بس مبارك مثلا يائس ومتخاذل زينا، حكومات الخليج همها تكويم الفلوس زي شعوبها حتى حكومة لبنان منقسمة زي ما اللبنانيين منقسمين...إلخ، مش عايزة اخبط في الباقيين عشان التخبيط ح يبقى جامد قوي خلينا في الخفيف خفيف
يعني المشكلة الحقيقة في الرأي العام العالمي، وسيبكوا من ناتورا كارتا وتشومسكي وسليتر والناس القليلة اللي صوتها عالي
هم بس صوتهم عالي، لكن استطلاعات الرأي كلها بتقول ان الرأي العام العالمي كله داعم لاسرائيل وان المتضررين من الصراع ماهماش ضد اسرائيل ولا حاجة، هم بس مش عايزين مشاكل
فيه تابوهين اساسيين لازم يتكسروا مرة والى الابد: فكرة حق اسرائيل في الوجود
لازم تبقى مسألة خلافية، مش ممكن ابدا تفضل كده من الثوابت، وماحدش يقدر يعمل كده غيرنا، على قد ما نسيط لفكرة تفكيك اسرائيل على قد ما ده يهز الرأي العام العالمي
التابو التاني فكرة ان المقاومة ارهاب، يعني حتى اللي بيدافعوا عن المقاومة بيقولوا: ماهي اسرائيل اللي بتدفعهم انهم يعملوا كده
!!!!!!!!!!!!
لا
الطريقة دي في الكلام لازم تتغير، او على الاقل تبقى مسألة خلافية
لما عملت المقارنة ما بين جورج واشنطن وحزب الله وحماس (انا عارفة ان المقارنة دي تنطوي على تنازل من جانبي بس التنازل لازم يتوزن بميزان حساس شوية) ونشرتها على كل حتة بما فيها ماي سبيس وموقع اوباما، في الاول ناس دخلت وقالت لي: انت بتهزري؟ ازاي تتكلمي كده
بعد شوية ناس دخلت تقول ايوة ماهو جورج واشنطن كان في نظر الانجليز ارهابي
بعد شوية ناس تانية ما صدقت (امريكان سود وامريكان اصليين) وكأن البوست ده جالهم نجدة قالوا: على الاقل حماس وحزب الله من اهل البلد لكن واشنطن وانجلترا كانوا اتنين حرامية بيتخانقوا على سريقة
وبكده التنازل اللي عملته في الاول من حيث اني قارنت واشنطن اللي فعلا حرامي بناس بتدافع عن بلدها اللي جدودهم فيها من الاف السنين اترد، واترد بشكل احسن من لو كنت انا اللي قلتها
فهمتوا قصدي ايه؟
انا عايزة مليون توقيع على الوثيقة دي، لو مش ح اجيبه منكوا ح اجيبه من اليهود اللي ضد الصهيونية والايرانيين وانشالله من الصين، ح الف الدنيا كلها على النت لحد ما اجيب اللي انا عايزاه، بس دايما الاسبق بياخد اجر الاسبق دنيا واخرة
http://www.petitiononline.com/ttwpdi/petition.html

36 comments:

Anonymous said...

أحبك يا نوارة وأحب تحليلاتك المقنعة وتأحب تفاؤلك اللى بلا شطأن بس لو أعرف المعين اللى بتجيبى منه الأمل ده فين؟

Unknown said...

من ربنا
:)

مواطن مصري said...

ب النسبة لمقارنة حزب الله و حماس طبعاً حزب الله يفرق كتيررررررررررررررررررررررررررر عن حماس على الاقل بيلعب سياسة صح و بيخطط قبل ما يدخل أي معركة و مش متسرع و أمكنياتة أفضل من حماس و مش عاوز سلطة زي حماس


المشكل بقى يا نوارة أن غلطة حماس انها خلت الصراع صراع ديني طائفي

بمعني شوفي أي حد في الشارع عمال يدعي على اليهود في كل مكان

ودة غلط لآن أكيد فية يهود شرفاء و رافضين اسرائيل زي الحاخام الي راح ايران بنسى اسمة

و ايضاً يحزني أن بعض المساجد بتشتم و تكفر الامسيحين الغربين و التعميم غلط لآن فية مسيحين في اوربا ميعرفوش اسرائيل فين اساسا و فية متعاطفين مع فلسطين ايضاً

حاجة كمان لو حماس استمرت انها تصارع فتح و اتمنى انها توصل ل اتفاق مع فتح و مصالحة

و لو أستمرت ايضا في الصراع ديني طائفي يبقى مفيش فايدة و هيبدلو بنظام نازي بنازين تانين بس في صورة مسلمين و يحاربو مسيحين و و اللعبة متخلصش


الصراع مش ديني عشان المفروض الكل يشارك فية بغض النظر عن دينهم يهود او مسيحين او مسلمين

ولا اية يا نوارة

احساس لسه حى said...

عزيزتى

مع انى مش بقتنع لموضوع التوقيعات دى

بس وقعت وروحت وقعت

مش عارف هى البلاوى اللى بتعملها اسرائيل محتاجه توقيع

هما فى الغرب مش بيشوفوا وبيفهموا ولا ايه بالضبط


سلاااام

رحلتنا في الحياة said...

30 توقيع علشان خاطر عيونك وان شاء الله
وان شاء الله هشوف ايميلات تانية واعمل توقيع اكتر مش تزعلى نفسك

Unknown said...

ايوة

كويس قوي انك اثرتي النقطة دي

اولا: لا مش بيشوفوا

ثانيا: مغسول مخهم بغباء

ثالثا: نسبة كبيرة في امريكا بالذات مقتنعة بحكاية لازم يبنوا اسرائيل عشان تموتنا وبعدين المسيح ينزل يموتهم
حاجة كده مش مستوعباها لانها مش موجودة في العقيدة المسيحية اللي عندنا هنا في العالم العربي

رابعا: فيه منهم سعيد بالقوة
اقصد يعني حاسس بالعزة واننا شوية بهايم وهم بيخلونا نتحضر

خامسا: فيه كتير محتقرينا وبيقولوا ما معناه: اذا هم يعني قفوات كده احنا نتعب نفسنا ليه؟

سادسا: حطي في بالك ان المنظومة الاخلاقية اللي بتحكمنا مختلفة عنهم في حاجات كتير
هم فعلا مقتنعين ان البقاء للاقوى وان ما معناه يعني ربنا ما يساعدش اللي مش بيساعد نفسه

سابعا: انا لاحظت حاجة
لما بتجامليهم بيقلوا ادبهم ولما بتقلي ادبك عليهم بيتأدبوا

مش فاهمة دي بتبقى نابعة منين بالظبط

حسن على said...

نوارة الفصيحة بت اللذين تكتب بمنظور زرقاء اليمامة و وول ديورانت مجتمعين ... بدأت بالامبراطورية الرومانية وانتهت بدور المدونات فى صناعة الرأى العام ... وتقول عن ذلك (من ربنا)وهو طبعا كدة ولكن... ولكن اللة يلقى بنورة ويقينة فى قلوب عبادة المخلصين المسكونين بهموم البسطاء المقهورين . وتستحق نوارة-بت اللذينة-جائزة تبسيط العلوم- لأنها تقول اشياء معقدة بطريقة غاية فى البساطة والعذوبةوخفة الدم والاقناع وهى نحلة لاتهداء ولاتكف عن افراز العسل وفى نفس الوقت تلدغ الفاسدين والمزيفين والعملاء بشجاعة يقف دونها "العصبة من الرجال"

Unknown said...

لا والنبي انا مش قد الدلع ده
:)

حسن على said...

" سابعا: انا لاحظت حاجة
لما بتجامليهم بيقلوا ادبهم ولما بتقلي ادبك عليهم بيتأدبوا

مش فاهمة دي بتبقى نابعة منين بالظبط" النقطة دى يشرحها البيت اللى بيقول: ووضع الندى فى موضع السيف بالعلا مضر كوضع السيف فى موضع الندى فأن انت اكرمت الكريم ملكتة وان انت اكرمت اللئيم تمردا

Anonymous said...

يا رب يكرمك يا نوارة- مكنتش عارفة انام من الغيظ و كنت بتخانق و بزعق و زينات تهدينى والعيال يقولوا لى فيه ايه يا ماما بسبب عريضة التوقيعات - ايه السلبية اللى احنا فيها دى - الشباب شهر بيشتغلوا و بنحاول ننجز شئ كبير و بنبدأ من الصفر و الصهاينة اللى و لا يتعدوا و لا هم شئ بيوقعوا يمئات الالاف و احنا كل واحد قاعد - زى ما نوارة قالت- و مش قادر حتى يتنازل و يتكرم و يوقع علشان العدد يكبر و نقدر نتكلم بصوت اعلى و بناس ورانا موقعة
كل كلمة قلتيها صح و هديتينى شوية بعد ما كنت شايطة من البرود بتاع الناس - ايمان بدوى

احمد سعيد said...

ايييييييييييوة
لا فض فوك والله
انتى كده فاهمه اللعبه صح
شوفتى لما بتهدى وتركزى يتوصلى ازاى
مشكلتك انك بتتنرفزى كتير و الترموستات بتاعك عايز
شويه ظبط
يهدى شويه
مش كدة احسن؟؟؟

أكون أو لا أكون said...

وقعت مرتين...
: )
من ايميلين مختلفين...
سأضع اللينك في مدونتي...

منصــــــــــــورين إن شـــــــــــــــاء الله

Unknown said...

تحية كبيرة ليكى
أ/ نوارة

و الصراحة انا استفدت بشده من تدوينتك ديه
عرفتنى حاجات تاريخية كثير

شكراً ليكى
-----
بس نصيحة ليكى
سيبك مننا و ركزى شغلك على

اليهود اللي ضد الصهيونية والايرانيين وانشالله من الصين،

احنا هوبل سكاس خالص
مفيش اى امل فينا
ما هو لما حضرتك تبقى بتبحثى عن توقيعات لتفكيك اسرائيل و زكريا عزمى الله يكحمه يقول ان تصدير الغاز لإسرائيل ليس عيباً عشان بينا اتفاقية سلام
يبقى ساعتها اعرفى اننا لا امل فينا و لا جديد تحت الشمس و لا تحت كشك السجاير حتى

انا بقول الكلام ده من غلبى بس
لكن طبعاً انا ححاول على قد ما اقدر نشر الوثيقة

و ربنا يعينك يارب

مواطن مصري said...

نوارة انتي لية مش بتشاركي في الايكونميست.؟؟؟

الخبر دةبيتكلم عن الانتخبات و فية اخبار تانية عن غزة
http://www.economist.com/world/mideast-africa/displaystory.cfm?story_id=13059924&mode=comment&intent=readBottom

مهندس مصري بيحب مصر said...

الله ينور عليكي
و أهو كل واحد يعمل اللي يقدر عليه
يحط بانر الوثيقة عنده في مدونته و يربطه بلنك مكان الو ثيقة
و يبعت لكل اللي عرفهم على جميع إيميلاته و على الفيس بوك و لكل معارفه على النت علشان يوقعوا الوثيقة
هرتزل بدأ يحلم بإسرائيل سنة 1898 م
و اتحققت سنة 1948م
يعني بعد 50 سنة
و مشوار الألف ميل بيبدأ بخطوة

مهندس مصري بيحب مصر said...

يا مواطن
علاقة حماس بمسيحين فلسطين سمنة على عسل و حبايب و زي الفل
فبلاش إختراعات الله يكرمك

مواطن مصري said...

يا مهندس اذا كان بعض الاسلامين متطرفين عاوزين يعاملو المسيحين اكنهة مواطنين من الدرجة الثانية


خليك واقعي

مهندس مصري بيحب مصر said...

يا بني هات لي تصريح واحد صدر من حماس ضد المسيحين
او شكوى واحدة من المسيحين الفلسطينين من حماس

ثم مين قال ان حماس مسؤولة عن كل الإسلاميين اللي في الدنيا
حماس مش مسؤولة غير عن نفسها و تصريحاتها و افعالها هي بس

خليك انت دقيق و محدد في كلامك
و بلاش تلخبط ابو قرش على ابو قرشين

Anonymous said...

نوارة انا عايزة اقولك حاجة بس متقوليش عليا هبلة,,,دلوقتي انا دخلت اوقع لقيت ناس موقعة باول حرف من اسمها بس وواحد كاتب زيكو وواحد كاتب رابسو وتلت تربع الناس مش كاتبة بلادهم...دلوقتي انا بعلق في مدونة مش مهم اسمي,,لكن لما اعلق علي وثيقة علي الاقل اعرف اسمي واكتبه بدل ما الناس تتضحك عليا

ثانيا شكرا علي الامل لواحدة يائسة من عشيتها
ثالثا ليفني بتتكلم عربي فعلا لانها كانت متنكرة وعاملة خدامة وسممت يحي المشد العالم النووي العراقي
:(
رابعا متشغليش وقتك بعمرو خالد ده عشان متديهوش اكبر من حجمه..كان فيه في رواية زقاق المدق شخصية زيطة صانع العاهات,مرة دخل عليه واحد لابس نضيف وبهيبة كده,,وقاله عاوزك تعملي عاهة عشان اشحت بيها قاله ليه؟ما انتا كده الناس هتشوفك فهتديك الفلوس لوحدها:(

Anonymous said...

" من إسرائيل إلى فلسطين .. جوانب استراتيجية في معركة العودة ."



تحدث في بدايتها عن إسرائيل بشكل من التفصيل الأنثروبولوجي حيث يقول :



" إسرائيل لا جدال مسخ اصطناعي بحت ، بدأ ابنا غير شرعي لبريطانيا , ونما لقيطا لأمريكا , ويشب الآن ربيبا لفرنسا "ونجد أن الدول الثلاث التي ذكرها جمال حمدان دول كبرى كل منها دولة استعمارية . ويستمر في حديثة عن إسرائيل قائلا : " إذا كان وجودها برمته خطيئة سياسية , فان كيانها هو خطأ جغرافي ، وفضيحة اقتصادية , ويكفى أن ننظر إلى نسيجها البشرى المهلهل لنعرف مدى التناقضات الداخلية التي تمزقها ، فلا نكاد نعرف في العالم أجمع دولة أكثر خلاسية وتخليطا من إسرائيل . "



يشير جمال حمدان إلى اليهود الذين هاجرو ا إليها منذ مايو 1948



حتى يونيو 1961 وأن هؤلاء المهاجرون ينتمون وحدهم إلى 79 دولة من قارات وأطراف العالم .... فهي بوضوح – على حد تعبيره – متحف جنسي , وبرج بابل لغوى , وبالوعة اجتماعية . إنها وان كانت دولة دينية عنصرية صرفة , فليس كمثلها دولة أقليات في العالم .



ويستمر في حديثة عن إسرائيل حيث يقول :



" إن جسم إسرائيل أبعد ما يكون عن الانسجام أو التماسك داخليا , وقابل للتصدع عند أي قلقلة." وعندما تحدث عنها من الناحية الاقتصادية قال :



" ليست إسرائيل سخرية اقتصادية فحسب بل هي فضيحة اقتصادية كاملة , فمعروف كيف إنها تستمد أغلب ميزانيتها ودخلها من الخارج , ومعروف كيف هي لا تصدر إلا كسرا ضئيلا مما تستورد . حتى أصبح ميزان مدفوعاتها مثلا فريدا في الاختلال وحتى أصبحت علما على دولة العجز . كذلك معروف أنها لا تكفى نفسها بنفسها في الغذاء أو حتى في الخامات والضروريات فهي في حكم المريض المزمن . الذي يعيش على الحقن الصناعية التي تنذر بان تنقطع عنه بالتدريج . ذلك إذا، بناء ممزقا مليئا بالثغرات يقدم على أرض واهية قد امتلاء بالثقوب . وبعد كل هذا الكلام يتساءل حمدان هل معنى هذا أن إسرائيل تحمل في كيانها جرثومة فنائها ؟"



يقول الدكتور جمال حمدان :"إن من حسن حظنا – يقصد العرب – في معركة المستقبل أن إسرائيل التي تتفاخر في قحة بغزوها للصحراء وتعميرها للنقب .. ليست في الحقيقة إلا قوقعة ضئيلة الحجم تتشرنق على نفسها في تكاتف نسبى كبير . فأولاً يترك العمران الصهيوني 60% من مساحة فلسطين المحتلة صحراء كاملة في النقب رغم وجود بعض المستعمرات على أطرافه الشمالية ولكن هل بعد هذا ينتشر الدخلاء على بقية الرقعة ؟ لا شك أن شذوذ ( دولة الشذوذ السياسي ) يصل إلى قمته في نمط العمران ؛ فقد أتى السرطان الاسرائيلى هنا ، سرطانا مدنيا تماما فكأمة – بل طائفة – خلاسية من طفيلات المدن بلا جذور بيئية , أتى الاستعمار الصهيوني لفلسطين ظاهرة مدنية بدرجة صارخة فليس يعرف العالم دولة قزمية يعيش 76% من سكانها في المدن إلا في إسرائيل فهي بهذا ثالثة دول العالم في نسبة حياة المدن بعد اسكتلندا ثم انجلترا وويلز."

ويؤكد الدكتور جمال حمدان عن أن تلك النسبة قد ارتفعت إلى 84% ومعنى هذا ببساطة أن إسرائيل ليست في الحقيقة إلا مدينة شيطانية ضخمة تجمعت فيها حثالة مدن العالم , وأن المدينة الإسرائيلية ليست إلا استقطابا لحارات اليهود في العالم . ابتداء من( الملة) المغربية إلى (القاع) اليمنى ومن حارة اليهود الألمانية إلى (الجيتو) الأوربي .. وإسرائيل بهذا ليست في مجموعها إلا( دولة الجيتو) .

BeLiEvEr said...

انا فاكر ان من آخر البوستات اللى كنت بعلق عليها قبل ما الواحد يغيب الفترة الكبيرة دى، كان لما حماس انقلبت على السلطة فى غزة
و فاكر ازاى ان احنا كنا بنقول يا جماعة عيب اللى انتو بتعملوه ده، دانتو فلسطينيين زى بعض، و ان كل واحد غيهم عمل عنتر على التانى، و طلعوا رشاشات و دبابات و وحاجات، متعرفيش بتستخبى فين لما الإسرائيليين يهجموا

المهم، انا فاكر ان الموضوع اتقلب، حتى فى التغليقات، ان حماس احسن من فتح، لأ فتح أحسن من حماس.
و كله نسى ان المشكلة فى الأصل انهم بيضربوا بعض
و لسه الناس لغاية دلوقتى برضة مش قادرين يشوفوا الموضوع بنظرة اوسع

مشكلة اسرائيل يا سادة مش انهم يهود و بيحربونا علشان احنا مسلمين، لأنهم عاشوا زى ما نوارة بتقول اكتر من الف سنة بين المسلمين ، و كانوا مدلعين آخر دلع.

الموضوع ان اسرائيل دولة عنصرية، عنصريتها دى مبنية على ايدولوجية قومية، مش دينية.
و اعتقد ان النقطة دى كانت واضحة جدا فى اول الصراع العربى الإسرائيلى، لو اتفرجنا على افلام، و او قرينا مقالات ، و سمعنا خطب، حنلاقى دايما الكلام عن الدولة الصهيونية، مش الدولة اليهودية، لأن كان فيه فصل واضح بين الموضوعين.

اول مسمار فى نعش اسرائيل، هو فضحها قدام العالم انها "دولة عنصرية"زعايزين نكسب العالم فى صفنا نتكلم بلغته، مش بلغتنا.

بس للأسف، احنا حنعرف نتكلم ازاى، اذا كنا احنا نفسنا ابتدينا نتحول لدول عنصرية فاشية

Sosso said...
This comment has been removed by the author.
Sosso said...

ya nawwara choti dee?
http://www.elbadeel.net/index.php?option=com_content&task=view&id=46927&Itemid=1
Homma haybi3ou echa3b kaman ?? eh elgholb da?
ahou fee etar el3awlama ha5as5asou esha3b elmasry.

Unknown said...

شطوره كده من غير اخصات
(:

انا اديت اللينك لواحده ايرانيه بلوجر بردو اعرفها
مضت عليها وهتنشرها عندها
وعندي كام واحد تركي هبعتهالهم ان شاء الله

سـهـيـر زكــي said...

عزيزتي نوارة

انا بحييّ فيكي إصرارك على المضي قدما في قضية إنتي مقتنعة و مؤمنة بيها من غير ما تيأسي أو يصيبك الإحباط

خليكي كده دايما وأوعى تتغيّري

بس لسّة واخدة على خاطري منك في حكاية العسكري العنصري أبو بريهة وتنازلك عن حقّك يوميها بالقسم, إنتي كدة (من وجهة نظري المتواضعة) تنازلتي مش بس عن حقك, إنتي تخليتي عن مبدأ وعن ناس كان ممكن يمرّوا بالمستقبل بنفس الموقف إلّي إنتي مرّيتي بيه ويمكن أكتر

سلام

جـــــــر شـكـــــــل said...

جزاك الله عنا خيراً

محمد حمدي said...

حوارى معاكى يوم حفل توقيع كتابك فى اسكندريه نزل على بلوجرز تايمز

على اللينك ده

http://bloggers-times.blogspot.com/2009/02/blog-post_27.html

شكرا ليكى

t3ban said...

انا وقعت عربي و انجليزي قبل التهزيء
بس و بعدين هي البتاعة دي حتعملنا اه و لا حتوصلنا لأه
:@

تامر علي said...

مسألة استخدام الإنترنت في تحريك قضية معينة ضرورة وواجب فعلاً .... لكن المسألة مش هاتعدي كونها (عرض) وجهة نظر ومحاولة اكتساب منصفين لقضيتنا ... ويجب أن نعترف ان اليهود يمتلكون زمام الإعلام العالمي وعلى رأسه الإنترنت وفعلاً تواجدهم ووعيهم أعلى منا بكثير ..لكن ده طبعاً لايقلل من واجبنا في استخدام المتاح من أدوات لعرض قضيتنا .... أما مسألة الطموح في شيء أكبر من كده فأعتقد هانبقى غير منطقيين وغير عقلانيين لأن ما يهز اسرائيل فعلاً هو المقاومة الحقيقية وليس مقاومة إعلامية تمتلك هي (كامل) أدواتها .... هذه هي وجهة نظري المتواضعة وشكراً

سكوت هنصوت said...

نوارة انت غيرتي وجهة نظري في العريضة...

صحيح ان انا وقعت لكن ما كنتش مقتنعة بصراحة بجدواها قوي مانا ياما وقعت

عموما لن اكون اقل منك حماسا للحق...(من وجهة نظري بالطبع)

وحتى لو ما عملتش ذرة خلخلة..فعلى الأقل نقول لربنا حاولنا اضعف الإيمان

و نقول لنفسنا حاولنا نكون محترمين..مع اننا فعلا مش محترمين..

ملاحظتك عن قلة ادب الأجانب ولما بنعاملهم بمحلسة وذوق بيتفرعنوا والعكس يتأدبوا فده بيرجع ان الي بيفرض احترامه على الناس بيحترم....والناس كلها تخاف ما تختشيش

انا بعد البوست بتاعك بتاع تفجيرات الحسين

رحت للمارينز الي عندي في الشغل وقلتلهم يا ريت تبلغوا اوباما يقطع المعونة...مش عايزين منكو حاجة..ماهو مش كل يوم هتتسببولنا في مشكلة

بصوا لبعض قوي وتنحوا...وقالولي احنا اول مرة نسمع عن التفسير ده بس تصدقي it makes sense

عموما انا هبدأ اللف على المدونات يا مسهل

حـنــّا السكران said...

شاب مصري يطعن أمريكياً بالسكين في خان الخليلي . و الشرطة المصرية تؤكد ان المواطن قام بفعلته بسبب كرهه للأجانب بعد حرب غزة الأخيرة .. انتهى الخبر .

ـ بدأ عوكل يحصد ما زرعت يداه

و سيكون حصادا مرّاً .

ـ هو عوكل مش أجنبي كمان بنظر المواطنين المصريين ؟؟

عوكل خواجه .. هو و كلّ العواكيل اللي حواليه

مواطن مصري said...

@حنا الي يعمل عمليات ارهابية في بلدة ميبقاش مواطن في البلد دي

الارهاب لا دين لة و هو هيضر البلد و المواطنين


انظر على سبيل المثال العمليات الارهابية في لبنان و العراق و السعودية و الجزائر

حـنــّا السكران said...
This comment has been removed by the author.
حـنــّا السكران said...

ما انا عارف يا مواطن ...
افهم اللي ورا الكلام

انا بقصد ان اسأل و ألفت انتباه لسؤال :

ليه الناس بتوصل للمرجلة دي ؟ خصوصا الناس البسطاء ..مش العقائديين ..

اسأل عوكل ...

ده قصدي من الكلام .. انا مش بروّج للإرهاب يا مواطن ..

انتم ليه مش قادرين تشوفوا من كل حاجة غير قشرها ؟؟

اللي ما حدا لحد هاللحظة .. سأل الناس انتم بقيتوا كده ليه .. انت فاكر الناس رح تبقى كلها عقل و حكمة يا مواطن ؟؟؟ اللي حصل و بيحصل عم يأسس لمصائب كتيرة جاية .. بس ان شاء الله حد يسأل عن الاسباب و يحاول يعالجها و لو مرة وحدة .. مس يسأل عن النتائج و يقول دول ارهابيين .. الصهاينة اللي بيزوروا رئيس بلدك في قصره هم اللي عملوا ارهاب في بلدك قبل شهر .. في بلدك انت مش في فلسطين .. انت فاكر انه الشعب المصري رح يبقى ساكت طول العمر ؟ و رح يبقى عاقل و جميل طول العمر ؟

انت ما حسيت بالذل يا مواطن لان المسألة ما كانت بتهمك لا من قريب و لا من بعيد إلا زيك زي أي حد في شمال او جنوب الكرة الارضية ..بس في ناس كتير شعرت بالذل و العار و القهر اللي لا يحتمل .. و هي شايفة معسكر اعتقال جنبها و ناس بتتقتل بأبشع طريقة و ما حدا بينجدهم و لو بشربة مية .. ناس محطوطين ورار سور كبير و بينقتلوا بالطريقة الوحشية دي ..و احنا مش قادرين لا ندافع عنهم و لا نجبر مولانا يفتح لهم الباب عشان يخرجوا ..
انت فاكر ان كل ده انتهى خلاص ؟؟
يبقى انت مش عارف حاجة يا مواطن ... عوكل رح يدفع أثمان غالية على يد الفقراء المصريين ..و ان ما كان اليوم يبقى بكرا ..ابنه رح يستلم الحساب ..ده عرف الشعوب .و عرف المجرمين اللي زي عوكل .

مواطن مصري said...

عوكل رح يدفع أثمان غالية على يد الفقراء المصريين ..و ان ما كان اليوم يبقى بكرا ..ابنه رح يستلم الحساب ..ده عرف الشعوب .و عرف المجرمين اللي زي عوكل


بدل ما يوجهو الغضب دو لمصر المفروض يوجهو الغضب على اسرائيل هو مين المحتل مصر ولا اسرائيل اكيد اسرائيل مش مصر

simply me said...

انا فى الاول ماكنتش مقتنعه بحكايه الوثيقه دى
وفعلا قولت يعنى احنا هنفكك اسرائيل بالورق مش ممكن طبعا

بس رايك ان الوثيقه دى لتغير مفهوم العالم فى احقيه وجود اسرائيل عاجبنى
وقلت دى فكره كويسه وفعلا قابله للتحقيق

اصل انا مابحبش الشعارات الفارغه

وعشان كده هشارك فيها ولعلها تجيب النتيجه المرجوه

تحياتتى ليكى